ترفيه تسوق in مصر الجديدة Cairo, Egypt

تسوق

هدايا شلبي: إكسسوارات ولعب وهدايا في الكوربة
اصدرت في: 31/12/2012

بـ نكتب عن المحل ده من منطلق أننا لما نلاقي مكان بـ يبيع حاجات مش عارفين هي ممكن تكون بـ تتباع فين، وبـ نكتشف مكان بـ يبيعها بالصدفة بـ نحب نعرفكم به. يعني مثلًا منين ممكن تشتري لوازم تدخين زي "البايب" وولاعات أنتيكة بأشكال مبتكرة وفلاتر؟ منين ممكن تشتري هدايا غير تقليدية بأسعار معقولة؟، والأهم من ده كله لوازم وزينة المناسبات المختلفة، وبما أننا زرنا المكان ده وقت احتفالات السنة الجديدة، فالمكان كان مغطى باللون الأحمر وكل فاترينات المحل مليانة لعب وعرائس لبابا نويل وغيرها من التحف والإكسسوارات الخاصة بالمناسبة.بوتيك صغير في شارع إبراهيم في منطقة الكوربة في مصر الجديد، اسمه «هدايا شلبي» وهو مش جديد بالمناسبة، بالعكس هو قديم ومعروف جدًا لكن سكان المنطقة والمناطق القريبة من مصر الجديدة. صحيح حجمه مش كبير لكن التنوع الغريب في نوعية المعروضات اللي عنده اكسبته سمعة كويسة كواحد من البوتيكات الكلاسيكية القليلة، وممكن نسميه محل "خردوات" كمان؛ نوعية المحلات دي اللي في طريقها للانقراض، لكن لما يكون الكلام عن «شلبي» يبقى أكيد دي حاجة باقية ومرتبطة ببقاء مصر الجديدة نفسها، وهـ يفضل علامة مميزة مرتبطة بالمكان.من المعروضات اللي لفتت نظرنا المرة دي لعب الكريسماس اللي دمها خفيف بجد وما شفناش زيها في أي مكان ثاني زي عفريت العلبة اللي بـ يخرج منها رجل الجليد، مصنوع من القطن والبلاستيك بجودة عالية، وبـ تبدأ من حجم كف اليد، بأسعار من 30 لـ 75 جنيه حسب الحجم، وعرائس لشخصيات بابا نويل بـ 30 جنيه، وبيوت خشبية وماكيتات لرحلة العائلة المقدسة بـ 60 جنيه، وأطباق هدايا عليها رسوم الكريسماس من 20 لـ 40 جنيه. وغيرها من لعب الأطفال والبالونات بأسعار لا تذكر.قسم أدوات التدخين مبهر بجد، رغم أننا ضد التدخين بشكل عام، لكن حبينا نشتري منه بعض الإكسسوارت على سبيل الاقتناء كتحف وأنتيكات، زي الأشكال المختلفة للبايب، اللي فيه منه موديلات مصنوعة في الصين بأسعار من 60 لـ 80 جنيه، وموديلات مصنوعة في تركيا بـ يوصل سعرها لـ 120 جنيه، الفرق بـ يبقى في نوع الخشب، وقد إيه بـ يستحمل درجة حرارة عالية وعمره يطول معاك. ولاعات Zippo وماركات ثانية على شكل طبنجات حقيقية وغيرها من الموديلات اللي تنفع هدايا، وطبعًا فيه توباكو وفلاتر دخان وطفايات وكمان سجائر إلكترونية للناس اللي بـ تحاول تبطل تدخين ومش عارفين يجيبوها منين. وعجبنا قوي مجموعة أنتيكات لشيشات بحجم صغير جدًا، لكن ممكن تستخدم كشيشة حقيقية. ومن الحاجات اللي «شلبي» متميز فيها فعلًا هي المحافظ المصنوعة من الجلد الطبيعي أو القماش وتصميماتها خطيرة وعمرها طويل مش بـ تتقطع أو شكلها بـ يقدم وده عن تجربة. وأسعارها من 40 لـ 100 جنيه حسب الماركة.هـ تلاقي هنا كمان الحاجات اللي ممكن تلاقيها في بازارات الحسين وخان الخليلي، من لعب فرعونية وتماثيل صغيرة وميداليات مفاتيح وأعلام وقصافات أظافر بتصميمات أنيقة وسكاكين سويسرية مقلدة، تقريبًا كل حاجة بـ تدور عليها في باب "الرفايع" والمستلزمات الضرورية اللي بـ تبقى مش فاكر اسمها حتى ولا عارف تجيبها منين هـ تلاقيها هنا عند «هدايا شلبي». بوتيك يستاهل الزيارة مخصوص.

...

بيتس & بايتس: إكسسوارات للموبايل واللاب توب في سيتي ستارز
اصدرت في: 31/10/2011

الدور الأرضي في سيتي ستارز مليان محلات إلكترونيات بـ تبيع كل أنواع الأجهزة والإكسسوارات. محل واحد لفت نظر الناقدة كاتبة الموضوع بشدة بإضاءته الخافتة والحوائط المرصوص عليها موبايلات وإكسسوارات. «بيتس & بايتس – Bits & Bytes» عنده تشكيلة مميزة من الإلكترونيات سواء للمحترفين ومحبي التكنولوجيا أو لأي حد بـ يدور على أي قطعة أو إضافة شكلية لتليفونه. المحل فيه اختيارات كثير للاب توب والكاميرات الديجيتال والكمبيوترات بشاشات باللمس وكمان منتجات شركة Apple بأسعار منافسة. فيه أجهزة آي باد 2 و3G بأسعار أقل من الموجودة في مصر بحوالي 400 جنيه، اللي سعته 64 جيجا سعره 5800 جنيه وعنده المنتج المنافس من شركة سامسونج وهو "جالاكسي تاب". الآيفون الوحيد اللي عنده كان iPhone 4 سعته 32 جيجا وكان مقفول على شبكة واحدة وسعره 5200 جنيه. الكاميرات الديجيتال الصغيرة موجودة بموديلات وماركات كثيرة، فيهCanon وGenius بأسعار بـ تبدأ من 300 جنيه. واضح أن ما عندهمش تنوع كبير في أنواع اللاب توب، لكن هـ تلاقي الموديلات الجديدة الأكثر شعبية وانتشارًا بأسعار كويسة لكن أغلى شوية من باقي محلات الكمبيوتر المتخصصة خارج المول. ممكن تتصل بالمحل وتعرف أي تفاصيل خاصة بموديلات الكمبيوتر وإمكانياته قبل ما تروح. أرفف وصفوف كثير مليانة إكسسوارات ملونة من البلاستيك للموبايل، وبأشكال غريبة ومبتكرة، وممكن تغير شكل الآيفون أو البلاك بيري أو أي تليفون ذكي وتخلي شكله مطرقع أو بـ يلمع باستخدام الأغلفة العجيبة بأسعار تبدأ من 15 جنيه. أكثر من ستاند في كل حتة في المحل عليهم شنط لاب توب، مصنفين حسب الحجم، من الصغير للكبير. وعندهم تصميمات وألوان حلوة وخامات جلد للناس المهمين. عجبنا شنطة لونها بمبي بناتي خالص وكان سعرها 100 جنيه وكان ملمسها ناعم وتقفيلها كويس. الحاجة العظيمة في «بيتس & بايتس» أنك ممكن تشوف كل حاجة معروضة في المحل وأنت واقف بره من خلال الزجاج. وممكن كمان تشوف بعض الأسعار قبل ما تدخل وتبدأ تسأل العاملين بالمحل عن تفاصيل المنتج. العاملين بالمحل محترفين جدًا وعارفين يجاوبوا على كل استفساراتنا وكانوا بـ يرشحوا لنا موديلات معينة من وسط كل المعروضات حسب احتياجاتنا وميزانيتنا، وخرجنا من المحل بزيارة مفيدة وتجربة جديدة ومش متعبة.

...

فيرجن ميجاستور: من الإبرة للصاروخ!
اصدرت في: 21/05/2011

من حوالي خمس سنين وسيتي ستارز كان لسة بـ يقول يا هادي فتح أول فرع لـ«فيرجن ميجاستور- Virgin Megastore» قبل ما يكون فيه «سبينيز» او «كاسبر اند جامبيني» و غيرهم كتير. « فيرجن» ساعتها كان سمة مميزة للمول. نقدر نقول «فيرجن» اتوجد في ارض بِكر و بعيد عن اي منافسة و قدر يبقى رقم واحد في «سيتي ستارز» لـ المالتي ميديا Multimedia: مزيكا، أفلام، كتب، تليفزيونات، موبايلات...كل اللي قلبك يحبه. المكان متقسم ٦ أقسام تقريباً، قسم الكتب و قسم الإلكترونيات و قسم سيديهات المزيكا و قسم الأفلام الـ DVD والألعاب. و رغم أن كلمة ميجاستور بـ تدّي إيحاء أنه محل ضخم مليان معروضات من الأرض للسقف إلا أن الحقيقة أن مساحته نفس مساحة «زارا – ZARA» اللي في نفس الدور في سيتي ستارز مثلاً و الإتنين أصغر من سبينيز اللي في الدور الأرضي بكتير، يعني واحد متسوق محترف ممكن ياخد ممراته رايح راجع في خمس دقايق. و مع ذلك «زارا» معندوش تي-شيرتات عليها رسومات دمها خفيف زي اللي في «فيرجن» ولا هـ تلاقي موسوعة «لاروس جاسترونوميك» للطبخ في «سبينيز»! فالمساحة مش هي المقياس. الفكرة أن «فيرجن» مثالي لأي حد بـ يدور على آخر رواية لـ«باولو كويلو»، فيلم لسة نازل DVD ومش موجود في أي حتة، آي بود iPod و مستلزماته. وعلى فكرة تقريباً كل البوسترات و اللعب و التي-شيرتات مش هـ تلاقي زيها في أي مكان تاني. الألبومات والسيديهات عليها علامة «فيرجن»، العربي والاجنبي و هـ تلاقي كل أنواع المزيكا من أول البوب لحد الجاز و السكا Ska! قسم الكتب كبير نسبياً و يعتبر أحسن قسم، و متقسم بأنواع الكتب. ركن الطبخ لواحده عايز زيارة إسبوعية ده للي غاوي طبعاً! و في كتب كتير للتعليم الذاتي و الهوايات و في موسوعات كاملة في كل التخصصات و الأظرف موسوعات المزيكا و السير الذاتية للفنانين العالميين و نجوم الروك! فيه ركن كامل لألعاب البلاي ستيشن و كل إكسسوارته، و هـ تلاقي كمان الجيتار بتاع لعبة «جيتار هيرو». ورا الركن ده فيه ركن لإسطوانات الـDVD للأفلام العربي والأجنبي والمسلسلات وغير الركن ده سيديهات المزيكا مترصصة على عواميد حوالين المحل. أحياناً لما بـ يكون فيه محل عاوز يبقى بتاع كله، ينتهي به الحال انه مش متخصص في حاجة، ولا مميز في حاجة بعينها! لكن ده مش حاصل مع «فيرجن»، خالص! هـ تتعب و انت بـ تلف في «فيرجن» مش عشان هو كبير إنما عشان التشكيلات المتنوعة من كل حاجة و اللي مرصوصة بشكل مغري قوي. «فيرجن» مش هـ يخذلك، هـ تلاقي كل اللي انت عايزه مدام مش بـ تدور على غسالة مثلاً!

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن