هدايا تسوق in الزمالك Cairo, Egypt

تسوق

زي زمان: كل حاجة لها علاقة بأيام زمان في الزمالك
اصدرت في: 18/12/2014

بغض النظر عن الأسباب اللي خلتنا كلنا فجأة نحس بـ "نوستالجيا" أو "حنين للماضي"، من فترة مش قليلة ظهرت موضة اقتناء أي شيء له علاقة من بعيد أو قريب بـ "أيام الزمن الجميل"، سواء كانت صور لفنانين السينما أو المطربين، أو حتى صورة قديمة لشارع مشهور تغيرت معالمه دلوقت تمامًا بفعل الزمن. وبما أن مش من السهل اقتناء صورة أصلية لعبد الحليم أو سعاد حسني، ممكن تكتفي بصورة مطبوعة على مج أو لوحة ممكن تتعلق على الحائط، ودول تقتدر تشتريهم من زي زمان – Zy Zaman في الزمالك. المحل مكرس نفسه لكل ما هو عتيق، على يمين المدخل مجموعة كبيرة جدًا من صور فنانين السينما الكلاسيكية المصرية، وأفيشات أفلام كلاسيكية عالمية مطبوعة على ألواح خشبية ممكن تتعلق. أكبر حجم سعره (100 جنيه)، أما الوسط حجمه حوالي 20x15 سم وسعره (35 جنيه)، أما الأصغر (10 جنيه) حجمه في حجم الصورة الفوتوغرافية. متوفر من جميع الأحجام صور للعائلة المالكة المصرية –أو اللي كانت مالكة- ومواضيع أخرى عن مصر وخصوصًا المولوية ورقصة التنورة. بنفس الموضوعات لاقينا مجموعة من المجات (45 جنيه) حجمهم كبير ولونهم أبيض، عجبنا منهم واحد مطبوع عليه رمز الملكية وجانبها صورة للملك فاروق، ولكن عيب المج أنه ثقيل. من المنتجات الثانية اللي لاقيناها كانت مجموعة من أفيشات الأفلام الورقية، ومعظمها لأفلام حقبة السبعينيات والثمانينيات (100 جنيه) وحجمها 75x100 سم. من ضمن المعروضات لاقينا مجموعة من نسخ الصحف القديمة زي "الوطني" و"الأهرام" وسعر الواحدة (50 جنيه). معظم المعروضات مطبوعة، ماعدا مجموعة من آلة الرق مرسوم عليها باليد كاريكاتير لفنانين زي إسماعيل يس، وسعر الواحدة (150 جنيه). وبما أننا تكلمنا عن الرق فبالمرة نحب نقول أن زي زمان بـ يبيع مجموعة من بدل الرقص الشرقي، زي اللي ممكن تلاقيهم في خان الخليلي. آخر مجموعة شفناها كانت أكياس المخدات المطبوع عليها نفس الموضوعات السابقة، ومرآة خشبية لونها بني غامق من الأرابيسك، مركب فيها مجموعة من الصور اللي بالحجم المتوسط سعرها (550 جنيه). إحنا شخصيًا ما أبهرتناش المنتجات دي لأننا شفناها في أماكن ثانية كثيرة، ولكن محل "زي زمان" ممكن يبقى مفيد لأنه ممكن تطبع عنده أي صورة أنت بـ تحبها على أي خامة، من أول التي شيرتات حتى الشموع. ده غير أنهم بـ يرسموا بورتريهات بالفحم أو بألوان الزيت حسب الطلب.

...

بوني آرت جاليري: مشغولات يدوية إثنية في الزمالك
اصدرت في: 27/10/2014

وسط عدد كبير من الجاليريهات الفخمة الموجودة في الزمالك، بوني آرت جاليري - Boné Art Gallery بـ يعرض مجموعة من المنتجات الخشبية والجلدية الإثنية بأسعار معقولة. واجهة المحل الزجاجية مليئة بالمعروضات، واللي في حد ذاتها مليئة بالتفاصيل؛ وبما أن المنتجات معظمها جلدية وخشبية، اللون البني بدرجاته غلب على المكان حتى أعلى الواجهة اللي عليها اللوجو بحروف معدنية كبيرة. المكان نفسه من الداخل مساحته محدودة، ولكن المعروضات كانت منظمة وفيه مساحة كافية أنك تتجول في المكان من غير ما توقع حاجة في سكتك بالغلط. أول مجموعتين لفتوا نظرنا كانت من الشنط الحريمي المصنوعة في إندونيسيا؛ الأولى شنط مناسبة للتسوق: حجمها المستطيل كبير وخامتها خفيفة، مرسوم عليها أفيال باللون البرتقالي على خلفية سوداء (60 جنيه)، أما المجموعة الثانية فذراعها قصيرة عليها نفس الأفيال، بحجم أصغر وخامة أثقل، لاحظنا أن تفاصيل المجموعة الثانية أكثر والشنط نفسها أثقل بالرغم من حجمها (75 جنيه). من نفس المنتجات الجلدية الإندونيسية، لاقينا مجموعة من المحافظ بأحجام مختلفة، منها الصغير والبسيط واللي يكفي النقود المعدنية (30 جنيه)، أما الأحجام الأكبر فمعظمها من الـ Patchwork بألوان مختلفة من الجلد وأسعارها بـ تتراوح بين (65 – 80 جنيه). المعروضات الخشبية معظمها من التماثيل بأحجام مختلفة. في وسط المحل مجموعة متنوعة من التماثيل الإفريقية والآسيوية، عجبنا منها تمثال بوذا المنحوت بالكامل من خشب الورد، وهو متوفر في ثلاثة أحجام: الصغير، ارتفاعه حوالي 30 سم (1100 جنيه)، أما الحجم الأكبر واللي ارتفاعه تقريبًا 50 سم (2500 جنيه)، من نفس المجموعة دي كرسي خشبي منحوت على شكل كف (800 جنيه). من ضمن المعروضات الخشبية، مجموعة من الـ Wind Chimes (المُعلقات اللي بـ تطلع صوت لما تفتح الباب في المحلات)، أصغر حجم منها سعره (80 جنيه) ولها طابع أفريقي. أما آخر مجموعة لفتت نظرنا كانت مرايا مستديرة مُزينة برسوم فلكية، منها الصغير قطرها -حوالي 25 سم- (45 جنيه)، أما الأكبر منها -حوالي 35 سم- فسعرها (60 جنيه). المعروضات كثيرة ولا نهائية، والشخص القائم على مساعدتك لطيف جدًا. يمكن يكون المحل مش بفخامة الجاليريهات الثانية الموجودة في الزمالك، ولكن ده ما يمنعش أنك ممكن تلاقي فيه قطعة أو اثنين مميزين.

...

باتشي: هدايا شوكولاتة راقية في الزمالك
اصدرت في: 20/02/2012

من زمان أسهل حاجة لو رايح مناسبة ومش عاوز تدخل بإيدك فاضية هي أنك تجيب معاك شوكولاتة. بس الصح بقى أنك تروح لمحل شوكولاتة مضمون وتختارها بنفسك، سواء كانت سادة ولا بالمكسرات وبالبندق ولا من غير سكر، اعمل تشكيلة حلوة. «باتشي - Patchi» محل شوكولاتة معروف جدًا في القاهرة وأصله لبناني. المحل فاتح في الزمالك وهـ تلاقيه على ناصية تقاطع شارع طه حسين والمرعشلي. المحل كله على بعضه مبهج، وڤاترينة المحل الزجاجية من الأرض للسقف، والنور النظيف، كل ده بـ يفتح نفسك أكثر أنك تشتري من المحل ده. كان هـ يبقى أسهل لو المحل عنده منيو تختار منه، لكن للأسف مافيش. علشان تشتري علبة شوكولاتة، عندهم اختيارات الفاخر، الكلاسيك، أو الديليس، وتقدر تشتريها بالكيلو بأسعار من 175 جنيه لـ 275 جنيه. متوفر عندهم كمان شوكولاتة من غير سكر، بونبون اللوز، وعلب شوكولاتة للأطفال بأسعار من 80 جنيه لـ 150 جنيه. شوكولاتة «باتشي» ممتعة جدًا مع شوية إضافات زي المقرمشات، الويفرز، كريمة البندق، والرايز كرسب، فيه الشوكولاتة البني والبيضاء، كلهم مغلفين بدرجات مختلفة من ألوان الفضي، البرونز، والذهبي. وبـ يعملوا الشوكولاتات من غير مواد حافظة أو نكهات صناعية، وده سبب واضح لنجاحهم. وقت ما رُحنا "السبشيال" كان شوكولاتة الكورن فليكس والتشيز كيك، ودول كانوا جزء من أكبر وأغلى تشكيلة اللي هي بـ 275 جنيه للكيلو. «باتشي» كمان بـ يبيع مختارات من إكسسوارات المنزل. ڤازات من الزجاج، طفايات سجائر ثقيلة، وعلب مصنوعة يدويًا، كلهم مليانين شوكولاتة وأسعارهم من 500 جنيه لـ 1000 جنيه. وفيه كمان طقم صواني ذهب عيار 24 أسعارهم من 800 جنيه لـ 1000 جنيه. وواضح أنهم معروفين بترتيباتهم للحفلات وعندهم جزء مخصوص لتجهيز سبوع الأطفال بعلب بـ تُباع بأسعار توصل لـ 1000 جنيه علشان الشوكولاتة بس. لو لقيت نفسك مزنوق ومش عارف تجيب إيه لحد، سواء كان علشان زيارة مرضية أو للاحتفال بمناسبة معينة، خليك دائمًا فاكر أن ده وقت علبة الشوكولاتة اللي ممكن تعجب أي حد. و«باتشي» أكيد واحد من أحسن الاختيارات وأفضلها كمان. جودة الشوكولاتات دائمًا كويسة ويعتمد عليها، وترتيباتهم مظبوطة. وممكن تغيير أكثر من "السبشيال" كان هـ يبقى أحسن، وكمان منيو يعرفنا الأصناف الموجودة.

...

ديوان أطفال: أول فرع مكتبة مخصص للأطفال في الزمالك
اصدرت في: 17/10/2011

ساعات بـ نلاقي صعوبة لما بـ نحاول نشتري هدية لطفل، خاصة لو كان الطفل ده مش ابنك أو لو كان طفل شقي ومتدلع ومش عارف إيه ممكن يعجبه. «ديوان - Diwan» افتتحت مؤخرًا ثالث محل لها في الزمالك وهو محل خاص بأدوات وألعاب الأطفال، ورغم أن سلسلة ديوان أصلًا متخصصة في الكتب، إلا أن المحل ده مافيهوش حاجة غير اللعب وإكسسوارات الحفلات. المحل موجود في شارع 26 يوليو بين «ولعة» و«قرطاسية ديوان». المحل مساحته صغيرة نسبيًا، وتحس أنه مش متشطب تمامًا! وأنه لسه محتاج شوية شغل. ولأننا تعودنا على محلات «ديوان» وأنها دائمًا مرتبة وبـ تعرف توصل للي عايزه بسهولة، لاقينا المحل هنا مش مرتب والمعروضات مرصوصة بشكل عشوائي. اللعب مصنفة حسب سن الأطفال ومعظمها ألعاب تعليمية. فيه ألعاب ماركة 4M، وأدوات تعليم الأطفال كيفية تنقية ماء الشرب أو كيفية عمل سيارة من الزجاجات الفارغة، وإزاي تعمل روبوت بالعلب الصفيح وإزاي تعمل عربية بالأسطوانات المدمجة أو الـ CD. ألعاب مبهرة مش للصغار فقط لكن لنا إحنا شخصيًا، والأسعار معقولة، يعني الأدوات التعليمية دي أسعارها بـ تبدأ من 70 جنيه، وعجبتنا جدًا مجموعة ألعاب الحضارة البشرية أو Civilization وسعرها 150 جنيه، وممكن من خلالها تبني أهرامات الجيزة أو قلعة "ماتشو بيتشو" الخاص بحضارة الأنكا في أمريكا اللاتينية، أو تعيد بناء مدينة "أطلانتس" المفقودة. ألعاب ثانية متوفرة زي الليجو (118 جنيه) للحجم الصغير، ومجموعة مختلفة من البازل ومعظمها لشخصيات وعوالم ديزني وبـ تبدأ من 70 جنيه. وممكن تجيب شخصية الأستاذ أو مدام بطاطس الشهيرة بـ 40 جنيه، وهـ تلاقي حاجات ثانية تنفع هدايا للكبار، وللبنات الصغيرين المثقفات فيه لاب توب Hello Kitty البمبي بسعر 375 جنيه. تشكيلة كبيرة من شنط الهدايا والكروت، لكن مافيش فيهم حاجة مميزة والشنط كان فيه منهم مجموعة في «قرطاسية ديوان». فيه قسم للمعروضات المتنوعة اللي مش شبه بعضها، زي صناديق الأكل البلاستيكية (Lunchbox) بـ 25 جنيه، وأدوات تلوين الوشوش (40 جنيه) والستيكرز اللي بـ تلمع في الظلمة (25 جنيه) وقريب من الكاونتر فيه مجموعة من إكسسوارات الحفلات وأغطية الرأس (12 جنيه) ومجموعة من الأكواب بـ 6.5 جنيه. لو بـ تدور على هدية لطفل نابغة وغير عادي هـ تلاقي ضالتك في «ديوان». من أغرب الألعاب في المحل لعبة عبارة عن قطع سوشي من الخشب بـ تتفك وتتركب علشان تكِّون وحدات سوشي مختلفة، وهي غريبة شوية على ثقافة الأطفال المصريين، وسعرها كان 222 جنيه. «ديوان أطفال – Diwan Kids» عندهم مجموعة كبيرة من ألعاب الذكاء لكن مش أكثر من محلات ثانية كثير في القاهرة، لكن لو لقيت نفسك مستعجل ومحتاج هدية أو قطعة إكسسوار معينة ومش عايز تخرج خارج الزمالك روح على هناك فورًا.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن