إكسسوارات تسوق in الزمالك Cairo, Egypt

تسوق

الشريف بوتيه: عطور وأدوات تجميل وإكسسوارات في الزمالك
اصدرت في: 17/02/2016

من المحلات اللي بـ نحاول على قد ما نقدر أننا نبعد عنها حفاظًا على سلامة المحفظة هي محلات العطور والماكياج؛ كل حاجة مغرية في المحلات دي، ده غير أن كل منتج –بالذات الماكياج- له ملحقاته ومكملاته اللي بـ تستخدم معاه علشان اللوك يبقى Perfect، بـ نتمنى أنهم في المستقبل يصنعوا منتج بـ يعمل كل حاجة بدل البهدلة اللي المحفظة بـ تتبهدلها معانا. في شارع المرعشلي في الزمالك فتح محل عطور وماكياج جديد اسمه الشريف بوتيه – Al Sharif Beauté، وبغض النظر عن الاسم، مجرد ما لمحنا من الواجهة الزجاجية الـ Stands الخاصة بالماكياج بدون تفكير قررنا ندخل، المحل مش كبير كعادة المحلات اللي من النوع ده، وبالتالي عدد الـ Stands ستة لماركات أسعارها معقولة زي Bourjois الفرنسية، Jordana الأمريكية، Deborah الإيطالية (اللي كان لها 3 ستاند لوحدها) وماركة العناية بالأظافر السويسرية Mavala، استغربنا أن المحل مش موجود فيه الماركات العالمية الكبيرة زيDior أو Chanel، واللي ممكن تلاقي صدى في منطقة الزمالك. بالرغم من أن فيه منتجات مالهاش Testers زي درجة الروݘ اللي كنا بـ ندور عليه، إلا أن القائمة على الخدمة حاولت بقدر الإمكان أنها تلاقي لنا أقرب درجة لون لهTester علشان نجربه، الخدمة هناك ممتازة وخصوصًا أن القائمين على خدمة البيع بـ يعطوا لنا مساحتنا في الجولة، ولكن على أتم الاستعداد أنهم يساعدوا في أي وقت. عجبنا من Bourjois الكحل السائل واللي متوفر منه أقلام تشبه الـ Markers، أو الشكل المعتاد (زجاجة وريشة) والنوع الثاني كان سعره (85 جنيه)، أما من مجموعة Deborah فلاحظنا أن مجموعة الروݘات كبيرة ومتنوعة بحسب خط الإنتاج، فمنها بالشكل العادي (90 جنيه) بألوان كلاسيكية ومنها أقلام أطول نسبيًا (شبه أٌقلام الألوان) سعرهم (50 جنيه) بـ تتميز بأن ألوانها مواكبة للموضة أكثر. الدور الثاني للمحل فيه مجموعة كبيرة من العطور الرجالي والحريمي: تقريبًا كل الماركات والأسعار موجودة هناك من أول S.T. Dupont، on كل الماركات والأسعار موجودة هناك من أول الرجالي والحريمي، وواجهة فيها عدد كبير من الإكسسوارات الفضة السويسرية، وPaco Rabanne بـ (50 جنيه) وحتى عطر المصمم Karl Lagerfeld، في نفس الدور فيه مجموعة من الإكسسوارات المصنوعة من الفضة السويسري، واللي تصميماتها أغلبها فيها أحجار شبه الألماس ولمعان الفضة نفسها يشبه الذهب الأبيض، الأسعار أكيد بـ تختلف باختلاف تصميم وحجم القطعة، إلا أن سعر القطعة الصغيرة زي حلق بسيط مثلًا ممكن تعمل 105 جنيه. بجانب الكاشير فيه Stand لمجموعة من الساعات ماركاتFossil وCK: عجبنا من الرجالي ساعة Fossil معدنية ضخمة لونها فضي سعرها 1395 جنيه، ومن الحريمي ساعةCK ذهبي "أوستيكها" الذهبي الرفيع شبه الإسورة سعرها كان 2975 جنيه. المحل كمان بـ يقدم عروض كثيرة وممكن توفر لك في مناسبات مختلفة زي عيد الحب وعيد الأم، وبعكس أماكن كثيرة الشريف بوتيه قدم لنا Tester عطر Burberry The Beat مع مشتراياتنا مع أننا اشترينا حاجة واحدة.

...

جاليرى أشرقت: جاليري الفكرة بصناعة يدوي في الزمالك
اصدرت في: 16/11/2015

الفكرة: "إحنا مش تجار إحنا صحاب فكرة".. دي أول جملة سمعناها من مدام أشجان بدير صاحبة المكان.. إحنا روحنا سألنا عادي عن الجاليري لما شدنا شكله.. وقررنا ندخل نتفرج عن المكان ونكتب عنه.. طب إيه الفكرة؟ الفكرة بقى أنهم بـ يعيدوا تشكيل التراث.. كل التراث المصري يطلع بشكل جديد.. وكمان يطلع بره مصر علشان يتعرفوا على التراث المصري الأصيل. أشجان وماريان: مدام أشجان هي صاحبة المكان وهي محامية أصلًا لكنها عاشقة للتراث.. واشتغلت مصممة ملابس واتخصصت فترة في العبايات الخليجي وشغل الخيامية.. ومن هنا تطور الموضوع معاها علشان تعمل جاليري بصبغة إسلامي وعربي واخدة من التراث روحه.. ومن الفن العصري الخامات والتقنية الحديثة.. يعني شغل حديث بطابع التراث والمهم أنه مصري أصيل. ماريان بقى هي مديرة الجاليري اللى تخرجت من كلية الفنون الجميلة وفاهمة كل حتة في المكان.. وعارفه تاريخها واتعملت من إيه وبـ ترجع لأي عصر من العصور، وكمان اتعملت إزاي. أشرقت: المكان واسع من جوه وفي المدخل فيه حديقة صغيرة معمولة بشكل حلو.. والشكل من بره كله عبارة عن شغل أرابيسك.. وتقريبًا كل حاجة في المكان معمولة يدوي.. وتعالوا نشوف المكان: هـ تلاقوا لوح للمستشرقين مرسومة بأيد مصريين، وسفرة معمولة أرابيسك.. هما بـ يبيعوا فكرة مش منتج.. يعني بـ يبيعوا لشخص هـ يعيش التراث ويرتبط بالتاريخ أكثر.. هو مزج بين المودرن والعربي، هناك هـ تشوفوا إزاي ممكن تجهزوا بيتكم بتحف وتعيشوا معاها وكمان بخامات عالية.. فيه كمان مطبخ كله معمول من الخشب وشغله هايل ومساحته جيدة جدًا.. وفيه سفرة معمولة برسومات على الخشب.. وكراسي وخداديات.. وطبق فخار ملون معمول من الطين الأسواني وكمان مدهون بمادة طبية علشان لما يدخل الفرن يبقى الأكل صحي وغير ضار..أما الترابيزات هناك.. فمعمولة من طبق نجمي معمول يدوي ودي حاجة عبقرية من الفن الإسلامي بـ تتركب جزء جزء لحد ما يعطيك الشكل الهندسي الإسلامي.. وكمان هـ تلاقوا هناك أطباق زجاج مطعمة بالنحاس.. والبراويز كمان معمولة صناعة يدوي بالحفر على الخشب.. وفيه سحارات وكنب عربي بشكل جديد.. غير النجف اللي معمول إما على شكل مشكاة عربي أو فانوس عربي.. وممكن كمان تكتب عليه آية أو اسمك واسم اللي تحبه.. وفيه بقى غير اللوحات.. معلقات اسمها فن الكف.. فيها رسومات يدوية برضه لبيوت وأولاد وبنات من النوبة.. تنفع تزين بها بيتك.. من الآخر المكان حلو ومحتاج زيارة.

...

ميكسي: ملابس مختلفة عن ماركات المولات في الزمالك
اصدرت في: 09/11/2015

كثير كنا بـ نتكلم عن أن الزمالك محلات الملابس فيها تتعد على الصوابع بعكس المطاعم ومحلات الحلويات؛ إلا أن بدأت تنتشر البوتيكات اللي بـ تبيع ملابس مستوردة بعيدًا عن الماركات المنتشرة في مولات مصر، من ضمن المحلات دي ميكسي – Mexy في الزمالك. المحل المكوَن من دورين مساحته ما تخرجش بره حيز 2.5×2.5 متر، وبالتالي التشكيلة الموزعة على حوالي أربع ريونات (شماعات) محتاجة صبر وتدقيق وأنت بـ تتفرجي عليهم، وبما أننا قربنا على الشتاء، فالتشكيلة الجديدة سيطر عليها الـSweatshirts والبلوفرات الخفيفة، واللي بصراحة ما ننكرش أنها كانت السبب الرئيسي أننا ندخل نلقي نظرة على المحل. مجموعة البلوفرات الخفيفة شكلها مبهج بألوانها اللي تنوعت ما بين اللون الوردي والأزرق الفاتح؛ إلا أن اللي عجبنا فيهم هو مجموعة الرسومات الموجودة عليها بشكل مكرر؛ واحد منهم عليه رسمة موتوسيكل عجبنا فيه أن ألوانها هي كمان مبهجة ومتماشية بشكل عام مع التصميم الكلي للقطعة، المجموعة دي أسعارها 250 و280 جنيه. وبما أن الكيمونو كان موضة الصيفين اللي فاتوا، فطبيعي أنه يكمل معانا في الشتاء؛ ميكسي كان عارض منهم مجموعة شتوية خامتها من الصوف الثقيل وعليها نقوش هندسية (300 جنيه). بالرغم من أن خامتها مناسبة إلى حد كبير للشتاء اللي بـ نشوفه في مصر، إلا أن ما عجبناش ألوانها اللي غلب عليها ألوان صريحة زي الأخضر والأحمر مع اللون الأسود، ده غير أن ثقل الخامة ما حسيناهوش لايق على الشراشيب الرفيعة الموجودة في أطراف الكيمونو –واللي لو كانت من نفس خامة الكيمونو كانت ممكن تخلي المنظر أحسن شوية. مجموعة الصيف كان عليها خصومات؛ من ضمنها مجموعة من البنطلونات الـ Harem المنقوشين، سعرها بعد الخصم (100 جنيه). الدور العلوي كان فيه عدد من فساتين كوكتيل، والإكسسوارت والأحذية؛ لاحظنا أن الإكسسوارات والأحذية تشبه لحد كبير المجموعات الموجودة في بقية البوتيكات الموجودة في القاهرة منهم حذاء بدون رباط لونه فضي لامع ماركة Chiara Ferragni، على كل فردة عين سعره (750 جنيه). بالرغم من أننا عندنا قناعة تامة أن أحيانًا أسعار المعروضات في البوتيكات بـ يبقى مبالغ فيها حبتين، إلا أن الميزة الكبيرة اللي بـ تقدمها محلات زي ميكسي أن المعروضات بـ تختلف اختلاف كبير عن ملابس المحلات المشهورة والمنتشرة في مولات القاهرة.

...

أفريكانو جاليري: محل إكسسوارات بيت وهدايا من بلاد بعيدة في الزمالك
اصدرت في: 01/11/2015

من ضمن الحاجات اللي بـ تميز القاهرة عن أي مدينة ثانية في مصر-واحتمال كبير عن أي مدينة ثانية في العالم كله- أنك هـ تلاقي فيها كل حاجة. تقريبًا ما بقاش فيه حاجة مش موجودة في العالم مش موجودة هنا في القاهرة. من أول مطاعم المطابخ الغريبة ومحلات الملابس وحتى محلات إكسسورات البيت؛ من ضمن النوعية الأخيرة من المحلات صادفنا أفريكانو جاليري - Africano Gallery في الزمالك. موقع المحل وشكله الخارجي الغريب هو اللي شدنا أننا ندخله؛ المحل موجود في الدور الأول بمجموعة سلالم جانبية منفصلة عن مدخل المبنى الرئيسي، أما فاترينة العرض الكبيرة، فمعروض فيها مجموعة كبيرة من التحف المتنوعة ما بين الستايل الأفريقي، الهندي وحتى الكلاسيكي. أما ديكور المحل من الداخل بسيط –المكوّن من مستويين بـ يفصل ما بينهم مجموعة من السلالم- لأنه معتمد في الأساس على غرابة المعروضات الموجودة فيه. المستوى الأول من المحل مخصص بشكل أساسي لعرض الهدايا والإكسسوارات الحريمي والرجالي، فعلى ترابيزة في الركن معروض بشكل عشوائي مجموعة من الأعقاد الهندية المصنوعة يدويًا من الخرز الملون بألوان زاهية (110 جنيه)، ومن نفس الخامة والبلد مجموعة من الأساور القماش (85 جنيه) –واللي بالصدفة شفناها في جاليري ثاني في الزمالك بـ تتباع بـ 350 جنيه. أما الإكسسوارات الرجالي واللي تنوعت ما بين سلاسل معلق فيها أشكال معدنية –زي الجماجم وخلافه- (15 جنيه)، وسلاسل مفاتيح مصنوعة من أنياب بلاستيكية (10 جنيه)، فدول وبلا منازع أسوأ حاجة شفناها في المحل، مش بس لأن جودتها سيئة، ده لأن حتى ذوقها عجيب. في المستوى الثاني من المكان فيه التحف وقطع الديكور؛ لفت نظرنا مجموعة من المعلقات الهندية، واللي بـ تشبه لحد الكبير الـ Dream Catchers، ولكن في صورة سلاسل من الأفيال والأجراز الصغيرة، عجبنا الصغير منهم (65 جنيه)، ومجموعة Wind Chimes خشبية -اللي بـ تطلع أصوات بمرور الهواء فيهم - مصنوعة في تايلاند وأسعارها بـ تختلف حسب الحجم (الصغير منهم بـ 125 جنيه). أفريكانو جاليري عارض مجموعة كبيرة من الأباجورات أغلبها مصنوعة من الخشب والنحاس؛ من الخامة الأولى عجبنا أباجورة من تايلاند، منحوتة على شكل رأس فيل (275 جنيه)، لدقة النحت وفي نفس الوقت القطعة محتفظة بلون خشبها الخام. أما الأباجورات النحاس فهي تشبه الأنتيك، ولكن للأسف في نسخته الرخيصة؛ من ضمن المجموعة دي وحدتين -الواحدة فيهم عبارة عن تمثال لحاملة شعلة- سعر الاثنين مع بعض (350 جنيه). على قد ما انبهرنا بالشكل العام للمحل، ما ابهرتناش المعروضات اللي كان فيه مجموعة كبيرة منهم منتشرة في محلات الهدايا؛ زي الماسكات الأفريقي والـ Wind Chimes. ولكن ما ننكرش أن وسط عدد كبير من المعروضات الكليشيه هـ تلاقي حاجة أو اثنين مختلفين بجد.

...

بوني آرت جاليري: مشغولات يدوية إثنية في الزمالك
اصدرت في: 27/10/2014

وسط عدد كبير من الجاليريهات الفخمة الموجودة في الزمالك، بوني آرت جاليري - Boné Art Gallery بـ يعرض مجموعة من المنتجات الخشبية والجلدية الإثنية بأسعار معقولة. واجهة المحل الزجاجية مليئة بالمعروضات، واللي في حد ذاتها مليئة بالتفاصيل؛ وبما أن المنتجات معظمها جلدية وخشبية، اللون البني بدرجاته غلب على المكان حتى أعلى الواجهة اللي عليها اللوجو بحروف معدنية كبيرة. المكان نفسه من الداخل مساحته محدودة، ولكن المعروضات كانت منظمة وفيه مساحة كافية أنك تتجول في المكان من غير ما توقع حاجة في سكتك بالغلط. أول مجموعتين لفتوا نظرنا كانت من الشنط الحريمي المصنوعة في إندونيسيا؛ الأولى شنط مناسبة للتسوق: حجمها المستطيل كبير وخامتها خفيفة، مرسوم عليها أفيال باللون البرتقالي على خلفية سوداء (60 جنيه)، أما المجموعة الثانية فذراعها قصيرة عليها نفس الأفيال، بحجم أصغر وخامة أثقل، لاحظنا أن تفاصيل المجموعة الثانية أكثر والشنط نفسها أثقل بالرغم من حجمها (75 جنيه). من نفس المنتجات الجلدية الإندونيسية، لاقينا مجموعة من المحافظ بأحجام مختلفة، منها الصغير والبسيط واللي يكفي النقود المعدنية (30 جنيه)، أما الأحجام الأكبر فمعظمها من الـ Patchwork بألوان مختلفة من الجلد وأسعارها بـ تتراوح بين (65 – 80 جنيه). المعروضات الخشبية معظمها من التماثيل بأحجام مختلفة. في وسط المحل مجموعة متنوعة من التماثيل الإفريقية والآسيوية، عجبنا منها تمثال بوذا المنحوت بالكامل من خشب الورد، وهو متوفر في ثلاثة أحجام: الصغير، ارتفاعه حوالي 30 سم (1100 جنيه)، أما الحجم الأكبر واللي ارتفاعه تقريبًا 50 سم (2500 جنيه)، من نفس المجموعة دي كرسي خشبي منحوت على شكل كف (800 جنيه). من ضمن المعروضات الخشبية، مجموعة من الـ Wind Chimes (المُعلقات اللي بـ تطلع صوت لما تفتح الباب في المحلات)، أصغر حجم منها سعره (80 جنيه) ولها طابع أفريقي. أما آخر مجموعة لفتت نظرنا كانت مرايا مستديرة مُزينة برسوم فلكية، منها الصغير قطرها -حوالي 25 سم- (45 جنيه)، أما الأكبر منها -حوالي 35 سم- فسعرها (60 جنيه). المعروضات كثيرة ولا نهائية، والشخص القائم على مساعدتك لطيف جدًا. يمكن يكون المحل مش بفخامة الجاليريهات الثانية الموجودة في الزمالك، ولكن ده ما يمنعش أنك ممكن تلاقي فيه قطعة أو اثنين مميزين.

...

رش فاشون: سواريهات وفساتين سهرة في الزمالك
اصدرت في: 15/10/2014

من حوالي شهر أو أكثر كتبنا عن فرع ملابس الكاجوال لـ رش فاشون - Rush Fashion في الزمالك، وذكرنا أن المحل له فرع متخصص في ملابس السهرة في الشارع اللي وراءه... أدينا بـ نكتب المقال النقدي الخاص بفرع السواريهات. من الصعب أنك تعرفي مكان المحل وخصوصًا لو ما روحتيش فرع الكاجوال من الأساس -واللي عرفنا أنه لسبب ما قفل- لأن فرع السواريهات مختفي في الدور الأول من العمارة رقم 6 في إسماعيل محمد، ومافيش أي علامة تدل عليه. المهم أن الموضوع سهل: هـ تدخلي العمارة، تطلعي السلالم المواجهة لكِ وبعدها تأخذي السلالم الضخمة اللي على اليمين... هـ تطلعي السلالم هـ تلاقي نفسك في بهو واسع في آخره مفترق طرق -جو أليس في بلاد العجائب، بس حقيقي المبنى ضخم- المهم، ادخلي شمال والباب عليه لوجو المحل... الباب مقفول؟ رنِ الجرس... Voila! مجموعة كبيرة جدًا من فساتين السواريه موجودة في المكان. وبما أننا جئنا المحل قبل كده، نقدر نقول أن الـ Collection المرة دي أغلبيته كانت مبهرجة زيادة عن اللزوم، الأيام دي صعب أن الواحدة تلاقي حاجة بسيطة وفي نفس الوقت مميزة... خصوصًا لو محجبة، ده حوار في حد ذاته! أول الفساتين الطويلة اللي عجبتنا كان جرئ: لونه أسود وHeart-Shaped (بدون حمالات) مطرز باللون البنفسجي الغامق (2499 جنيه)، بنفس السعر لاقينا واحد من غير أكمام لونه أبيض، بقصة ذيل السمكة و أغلبيته مغطى بقماش دانتيل خيوطه ذهبية واسعة... طبعًا إحنا ما بـ ننصحش أنك تشتريه لفرح أو خطوبة، إلا لو كنتِ العروسة. مش كل الفساتين بالسعر ده، غالبًا ده أعلى رقم قرأناه على التيكيت، الباقي أسعارهم بـ تبدأ من 1399 جنيه وأعلى، بسعر 1749 جنيه لاقينا فستان لونه سيمون فاقع، من غير أكمام: من أول الرقبة تل سادة حتى الصدر اللي كان رسمته Heart-Shaped ومرصع بقطع كريستال لمنطقة الوسط والباقي شيفون سادة... كثير قوي، مش كده؟ عجبتنا فساتين الكوكتيل القصيرة، لأنها أبسط بكثير. أسعارهم أقل طبعًا من الفساتين القصيرة (فيه فرق قماش) وأغلى واحد فيهم بحوالي (999 جنيه)، أول واحد عجبنا كان بدون أكمام وطوله لمنتصف الفخذ، لونه Powder pink من الدانتيل (899 جنيه)، وواحد ثاني لونه أبيض بنفس القَصة والطول، مغطى بشرائط ستان مثنية بشكل مربع (999 جنيه). المحلات اللي زي دي بـ تبقى محتاجة زيارات دائمة لأن التشكيلة بـ تتغير كل فترة، الجميل أننا لاقينا قسم خاص لأصحاب المقاسات الكبيرة بنفس التصميمات العادية، غير أن فيه قسم خاص للي وقار سنهم ما يسمحش بالبهرجة... (ما عرفناش نقولها إزاي... بدل ما نقول كبار السن لا سمح الله يعني). المهم أيًا كان الفستان اللي هـ تنتقيه نتمنى لك سهرة سعيدة.

...

رش فاشون: شيفونات وفساتين كوكتيل بالزمالك
اصدرت في: 03/06/2014

الزمالك اكتسبت شهرة بكونها المكان اللي بـ يجمع كل الصيحات الجديدة في مصر مهما كانت غريبة؛ أول ما بـ تظهر موضة –أي موضة- سواء في الأكل، أو الملابس أو أسلوب الحياة، هـ تلاقي أول ظهور لها في الزمالك. وبالرغم من الزمالك أصبح فيها تقريبًا كل شيء لدرجة أنها وارد جدًا تكتفي بنفسها ذاتيًا، وتعلن استقلالها عن مصر –الصراحة حقها- إلا أن الملحوظ أن عدد محلات الملابس فيها معدود. حتى الماركات العالمية بـ تفضل أنها تفتح في المولات الكبيرة المنتشرة في كل القاهرة، وبالفعل كذا ماركة فتحت في الزمالك منها ماركة الملابس المشهورة "نايك"، و"ديادورا"، إلا أنهم قفلوا بعد مدة قصيرة نسبيًا. حاليًا محلات الملابس في الزمالك أغلبها بـ تبيع الملابس الرجالي المستوردة من تركيا، واللي ممكن تلاقيها هي نفسها في مناطق ثانية زي أحمد عرابي مثلًا بسعر أرخص. أما الملابس الحريمي، فأغلبها موجودة في بوتيكات بـ تعرض ملابس شباب المصممين، واللي عادة بـ تكون مجنونة، مش أي حد يلبسها، واللي بـ يلبسها مش هـ يلبسها كل يوم لأن أغلبها مش عملي، "رش فاشون – Rush Fashion" واحد من أوائل محلات الملابس اللي فتحت في الزمالك. مساحة المحل صغيرة، لكنه مُقسم بطريقة عملية لأنه مستوعب كمية لا يُستهان بها من الملابس. أغلب المعروضات عبارة عن بلوزات من الأقمشة الخفيفة زي الشيفون والحرير، وهي قطع مناسبة جدًا لأي حد بـ يدوَر على حاجة شيك لمناسبة مهمة بس مش رسمية لدرجة السواريه... كتب كتاب مثلًا، عزومة أو خروجة مهمة... يعني. أول مجموعة كانت قطع بنص كم، وهي الوحيدة اللي قماشها تريكو خفيف، نقدر نقول أنها المجموعة الكاجوال بين المعروضات وأسعارها (250 – 300) جنيه. بعدها مجموعة من البلوزات الطويلة، ألوانها ونقوشاتها مجنونة... تحتاج لشخصية جريئة نوعًا ما، أسعارها بـ تصل حتى 360 جنيه. بالرغم من أن عدد القطعة الواحدة محدود وبالتالي المقاسات نفس الكلام، إلا أن فيه عدد مش قليل من البلوزات المخصصة لأصحاب المقاسات الكبيرة. أيوه، واخدين بالنا من أننا بـ نتكلم عن البلوزات بس... واضح أن المحل مُهدي للبلوزات لأن عدد البنطلونات والجونلات محدود جدًا ومالهاش علاقة بالموضة نهائيًا. البنطلونات معظمها غوامق وبسيطة جدًا في شكلها... ده إحنا حتى ما لاقيناش بنطلونات جينز! فيه ركن مخصص للقطع –نوعدك مش هـ نقول كلمة بلوزات ثاني لآخر المقال!- اللي تنفع لخروجة حلوة بالليل، لأن كلها قطع ألوانها غامقة ولكن منسوج فيها خيوط ذهبي وفضي لامعة. أسعار القطع دي أغلى من بقية القطع الأخرى (350 – 450) جنيه. فساتين الكوكتيل بـ تحتل الركن الأخير من المحل، إلا أن موديلاتها مناسبة لفئة عمرية أكبر عدت مرحلة الشباب. ناقص بس نقول أن المحل فيه مجموعة من الإكسسوارات، هي متنوعة وظريفة بس أسعارها مبالغ فيها نسبيًا، زي سوار للقدم متناهي الصغر والرُفع سعره (70 جنيه). إجمالًا المحل ممكن نعتبره قارب إنقاذ لواحدة عندها مناسبة ظهرت فجأة وما عندهاش وقت تلِف في المولات، ومش لازم تأخذي صاحبتك معاكِ علشان تسأليها رأيها، لأن المساعدة الموجودة في المحل ظريفة جدًا وهـ تفهم ذوقك بسرعة... الكلام ده عن تجربة.

...

هارلي دافيدسون: المكان الأنسب لمحبي الموتوسيكلات في الزمالك
اصدرت في: 10/05/2014

بانتشار موضة اقتناء الموتوسيكلات بين أهل كايرو، بل وتكوين مجموعات بين أصحاب الهواية نفسها، كان لازم نزور محل "هارلي دافيدسون – Harley Davidson" في الزمالك، لأنه أكيد عنده كثير يقدمه لمحبي الموتوسيكلات. محل ماركة الموتوسيكلات الشهيرة مليء بأشهر موتوسيكلاتهم الكلاسيكية وأحدثها بإكسسواراتها وقطع غيارها؛ ده غير خط إنتاج للملابس اللي بـ تتماشى مع جو الموتوسيكلات (افتكر كده عمرو دياب في فيلم آيس كريم في جليم). ولمحبي التميز، هارلي دافيدسون بـ تقدم لهم الفرصة أنهم يعدلّوا في الشكل الخارجي للموتوسيكل لإضافة شكل مميز له. المحل مجهز بمجموعة من الترابيزات العالية والكراسي اللي تشجع على إقامة حوارات لطيفة على الماشي بين محبي الدراجات. وبما أن عالم الموتوسيكلات ده متشعب وعميق، ومليء بالأنواع والفئات المختلفة، هارلي دافيدسون سخرت الدور الأول لعرض الأنواع المختلفة من الموتوسيكلات علشان اللي ناوي يشتري يتفرج ويعرف أنسب موتوسيكل له، وده بمساعدة المسئولين عن البيع، واللي كانوا غاية في اللطف، وعلى أتم الاستعداد للرد على أي استفسار. أصغر وأسهل موديل في التحكم اسمه The Sportster بمحرك سعة 883 سي سي، واللي سعره (10.000 :70.000 جنيه). والموديل ده فيه منه لونين: الأسود والبيج المموه (زي ملابس الصاعقة، فاكر الموضة دي؟). أشهر الفئات وأرقاها اسمها Dyna من ضمنها موديل Fat Bob بلونه الأبيض اللؤلؤي، محركه سعة 1585 سي سي، وكمان موديل Wide Glider بلونه الأسود المميز برسوم شُعلة اللهب، وأسعارهم (110.000 :190.000 جنيه). تخيل لما قوة هارلي دافيدسون وبورشا تتحد في صورة مجموعة VRSC، ومن ضمنها موتوسيكل Night Rod برتقالي وأحمر بمحرك سعة 1250 سي سي (نفس سعة محرك سيارة صغيرة، تخيل!)، وموتوسيكل V-Rod باللون الذهبي مع رسوم للهب أسود، وأسعارهم (205.000 :209.000 جنيه). من الموتوسيكلات الكلاسيكية الموجودة فئة اسمها Soft – Tail Family معروفة بشكلها الأنيق. معروض منها موديل Springer بمحرك سعة 1700 سي سي، وموديل Black Fat Boy (اسم عنصري!) بمحرك 1700 سي سي، أسعارهم بـ تصل حتى 200.000 جنيه. أكثر الفئات اللافتة للانتباه هي The Touring اللي سعة محركها تصل لـ 1700 سي سي، منها موديل Road King ونفس الموديل، ولكن المستعمل منه، وأسعارهم تصل حتى 200.000 جنيه. الدور الثاني من المحل مخصص للملابس الرجالي، والحريمي وللأطفال. وبـ يضم مجموعة من الخوذات، والبوتات والجاكيتات الجلد، ده غير التي شيرتات والقفازات (لازم تسوق وأنت شيك برضه). الخوذات لها أنواع، النصفي (الشبيهة بخوذة جندي الجيش) سعرها (1200: 2000 جنيه)، اللي بـ تغطي معظم الرأس (1800: 2300 جنيه)، والخوذة الكاملة اللي لها واقي أمامي (2000: 3500 جنيه). البوتات اللي رقبتها عالية (2000: 2500 جنيه) واللي رقبتها أقصر (1400: 1800 جنيه). القفازات (500: 1000 جنيه)، والنظارات (1300 جنيه)، الشنط (960 جنيه). ده غير أن بـ يباع شمع لتلميع الموتوسيكل. الجاكيت الجلد الشتوي (4000: 5000 جنيه)، أما الصيفي (2000 جنيه). في المجمل، التجربة ممتعة وبالذات لو أنت من محبي الموتوسيكلات، وهـ تنبسط أكثر لما تعرف أنهم بـ يقدموا تجارب قيادة مجانية للموتوسيكلات.

...

بيبر كلوزيت: ماركات عالمية بأسعار قليلة فى الزمالك
اصدرت في: 21/08/2013

حتى مع كل الظروف الاقتصادية الصعبة فى أيامنا الحالية، لسه فيه ناس عندها الشجاعة أنها تفتح مطاعم، وكافيهات ومحلات فى القاهرة. دائمًا فيه اختيارات لا نهائية لما نتكلم عن محلات الملابس الحريمى، رغم أن كثير من المحلات بـ تعرض نفس الحاجات، وبكده التنوع بـيبقى قليل فى السوق. مكان "بيبر كلوزيت -Pepper Closet" مستخبى فى شارع محمد مظهر فى الزمالك، وبـ يقدم لكل عشاق الموضة مجموعة مختارة من الماركات المحلية والعالمية. البوتيك يحتل مكان صغير وفى الوقت نفسه منظم يشبه دولاب البنات. البضاعة الموجودة من ماركات ومصممي أزياء معروفين وبـتُباع بأقل من سعرها الأصلى. مى عز الدين شابة بـ تملك المكان، فاهمة كويس الموضة وبـ تقابلك بترحاب شديد؛ على طول عرضت تساعدنا فى اختيار أكثر حاجة تناسبنا وقالت لنا رأيها بصراحة طوال المدة الطويلة فى تجربة الملابس. لما لاحظت أن واحد من الفساتين مقاسه مش مضبوط، مى علشان تساعدنا قالت لنا على ترزى ممكن يضبطه. الأقسام كلها منظمة بدقة، ومع بداية جولتنا وسط صفوف الملابس المبهجة، لاحظنا أسماء شهيرة، وكمان ماركات باريسية، معظمها مش متوفر فى مصر. توبات خفيفة مناسبة للصيف بمجموعة من الألوان، الأشكال والتصميمات سعرها يبدأ من 110جنيه لغاية 250 جنيه، وفى نفس الوقت تي شيرتات بالدانتيل من فيلا Vila كان سعرها 220جنيه. شوفنا توب كريمى خفيف مزين بجماجم ذهبية صغيرة سعره 250جنيه وتيشيرتات بدون أكمام لها تطريز على شكل سلسلة حول الرقبة (180جنيه). بلوزات أتموسفير Atmosphere بزراير مقفولة سعرها كان 120جنيه وسويتر جميل من الصوف لونه مرجانى من باندوليراBandolera ثمنه 250جنيه. علشان تكمل مجموعتك المميزة، شوفنا رف منظم بشكل أنيق عليه مجموعة من الجينزات، بنطلونات سكينى leggings وبنطلونات haram pants مريحة، منهم على سبيل المثال جينز أبيض فى أسود مقلم من Miss Anna بسعر 150 جنيه. نروح على صف الفساتين اليومية، وفيها لاقينا أكثر من حاجة تنفع تتلبس لمناسبة رسمية أو عادية. فساتين كثيرة منها الماكسى، المتوسط أو القصير، ومتوفر منها ألوان وخامات كثيرة. شدينا فستان صيفى خفيف (780) من مجموعة كارين ميلن، سعره الأصلى 1700جنيه. لو عاوزة فستان سهرة ما حصلش، بيبر كلوزيت ممكن يبقى المكان المناسب للزيارة. الأسعار تبدأ من سعر بسيط هو 250جنيه، وبالتالى ممكن تلبسى حاجات شكلها تساوى ملايين الدولارات بشوية جنيهات بسيطة. فساتين مطرزة بترتر سعرها كان 450جنيه وفى نفس الوقت فستان أسود قصير شكله ثمين من Andrea Jovine والمفاجأة أن سعره كان 350جنيه. وزى ما هو متوقع، الأسعار بـ تزيد على حسب الماركة. فستان طويل رائع لونه أخضر زمردى من لابلانكا La Blanca كان بـ يباع بسعر مخفض (1700جنيه بدلاً من 3000 جنيه). فستان على طراز الـbandage أسود أصلى من مجموعة Hervé Léger بتطريز ذهبى من الأمام ثمنه فى العادى 4000جنيه، بس ثمنه هناك كان 2500جنيه. عندهم كمان مجموعة كبيرة تقدرى تختارى من بينها، منها الأحذية والصنادل (110جنيه: +180جنيه)، كوفيات حرير (40جنيه)، قبعات للشمس (100جنيه)، مايوهات (+150جنيه)، شنط يد (+250جنيه)، محافظ ومجوهرات أنيقة (+60جنيه)؛ شنط يد مستعملة من أشهر مصممى الأزياء، رغم أنك صعب تقدرى تطلعي الفرق. إصدار محدود من شنط يد دولتشى & جابانا كان ثمنه 5000 جنيه، وكمان حذاء بكعب من كريستين ديور كان سعرها 1400 جنيه. تقدر تلاقى كمان شوية حاجات من محلات شهيرة ومصممين محليين مميزين، منهم دكان بلدى، آية دينا وداليا حافظ. بيبر كلوزيت عنده تنوع هايل، وعادة القطعة الواحدة مش بـ تتكرر؛ وعلشان كده مش بس بـ يقدم اللى تحتاجه أى واحدة بأى ميزانية، ده كمان بـ يضمن أن مافيش حد ثانى يلبس نفس الحاجة.

...

داندي: ملابس كاجوال رجالي وإكسسوارات في الزمالك
اصدرت في: 14/05/2012

رغم أنه مش مشهور قوي بين محلات الملابس الكاجوال الرجالي، إلا أن فروعه المنتشرة في أحياء القاهرة والمحافظات بـ تؤكد أنه ناجح وله زبائنه المخلصين، خصوصًا مع استمراره حوالي 15 سنة وهو محافظ على مستوى معين من جودة الخامات والموديلات والأسعار المغرية، وده لأن منتجات «داندي» كلها من المصنع الخاص بهم، وكل التصميمات كمان لمصممين مصريين، يعني نقدر نقول على «داندي» فخر الصناعة المصرية بجد. له فروع في مصر الجديدة ووسط البلد والمعادي والزمالك وفي مدن ثانية زي طنطا والإسكندرية، في زيارتنا دي لفرع الزمالك الأصغر حجمًا بين باقي الفروع، كنا مش متأكدين إذا كان المحل ده تابع لباقي السلسلة ولا مجرد تشابه أسماء، لكن تأكدنا لما دخلنا المحل ولقينا الموديلات اللي إحنا متعودين نشوفها في باقي الفروع. «داندي» مشهور بالملابس الشبابية البسيطة في تصميمها واللي غالبًا مصنوعة من القطن، التي شيرتات البولو هي أيقونة المحل، بموديلات وقصات مختلفة ودائمًا هـ تلاقي عنده كل الألوان، أسعار البولو شيرت بـ تبدأ من 80 جنيه لحد 120 جنيه، وأوقات التخفيضات بـ توصل لـ 50 أو 60 جنيه، ميزة قصات البولو شيرت عند «داندي» أنه بـ يناسب كل الأحجام وممكن يداري عيوب الجسم لأن نسبة البوليستر اللي في الخامات بـ تخلي للتي شيرت شكل ثابت ومش بـ يتغير بتغير شكل الجسم. التصميمات هـ تلاقيها دائمًا شبه الموجودة في كل بيوت الموضة العالمية، لكن بطابع خاص بالمحل ومن غير أي إضافات مالهاش لازمة. نفس الكلام على القمصان سواء بأكمام طويلة أو نصف كم، أسعارها من 120 لـ 140 جنيه، قليل لما هـ تلاقي قميص سادة، كل التصميمات هناك كاروهات بأحجام مختلفة أو مقلمة، لكن شيك وتمشي كاجوال أو كلاسيك. الجينز بألوانه الأساسية كلها موجود، بس مش هـ تلاقي الـ Slim اللي على الموضة موجود إلا باللون الأزرق الغامق فقط، أغلب البنطلونات هناك بقصات تقليدية (Straight) ومن غير أي شغل من الأمام أو الخلف (Used) وده شيء كويس لأن ساعات بـ ندور على الموديلات العادية وبـ نبقى مش عارفين نجيبها منين. أسعار الجينز من 140 لـ 180 جنيه، وهـ تلاقيها من ماركة Dandy أو Jeep من مصنعهم الخاص. فيه كمان بنطلونات جبردين كلاسيك بالألوان الفاتحة زي البيج والكريمي والرصاصي، مريحة وعملية جدًا لو هـ تجيبها للشغل اللي بـ يتطلب ملابس شبه رسمية. فيه جوارب وملابس داخلية للرجال (10 جنيه) وبعض الإكسسوارات زي الأحزمة وعدد محدود جدًا من الأحذية بأسعار 285 جنيه أو أكثر، وكالعادة إحنا مش بـ نرشح لحد أنه يشتري أحذية إلا من محل متخصص في الأحذية. فيه كمان مايوه شورت بموديلات شبه الموجودة في «Quicksilver» وكلها Free Size أو مقاس واحد وسعر الواحد 59 جنيه. «داندي» عندهم مشكلة في التعامل مع الزبائن، في تجربة شخصية للناقد كاتب المقال فى زيارة سابقة للى بـ نكتب عنها، حاول يرجع جينز كان ظهر فيه عيوب صناعة، لكن بعد أسبوعين من المماطلة وعدم الإفادة يأس تمامًا وتخلص من الجينز بعد ما راح الفرع الرئيسي في وسط البلد وقال لهم قد إيه هو مستاء من تجربته مع خدمة العملاء. مش لازم تكون دي القاعدة في التعامل بس وجب التنويه. غير كده التعامل داخل المحل في الشراء والاستبدال والقياس بـ يبقى جيد جدًا، وخبرة البائعين كبيرة وهـ يساعدوك بقلب.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا