أثاث ومستلزمات منزل تسوق in مصر الجديدة Cairo, Egypt

تسوق

تيمبو: ورق حائط وملصقات فينيل ممتازة فى مصر الجديدة
اصدرت في: 11/09/2012

لأننا من عشاق المطبوعات المصنوعة من خامة الفينيل جربنا قبل كده الدوشة بتاعة طلبهم أون لاين وتركيبهم حتة حتة، وإحنا مش متأكدين حتى من الشكل النهائى هـ يطلع إزاى. علشان كده أول ما سمعنا عن "تيمبو" كنا متحمسين لأن أخيرًا ملصقات الفينيل هـ تكون موجودة فى القاهرة من غير مشاكل أو تكلفة زيادة.فوق مكتبة أ فى شارع الميرغنى فى هليوبوليس، تيمبو فعلاً محل فريد من نوعه فى القاهرة، بالملصقات الفينيل الظاهرة من شباكهم فى الدور الأول والستيكرات اللى بـ توجهك للمحل الراقي. على حسب علمنا تيمبو هو المحل الوحيد اللى بـ يقدم ملصقات فينيل خاصة فى مصر.بعد ما رحّب بنا مسئول المبيعات، فرجنا على المعروضات الكثير الموجودة فى المحل الصغير. مسئول المبيعات كان منتبه زيادة عن اللزوم، يمكن علشان مش متعود على زباين فاهمين زينا، لكن في المجمل كان مفيد.العرض الآخاذ بـ يعبر عن الفكرة العامة أكثر من القطع المنفردة، كل الحوائط مغطاة بستيكرات لها أفكار، وأشكال وأحجام متنوعة. أوقات بـ يبقى صعب أنك تقدّر القطع المنفردة بسبب طريقة العرض الفوضوية. امشى شوية للمدخل، هـ تلاقى مطبوعات على شكل كذا تنين صينى وصور سيدات بـ تلفت نظر الزوار. المجموعة المعروضة فيها كل حاجة من أنماط فنون القبائل البدائية لغاية صور متعلقة بالرياضة، ومن فن كتابة الخط العربى لغاية رسومات أطفال حلوين.كثير من تصميماتهم واضح أنها مستوحاة من أفكار التاتوهات المشهورة زى اللى عليها تنين، والسحالى والورد وأنماط فنون القبائل البدائية. مع أفكار ثانية موجودة زى الطبيعة، والرياضة والموسيقى. بعض التصميمات مناسبة للبيوت، وفيه تصميمات ثانية مناسبة أكثر للمطاعم أو الستوديوهات. رغم مجموعة التصميمات الكبيرة الموجودة عندهم، لكن التصميمات الجديدة قليلة.تشكيلتهم الخاصة بغرف الأطفال مرحة وألوانها مبهجة، بـ تتراوح بين صور جريئة شوية لطائر الرود رانر road runner والزرافات، لغاية مجموعة أقل حدة شوية للدب بو Pooh. كل الملصقات بـ تُصنع حسب الطلب، وممكن تتعمل بأى حجم وأى لون.فرحنا كمان أنهم بـ يعملوا تصميمات وملصقات فينيل حسب الطلب. الكتالوج الخاص بهم، واللى بـ يقدموه بفخر موجود فيه مجموعة ملصقات أكثر بكثير من المعرض. وبـ يسهل عرض التصميمات على الزبائن.المجموعة الأصلية عندهم شاملة ملصقات عليها فن الكتابة باللغة العربية، ودى بـ تضيف لمسة أنيقة على المعروضات المزعجة. كمان عجبتنا الملصقات الأفريقية اللى بـ تتراوح بين الظلال وحتى صور لأدوات.خاصية ثانية مميزة هى الملصقات الفينيل المضادة للمياه علشان الحمامات وكبائن الاستحمام وحمامات السباحة. سهولة التركيب والإزالة بـ تخليها طريقة لطيفة لإضافة روح جديدة على الأماكن المهملة.الأسعار بـ تبدأ من 120 جنيه وأنت طالع، على حسب الحجم والتصميم. التصميمات الأصلية عادة تكلفتها بـ تبقى أكثر شوية. تنفيذ التصميم بـ يأخذ حوالى أسبوع للتنفيذ والتوصيل، وكمان بـ يقدموا خدمة التوصيل والتركيب.

...

جاليرى بوهو: ماركات محلية وعالمية فى هليوبوليس
اصدرت في: 13/07/2012

واضح أن فيه قاعدة خفية بـ تقول أنك مستحيل تلاقي ملابس سعرها مناسب وفى نفس الوقت ماشية مع الموضة بسهولة من غير ما تلف على القاهرة كلها. كمثال، لو كنت فى محل غالى هـ تدّور وسط حاجات كثير أسعارها غالية علشان توصل لحاجة سعرها معقول، أو فى محل رخيص محتاج تشوف حاجات كثير مش حلوة علشان توصل لحاجة كويسة. «جاليرى بوهو» اللى لسه فاتح كسر القاعدة دى. وواضح أنه قارى السوق المحلية والأوربية وجمع كل الحاجات الحلوة علشان تبقى جاهزة ومتاحة لسكان هليوبوليس تحت سقف واحد. فى شارع جانبى متفرع من شارع صلاح سالم، وفى مساكن شيراتون، المحل بـ يعرض ملابس على أحدث طراز، وفساتين سهرة، وشنط، وأحذية، وإكسسوارات ومستلزمات منزل لمصممين محليين ومن البلاد المجاورة لنا، بالإضافة لماركات معروفة من أوربا. أول ما تدخل هـ يقابلك أرفف عليها حاجات متنوعة زى أعواد للحفلات قابلة لإعادة الاستخدام وأعواد الأكل الصينى، أو سماعات ملونة تنفع تتوصل على أى موبايل سعرها 190 جنيه. كل دى قطع لطيفة مش موجودة عادة فى أى مكان ثانى فى القاهرة. كمان فيه مستلزمات منزل زى مخدات، وقاعدة للكؤوس، وفوط، وصوانى، ومجّات لمصممين مصريين زى "جود"، و"خمسة وخميسة"، و"كايرويد"، إضافة لشموع من "كاندل كوليكشن". مكان لوضع ميدالية المفاتيح على شكل مفتاح خشب من "امسكوا الخشب" كانت لطيفة جدًا، وبرضه مجموعة سكاكين من سبع قطع. كمان عجبنا قفاز من غير صوابع ملون وخامته مقاومة للماء ومعاه مريلة سعرهم 85 جنيه. القطع المفضلة لنا كانت إكسسوارات لزينب شاهين عليها مصطلحات ساخرة مصرية ولبنانية زى "إيجيبشن هـ يبوسنى" مطبوعة بالعربى على خواتم ألوانها مبهجة وأسعارها بين 50 جنيه و70 جنيه. إكسسوارات ثانية موجودة لمصممين زى "تاش"، و"لوليسكو"، و"يوكيز"، و"بانجلز" ومصممين ثانيين، مع حاجات ثانية من إكسبريس وبريمارك. كمان فيه ساعات "وى واتش" ومايوهات بيكينى لطيفة وملابس للبحر. تشكيلة متنوعة من القمصان وملابس السيدات معروضة داخل المكان. تى شيرت بيضاء لندى أكرم عليها صورة الممثلة أودرى هيببورن بشريطة وردى فى شعرها مع تعليق مكتوب "البنات الفرحانين هم أحلى بنات" ( 300 جنيه). تى شيرتات ثانية عليها صور مارلين مونرو، وسعاد حسنى وإليزابيث تايلور. قطعة ثانية شيقة عبارة عن مجموعة تي شيرتات قصيرة بدون أكمام من تصميم "بوهو شاركى" عليها تطريز على شكل عين وشنب عاملة تكوين لرجل لابس طربوش (290 جنيه). معروض كمان فى الجاليرى أشكال مختلفة من الشنط الأنيقة والأحذية والصنادل. شنط بوهو بألوانها المتعددة بحوالى 250 جنيه، وشنط بوهو الصغيرة للبنات تبدأ من 120 جنيه. شنط ثانية من "إل ماك" و"جاى روس" وناعومى هانم بالإضافة لمايكل كورس متاحة برضه. كمان تشكيلة محدودة لكن لطيفة من الباليرينات، والصنادل والشباشب ماركة "أتموسفير" ده غير ماركات أوربية ثانية زى صندل برتقالى مبهج مكتوب سعره 190 جنيه. غرفه كاملة مخصوصة علشان عرض الفساتين. فساتين سهرة من رفيق زكى معروضة على رف أسعارها بـ تبدأ من 190 جنيه. ورف ثانى عليه فساتين مستوردة من "بى سى بى جى"، و"ميس سيلفريدجس" و"بريمارك". "جاليرى بوهو" يعتبر إضافة هائلة علشان بـ يعرض تشكيلة كبيرة متنوعة وقطع مرحة، لكن أهم سبب أنه كسر القاعدة الذهبية للتسوق فى القاهرة بأن عنده ملابس شيك وسعرها مناسب، وكل ده فى مكان واحد.

...

ديزاين سنتر: أثاث مميز مناسب لاحتياجاتك فى هليوبوليس
اصدرت في: 02/07/2012

وأنت بـ تتمشى فى شارع بغداد الموجود فى منطقة الكوربة فى هليوبوليس، صعب ما تأخذش بالك من محل بواجهة زجاجية كبيرة معروض فيها نماذج أثاث مصغرة وتحف تخطف العين. أهم حاجة عند «ديزاين سنتر» هو الاهتمام بالتفاصيل، لأنهم بـ يفخروا أنهم فنانين، مصممي ديكور وأثاث ومهندسين معماريين فى نفس الوقت. المعروض عندهم يعتبر عينات من إنتاجهم، داخل المكان هـ تشوف كتالوج كامل من الأثاث من تصميمهم. "ديزاين سنتر" أكيد مش لعشاق الأثاث الكلاسيك. فى الحقيقة مقابلة واحدة مع المهندس ماجد عزمى -مصمم ديكورات واستشارى- هـ تخليك تقول بنفسك "أنا ضد الكلاسيك"، لكن نقدر نقول أن التشكيلة المتنوعة اللى عندهم هـ تنفع مع أى بيت فيه أذواق مختلفة. وصف المكان بأنه "محل" هـ يبقى ظلم، لأن ببساطة النصائح والتوصيات اللي بـ يعطوها لك مالهاش ثمن. بـ يأخذوا وقتهم علشان يتعرفوا على العميل والمساحة اللى يقدروا يتحركوا فيها، وده بالتركيز على العملية والشكل الجمالي في نفس الوقت. أشكال كثيرة من ترابيزات الطعام مصنوعة من زجاج، ومعدن، وخشب، وكل قطعة تعتبر تحفة فنية. الحقيقة أن دى غالبًا أكبر تشكيلة أثاث نشوفها فى القاهرة بـ يدخل فى خاماتها الزجاج. من ترابيزات الأكل لترابيزات القهوة للبارات ووحدات التليفزيون. أرجل الترابيزات ساعات بـ تتعمل من الزجاج وداخله أوراق شجر مجففة وفلين وأشكال زينة ثانية. البارات تعتبر مفضّلة وكمان تخصص بالنسبة لهم وأسعارها بين 6000 إلى 8000 جنيه. الكتالوجات فيها بارات مقّفلة للبيوت المحافظة. لكن أكثر حاجة عجبتنا كانت ترابيزة قهوة قصيرة قاعدتها معمولة من جذع شجرة الرمّان، ومن فوقها سطح زجاجى مدوّر (2500 جنيه). أسعار ترابيزات القهوة بـ تكون بين 3000 إلى6000 جنيه والطقم الكامل هـ يكلفك حوالى20000 جنيه. الكنب المعروض أغلبه لفردين، وسعره تقريبًا 3000 جنيه. مكتبة من خامات مختلفة سعرها بين 12000 إلى 8000 جنيه. وعلشان يضمنوا التميّز. فيه عدد محدد للمرات اللي بـ يُنفذ فيها كل تصميم، علشان تبقى حاجة خاصة بك. "إحنا مش بـ نعمل إنتاج ضخم"، دى كانت كلمة إسحق عزمى شريك مؤسس لديزاين سنتر. التحف الحقيقية هى فعلاً مجموعة لوحات رسمها إسحق عزمى بنفسه، وكمان فنانين ثانيين، بين (50000 – 2000 جنيه). كمان تقليد للأعمال الأصلية ممكن يُنفذ وغالبًا بـ يكون أوفر بكثير. التوصيل بـ يأخذ حوالى 8 - 12 أسبوع لو اختارت حاجة معمولة لك مخصوص. ديزاين سنتر كمان عامل دروس لشرح مبادئ التصميم، الفنون الجميلة وتصميم الديكور (4000 جنيه لكورس 18 حصة). كمان بـ يعملوا معرض كل كام شهر.

...

كادر: تابلوهات وأعمال فنية للبيع في سيتي ستارز
اصدرت في: 06/06/2012

في الدور الأول في المرحلة الأولى في مول سيتي ستارز وبالتحديد أمام محل «استقبال» للأثاث، لمحنا محل بـ يبيع منتج غير مألوف في المول، وهو محل «كادر» اللي بـ يبيع بورتريهات ولوحات زيتية وبراويز ولوحات فنية بأحجام مختلفة. المحل أشبه بركن في الجدار مساحته مش كبيرة وكل واجهاته زجاجية علشان تبين الأعمال المعروضة داخل المحل. دخلنا وبدأنا نتفرج على اللوحات المعلقة لكن لأن المساحة مش كبيرة كان فيه أضعاف عدد اللوحات مرصوصة على الأرض ولازم تقعد تقلب بأيدك علشان تتفرج على كل اللى موجود في المحل. المحل فيه أعمال فنية أصلية ومقلدة، مصرية ومستوردة وكل الأحجام موجودة من أول الـ 1.5 متر x 1.5 متر لحد الأحجام الصغيرة الـ 30 سم x 20 سم. مناظر طبيعية وبورتريهات لأشخاص وأعمال تجريدية وسريالية وتكعيبية. فيه لوحات زيتية عادية وفيه رسومات على القماش ولوحات أكريليك وفحم وكل ما تتخيله. الأسعار بـ تختاف حسب الحجم أولاً وبعد كده حسب الخامات المستخدمة وإن كانت أصلية ولا لأ. يعني مثلًا عجبنا جدًا تابلوه عملاق عليه ألوان مجردة بدرجات البرتقالي والأحمر وكان مقاسه أكبر من متر مربع وكان سعره 2150 جنيه وعرفنا أن اللوحة نفسها مستوردة. وأصغر حجم من النوع ده من اللوحات التجريدية المستوردة كانت بـ 185 جنيه. على الصف الشمال من الأعمال المعروضة في واجهة المحل كانت كلها واخدة الطابع المصري التراثي ببورتريهات لوجوه نوبية ورسوم بالفحم للموالد والفرق الشعبية الصعيدية وفوانيس ودي كانت من أكثر الأعمال اللي عجبتنا في المحل. وعرفنا أن دي أعمال أصلية لفنان اسمه محمد شهاب، وكان واضح عليه توقيع الفنان والتاريخ. وكان سعر أحد اللوحات بالحجم الوسط 1080 جنيه. «كادر» بـ يشارك في معارض الأثاث والديكورات زي (لو مارشيه) اللي لسه خلصان قريب، وبـ يتعامل مع عدد من الفنانين المصريين والأجانب وبـ يعرض أعمالهم للبيع وممكن تحدد طلبك بالضبط وهم يحاولوا يحضروه لك من خلال معارفهم وعلاقاتهم بالرسامين والتشكيليين. بـ تختار شكل البرواز اللي يعجبك، ممكن تأخذ التابلوه بالبرواز اللي عليها، وممكن تختار من المعروض داخل المحل وفيه عينات كثيرة جدًا منها المذهب والخشبي العادي والملون والتقليدي والمنحوت زي شغل القويما في النجارة وغيرها كثير. بس طبعًا لو هـ تأخذ برواز عمولة الموضوع ممكن يأخذ يوم أو اثنين. إدارة المحل والمصنع الخاص بهم موجود في مدينة بدر بالمنطقة الصناعية الثالثة، متخصصين في صناعة البراويز. عجبنا أن لهم فرع في سيتي ستارز لأن النوع ده من المحلات ناقص شوية هناك، وفي كل مكان الحقيقة.

...

هاي هوم: تشكيلة كبيرة من الأثاث والإكسسوار في مصر الجديدة
اصدرت في: 17/09/2011

في ميدان تريامف في مصر الجديدة، محل صغير أنواره جامدة من بعيد شدنا، أول ما تقرب وتنزل الكام سلمة اللي بـ يؤدوا للمدخل وعلى الجانبين جنينة صغيرة هـ تلاقي صوت مزيكا صدر عن Sensor أول ما تدخل من الباب علشان تنبه العاملين في محل «هاي هوم - High Home» أن عندهم ضيف جديد. "هاي هوم" محل أثاث وإكسسوارات منزل (زي تابلوهات، تماثيل على شكل حيوانات وأشخاص، وحدات إضاءة زي الأباجورة، فازات، وغيرها)، الإكسسوارات مستوردة من الفلبين، وتايلاند، وكينيا، والهند، وباكستان، وأندونيسيا. أما الأثاث المنزلي (ماعدا أثاث المطابخ) بـ يصنعوه لك بناء على نماذج صور عندهم، أو لو جبت لهم صور لأثاث أنت حابب تصنع شبهه في ورشتهم في عين شمس. المحل موجود من سنة 2005، مساحته صغيرة لكن فيه تنويعات كثيرة جدًا على كل الأذواق ومافيش قسم مخصص لكل حاجة، كل الحاجات محطوطة مع بعضها، والطرقات صغيرة مش مستقيمة عاملة زي بيت جحا شوية لحد ما توصل لمكتب صاحب المحل أحمد أنور. العاملين في المحل ودودين جدًا ومتعاونين وبـ يفضلوا معاك لو أنت حابب تسأل عن حاجة وتفاصيلها. أسعار الإكسسوارات بـ تتراوح من 50 لحد 5 آلاف جنيه على حسب الحجم والخامة المصنوع منها، يعني مثلاً شفنا هناك تابلوه على شكل مجموعة من كذا حصان بارزة ومحفورة من قطعة خشب واحدة (3750 جنيه)، وتماثيل القطط الخشب المطعمة بالمعدن (50 جنيه)، إلى جانب تماثيل لحيوانات ثانية من الخشب المطعم بالنحاس. فيه كمان حاجة هاي هوم بـ يصمموها هي الستيكرز اللي بـ تتعلق على الحائط كديكور. أما بالنسبة للأثاث لقينا عنده كنبة كبيرة على شكل حرف L بـ 10 آلاف جنيه من القطيفة، ولو عاجبك الشكل ممكن تغير خامة الكنبة وحجمها يكبر ويصغر على حسب مساحة شقتك. الخدمة في "هاي هوم" مش بـ تقف عند حد التصنيع للأثاث فقط، لأنهم هناك حريصين أن شغلهم يتوظف مع باقي ديكور شقتك بشكل كويس علشان على حد قولهم "قطعة الأثاث ما تتظلمش"، أحمد أنور صاحب المحل لازم بـ يسألك لون الحائط في شقتك إيه ومساحتها وبـ يعرف كل تفاصيل Plan الشقة علشان يتفصل صح وكمان بـ يقدم لك توصية للون الستائر والأرضيات علشان المكان يكون وحدة واحدة مش مجرد قطعة أثاث من عنده محطوطة في بيتك وخلاص.

...

«بشاير ستايل»: محل أثاث شغل يدوي في سيتي ستارز
اصدرت في: 03/08/2011

ساعات بـ تروح محلات أثاث وبـ تحس أنك عايز تنقل من بيتك وتعيش فيه على طول.. مستخبي في ركن أمام «كنوز» في قسم «خان الخليلي» في سيتي ستارز هـ تلاقي محل «بشاير ستايل – Bashayer Style» وهو من النوعية دي من محلات الأثاث. «بشاير» متخصص في الأثاث العربي والمصري التقليدي بس مع طابع حديث أو مودرن شوية. أول ما تدخل المحل هـ تحس أنك دخلت مغارة علاء الدين، كل حتة بـ تبص فيها، هـ تلاقي فيها قطع حلوة، السقف مليان وحدات إضاءة عربية تقليدية محفورة بالخط العربي. الحوائط مليانة رسومات فنية وسجاد شكلهم مع بعض لوحة فنية حلوة، هـ تلاقي كمان وحدات للقعدة موجودين في أماكن مختلفة. المساحة مُقسمة إلى جزء ملون زي مثلاً ركن أزرق وفيه ترابيزات زرقاء ودواليب وكنب وفيه كمان ركن أخضر، أحمر وفضي. الأثاث بالخشب كله شغل يدوي ومرسوم ومعظمه معمول بالأرابيسك، وفيه قطع ثانية شكلها بسيط وعليها رسومات حلوة، الأسعار مش رخيصة قوي يعني طقم مكون من 3 كنب و3 طاربيزات بـ 19000 جنيه، وفيه مثلاً مجموعة أصغر مكونة من 2 كنب و3 ترابيزات بـ 14000 جنيه، الأسعار دي من غير المخدات اللي بـ تيجي مع الكنب. فيه كمان كنب ناعم بـ 3500 جنيه 1.5 متر وممكن تعمل تصميمها ومقاسها حسب رغبتك. وفيه مساند للأرجل بـ 850 جنيه وأكثر وممكن كمان تعملهم حسب رغبتك، والمخدات على شكل هرم وعليها زخارف شبه الخيامية بـ 250 جنيه. وحدات الإضاءة في بشاير أسعارها غالية وممكن يوصل سعرها لـ 25000 للقطعة، لكن فيه لاﭬانديرا صغيرة سعرها بـ 800 جنيه وفيه أغلى كمان، وحدات الإضاءة بالخشب بـ تضيف جو لطيف، هادئ ودافئ بالإضاءة وأسعارها بـ تبدأ من 2500 جنيه. فيه قسم صغير مخصص لغرف النوم، فيه إطارات للسرير أسعارها بـ 8000 جنيه وفيها 2 كومودينو، وفيه مجموعة كبيرة من المخدات والستائر، ستائر معمولة من الخط العربي وعليها تصميمات مصرية قديمة، وفيه قسم صغير للسجاد بـ يقدم سجاد شغل يدوي من جلد الخروف من أسوان وسيوة وحسب المقاس والقماش الأسعار بـ تختلف، وبـ تتراوح ما بين 360 جنيه لـ 7000 جنيه. جنب قسم السجاد فيه مجموعة من أطباق من السيراميك والبلاط، كل المنتجات شغل يدوي ومرسومة وحسب كلام البائع في المحل هي سهلة الغسيل، التصميمات غير مثيرة للاهتمام في المحل، ولو أنت ملتزم بمبلغ معين ممكن تشتري عروسة أو دبدوب صغير مصنوع من الطين بـ 30 جنيه للقطعة. «بشاير» محل أثاث رائع ومليان منتجات حلوة قوي بس غالية شوية، ممكن تزوره مرة وتتفرج على المحل نفسه كأنه متحف صغير وهـ تلاقي فيه حاجات مصنوعة بشكل حلو قوي والتفاصيل فيها رائعة.

...

كرداني: أثاث مودرن بلمسة شرقية في مصر الجديدة
اصدرت في: 20/07/2011

أغلب الناس لما بـ ييجوا يفرشوا بيتهم بـ يكون أمامهم اختيار من اثنين: إما يفرشوا مودرن أو ستيل. بس ليه ما نأخذش أحسن ما في الاثنين؟ لو نفسك تحاول تعمل الخليط المتميز ده٬ روح «كرداني» في مصر الجديدة. المحل الصغير ده قدر يعمل دمج بين المودرن والستيل بنجاح باهر. أول ما هـ تدخل المكان هـ تشوف تزاوج المودرن والستيل فورًا، خداديات أقمشتها بدوي محطوطة على فوتيه كبير ومريح. ورق بردي مكتوب عليه بخط اليد عليه مبروز في براويز مودرن ضخمة عاملين توازن هائل بين عملية الأثاث المودرن والتفاصيل المصرية التقليدية. كرداني عنده نجف رائع، وغالبًا أول حاجة هـ تلاحظها في المكان النجفة العربي القديمة المتعلقة في غرفة العرض الرئيسية، ده غير المصابيح العربية ومصابيح أخرى بـ تعطيك إيحاء أنها من القاهرة القديمة اللي مُوزعة في أكثر من جزء في المكان٬ وبجانب ده فيه مصابيح معاصرة براقة وانسيابية. فيه ترابيزات خشب مُزينة بحليات نحاس ملحومة في أركانها، وفيه بعض ترابيزات الصالون هـ تلاقي ورد بسيط جدًا مرسوم بمثلثات فـ أعطى لمسة مميزة وجديدة لقطعة أثاث خشب بسيطة، فيه كمان ڤازات٬ وزجاجات عطر وطفايات شكلها مختلف جدًا على الترابيزات. الحوائط مغطاة بلوح عبارة عن جمل مكتوب عليها عبارات كلها تفاؤل بالعربي المخطوط باليد٬ ومنها مثلاً: "حب الدنيا تحبك"٬ وبعض الآيات القرآنية، ومعلق على الحائط عند السلالم عقود بدوي كثيرة مبروزة ولازم تأخذ بالك منهم٬ الواحد منهم ممكن يجعل أي حجرة معلق فيها تحفة فنية. الموضوع بـ يحلو أكثر لما بـ نعرف الأسعار، أسعار كرداني حلوة! النجف الكبير من 2000-3500 جنيه والترابيزات الصغيرة اللي أركانها مُزينة بالنحاس بـ1750، والكرسي بـ550، والإكسسوارات الثانية زي البراويز المنحوتة والماسكات الأفريقية والڤازات كلها تحت الـ500 جنيه. الواضح أن كرداني بـ يعرف يقدر الثقافات المتنوعة اللي ألهمت الفن القاهري على مر العصور، وعنده من الصواني النحاس لأشكال هندسية منحوتة لماسكات أفريقية ألوانه متعددة، من الآخر كرداني رجع القديم موضة ثاني.

...

مودرن ماسترز: متخصص إضاءة صيني في مصر الجديدة
اصدرت في: 07/05/2011

في شارع نزيه خليفة اللي رايح على الميريلاند٬ فتح محل نجف وإكسسوار إضاءة من حوالي سنة اسمه «مودرن ماسترز – Modern Masters ». من بره منظره مبهر ومنور وهـ يشدك. المحل تابع لمجموعة «رشدان» و«رويال هاوس – Royal House » ٬ وهـ تلاقي اللوجو بتاع الإتنين والمعروضات المنورة والحائط الفضي اللامع اللي باين من برة بـ يناديلك من جوة المحل. لما دخلنا اول حاجة لفتت انتباهنا السقف المتغطي بالنجف الغريب المودرن واللي ليه طابع صيني. وفعلاً لما سألنا عرفنا ان النجف مستورد من الصين. أشكال النجف كانت أغلبها لاصق بالسقف ودائري او مربع٬ بأجزاء مربعة أو على شكل ورد أو قلوب وفيه منها متدلي من السقف. وإضاءتها بيضة فلورسنت أو صفرا٬ ودي أسعارها بـ تتراوح من ألف وشوية لفوق الألفين. وفيه كمان نجف طويل مثالي لبير سلم في ڤيلا أو شقة دوپلكس. فيه كمان ترابيزات للريسپشن بـ تبدأ من حوالي 450 جنيه. وتابلوهات كبير وصغير الصغير بـ يبدأ من حوالي 100 لفوق الألف للكبير. النجف كله مودرن٬ وبالرغم من إنه صيني الجودة واضحة على الحاجة. فيه كمان أباچورات في المكان مودرن وستيل٬ وموديلاتها جديدة وملفتة. ومن أجمل الحاجات اللي في المكان شيت ( sheet ) الحائط٬ واللي هو عبارة عن ورق حائط بس سميك وليه أشكال مختلفة ممكن يكون ليه ملمس الجلد أو البلاط. وده بـ يتباع بالشيت والشيت متر في حوالي مترين 60٬ وأسعاره بـ تبدأ من ألف جنيه للشيت. وفي ألوان وأشكال رائعة منها الميتاليك الفضي والميتاليك النحاسي. المكان كمان كان فيه أكتر من فوتيه «لازي بوي – La z boy » ألوانه وأحجامه مختلفة. ده غيرتشكيلة كراسي جلد على قوايم معدن رائعة٬ مودرن جداً وإنسيابية وجميلة٬ وكان في منهم عالي للترابيزات العالية. الخدمة رائعة والقائمين على البيع ودودين وبـ يرحبوا بإستكشافنا للمعروضات وبأسئلتنا الكتيرة. لكن لو انت مش من هواة الصيني – اللي الواحد كتير بـ يضطر يستسلمله عشان أسعاره المعقولة – مش هـ تلاقي حاجات تعجبك هناك كتير. ومع ذلك في لُقَط ما تتسابش وحاجات جودتها باينة عليها جداً.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن