مكتبات تسوق in وسط البلد Cairo, Egypt

تسوق

ألوان: أدوات وخامات فنية في وسط البلد
اصدرت في: 19/05/2014

بالرغم من أن نسبة المبدعين في القاهرة بـ تزيد يوم عن الثاني، إلا أن مازالت المحلات اللي بـ توفر الخامات والأدوات الفنية شبه نادرة، يمكن اسم أو اثنين اللي ممكن نفكر فيهم لما نقرر نطلّع البيكاسو اللي نايم جوانا، "ألوان – Alwan" بفرعها الصغير نسبيًا في وسط البلد هـ يوفر لك أي خامة تحتاجها في سبيل الفن. "ألوان" أصبحت قِبلة المبدعين في كل مكان، وانتشرت في أنحاء القاهرة مش بس بفرع وسط البلد، دي كمان لها فروع كثيرة في مدينة نصر، والزمالك ومصر الجديدة والفجالة، وقريبًا في الهرم (يعنى ما لكش حجة، الرك على الموهبة). ألوان بـ تتعامل مع فنانين كبار ومشهورين، فمافيش مجال أنك تأخذ خامة مشكوك فى أصالتها أو جودتها... كل الخامات والدرجات اللونية محفوظة في المخزن اللي في الدور العلوي: من الأبيض الناصع وحتى البني المحروق. وطبعًا الخامات والموهبة مش كفاية: ألوان عندها كل الأدوات اللي هـ تساعدك في الإبداع، من أول الفُرش بمقاساتها المختلفة وحتى أدوات النحت. ده غير الورق، وتوالات الزيت (اللي هي الشاسيهات اللي بـ يترسم عليها وبـ تشوفها في المعارض كلوحات... عارفها دي؟) وإسكتشات بجميع المقاسات علشان أفكارك النيرة ما تهربش منك! هو صحيح فرع وسط البلد صغير، إلا أن بمجرد دخولك هـ تنسى المساحة الضيقة، وهـ تلاقي نفسك أخذت وقت طويل في الفرجة وأنت مش داري من الاستمتاع. القائمين على مساعدتك تحت رهن إشارتك، عارفين كل حاجة فين وبـ تستخدم في إيه وإيه أحسن حاجة في نوعها... لدرجة أننا شكينا أنهم هم كمان فنانين بس مش لاقيين فرصة. زي ما قلنا كل الدرجات اللونية موجودة وفيه جميع الخامات، سواء ألوان مائية واللي مشهورة بشفافيتها، والجواش الأثقل من حيث القوام وطبعًا ألوان الزيت بقوامها الأثقل على الإطلاق، وبما أنها بـ تحتاج جهد في التحضير فهي بالتالي بـ تأخذ وقت في الجفاف، كمان فيه تقريبًا كل الدرجات من البديل الأسهل لألوان الزيت وهي ألوان الأكريليك، واللي بـ تمتاز بسرعة جفافها. مثلًا، أنبوب لون 50 مل سعره (11 جنيه)، بينما العلبة الـ 15 لون سعرها (75 جنيه)، أما العلبة اللي فيها 24 لون (100 جنيه)... العلبة تنفع كهدية لشخص موهوب، أو كنوع من التوفير في سعر الأنبوب الواحد. إسكتش حجم A4 سعره (18 جنيه)، حجم الـ A3 سعره (36 جنيه)، بس خذ بالك أن نوع الورق وسُمكه بـ يفرق في السعر، والاختيار بـ يرجع لنوع الخامة اللي هـ تستخدم لها الإسكتشات دي. بالرغم من ارتفاع الأسعار نسبيًا في ألوان، إلا أننا مستوعبين فكرة ندرة الأماكن اللي بـ توفر الخامات الفنية في القاهرة، وبالتالي ندرة الخامات نفسها. المكان ملىء بكل ما تحتاج لممارسة الفن، وسواء كنت فنان تشكيلي عبقري، أو مجرد هاو مبتدئ هـ تحس داخل المكان إحساس طفل صغير داخل محل لعب.

...

ألوان: محل متخصص ألوان في وسط البلد
اصدرت في: 10/05/2011

أي حد بـ يشتري أدوات رسم في القاهرة٬ عارف انها غالية٬ وأكتر ناس تعرف ده طلبة فنون جميلة. والمشكلة التانية ان المحلات المتخصصة في المنتجات دي قليلة جداً. وسط مجموعة من المكتبات ومحلات الإكسسوار٬ هـ تلاقي محل ألوان بتاع وسط البلد٬ واللي موجود في شارع شريف باشا. مش هـ تشوفه من الزحمة لو ماروحتش قبل كدة٬ فركز في الشارع ودور على الإضاءة اللي في الإزاز الملون اللي عند مدخله. أول ما تدخل هـ تعرف على طول ان المحل بقى له في مكانه ده سنين. وجوه المضياف والدافي هـ يخليك عاوز تستغل كل شبر من المساحة دي واللي مليانة بمنتجات شكلها حلو كتير. المكان ضيق وصغير بس مش لدرجة انه يخنقك. العاملين في المكان مضيافين٬ وبـ يهتموا بالزباين وهـ يساعدوك تلاقي اللي انت عاوزه من غير ما يصربعوك. الإزاز الملون المتعشق في الأرضية جميل جداً وهـ يلهمك في حد ذاته. فيه أدوات مكتبية أساسية كمان٬ أساتيك وأقلام جاف وحبر ورصاص وألوان طباشير ملونة (بتاع الورق). وفيه رف عليه برج ألوان شمع. لو بـ تدور على أدوات رسم٬ المكان ده ملجأك الأول. عندهم أحسن أنواع ألوان في القاهرة بحالها. أغلب الألوان اللي عندهم من ماركة پـ يبيو Pebeo والألوان كتير. وفيه خامات مختلفة٬ جواش بـ16 جنيه للأنبوب الصغيرة٬ وفيه أنابيب كبيرة كمان. الأكليريك أسعاره بين 20 و30 جنيه٬ وده غالي شوية. وفيه ألوان مياه وورنيش. الورق الكارتون بـ يبدأ من 3جنيه٬ وفيه كانسون Canson وموجود جنب رف كراسات الرسم٬ وكراسات الكانسون الصغيرة اللي غلافها مقوى بـ 45 جنيه. فيه كانڤاس (لوحة كتان للرسم) بأحجام مختلفة٬ لو عاوز واحد للرسم بالزيت أو الأكليريك في 26×30 سم بـ9 جنيه وده سعر معقول. ولو بتفضل الكانڤاس يكون مالهوش ضهر ممكن تشتري المتر بـ55 جنيه. المكان يمكن صغير لكنه ضروري جداً لو محتاج أدوات للرسم ولاقي نفسك في مزاج فني وعاوز تبدع.

...

مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول