أحذية تسوق in مصر الجديدة Cairo, Egypt

تسوق

ناين ويست: ماركة أحذية عالمية فى صن سيتى مول بهليوبوليس
اصدرت في: 24/05/2013

الماركات المشهورة من الأحذية فى القاهرة قليلة ومكانها بعيد عن بعضها، بس صن سيتى مول اللى بـ ينمو بسرعة رهيبة فى القاهرة بـ يستضيف واحد من أشهر الأسماء فى العالم. اتولد ناين ويست Nine West سنة 1978 فى رقم 9 غرب شارع 57 فى كاليفورنيا، ودلوقت بقى مشهور فى أكثر من 60 دولة حول العالم بسبب جودة منتجاته من الأحذية والشنط الحريمى. دول حتى فتحوا فروع كثير فى القاهرة، وبكده قدر يوصّل الماركات العالمية لموضة شوارع القاهرة الراقية. مكانه فى الدور الثالث من صن سيتى مول هليوبوليس، وله شكله الموحد فى كل فروعه عبارة عن واجهة زجاجية بسيطة، يافطة معدنية لامعة وعرض أنيق. شباك العرض عنده القدرة أنه يشد محبى الموضة بمجموعته الأنيقة من الموديلات المختلفة، أحذية سواريه روعة، أحذية رسمية بكعب وصنادل صيفى بألوان مبهجة. أول ما دخلنا وجهتنا المظفة فى اتجاه المجموعة الجديدة وقالت لنا لو عاوزين نجرب حاجة هـ تكون قريبة مننا. معظم مجموعة الصيف كانت حلوة وألوانها روعة، وفى نفس الوقت بـ تتميز بأنها عملية فى استخدامها. حذاء بنصف خياطة مقلمة، تشبه أحذية البحر كانت غالية شوية بـ 999 جنيه، وفى نفس الوقت أحذية كعب عالى سعرها 499 جنيه. أحذية موكاسين moccasins جلد طرية ومسطحة موجودة باللون الأسود، والأبيض والأزرق الغامق (699 جنيه) ولو عاوزة شكل مختلف، أحذية بكعب مزينة بالخرز ومدورة من الأمام وشكلها جميل، وبرضه بنفس السعر. مجموعة البحر الموجودة زى شباشب بأصبع لونها أزرق فاتح (369 جنيه)، وكمان ذهبى ميتاليك وفضى (599 جنيه)؛ لفت انتباهنا صنادل برباط strappy sandals مزينة بالخرز وعليها نقشة تركواز وذهبى (599 جنيه). عندهم كمان صنادل بكعب قطة Kitten heeled sandals وده حيرنا شوية، هل النوع ده من الصنادل يعتبر موضة، ولا خلاص قدمت؟ ناين ويست برضه بـ يعرض عدد كبير من أحذية سوداء بسيطة بكعب، واللى يعتبروا من الأساسيات فى دولاب أى حد. شوفنا زوج جلد بكعب ارتفاعه معقول سعره 699 جنيه، وفى نفس الوقت زوج من الجلد المطفى بنفس السعر، وزوج ثانى أسود ساتان مدبب من الأمام، وعلي مقدمته خرز أسود ثمنه 799 جنيه. من ضمن المجموعة الكبيرة زوج له نعل سميك، مزين كله بترتر ذهبى كان سعره 839 جنيه. معظم الأحذية معروض جنبها شنط بمقابض بطريقة أنيقة تقدرى تكملى بها الطقم بأسعار تبدأ من 400 جنيه. بغض النظر عن شنط اليد الساحرة، ناين ويست بـ يقدم مجموعة صغيرة من شنط السفر، بس شوفنا شنطة يد جلد كبيرة قوى لونها بنى (599 جنيه) مع شنط سفر أزرق فاتح ورمادى، شنط بحر على شكل مركب وشنط يد روشة، بس فى الحقيقة مافيش حاجة بعينها شدت انتباهنا. يمكن أغلب الأذواق هـ تقدر تلاقى طلبها فى فرع صن سيتى مول، بس الجودة كانت واضحة على بعض القطع مش كلها. عمومًا، لو عاوزة حذاء أنيق لأى مناسبة، ناين ويست يعتبر نقطة انطلاق هائلة.

...

سكيتشرز: أحذية المهام الصعبة الأمريكية في سيتي ستارز
اصدرت في: 13/02/2013

فتح مؤخرًا في الدور الثالث من المرحلة الثانية في سيتي ستارز منفذ بيع لمنتجات «سكيتشرز – Skechers» الأمريكية. سكيتشرز شركة متخصصة في الأحذية الرياضية والكلاسيكية والكاجوال للرجال والسيدات وكذلك أحذية مواقع العمل أو الـ Safety وفيها قسم متخصص لأحذية الأطفال والسنيكرز. الماركة الأمريكية بدأت في الانتشار منذ انطلاقها سنة 1992 يعني مش من زمان قوي، ومع ذلك حققت نجاح كبير بسبب تنوع موديلاتها وجودة الخامات اللي بـ تخلي عمرها طويل جدًا وبـ تتحمل ظروف استخدام صعبة. ومن الوارد أنك تكون شوفتها قبل كده بلوجو حرف الـ S اللي بـ يُكتب بطريقة مميزة بس ما عرفتش أنها سكيتشرز الأمريكية.المحل مساحته متوسطة لكن فيه كم كبير جدًا من المعروضات على الأرفف والستاندات في وسط المحل. وكان طبيعي أننا نتوجه للأرفف الرجالي في واجهة المحل اللي كان عليها موديلات كثير جدًا ومتنوعة من البوتات والهاف بووت والسنيكرز والشوز الـ Safety العملاق وبعض الموديلات الكلاسيكية والكاجوال بزيادة. كل الخامات والموديلات تقريبًا هـ تلاقيها هنا، وكلها عليها حرف الـ S الشهير. الأسعار من 500 لحد 1000 جنيه، والموديلات اللي عجبتنا كانت بوتات من الجلد الأسود اللامع اللي من غير رباط أو أبزيم، بـ تتلبس زي السبترين بدون أي مجهود بسعر 750 جنيه، وده بعد الخصومات طبعًا، وموديل ثاني من السابوهات الشامواه بسعر 500 جنيه بـ يتلبس بنفس الطريقة. الأسعار مش قليلة خالص، لكن هـ تحس أنه غالي وثمنه فيه. لما تمسك الخامة وتشوف موديلات شكلها غير تقليدي بالمرة هـ تحس أنها تستاهل تدفع فيها المبالغ دي. فيه كمان كوتشي بألوان فسفورية عجيبة وبنفس متوسط الأسعار. فيه موديلات متخصصة للرياضات المختلفة، وفيه أحذية أقرب لأحذية تسلق الجبال أو أي أشغال شاقة تخطر على بالك. والغريب أن شكلها جذاب وهـ تحب تجربها في رجلك وممكن بسهولة تشتريها حتى لو مش هـ تستخدمها في الأغراض المخصصة لها. الموديلات الحريمي لها نفس الخصائص تقريبًا، وإن كان فيه تشكيلة مختلفة من البوتات الطويلة المصنوعة من الفرو والشامواه والجلد الملون، والأسعار بـ تبقى 600 و700 جنيه بعد الخصموات الموجودة حاليًا، وللمرة الثانية بـ نقول أن «سكيتشرز» مناسب جدًا لهواة التميز وارتداء ملابس غير تقليدية. ده طبعًا بجانب العمر الطويل وخصائص القوة في الشوز نفسه. فيه عدد من الستاندات عليها موديلات الأطفال اللي من أول عمر 6 شهور لحد 14 سنة، عدد مهول من التصميمات والخامات الولادي والبناتي، كوتشي وvans وباليرينات وصنادل بأشكال فريدة وأسعار بـ تبدأ من 300 جنيه. المحل له فرع ثاني في مول العرب في 6 أكتوبر وممكن لو ما لقيتش موديل أو مقاس أنت عاوزه هنا يتأكدوا لك فورًا إذا كان موجود في مول العرب وممكن تحجزه وتروح تأخذه فورًا، والخدمة عمومًا في المحل جيدة جدًا ومحترفة. هـ تأخذ راحتك وأنت بـ تتفرج وبـ تجرب أي حاجة تعجبك. نتمنى نشوف فروع أكثر لـ «سكيتشرز» في مناطق مختلفة من القاهرة.

...

فراتيللي: ماركات أحذية عالمية في سيتي ستارز
اصدرت في: 12/10/2012

«فراتيللي» موجود في الدور الثاني في المرحلة الثانية من سيتي ستارز، محل كبير واخد زاوية واضحة ومميزة، فاترينة العرض فيها عدد محدود من الأحذية الرجالي والحريمي، عدد محدود بس متنقي بعناية، وهـ يغريك أنك تدخل المحل وتتفرج على كل الموديلات اللي عنده. كل جدران المحل من الأرض للسقف عليها أشكال وألوان من الأحذية الكاجوال والكلاسيكية وكل جزء من الجدار مخصص لماركة معينة، ده غير الستاندات اللي في وسط المحل ومعروض عليها عدد من السابوهات والشباشب والإكسسوارات.هنا هـ تلاقي منتجات CAT الأصلية، الموديلات الجديدة بتاعة السنة دي ومنتجات سنتين فاتت، الكوتشي بألوان فاتحة بأسعار من 400 لـ 500 جنيه، وحذاء CAT التقليدي المصنوع من الجلد المقلوب أو الشمواه أو الجلد الطبيعي العادي بأسعار من 500 لـ 650 جنيه، وفيه الموديلات الضخمة والـ Safety المشهور بها كات وأسعارها من 650 لـ 800 جنيه. الموديلات الجديدة من كات فيه منها أنيق جدًا وأحجامها صغيرة ورقيقة غير الشكل المعهود بتاعها، وفيه درجات كثير من اللون البيج والبني هـ يخليك محتار ومش عارف تختار بينهم.ماركة ثانية قوية جدًا «فراتيللي» واخد توكيلها وهي أحذية MERELL الأمريكية. أحذية اتعملت خصيصًا للأشغال الشاقة وتسلق الجبال والأراضي الوعرة، موديلاتها كاجوال بزيادة بس بـ تتميز بالتقفيل الشيك جدًا والألوان الكثيرة المتداخلة، والأهم أن لها ستايل مميز مش موجود في أي ماركة ثانية. أسعارها من 500 لـ 800 جنيه حسب حداثة الموديل، وفيه عروض خاصة على بعض الموديلات التقليدية منها بسعر 300 جنيه بس.لو عاوز حاجة كلاسيك وبسيطة أكثر هـ تحب موديلات الـ Sebago الأمريكية برضه، الألوان هي الأسود والبني والأسعار من 390 لـ 500 جنيه فيه منها الجلد اللميع والشمواه والفلات خالص والمصنوع من القماش زي الأسبترين. نفس الموديلات تقريبًا هـ تلاقيها في ماركات ثانية متوفرة عند «فراتيللي» وهي ماركات زي الـ West Coast.عجبنا جدًا موديلات ماركة Sapatoterapia البرازيلية وجربناها ولقيناها مريحة جدًا في اللبس، ورغم شكلها التقليدي نوعًا ما إلا أن شكلها في اللبس بـ يختلف تمامًا والخامات اللي مصنوعة منها عاملة لها شكل مميز وفريد. الأسعار مش بـ تختلف كثير من ماركة للثانية، برضه كله بـ يتراوح بين 500 لـ 700 في النوع ده.الصف الخاص بالأحذية الحريمي مش مبهر زي الخاص بالرجالي، أو يمكن لأننا مش فاهمين قوي في الموديلات البناتي، بس اللي إحنا متأكدين منه أن شبشب بسيط جدًا وموديله منتشر بكثافة كان سعره 350 جنيه، حتى لو عليه ماركة Piccadilly البرازيلية. ممكن نقبل الأسعار دي على الأحذية والبوتات المعروضة واللي بـ يوصل سعرها هنا لـ 600 و700 جنيه زي الأحذية الرجالي، لكن السابوهات والشباشب فعلًا ما تستحقش الأرقام دي. الميزة في «فراتيللي» أن كل المقاسات موجودة والألوان كمان، يعني لو دخلت وفي نيتك تشترى ومحدد الميزانية بتاعتك أكيد هـ تلاقي اللي أنت عاوزه. وبما أنك عرفت الأسعار والماركات الموجودة هناك من المقال ده، يبقى روح على هناك وأكيد هـ تلاقي حاجات تعجبك.

...

جاليرى بوهو: ماركات محلية وعالمية فى هليوبوليس
اصدرت في: 13/07/2012

واضح أن فيه قاعدة خفية بـ تقول أنك مستحيل تلاقي ملابس سعرها مناسب وفى نفس الوقت ماشية مع الموضة بسهولة من غير ما تلف على القاهرة كلها. كمثال، لو كنت فى محل غالى هـ تدّور وسط حاجات كثير أسعارها غالية علشان توصل لحاجة سعرها معقول، أو فى محل رخيص محتاج تشوف حاجات كثير مش حلوة علشان توصل لحاجة كويسة. «جاليرى بوهو» اللى لسه فاتح كسر القاعدة دى. وواضح أنه قارى السوق المحلية والأوربية وجمع كل الحاجات الحلوة علشان تبقى جاهزة ومتاحة لسكان هليوبوليس تحت سقف واحد. فى شارع جانبى متفرع من شارع صلاح سالم، وفى مساكن شيراتون، المحل بـ يعرض ملابس على أحدث طراز، وفساتين سهرة، وشنط، وأحذية، وإكسسوارات ومستلزمات منزل لمصممين محليين ومن البلاد المجاورة لنا، بالإضافة لماركات معروفة من أوربا. أول ما تدخل هـ يقابلك أرفف عليها حاجات متنوعة زى أعواد للحفلات قابلة لإعادة الاستخدام وأعواد الأكل الصينى، أو سماعات ملونة تنفع تتوصل على أى موبايل سعرها 190 جنيه. كل دى قطع لطيفة مش موجودة عادة فى أى مكان ثانى فى القاهرة. كمان فيه مستلزمات منزل زى مخدات، وقاعدة للكؤوس، وفوط، وصوانى، ومجّات لمصممين مصريين زى "جود"، و"خمسة وخميسة"، و"كايرويد"، إضافة لشموع من "كاندل كوليكشن". مكان لوضع ميدالية المفاتيح على شكل مفتاح خشب من "امسكوا الخشب" كانت لطيفة جدًا، وبرضه مجموعة سكاكين من سبع قطع. كمان عجبنا قفاز من غير صوابع ملون وخامته مقاومة للماء ومعاه مريلة سعرهم 85 جنيه. القطع المفضلة لنا كانت إكسسوارات لزينب شاهين عليها مصطلحات ساخرة مصرية ولبنانية زى "إيجيبشن هـ يبوسنى" مطبوعة بالعربى على خواتم ألوانها مبهجة وأسعارها بين 50 جنيه و70 جنيه. إكسسوارات ثانية موجودة لمصممين زى "تاش"، و"لوليسكو"، و"يوكيز"، و"بانجلز" ومصممين ثانيين، مع حاجات ثانية من إكسبريس وبريمارك. كمان فيه ساعات "وى واتش" ومايوهات بيكينى لطيفة وملابس للبحر. تشكيلة متنوعة من القمصان وملابس السيدات معروضة داخل المكان. تى شيرت بيضاء لندى أكرم عليها صورة الممثلة أودرى هيببورن بشريطة وردى فى شعرها مع تعليق مكتوب "البنات الفرحانين هم أحلى بنات" ( 300 جنيه). تى شيرتات ثانية عليها صور مارلين مونرو، وسعاد حسنى وإليزابيث تايلور. قطعة ثانية شيقة عبارة عن مجموعة تي شيرتات قصيرة بدون أكمام من تصميم "بوهو شاركى" عليها تطريز على شكل عين وشنب عاملة تكوين لرجل لابس طربوش (290 جنيه). معروض كمان فى الجاليرى أشكال مختلفة من الشنط الأنيقة والأحذية والصنادل. شنط بوهو بألوانها المتعددة بحوالى 250 جنيه، وشنط بوهو الصغيرة للبنات تبدأ من 120 جنيه. شنط ثانية من "إل ماك" و"جاى روس" وناعومى هانم بالإضافة لمايكل كورس متاحة برضه. كمان تشكيلة محدودة لكن لطيفة من الباليرينات، والصنادل والشباشب ماركة "أتموسفير" ده غير ماركات أوربية ثانية زى صندل برتقالى مبهج مكتوب سعره 190 جنيه. غرفه كاملة مخصوصة علشان عرض الفساتين. فساتين سهرة من رفيق زكى معروضة على رف أسعارها بـ تبدأ من 190 جنيه. ورف ثانى عليه فساتين مستوردة من "بى سى بى جى"، و"ميس سيلفريدجس" و"بريمارك". "جاليرى بوهو" يعتبر إضافة هائلة علشان بـ يعرض تشكيلة كبيرة متنوعة وقطع مرحة، لكن أهم سبب أنه كسر القاعدة الذهبية للتسوق فى القاهرة بأن عنده ملابس شيك وسعرها مناسب، وكل ده فى مكان واحد.

...

جيوفاني جالي: بيت أزياء برتغالي جديد في سيتي ستارز
اصدرت في: 24/06/2012

في الدور الثالث في المرحلة الثانية في سيتي ستارز وفي ركن هادئ شوية من المول لمحنا محل جديد ما كانش موجود من شهور قليلة، وهو محل ملابس رجالي اسمه «جيوفاني جالي». لفت نظرنا من زجاج العرض الخارجي أن معظم المعروضات كانت ملابس كلاسيك وبِدل كاملة وبولو شيرت. لكن لما دخلنا المحل اللي مساحته متوسطة لاقينا أنه تقريبًا بـ يبيع كل أشكال الملابس الرجالي من البدلة والبليزر لحد الجينز والتي شيرت العادي وكمان الملابس الداخلية والإكسسوارات زي الأحزمة والأحذية والمحافظ. البراند ده برتغالي، وطبعًا من الاسم كنا فاكرينه إيطالي، ومالوش أي فرع في مصر غير الفرع اللي في سيتي ستارز دلوقتي. كل المعروضات داخل المحل عليها تيكيت (ﭼيوﭭاني جالي) أو حرفين الـ G جنب بعض. وعرفنا من العاملين بالمحل أن الماركة دي مشهورة بمنتجات الجلد الطبيعي لأن البرتغال أصلًا مشهورة بالمنتجات الجلدية الطبيعية. وفعلًا بدأنا نتفرج على الأحزمة الجلد (200 جنيه) والأحذية (من 500 لـ 700 جنيه) وكانت في منتهى الشياكة وتفصيلاتها مبتكرة جدًا، خاصة الأحذية المصنوعة من الجلد المطفي المكرمش شوية وعليها خياطات بألوان مختلفة من الخارج، كانت شيك جدًا وكأنها معمولة مخصوص علشان البليزرات غير التقليدية اللي شفناها في المكان، زي البليزر اللبني الفاتح بأقلام زرقاء رفيعة (1500 جنيه) واللي لما جربناه في اللبس حسينا أنه بـ يغير شكل الواحد 180 درجة. لون غريب وتفصيلة غريبة بس عجبتنا! نفس الكلام بالنسبة للبدل المصنوعة من الصوف البرتغالي المميز. ما تتخضش من كلمة صوف في الحر ده، هي ملمسها ناعم وخفيفة، وتنفع لأي فصل، بس الخامة اسمها كده. أسعار البدل من 2500 لـ 3000 جنيه، والألوان الموجودة هي الغوامق والأساسية بس، الأسود والرصاصي والكحلي، ما كانش فيه بني أو بيج. بس مرة ثانية التفصيلات ظريفة وكل المقاسات موجودة. الأسعار تقريبًا واحدة بالنسبة للقمصان الكلاسيك والتي شيرت البولو وهي 399 جنيه، كل الألوان موجودة حتى الوردي والبنفسجي، وعليها طباعات أو من غير. غالية حبتين طبعًا؛ بس برتغالي بقى! كاونتر كبير في وسط المحل معروض عليه ملابس بحر ومايوهات وشورتات شبه الموجودة في Quicksilver وبـ نفس الأسعار كمان وهي 300 جنيه وأنت طالع. الجينز ما لفتش نظرنا قوي في المحل وما حسيناش أن العاملين حتى مهتمين أنهم يفرجونا عليه. لأنهم كانوا مهتمين أنهم يعرفونا كل التفاصيل الخاصة بالمحل وبالمعروضات لأنهم لسه فاتحين قريب وبـ يحاولوا يكسبوا ثقة الزبائن. «جيوفاني جالي» في النهاية بيت أزياء عالمي بـ ينضم لأخواته الموجودين بكثافة في سيتي ستارز، الأسعار متقاربة مع اللي هـ تلاقيه في Sarar وZara وSpring والموديلات كمان. بس كالعادة بـ نفرح لما نعرف أن براند عالمي جديد فتح له محل في مصر.

...

بول & بير: ملابس كاجوال على الموضة وأسعارها معقولة في سيتي ستارز
اصدرت في: 19/01/2012

شهر بـ يعدي وراء شهر وإحنا بـ نمر من أمام محل فاضي عليه إعلان أن هـ يفتتح هنا محل «بول & بير – Pull & Bear»، صبرنا كان بـ ينفذ كل ما كنا بـ نشوفه لكن اللى هون علينا أننا شفنا العمال طالعين داخلين على المكان وشغالين من نار فـ عرفنا أن الموضوع قرب. وأخيرًا أول ما فتح "بول & بير" أبوابه جرينا داخل المكان وكلنا حماس لكن للأسف خاب ظننا من الفرع ده بعد زيارته. الفكرة أننا كان عندنا آمال كبيرة أن الفرع ده هـ يكون أكبر وفيه معروضات أكثر من اللى موجودة في فرع المهندسين، لكن للأسف لقيناه كمان أصغر منه وموجود فى ركن فى الدور الأول بالمرحلة الأولى (جنب محل "زارا - Zara" الضخم). وأكثر حاجة هـ تلاحظها هناك أن ركن الرجال أكبر من السيدات، لكن إزاي؟ إحنا حاسين أننا مش فى بول & بير اللى نعرفه. جودة الملابس إلى حد ما جيدة وأغلب الأسعار معقولة، من الحاجات الحلوة أن بـ ييجي لهم تشكيلة ملابس جديدة كل ستة أسابيع، وبالتالى فرصتك أنك تلاقي موديلات جديدة كل فترة أفضل. ستايل الملابس في بول & بير مريح ومن النوع الكاجوال اللى فيه جانب مرح، وبالتالى تحس أنهم مستهدفين شباب كايرو، التى شيرتات على سبيل المثال بـ يكون عليها غالبًا مطبوعات أو كلام مرح. وغالبًا تلاقيهم برضه بـ يتبعوا تيمة معينة كل فترة فى التصميمات زي المتعلقة بشخصيات ديزنى، لونى تونز، أو مدينة نيويورك وبـ تبدأ من 79 جنيه للسيدات وبـ 129 جنيه للرجال. سعر بنطلون الجينز في بول & بير بـ يبدأ من 399 جنيه للسيدات وبـ 499 جنيه للرجال. وسعر السويت شيرت بالكابوشو (غطاء الرأس) بـ 299 جنيه للجنسين. "بول & بير" عندهم صف كبير من الفساتين اللطيفة على الرغم من أنهم غاليين شوية وأغلبهم عليه رسومات بنانيتي وورد بـ 399 جنيه، وبالنسبة للأحذية هناك مش هـ تقعد أمامها كثير لأنها بلاستيك وجودتها رديئة وسعرها غالي، لقينا هناك صنادل تصميمها بسيط بـ 459 جنيه، فى حين أن الجزم الباليرينا بـ يتراوح سعرها بين 259 و499 جنيه، الاثنين سعرهم عالي قوي بالمقارنة بمثيلاتهم في أى مكان ثاني. لو بـ تدور على بالطو روح المحل بالتأكيد، أغلبها بـ يتراوح سعرها بين 499 و799 جنيه. والسعر الثانى ده ممكن تجيب به بالطو أسود بياقة فرو، أغلب البالطوهات مش مرتبطة بموسم معين وتقدر تلبسها بسهولة لموسمين متتاليين أو أكثر. أفضل شيء بالنسبة لـ "بول & بير" هي التخفيضات بالتأكيد اللى فيه بـ تلاقى خصم على المعروضات بـ يوصل إلى 50% لأن المعروضات بـ تتغير في وقت قليل، وبالتالى ممكن تلاقى عندهم تخفيضات طوال الوقت. طاقم العمل هناك ودود وتلاقيه وقت ما تحتاجه رغم أنهم مشغولين دائمًا بـ توضيب المعروضات. لكن مازلنا بـ نفضل فرع المهندسين على اللى موجود في سيتي ستارز.

...

هش بابيز: ماركة أحذية أمريكية كلاسيك في سيتي ستارز
اصدرت في: 20/11/2011

لو فيه حاجة واحدة فقط حقيقية في العالم ده فهي أننا –ولاد وبنات- أكيد لا يمكن يكون عندنا أحذية كثيرة. «هش بابيز – Hush Puppies» في سيتي ستارز عنده تشكيلة متنوعة إلى حد ما ولكن في نفس الوقت شكلهم مش جذاب كفاية لنا وخاصة لمدمنيها علشان تتميز وسط الأحذية العملية واللي أسعارها معقولة اللي موجودة في كل مكان في كايرو. بنظرة واحدة على أزواج الأحذية في أقسام السيدات والرجال وحتى الأطفال هـ تحس أن الأحذية دي بقالها على الأرفف على الأقل سنتين، ومن الآخر الستايل بتاعهم ما نقترحوش لكم. جودة الجلد وخامة الأحذية جيدة جدًا، خامة الجلد ناعمة وشيك. زوج جزمة بكعب عالي سوداء سادة هـ تكلفك 750 جنيه، ولكن ممكن تلاقي هناك صندل ذهبى هـ يشد انتباهك بـ 600 جنيه وهـ يكون مريح أكثر. بالكاد هـ تلاقي نوع واحد من الأحذية هـ يعجبك بالرغم من أن مافيش اختيارات كثيرة في كل ستايل. لقينا جزمة كلاسيك كعبها منخفض بني بـ 500 جنيه محطوطة جنب جزمة مسطحة بـ 188 جنيه، وجنبهم كمان شبشب فيه ورد بـ 300 جنيه، في أي مكان تبص هـ تلاقي حاجة مختلفة أسوأ أو أفضل. أغلب القطع اللي موجودة في القسم الرجالي تقريبًا حاجة واحدة. زوج الأحذية التقليدي بـ يبدأ من 700 جنيه، وفيه قسم ممكن تلاقي فيه شبشب جلد بـ 400 جنيه. وفيه كمان منتجات عناية بالأحذية الجلد والرياضية متاحة بألوان مختلفة وبـ تبدأ من 39 جنيه. قسم الأطفال هو أصغر قسم فيهم. في الحقيقة ممكن يفوتك وما تلاحظوش وأنت ماشي بـ تتفرج على الأحذية في قسم السيدات لأنه جنبها. يمكن "هش بابيز" عنده أصغر أحذية ممكن تشوفها عينيك على وجه الأرض لكن ثمنها كان 200 جنيه، كانت مغرية للشراء جدًا. "هش بابيز" عنده كمان إكسسوارات زي الشرابات ونظارات الشمس بتصميمات مختلفة زي النظارة الكبيرة اللى كان لونها أحمر وفيها نقشة النمر بـ 300 جنيه، فيه كمان كذا شنطة كانت معلقة على حائط المحل وما كانش شكلهم جذاب خالص، لكن ممكن يعجبوك لو بـ تدور على شنط جلد سادة مصنوعة بشكل جيد ممكن تكلفك حوالي 500 جنيه. على الرغم من اللوجو اللطيف للمحل، "هش بابيز" مش المحل اللي تقع في غرامه من أول زيارة، يمكن يحالفك الحظ وتلاقي اللي بـ تدور عليه، ولكن بسبب كمية الاختيارات المحدودة مش سهل أن ده يحصل.

...

لطفي: أحذية وإكسسوارات عادية في مصر الجديدة
اصدرت في: 23/09/2011

لو كنت من الجيل اللي اتعود يجيب لبس المدرسة من «ريموندس» و«فرج» وبعد كده تطلع على «لطفي» أو «زلط» علشان تجيب الجزمة أو الكوتشي، يبقى المقال ده مش هـ يضيف لك كثير لأن «لطفي» تقريبًا ما تغيرش من ساعتها، مش عارفين ده عن عمد حفاظًا على شخصية المحل "التقليدية" جدًا ولا التطور اللي بـ يحصل بطئ لدرجة لا تُلاحظ بالعين المجردة. المحل شكله من الخارج مميز وأنيق، مبني بالحجر الأبيض الكبير وعلى المحل خطين بالعرض باللون الأسود، والمحل واخد ناصية نموذجية على شارع الميرغني وشارع مصطفى كامل جنب نادي هليوبوليس، وهو مكون من دورين، الدور الأرضي مخصص للأحذية والشنط الحريمي والعلوي للرجالي. وفيه ركن لأحذية وكوتشيات وشنط المدرسة للأطفال جزء منه في الدور الأرضي والجزء الأكبر في الدور العلوي. المحل واسع وفيه كمية كبيرة من المعروضات وهـ يأخذ منك شوية وقت لو كنت لسه مش عارف أنت بـ تدور على إيه. رغم العدد المهول من الأحذية المعروضة إلا أن التنوع والأفكار في الموديلات محدود جدًا، لأن «لطفي» مش ماركة في حد ذاته، لكنه منفذ بيع واسم كبير بـ يقوم بـ توزيع إنتاج مصانع كثير وماركات معروفة للأحذية، لكن المشكلة أن الماركات دي موديلاتها شبه بعضها إلى حد كبير، بالذات في الأحذية الكلاسيكية الرجالي بألوانها الأسود والبني. في القسم الرجالي أكثر حاجة عجبتنا كانت موديلات ماركة "برونتو" الكاجوال والكلاسيك، أسعارها بـ تتراوح بين 220 لـ 250 جنيه، هي تقريبًا أغلى ماركة في المحل هي وبعض موديلات "الجباس" الإيطالية (260 جنيه)، لكن خامتها قوية جدًا وشكلها تستحمل الاستخدام القاسي زي موديلات «تمبرلاند» كده، مع الفارق طبعًا. وفيه ماركة اسمها "أرت وورك" عاملة موديلات مش بطالة، وهي الجزم الفلات الشمواة والجلد بالبوز العريض، أسعارها هناك منطقية، يعني من 130 لـ 150 جنيه، وفيه منها كل الألوان، وفيه من نفس الماركة موديلات إيطالية كاجوال شيك جدًا وجلد طبيعي، أسعارها 160 و180 جنيه، والنعل مكتوب عليه بالطول كلمة (Baretta) وكنا فاكرين هي الماركة، طلع ده اسم الشركة اللي بـ تصنع النعل! هـ تلاقي موديلات شبه بعضها كثير قوي فيه ماركات زي "بيبو" و"بيرد شوز" و"جولدن تراينجل" و"رايدر" المتخصصة في الجزم الضخمة اللي شبه "الدوج" بتاعة زمان. وأسعارها دائمًا بين الـ 110 والـ 180 جنيه، وفيه رف كان عليه مجموعة من الأحذية اللي بين الكوتشي والجزم كده بسعر موحد هو 150 جنيه، لكن برضه المعروضات اللي عليه ما كانتش قد كده. الأحزمة الرجالي موجود منها الكلاسيك والكاجوال بأسعار من 70 لـ 100 جنيه، وبرضه نفس مشكلة التنوع، كلها ماركات مختلفة بـ تعرض نفس الموديلات، والفرق بـ يبقى في الجودة ونوع الجلد فقط. فيه ستاند كبير للشرابات بأسعار من 15 لـ 25 جنيه. القسم الحريمي فيه تقريبًا نفس الماركات الرجالي، وأن كان بـ يعيبه أكثر أن الموديلات عتيقة شوية رغم أن المعروف أن موديلات البنات بـ تتغير أسرع من الرجالي، خاصة في الأحذية. والجزم قليلة جدًا ومعظمها فلات وهو أشيك حاجة بالمناسبة. أغلب المعروضات صنادل وسابوهات، أسعاها من 40 لـ 50 جنيه وده علشان فيه تخفيضات في القسم الحريمي فقط، والشنط أسعارها 80 و90 جنيه، وفيها نفس المشكلة أنك تحس أنها قديمة وموديلها بِطِل خلاص. وفيه ستاند لشباشب البيت والخروج بـ 29 و39 جنيه. وبشكل عام القسم مناسب أكثر للسيدات مش للبنات علشان غالب عليه الطابع الوقور والتقليدي. الخدمة عادية زي كل حاجة في المحل، ويمكن جافة شوية، أو يمكن حظنا أننا وقعنا مع موظف "كِشري" حبتين، لدرجة أننا بـ نسأله عن موديلات رقبة قصيرة، نظر لنا باشمئزاز وقال لنا: "لأ، لأ ما بـ نشتغلش فيها.. لا السنة دي ولا السنة اللي فاتت" كأنها عيب أو حرام! المهم المحل ممكن يحل لك أزمة لو عاوز جزمة ومش محدد موديل معين، أكيد هـ تلاقي هناك حاجة ناقصاك وممكن تأخذها بسعر كويس أحسن من أي محل ثاني في مصر الجديدة.

...

ماكس: ملابس متنوعة بأسعار خطيرة في مصر الجديدة
اصدرت في: 21/09/2011

ممكن نقول عليه مول صغير، أو محل ملابس عملاق، لأنه واخد أول دورين في عمارة ضخمة شيك جدًا أمام البوابة الرئيسية للميريلاند في شارع الحجاز في مصر الجديدة، «ماكس» بـ يفكرنا بمحلات «عمرافندي» في الملابس زمان و«H&M» حاليًا في سيتي ستارز. صاحب سلسلة المحلات هندي الجنسية، وبدأ المجموعة بفرع رئيسي في دبي وبعد كده إنطلق بفروع في معظم الدول العربية زي الأردن والكويت والسعودية وقطروالبحرين ولبنان والسودان وآخيرًا مصر، وبسهولة هـ تلاحظ الطابع الخليجي للمحل خاصة لما تسمع الإذاعة الداخلية للمحل باللهجة الإماراتية المميزة، ولما تشوف بعض موديلات اللبس غير المألوفة في مصر واللي بـ نشوفها أكثر على الخليجيين لما بـ يكونوا في مصر. المحل منظم جدًا، كل ركن مخصص لحاجة معينة، وبشكل عام الدور الأرضي للملابس الرجالي والدور العلوي للسيدات، وفيه جزء خاص لملابس الأطفال ومستلزماتهم في الدور الأرضي. القسم الرجالي فيه كل حاجة ممكن تتخيلها، من أول ملابس البيت والبيجامات الكلاسيكية (أسعارها من 80 لـ 100 جنيه) والملابس الرياضية، مرورًا بالجينز بكل موديلاته وتفصيلاته وألوانه، ولازم نقول أن «ماكس» مميز بتشكيلة الجينز اللي عنده، وسهل تدخل المحل للفرجة بس تطلع وانت شاري بنطلونين أو ثلاثة، أولاً لأن الأسعار مغرية جدًا وبـ تبدأ من 80 جنيه (مافيش محل بـ يبيع جينز محترم بـ 80 جنيه دلوقتي) وأحدث موديلات عنده آخرها 160 جنيه وبعد الخصومات اللي هـ تكون لسة شغالة وقت نشر المقال ده بـ توصل لـ 114 جنيه، يعني يا بلاش. التي شيرتات كثير قوي وأشكال وألوان، من أول البولو شيرت العادي لحد التي شيرتات الواسعة بتاعة مغنيين الراب وفيه طبعًا الموديلات العادية بكل الألوان، والخامات كويسة جدًا والأسعار بـ تتراوح بين 50 لـ 100 جنيه وبرضه ممكن تنزل عن كده في التخفيضات (مكتوب هناك "تنزيلات"..خليجي بقى). في آخر الممر في الدور الأرضي ركن الملابس الرسمية والبدل والقمصان الكلاسيكية، البنطلون القماش بـ يبدأ من 110 جنيه وموجود بكل الألوان الوقورة زي الأسود والرمادي والبني والكحلي، وبـ يكون فيه أقلام طولية رقيقة وخامته جيدة جدًا، والقمصان بـ 130 جنيه والكرافتات بين 30 لـ 50 جنيه ولاقينا الموديلات الرفيعة بأسعار أقل من أي محل تاني. فيه ستاند كبير عليه أشكال وألوان من القمصان طويلة وقصيرة الأكمام، وفي «ماكس» الكاروهات بكل أشكالها واخدة حقها بزيادة، بس الخامات والتفصيلات ظريفة وتليق على كل الأجسام والأحجام. الدور العلوي هو بإختصار مكان لازم أي بنت عايزة تعمل دعم كامل لدولابها تروح عليه، من غير تفاصيل كثير هو فيه كل ما له علاقة بالملابس الحريمي سواء للبيت أو للخروج، موديلات بنطلونات وباديهات كثير جدًا، أي حاجة بـ تشوفي حد لابسها ومش عارفة دي بـ تتجاب منين روحي على «ماكس» وهـ تلاقيها، والأسعار كالعادة أقل من أي محل في أي مول كبير وإن كانت الجودة مش أقل كثير. الملابس الكلاسيكية كمان متوفرة في القسم الحريمي بس الخامات ممكن تكون مش الأفضل. ولفت نظرنا الملابس الرياضية والترينينج سوت الـ 3 قطع بألوان وموديلات تحفة، وسعره كان حوالي 250 جنيه، لكن كل قطعة ممكن تتباع لوحدها. الأطفال ليهم عالم خاص من الملابس في «ماكس»، حتى عربيات ولعب البيبي موجودة، بـ نرشح قسم الأطفال لأي أب وأم عايزين يجمعوا أكبر قدر من الملابس والأدوات لأولادهم من مكان واحد، ودائمًا نضع في الإعتبار موضوع الأسعار مقارنة بالجودة، وهـ نلاقي «ماكس» بـ يحقق المعادلة دي على طول الخط. الأحذية والكوتشيات والشنط والأحزمة هي نقطة ضعف المكان، موديلات عجيبة وألوان مهجورة وأسعار مش منطقية، يستحسن ما تضيعش وقتك قدام ستاندات أي حاجة بـ تتلبس في الأقدام. يمكن الإكسسوارات البناتي والمشغولات والأعقاد حلوة شوية (من 30 لـ 50 جنيه) إنما بشكل عام «ماكس» مش بتاع إكسسوارات. الخدمة جيدة وموظفين المحل لابسين تي شيرتات لونها أحمر ومنتشرين عند كل الأقسام وهـ يساعدوك في موضوع المقاسات والتدوير على حاجة مش لاقيها. «ماكس» لسة ما أخذش حقه من الشهرة والإعتمادية، صحيح رواد مصر الجديدة بقوا عارفينه كويس، لكن المحل يستاهل يكون له زبائن من مصر كلها، لأن النوع ده من المحلات بـ يوفر وقت ومجهود وفلوس، ولو أذواق الحاجات هناك عجبتك هـ تلاقي نفسك زبون دائم وبـ ترشحه لكل معارفك.

...

تمبرلاند: جِزم رجالي وبدل كاكي
اصدرت في: 28/08/2011

لما بـ نيجي ندور على لِبس٬ خصوصًا لو رجالة٬ بـ نبقى عاوزين حاجتين: أن اللبس ده يكون عملي وشيك. وكمان لما بـ ندفع فيه فلوس لازم جودته تكون عالية ويقعد أكبر مدة ممكنة حالته كويسة. بفروعه حول القاهرة في كل حتة «تمبرلاند - Timberland» بـ يوفر لك هدوم فيها المواصفات المطلوبة. أول حاجة بـ تيجي على بال الواحد لما بـ يسمع «تمبرلاند» هي البوتات الجلد البني الجملي اللي لها كعب سميك وحز حوله غامق. لكن النهارده في الفرع اللي زرناه واللي موجود في الجزء القديم من «سيتي ستارز – City Stars» كان البوت المشهور به «تمبرلاند» مُهمش لحد كبير في آخر المحل خالص وكان بـ 1095 جنيه. أول ما بـ تخش المحل على شمالك هـ تلاقي أحذية شيك أكثر من البوت التقليدي المشهورة به الماركة. ده طبعًا بعد ما ترحب بك أجواء المحل اللي هـ تحسسك أنك رايح تستكشف غابة أو مغامرة في الصحراء (هو متخصص ملابس «أوت-دور» يعني مخصصة للرحلات أو ما شابه). فيه جِزم جلد كلاسيك برباط٬ وموديلات سمارت كاچوال٬ وجزم كوتشي. ودول أسعارهم بـ تتراوح من 550: 700 جنيه. وعلى فكرة الجزم بتاعتهم ثمنها فيها٬ من النوع اللي بـ يعيش ويستحمل (مش يفتح بقه بعد لبستين زي حاجات كثيرة من اللي في السوق٬ أو يعذب لك صوابع رِجلك!). ومع أن الجزم بالنسبة للجودة أسعارها معقولة إلا أن باقي منتجات المحل غالية. قمصان كتان نصف كُم بـ 749 جنيه٬ وبنطلون چينز بـ400 جنيه. لكن الحق يُقال الجودة بتاعة القماش باينة٬ التقفيل مظبوط والقَصة حلوة. وبالرغم من أن 500 جنيه ثمن كثير قوي على بعض موديلات القمصان٬ إلا أن من موسم للثاني أسعار القمصان الشيك اللي قماشها رائع بـ تنزل لتحت الـ 300 جنيه والتي شيرتات بـ تنزل لـ169 جنيه٬ وساعتها بـ يكون معقول لحد ما لو حطينا في الاعتبار الجودة والستايل. جنب اللي اتكلمنا عنه في لبس كاكي٬ بنطلونات وشورتات بجيوب من الجنب وچيليهات. فيه قسمين حريمي وأطفال صغيرين في «تمبرلاند». الحريمي فيه شوية أحذية موديلاتها قديمة وتقليدية٬ وأسعارها أقل من أسعار الجزم الرجالي٬ بس بوجه عام القسم صغير ومافيهوش حاجات كثير، الأطفال فيه مجموعة تي شيرتات وسالوپيتات ألوانها مبهجة بحوالي 150 جنيه. ده بالإضافة لكوتشيات وصنادل. مع أنه غالي شوية٬ «تمبرلاند» عنده تشكيلة هائلة من الملابس اللي جودتها عالية للعائلة.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح