أثاث ومستلزمات منزل تسوق in الزمالك Cairo, Egypt

تسوق

شابي شيك شوب: إكسسوارات منزلية وأثاث لمحبي الطراز العتيق فى الزمالك
اصدرت في: 28/01/2015

ستايل الخمسينات العتيق أو الـ Vintage له محبين كثير، لأنه بـ يتميز بتفاصيله الكثيرة وألوانه الباستل الفاتحة زي الوردي والزهري، ده غير أنه مشهور بنقشة الورود والـ Polka Dots. محلات كثير للديكور بدأت في عرض قطعة أو اثنين لمحبي الستايل ده، ولكن أغلب القطع بـ تبقى منفذة بشكل عصري. شابي شيك شوب – Shabby Chic Shop في الزمالك متخصص في الطراز ده من الألف للياء. بالرغم من أن قطع الأثاث المعروضة محدودة، إلا أن المحل على أتم الاستعداد أنه ينفذ للعميل أي قطعة هو عاوزها، يكفي أنك تقدم لهم صورة وتختار اللون وهم هـ يعملوا الباقي. من ضمن القطع المعروضة سرير حوالي 2X2 متر ظهره تصميمه بسيط فيه حلية على الجوانب ومدهون باللاكيه الأبيض (7100 جنيه)، كونسول عريض لونه أخضر فاتح، مقابضه لونها ذهبي (5500 جنيه)، جسم الكونسول له درجين كبار، وودرج ثالث عبارة عن لوح خشبي ممكن يستخدم كمسند للكتابة. غير أن شكل الأثاث الخارجي ممتاز، التنفيذ والاهتمام بالتفاصيل واضح في القطع المختلفة. من ضمن القطع الأخرى، واللي شكلها كان غريب بالنسبة لنا نصف كونسول معلق على الحائط، ممكن يستخدم كرف لو هـ يتعلق أعلى من مستوى الترابيزات، لونه أخضر فاتح وفيه درج صغير في وسطه (1700 جنيه). المحل بـ يعرض مجموعة كبيرة من الخداديات المنقوشة بنقشات مختلفة أغلبيتها للورود. وهي نوعين: الأول مربع مقاسه حوالي 30X30 سم، قماشه مصري وسعره (169 جنيه) أما النوع المستورد فحجمه أعرض حوالي 25x50 سم وسعره بـ يوصل لـ 550 جنيه، وده كان سعر واحدة عليها صورة مجموعة من البنات بملابس البحر، النوع الثاني قماشته كانت أنعم نوعًا ما، ولكن فضلنا النوع المصري لأن نقشات قماشه كانت أحلى. شابي شيك شوب بـ يعرض الأقمشه المصري المستخدمه في الخداديات دي، وأغلبها من القطن، سعر المتر منها (200 جنيه)، واللي ممكن تستخدم كمان في أي قطعة أثاث يحب يعملها العميل. شابي شيك شوب عنده مجموعتين من ورق الحائط: الأول نوعه كلاسيكي واللي بـ يحتاج المادة اللاصقة الخاصة به وسعر الرول منه (350 جنيه)، أما النوع الثاني فهو من الفينيلVinyl وهو بـ يبقى عامل زي الستيكر وأسهل في التركيب سعره (358 جنيه) للرول الواحد. مجموعة الأطباق والأكواب كلها ماركة دنماركية اسمها Greengate، وبلا شك ده السبب أن سعر أي قطعة غالي جدًا عن أي مكان ثاني، مثلًا الفناجيل الصغيرة سعرها بـ يتراوح بين 129: 149 جنيه للقطعة الواحدة، عجبنا منها أخضر منقط بالأبيض. أما المجات اللي حجمها أكبر فكانت بـ (194 جنيه)، سعر الطبق المتوسط في الحجم (220 جنيه). طبعًا بلا شك خامتهم وشكلهم ممتاز ولكن أسعارهم مبالغ فيهم جدًا. شابي شيك شوب مكان مجتمع فيه كل اللي تحتاجه علشان تعمل ركن عتيق خاص في البيت، ومش بس كده ممكن كمان تضيف لمستك على الستايل وكل حاجة هـ تتعمل على مزاجك.

...

صندوق الدنيا: كل ما هو أنيق وعتيق في الزمالك
اصدرت في: 11/01/2015

كتابة مقال نقدي عن محلات الأنتيكات فكرة مرعبة بالنسبة لنا؛ بـ يتهيأ لنا دائمًا أننا هـ نكسر حاجة هناك وإحنا بـ نتفرج. يمكن علشان معظم محلات الأنتيكات في مصر بـ تبقى فيها المعروضات –اللي عادة بـ تبقى غالية- متكتلة جانب بعضها، ومستنية كوعك يخبط فيها علشان تقع وتتكسر. بس عمر ما خوفنا وقفنا أننا نقوم بواجبنا تجاه أصحاب مزاج الأنتيكات في القاهرة، وعلشان كده قررنا أننا نروح صندوق الدنيا في الزمالك. صندوق الدنيا كان فاتح قبله جاليري فني مشهور اسمه خان المغربي؛ واللي ما زارش المكان ده قبل كده المحل موجود تحت الأرض بـ تنزله بمجموعة سلالم. وعلشان ما تعملش زيّنا وتخض المسؤولة عن البيع، رن الجرس اللي موجود على الشمال قبل ما تحاول تفتح الباب المعدني بنفسك لأنه مقفول. المهم بعد سلسلة اعتذارات عن تسببنا في خضة، أخذنا جولة في المكان واللي لحسن حظنا مرتب بالرغم من حجمه الصغير نسبيًا –هو عبارة عن حجرتين مفتوحين على بعض- على الحوائط مُعلقة مجموعة من اللوحات اللي تنوعت بين خامة الزيت وحتى الحفر. بالرغم من أننا لاحظنا أن فيه عناية في اختيار اللوحات، لأن معظمها مميز، إلا أننا لاحظنا أن فيه لوحتين بالألوان المائية للفنان الكبير الحسين فوزي بـ تصور سيدات ريفية أهميتها الوحيدة هي إمضاء الفنان الراحل، لأنها مافيهاش أسلوبه اللي اشتهر به. من ضمن المعلقات برضه مجموعتين من أطباق البورسلين، طريقة عرضهم مغرية أنك تأخذهم كلهم وأنت مروح. معظمهم مرسوم عليهم باللون الأزرق المشهور، أو عليهم رسوم نباتية عتيقة؛ الوحيد اللي تميز فيهم هو طبق إنجليزي الصنع مستخدم اللون البني المائل للرمادي في رسم منظر طبيعي عليه (350 جنيه). من المعروضات الموجود منها بكثرة هي النجف؛ من ضمن المجموعة الكبيرة اللي معظمها من النحاس والنحاس المتأكسد لفت نظرنا اثنين اختلفوا عن الباقي. الأولى كانت من الخشب الغامق شكلها بسيط وحجمها صغير (2500 جنيه)، وبنفس سعرها الثانية اللي أجزاءها الرئيسية مصنوعة من البورسلين الملون بالأخضر والبرتقالي. الأباجورات عددها قليل نسبيًا، إلا أن أكثر واحدة مميزة فيهم من النحاس، والشابو لونه أحمر مزخرف باللون الأصفر (2500 جنيه). آخر قطعة عجبتنا كانت قطعة أثاث إنجليزي قديمة عبارة عن ستاند خشبي له ترابيزة مثبت فيه مرآة وسعره (3000 جنيه). أجمل حاجة في صندوق الدنيا هو العناية الشديدة في اختيار القطع، واللي معظمها مش بس قيمتها في شكلها الجمالي أو قدمها، ده كمان في جودة حالتها.

...

كارافان سراي: أثاث وإكسسوارات مستوحاة من التراث المصري في الزمالك
اصدرت في: 01/11/2014

معظم الناس لما تيجي تختار فرش بيتها بـ تميل للطابع المودرن الأوربي لبساطته وكونه عملي في نفس الوقت، فطبيعي جدًا أن المودرن هو اللي يكون له نصيب الأسد في معارض الأثاث في القاهرة. في رأينا أن المودرن عيبه الوحيد أن العين تعودت عليه فبالنسبة لنا كله بقى واحد وبلا هوية مميزة، "كارافان سراي – Caravanserai" في الزمالك هو واحد من الأماكن النادرة اللي قدرت أنها توظف عملية المودرن وبساطته في تصميمات مستوحاة من التراث المصري. من أول ما دخلنا المحل وإحنا في حالة انبهار كامل، حسينا أننا عاوزين نأخذ معانا أي حاجة البيت. في الواجهة الخارجية معروض غرفة طعام لونها رمادي فاتح جدًا مائل للبيج مكون من ترابيزة لأربعة أفراد؛ على جانبي سطحها زخارف هندسية شبيهة بالزخارف الإسلامية من نفس اللون (8500 جنيه). أما الكراسي فهي من نفس اللون وشبيهة بكراسي القهاوي مع اختلاف بسيط في الظهر اللي على شكل حرف X ولكن باستدارة خفيفة (900 جنيه للواحد). وضح لنا القائم على خدمة البيع أن الكراسي دي مش من مصنع كارافان سراي، وأن كراسي مصنعهم سعرها أغلى. ثاني قطعة لفتت نظرنا كانت مكتبة من نفس شكل غرفة الطعام الأولى (12.500 جنيه) أبعادها 130 سم للعرض وارتفاعها 180 سم، وبالرغم من حجمها الصغير إلا أن مساحات التخزين فيها متنوعة سواء أدراج لها مقابض معدنية أو أرفف لأحجام الكتب المختلفة. وحدات الإضاءة من المعروضات الموجودة بكثرة، في رأينا أن وحدات الإضاءة الرئيسية ما كانتش مميزة زي الوحدات الجانبية والأبليكات، لأن الأولى مكررة من حيث الشكل وشفنا منها كثير في أماكن ثانية أرخص، أما الأبليكات المصنوعة من النحاس أو النحاس المطلي بالنيكل فكانت هي الأحسن ضمن المجموعة؛ عجبنا منها وحدة صغيرة الحجم أسطوانية من النحاس المفرغ على الطراز الإسلامي (450 جنيه)، ووحدة ثانية مستطيلة الشكل وأكبر من نفس طراز الأولى (900 جنيه). آخر وحدة إضاءة عجبتنا كانت من النحاس المطلي بالنيكل، وهي عبارة عن عمود متوج بأسطوانة مفرغة الزخارف (2600 جنيه). مجموعة المرايات المستديرة اللي ممكن يُعلق منها عدد كبير بشكل عشوائي على الحائط كانت آخر حاجة في جولتنا، وعلى عكس أغلبية المعروضات، كان فيها طابع شعبي أكثر منه إسلامي منها مرآة إطارها عليه طيور، واثنين إطارهم بسيط جدًا ولكن بـ يزينه وحدة زخرفية ممكن تُعلق منها المرآة على الحائط (900 جنيه). أكبرهم كانت بزخارف إسلامية مفرغة سعرها (2050 جنيه). طبعًا لا جدال على أن الأسعار مرتفعة نسبيًا، ولكن حقيقي التصميمات والقطع مختلفة جدًا عن أي مكان ثاني إحنا روحناه، وأحلى ما فيها أنها مستوحاة من تراثنا المصري.

...

بوني آرت جاليري: مشغولات يدوية إثنية في الزمالك
اصدرت في: 27/10/2014

وسط عدد كبير من الجاليريهات الفخمة الموجودة في الزمالك، بوني آرت جاليري - Boné Art Gallery بـ يعرض مجموعة من المنتجات الخشبية والجلدية الإثنية بأسعار معقولة. واجهة المحل الزجاجية مليئة بالمعروضات، واللي في حد ذاتها مليئة بالتفاصيل؛ وبما أن المنتجات معظمها جلدية وخشبية، اللون البني بدرجاته غلب على المكان حتى أعلى الواجهة اللي عليها اللوجو بحروف معدنية كبيرة. المكان نفسه من الداخل مساحته محدودة، ولكن المعروضات كانت منظمة وفيه مساحة كافية أنك تتجول في المكان من غير ما توقع حاجة في سكتك بالغلط. أول مجموعتين لفتوا نظرنا كانت من الشنط الحريمي المصنوعة في إندونيسيا؛ الأولى شنط مناسبة للتسوق: حجمها المستطيل كبير وخامتها خفيفة، مرسوم عليها أفيال باللون البرتقالي على خلفية سوداء (60 جنيه)، أما المجموعة الثانية فذراعها قصيرة عليها نفس الأفيال، بحجم أصغر وخامة أثقل، لاحظنا أن تفاصيل المجموعة الثانية أكثر والشنط نفسها أثقل بالرغم من حجمها (75 جنيه). من نفس المنتجات الجلدية الإندونيسية، لاقينا مجموعة من المحافظ بأحجام مختلفة، منها الصغير والبسيط واللي يكفي النقود المعدنية (30 جنيه)، أما الأحجام الأكبر فمعظمها من الـ Patchwork بألوان مختلفة من الجلد وأسعارها بـ تتراوح بين (65 – 80 جنيه). المعروضات الخشبية معظمها من التماثيل بأحجام مختلفة. في وسط المحل مجموعة متنوعة من التماثيل الإفريقية والآسيوية، عجبنا منها تمثال بوذا المنحوت بالكامل من خشب الورد، وهو متوفر في ثلاثة أحجام: الصغير، ارتفاعه حوالي 30 سم (1100 جنيه)، أما الحجم الأكبر واللي ارتفاعه تقريبًا 50 سم (2500 جنيه)، من نفس المجموعة دي كرسي خشبي منحوت على شكل كف (800 جنيه). من ضمن المعروضات الخشبية، مجموعة من الـ Wind Chimes (المُعلقات اللي بـ تطلع صوت لما تفتح الباب في المحلات)، أصغر حجم منها سعره (80 جنيه) ولها طابع أفريقي. أما آخر مجموعة لفتت نظرنا كانت مرايا مستديرة مُزينة برسوم فلكية، منها الصغير قطرها -حوالي 25 سم- (45 جنيه)، أما الأكبر منها -حوالي 35 سم- فسعرها (60 جنيه). المعروضات كثيرة ولا نهائية، والشخص القائم على مساعدتك لطيف جدًا. يمكن يكون المحل مش بفخامة الجاليريهات الثانية الموجودة في الزمالك، ولكن ده ما يمنعش أنك ممكن تلاقي فيه قطعة أو اثنين مميزين.

...

لو برينس: إكسسوارات منزلية مختلفة بالزمالك
اصدرت في: 23/09/2014

محلات الديكور وإكسسوارات المنزل في الزمالك كان بقالها فترة منحصرة بين مدرستين فقط؛ إما قطع كلاسيكية وأنتيك، أو قطع بوهيمية مجنونة. ولكن بعد وجود محل زي لو برينس في الزمالك الموضوع توازن شوية، وخصوصًا أنه بـ يقدم مجموعة متنوعة من المعروضات اللي بـ تناسب الأشخاص اللي عايزين ذوق في الوسط ما بين المدرستين اللي لسه ذاكرينهم. مدخل المحل مليء بوحدات الإضاءة المختلفة، سواء أباجورات أو أبليكات تُعلق على الحائط: من النوع الأول عجبنا واحدة مستطيلة من الخشب الداكن المفرغة من المنتصف. لازم نوضح هنا أن أي أباجورة -زي المايوه البكيني- بـ تتكون من قطعتين كل واحدة منهم لها سعر: الشابوه الدائري الكريمي البسيط (570 جنيه) ووحدة الإضاءة نفسها (685 جنيه). من القطع المميزة برضه أباجورة كاملة من الزجاج (1050 جنيه) أما الشابوه (345 جنيه). من الأبليكات لاقينا وِحدة مزدوجة، بالرغم من بساطتها إلا أنها كلاسيكية نوعًا ما ولونها ذهبي سعرها (845 جنيه) قماش شابوهاتها طبعته Scottish لونه أحمر وسعر الواحد منهم (95 جنيه). أما الأبليك الفردي من نفس الشكل سعره (530 جنيه) بنفس سعر الشابوه للوحدة اللي قبلها. من القطع اللي شفناها كانت ترابيزة بيضاء سطحها على شكل صينية سعرها (659 جنيه). إكسسوارات الحمام من المعروضات الموجودة بكثرة في لو برينس؛ منها حمالة فوط على الأرض من المعدن الذهبي، وهي تكفي لحوالي 2-3 فوط (2575 جنيه). ده غير أن فيه عدد كبير من إكسسوارت الحوض زي الصبّانة وخلافه بأشكال متميزة. من الحاجات اللي عجبتنا كانت مجات بزخارف نباتية متداخلة، اللون الغالب فيها هو الذهبي مع الأخضر، الأزرق أو الموف و مجات عليها الـ Scottish Print والاثنين من الماركة الأسكتلندية Dunoon ، سعر المج الواحد (445 جنيه)... أيوه، المج الواحد. لو برينس أيضًا بـ يقدم مجموعة كاملة من الزيوت العطرية للمنزل وفواحات، زجاجة زيت صغيرة برائحة الفانيليا (55 جنيه)، إحنا شخصيًا جربناها وفعلًا تستحق التجربة لو عايز تتخلص من أي روائح مكروهة في البيت أيًا كانت مساحته. للناس اللي بـ تفضل الشموع المعطرة لاقينا واحدة متوسطة الحجم (265 جنيه) بروائح مختلفة منها اللافندر. بغض النظر عن أسعار بعض المعروضات المبالغ فيها، إلا لو برينس فعلًا يستحق الزيارة لو بـ تفكر في حملة تجديد لديكور بيتك.

...

باجوا: أثاث وإكسسوارات منزلية مختلفة في الزمالك
اصدرت في: 12/08/2014

زمان، وبالذات في مصر، أي شخص بـ يجهز بيته كان بـ يهتم بثوابت محددة في الفرش والديكور، زي مثلًا الصالون الكلاسيكي للضيوف -واللي غالبًا مابـ نفتكرش شكله أصلًا لأنه مغطى بطبقة "بياضات"، وما بـ يتكشفش غير للضيوف. ده غير السفرة الخشب، واللي لازم يكون معها أشهر قطعة أثاث في مصر، ألا وهي "النيش"، واللي بـ تمثل متحف مضغوط لكل مقتنيات أهل البيت، وبغض النظر عن مساحة المكان هـ تسمح أو لأ، لازم يكون فيه الفرش المتعارف عليه... علشان إحنا مش أقل من أي حد ثاني! دلوقت الموضوع اختلف، معظمنا بقى يدوّر على الحلول العملية، ده كمان أصبح فيه انفتاح على فكرة أن أهم حاجة في البيت أنه يكون مريح نفسيًا حتى لو هـ نضطر نكسر ثوابت العصور القديمة، الفكرة دي بـ تؤكد عليها تصميمات "باجوا - Bagua" اللي فتح جديد في الزمالك. مبدئيًا، "باجوا" هي كلمة صينية معناها الحرفي "8 رموز"، ولكن هي اسم لخريطة لونية مكونة من تسع ألوان لو تم توظيفهم من خلال الديكور بشكل صحيح داخل مساحة المنزل أو المكتب، إلخ... المكان هـ يشع طاقة إيجابية وبالتالي هـ يكون تأثيره عليك إيجابي. والخريطة دي هي أحد أهم أدوات مدرسة "فنج شوي" المعمارية، واللي بـ تؤمن بأن الأماكن والمساحات اللي بـ نشغلها لها تأثير مباشر على صحتنا النفسية. الحقيقة أن أصحاب المكان قدروا يطبقوا نظرية "باجوا" فعليًا في ديكور المحل، لأن بالرغم من مساحته الضيقة جدًا وكمية المعروضات واختلاف ألوانها ونقوشها، إلا أن بمجرد دخولنا حسينا براحة نفسية وبهجة. أول شيء لفت نظرنا كان مرآة بيضاوية طويلة لها إطار ومسند خشبي لونه تركواز (1600 جنيه)، ومجموعة من الكراسي المختلفة في الحجم والشكل، بـ يجمع ما بينهم طرازهم العتيق واللي أضافوا إليه نوع من البوهيمية بتنجيد القاعدة بقماش منقوش من نوعية "الباتش وورك". نفس القماش مستخدم في مجموعة من الخداديات، وسعرها (190 جنيه) للواحدة، أما لو قطيفة أو قطن فسعرها (160 جنيه). الرفوف الأعلى موجود عليها مجموعة من الأباجورات الفخارية والزجاجية، بالرغم من ألوانها القاتمة، إلا أنها متماشية مع قماش الشابوهات المليء بالتفاصيل، ولازم نوضح أن الأباجورة نفسها لها سعر غير سعر الشابوه. أبهرتنا مجموعة قصاري الزرع الفخارية اللامعة، واللي بـ تتفاوت في الحجم، أصغر حجم منها سعره (30 جنيه)، وكمان أباريق من نفس الخامة سعرها (100 جنيه). لاحظنا عرض مجموعة من الأطباق الزجاجية المميزة بالنقوشات العتيقة، واللي أول ما مسكناها اكتشفنا أنها من مادة الميلامين، الأحجام مختلفة وأسعارها بـ تبدأ من 60 حتى 150 جنيه. نفس النقوش العتيقة دي معمول منها "مسّاكات مطبخ" وسعرها (60 جنيه). يمكن "باجوا" ما يكونش المكان المعتاد اللي ممكن تشتري منه كل حاجة محتاجها في بيتك، إلا أننا متأكدين أنه تأثيث ولو غرفة واحدة في بيتك منه ممكن يعمل فرق كبير ومبهج في الوقت نفسه.

...

الحرملك: منتجات منزلية فخمة صنع بلدنا فى الزمالك
اصدرت في: 01/06/2014

خلال الكام سنة اللى فاتوا، ظهرت حالة من تقدير الصناعات المحلية، وده أضاف بُعد جديد لمشهد التسوق فى القاهرة. الحرملك الموجود على شارع حسن صبرى فى الزمالك، وتحديدًا فى الدور الأرضى من دجلة سنتر، بـ يقدم منتجات منزلية فخمة مصنعة محليًا. رغم أن المحل يعتبر صغير شوية، الجو الشيك المريح مع المنتجات المعروضة بشكل ممتاز بـ يرحبوا بزبائنهم يدخلوا ويتفرجوا. معروض تشكيلة متنوعة من المنتجات لغرف النوم، والحمامات، وغرف الطعام بـ تشكل أغلب بضاعة الحرملك، بس مع قرب دخول موسم الصيف، معروض عدد بسيط من مستلزمات البحر اللطيفة. المعروضات كلها بـ تشترك فى الخامة الطرية، بدرجات خفيفة من البيج، والأبيض والكريمى مع رسومات ورد بسيطة وشغل خرز ملون. طقم مكون من ملائتين عليهم أشكال من الخرز باللون البرتقالى وغطائين للمخدات (2300 جنيه) كان شكلهم مميز. مفارش للسفرة أحجامها مختلفة، تبدأ مع 250 سمx 250 سم سعرها حوالى 1500 جنيه، 400 سمx 190 سم سعرها حوالى 1750 جنيه، وأخيرًا 170 سمx 170 سم بحوالى 800 جنيه. كل تصميماتهم بسيطة وأنيقة، وتقدر تنور أى غرفة أكل. معروض كمان فوط للحمام مع بشاكير بحر، وطقم فوط صغيرة للضيوف عليها أشكال بسيطة سعرها 154 جنيه، طقم من أربع فوط حمام (418 جنيه) وعدد بسيط من بشاكير البحر متوفر منها ألوان برتقالى، وأزرق وأبيض (253 جنيه). مايوهات لطيفة كانت برضه معروضة، منها كاش مايوه عملى وشكله روش موجود منه ألوان أزرق وبرتقالى (429 جنيه)، وكمان جلابيات ملونة (336 جنيه). شنط للاستعمال اليومى رجالى وحريمى أسعارهم بين 200 جنيه و300 جنيه، على حسب الحجم، منها شنط قماش كريمى بتصميمات تقليدية، وكمان شنط شفافة مقاومة للمياه مناسبة للشاطئ. بالنسبة للأطفال الصغيرين، طقم ملايات مريح مع أكياس مخدة بألوان متوهجة سعره بين 550 جنيه و594 جنيه، مع روب حمام أطفالى لطيف سعره 286 جنيه. لو على المحلات اللى عندها الخامات المحلية وإتقان الصنعة ف عددهم فى الليمون، بس الفكرة أن مافيش محل يقدر يترجم الكلام ده لمنتجات منزلية فخمة بجودة عالية زى الحرملك.

...

إنكانا ناتشورا: كساء إيطالى للحوائط بأشكال الصخور فى الزمالك
اصدرت في: 16/11/2013

مع ازدهار سوق العقارات القاهري، الاحتياج لديكورات منزلية مميزة بـ يزيد يوم بعد يوم. الشركة العالمية "إنكانا- Incana" الحاصلة على جائزة فى مجالها، متخصصة فى تغطية الحوائط بالأحجار الصناعية الفريدة، ودلوقتي فتحوا صالة عرض رائعة فى الزمالك. مكانه فوق محل 50A Concept Store الردئ شكلاً لحدٍ ما، وفيه عرض خاص بماركة إنكانا الخاصة لكسوة الحوائط الخارجية بـ يؤدى فى نهايته للسلالم الخاصة بصالة العرض نفسها. تصميم الصالة عبارة عن وحدة سكنية معاصرة مساحتها واسعة – تخطيطها عبارة عن مطبخ، حمامين، غرفة معيشة ومكتب – يقدر فيها عملاؤهم يشوفوا تشكيلات كثيرة مختلفة على الحوائط، بحيث يقدروا يشعروا بشكل المنتجات ويتخيلوا الشكل النهائي للمنتج بطريقة عملية. حوائط على شكل طوب أو أحجار ممكن تستخدم لخلق لمسات فنية فى كل أنحاء المنزل، وكمان فى الخارج لتحقيق منظر جمالي فى الحديقة. منتجات إنكانا على عكس الصخور الطبيعية صديقة للبيئة، محكمة وممكن تغييرها وتلوينها، بحيث توصل لشكل نهائي أنيق ومبتكر. كل مجموعة لها نطاق ألوانها، وبجانب تنسيقاتهم من الظلال الواقعية والأحجار الطبيعية، مجموعتهم الملفتة للنظر shiny متاحة بكل الألوان الممكنة، زى الأزرق الفاتح، البنفسجي، الذهبي والأبيض. وجود خمسة ألوان مختلفة من المادة الخاصة بملأ الفراغات بين البلاط معناه إمكانية الوصول لأشكال مختلفة، سواء كانت الألوان متماثلة أو متنافرة. فريق عمل إنكانا مدرك تماماً لأهمية توظيف الإضاءة المضبوطة فى الغرفة، خصوصاً أن الطرق الخاطئة ممكن تتسبب فى تغيير أجواء البيت. رغم أنهم مش بـ يبيعوا لوازم الإضاءة، لكنهم بـ يرحبوا بتوجيهك لأماكن مناسبة. نظام التسعير واضح وصريح، يختلف باختلاف المجموعة، ويتراوح بين 380جنيه للمتر وصولاً ل480جنيه للمتر، وسعر التركيب 90جنيه للمتر. أشهر الموديلات دائماً موجود منها مخزون زيادة، وممكن يتم توصيلها بشكل سريع. فى حالة عدم توافر منتج معين، الشركة الأم بـ ترسله فى خلال ثلاثة أشهر. بـ تقديمهم لخامات جودتها عالية وعمالة مدربة طبقاً للمعايير العالمية، إنكانا يهدف للوصول لكسوة حوائط تخطف الأنظار، مع تشطيب درجة أولى بالإضافة لخدمة عملاء مفيدة وفعالة.

...

هاوس أند جاردن: إكسسوارات مناسبة للحدائق وديكورات المنازل فى الزمالك
اصدرت في: 13/08/2013

على شارع أحمد حشمت فى الزمالك مكان واحد يجمع بين الأثاث الساحر، تصميم الديكورات ومستلزمات التشجير هو "هاوس أند جاردن – House & Garden"، صندوق بريد أزرق فى الشارع عليه نماذج بيوت خشب ملونة متوصلة بجذوع افتراضية بـ يوجهك لمكانه، بس هـ تحتاج تدخل فى ممر كله نباتات يشبه المتاهة علشان توصل لهدفك. المحل من أول وهلة يخطف الأنظار بكمية الألوان الضخمة؛ كل قسم من المكان مطلى بلون مبهج مختلف والمنطقة الخارجية مليانة نباتات تخلق منظر طبيعى يضيف إحساس بالخصوصية على حديقتك. شوفنا فى المحل تشكيلة متنوعة من مجموعة أثاث متكاملة، زى ترابيزات الأكل وكومود بأدراج، ده غير إكسسوارات منزلية تشمل لمبات، وأصيص ورد، ومرايات وحتى البشاكير. الشكل العام للمكان نقدر نوصفه أنه منظم، عملى وبسيط. الديكور يشمل خشب كثير وألوان سادة بـ تشكل الصورة العامة؛ وجود إكسسوارات الحدائق كمان أضاف إحساس بجو ريفى. أصيص ورد صغير مطلي محليًا سعره كان 100 جنيه، وكمان لوحات صغيرة عليها رسم ورود سعرها بين 1200: 1500جنيه. أدوات الإضاءة عندهم منها عدد كبير، أغلبها عبارة عن مظلات مصابيح دائرية مصنوعة من القماش؛ التصميمات تجمع بين الألوان المشرقة والتصميم البسيط. نجفة مُعلق فيها لمبات سعرها حوالى 1200 جنيه، وفى نفس الوقت واحدة أكبر حجمًا تصميمها أبسط سعرها كان 600 جنيه. الأباجورات أسعارها تتراوح بين 150: 250 جنيه. قطع أثاث أكبر حجمًا مش معروض منها كثير، لكن على العموم، سعر ترابيزة طعام كانت موجودة وقت زيارتنا كان 6000 جنيه، وكرسى طويل عليه بطاقة سعر مكتوب فيها 2900 جنيه. هاوس أند جاردن بـ يقدم حاجات ثانية منها مجّات (50 جنيه)، طقم كوبايات شاى (300 جنيه) وشنط (180 جنيه)، وكمان دفاتر وأكياس مصنعة يدويًا. سعر محافظ جلد يدوية من تصميم موظفة فى المحل كان 80 جنيه. هـ تلاقى فى هاوس أند جاردن كمان مجموعة من منتجات أيكيا Ikea. بطاطين (190 جنيه)، فوانيس، أصيص زرع فيه ورد صناعى (50 جنيه) وحامل شمع (120 جنيه)، وكلهم من الماركة السويدية المعروفة. المكان مشترك بينهم وبين جورج حتحوت للديكور وlandscaping studio، وكمان أعمال الفنانة مريم حتحوت معروضة هناك. الجو العام هناك يبعث على الإبداع وبـ يضفى راحة وسكينة. لو عاوزة إكسسوارات منزلية بسيطة وجودتها عالية، وكمان بأسعار مناسبة –بالمقارنة مع المحلات الثانية فى الزمالك طبعًا– يبقى هاوس أند جاردن هو أنسب مكان تبدأ منه.

...

موروكان كنوز: لمسة مغربية فى القاهرة
اصدرت في: 31/01/2013

أكيد مع شباك العرض الجميل الموجود فوق مترو ماركت فى الزمالك، صعب تفوت المحل المشوق. لكن مع الأسف، أسعاره مرتفعة حبتين.دخلنا علشان نعرف هل جلد الجمل الملون والمصابيح السلكية قريبين من إمكانياتنا المادية ولا لأ، والمفاجأة اللطيفة أن السعر كان 120 جنيه. علشان كده بعد ما فكرنا كثير فى أى تصميم عاجبنا أكثر، قررنا نتفرج على باقى المحل علشان نشوف باقى المعروضات عندهم.معظم شغلهم عبارة عن أثاث كبير، أشكال متنوعة من الكومود المطعم بالخشب، برطمانات ديكور ضخمة، وكلها قطع مهمة وكمان أسعارها غالية. حتى القطع الصغيرة زى الأوانى، والطواجن، وطفايات السجائر برضه أسعارهم عالية. كنا فاكرين أننا قدرنا نلاقى مجموعة شاى لطيفة هدية لوالدتنا بس أول ما وصلنا للكاونتر أدركنا أن "المجموعة" كانت عبارة عن كوبايات بس، ولو زودت الأطباق السعر بـ يتضاعف، وعلشان تشطيبهم ما كانش حلو للدرجة، قررنا أننا نسيبهم.بـ يقدموا كمان مجوهرات أنيقة شيك من الهند، مش ذهب حقيقى أو أحجار كريمة حقيقية، تقدرى تقولى عليهم تقليد. مجموعتهم من العقود والحلقان المتدلية تخطف العين وتصميمها قريب من الستايل الشرقي بأسعار تبدأ من 120 جنيه، بس ممكن تلاقى شغل أحسن.القطع بـ تتشحن من المغرب، فلو كنت نفسك تشترى حاجة أصلية مضاف لها سعر الشحن والجمارك -بدلاً من تذكرة الطيران- يبقى هو ده أنسب مكان لك.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن