الزمالك تسوق in Cairo, Egypt

تسوق

ليتشي: فطارك سلاطات وشوفان من خبير العصائر المعروف
اصدرت في: 27/07/2016

في 2012 لما "ليتشيLychee " فتح كان من أوائل الأماكن اللي تفتح بار مخصوص للعصائر والسموزي في القاهرة. أي واحد من المهتمين بالأكل الصحي أكيد طار من الفرحة لما سمع إنهم أضافوا للمنيو بتاعتهم أصناف أكل جديدة، خصوصًا إنها بتقدم أكلات لذيذة وسريعة يستمتعوا بيها مع عصائر وسموزي ليتشي اللي كلنا بنحبها. المكان هنا صغير وتقدر تستمع فيه بأكلات "صحية سريعة". عجبنا شكل المكان واتفرجنا على الصبورات اللي مكتوب عليها أصناف السموزي ومكونات كل واحد منهم. البرطمانات والزجاجات الفاضية المرصوصين فوق أرفف خشبية والصور الصغيرة على الحوائط أكيد أضافوا لشكل المكان المميز. المكان كان مليان على أخره بشباب القاهرة الجميل وهم بيشربوا سموزي ليتشي، وصحيح عندهم دكة صغيرة تكفي من 5-6 أفراد، لكن الأحسن أنك تشتري وتمشي زي معظم محلات العصائر. بدأنا رحلتنا مع سلطة كال واي 'The Kale Way'، واللي وصفتها المنيو بأنها تفاح وفول سوداني مملح وتوت مجفف وتوت أحمر مجفف وخيار وبذور كتان ذهبية وكرنب. في الأول كنا متخيلين إنها خلطة منعشة لذيذة من المكونات الطازة تناسب جو الصيف، لكن السلاطة للأسف كانت بعيدة خالص عن توقعنا. المكونات المهمة اللي بتضيف الطعم المميز للسلطة زي التوت والتفاح والسوداني كانوا قليلين جدًا فطبيعي أن طعمها يطلع عادي. السلطة كمان غير إن مافيش نكهة مميزة كان فيها حاجة مش مريحة. الكرنب مع قطع التفاح كان لازم يتقطعوا أحسن من كده، فكان صعب حتى إننا نأكلهم بالشوكة، أما الخيار فكان متقطع لشريحة طويلة رفيعة، فأكلناها زي السباجيتي. الموضوع مش لطيف خالص يا جماعة. ندخل على الطبق الثاني اللي كان أحسن شوية وطعمه أفضل وهو بريك فاست أوت ميل breakfast oatmeal (40 جنيه). الطبق عبارة عن توت أزرق وموز وبذور شيا واختيارك من حليب اللوز أو حليب خالي الدسم. صحيح إحنا اخترنا حليب اللوز لكن اللي وصل حاجة ثانية، والشوفان – المضاف له شوية مياه – كان سميك القوام وأحسن حاجة إن السكر مضبوط في طعم الأكل. التوت الأزرق المجمد كان مهم علشان يضيف طعم الفاكهة اللذيذ أول لما اختلط وساح مع الشوفان الدافئ، وطبعًا إضافة القرفة للطبق كانت مسك الختام. الطبق فعلًا لذيذ وبيشبع ومليان بروتين ومفيد جدًا للصحة بفضل بذور الشيا وكمية الفاكهة الكبيرة. قررنا نجرب طبق حلو صغير جديد من ليتشي وهو كوكي خالية من الجلوتين (15 جنيه) اللي كانت ناشفة شوية، بس طعمها لذيذ وتشبه فطيرة القرفة. الكوكي ملفوفة في ورقة علشان تأكلها براحتك ومرصوصة على الرف جنب كوكيز بنكهات ثانية، وبكده تقدر تختار أي واحدة على السريع لو كنت جعان. سهل نقول بعد تجربتنا لعصائر وسموزي ليتشي أنهم كسبانين معانا بدون منافس. الكيوي بليند (18 جنيه) كان مسكّر ومنعش، وواضح جدًا إن الكيوي طازة على الأخر. العصائر الجاهزة كان لها نصيب معانا وطلبنا منهم كالمينج جرينز Calming Greens (25 جنيه) وأكيد اسم كالمينج ده له سبب. العصير غير أي حاجة خضراء جربناها في حياتنا، العصير ده بالذات فيه كاموميل -المعروف بخصائصه المهدئة- وتوت أزرق. الأثنين دول ومعاهم شوية أناناس وجزر أضافوا طعم مسكر علشان يقاوم أي نكهة حادقة من الكرنب والجرجير؛ كوكتيل مثالي مافيش كلام. بالنسبة للسموزي قررنا نطلب 'I Love Watermelon' وهو كوكتيل بسيط من البطيخ والنعناع وباشن فروت. زي ما كلنا عارفين إن البطيخ والنعناع كوكتيل محبوب في الشرق الأوسط، بس باشن فروت إزاي؟ الموضوع شكله في شغل عالي يا جماعة؛ تعالوا نشوف! السموزي بشكل عام كان روعة الروعة. مسكر وبيروي عطشك وكمان منعش، ويعتبر المشروب المثلج المثالي لحر الصيف الرهيب. كمان البطيخ المسكّر عمل تناغم رائع مع طعم الباشن فروت اللاذع. بصراحة بعد السموزي ده نقدر نقول إن الباشن فروت هو النصف الثاني للبطيخ، وأكيد نفسك هتروح عليه بعد ما يخلص. على العموم، الشيك كان عامل 168 جنيه، مش بطال طبعًا لو بصينا إن مافيش حد يتوقع من مكان بيبيع عصائر باردة مليانة مكونات أورجانيك ويكون رخيص جدًا. يمكن زعلنا شوية إن في حاجات مش موجودة – زي حليب اللوز – والجرسونات كانوا بيتوهوا شوية، بس الخدمة كانت كويسة مافيش كلام. صحيح في أكلات جديدة مش على المستوى المطلوب، بس مافيش شك إن ليتشي هو أول أخصائي عصائر وسموزي من نوعه.

...

فولي فولي: إكسسوارات حريمي من الفضة وساعات في الزمالك
اصدرت في: 26/05/2016

فيه محلات بتبقى بقالها زمن موجودة وما بنفكرش أننا ندخلها علشان نكتب مقال نقدي عنها؛ يمكن لأننا على طول بنبقى بندوّر على أي مكان جديد يفتح علشان نكتب عنه، من الأماكن اللي طول عمرنا بنعدي عليها ومافكرناش نكتب عنها هي محل الإكسسوارات الحريمي والساعات فولي فولي – Folli Follie في الزمالك. فولي فولي ماركة إكسسوارات حريمي يونانية بدأت نشاطها سنة 1982 ووصلت لمصر سنة 1996 بتسعة فروع مختلفة في أنحاء القاهرة. وبالرغم من أن موديلاتها الغربية تقدري تلاقي زيّها في المحلات العادية، إلا أن ميزة فولي فولي أن القطع كلها مصنوعة من الفضة، وبالتالي القطعة اللي هتشتريها هتعيش معاكي. أول حاجة لفتت نظرنا في المحل كانت مجموعة الشنط الجلدية، واللي لاحظنا أن موديلاتها –كانوا 3 بالعدد- منهم واحدة (400 جنيه) عجبتنا لأن حجمها وبساطة تصميمها عملي بالنسبة لنا؛ فهي عبارة عن شنطة مستطيلة جواها شنطة أصغر من نفس اللون. الشنطة نفسها ما عليهاش أي نوع من أنواع التفاصيل، ولكن واضح أنها أحدث موديل متوفر في القاهرة للماركة لأن كان معروض منها ألوان كثير زي الأخضر والسيمون والأزرق بالإضافة للألوان الكلاسيكية الأسود والأبيض. ثاني حاجة شفناها كانت مجموعة الساعات، واللي كانت محدودة في عدد موديلاتها؛ الموديل الأول كان "أستيكه" من المطاط ومتوفر باللونين الأبيض والأسود. متوفر من الساعات حجمين الأصغر كان بـ 2000 جنيه والأكبر بـ 2500 جنيه. وبنفس الأسعار كان الموديل الثاني وهي ساعات كلها من المعدن وألوانها ما بين الذهبي والذهبي الوردي. كنا بنفكر جديًا نشتري ساعة ولكن فكرة وجود أحجار زجاجية شبه الألماظ في كل الموديلات قفلتنا منها –ده غير السعر اللي ممكن تجيب بيه ساعة ماركتها أقوى. وواضح أن الألماظ كان مكتسح المحل كله، فلاقينا أسورة كلها فصوص سعرها كان 550 جنيه وهي مناسبة لفرح أو سهرة لأن فضتها لامعة قوي. أما الخواتم فأبسط واحد كان على شكل وردة مكونة من أربع ورقات مصنوعة من الصدف سعره (380 جنيه)، الخاتم من الفضة ولكن مطلي باللون الذهبي الوردي. من ضمن مجموعة الخواتم برضه لاقينا واحد عليه وردة من الألماظ، لونه فضي وسعره (320 جنيه). بالرغم من أن فولي فولي ماركة معروفة، إلا أننا شخصيًا ما لناش في الستايل اللي بيقدمه. توقعنا أن يكون فيه موديلات متنوعة أكثر تناسب الأذواق المختلفة ولكن كل اللي لاقيناه كان قطع مرصعة بالألماظ واللي كانت كثير علينا كمحبي القطع البوهيمية. أما عن الأسعار؛ ففيه قطع حسينا أن الأسعار مبالغ فيها ولكن في النهاية فولي فولي ماركة عالمية وده شيء ممكن نتوقعه .

...

تويا: شنط ومحافظ جلد طبيعي في الزمالك
اصدرت في: 30/03/2016

بالرغم من أن الجلد الطبيعي كان هو البطل الأوحد لسنين كثيرة، إلا أن من ساعة ما ظهر الجلد الصناعي وبقيت المنتجات المصنوعة من الجلد الطبيعي شيء نادر وقيم، صحيح للجلد الصناعي مميزات كثيرة هي رخص سعره للمستهلك والمُصنِّع، إلا أن الجلد الطبيعي برضه له جماله، من المحلات اللي كل منتجاتها مصنوعة من الجلد الطبيعي هو تويا – TUYA والموجود في الزمالك. أغلب المحلات اللي لسه متمسكة بالجلد الطبيعي بتبيع لك فكرة أن منتجاتها من الجلد الطبيعي من غير اهتمام بالتصميم؛ يعني تلاقي الجلد ممتاز بس المنتجات موديلاتها من القرون الوسطى، أول حاجة أخذنا بالنا منها في المحل الصغير الموجود في شارع متفرع من 26 يوليو بالزمالك –ناصية كوفي بين أند تي ليف – Coffee Bean and Tea Leaf– أن التصميمات بتتنوع ما بين الموديلات الكلاسيكية اللي ممكن تلبسها مع الـ Formal، والموديلات الجديدة اللي ممكن تلبسها على لبس كاجوال. زي ما قلنا المحل مش كبير، ولكن المجموعة المعروضة متنوعة، ومش كلها مصنوعة من الجلد بس، فيه شنط داخل فيها قماش الـ Canvas، واللي بيتميز بقوة تحمله، من المجموعة اللي ممكن تتلبس على حاجة Formal لاقينا Tote Bag بـ (720 جنيه) واللي بتبقى بسيطة من حيث التصميم: دراعاتها قصيرة ولكن تسمح أنها تتشال على الكتف أما جسم الشنطة نفسه فهو شبه مستطيل، الشنطة من جوه فيها مكان مخصص للموبايل، ومكان ثاني للنظارة وجيب بسوستة، بالرغم من أن نوع الشنط دي بيبقى بسيط وعملي، إلا أن دائمًا بنلاقيها من غير سوستة وبالتالي أي حد ممكن يشوف محتويات الشنطة، ولكن تويا عاملين الشنطة بسوستة وزرار مغناطيسي. ومن ضمن الـ Collection الجديد، فيه مجموعة من الشنط اللي بتتقفل بشريط جلد سميك من فوق مدكك في أطرافها، وهي متوفرة بألوان كثيرة وحجمين (620 و495 جنيه). إحنا شخصيًا بنحب الشنط الكاجوال واللي بتشيل كل احتياجاتنا؛ تويا عنده مجموعة كبيرة من الشنط الكاجوال اللي بتتنوع ما بين اللي بتتشال على الكتف، واللي بتتشال على الظهر، لاقينا واحدة مناسبة جدًا للبحر أغلبها من القماش -ماعدا الذراعين الجلد- متوفر منها ألوان الأزرق والأحمر والبرتقالي بالإضافة لوجود نقشة هندسية بعرض الشنطة باللونين الأبيض والأسود، وبما أن أغلبها من القماش، فسعرها أقل بكثير من أسعار الشنط الثانية (270 جنيه). من نفس الخامة، عجبتنا واحدة لونها زيتي بتتشال على الظهر (550 جنيه)، لأن بالرغم من أن نسبة الجلد بسيطة فيها، إلا أنها متماسكة وصلبة نوعًا ما، وممكن تحط فيها أي حاجة من غير ما تقلق، ولو أنت من النوع اللي ما يعرفش يعيش من غير لابتوب، لاقينا واحدة بتتشال على الظهر لونها بني فاتح كلها من الجلد (980 جنيه) فيها مكان مخصص للابتوب كبير، اللطيف أن الشنط دي تناسب الجنسين. وبما أن الصيف قرب وهتيجي معاه سفريات نهاية الأسبوع، فيه مجموعة من الشنط المصنوعة من القماش والجلد (640 جنيه) مناسبة أنك تروح بها رحلة ليوم أو اثنين أو حتى تروح بها الجيم. تويا برضه عنده مجموعة للشنط الرجالي، ولكن حسينا موديلاتها قديمة شوية، ومجموعة من المحافظ الرجالي والحريمي؛ طبعًا بتختلف الأسعار حسب الحجم والسعر: الحريمي فيه منها واحدة عريضة ولكن عدد جيوبها مش كثير (200 جنيه) أما اللي فيها جيوب أكثر وحجمها أقل من حيث العرض فعجبتنا واحدة بـ 380 جنيه، أما أبسط محفظة رجالي فسعرها 180 جنيه ومتوفر منها ألوان البني والأسود بدرجات مختلفة. إحنا عارفين أن الأسعار دي تعتبر غالية جدًا بالنسبة لأماكن كثيرة، ولكن الجلد الطبيعي عادة سعره بيبقى أغلى، وغير كده مجموعة التصميمات عند تويا حقيقي مختلفة عن معظم محلات الجلد الطبيعي اللي دخلناها قبل كده.

...

الشريف بوتيه: عطور وأدوات تجميل وإكسسوارات في الزمالك
اصدرت في: 17/02/2016

من المحلات اللي بـ نحاول على قد ما نقدر أننا نبعد عنها حفاظًا على سلامة المحفظة هي محلات العطور والماكياج؛ كل حاجة مغرية في المحلات دي، ده غير أن كل منتج –بالذات الماكياج- له ملحقاته ومكملاته اللي بـ تستخدم معاه علشان اللوك يبقى Perfect، بـ نتمنى أنهم في المستقبل يصنعوا منتج بـ يعمل كل حاجة بدل البهدلة اللي المحفظة بـ تتبهدلها معانا. في شارع المرعشلي في الزمالك فتح محل عطور وماكياج جديد اسمه الشريف بوتيه – Al Sharif Beauté، وبغض النظر عن الاسم، مجرد ما لمحنا من الواجهة الزجاجية الـ Stands الخاصة بالماكياج بدون تفكير قررنا ندخل، المحل مش كبير كعادة المحلات اللي من النوع ده، وبالتالي عدد الـ Stands ستة لماركات أسعارها معقولة زي Bourjois الفرنسية، Jordana الأمريكية، Deborah الإيطالية (اللي كان لها 3 ستاند لوحدها) وماركة العناية بالأظافر السويسرية Mavala، استغربنا أن المحل مش موجود فيه الماركات العالمية الكبيرة زيDior أو Chanel، واللي ممكن تلاقي صدى في منطقة الزمالك. بالرغم من أن فيه منتجات مالهاش Testers زي درجة الروݘ اللي كنا بـ ندور عليه، إلا أن القائمة على الخدمة حاولت بقدر الإمكان أنها تلاقي لنا أقرب درجة لون لهTester علشان نجربه، الخدمة هناك ممتازة وخصوصًا أن القائمين على خدمة البيع بـ يعطوا لنا مساحتنا في الجولة، ولكن على أتم الاستعداد أنهم يساعدوا في أي وقت. عجبنا من Bourjois الكحل السائل واللي متوفر منه أقلام تشبه الـ Markers، أو الشكل المعتاد (زجاجة وريشة) والنوع الثاني كان سعره (85 جنيه)، أما من مجموعة Deborah فلاحظنا أن مجموعة الروݘات كبيرة ومتنوعة بحسب خط الإنتاج، فمنها بالشكل العادي (90 جنيه) بألوان كلاسيكية ومنها أقلام أطول نسبيًا (شبه أٌقلام الألوان) سعرهم (50 جنيه) بـ تتميز بأن ألوانها مواكبة للموضة أكثر. الدور الثاني للمحل فيه مجموعة كبيرة من العطور الرجالي والحريمي: تقريبًا كل الماركات والأسعار موجودة هناك من أول S.T. Dupont، on كل الماركات والأسعار موجودة هناك من أول الرجالي والحريمي، وواجهة فيها عدد كبير من الإكسسوارات الفضة السويسرية، وPaco Rabanne بـ (50 جنيه) وحتى عطر المصمم Karl Lagerfeld، في نفس الدور فيه مجموعة من الإكسسوارات المصنوعة من الفضة السويسري، واللي تصميماتها أغلبها فيها أحجار شبه الألماس ولمعان الفضة نفسها يشبه الذهب الأبيض، الأسعار أكيد بـ تختلف باختلاف تصميم وحجم القطعة، إلا أن سعر القطعة الصغيرة زي حلق بسيط مثلًا ممكن تعمل 105 جنيه. بجانب الكاشير فيه Stand لمجموعة من الساعات ماركاتFossil وCK: عجبنا من الرجالي ساعة Fossil معدنية ضخمة لونها فضي سعرها 1395 جنيه، ومن الحريمي ساعةCK ذهبي "أوستيكها" الذهبي الرفيع شبه الإسورة سعرها كان 2975 جنيه. المحل كمان بـ يقدم عروض كثيرة وممكن توفر لك في مناسبات مختلفة زي عيد الحب وعيد الأم، وبعكس أماكن كثيرة الشريف بوتيه قدم لنا Tester عطر Burberry The Beat مع مشتراياتنا مع أننا اشترينا حاجة واحدة.

...

جاليري ألف: سلطنة زمان في الزمالك
اصدرت في: 24/11/2015

الفن: مش كل جاليري بـ يقدم تحف تتعلق وبس.. مش كل جاليري علق مجموعة لوح يبقى اسمه جاليري.. مش لحاجة نقدر نقول عليها فن.. قبل ما نتكلم عن المكان لازم نقول أن الفن حالة مختلفة.. حالة بـ تخليك تحس بكل حاجة حولك.. وتشوفها من منظور ثاني.. تشوفها بعين الروح.. يعني الفن الحقيقي هو اللي له 3 علامات: يجدد روحك ويحسسك بالسعادة، يقدم معنى قايم على قيمة حقيقية، يكون فيه جديد للعين والعقل والقلب.. حتى لو مستوحى من التراث. الجاليري: يا ترى يعني إيه جاليري؟ واشمعنى الاسم ده انتشر الفترة الأخيرة في حياتنا الفنية والثقافية؟ مش هـ نطول عليكم إحنا جرينا على عم جوجل وسألناه.. إيه الموضوع.. فقال لنا: الجاليري هو البهو اللى فيه أعمدة.. أو صالة عرض لبيع الآثار الفنية.. والجاليري يا سادة.. مع أنه اسم أجنبي لكنه بالفعل متماشي جدًا مع الحالة اللى بـ نتكلم فيها.. هو بـ يجمع بين فكرة البهو (الصالة الواسعة في القصور) واللى فيها أعمدة فنية.. وبـ يجمع كمان فكرة صالة بيع الآثار الفنية.. وفكرة المعرض.. يعني كلمة فنية من ساسها لراسها.. وعلشان كده بـ نحاول نشوف ألف بـ تعمل إيه فى الفن. ألف: صالة واسعة جدًا ومكان أصلًا عبارة عن تحفة.. جنب بوابة دخول فندق هيلتون في الزمالك.. من أول باب الجاليري هـ تحس أنك انتقلت لعالم مختلف تمامًا، عالم كده فيه حالة من "السلطنة" بتاعة زمان.. داخل المكان هـ تلاقي اختصار للجمال والفن.. في كل ركن مستخدمين حاجة.. في كل حتة هـ تشوف جمال اللوح والسجاد والتحف بأشكالها المختلفة وكمان بعض الأثاث المنزلي.. لكنه مش زي أي أثاث دي حالة كده بـ تقول إحنا مش بـ نعمل أي حاجة.. إحنا عاوزين نقدم الفن على أصوله.. صراحة هـ تنبهر من جمال التحف هناك.. كل حاجة معمولة بمقاس محدد وبشروط جمالية واضحة جدًا والناس كمان هناك مهذبين جدًا.. عارفين أن اللى بـ يدخل المكان عاشق للفن في المقام الأول.. علشان كده بـ يعاملوه بشكل مهذب ومحترم وبـ يجاوبوا على كل الأسئلة.. ألف معرض تاريخي بصورة معاصرة.. فكرته قايمة على تقديم المشروعات الفنية الجاهزة.. وكمان التصميم الداخلي للشقق والمنازل والفنادق والبوتيكات بحثًا عن البصمة التاريخية... وعندهم فريق من المخططين والمهندسين المعماريين ومصممي الديكور الداخلي، وهدفهم صناعة صيغة فنية مستوحاة تاريخيًا علشان يعملوا حالة من النهضة الثقافية.

...

جاليرى أشرقت: جاليري الفكرة بصناعة يدوي في الزمالك
اصدرت في: 16/11/2015

الفكرة: "إحنا مش تجار إحنا صحاب فكرة".. دي أول جملة سمعناها من مدام أشجان بدير صاحبة المكان.. إحنا روحنا سألنا عادي عن الجاليري لما شدنا شكله.. وقررنا ندخل نتفرج عن المكان ونكتب عنه.. طب إيه الفكرة؟ الفكرة بقى أنهم بـ يعيدوا تشكيل التراث.. كل التراث المصري يطلع بشكل جديد.. وكمان يطلع بره مصر علشان يتعرفوا على التراث المصري الأصيل. أشجان وماريان: مدام أشجان هي صاحبة المكان وهي محامية أصلًا لكنها عاشقة للتراث.. واشتغلت مصممة ملابس واتخصصت فترة في العبايات الخليجي وشغل الخيامية.. ومن هنا تطور الموضوع معاها علشان تعمل جاليري بصبغة إسلامي وعربي واخدة من التراث روحه.. ومن الفن العصري الخامات والتقنية الحديثة.. يعني شغل حديث بطابع التراث والمهم أنه مصري أصيل. ماريان بقى هي مديرة الجاليري اللى تخرجت من كلية الفنون الجميلة وفاهمة كل حتة في المكان.. وعارفه تاريخها واتعملت من إيه وبـ ترجع لأي عصر من العصور، وكمان اتعملت إزاي. أشرقت: المكان واسع من جوه وفي المدخل فيه حديقة صغيرة معمولة بشكل حلو.. والشكل من بره كله عبارة عن شغل أرابيسك.. وتقريبًا كل حاجة في المكان معمولة يدوي.. وتعالوا نشوف المكان: هـ تلاقوا لوح للمستشرقين مرسومة بأيد مصريين، وسفرة معمولة أرابيسك.. هما بـ يبيعوا فكرة مش منتج.. يعني بـ يبيعوا لشخص هـ يعيش التراث ويرتبط بالتاريخ أكثر.. هو مزج بين المودرن والعربي، هناك هـ تشوفوا إزاي ممكن تجهزوا بيتكم بتحف وتعيشوا معاها وكمان بخامات عالية.. فيه كمان مطبخ كله معمول من الخشب وشغله هايل ومساحته جيدة جدًا.. وفيه سفرة معمولة برسومات على الخشب.. وكراسي وخداديات.. وطبق فخار ملون معمول من الطين الأسواني وكمان مدهون بمادة طبية علشان لما يدخل الفرن يبقى الأكل صحي وغير ضار..أما الترابيزات هناك.. فمعمولة من طبق نجمي معمول يدوي ودي حاجة عبقرية من الفن الإسلامي بـ تتركب جزء جزء لحد ما يعطيك الشكل الهندسي الإسلامي.. وكمان هـ تلاقوا هناك أطباق زجاج مطعمة بالنحاس.. والبراويز كمان معمولة صناعة يدوي بالحفر على الخشب.. وفيه سحارات وكنب عربي بشكل جديد.. غير النجف اللي معمول إما على شكل مشكاة عربي أو فانوس عربي.. وممكن كمان تكتب عليه آية أو اسمك واسم اللي تحبه.. وفيه بقى غير اللوحات.. معلقات اسمها فن الكف.. فيها رسومات يدوية برضه لبيوت وأولاد وبنات من النوبة.. تنفع تزين بها بيتك.. من الآخر المكان حلو ومحتاج زيارة.

...

ميكسي: ملابس مختلفة عن ماركات المولات في الزمالك
اصدرت في: 09/11/2015

كثير كنا بـ نتكلم عن أن الزمالك محلات الملابس فيها تتعد على الصوابع بعكس المطاعم ومحلات الحلويات؛ إلا أن بدأت تنتشر البوتيكات اللي بـ تبيع ملابس مستوردة بعيدًا عن الماركات المنتشرة في مولات مصر، من ضمن المحلات دي ميكسي – Mexy في الزمالك. المحل المكوَن من دورين مساحته ما تخرجش بره حيز 2.5×2.5 متر، وبالتالي التشكيلة الموزعة على حوالي أربع ريونات (شماعات) محتاجة صبر وتدقيق وأنت بـ تتفرجي عليهم، وبما أننا قربنا على الشتاء، فالتشكيلة الجديدة سيطر عليها الـSweatshirts والبلوفرات الخفيفة، واللي بصراحة ما ننكرش أنها كانت السبب الرئيسي أننا ندخل نلقي نظرة على المحل. مجموعة البلوفرات الخفيفة شكلها مبهج بألوانها اللي تنوعت ما بين اللون الوردي والأزرق الفاتح؛ إلا أن اللي عجبنا فيهم هو مجموعة الرسومات الموجودة عليها بشكل مكرر؛ واحد منهم عليه رسمة موتوسيكل عجبنا فيه أن ألوانها هي كمان مبهجة ومتماشية بشكل عام مع التصميم الكلي للقطعة، المجموعة دي أسعارها 250 و280 جنيه. وبما أن الكيمونو كان موضة الصيفين اللي فاتوا، فطبيعي أنه يكمل معانا في الشتاء؛ ميكسي كان عارض منهم مجموعة شتوية خامتها من الصوف الثقيل وعليها نقوش هندسية (300 جنيه). بالرغم من أن خامتها مناسبة إلى حد كبير للشتاء اللي بـ نشوفه في مصر، إلا أن ما عجبناش ألوانها اللي غلب عليها ألوان صريحة زي الأخضر والأحمر مع اللون الأسود، ده غير أن ثقل الخامة ما حسيناهوش لايق على الشراشيب الرفيعة الموجودة في أطراف الكيمونو –واللي لو كانت من نفس خامة الكيمونو كانت ممكن تخلي المنظر أحسن شوية. مجموعة الصيف كان عليها خصومات؛ من ضمنها مجموعة من البنطلونات الـ Harem المنقوشين، سعرها بعد الخصم (100 جنيه). الدور العلوي كان فيه عدد من فساتين كوكتيل، والإكسسوارت والأحذية؛ لاحظنا أن الإكسسوارات والأحذية تشبه لحد كبير المجموعات الموجودة في بقية البوتيكات الموجودة في القاهرة منهم حذاء بدون رباط لونه فضي لامع ماركة Chiara Ferragni، على كل فردة عين سعره (750 جنيه). بالرغم من أننا عندنا قناعة تامة أن أحيانًا أسعار المعروضات في البوتيكات بـ يبقى مبالغ فيها حبتين، إلا أن الميزة الكبيرة اللي بـ تقدمها محلات زي ميكسي أن المعروضات بـ تختلف اختلاف كبير عن ملابس المحلات المشهورة والمنتشرة في مولات القاهرة.

...

أفريكانو جاليري: محل إكسسوارات بيت وهدايا من بلاد بعيدة في الزمالك
اصدرت في: 01/11/2015

من ضمن الحاجات اللي بـ تميز القاهرة عن أي مدينة ثانية في مصر-واحتمال كبير عن أي مدينة ثانية في العالم كله- أنك هـ تلاقي فيها كل حاجة. تقريبًا ما بقاش فيه حاجة مش موجودة في العالم مش موجودة هنا في القاهرة. من أول مطاعم المطابخ الغريبة ومحلات الملابس وحتى محلات إكسسورات البيت؛ من ضمن النوعية الأخيرة من المحلات صادفنا أفريكانو جاليري - Africano Gallery في الزمالك. موقع المحل وشكله الخارجي الغريب هو اللي شدنا أننا ندخله؛ المحل موجود في الدور الأول بمجموعة سلالم جانبية منفصلة عن مدخل المبنى الرئيسي، أما فاترينة العرض الكبيرة، فمعروض فيها مجموعة كبيرة من التحف المتنوعة ما بين الستايل الأفريقي، الهندي وحتى الكلاسيكي. أما ديكور المحل من الداخل بسيط –المكوّن من مستويين بـ يفصل ما بينهم مجموعة من السلالم- لأنه معتمد في الأساس على غرابة المعروضات الموجودة فيه. المستوى الأول من المحل مخصص بشكل أساسي لعرض الهدايا والإكسسوارات الحريمي والرجالي، فعلى ترابيزة في الركن معروض بشكل عشوائي مجموعة من الأعقاد الهندية المصنوعة يدويًا من الخرز الملون بألوان زاهية (110 جنيه)، ومن نفس الخامة والبلد مجموعة من الأساور القماش (85 جنيه) –واللي بالصدفة شفناها في جاليري ثاني في الزمالك بـ تتباع بـ 350 جنيه. أما الإكسسوارات الرجالي واللي تنوعت ما بين سلاسل معلق فيها أشكال معدنية –زي الجماجم وخلافه- (15 جنيه)، وسلاسل مفاتيح مصنوعة من أنياب بلاستيكية (10 جنيه)، فدول وبلا منازع أسوأ حاجة شفناها في المحل، مش بس لأن جودتها سيئة، ده لأن حتى ذوقها عجيب. في المستوى الثاني من المكان فيه التحف وقطع الديكور؛ لفت نظرنا مجموعة من المعلقات الهندية، واللي بـ تشبه لحد الكبير الـ Dream Catchers، ولكن في صورة سلاسل من الأفيال والأجراز الصغيرة، عجبنا الصغير منهم (65 جنيه)، ومجموعة Wind Chimes خشبية -اللي بـ تطلع أصوات بمرور الهواء فيهم - مصنوعة في تايلاند وأسعارها بـ تختلف حسب الحجم (الصغير منهم بـ 125 جنيه). أفريكانو جاليري عارض مجموعة كبيرة من الأباجورات أغلبها مصنوعة من الخشب والنحاس؛ من الخامة الأولى عجبنا أباجورة من تايلاند، منحوتة على شكل رأس فيل (275 جنيه)، لدقة النحت وفي نفس الوقت القطعة محتفظة بلون خشبها الخام. أما الأباجورات النحاس فهي تشبه الأنتيك، ولكن للأسف في نسخته الرخيصة؛ من ضمن المجموعة دي وحدتين -الواحدة فيهم عبارة عن تمثال لحاملة شعلة- سعر الاثنين مع بعض (350 جنيه). على قد ما انبهرنا بالشكل العام للمحل، ما ابهرتناش المعروضات اللي كان فيه مجموعة كبيرة منهم منتشرة في محلات الهدايا؛ زي الماسكات الأفريقي والـ Wind Chimes. ولكن ما ننكرش أن وسط عدد كبير من المعروضات الكليشيه هـ تلاقي حاجة أو اثنين مختلفين بجد.

...

إم بي ثري: محل ملابس داخلية في الزمالك
اصدرت في: 19/09/2015

عادة بـ يبقى صعب علينا ككتاب مقالات نقدية عن أماكن التسوق أننا ندخل المحل، نفضل نقلب في المعروضات ونسأل عن أدق تفاصيلها بجانب السؤال البديهي "بكام ده لو سمحت؟" علشان بعدها نقول "شكرًا" ببساطة ونلف ونخرج ولا كأن أي حاجة حصلت... ده في المحلات العادية، فما بالكم شعورنا وإحنا داخلين محل ملابس داخلية لمجرد العلم بالشيء؟ بما أن الشغل شغل، استجمعنا شجاعتنا وقررنا ندخل محل إم بي ثري – MB3 للملابس الداخلية في الزمالك، وبالرغم من أن المحل بـ يضم ملابس حريمي ورجالي وأطفال، إلا أن المحل مافيهوش غير رجل واحد لكل المهام، وده ممكن يسبب نوع من الحرج لبعض الزبائن من الستات. بدأنا بالقسم الحريمي، والمواجه للباب؛ أول مجموعة صادفناها كانت فانلات قطن بجميع الأشكال والألوان، خامتها ثقيلة نوعًا ما كملابس داخلية في الجو ده، كل موديل نازل منه أبيض، وألوان ومنقوش، سعر الفانلة بدون أكمام للألوان والمنقوش (37 جنيه)، أما الأبيض فسعرها (35 جنيه) وهو سعر ما فرقش كثير عن أسعار أماكن ثانية، مع نفس المجموعة معروض Leggings، الأبيض (55 جنيه) والألوان والمنقوش (60 جنيه)، إم بي ثري عندهم مجموعة كبيرة من الملابس الداخلية التحتية الحريمي المنقوشة (20 جنيه). قسم الأطفال هو الأصغر في المحل، وغلبت عليه الملابس الداخلية الولادي، واللي تميزت برسومات لشخصيات كارتونية وخصوصًا على البوكسرات اللي سعرها (13 جنيه). غالبَا إم بي ثري اهتمامه الأكبر منصب على الملابس الداخلية الرجالي، واللي كان متوفر منها كمية كبيرة، ما عرفناش نسأل لكم على سعر البوكسرات لأن القائم على الخدمة في المكان استنكر سؤالنا عن سعر الفانلات الداخلية -البيضاء بدون أكمام (37 جنيه) للأبيض و(40 جنيه) للألوان- واللي قعد يكرر لنا جملة "دي رجالي يا فندم"، أومال لو كنا اشترينا بوكسر كان هـ يعمل إيه؟ الحقيقة أن المعروضات موديلاتها ما استهويتناش، واللي معظم نقشاتها غريبة على ذوقنا، إلا أن أكثر حاجة عجبتنا كانت مجموعة الفوط والبشاكير اللي عارضينها، واللي ألوانها بـ تتميز بأنها مبهجة، الفوط أحجامها بـ تختلف: البشكير (70 جنيه)، الفوطة المتوسطة (50 جنيه)، فوط اليد لها حجمين: المربع (10 جنيه) والمستطيلة (15 جنيه). أما البُرنس فسعر الواحد (300 جنيه). قبل ما نخرج من المحل، أخذنا كتالوج مجاني فيه جميع المنتجات اللي المحل بـ يعرضها، وعلى ظهره اكتشفنا أن إم بي ثري عنده فروع كثيرة جدًا في القاهرة والمحافظات، ومش بس كده ده كمان له فرعين في السودان، عامة مبروك عليهم النجاح، بس يا رب ما يتحفوناش بحملات دعاية تليفزيونية مبتذلة زي شركات ثانية.

...

ديكسيت: ماركة الملابس الحريمي العالمية في الزمالك
اصدرت في: 31/08/2015

بالرغم من أن الزمالك بدأ ينتشر فيها محلات للملابس، إلا أن عددها عمره ما هـ يتفوق على عدد المطاعم ومحلات الحلويات الموجودة تقريبًا في كل شارع هناك، من ضمن محلات الملابس الموجودة في الزمالك هي ديكسيت – Dixit في اليمامة سنتر. بعكس الفرع اللي كان موجود في شارع محيي الدين أبو العز، المحل الموجود في الدور الأرضي ديكوراته بسيطة جدًا، أو تكاد معدومة... مجرد مجموعة من الشماعات والأرفف اللي بـ تؤدي غرض عرض المنتجات وكان بها؛ وفيما عدا ذلك كل حاجة ثانية لونها أبيض بياض ناصع من أول الحوائط حتى الأرضيات، بالرغم من أن فيه معروضات كثيرة كان عليها تخفيض وقت زيارتنا، إلا أن واجهة المحل ما عليهاش أي حاجة توضح ده. أول مجموعة صادفتنا كانت بنطلونات Jeggings -وهي عبارة عن بنطلونات leggings بس جينز- لونها أسود وسعرها (135 جنيه)، وبنطلونات leggings قماش، حسينا أنها ثقيلة نوعًا ما على الصيف متوفر منها اللون الرمادي (225 جنيه). مجموعة الصيف كانت أكثرها فساتين قصيرة مطاطية باللون الأسود، من كثر ما هم شبه بعضهم ما علقش معنا منهم غير واحد بسيط بنصف كم وديكولتيه مستدير، أسعار الفساتين بـ تتراوح مابين 225 – 350 جنيه حسب الموديل. المحل مقسم لمستويين: الدور الثاني كان فيه مجموعة من الجينزات الفاتحة اللي قصتها مستقيمة (225 جنيه)، ومعها مجموعة كبيرة من البلوزات المنقوشة بالورود قصاتهم مختلفة... اللي بأزرار وتشبه لحد كبير للقمصان واللي بفتحة رقبة مستديرة وكمها يصل لحد المرفق أسعارهم (350 جنيه)؛ بالرغم من أننا بـ نحب أي حاجة منقوشة، إلا أننا حسينا أن قماشتهم خشنة وثقيلة ده غير أن النقوشات المطبوعة تفاصيلها كثيرة ومتعبة للعين. بعكسهم كان فيه بلوزة قطن بيضاء بأكمام، الجزء الأمامي منها كان منقط بالأسود (135 جنيه)، حسينا أن قماشتها الخفيفة مناسبة للصيف والحر اللي إحنا فيه ده، بالرغم من أننا ما حسيناش أن فيه قطعة مميزة في المحل تخلينا نطلع المحفظة بقلب جامد ونصرف، إلا أن شدنا كارديان طويل وبكُم لونه أبيض وعليه نقشة زهور باللون البنفسجي، تصميمه بسيط وتفاصيل النقشة حلّته أكثر. حتى الآن مش عارفين سر اختيار ديكسيت لموقعه الميت في اليمامة سنتر، وحتى موقعه الأول في محيي الدين أبو العز كان بعيد تمامًا عن أي منافسة لأنه كان المحل الوحيد في المنطقة، ممكن يكون الاختيار ده نابع من أن موديلاته وجودة ملابسه ممكن ما تقدرش تصمد أمام طوفان الماركات الثانية الأكثر شبابية... وده في حد ذاته ذكاء منهم.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا