ملابس حريمي تسوق in الزمالك Cairo, Egypt

تسوق

إم بي ثري: محل ملابس داخلية في الزمالك
اصدرت في: 19/09/2015

عادة بـ يبقى صعب علينا ككتاب مقالات نقدية عن أماكن التسوق أننا ندخل المحل، نفضل نقلب في المعروضات ونسأل عن أدق تفاصيلها بجانب السؤال البديهي "بكام ده لو سمحت؟" علشان بعدها نقول "شكرًا" ببساطة ونلف ونخرج ولا كأن أي حاجة حصلت... ده في المحلات العادية، فما بالكم شعورنا وإحنا داخلين محل ملابس داخلية لمجرد العلم بالشيء؟ بما أن الشغل شغل، استجمعنا شجاعتنا وقررنا ندخل محل إم بي ثري – MB3 للملابس الداخلية في الزمالك، وبالرغم من أن المحل بـ يضم ملابس حريمي ورجالي وأطفال، إلا أن المحل مافيهوش غير رجل واحد لكل المهام، وده ممكن يسبب نوع من الحرج لبعض الزبائن من الستات. بدأنا بالقسم الحريمي، والمواجه للباب؛ أول مجموعة صادفناها كانت فانلات قطن بجميع الأشكال والألوان، خامتها ثقيلة نوعًا ما كملابس داخلية في الجو ده، كل موديل نازل منه أبيض، وألوان ومنقوش، سعر الفانلة بدون أكمام للألوان والمنقوش (37 جنيه)، أما الأبيض فسعرها (35 جنيه) وهو سعر ما فرقش كثير عن أسعار أماكن ثانية، مع نفس المجموعة معروض Leggings، الأبيض (55 جنيه) والألوان والمنقوش (60 جنيه)، إم بي ثري عندهم مجموعة كبيرة من الملابس الداخلية التحتية الحريمي المنقوشة (20 جنيه). قسم الأطفال هو الأصغر في المحل، وغلبت عليه الملابس الداخلية الولادي، واللي تميزت برسومات لشخصيات كارتونية وخصوصًا على البوكسرات اللي سعرها (13 جنيه). غالبَا إم بي ثري اهتمامه الأكبر منصب على الملابس الداخلية الرجالي، واللي كان متوفر منها كمية كبيرة، ما عرفناش نسأل لكم على سعر البوكسرات لأن القائم على الخدمة في المكان استنكر سؤالنا عن سعر الفانلات الداخلية -البيضاء بدون أكمام (37 جنيه) للأبيض و(40 جنيه) للألوان- واللي قعد يكرر لنا جملة "دي رجالي يا فندم"، أومال لو كنا اشترينا بوكسر كان هـ يعمل إيه؟ الحقيقة أن المعروضات موديلاتها ما استهويتناش، واللي معظم نقشاتها غريبة على ذوقنا، إلا أن أكثر حاجة عجبتنا كانت مجموعة الفوط والبشاكير اللي عارضينها، واللي ألوانها بـ تتميز بأنها مبهجة، الفوط أحجامها بـ تختلف: البشكير (70 جنيه)، الفوطة المتوسطة (50 جنيه)، فوط اليد لها حجمين: المربع (10 جنيه) والمستطيلة (15 جنيه). أما البُرنس فسعر الواحد (300 جنيه). قبل ما نخرج من المحل، أخذنا كتالوج مجاني فيه جميع المنتجات اللي المحل بـ يعرضها، وعلى ظهره اكتشفنا أن إم بي ثري عنده فروع كثيرة جدًا في القاهرة والمحافظات، ومش بس كده ده كمان له فرعين في السودان، عامة مبروك عليهم النجاح، بس يا رب ما يتحفوناش بحملات دعاية تليفزيونية مبتذلة زي شركات ثانية.

...

ديكسيت: ماركة الملابس الحريمي العالمية في الزمالك
اصدرت في: 31/08/2015

بالرغم من أن الزمالك بدأ ينتشر فيها محلات للملابس، إلا أن عددها عمره ما هـ يتفوق على عدد المطاعم ومحلات الحلويات الموجودة تقريبًا في كل شارع هناك، من ضمن محلات الملابس الموجودة في الزمالك هي ديكسيت – Dixit في اليمامة سنتر. بعكس الفرع اللي كان موجود في شارع محيي الدين أبو العز، المحل الموجود في الدور الأرضي ديكوراته بسيطة جدًا، أو تكاد معدومة... مجرد مجموعة من الشماعات والأرفف اللي بـ تؤدي غرض عرض المنتجات وكان بها؛ وفيما عدا ذلك كل حاجة ثانية لونها أبيض بياض ناصع من أول الحوائط حتى الأرضيات، بالرغم من أن فيه معروضات كثيرة كان عليها تخفيض وقت زيارتنا، إلا أن واجهة المحل ما عليهاش أي حاجة توضح ده. أول مجموعة صادفتنا كانت بنطلونات Jeggings -وهي عبارة عن بنطلونات leggings بس جينز- لونها أسود وسعرها (135 جنيه)، وبنطلونات leggings قماش، حسينا أنها ثقيلة نوعًا ما على الصيف متوفر منها اللون الرمادي (225 جنيه). مجموعة الصيف كانت أكثرها فساتين قصيرة مطاطية باللون الأسود، من كثر ما هم شبه بعضهم ما علقش معنا منهم غير واحد بسيط بنصف كم وديكولتيه مستدير، أسعار الفساتين بـ تتراوح مابين 225 – 350 جنيه حسب الموديل. المحل مقسم لمستويين: الدور الثاني كان فيه مجموعة من الجينزات الفاتحة اللي قصتها مستقيمة (225 جنيه)، ومعها مجموعة كبيرة من البلوزات المنقوشة بالورود قصاتهم مختلفة... اللي بأزرار وتشبه لحد كبير للقمصان واللي بفتحة رقبة مستديرة وكمها يصل لحد المرفق أسعارهم (350 جنيه)؛ بالرغم من أننا بـ نحب أي حاجة منقوشة، إلا أننا حسينا أن قماشتهم خشنة وثقيلة ده غير أن النقوشات المطبوعة تفاصيلها كثيرة ومتعبة للعين. بعكسهم كان فيه بلوزة قطن بيضاء بأكمام، الجزء الأمامي منها كان منقط بالأسود (135 جنيه)، حسينا أن قماشتها الخفيفة مناسبة للصيف والحر اللي إحنا فيه ده، بالرغم من أننا ما حسيناش أن فيه قطعة مميزة في المحل تخلينا نطلع المحفظة بقلب جامد ونصرف، إلا أن شدنا كارديان طويل وبكُم لونه أبيض وعليه نقشة زهور باللون البنفسجي، تصميمه بسيط وتفاصيل النقشة حلّته أكثر. حتى الآن مش عارفين سر اختيار ديكسيت لموقعه الميت في اليمامة سنتر، وحتى موقعه الأول في محيي الدين أبو العز كان بعيد تمامًا عن أي منافسة لأنه كان المحل الوحيد في المنطقة، ممكن يكون الاختيار ده نابع من أن موديلاته وجودة ملابسه ممكن ما تقدرش تصمد أمام طوفان الماركات الثانية الأكثر شبابية... وده في حد ذاته ذكاء منهم.

...

زفير: كل حاجة بـ تتكلم عربي في محل الزمالك الشهير
اصدرت في: 23/08/2015

نعتقد أننا مررنا بمرحلة زمنية كانت أي حاجة لها علاقة بلغتنا أو ثقافتنا كانت بـ تعتبر غير مرغوب فيها، ووصلنا لأن كل حاجة في حياتنا من أول أكلنا، موسيقتنا وحتى لبسنا لازم يكونوا على الطابع الغربي، بعدها ظهرت مرحلة الاعتزاز بالتراث وكل ما هو شرقي عامة، ومصري على الأخص؛ زفير - Zafir في الزمالك من أول المحلات اللي ساعدت على انتشار الموجة دي بقوة وبشكل مختلف. مش عارفين بالضبط مرحلة الاعتزاز بثقافتنا بدأت إمتى وإزاي، يمكن بانتشار المراكز الثقافية المختلفة اللي أتاحت الفرصة لعدد كبير من فرق الأندرجراوند المصري أنها تظهر، مع انتشار المكتبات اللي معها انتعش سوق الكتب العربي والمصري، وبالتالي أصبح فيه ثقافة محلية معاصرة، بعدما كان فيه فجوة كبيرة بين واقع الشباب وأي حاجة لها علاقة بثقافتنا. بعيدًا عن تحليلنا الشخصي للموقف، "زفير" وظف الثقافة المحلية بشكل أقل جدية وقدر أنه يكوّن شعبية كبيرة عند الشباب بمجموعة تي شيرتات مختلفة تيماتها تنوعت ما بين استخدام الكلمات والخطوط العربية، والنوستالجيا وتوظيف رسومات مجموعة من الفنانين الشباب، بعد مرور سنين من أول زيارة لنا لزفير، لاحظنا تطور في المنتجات المعروضة، واللي ما بقيتش مقتصرة على التي شيرتات بس. على شمالك أول ما تدخل ستاند خاص بمجموعة من سيديهات موسيقى الأندرجراوند، لفت نظرنا منهم سي دي بـ يجمع عدد كبير من الأصوات النسائية المشهورة (35 جنيه). جنبهم مجموعة من الأرفف مرصوص عليها مجلات (35 جنيه) بتصميمات أنجح تي شيرتاتهم زي "سلاح التلميذ"، وهو عبارة عن صورة غلاف الكتاب المشهور ولكن مع الفرق أن الشخصيتين ماسكين أسلحة فعليًا. معروض كمان مجموعة من حاملي الأكواب المصنوعة من الكروشيه بألوان مبهجة (15 جنيه الواحدة)، وDream Catchers وهي عبارة عن معلقات مصنوعة بالخيوط، بـ تقول الأسطورة عند سكان أمريكا الشمالية الأصليين أنها بـ تجلب الأحلام السعيدة وتبعد الكوابيس، وأسعارهم بـ تتفاوت حسب الحجم (متوسطة 55 جنيه). الجديد أن زفير عارض مجموعة من المايوهات الحريمي، لو قطعة واحدة (100 جنيه) لو قطعتين (110 جنيه)، عامة هم مافيهومش تفاصيل كثيرة واعتمادهم الكلي على ألوانهم ونقشة القماش، ينفعوا في زنقة وسعرهم ممتاز بالنسبة للمحلات الثانية. بجانب الكاشير معروض إكسسوارات لـ Eman Designs اللي بـ تتميز بطابعها الشعبي، لفت نظرنا أنها مصنوعة بدقة وشكلها النهائي ممتاز وأسعارهم بـ تبدأ من 65 جنيه وبـ توصل لـ 200 جنيه. الدور الثاني فيه مجموعة التي شيرتات المشهورة (160 جنيه)، عجبنا منها واحدة لونها رمادي عليها رسوم فرعونية، لاحظنا أن عددهم قليل بالنسبة لزمان، ده غير أن معظمهم حجمه كبير والتصميمات مش كثيرة، زفير بـ يعرضوا ماركة الملابس المصرية ألاجا - Allaga، واللي برضه مستوحاة من التراث المصري، القطع مش كثيرة عجبنا منهم فستان قصير بدون أكمام لونه بني (400 جنيه). من ضمن الحاجات اللي زفير بـ يعرضها هي مجموعة من الخداديات اللي مصنوعة من أقمشة طابعها عتيق (زي اللي كنا بـ نلاقيها في بيت جدودنا)، ومنها حجمين الصغير (45 جنيه) والأكبر (65 جنيه). لو قعدنا نتكلم عن المنتجات المعروضة في زفير مش هـ يخلص المقال، لازم تروحوا تشوفوه لمجرد أنكم تأخذوا فكرة عن المكان، وحتى لو أنتم رحتوا هناك قبل كده، ننصحكم أنكم تعملوا زيارة ثانية لأنكم بكم المعروضات دي محتاجين كذا زيارة وراء بعض.

...

بوهو جاليري: مقتنيات فريدة من نوعها في بوتيك الزمالك المبتكر
اصدرت في: 27/07/2015

فيه مشكلة بـ تزيد كل يوم وهي أماكن التسوق الرئيسية في القاهرة، يعني مثلاً سلاسل وماركات المنتجات المستوردة الكبيرة، والأماكن المحلية اللي ماشية على نفس النهج. أغلب الحاجات المعروضة عندهم بـ تكون عامة وبـ تنتج بكميات كبيرة، والنتيجة مئات الناس لابسين نفس الحاجات، ودي حاجة مش لطيفة طبعًا، من هنا احتلت بوتيكات الملابس اللي بـ تقدم قطعة أو اثنين بالكثير من كل تصميم مكانة خاصة في قلوب الباحثين عن التميز. بوهو جاليري في الزمالك بـ يقدم مجموعة مميزة من الملابس المستوردة وكمان المصممة محليًا من مصممين مصريين شباب، ميزة المحل أن أجواءه المريحة، والديكورات البسيطة جدًا بـ تظهر الملابس والإكسسوارات المعروضة، كان فيه مقالة سابقة عن فرع بوهو جاليري هليوبوليس بـ تشكر في تشكيلة المنتجات المتنوعة هناك وأسعارها المعقولة، فـ قررنا نروح يمكن الكلام ده يكون في فرع الزمالك كمان. بوهو بـ يقدم كل أنواع الملابس الحريمي، وأي واحدة تقدر تجمّع أطقم كاملة من المحل الظريف ده، من شورتات جينز مرصعة بالجواهر، لملابس سهرة، لفساتين أنيقة، لشنط يد، لإكسسوارات، لملابس بحر، لسنيكرز، لكيمونو وجلابيات، فعلاً المعروض هناك يكفي وزيادة. مجموعة شنط يد من زام ZAAM معروضة في ركن من المحل شدت انتباهنا، تشمل شنط bucket bags سادة (450 جنيه). نروح على قسم الصديري والكيمونو، وعجبنا فيه صديري قصيرة عليها أشكال ورد (400 جنيه)، وكيمونو أسود وأبيض من تصميمات آيه أشرف (290 جنيه)، وكيمونو ماكسي أبيض دانتيل من تصميمات مدني (500 جنيه)، وكيمونو مدهش متحدد باللون الوردي من ندى كرم (330 جنيه) وبشكير بحر أبيض دانتيل (380 جنيه). شوفنا في وسط المحل ترابيزة عليها كل أنواع المجوهرات المطلية ذهبي تشمل حلقان، أساور وسلاسل، أكثر حاجة عجبتنا كانت أساور الذراع (700 جنيه). طول ما إحنا هناك الموظفين كانوا معانا بس من غير ضغط، بحيث نقدر نتفرج براحتنا وفي نفس الوقت يساعدونا لما نحتاجهم. بوهو جاليري من الأماكن اللي تحب تزورها وتتسوق منها، عجبنا جدًا المفهوم الجديد اللي بـ يتبعه المكان والموظفين الرائعين، ما كانش ينفع نمشي من غير ما ندلع نفسنا بواحد من عشرات الكيمونو الجميلة المعروضة هناك.

...

ذا دريسينج رووم: بوتيك ساحر في الزمالك
اصدرت في: 12/06/2015

من المعروف أن مشهد الأزياء المصري بـ يكبر بسرعة رهيبة، الأكيد أن أهل القاهرة بـ يحبوا يدلعوا نفسهم بملابس راقية، مختلفة وعلى الموضة. واحد من البوتيكات اللي بـ تروي عطش عشاق الموضة هو "ذا دريسينج رووم – The Dressing Room"، بمكانه في المنطقة المتخصصة في المحلات المبتكرة بكل أنواعها. أكيد عرفتوا إحنا نقصد مين؛ الزمالك طبعًا. قابلتنا ابتسامة موظف البيع هناك أول ما دخلنا، واللي رحب بنا بشدة في المحل المريح. الفكرة في ذا دريسنيج رووم أنه المكان اللي تروحيه لو بـ تدوري على حاجة مميزة لأي مناسبة. المحل بـ يخدم كل الأذواق، وعلشان كده نصف المعروضات هـ تلاقيها من مصممين أزياء محليين، والنصف الثاني مستورد من باريس. الديكورات هناك بسيطة نوعًا ما، ومافيش أي نوع من تشتيت التركيز، بحيث يكون تركيزنا كله على الملابس والإكسسوارات المعروضة، لاحظنا كمان أن فيه مراية كاملة و"كابينة سيلفي"، وفي رأينا أنها أضافت لمسة لطيفة لشكل المكان العام. من بين أرفف عليها تصميمات لمصممين مصريين، وقعنا في غرام بنطلونات قفطان من شروال (350 جنيه) وفستان ماكسي واسع من دينا شاكر (250 جنيه). بعد ما اتمشينا أكثر في المحل، شوفنا top دانتيل بأكمام طويلة (780 جنيه)، ممكن يمشي على ملابس كاجوال أو رسمية، وكمان عجبنا فستان ماكسي مزين بدانتيل أبيض (660 جنيه) شكله مريح جدًا. عيوننا عدت على رف ملابس السهرة، وكمّلت لغاية ما وقعت على فستان فضي مغري جدًا بأساور مطرزة أكيد بـ يخطف الانتباه (6720 جنيه). لاحظنا كمان حاجات ثانية منها ملابس بحر، شنط bucket bags وكلاتش، بلوزات قصيرة، أفرولات jumpsuits مع عدد من الإكسسوارات الملونة، ما قدرناش نقاوم تاتوهات فضي وذهبي (200 جنيه للوحة الواحدة) عند الكاشير علشان تضبط بشرتنا المطلية من الشمس حديثًا. علشان نلخص الموضوع، أكيد ذا دريسينج رووم واحد من الأماكن المختلفة عن المنتشر ويعتبر مكان مثالي لعشاق الموضة، والفضل يرجع لأزيائهم الفريدة وكمان الموظفين الممتازين، أكيد تجربة تسوقنا هناك كانت هائلة ويمكن نروح هناك مرة ثانية علشان ندمر الشوية الباقية من ميزانيتنا.

...

فينتاج بوتيك: محل جديد لكل المهووسين بالموضة في الزمالك
اصدرت في: 19/04/2015

فيه مقالات قبل كده قلنا أن بالرغم من كم المحلات الموجودة في الزمالك، نسبة المحلات اللي بـ تبيع ملابس قليلة جدًا بالمقارنة للمطاعم والكافيهات، وحتى المحلات الموجودة أغلبيتها بـ تبيع أي حاجة ثانية غير الملابس من أول لوحات فنية، ورد حتى الكتب. في خلال الكام شهر اللي فاتوا دول فتح كذا مكان بـ يبيع ملابس حريمي؛ منهم فينتاج بوتيك – Vintage Boutique في شارع الجزيرة الوسطى بالزمالك. البوتيك ده بـ يختلف عن معظم محلات الملابس الحريمي اللي صادفناها قبل كده سواء باهتمامه بشكله الخارجي، واللي عبارة عن واجهة زجاجية محاطة ببانوهات بيضاء طابعها عتيق زي اسم المحل، أما من الداخل ففيه اهتمام بتفاصيل الديكور ولكن ببساطة مميزة ما تلفتش نظر أي واحدة بعيد عن مهمتها المقدسة وهي التسوق. أول مجموعة لاقيناها كانت عبارة عن Cardigans بنصف كم، قماشتهم خفيفة ومخرمة (250 جنيه)، وألوانهم الأحمر والأزرق. ممكن يتلبس تحتهم أي تي شيرت بسيط. بما أننا في الصيف، معروض عدد من التي شيرتات القطنية بأشكال وموديلات مختلفة منهم واحدة لونها فوشيا بدون أكمام في ظهرها فتحات على طول الظهر (400 جنيه)، ومن نفس الستايل تي شيرت بيضاء بنصف كم عليها قلب؛ الأكمام عليها نفس الفتحات، أما القلب المطبوع على صدر التي شيرت فشكله زي القفص الصدري (300 جنيه). من ضمن المعروضات اللي عجبتنا جدًا، كانت مجموعة من الكيمونو، وهو موضة من السنة اللي فاتت، بـ يبقى عبارة عن كارديجان طويل من قماش خفيف زي الشيفون مثلًا، وعادة بـ يكون منقوش، من غير أزرار، وله شراشيب في طرفه، من ضمنهم معروض واحد بيج برسومات هندسية بالأسود سعره (350 جنيه). فينتاج بوتيك كمان عنده كم هائل من البنطلونات الجينز، بجميع أشكالها وألوانها. فينتاج بوتيك بـ يعرض إكسسورات لعدد من المصممين المشهورين في عالم الموضة في مصر زي مجموعة الغوايش الملونة المصنوعة من الخرز واللي معلق فيها دلايات معدنية مزخرفة (20 جنيه للواحدة) من Miral's Designs، ومجموعة ثانية من العقود للمصممة سارة بشير واللي ممزوج فيهم بين التراث وموتيفاته والتصميمات العالمية. وبما أن الخواتم الكبيرة موضة، كان فيه مجموعة كبيرة منهم مرصعين بالكريستالات الملونة. بجانب كل ده، فيه كمان مجموعة من الأحذية والشنط المعروضة، واللي بـ تناسب كل الأوقات سواء كاجوال أو سهرة أو حتى ملابس رسمية. نازلة السنة دي موضة القماش الـ Hologram. وهو عبارة عن قماش لامع بيضوي ألوان كثيرة زاهية لما النور بـ ييجي عليه. من الستايل ده فيه مجموعة كبيرة من الشنط الـ Backpacks المتوسطة (500 جنيه)، والصنادل والـ Wedges الرياضية، نوع الأحذية الأخير ده متوفر منه أشكال وأنواع كثيرة منها واحد هولوجرام في أسود وقطع معدنية سعره 1300 جنيه. فيه كمان مجموعة كبيرة من فساتين الكوكتيل والسهرة، ومنهم كمان للأطفال، كم المعروضات كبير، وبجانب أن الأسعار تعتبر غالية لحد كبير، عيب البوتيكات دي أن المعروضات والمقاسات مش كلها بـ تبقى متوفرة طوال الوقت. لو بـ تحبي الموضة نعتقد أنك هـ تحبي فينتاج بوتيك.

...

إيف: ملابس بيت وبيجامات حريمي في الزمالك
اصدرت في: 21/03/2015

بالرغم من أن محلات بيع البيجامات والملابس المنزلية الحريمي كثيرة ومنتشرة في القاهرة، إلا أن معظمها من الماركات العالمية المستوردة، واللي عادة بـ تبقى أسعارها غالية، ده غير أن معظم خامات منتجاتها ما بـ تبقاش مناسبة لجو مصر، من الأماكن القليلة اللي بـ تقدم منتجات من نفس النوع مصنوعة في مصر بخامات مناسبة هو إيف – Eve، واللي فتح فرع جديد في الزمالك. المحل بـ يحاول محاكاة محلات الماركات العالمية في ديكوراته، المدخل الأسود مع الباب الإلكتروني عاملين شغل جامد الصراحة، بس في وقت زيارتنا كانت المعروضات الموجودة في الفاترينة غير مبهرة بالمرة بعكس أوقات كثيرة كنا بـ نعدي من بره ونقول أن ممكن يبقى موجود في المحل حاجة كويسة. المحل مقسم لدورين؛ الدور الأول فيه أربعة تصميمات رئيسية مقسمة على أربعة أجزاء، كل تصميم معمول منه روب، بيجاما من قطعتين وقميص نوم وشبشب، بما أننا في فترة الشتاء نسبيًا، فالأقمشة المستخدمة كانت معظمها قطنية ثقيلة، التصميمات كانت متنوعة ما بين شبابية –زي الرسومات الكرتونية- والمناسبة لسن أكبر زي الأقمشة المنقوشة بالورود أو مطبوعة بنقوش جلود الحيوانات (زي الحمار الوحشي). من المنقوشات الشبابية، لاقينا مجموعة Hello Kitty، وألوان التصميم من الأسود والأبيض والروز. البيجاما مكونة من قطعتين (237 جنيه) لونها أبيض، وعلى السويت شيرت صورة الشخصية الشهيرة من الأمام، أما الظهر فكلمةHello kitty مكتوبة في المنتصف والبنطلون أسود والكلمة بالأبيض مع صورة الشخصية. أما قميص النوم فهو بنفس تصميم البنطلون في البيجاما السابقة مع سفرة بيضاء على الصدر مقفولة بأزرار على شكل لآلئ باللون الروز (257 جنيه) أما الشبشب من نفس الشكل (60 جنيه)، والروب (206 جنيه). إيف كمان بـ يقدم مجموعة كبيرة من القطع المنفردة في الدور الثاني، منها مجموعة بنطلونات Leggings وعادية (120 جنيه) منها السادة والمنقوش. وكمان فيه مجموعة محدودة من السويت شيرت منها واحدة بيضاء عليها كلمة مكتوبة بالترتر (150 جنيه)، بعكس توقعاتنا ما لاقيناش إيف عارض ملابس داخلية نهائيًا، واللي في اعتقادنا ممكن تكون صفقة مربحة بالنسبة له، لأن دي الحاجة الوحيدة اللي ممكن نسبة كبيرة من الناس تشتريها لخامتها أكثر من شكل التصميم المطبوع عليها. بالرغم من أن الخامة القطن المستخدمة في المعروضات ممتازة والأسعار نسبيًا رخيصة بالنسبة لأماكن ثانية كثيرة، إلا أن التصميمات للأسف مش بجودة تصميمات الماركات العالمية.

...

رش فاشون: سواريهات وفساتين سهرة في الزمالك
اصدرت في: 15/10/2014

من حوالي شهر أو أكثر كتبنا عن فرع ملابس الكاجوال لـ رش فاشون - Rush Fashion في الزمالك، وذكرنا أن المحل له فرع متخصص في ملابس السهرة في الشارع اللي وراءه... أدينا بـ نكتب المقال النقدي الخاص بفرع السواريهات. من الصعب أنك تعرفي مكان المحل وخصوصًا لو ما روحتيش فرع الكاجوال من الأساس -واللي عرفنا أنه لسبب ما قفل- لأن فرع السواريهات مختفي في الدور الأول من العمارة رقم 6 في إسماعيل محمد، ومافيش أي علامة تدل عليه. المهم أن الموضوع سهل: هـ تدخلي العمارة، تطلعي السلالم المواجهة لكِ وبعدها تأخذي السلالم الضخمة اللي على اليمين... هـ تطلعي السلالم هـ تلاقي نفسك في بهو واسع في آخره مفترق طرق -جو أليس في بلاد العجائب، بس حقيقي المبنى ضخم- المهم، ادخلي شمال والباب عليه لوجو المحل... الباب مقفول؟ رنِ الجرس... Voila! مجموعة كبيرة جدًا من فساتين السواريه موجودة في المكان. وبما أننا جئنا المحل قبل كده، نقدر نقول أن الـ Collection المرة دي أغلبيته كانت مبهرجة زيادة عن اللزوم، الأيام دي صعب أن الواحدة تلاقي حاجة بسيطة وفي نفس الوقت مميزة... خصوصًا لو محجبة، ده حوار في حد ذاته! أول الفساتين الطويلة اللي عجبتنا كان جرئ: لونه أسود وHeart-Shaped (بدون حمالات) مطرز باللون البنفسجي الغامق (2499 جنيه)، بنفس السعر لاقينا واحد من غير أكمام لونه أبيض، بقصة ذيل السمكة و أغلبيته مغطى بقماش دانتيل خيوطه ذهبية واسعة... طبعًا إحنا ما بـ ننصحش أنك تشتريه لفرح أو خطوبة، إلا لو كنتِ العروسة. مش كل الفساتين بالسعر ده، غالبًا ده أعلى رقم قرأناه على التيكيت، الباقي أسعارهم بـ تبدأ من 1399 جنيه وأعلى، بسعر 1749 جنيه لاقينا فستان لونه سيمون فاقع، من غير أكمام: من أول الرقبة تل سادة حتى الصدر اللي كان رسمته Heart-Shaped ومرصع بقطع كريستال لمنطقة الوسط والباقي شيفون سادة... كثير قوي، مش كده؟ عجبتنا فساتين الكوكتيل القصيرة، لأنها أبسط بكثير. أسعارهم أقل طبعًا من الفساتين القصيرة (فيه فرق قماش) وأغلى واحد فيهم بحوالي (999 جنيه)، أول واحد عجبنا كان بدون أكمام وطوله لمنتصف الفخذ، لونه Powder pink من الدانتيل (899 جنيه)، وواحد ثاني لونه أبيض بنفس القَصة والطول، مغطى بشرائط ستان مثنية بشكل مربع (999 جنيه). المحلات اللي زي دي بـ تبقى محتاجة زيارات دائمة لأن التشكيلة بـ تتغير كل فترة، الجميل أننا لاقينا قسم خاص لأصحاب المقاسات الكبيرة بنفس التصميمات العادية، غير أن فيه قسم خاص للي وقار سنهم ما يسمحش بالبهرجة... (ما عرفناش نقولها إزاي... بدل ما نقول كبار السن لا سمح الله يعني). المهم أيًا كان الفستان اللي هـ تنتقيه نتمنى لك سهرة سعيدة.

...

كوتون بول: تي شيرتات قطنية سادة في الزمالك
اصدرت في: 04/09/2014

فيه منتجات بالرغم من أنها بسيطة جدًا وبديهية الوجود إنما صعب تلاقيها. من المنتجات دي التي شيرتات السادة؛ ولو حصل ولاقيتها يا إما موديلاتها محدودة، أو مصنوعة من خامة صناعية غير مناسبة لجو مصر في الصيف. "كوتون بول - Cottonball" في الزمالك بـ يقدم لك مجموعة متنوعة من التي شيرتات السادة المصنوعة من القطن المصري الخالص. المحل ديكوراته الحداثية البسيطة ملائمة جدًا لبساطة المنتج، ده غير أن ألوان حوائطه الرمادية الفاتحة ووحدة العرض البيضاء الموجودة في منتصف المكان ساعدوا على إبراز منتجهم بشكل ممتاز، وخصوصًا أن ألوان التي شيرتات كثيرة ومتنوعة. وبما أن القطن المصري هو سيد الموقف، أصحاب المكان أطلقوا على كل موديل عندهم اسم محافظة من محافظات مصر؛ مثلًا موديل التي شيرت اللي رقبتها على شكل حرف "V" اسمه أسوان. أما دلتا فهو اسم موديل التي شيرت اللي رقبتها شكلها كذا.. وهكذا... الأسماء كثيرة لأن القصّات كثيرة ومختلفة، سواء لطول الكم أو التي شيرت نفسه أو قصّة الرقبة. بالرغم من تنوع الموديلات الرجالي وتعددها، إلا أن نصيب الأسد في التنوع للقسم الحريمي -طبيعي جدًا، الستات تفاصيلهم كثيرة- سواء من حيث الألوان والقصات اللي ممكن تساعد البنات اللي بـ يحبوا الـ Layering، يعني يلبسوا كذا حاجة فوق بعض. ده غير أن الألوان رائعة، عجبنا منها أخضر ليموني شبه نيون بس مش مزعج كعادة الألوان النيون، والوردي الزاهي. كوتون بول بـ يعرض كمان مجموعة محدودة من الإكسسوارات البسيطة المصنوعة يدويًا، المجموعة اللي شفناها كانت للعرض فقط لأن المكان لسه فاتح جديد. توقعنا أن الأسعار هـ تكون مبالغ فيها -بما أننا في الزمالك- ولكن الأسعار مناسبة جدًا وموحدة للحريمي والرجالي: اللي بكم طويل (135 جنيه)، نص كم (125 جنيه) والكَت (99 جنيه)، ده غير عرضهم الدائم أنك لو اشتريت 3 سعر القطعة هـ يكون (100 جنيه). بالرغم من بساطة فكرة التي شيرتات السادة، إلا أنها مناسبة جدًا للناس اللي بـ تفضل الملابس العملية والمريحة، حتى كمان للجيم والقعدة على الشاطئ.

...

رش فاشون: شيفونات وفساتين كوكتيل بالزمالك
اصدرت في: 03/06/2014

الزمالك اكتسبت شهرة بكونها المكان اللي بـ يجمع كل الصيحات الجديدة في مصر مهما كانت غريبة؛ أول ما بـ تظهر موضة –أي موضة- سواء في الأكل، أو الملابس أو أسلوب الحياة، هـ تلاقي أول ظهور لها في الزمالك. وبالرغم من الزمالك أصبح فيها تقريبًا كل شيء لدرجة أنها وارد جدًا تكتفي بنفسها ذاتيًا، وتعلن استقلالها عن مصر –الصراحة حقها- إلا أن الملحوظ أن عدد محلات الملابس فيها معدود. حتى الماركات العالمية بـ تفضل أنها تفتح في المولات الكبيرة المنتشرة في كل القاهرة، وبالفعل كذا ماركة فتحت في الزمالك منها ماركة الملابس المشهورة "نايك"، و"ديادورا"، إلا أنهم قفلوا بعد مدة قصيرة نسبيًا. حاليًا محلات الملابس في الزمالك أغلبها بـ تبيع الملابس الرجالي المستوردة من تركيا، واللي ممكن تلاقيها هي نفسها في مناطق ثانية زي أحمد عرابي مثلًا بسعر أرخص. أما الملابس الحريمي، فأغلبها موجودة في بوتيكات بـ تعرض ملابس شباب المصممين، واللي عادة بـ تكون مجنونة، مش أي حد يلبسها، واللي بـ يلبسها مش هـ يلبسها كل يوم لأن أغلبها مش عملي، "رش فاشون – Rush Fashion" واحد من أوائل محلات الملابس اللي فتحت في الزمالك. مساحة المحل صغيرة، لكنه مُقسم بطريقة عملية لأنه مستوعب كمية لا يُستهان بها من الملابس. أغلب المعروضات عبارة عن بلوزات من الأقمشة الخفيفة زي الشيفون والحرير، وهي قطع مناسبة جدًا لأي حد بـ يدوَر على حاجة شيك لمناسبة مهمة بس مش رسمية لدرجة السواريه... كتب كتاب مثلًا، عزومة أو خروجة مهمة... يعني. أول مجموعة كانت قطع بنص كم، وهي الوحيدة اللي قماشها تريكو خفيف، نقدر نقول أنها المجموعة الكاجوال بين المعروضات وأسعارها (250 – 300) جنيه. بعدها مجموعة من البلوزات الطويلة، ألوانها ونقوشاتها مجنونة... تحتاج لشخصية جريئة نوعًا ما، أسعارها بـ تصل حتى 360 جنيه. بالرغم من أن عدد القطعة الواحدة محدود وبالتالي المقاسات نفس الكلام، إلا أن فيه عدد مش قليل من البلوزات المخصصة لأصحاب المقاسات الكبيرة. أيوه، واخدين بالنا من أننا بـ نتكلم عن البلوزات بس... واضح أن المحل مُهدي للبلوزات لأن عدد البنطلونات والجونلات محدود جدًا ومالهاش علاقة بالموضة نهائيًا. البنطلونات معظمها غوامق وبسيطة جدًا في شكلها... ده إحنا حتى ما لاقيناش بنطلونات جينز! فيه ركن مخصص للقطع –نوعدك مش هـ نقول كلمة بلوزات ثاني لآخر المقال!- اللي تنفع لخروجة حلوة بالليل، لأن كلها قطع ألوانها غامقة ولكن منسوج فيها خيوط ذهبي وفضي لامعة. أسعار القطع دي أغلى من بقية القطع الأخرى (350 – 450) جنيه. فساتين الكوكتيل بـ تحتل الركن الأخير من المحل، إلا أن موديلاتها مناسبة لفئة عمرية أكبر عدت مرحلة الشباب. ناقص بس نقول أن المحل فيه مجموعة من الإكسسوارات، هي متنوعة وظريفة بس أسعارها مبالغ فيها نسبيًا، زي سوار للقدم متناهي الصغر والرُفع سعره (70 جنيه). إجمالًا المحل ممكن نعتبره قارب إنقاذ لواحدة عندها مناسبة ظهرت فجأة وما عندهاش وقت تلِف في المولات، ومش لازم تأخذي صاحبتك معاكِ علشان تسأليها رأيها، لأن المساعدة الموجودة في المحل ظريفة جدًا وهـ تفهم ذوقك بسرعة... الكلام ده عن تجربة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن