مصر الجديدة تسوق in Cairo, Egypt

تسوق

كابرون نيتس: إكسسوارات يدوية ملفتة على المتجر الإلكترونى فى القاهرة
اصدرت في: 05/01/2015

كلنا عارفين أن مع دخول جو الشتاء المرعب، كل اللى بـ نحتاجه هو شوية بطاطين تحمينا من البرد. البطاطين دى صحيح ممتازة لحمياتنا من الصقيع، لكنها مش مقبولة من وجهة نظر الموضة، أو حتى المجتمع، من هنا، قررنا نتفرج على "كابرون نيتس - Kaprun Knits" بحثًا عن أشكال شتوية مناسبة. المصممة فيكتوريا كالينينا بـ تعرض منتجاتها اليدوية الصنع على كل منصات التواصل الإلكترونى من منتجات كروشيه متنوعة. من مجموعة كبيرة من الكوفيات المضفرة (400 جنيه) لأغطية رأس مريحة (420 جنيه) وكوفيات بشراشيب (390 جنيه)، مع غطاء (90 جنيه) وقواعد للأكواب، بالإضافة لبندانات رأس (180: 200 جنيه)، وكلهم تقدرى تلاقيهم على حسابات المتجر المُصممة بشكل فنّي على إنستجرام وفيسبوك، كمان بـ يقدموا ربطات عنق (95 جنيه)، وبندانات رأس للأطفال (130 جنيه). قررنا نتواصل مع فيكتوريا ونطلب منها باندانا للرأس من الصوف، وفورًا وصلنا ردّها. بعد ما ناقشنا مع المصممة اللطيفة الاختيارات المتاحة، استقرينا على باندانا عنّابى متوسطة الحجم (180 جنيه). أكثر حاجة عجبتنا كانت المرونة فى اختيار اللون، وكمان الحجم. الألوان المتوفرة عددها لا نهائى، من درجات قوية من البرتقالى، البنى والأحمر لدرجات ألوان خفيفة من الأزرق، والرمادى، والبنفسجى والأخضر مع ألوان ثانية متعددة. طلبنا كان جاهز للتسليم بعد ما اتفقنا بيومين، واستلمناه من مقر فيكتوريا الرئيسي فى هليوبوليس. بعد ما شوفنا التعبئة، تأكدنا أننا فى انتظار مفاجأة رائعة داخلها؛ الباندانا كانت مُزيِّنة بأشكال الكريسماس المحبوبة مع كتابات يدوية جميلة. الباندانا قدرت مش بس تحقق توقعاتنا، لكنها كمان تجاوزت المرحلة دى، مقاسها كان مضبوط، وتحسها مريحة لكن فى نفس الوقت مُستقرة فى مكانها. اللون كان بالدرجة اللى تخيلناها. كابرون نيتس اسم إلكترونى ساحر عنده قدرات مميزة؛ أى صور هـ تشوفيها من منتجاتهم الرائعة أكيد تقدرى تطلبيها. عجبنا عندهم دقة المواعيد وطريقة تغليف كل حاجة بأبسط وأجمل الطرق اللى شوفناها فى حياتنا، أكيد هـ نتابع صفحتهم باستمرار، ومنتظرين على نار تصميماتهم الجديدة.

...

بت شوب: كشك حيوانات أليفة على القد فى سيتى ستارز، هليوبوليس
اصدرت في: 19/03/2014

فى وجود عدد رهيب من محلات القاهرة كلها مخصصة للملابس، كثير من أصحاب الحيوانات الأليفة بـ يحسوا بالإحباط من صعوبة الوصول للحيوانات، وأكلهم وإكسسواراتهم، والسبب قلة عدد المحلات المتخصصة فى تلبية احتياجات ذوات الأربع. على العموم، الطلبات الكثيرة نتج عنها خلق منافسة فى السوق ده. فى مكان مستخبى جوه كشك صغير فى سيتى ستارز المرحلة الثانية، "بت شوب -Pet Shop" بـ يجذب حشد من الناس عاوزين يشوفوا مجموعة الحيوانات الصغيرة المعروضة للبيع. المكان مساحته صغيرة شوية، سهل تلاحظه من زقزقة البغبغانات المعروضة. المحل مع بيعه للطيور، عنده كمان عدد من سمك النهاش بودانه الحمراء وسلاحف موجودين فى حوض سمك محاكى لبيئتهم الطبيعية. أصناف السمك مافيش أكثر منها، من سلالات تقليدية من السمك الذهبى لغاية سمك يابانى مقاتل فريد من نوعه وسمك كوى الجميل. عامل الجذب الرئيسى بصراحة كان سحلية الإجوانا والحرباء الموجودين فى أول المحل. الموظفين هناك ودودين بشكل رائع وبـ يسمحوا باللعب مع بعض الحيوانات، تحت إشرافهم أكيد! معظم الحيوانات الصغيرة دى أسعارها غالية بالمقارنة بباقى محلات الحيوانات الأليفة الأقل مستوى من "بت شوب"، سمك النهاش سعره يبدأ من 50 جنيه، بس ممكن تفاصل ويوصل سعره 30 جنيه، أو 20 جنيه لو كنت مصمم. بت شوب كمان بـ يبيع إكسسوارات وأكل لأصدقائك الصغيرين أصحاب الفرو. أطواق وأحزمة للكلاب معروض منها سلك أو قماش، والأخير متوفر بمجموعة مختلفة من الألوان والتصميمات. ألعاب للمضغ ولعب ثانية برضه متوفرة، بس عددهم قليل جدًا. تشكيلة حلويات القطط والكلاب على قدها، بس متنوعة كفاية. أكثر مجموعة أكل موجودة مخصصة للحيوانات المعروضة، زى السلاحف (15 جنيه)، السمك وأكل للطيور. معروض كمان أقفاص، أحواض سمك وخزان للزينة، مع حاوية حجمها متوسطة مناسبة لسلحفتين ثمنها 250 جنيه. رغم أنه بعيد كل البعد عن الإبهار الموجود فى المحلات الأكبر، "بت شوب" يعتبر إضافة جديدة مختلفة لمحلات الهدوم والمطاعم الموجودة فى نفس الدور.

...

رستون: محل ساعات عريق في مصر الجديدة
اصدرت في: 05/03/2014

موجود في نهاية شارع إبراهيم اللقاني بالقرب من قصر الاتحادية بمصر الجديدة، محل صغير يا دوب تقدر تدخل لوحدك بالجنب علشان توصل للكاونتر اللي قاعد عليه صاحب المحل، محل «رستون» من أقدم محلات الساعات في المنطقة، مشهور في الأصل بأنه بـ يصلح ويركب قطع غيار للساعات بأنواعها المختلفة، لكن بجانب ده عنده موديلات محدودة من ساعات اليد الكوارتز أو العقارب والساعات الرقمية، وكله معروض في واحدة من أصغر الفتارين اللي شوفناها في حياتنا، لكن ده ما يمنعش أنك عينك هـ تزغلل من كثر الساعات المعروضة وهـ تلاقي نفسك واقف مدة طويلة مستمتع بكل التشكيلة دي، والأسعار المكتوبة على كل ساعة هـ تغريك أنك تدور أكثر يمكن تلاقي أرخص، وهو ده الحلو في المحلات القديمة اللي بـ تتبع الطريقة الكلاسيكية في العرض، وبـ تخلينا في بعض الأحيان نفضلها عن المحلات الكبيرة الموجودة في المولات والشوارع التجارية الكبرى. بـ نشوف محل «رستون» من بعيد وكنا مش متخيلين أننا في يوم من الأيام ممكن نكتب عنه، لأنه زي ما قلنا أصغر من اللازم، ومستخبي أكثر من اللازم، لكن بمجرد ما قربنا منه لاقينا أنه يستاهل فعلًا أننا نعرف الناس به، لأنه بجانب التصليح بمهارة ودقة فائقة وده عن تجربة بعض أصدقائنا هناك، لقينا عنده ساعات من ماركات عالمية أصلية بأسعار كويسة جدًا، بجانب مجموعة من الساعات غير الأصلية أو الـ First Copy زي ما بـ يقولوا وهي أحسن درجات التقليد من موديلات سويسرية زي تاجور ورولكس وزينيث وأيدوكس وتيسوت، الموديلات الأصلية من الساعات دي أسعارها بـ تتراوح ما بين 25000 لـ 35000 جنيه وفيه موديلات طبعًا فيها ماء ذهب وأحجار كريمة بـ توصل لأرقام خيالية، لكن هنا هـ تلاقي كل الموديلات اللي تتخيلها وبتقليد عالي الجودة مش هـ تقدر تفرقه عن الأصل، وبمكونات يابانية أصلية وبأسعار من 400 لـ 1000 جنيه بس، الفرق هنا أنها مش ضد الماء، وطبعًا مش بالضمان. نروح بقى للموديلات الأصلية وهي ألبا وسيتزن وكاسيو، أسعارها زي التقليد تقريبًا من 400 جنيه لحد 900 جنيه، موديلات أنيقة جدًا ومعظمها رجالي، أستيك معدن أو جلد أسود وبني، وممكن تغير أستيك أي ساعة أو تبدل المعدن بالجلد أو العكس، فيه كمان موديلات الـ Q&Q بأسعارها اللي في متناول الجميع، من أول 70 جنيه لحد 180 جنيه ممكن تجيب ساعة حلوة وعملية. والساعات الرقمية هنا كلها كاسيو، وهـ تلاقي الموديلات الكلاسيكية منها وأشكال رياضية حديثة، وفيه ستوب ووتش كمان بـ 70 جنيه. وطبعًا الميزة الأهم في الموديلات الأصلية دي أنها ضد الماء. ميزة المحل ده أنك بـ تحس بتكلف وأنت واقف تتفرج أو بـ تستفسر عن أي حاجة، كأنك واقف مع واحد صاحبك بـ تسأله عن رأيه في مواصفات الساعة وشياكتها، لكن كان نفسنا يبقى فيه مراية علشان نعرف نشوف الساعات من بعيد، شكلها بـ يختلف برضه. تجربتنا في «رستون» كانت حلوة علشان الأمور فيه كانت واضحة؛ الأصلي واضح والتقليد واضح، والفرق معروف، مافيش خداع أو تضليل زي ما بـ نشوف في محلات ثانية وللأسف بـ تبقى مشهورة ولها سمعة.

...

موتو لايف: معرض جديد للسكوتر ومستلزماته في مصر الجديدة
اصدرت في: 09/02/2014

الموضوع ما بقاش مجرد هواية أو وسيلة انتقال استثنائية أو ترفيهية، فكرة السكوترز Scooters بقيت مسيطرة على دماغ ناس كثير، اللي بـ يفكروا فيها كوسيلة انتقال عملية مع زحمة المرور وأزمات الوقود، ده غير أن لها ستايل مميز في الشكل غير الموتوسيكلات العادية أو الموتوسيكلات الرياضية فائقة السرعة، هي حاجة كده شبه الـ Vespa الإيطالي القديمة لكن بتصميمات عصرية وشبابية أكثر، مريحة في الاستخدام واقتصادية في الوجود وأسعارها معقولة جدًا، لكن بما أننا مش بصدد شرح مميزات السكوتر في المقال ده فإحنا هـ ندخل في الموضوع ونحكي لكم على تجربتنا في «موتو لايف – Motolife» المتخصص في السكوترز بموديلاته المختلفة، وبـ يبيع كل الإكسسوارات والكماليات الخاصة بعالم الموتوسيكلات، وده كان الفرع الأحدث لسلسلة المحلات المشهورة في مدينة الرحاب والشروق وفي القاهرة الجديدة، الفرع الجديد في في شارع حسن أفلاطون اللي أمام مبنى الرقابة الإدارية مباشرة في شارع النزهة في مصر الجديدة. معرض كبير نسبيًا، فيه مساحة داخلية كافية لعرض المركبات، مش بـ يستغل الرصيف اللي أمامه للعرض زي ما كثير من محلات الموتوسيكلات بـ تعمل، دخلنا المعرض وبدأنا نتفرج على الموديلات المختلفة ولاحظنا أنه بـ يشتغل في 3 ماركات بس في السكوترز وهم الـ sym والـ Kymco والـ Daelim الكوري. الأسعار هنا أغلى شوية من باقي المعارض اللي بـ تبيع الموديلات نفسها، وتفسير موظف البيع لده أنهم شركة موثقة وبـ تقدم ضمان حقيقي وعندها مراكز صيانة في كل الفروع اللي ذكرناها، لكن أكيد ده مش مبرر كافي بالنسبة لما يبقى سكوتر في كل مكان بـ 9000 جنيه مثلًا ونلاقيه هنا بـ 9600 جنيه، لكن المهم هنا أن الخدمة جيدة والموظف متعاون جدًا وشرح لنا كل التفاصيل لأننا مش خبراء في عالم الدرجات البخارية. موديلات الـ sym كلها موجودة بدءًا من الـ Fiddle التقليدي بسعر 7000 جنيه والـ Jet 4 بـ 9200 جنيه والـ Symphony بـ 9600 جنيه، كل الموديلات دي بسعة محرك 150 cc وده اللي بـ ينصح به لأي حد بـ يركب دراجة بخارية لأول مرة في حياته، الموديلات دي فيه منها الألوان الأسود والأبيض والأحمر والأزرق، لكن اللي كان في العرض كان الأبيض فقط، ولو عاوز تشوف لون مش موجود يبقى لازم تكون هـ تشتريه وتدفع عربون 200 جنيه علشان يجيبوه من المخزن، طيب أومال فائدة المعرض إيه! الموديلات الـ 300 cc شكلها أفخم وأشيك كثير، حجمها أكبر وفيه منها الألوان الغامقة المطفية أو الـ Mutt وأسعارها كالتالي: الـ sym 300 بـ 28,000 جنيه والـ Kymco الـ Joyride والـ Roar بأسعار من 32,000 جنيه فما فوق، والـ Daelim المصنوع بالكامل في كوريا ومستورد من هناك وهو من نقاط القوة المميزة للمحل وفيه منه وموديلات الـ K-XCT والـ GTS 300i وأسعاره بـ تبدأ من 25,000 جنيه. الموديلات الـ 200 cc ناقصة هنا في المحل، وناقصة عمومًا في مصر، لكن هم قالوا لنا أن فيه شحنة جاية شهر أبريل اللي جاي. وفيه موديلات محدودة من البيتش باجي والموتوسيكل العادي لكن بما أنها مش التخصص هنا فما سألناش عنها بالتفصيل. خوزات ماركة Zeus بكل الأشكال والأحجام والألوان بأسعار من 350 لحد 800 جنيه اللي بـ تغطي الرأس تمامًا، وفيه سترات واقية وقفازات وأقفال للأمان ونظارات وغيرها من الكماليات معظمها صناعة صينية لكن شكلها ظريف وأسعارها كويسة. لو عاوز صالة عرض تشوف فيها أنواع وأحجام السكوترات المختلفة وتعمل مقارنة بينها وبين بعضها علشان تختار صح، بـ نرشح لك «موتو لايف» بكل فروعه، وحاول تفاصل في السعر شوية، بس الأكيد أنك هـ تلاقي خدمة مميزة أثناء جولتك داخل أي من المعارض الخاصة به.

...

العجيل: إلكترونيات وأدوات كهربائية وإكسسوارات في مصر الجديدة
اصدرت في: 06/02/2014

أشهر من نار على علم، لكن عدى 4 سنين تقريبًا من عمر كايرو 360 من غير ما نكون كتبنا عنه، كان لازم نسلط الضوء على محلات «العجيل» الشهيرة ونعرف اللي مش عارف هي ليه اتشهرت وبقيت من أهم محلات بيع الإلكترونيات والأجهزة المنزلية وخصوصًا الكهربية، وغيرها من الرفايع اللي مش بـ تلاقيها في أي حتة، وآخر ما تزهق هـ تلاقي حد بـ يقول لك: طيب سألت في العجيل؟ وتروح وتلاقيها في العجيل. عملنا زيارة لفرع المحل اللي في شارع بغداد في الكوربة في مصر الجديدة، على نفس الصف اللي فيه محلات TBS وڤودافون، تحت البواكي العريقة المميزة لشوارع مصر الجديدة. واجهة المحل ومدخله صغير وعلى الجانبين فاترينات عرض كبيرة فيها كل الحاجات الملفتة والترفيهية زي أجهزة ألعاب البلاي ستيشن والـ xbox والساعات وماكينات الحلاقة الكهربائية وغيرها من الحاجات اللي مالهاش علاقة ببعضها، لكن العلاقة الوحيدة اللي بـ تربطها أنها موجودة عند العجيل، وهـ نعطيكم أمثلة على الحاجات دي. من الداخل المحل كبير فعلًا، لكن بمساحة طولية داخلية، ممكن تمشي فيها وتتفرج على المعروضات المتنوعة من الأجهزة المنزلية زي المكانس والسخانات والتليفزيونات والأفران والميكرويف، كل الماركات موجودة وفيه موديلات مختلفة من كل ماركة كمان. الحقيقة ما كانش تركيزنا على الأجهزة الكهربائية وقت الزيارة أولًا لأنها موجودة في أماكن ثانية كثير أكثر تخصصًا، وثانيًا لأن أسعار العجيل بشكل عام بـ تبقى أغلى بحاجة بسيطة من مناطق زي شارع عبد العزيز وباقي المحلات اللي بـ تبيع أجهزة منزلية وبس. فكان تركيزنا على الحاجات غير التقليدية والكماليات اللي قولنا عليها، واللي أغلبها ينفع يُقدم كهدايا، وفيه حاجات لهواة الاقتناء وأصحاب الهوايات الخاصة. موبايلات سامسونج وآي فون بكل موديلاتها، تقريبًا مافيش أنواع ثانية، وأجهزة بلاي ستيشن 3 معدلة بأسعار من 2500 لـ 3000 جنيه حسب الملحقات اللي معاها، وفيه xbox ومعاه وحدة الـ Kinect و5 ألعاب ومعدل برضه بسهر 3100 جنيه. ولسه فيها أجهزة بلاي ستيشن 2 بأسعار مميزة، بـ 890 جنيه تقدري تشتري واحد ومعاه 2 ذراع و10 ألعاب. وفيه مساحة كبيرة من الواجهة مخصصة لماكينات الحلاقة بالكهرباء من ماركات فيليبس وبراون وموسر الألمانية، من أول موديلات حلاقة الشعر العادية للـ Trimmer المخصصة للذقن وتضبيط الشارب والحاجات دي، فيه موديلات ألماني أصلي أسعارها بـ توصل لـ 1200 جنيه، وفيه موديلات مصنوعة في الصين أسعارها من 150 لـ 600 جنيه، مش وحشة برضه بس لازم تتأكد أنت بـ تدفع فلوسك في إيه. الساعات ماركة Guess و Alba هي المسيطرة على فاترينات «العجيل» وهي ساعات كوارتز أقرب للكلاسيكية، مافيش موديلات كثير معروضة لكن الموجود شيك فعلًا وأصلي، أسعار من 600 جنيه لحد 1300 جنيه، مناسبة جدًا للهدايا وللأناقة طبعًا. وفيه مجموعة من الكاميرات الديجيتال ماركة Nikon وSony بأسعار من 1500 لـ 3500 جنيه، وغالبًا هـ تلاقي عروض على كل المعروضات طوال السنة، والسعر مكتوب ومشطوب عليه ومكتوب السعر الجديد جنبه والحاجات دي، بس ما ننكرش أن الطريقة التسويقية دي ناجحة جدًا في مصر. هنا من الأماكن القليلة الللي ممكن تلاقي فيها نظارات مُعظمة (400 جنيه) وبعض معدات الصيد، وبايب وولاعات أنيقة وبعض الإكسسوارات المنزلية اللي ممكن تستخدمها كتحف أو ديكورات، ولو خطر في بالكم أي حاجة غريبة مش عارفين ممكن تلاقوها فين بـ ننصحك تسأل في أي فرع من فروع العجيل الموجودة في مصر الجديدة والمهندسين والعجوزة والتجمع الخامس ووسط البلد والمعادي، ولغاية دلوقت إحنا مش عارفين الفرق بين اسم "العجيل" و"رضوان العجيل" ومش فاهمين لو كان حق امتياز أو انفصال بين شريكين، لكن المهم أنهم بـ يبيعوا نفس الحاجات تقريبًا، وبـ يعملوا عروض تقسيط معقولة، لكن كل فرع له شروط مختلفة يفضل تسألوا عليها وأنتم هناك.

...

إس إم جاليرى: صالة عرض أثاث كلاسيك فى هليوبوليس
اصدرت في: 21/01/2014

موضة الأثاث الكلاسيك للأسف أصبحت من التقاليد المصرية القديمة، وده أدى أن شعبية كثير من محلات الأثاث الشهيرة تتراجع بشكل كبير. عمومًا فيه وجهات نظر بـ تقول أن الإنتاج بكميات كبيرة أثر على جودة الإكسسوارات المنزلية والمفروشات، والناس ساعات بـ ترجع من ثانى للصنايعى الشاطر علشان توصل لأثاث كلاسيك محترم. مع تأسيسه فى 1985، "إس إم جاليرى - SM Gallery" قدر يتعايش مع العصر الحديث عن طريق مرونته، ومزج الحرف المتوارثة مع التصميمات المتوارثة. الجاليرى مكانه فى شارع جانبى هادئ من شوارع هليوبوليس، مكون من صالة عرض صغيرة فى الدور الأرضى من مبنى سكنى. مع دخولنا، رحب بنا شخص شديد الاحترام قاعد وراء مكتب كلاسيك من الخشب. المحل كان مزدحم بأربعة أذواق من الأثاث وكمية كبيرة من عينات القماش الخاصة بشركة الأقمشة "دماسك". من حسن حظنا أنه تركنا لدماغنا من غير أى تدخلات فضولية أو محاولات مزعجة للبيع طوال وقت زيارتنا. رغم أن الشركة بـ تنتج أثاث لأكثر من غرفة، معظم المعروض كان مخصص للصالونات. القطع الموجودة إما على طراز فرنسى/ فيكتورى، مع مخدات رقيقة، دلايات ستائر للزينة وقماش فخم، أو قطع بإطار من الخشب، يزينه نجارة شيك وتركيبات ديكور مميزة. المجموعة تبدأ من 16000 جنيه وشمل كنبة وكرسيين، أما ترابيزات القهوة تكلفتها من 3000 لغاية 4000 جنيه. القماش المعروض بـ يُباع بالمتر، سعره بين 150 و1000 جنيه بطباعة غامقة وخفيفة، والألوان خريفية رزينة من الأحمر، الأخضر والبنى. إس إم جاليرى يفتخر باستخدامه أسطح سيراميك مستوردة، ودائمًا بـ يحاول يراعى الميزانية الشخصية وذوق العميل. بجانب تقديمه لخطوط أثاثه المعتادة، الجاليرى كمان بـ يقدم خدمات التصميمات الداخلية، تخطيط المنازل والديكورات. رغم قلة عدد الاختيارات المعروضة، إس إم جاليرى عنده كتالوج تفاعلى فى المعرض بـ يتيح لعملائه البحث إلكترونيًا وسط عدد منتجات الشركة الضخم، وكمان عمل تعديلات شخصية على اختياراتهم. رغم أن كل الأعمال التجارية المتوارثة بـ تكافح فى مواجهة المصانع العالمية، إس إم جاليرى أثبت أن الحرفة المتقنة لأقصى درجات الجودة والمرونة عادة بـ تتفوق على الماركات.

...

فورتشن: ماركة الإكسسوارات ومستحضرات التجميل العالمية دلوقت فى مول صن سيتى
اصدرت في: 15/01/2014

الماركات العالمية تشبه حبيبات الذهب وسط مشهد التسوق القاهرى، كون المنتجات المستوردة هى الاختيار الوحيد للوصول لجودة عالية. مع وجوده بالفعل فى كثير من مراكز تسوق القاهرة، دلوقت فرع جديد لـ "فورتشن-Fortune" وصل صن سيتى مول فى هليوبوليس. بتقديمه لمجموعة مبهرة من كل حاجة بداية من شنط يد ماركة جيفنشى وشنط سفر ديلسى، لغاية مستحضرات تجميل من بورجوا، وطلاء أظافر من سيبال Cybele، وعطور تيرى ماجلر Theirry Mugler وخطوط العناية بالبشرة من كلارينز، المحل مكون من أقسام كل واحد فيهم اسمه واضح ومنتشرين فى مكانه الواسع فى الدور الثالث. فورتشن بإضاءته المبهجة وشكل العرض المميز دائمًا بـ يقدم عروض دعائية تشجع المتسوقين المترددين يدخلوا المحل. المحل له مدخلين، واحد يدخلك مباشرة لقسم الشنط بماركاته زى جيفنشي، جينزات كالفين كلاين وروكوباروكو. مع موضة كل الموسم، فورتشن بـ يعرض مجموعة ملابس للموسم الحالى ببطاقة سعر عليها أسعار تبدأ من 500جنيه. جزء من المعروضات الباقية من الموسم السابق ممكن تلاقى عليها أسعار مخفضة لكن لمدة أسابيع قليلة. بجانب شنط اليد، فورتشن كمان بـ يقدم قمصان رجالى ماركة فالنتينو وأرمانى معروضة بشكل شيك فى أدراج مقفلة. الدور الثانى هو المدخل الرئيسى المؤدى لأقسام العطور المليانة بماركات دافى دوف، تيرى ماجلر، شانيل، ديور، جيفينشى، نينا ريتشى وأسماء ثانية لها نفس الشهرة. على اليمين، فورتشن بـ يعرض قسم كبير مخصص كله لخطوط العناية بالبشرة لكلارينز، لانكوم، إستى لودر وكلينيك. الأسعار تتراوح بين 200جنيه و800 جنيه على حسب الحجم والتركيبة لمستحضر العناية بالبشرة. نرجع للوراء شوية، قريب من مكتب الكاشير الدائرى، فورتشن خصص ركن صغير حجمه صغر بشكل واضح من وقت آخر زيارة لنا بحيث يعرض مجموعة محدودة من مستحضرات التجميل وطلاء الأظافر، منها الماركة المحلية الاقتصادية والمحبوبة فى نفس الوقت، سيبال، الاسم الفرنسى الشهير بورجوا، الماركة البريطانية آفون، والشركة الأمريكية الشهيرة ريفلون.من ناحية السعر مافيش شك أن سيبال هى الأرخص، بتكلفة طلاء الأظافر حوالى 14جنيه. على العموم، كحل عين عادى جدًا من بورجوا هـ يزود فاتورتك بقيمة 44 جنيه. قسم ملابس البحر والملابس الداخلية مستخبى فى الخلف وراء حائط، نوعًا ما عادى ومافيش اهتمام كبير به. معظم ملابس البحر المعروضة مايوهات بيكينى عليها رسومات محرجة وزخرفة بـ تزين القماش. على النقيض، فورتشن بـ يقدم مجموعة مبهرة من شنط ماركة ديلسى الشهيرة بمتانتها وألوانها المبهجة. صحيح أغلب المتسوقين العاديين غالبًا مش هـ يفكروا يدخلوا فورتشن إلا فى وجود عروض، لكن مستهلكين ثانيين من المهتمين بالماركات هـ يفرحوا بوجود مكان فيه أفضل خطوط المنتجات لأغلب الأسماء الشهيرة فى السوق.

...

لازار: بدل رجالي أنيقة في محل صغير بالكوربة
اصدرت في: 05/01/2014

بـ نشوف المحل ده من أكثر من سنة فاتت، صغير لدرجة أنك ممكن ما تأخذش بالك منه، وكمان مش موجود في شارع رئيسي في منطقة الكوربة العامرة بالمحلات، لكن محل «لازار - LaZar» موجود في شارع الصومال المتفرع من شارع بغداد وواجهته صغيرة ومش ملفتة بالمرة، وكمان مش عليه أي يافطة بـ تقول أي حاجة، مجرد فاترينة زجاجية فيها عدد من البدل الرجالي بالألوان الغامقة وبوابة صغيرة تدخل منها على المحل اللي مساحته مش بطالة من الداخل، لكن بشكل طولي وعلى الجانبين معروض عدد كبير من البدل وفي نهاية المحل مجموعة من الأرفف للقمصان. تخصص محدد جدًا، بدل رجالي وبس، بدل كاملة كمان مافيش هنا بليزر أو بالطو، المحل معتمد على مستورد مهم من تركيا بـ يجيب منه أحدث الموديلات والقصات الإيطالية اللي عليها بادجات بماركات مش مشهورة، لكن بتقفيل عالي الجودة وستايلات ممتازة زي الموجودة في أشهر بيوت الموضة في أي مكان في العالم مش في مصر بس، ومدير المحل وموظف البيع اللي هناك كمان شاطرين ومتابعين إيه اللي بـ يحصل في خطوط الموضة العالمية وبـ يساعدوا الزبون أنه يلبس اللي حاجة اللي تليق عليه مش بس الحديثة أو المختلفة. تجربتنا كانت جيدة جدًا لأنها كانت بسيطة ومريحة جدًا، ما تعبناش في التدوير على أي حاجة، البدل السوداء والرمادي هي المسيطرة على كل المعروض باستثناء عدد من البدل باللون الأزرق الفاتح المناسبة أكثر لمناسبات الخطوبة، وفيه بدل للأفراح طبعًا بالساتان الأسود المميز، الأسعار كمان كلها قريبة من بعضها، كلها من 1100 لحد 1300 جنيه، وده بعد شوية خصومات وصلت لـ 20 % في بعض الموديلات، القمصان هنا بالألوان السادة والخطوط الرفيعة فقط علشان تبقى مناسبة للبدل، سعرها واحد هو 160 جنيه، وقصتها Slim fit طبعًا زي البدل اللي كلها بلا استثناء Slim Cut ومطابقة للجسم تمامًا وفيه منها موديلات بزرارين في الجاكيت وبعضها بزرار واحد وشكلها حلو ومختلف نوعًا ما، بس أقرب للكاجوال في رأينا ومناسبة أكثر للخروجات "ده لو حد بـ يخرج ببدل عادي يعني" أكثر من الشغل والمناسبات. المقاسات متوفرة من أول الأطفال تقريبًا أو أكبر شوية لحد مقاس 58 في الرجالي، وأحيانًا بـ يبقى فيه موديلات أكبر، والخامات كويسة جدًا وفيها لمعة بسيطة وأنيقة، فيه كمان كل الإكسسوارات الرجالي زي البابيون والكرافات والأزرار المعدنية، وبالمناسبة أنت ممكن تختار أي موديل من البدل وتغير الأزرار حسب رغبتك، وبـ يتم تقصير البنطلون وتضبيط الجاكيت في خلال ساعة زمن. «لازار» في رأينا هو المكان المناسب لشراء بدلة أنيقة بمواصفات جودة عالية بسعر معقول بدون الحاجة أننا نروح للمولات ومنافذ بيع المصانع في آخر الدنيا.

...

إيجل: ملابس رجالي بأسعار جيدة في مصر الجديدة
اصدرت في: 31/10/2013

محل جديد لفت نظرنا في مصر الجديدة، وبالتحديد في شارع النزهة قريب من أرض الجولف، هو محل «إيجل - Eagle» للملابس الرجالي الكاجوال والكلاسيك، ويمكن الكلاسيك أكثر شوية، من بعيد وأنت معدي أمامه مش هـ تشوف غير البدل الكاملة والسموكن والبليزرات، لما تدخل جوه هـ تلاقي مجموعة من الجينز والبول أوڤر والقمصان الكاروهات الشتوية. لكن التركيز الأكبر هنا وحتى البضاعة الجديدة اللي كان العمال في المحل منهمكين في رصها وتوزيعها على الأرفف وقت زيارتنا كانت كلها كلاسيك، وفيه مجموعة كبيرة من الإكسسوارات زي المحافظ والأحزمة الجلدية والكوفلينكس (أزرار القميص) وفيه عدد كبير من الأحذية الكلاسيكية، ومجموعة صغيرة من الأحذية الكاجوال والشامواه والموكاسان اللي شبه السبدرين. المحل مساحته مش كبيرة لكن المعروضات متنوعة وكثيرة بدرجة ملفتة، هـ تلاقي كل حاجة تقريبًا وكل الأذواق، والظريف أن الأسعار هنا قليلة بجد، يعني صف السويترات الجلد الموجود في منتصف المحل أسعاره من 300 لـ 400 جنيه، وقصته ظريفة (slim cut) وألوانه حلوة فيه منه البني والأسود والرصاصي، بس المشكلة أن أكبر مقاس في السويتر هنا اللي هو XXL في مقام اللارج العادي في أي محل ثاني، والتقفيل مش ممتاز لكن معقول بالنسبة للسعر. علامة «إيجل» التجارية موجودة على موديلات كثير من البليزرات والأحذية والجينز، لكن في الوقت نفسه المعروضات كلها مستوردة، من الصين وتركيا وغيره، لكن علامة إيجل اللي حاطينها بـ تبقى للتمييز مش أكثر. البليزر بأسعار من 350 لحد 500 جنيه وفيه مجموعة كانت بـ 900 جنيه وعليها خصومات 50 % لأنها من موديلات السنة اللي فاتت، قصتها كلها ومصنوعة من الصوف والكتان والقطن العادي، موديلاتها كاجوال بزيادة أو كلاسيك تقليدي، أذواق كثيرة موجودة هنا وألوان عجيبة زي النحاسي والأخضر، بس برضه مشكلة المقاسات موجودة وهـ تتعب على ما تلاقي المقاس لأنهم بـ يدوروا في المخازن واللي أنت فاكر أنه لارج بـ يطلع هنا medium فلازم تطلب أكبر من مقاسك بدرجتين ولا حاجة. الجينز بأسعار من 200 لـ 350 جنيه، وما ننصحش به خالص هنا لأن موديلاته عتيقة وقصاته وألوانه وواضح أنه جايبه المحل من باب أنه يبقى عنده كل حاجة وخلاص، لكن البدل الكلاسيك كانت خطيرة وتستاهل أنك تقضي كل وقتك داخل المحل بـ تتفرج عليها وبـ تقيس في موديلاتها المختلفة، وأسعارها من 1100 جنيه لحد 1600 جنيه، والأحذية بـ 350 لحد 500 جنيه وعجبنا جدًا بعض الموديلات الكلاسيك بلمعة وتصميم جذاب مش شبه الموجودة في أي مكان ثاني، والكوفلينكس بـ 100 جنيه والأحزمة والمحافظ الجلدية في نفس الحدود، وبالمناسبة هنا هـ تلاقي نوع معين من المحافظ مش بـ نلاقيه في أي حتة وهي المحفظة الكلاسيكية المعمولة مخصوص للبدلة، بـ تبقى طويلة كدة وفيها خانات كثير للكروت، وفيه طبعًا كرافتات وبابيون وشرابات وكل ما يلزم الملابس الرسمية للرجال. عجبنا محل «إيجل» وعجبنا أنه مش مبالغ في أسعاره، وعجبنا أن العاملين سايبينك تتفرج براحتك ومش بـ يقربوا إلا لو أنت سألت على حاجة.

...

باث أند بودى وركس: جنة من مستحضرات التجميل فى مول صن سيتى، هليوبوليس
اصدرت في: 30/10/2013

رغم كل مشاكل الاقتصاد اليومين دول، رحلة التسوق فى القاهرة مستمرة فى النمو والتوسع. ومع افتتاح سلاسل عالمية جديدة فى أرقى تجمعات التسوق القاهرية، مول صن سيتي استقبل "باث أند بودى وركس- Bath & Body Works" فى الدور الثالث. مع إضاءته المبهرة وتنظيمه المتقن، المحل بـ يشع بالروائح الرائعة والألوان المبهجة. بعد دخولنا على طول، خطف أنظارنا عرض كبير فيه أفضل عطور باث أند بودى وركس وهو "Dark Kiss" المناسب جداً لسهرات الخريف الباردة. كل أقسام المحل مُعنونة بطريقة ذكية على حسب الصفة المميزة لرائحة المنتج؛ دافئ ومريح، واثق وجذاب، رومانسى ورقيق، ومنعش ولعوب. الطريقة دى سهلت معاناة التسوق بحيث نقدر نختار طلبنا من مكانه المحدد. المفضل بالنسبة لنا فى الحقيقة كان من قسم "واثق وجذاب" وهو (Japanese Cherry Blossom) ومن قسم "رومانسى ورقيق" كان (Sweet Pea and Paris Amour). كل مجموعة من العطور متوفر منها سائل الاستحمام الخاص بها (135 جنيه)، حمام الرغاوى (100 جنيه)، مرطب عطرى للجسم (175 جنيه)، كريم للجسم (135 جنيه)، وعطور (265 جنيه). منهم على سبيل المثال خط Cashmere Glow line، يشمل مرطب جسم لامع (175 جنيه) وزبدة للجسم (130 جنيه). وقت زيارتنا، كانوا بـ يقدموا حملة دعائية ملفتة هى "اشترى اثنين، واحصل على الثالث مجاناً"، وبـ يقولوا أنها مستمرة لفترة. باث أند بودى وركس قدر يسهل من التسوق بهدف شراء الهدايا، بعبواته الرائعة وشنط الماكياج، المليانة عينات من خط معين. سعر هدية صغيرة يتراوح بين 160: 365 جنيه أما المجموعات الأكبر تبدأ من 465 جنيه وتشمل ليفة استحمام، مرطب للجسم، سائل استحمام وكريم ترطيب ثلاثى. المحل كمان مخصص قسم للعطور المنزلية والإكسسوارات منها معطرات غرف مركّزة (90 جنيه)، صابون يد متنوع (50 جنيه)، وأجهزة لتثبيت معطرات الهواء (60 جنيه). بجانب كل اللي فات، خطوط منتجاتهم توسعت لتشمل كل العطور الطبيعية، قسم لكريمات الوجه True Blue Spa وحتى الرجال لهم قسمهم الخاص. على ذكر الرجال، القسم ده بـ يقدم غسول فيتامين للجسم بالنعناع الأخضر (125 جنيه) وكريم (145 جنيه) بالإضافة إلى غسول الوجه والجسم Barber المتوفر برائحتين-Confident Exotic Rich و Modern Bright Refined.خليك عارف كمان أن متوفر كريمات (90 جنيه)، عطور (250 جنيه) ومزيلات للعرق (140 جنيه). الحقيقة أن باث أند بودى وركس ملاذ لطيف عطرى لكل اللى عاوزين يستمتعوا بروائح لذيذة تدوم وقت طويل؛ سواء كانت لنفسك أو هدية لشخص عزيز عليك.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح