مجوهرات تسوق in الزمالك Cairo, Egypt

تسوق

مجوهرات أمين السرجانى: عائلة الجواهرجية فى الزمالك
اصدرت في: 20/05/2014

الحياة فى القاهرة ماشية بسرعة البرق، بس ثقافة وتاريخ المدينة العريق شاهدين على شغلانات مستمرة من قديم الأزل. فى قلب الزمالك، مجوهرات أمين السرجانى يعتبر واحد من أقدم محلات الجواهرجية اللى لسه فاتحة لوقتنا ده فى مصر. صحيح السرجانى شغال من سنة 1776، المحل الموجود فى الزمالك بـ يخص أمين السرجانى، بعد ما استقل بنفسه فى 1977. أمين السرجانى مميز بين الجواهرجية، ومتخصص فى حرفة الذهب الخالص، الماس بجودة عالية والأحجار النادرة. بعد توليهم المسؤولية عن شغل والدهم، بناته دينا ونيرفانا السرجانى –الاثنين خبراء معتمدين فى الأحجار الكريمة– يتمتعوا بالإبداع فى عمل تصميماتهم الخاصة وكمان تعديل الطلبات المخصوصة، للتأكد من أن كل قطعة تكون متفردة. رغم أن المحل مساحته صغيرة، تحس فيه بجو من الشياكة والرقى. معروض تشكيلة من الحلقان، والخواتم، وخواتم الخطوبة، ودلّايات، وعقود وأساور. صحيح القطع المعروضة بسيطة وهادئة، حاجات ثانية بـ تشمل الماس وأنواع مختلفة من الأحجار. خاتم من الذهب الأبيض مطعم بحجر ياقوت أزرق، وحوله ألماس من كل جانب سعره كان 3500 جنيه. روعة الحجر الأزرق النادر صعب تقاومها حتى وإن كان حجمه صغير. كثير من القطع الموجودة بـ تكون على هيئة أطقم، وواضح فعلاً المجهود والاهتمام بالتفاصيل الموجودين فى التصميمات المنفذة يدويًا. الطقم المعروض كان عبارة عن حجر زبرجد جميل بـ يزين دلّاية، مع ألماس على الأطراف (5000 جنيه). مع الدلّايات، معروض حلقان كلاسيكية مناسبة لكل الأعمار فيها نفس حجر الزبرجد (3500 جنيه). وقت زيارتنا كانت المصممة نيرفانا السرجانى موجودة فى المحل، وبكل ود وفخر كشفت عن مجموعة من حلقان فخمة مش موجودة ضمن العرض. شد انتباهنا أنواع نادرة من الأحجار بين خواتم من الذهب الأبيض والأصفر. حجر من الياقوت الأصفر الجميل مغروس فى خاتم أبيض وأصفر (8000 جنيه)، ويمكن الياقوت الأزرق شكله كان أكبر شوية، التصميم ككل كان له طابع ملكى لو صح التعبير. خاتم مبهر ثانى من الذهب الأبيض بلؤلؤة سوداء (7000 جنيه). الخاتم كان محكوم بقطع ألماس صغيرة، اللى قدرت تبرز الؤلؤة أكثر؛ عشاق المجوهرات هـ يحبوا القطعة دى تحديدًا نظرًا لندرة اللؤلؤ الأسود. القاهرة مش بـ تعانى نقص فى عدد الجواهرجية، بس ذهب أمين السرجانى يتمتع بصنعة وتصميمات هائلة، باستخدام أعلى جودة مجوهرات.

...

بيبر كلوزيت: ماركات عالمية بأسعار قليلة فى الزمالك
اصدرت في: 21/08/2013

حتى مع كل الظروف الاقتصادية الصعبة فى أيامنا الحالية، لسه فيه ناس عندها الشجاعة أنها تفتح مطاعم، وكافيهات ومحلات فى القاهرة. دائمًا فيه اختيارات لا نهائية لما نتكلم عن محلات الملابس الحريمى، رغم أن كثير من المحلات بـ تعرض نفس الحاجات، وبكده التنوع بـيبقى قليل فى السوق. مكان "بيبر كلوزيت -Pepper Closet" مستخبى فى شارع محمد مظهر فى الزمالك، وبـ يقدم لكل عشاق الموضة مجموعة مختارة من الماركات المحلية والعالمية. البوتيك يحتل مكان صغير وفى الوقت نفسه منظم يشبه دولاب البنات. البضاعة الموجودة من ماركات ومصممي أزياء معروفين وبـتُباع بأقل من سعرها الأصلى. مى عز الدين شابة بـ تملك المكان، فاهمة كويس الموضة وبـ تقابلك بترحاب شديد؛ على طول عرضت تساعدنا فى اختيار أكثر حاجة تناسبنا وقالت لنا رأيها بصراحة طوال المدة الطويلة فى تجربة الملابس. لما لاحظت أن واحد من الفساتين مقاسه مش مضبوط، مى علشان تساعدنا قالت لنا على ترزى ممكن يضبطه. الأقسام كلها منظمة بدقة، ومع بداية جولتنا وسط صفوف الملابس المبهجة، لاحظنا أسماء شهيرة، وكمان ماركات باريسية، معظمها مش متوفر فى مصر. توبات خفيفة مناسبة للصيف بمجموعة من الألوان، الأشكال والتصميمات سعرها يبدأ من 110جنيه لغاية 250 جنيه، وفى نفس الوقت تي شيرتات بالدانتيل من فيلا Vila كان سعرها 220جنيه. شوفنا توب كريمى خفيف مزين بجماجم ذهبية صغيرة سعره 250جنيه وتيشيرتات بدون أكمام لها تطريز على شكل سلسلة حول الرقبة (180جنيه). بلوزات أتموسفير Atmosphere بزراير مقفولة سعرها كان 120جنيه وسويتر جميل من الصوف لونه مرجانى من باندوليراBandolera ثمنه 250جنيه. علشان تكمل مجموعتك المميزة، شوفنا رف منظم بشكل أنيق عليه مجموعة من الجينزات، بنطلونات سكينى leggings وبنطلونات haram pants مريحة، منهم على سبيل المثال جينز أبيض فى أسود مقلم من Miss Anna بسعر 150 جنيه. نروح على صف الفساتين اليومية، وفيها لاقينا أكثر من حاجة تنفع تتلبس لمناسبة رسمية أو عادية. فساتين كثيرة منها الماكسى، المتوسط أو القصير، ومتوفر منها ألوان وخامات كثيرة. شدينا فستان صيفى خفيف (780) من مجموعة كارين ميلن، سعره الأصلى 1700جنيه. لو عاوزة فستان سهرة ما حصلش، بيبر كلوزيت ممكن يبقى المكان المناسب للزيارة. الأسعار تبدأ من سعر بسيط هو 250جنيه، وبالتالى ممكن تلبسى حاجات شكلها تساوى ملايين الدولارات بشوية جنيهات بسيطة. فساتين مطرزة بترتر سعرها كان 450جنيه وفى نفس الوقت فستان أسود قصير شكله ثمين من Andrea Jovine والمفاجأة أن سعره كان 350جنيه. وزى ما هو متوقع، الأسعار بـ تزيد على حسب الماركة. فستان طويل رائع لونه أخضر زمردى من لابلانكا La Blanca كان بـ يباع بسعر مخفض (1700جنيه بدلاً من 3000 جنيه). فستان على طراز الـbandage أسود أصلى من مجموعة Hervé Léger بتطريز ذهبى من الأمام ثمنه فى العادى 4000جنيه، بس ثمنه هناك كان 2500جنيه. عندهم كمان مجموعة كبيرة تقدرى تختارى من بينها، منها الأحذية والصنادل (110جنيه: +180جنيه)، كوفيات حرير (40جنيه)، قبعات للشمس (100جنيه)، مايوهات (+150جنيه)، شنط يد (+250جنيه)، محافظ ومجوهرات أنيقة (+60جنيه)؛ شنط يد مستعملة من أشهر مصممى الأزياء، رغم أنك صعب تقدرى تطلعي الفرق. إصدار محدود من شنط يد دولتشى & جابانا كان ثمنه 5000 جنيه، وكمان حذاء بكعب من كريستين ديور كان سعرها 1400 جنيه. تقدر تلاقى كمان شوية حاجات من محلات شهيرة ومصممين محليين مميزين، منهم دكان بلدى، آية دينا وداليا حافظ. بيبر كلوزيت عنده تنوع هايل، وعادة القطعة الواحدة مش بـ تتكرر؛ وعلشان كده مش بس بـ يقدم اللى تحتاجه أى واحدة بأى ميزانية، ده كمان بـ يضمن أن مافيش حد ثانى يلبس نفس الحاجة.

...

دينا مغاورى: صالة عرض مجوهرات فتحت من جديد فى الزمالك
اصدرت في: 08/09/2012

إلى جانب اسمها المعروف فى السوق من سنين، شغل دينا مغاورى يعتبر بعيد تمامًا عن المتداول أو التقليدي. مجموعة مجوهراتها بـ تبرز الأناقة وجودة التصميم والفكرة المتميزة، بطريقة مش بس بـ تجذب نظر السيدات لكن كمان بـ تخليهم يرجعوا علشان يشتروا مجوهرات ثانية.بعد ما فتحت صالة عرض فى الزمالك سنة 2003 بـ تخدم عملائها المصريين والأجانب القدامى والجدد، دينا رجعت من ثانى بصالة عرض جديدة. إعادة الافتتاح كانت فى آخر أسبوع من شهر أغسطس، الصالة المجددة صُممت بطريقة فنية، وذوقها يتميز بالحداثة والأناقة، مع لمسة من البحر المتوسط. المحل موجود فى مكان مستخبى فى شارع حسن قاسم، هـ تلاقى شمسية عليها علامة المحل بـ تساعد على تحديد مكان الصالة، والحوائط الناصعة البياض مع الزرع الأخضر بـ تخلى المدخل لطيف ومرحب بالزوار.المحل مليان دواليب للعرض، بعضها قديمة وعتيقة، بـ يعرض فيهم مجموعة المجوهرات المتنوعة. كل مجموعة منهم فريدة من نوعها ومُعرفة بلوحة كديكور من فوقها للشرح. وعلشان بـ تحب وتقدر المواهب المصرية، دينا اهتمت بوجود الصور، والأثاث واللوحات بتوع زملائها الفنانين كنوع من الديكور فى الصالة، وبـ تخطط فى المستقبل أنها تستثمر فى فعاليات مشتركة وتشتغل مع مواهب شابة من الفنانين المصريين.أحدث مجموعة من تقديمها اسمها "نوبيا" اللى سرقت الأضواء بدمجها ألواح نحاس مطلية أصفر عليها شكل هلال مع أحجار شبه كريمة. مجموعات ثانية معروضة زى أعمال فنية Objet D’art مستوحاة من الستايل البوهيمى ومزينة باستخدام طلاء ناصع بـ يكمله قطع كبير من أحجار شبه كريمة. من الألوان الروشة المستخدمة فى المجموعة الأخضر المصفر، والأزرق السماوى والنيون الأصفر.مجموعة ثانية اسمها patrie –مشتقة من كلمة patriotism أو الوطنية- مختلفة تمامًا لكن برضه أصلية. دينا بـ تعبر عن حبها لمصر عن طريق استخدام رموز من ثقافتنا زى علم مصر القديم، وعملة بخمسة قروش وحتى رمز النسر الموجود على العلم دلوقتى. مجموعة باتينا patina، ودى تشكيلة قديمة شوية بـ تركز على المجوهرات البسيطة وبـ تتكون من أشكال متعددة. صالة العرض وتصميمها فعلاً مبهرين جدًا، تشكيلات المجوهرات معروضة فيها بطريقة جذابة واضحة وسهل أنك تتفرجى براحتك. واحدة من أهم المميزات أن فيه حاجة تنفع لكل واحد، بغض النظر عن الميزانية: أساور، وحلقان، وعقود وخواتم تبدأ من 150 جنيه وبـ تتدرج لغاية 1500 جنيه، مع متوسط سعر يتراوح بين 500: 800 جنيه بـ يتحدد حسب القطعة والمادة الخام والتشكيلة.دينا كمان مستنية مجموعات جديدة مهمة، وهي مجموعة الفلاحة اللي بـ تكرم المرأة الريفية المصرية وبـ تستخدم قطع نحاس مطلية بقشرة الذهب مع أحجار شبه كريمة فى تصميمها.لو ليكي مزاج أنك تدلعى نفسك أو جاءت لك فكرة هدية مجنونة لحد معين، صالة عرض دينا مغاورى لازم تبقى فى قائمة التسوق بتاعتك.

...

عزة فهمي: سيدة مصر الأولى في المجوهرات
اصدرت في: 02/07/2011

لمّا مصممة المجوهرات المصرية عزة فهمي إتخرجت من قسم تصميم الديكور من كلية الفنون الجميلة، أدركت إنها تقدر تبتكر أكتر فى مجال الموضة. بدل ما تبتدى تدرس من جديد فى مجال حبها للمجوهرات، عزة فهمي إختارت إتجاه غير تقليدي خالص وبدأت تتمرن فى سوق خان الخليلي التاريخي. عزة فهمي قعدت تتدرب سنتين على الحرفة دي تحت إشراف ناس من أحسن الحرفيين المصريين، والنهاردة، عزة بقت أكتر اسم معروف فى مصر فى مجال المجوهرات الراقية، وبقت علامتها التجارية بمثابة سفيرة مصرية في السوق العالمي. عزة متخصصة فى عمل المشغولات الذهب والفضة اللي جودتها عالية جداً٬ وأحياناً هـ تشوف الفضة والذهب مع بعض في نفس القطعة. المشغولات معمولة بدقة كبيرة والتصميمات في منتهى الإبداع. حاجة بـ نلاحظها في مشغولاتها، إنها دايماً بـ تستخدم الخط العربي وبـ تكتب بيه مُقتبسات من شعراء و فلاسفة، وكمان بـ تستخدم كتير أشكال زى "كف فاطمة". وبـ تستخدم رسومات التجريد الهندسية كتير في تصميماتها. ده غير الأحجار زي التورمالين والفيروز اللي بـ يزينوا التصميمات العبقرية. مشغولات عزة فهمي بـ تصميماتها ما بين الرقة والبساطة والجرأة، زى الأساور الثلاثية الأبعاد والأحزمة المصممة لماركة «برين – Preen» فى المملكة المتحدة. و فىه كمان خط إنتاجي للرجال غالباً بـ يبقى فيه أزرار أكمام وشوية أساور وخواتم وأعقاد رجالي. فرع محل عزة فهمي اللي فى الزمالك موجود فى تقاطع شارع المرعشلي مع شارع طه حسين. المحل منور قوى والمشغولات معروضة في دواليب إزاز ومتقسمين لـ3 أقسام كل واحد بـ يمثل خط من خطوط الإنتاج المختلفة٬ خطوط الإنتاج هم: ثقافة٬ موضة والطلبات الخاصة. بالرغم أن أغلب الأسعار كانت مش باينة فى العرض، لكننا لمحنا كده خاتم بـ حوالي 4000 جنيه، عليقات بسيطة معروف إنها بـ تكون بحوالي 2000 جنيه، بس طبعاً إعمل حسابك أنك هـ تدفع أكثر من كده بـ كتير للمشغولات الأثقل اللى فيها أحجار أو اللي عليها علامات لماركات عالمية. مع إن المجوهرات وهمية، بس هـ تحس إن فيه حاجة ناقصة وانت بـ تتفرج. وقت لمّا رحنا، البياعين ماكانوش ودودين مع الزباين اللى مش باين عليهم إنهم ناويين يشتروا حاجة. فالأحسن للى بـ يحبوا يتفرجوا إنهم يتفرجوا من بره المحل، أو من الويب سايت عشان عليه مجموعة أكبر من المشغولات. بس عامةً، إحنا سمعنا من مصادر موثوق فيها إن البياعين فى فرع المعادي ألطف بـ كتير. بالرغم من ان الأسعار عالية جداً٬ إلا إنك لمّا بـ تشتري من عزة فهمي، إنت مش بس بـ تدفع عشان الماركة؛ بس برضه بـ تدفع فى حاجة معمولة حلو قوي وتستاهل.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن