إكسسوارات تسوق in مصر الجديدة Cairo, Egypt

تسوق

فورتشن: ماركة الإكسسوارات ومستحضرات التجميل العالمية دلوقت فى مول صن سيتى
اصدرت في: 15/01/2014

الماركات العالمية تشبه حبيبات الذهب وسط مشهد التسوق القاهرى، كون المنتجات المستوردة هى الاختيار الوحيد للوصول لجودة عالية. مع وجوده بالفعل فى كثير من مراكز تسوق القاهرة، دلوقت فرع جديد لـ "فورتشن-Fortune" وصل صن سيتى مول فى هليوبوليس. بتقديمه لمجموعة مبهرة من كل حاجة بداية من شنط يد ماركة جيفنشى وشنط سفر ديلسى، لغاية مستحضرات تجميل من بورجوا، وطلاء أظافر من سيبال Cybele، وعطور تيرى ماجلر Theirry Mugler وخطوط العناية بالبشرة من كلارينز، المحل مكون من أقسام كل واحد فيهم اسمه واضح ومنتشرين فى مكانه الواسع فى الدور الثالث. فورتشن بإضاءته المبهجة وشكل العرض المميز دائمًا بـ يقدم عروض دعائية تشجع المتسوقين المترددين يدخلوا المحل. المحل له مدخلين، واحد يدخلك مباشرة لقسم الشنط بماركاته زى جيفنشي، جينزات كالفين كلاين وروكوباروكو. مع موضة كل الموسم، فورتشن بـ يعرض مجموعة ملابس للموسم الحالى ببطاقة سعر عليها أسعار تبدأ من 500جنيه. جزء من المعروضات الباقية من الموسم السابق ممكن تلاقى عليها أسعار مخفضة لكن لمدة أسابيع قليلة. بجانب شنط اليد، فورتشن كمان بـ يقدم قمصان رجالى ماركة فالنتينو وأرمانى معروضة بشكل شيك فى أدراج مقفلة. الدور الثانى هو المدخل الرئيسى المؤدى لأقسام العطور المليانة بماركات دافى دوف، تيرى ماجلر، شانيل، ديور، جيفينشى، نينا ريتشى وأسماء ثانية لها نفس الشهرة. على اليمين، فورتشن بـ يعرض قسم كبير مخصص كله لخطوط العناية بالبشرة لكلارينز، لانكوم، إستى لودر وكلينيك. الأسعار تتراوح بين 200جنيه و800 جنيه على حسب الحجم والتركيبة لمستحضر العناية بالبشرة. نرجع للوراء شوية، قريب من مكتب الكاشير الدائرى، فورتشن خصص ركن صغير حجمه صغر بشكل واضح من وقت آخر زيارة لنا بحيث يعرض مجموعة محدودة من مستحضرات التجميل وطلاء الأظافر، منها الماركة المحلية الاقتصادية والمحبوبة فى نفس الوقت، سيبال، الاسم الفرنسى الشهير بورجوا، الماركة البريطانية آفون، والشركة الأمريكية الشهيرة ريفلون.من ناحية السعر مافيش شك أن سيبال هى الأرخص، بتكلفة طلاء الأظافر حوالى 14جنيه. على العموم، كحل عين عادى جدًا من بورجوا هـ يزود فاتورتك بقيمة 44 جنيه. قسم ملابس البحر والملابس الداخلية مستخبى فى الخلف وراء حائط، نوعًا ما عادى ومافيش اهتمام كبير به. معظم ملابس البحر المعروضة مايوهات بيكينى عليها رسومات محرجة وزخرفة بـ تزين القماش. على النقيض، فورتشن بـ يقدم مجموعة مبهرة من شنط ماركة ديلسى الشهيرة بمتانتها وألوانها المبهجة. صحيح أغلب المتسوقين العاديين غالبًا مش هـ يفكروا يدخلوا فورتشن إلا فى وجود عروض، لكن مستهلكين ثانيين من المهتمين بالماركات هـ يفرحوا بوجود مكان فيه أفضل خطوط المنتجات لأغلب الأسماء الشهيرة فى السوق.

...

كريبتونايت: جنة هواة الكوميكس والأبطال الخارقين في سيتي ستارز
اصدرت في: 25/09/2013

في الدور الرابع من المرحلة الثانية في سيتي ستارز فتح فرع جديد لمحلات «كريبتونايت – Kryptonite» اللي كان فتح في البداية في شارع السبكي في مصر الجديدة، وده الفرع الجديد للمحل الفريد من نوعه والمتخصص جدًا والمبهر لأقصى درجة. مش هـ نقدر نداري إعجابنا وانبهارنا بـ «كريبتونايت» طول ما إحنا بـ نكتب المقال ده، ولولا الأسعار المرعبة أحيانًا لبعض المعروضات كان هـ يأخذ الـ 5 نجوم بدون فصال. تعالوا نتكلم شوية عن التخصص غير المألوف للمحل، وبالتحديد غير المألوف في مصر. كريبتونايت طبعًا هو العنصر المادي اللي بـ يطلع من كوكب كريبتون اللي جاء منه "سوبرمان" زي الحدوتة الخيالية ما بـ تقول. ولأن دي الحدوتة الأشهر في عالم الكوميكس Comics اختار المحل المتخصص في بيع القصص المصورة وتماثيل الأبطال الخارقين وشخصيات أفلام الأكشن العالمية اختار لنفسه الاسم ده. هنا هـ تلاقي كل كتب ومجلدات الـ Marvel وهي الشركة اللي ابتكرت كل الـ Super Heroes المشهورين زي سبايدر مان وكابتن أميركا وإكس مِن وآيرون مان وثور وغيرهم، وفيه كوميكس شركة DC Comics الشهيرة زي باتمان وسوبرمان وجرين لانتيرن وذا فلاش. طبعًا الأسعار مدونة على كل الكتيبات بالدولار، وكلها بـ تتراوح بين 15 لـ 20 دولار، حولها للجنيه المصري بقى وأنت تعرف أن أي كتاب من دول مش هـ يبقى سعره قليل. لكن المهم أنها أصلية ونادر أنك تلاقيها في أي مكان ثاني، والإصدارات حديثة وبـ تيجي أول بأول وده المهم. الجانب الثاني الأكثر إبهارًا في المحل هو التماثيل أو الـ Figures المعروضة للبيع! مصنوعة من خامات مختلفة، جبس وفيها حلي من المعدن والفايبر، بأحجام توصل لـ 60 سم طول وبتصميمات غاية في الدقة، تقريبًا مافيش غلطة، لما تشوف تمثال شخصية الجوكر شرير كوميكس باتمان أو تمثال الرجل الأخضر Hulk أو جرين لانتيرن أو الرجل الحديدي Ironman أو Seth من مجموعة حرب الكواكب بأسعار من 1000 لحد 3000 جنيه ما تستغربش وما تستكترش الرقم! التصميمات خيالية وهـ تحس أنك فجأة تحولت لمدمن تماثيل أكشن وعاوز تقتني كل حاجة بـ تشوفها هنا، تمثال شخصية Terminator لأرنولد شوارزنيجر كان تحفة فنية، وكذلك روبن وهو على موتوسيكل باتمان الشهير (3200 جنيه) وغيرها من التماثيل ولعب الأطفال أو الشخصيات الأصغر حجمًا (20 لـ 30 سم) لكل الأبطال الخارقين وG.I Joe والمتحولون Transformers وشخصيات من ديزني وهوليوود بأسعار من 200 لحد 600 جنيه. شكل المحل مغري أنك تقضي فيه وقت طويل علشان تتفرج على كل حاجة بتمعن، والقائمين على المكان متخصصين ومحترفين جدًا وبـ يحبوا عالمهم الخاص جدًا في «كريبتونايت» وعندهم إجابة لكل سؤال. حبينا المحل جدًا وحتى لو مش هـ نقدر نشتري بالأسعار دي ممكن نروح كل يوم علشان نتفرج.

...

كوتون: ماركة الملابس التركية الشهيرة فى سيتى ستارز بهليوبوليس
اصدرت في: 16/09/2013

لا صوت يعلو وسط مشهد التسوق القاهرى فوق صوت الملابس. ماركة الملابس التركية " كوتون-Koton" تفتخر بتقديمها أحدث الموديلات من الملابس الحريمى، الرجالى وكمان الأطفال. بعد توسعها فى السوق العالمية من كام سنة فاتوا، مصر فازت بفرعين مميزين، واحد منهم موجود فى سيتى ستارز. وقت زيارتنا، كوتون كان عامل تخفيضات قوية، مع قطع كثيرة عليها خصم يوصل 70% من السعر الأصلى. ممكن تحتاج وقت علشان تدور كويس وسط الرفوف، والسبب هو اللخبطة الشديدة فى ترتيب المقاسات وتصنيفها. الفرع ده تحديدًا بـ يقدم مجموعة محدودة جدًا من ملابس الرجال والأطفال، وأغلب المساحة الباقية تحتلها مجموعة كبيرة من ملابس السيدات. مع تركيزنا على قسم الحريمى، لاحظنا تشكيلة كبيرة من البنطلونات الصيفية مزينة بالورد، سعرهم قبل الخصم 399 وبعده 320 جنيه. جينزات Skinny بألوان فاتحة زى الفوشيا، البرتقالى، التركواز موجودين بسعر 170 جنيه، وبنطلونات ضيقة لونها أبيض سعرها 280 جنيه بدلاً من 399 جنيه. فساتين ماكسى بأشكال متنوعة أنيقة زى الورد، المقلم ومربعات بس أسعارهم غالية شوية حوالى 500 جنيه. متوفر كمان فساتين تقليدية طولها للركبة بمجموعة متنوعة من الألوان والأشكال (+235 جنيه). فستان لطيف بمربعات أسود فى أبيض سعره قليل جدًا (52 جنيه). صحيح أننا لاحظنا عدد بسيط من التنورات طولها للركبة منتشرة فى المحل، ده بغض النظر عن القطع الثانية بألوانها الخفيفة والمبهجة (250 جنيه)، لكن المجموعة الموجودة كانت محدودة جدًا. تنورة طويلة لونها برتقالى كانت مميزة وسعرها 369 جنيه. الجاكيتات كمان لها وجود معانا، وموجود منها بأكمام طويلة وقصيرة؛ واحد منهم لفت نظرنا سعره نازل من 770 جنيه لغاية 560 جنيه. تي شيرتات سادة وكمان تي شيرتات عليها تصميمات ورسومات بسيطة أسعارها تبدأ من 90 جنيه. سحرنا تونيك بدون أكمام، منقط، لونه بيج مبالغ فيه شوية بربطة عنق على منطقة الصدر، ومن ثانى بـ نؤكد أن سعره (399 جنيه) زيادة شويتين. عرض كوتون من الإكسسوارات مليان بكل أنواع المجوهرات، خصوصًا من القلادات، والحلقان والأساور، وكلهم معروضين بدون بطاقات سعر. شنط يد أسعارها حوالى 300 جنيه، محافظ سعرها 60 جنيه وأحزمة ثمنها 70 جنيه. حاجات ثانية متعلقة بموسم الصيف منها نظارات شمس، وشورتات قصيرة ومايوهات بيكينى كلها متوفرة فى المحل. مجموعتهم من أحذية الباليرينا عليها تخفيض كبير من 350 لغاية 179 جنيه، متوفر منها تصميمات ظريفة مقلّمة بألوان الأحمر والبيج مع ألوان ثانية منها الخفيف ومنها البراق. رغم أنهم عاملين أوكازيون، فيه بعض حاجات ما قدرناش نفهم سبب ارتفاع سعرها. على العموم، مع المجموعة المتنوعة من المعروضات والتشكيلة الأنيقة من الملابس الأساسية، كوتون بـ يوفر أساسيات مهمة بأسعار معقولة.

...

ديفاكتو: ماركة ملابس تركية فى مول صن سيتى بهليوبوليس
اصدرت في: 27/08/2013

من الصعب أنك توصل لصفقة كسبانة من أولها لآخرها فى محلات القاهرة، والسبب أن الأسعار القليلة غالبًا معناها جودة قليلة. ومع إعلانهم عن تخفيضات شديدة على كل معروضاتهم طلعنا على محل الملابس التركى "ديفاكتو "DeFacto- فى مول صن سيتى في هليوبوليس، وشعارنا هو "أهلاً بالتخفيضات". وبعد تأسيسها سنة 2003 زادت شعبية الماركة التركية وبدأت تتوسع للسوق العالمية. المحل مساحته واسعة مقسمة تقريبًا لنصفين: رجالى وحريمى. مئات من الرفوف المنظمة فوقها لوحات لونها أحمر مشرق مكتوب عليها "تخفيضات"، وعليها الأسعار بشكل واضح. موظفين بملابس موحدة بـ ينظموا المعروضات ويعرضوا مساعدتهم على الناس كل فترة، لكنهم فى نفس الوقت مش مميزين، وبكده قدرنا نتفرج براحتنا. حصل لنا حالة من الانبهار بمجموعتهم من الملابس، منها تي شيرتات سادة رجالى وحريمى بياقة دائرية وحرف V، بكل المقاسات والألوان (58: 78 جنيه). نفس الكلام بالنسبة للتي شيرتات البولو بألوانها المبهجة تبدأ من 79 للحريمى و148 جنيه للرجالى. مجموعة من قمصان بحمالات بتطريزة حريمى سعرها 79 جنيه، وتي شيرتات رجالى كاجوال بأكمام طويلة ثمنها 99 جنيه. قمصان عليها مربعات كانت موجودة فى كلٍ من القسمين (129: 148 جنيه) ونفس الكلام بالنسبة لبليزرات سمارت كاجوال (398: 499 جنيه). موجود عدد كبير من الجينزات jeggings، leggings وبنطلونات كتان، قسم الرجالى على وجه التحديد مليان بنطلونات جينز، كتان (249 جنيه) وبنطلونات سمارت كاجوال (179 جنيه- 249 جنيه) تقريبًا بكل الألوان اللى ممكن تتخيلها. شوفنا كمان شورتات مقلمة ظريفة سعرها 249 جنيه مع شورتات ثانية مناسبة للبحر. قسم الحريمى مش بس بـ يقدم جينزات (+179 جنيه)، فيه كمان تشكيلة كبيرة من leggings و jeggings بأسعار من 79 لـ 300 جنيه وعدد كبير من جينزات صيفية برسومات ورود (209 جنيه). تنورات جينز بوسط عالى برضه متاحة بألوان سادة، مقلمة وألوان غامقة (179 جنيه) مع تنورات أطول سعرها 218 جنيه. المحل للأسف كان مليان تي شيرتات مبتكرة لكن جودتها سيئة (59: 229 جنيه) منها عليها شخصيات كرتون أو جمل مالهاش معنى. البلوزات (199: 249 جنيه) كانت شوية على الموضة، منهم منقط على شكل جلد الفهد ومنهم بأزرار بألوان مختلفة. كان شيء لطيف أننا نلاقى قمصان تشبه الجينز (179 جنيه) فى قسم الرجالى، قبل ما نلاحظ أنهم برضه عليهم شعار شكله سيء على الصدر. نروح لحاجة أحسن شوية، بلوفرات سادة (+199 جنيه) متوفرة للرجال والسيدات، بنطلونات رياضية حريمى سعرها 129 جنيه وتي شيرتات رجالى لها جيوب ملونة كان سعرها معقول (118 جنيه). كان متوفر تشكيلة بسيطة من الفساتين الكاجوال (+200 جنيه) مع مجموعة محدودة من ملابس الحوامل متعلق عليه "آخر قطعة". قسم الإكسسوارات كان كبير بالنسبة للجنسين، وبـ يضم كل المطلوب؛ شرابات (25 جنيه- 59 جنيه)، أحزمة شيك (79 جنيه- 129 جنيه)، كوفيات خفيفة بألوان مفرحة (68 جنيه- 99 جنيه)، محافظ وشنط كبيرة وتصميم بسيط (63 جنيه- 119 جنيه)، ساعات ضخمة مبتكرة (278 جنيه) ومجموعة من الأساور الساحرة (69 جنيه) ومجوهرات تقليد. ديفيكتو بـ يقدم تشكيلة ملابس أسعارها مناسبة بمجموعة متنوعة من الألوان، رغم أنهم ممكن يكونوا بعدوا شوية عن منطقة التصميمات الشهيرة اللى على أحدث صيحة. بـ ننصح بالمكان ده للضروريات والإكسسوارات البسيطة.

...

إنفوتيس: إكسسوارات منزلية هولندية مختلفة فى سيتى ستارز
اصدرت في: 23/02/2013

إنفوتيس الموجود جنب محل ذا كريب -شقيقه- فى الدور الأرضى فى سيتى ستارز بـ يشد الانتباه باللوحات الحمراء المشرقة وأرضية المكان اللامعة. المحل بدأ فى هولندا سنة 1995، ودلوقت بقى عنده فروع فى كل أنحاء العالم، ومن ضمنهم كذا فرع قريب وداخل القاهرة.المعروضات المرتبة بشكل أنيق مع مجموعة من الإكسسوارات المنزلية الغريبة والرائعة فى نفس الوقت من أقلام مبتكرة شبه طلاء الشفاه (45 جنيه) لغاية منبهات مطرقعة معمولة من التروس الميكانيكية (995 جنيه) بـ تخليك دائمًا قادر تلاقى عندهم حاجة فريدة.لأميرات المطبخ -أو الأمراء لو يحبوا- شوفنا زوج من قفازات الفرن وفيها حجر كريم كبير موجود على أصبع البنصر (110 جنيه) وشوية أكواب 2 قيراط (85: 145 جنيه) ودى عبارة عن مجات حجمها عادى أو بحجم السبريسو فيها خاتم ماسى على قد الأصبع، بدلاً من يد المج العادية. لاحظنا كمان قوالب لطيفة على شكل قلب علشان قلى البيض أو البان كيكس سعرها 55 جنيه وكمان أشكال لقطع سوشى بـ تستخدم كمغناطيس للثلاجة (65 جنيه لعبوة فيها 5). وبمناسبة السوشى عندهم كمان عصيان أكل صينى مربوطين ببعض بسوستة من فوق علشان تمنع أى غلطة تسبب فوضى.لو بـ تدور على حاجات رجالى شوية، عندهم مجات بأيد زى المسدس (+190 جنيه) وكمان أكواب صغيرة بيد تصميمها مشابه للى فات (155جنيه لعلبة فيها 4). حامل شمع على شكل مسدس سعره 195 جنيه وطفاية سجائر على شكل محطة توليد كهرباء بـ تكملها مدخنة للتخلص من أى دخان بـ 160 جنيه.بالنسبة للسيدات شوفنا ملمع شفاه فاتن على شكل دوناتس وشنط ماكياج روشة مزينة بصور مستحضرات تجميل على مقدمتها (65 جنيه). شكل مصغر لزجاجات مياه ساخنة بغطاء سلك محكم كانت سعرها 115 جنيه ،وأفارول صغير منفوخ ومعطر مُعلق على شماعات صغيرة، معمول علشان يُعلق فى الدواليب (65 جنيه لعلبة فيها قطعتين).آلات حاسبة على شكل لوح شوكولاتة سعرها 75 جنيه وجواكيت للفاكهة –عبارة عن شنطة بسوستة علشان تمنع الفاكهة من التخبيط- سعر الواحدة منها 110 جنيه. شباشب على شكل ناموسة سعرها 95 جنيه.ساعات كبيرة شكلها مصنوعة من ورق كرتون بنى سعرها يبدأ من 195 لغاية 230 جنيه على حسب المقاس، فازات بيضاء على شكل شنط ورقية مهترئة بـ تبدأ من 270 لغاية 480 جنيه.رغم أن بعض المنتجات تحسها مبهرجة إلى حدٍ ما، بس إحنا بـ نعتبرها حاجات ظريفة ومختلفة رغم أن سعرها مرتفع شوية.

...

ﭭـون دوتش: ملابس رجالي وإكسسوارات في مصر الجديدة
اصدرت في: 09/02/2013

سمعنا عن المحل من بعض الأصدقاء اللي بـ يترددوا عليه بشكل دائم وبـ يعتمدوا عليه بنسبة كبيرة في معرفة ومتابعة خطوط الموضة الجديدة فيما يخص الملابس الرجالي، وبـ يزوروه في بداية كل موسم علشان يعملوا الدعم الضروري لدولاب الملابس الصيفية والشتوية بأسعار معقولة جدًا وكمان يأخذوا فكرة عن اتجاه الموضة في الموسم الجديد. وطبعًا مش محتاجين نقول أن الموديلات هنا مش أصلية ولكنها تقليد عالي الجودة خاصة لماركات زي Burberry وUS polo وغيرها لكن الغريب أن محل «ﭭـون دوتش – Von Dutch» له حوالي 4 فروع في مصر، وله فرع في الولايات المتحدة وأصحابه المصريين قدروا يحققوا نجاح ملحوظ في مجال استيراد وبيع الملابس الجاهزة والإكسسوارات مش على مستوى مصر بس لكن بدأوا البيزنس الخاص بهم خارج الحدود، وكنا محتاجين زيارة للمكان علشان نعرف إيه المختلف في المحل ده.المحل موجود في شارع الميرغني في مصر الجديدة، جنب معارض أبو غالي موتورز، والمحل في الدور الثاني ولازم تدخل مدخل العمارة وتطلع السلالم علشان توصل له. مساحته من الداخل مش كبيرة خالص؛ كأنها شقة بغرفتين، واحدة معروض فيها البول أوﭭر والجاكت وﭭاترينة عرض زجاجية فيها ساعات ونظارات وbracelets معدنية، والغرفة الثانية للجينز والقميص والتي شيرت. هـ تلاقي تشكيلة ضخمة من البول أوﭭرات الصوف والتريكو والقطن الخفيفة عليها علامات بيربري وأمريكان إيجل وبولو، لكن ما تركزش في الماركات وركز في الموديلات اللي هـ تلاقيها أنيقة لأقصى درجة، والألوان واضحة والتفصيلات مضبوطة وجميع المقاسات موجودة، المفاجأة لما تعرف أن فيه خصم بـ يوصل لـ 50 % على عدد كبير من المعروضات في المحل، يعني البول أوﭭر اللي عجبنا جدًا عرفنا أنه بـ 100 جنيه بدل 200 جنيه، وكذلك الهووديز والسويت شيرت التومي اللي بسوستة من الأمام، بنفس السعر، تقريبًا مستحيل تلاقي حاجة زي كده وبالجودة دي بالسعر ده، بس عرفنا أن التخفيضات مش محددة بمدة وأن الأسعار ممكن تتغير في أي لحظة، بس حتى لو الأسعار الموجودة مغرية جدًا ولازم هـ تلاقي حاجة تناسب ذوقك.القمصان بأسعار من 75 لـ 150 بعد الخصم بموديلات جيدة بس مش رائعة زي البول أوﭭرات والسويت شيرت، الجينز هنا من 150 لـ 230 جنيه، ومش كل الجينز بـ يدخل في الأوكازيونات زي ما كلنا عارفين، بس كل القصات هنا skinny أو Slim بزيادة، والألون الموجودة محدودة بس الخامات جيدة برضه. الأحذية واضح أنها من أحسن المعروضات في المحل، ماركات مش معروفة بس تشبه الـ vans والموديلات الإيطالية الكاجوال من خامات الشامواه والجلد المقلوب، وفيه هاف بووت ببوز رفيع شيك جدًا ومش بـ نلاقيه في أي حتة، وألوان غير معتادة زي الأزرق والبترولي، والموديلات دي كانت داخلة في التخفيض وأسعارها بقت 200 جنيه بدلاً من 300 و250 جنيه. وفيه رف واحد بس عليه مجموعة من الأحذية الأقرب للكلاسيكية دي خارج التخفيضات لأنها لسه واصلة المحل. نظارات Ray-Ban وPesrol وCarrera بأسعار من 300 لـ 600 جنيه، وساعات CK وEsprit بأسعار من 450 لـ 900 جنيه. صحيح كل تقليد بس مش أي تقليد، وخلينا واقعيين ونعترف أن في النهاية كله معمول في الصين، المهم عمرها يكون طويل، إنما بالنسبة للأناقة والستايل مافيش أي فرق بينها وبين الأصلية. فيه عدد من إكسسوارات الرجال زي الخواتم والـ bracelets والكابات وبرنيطة شيرلوك هولمز الشهيرة بأسعار من 40 لـ 60 جنيه. تجربتنا كانت غنية جدًا في «ﭭـون دوتش» وقضينا هناك أكثر من ساعة بـ نتفرج على المعروضات وبـ نجربها، وده راجع للخدمة المحترفة للعاملين هناك اللي فاهمين شغلهم كويس وبـ يساعدوا الزبون كما يجب. بـ نرشح لكم المحل ده ودلوقت بالذات علشان تلحقوا التخفيضات اللي عنده، وممكن تأخذوا فكرة من خلال صفحته على الفيسبوك.

...

تيوليب: أدوات منزلية وإكسسوارات في صن سيتي مول
اصدرت في: 16/01/2013

دي أول مرة ندخل فرع من فروع «تيوليب» اللي لاحظنا بعد ما أخذنا الكارت الخاص بالمحل أنها كثير ومنتشرة في أحياء القاهرة والإسكندرية. ما نقدرش نوصفه بأقل من أنه علامة مضيئة ومميزة بين محلات أدوات المطبخ والمائدة، وواجهة كل واحد أو واحدة بـ تجهز بيت جديد أو بـ تدور على أي حاجة جديدة في عالم الأدوات المنزلية اللي هو "عالم" فعلًا مليان اختراعات وحاجات ما تخطرش على بالك ومش هـ تتخيل أنها موجودة إلا لو زرت المكان ده، او كنت متابع جيد لقناة "فتافيت" وبرامج الشيف شربيني علشان تشوف هم بـ يستخدموا إيه في مطابخهم وتروح تجيبها من هناك. زيارتنا لفرع «تيوليب» اللي في صن سيتي مول كانت من باب الفضول ورغبتنا في استكشاف المكان من الداخل، المحل الشيك اللي في الدور الرابع اللي عارض عدد من أطقم الشاي الصيني والأركوبال في الفاترينة الداخلية وتخيلنا أن الموضوع مش هـ يزيد عن مجموعة إضافية من أطقم الشاي والحلل في الداخل، لكن بمجرد ما دخلنا لقينا نفسنا في "العالم" اللي بـ نقول لكم عليه ولفت نظرنا جملة "صنع في تركيا" على أغلب المعروضات وعرفنا أن المحل متخصص في البضائع التركية عالية الجودة، وعالية السعر برضه.بالإضافة لكل الأدوات المعروفة اللي ممكن تشوفها في أي محل أدوات منزلية زي علب الثلاجة والفناجين والبرادات والحلل والطاسات الموجودة هناك، هـ نقول لكم على بعض المعروضات اللي عجبتنا وحسيناها فريدة وهـ نقول لكم على أسعارها. فيه طقم شاي باللون الأبيض ومنقط بالأزرق مكون من 38 قطعة بـ 850 جنيه، فيه طقم ثاني أصغر شوية عليه عرض خاص بـ 350 جنيه. وعجبنا كمان مجّات أركوبال من ماركة bodum محاطة بكاوتشوك عازل علشان الحرارة (49 جنيه للقطعتين)، وفيه طاسات تيفال بأقطار مختلفة (20، 24، 26، 28 سم) وبألوان عجيبة زي الأخضر والوردي واللبني بأسعار من 90 لـ 135 جنيه، فيه حلة ضغط كبيرة "بريستو" بـ 380 جنيه، وتوستر بـ 430 جنيه، وفيه شنط حفظ مأكولات للأطفال وزمزميات بأشكال رائعة بأسعار 35 و40 جنيه، وساعة حائط ببندول بـ 140 جنيه. لحد هنا والحاجات تبدو تقليدية، لكن اللي كان مش تقليدي بالنسبة كان الأشكال والألوان المختلفة من المساكات والقطَّاعات وقشارات الخضروات والفاكهة والمكسرات ومجَّات صناعة القهوة وطحن البن وفرشات دهان المأكولات بعد ملأها بالسائل المراد الدهان به، ورغم إعجابنا الشديد بالقسم ده بالذات من المحل إلا أننا استغلينا بعض الأدوات دي اللي أسعارها أقل حاجة منها كان بـ يوصل لـ 50 جنيه فما فوق. لكن طبعًا الغاوي هـ يلاقي متعة غير عادية وسط كل الاختراعات دي.عدد لانهائي بقى من أطقم الكاسات وأطباق التقديم لكل أنواع الأكلات، معظمها تركية الصنع وفيه المصنوع في كوريا، الموديلات جديدة وشكلها غير مألوف، وكأنها معمولة خصيصًا لهواة اقتناء الحاجات الغريبة، هنا هـ تلاقي دائمًا أدوات فريدة بـ تعبر عن شخصيتك في مطبخك وعلى سفرتك.الخدمة جيدة وبسيطة داخل المحل، ومش هـ تلاقي حد من الموظفين جنبك إلا لو طلبت ده، بس يفضل عدم لمس المعروضات بالذات المغرية منها إلا في وجود الموظف المختص، وده مكتوب على لافتات داخل المحل. «تيوليب» باختصار هو جنة مجانين المطبخ والأدوات المنزلية المميزة، ودي صفحتهم على الفيسبوك.

...

هدايا شلبي: إكسسوارات ولعب وهدايا في الكوربة
اصدرت في: 31/12/2012

بـ نكتب عن المحل ده من منطلق أننا لما نلاقي مكان بـ يبيع حاجات مش عارفين هي ممكن تكون بـ تتباع فين، وبـ نكتشف مكان بـ يبيعها بالصدفة بـ نحب نعرفكم به. يعني مثلًا منين ممكن تشتري لوازم تدخين زي "البايب" وولاعات أنتيكة بأشكال مبتكرة وفلاتر؟ منين ممكن تشتري هدايا غير تقليدية بأسعار معقولة؟، والأهم من ده كله لوازم وزينة المناسبات المختلفة، وبما أننا زرنا المكان ده وقت احتفالات السنة الجديدة، فالمكان كان مغطى باللون الأحمر وكل فاترينات المحل مليانة لعب وعرائس لبابا نويل وغيرها من التحف والإكسسوارات الخاصة بالمناسبة.بوتيك صغير في شارع إبراهيم في منطقة الكوربة في مصر الجديد، اسمه «هدايا شلبي» وهو مش جديد بالمناسبة، بالعكس هو قديم ومعروف جدًا لكن سكان المنطقة والمناطق القريبة من مصر الجديدة. صحيح حجمه مش كبير لكن التنوع الغريب في نوعية المعروضات اللي عنده اكسبته سمعة كويسة كواحد من البوتيكات الكلاسيكية القليلة، وممكن نسميه محل "خردوات" كمان؛ نوعية المحلات دي اللي في طريقها للانقراض، لكن لما يكون الكلام عن «شلبي» يبقى أكيد دي حاجة باقية ومرتبطة ببقاء مصر الجديدة نفسها، وهـ يفضل علامة مميزة مرتبطة بالمكان.من المعروضات اللي لفتت نظرنا المرة دي لعب الكريسماس اللي دمها خفيف بجد وما شفناش زيها في أي مكان ثاني زي عفريت العلبة اللي بـ يخرج منها رجل الجليد، مصنوع من القطن والبلاستيك بجودة عالية، وبـ تبدأ من حجم كف اليد، بأسعار من 30 لـ 75 جنيه حسب الحجم، وعرائس لشخصيات بابا نويل بـ 30 جنيه، وبيوت خشبية وماكيتات لرحلة العائلة المقدسة بـ 60 جنيه، وأطباق هدايا عليها رسوم الكريسماس من 20 لـ 40 جنيه. وغيرها من لعب الأطفال والبالونات بأسعار لا تذكر.قسم أدوات التدخين مبهر بجد، رغم أننا ضد التدخين بشكل عام، لكن حبينا نشتري منه بعض الإكسسوارت على سبيل الاقتناء كتحف وأنتيكات، زي الأشكال المختلفة للبايب، اللي فيه منه موديلات مصنوعة في الصين بأسعار من 60 لـ 80 جنيه، وموديلات مصنوعة في تركيا بـ يوصل سعرها لـ 120 جنيه، الفرق بـ يبقى في نوع الخشب، وقد إيه بـ يستحمل درجة حرارة عالية وعمره يطول معاك. ولاعات Zippo وماركات ثانية على شكل طبنجات حقيقية وغيرها من الموديلات اللي تنفع هدايا، وطبعًا فيه توباكو وفلاتر دخان وطفايات وكمان سجائر إلكترونية للناس اللي بـ تحاول تبطل تدخين ومش عارفين يجيبوها منين. وعجبنا قوي مجموعة أنتيكات لشيشات بحجم صغير جدًا، لكن ممكن تستخدم كشيشة حقيقية. ومن الحاجات اللي «شلبي» متميز فيها فعلًا هي المحافظ المصنوعة من الجلد الطبيعي أو القماش وتصميماتها خطيرة وعمرها طويل مش بـ تتقطع أو شكلها بـ يقدم وده عن تجربة. وأسعارها من 40 لـ 100 جنيه حسب الماركة.هـ تلاقي هنا كمان الحاجات اللي ممكن تلاقيها في بازارات الحسين وخان الخليلي، من لعب فرعونية وتماثيل صغيرة وميداليات مفاتيح وأعلام وقصافات أظافر بتصميمات أنيقة وسكاكين سويسرية مقلدة، تقريبًا كل حاجة بـ تدور عليها في باب "الرفايع" والمستلزمات الضرورية اللي بـ تبقى مش فاكر اسمها حتى ولا عارف تجيبها منين هـ تلاقيها هنا عند «هدايا شلبي». بوتيك يستاهل الزيارة مخصوص.

...

فراتيللي: ماركات أحذية عالمية في سيتي ستارز
اصدرت في: 12/10/2012

«فراتيللي» موجود في الدور الثاني في المرحلة الثانية من سيتي ستارز، محل كبير واخد زاوية واضحة ومميزة، فاترينة العرض فيها عدد محدود من الأحذية الرجالي والحريمي، عدد محدود بس متنقي بعناية، وهـ يغريك أنك تدخل المحل وتتفرج على كل الموديلات اللي عنده. كل جدران المحل من الأرض للسقف عليها أشكال وألوان من الأحذية الكاجوال والكلاسيكية وكل جزء من الجدار مخصص لماركة معينة، ده غير الستاندات اللي في وسط المحل ومعروض عليها عدد من السابوهات والشباشب والإكسسوارات.هنا هـ تلاقي منتجات CAT الأصلية، الموديلات الجديدة بتاعة السنة دي ومنتجات سنتين فاتت، الكوتشي بألوان فاتحة بأسعار من 400 لـ 500 جنيه، وحذاء CAT التقليدي المصنوع من الجلد المقلوب أو الشمواه أو الجلد الطبيعي العادي بأسعار من 500 لـ 650 جنيه، وفيه الموديلات الضخمة والـ Safety المشهور بها كات وأسعارها من 650 لـ 800 جنيه. الموديلات الجديدة من كات فيه منها أنيق جدًا وأحجامها صغيرة ورقيقة غير الشكل المعهود بتاعها، وفيه درجات كثير من اللون البيج والبني هـ يخليك محتار ومش عارف تختار بينهم.ماركة ثانية قوية جدًا «فراتيللي» واخد توكيلها وهي أحذية MERELL الأمريكية. أحذية اتعملت خصيصًا للأشغال الشاقة وتسلق الجبال والأراضي الوعرة، موديلاتها كاجوال بزيادة بس بـ تتميز بالتقفيل الشيك جدًا والألوان الكثيرة المتداخلة، والأهم أن لها ستايل مميز مش موجود في أي ماركة ثانية. أسعارها من 500 لـ 800 جنيه حسب حداثة الموديل، وفيه عروض خاصة على بعض الموديلات التقليدية منها بسعر 300 جنيه بس.لو عاوز حاجة كلاسيك وبسيطة أكثر هـ تحب موديلات الـ Sebago الأمريكية برضه، الألوان هي الأسود والبني والأسعار من 390 لـ 500 جنيه فيه منها الجلد اللميع والشمواه والفلات خالص والمصنوع من القماش زي الأسبترين. نفس الموديلات تقريبًا هـ تلاقيها في ماركات ثانية متوفرة عند «فراتيللي» وهي ماركات زي الـ West Coast.عجبنا جدًا موديلات ماركة Sapatoterapia البرازيلية وجربناها ولقيناها مريحة جدًا في اللبس، ورغم شكلها التقليدي نوعًا ما إلا أن شكلها في اللبس بـ يختلف تمامًا والخامات اللي مصنوعة منها عاملة لها شكل مميز وفريد. الأسعار مش بـ تختلف كثير من ماركة للثانية، برضه كله بـ يتراوح بين 500 لـ 700 في النوع ده.الصف الخاص بالأحذية الحريمي مش مبهر زي الخاص بالرجالي، أو يمكن لأننا مش فاهمين قوي في الموديلات البناتي، بس اللي إحنا متأكدين منه أن شبشب بسيط جدًا وموديله منتشر بكثافة كان سعره 350 جنيه، حتى لو عليه ماركة Piccadilly البرازيلية. ممكن نقبل الأسعار دي على الأحذية والبوتات المعروضة واللي بـ يوصل سعرها هنا لـ 600 و700 جنيه زي الأحذية الرجالي، لكن السابوهات والشباشب فعلًا ما تستحقش الأرقام دي. الميزة في «فراتيللي» أن كل المقاسات موجودة والألوان كمان، يعني لو دخلت وفي نيتك تشترى ومحدد الميزانية بتاعتك أكيد هـ تلاقي اللي أنت عاوزه. وبما أنك عرفت الأسعار والماركات الموجودة هناك من المقال ده، يبقى روح على هناك وأكيد هـ تلاقي حاجات تعجبك.

...

جاليرى بوهو: ماركات محلية وعالمية فى هليوبوليس
اصدرت في: 13/07/2012

واضح أن فيه قاعدة خفية بـ تقول أنك مستحيل تلاقي ملابس سعرها مناسب وفى نفس الوقت ماشية مع الموضة بسهولة من غير ما تلف على القاهرة كلها. كمثال، لو كنت فى محل غالى هـ تدّور وسط حاجات كثير أسعارها غالية علشان توصل لحاجة سعرها معقول، أو فى محل رخيص محتاج تشوف حاجات كثير مش حلوة علشان توصل لحاجة كويسة. «جاليرى بوهو» اللى لسه فاتح كسر القاعدة دى. وواضح أنه قارى السوق المحلية والأوربية وجمع كل الحاجات الحلوة علشان تبقى جاهزة ومتاحة لسكان هليوبوليس تحت سقف واحد. فى شارع جانبى متفرع من شارع صلاح سالم، وفى مساكن شيراتون، المحل بـ يعرض ملابس على أحدث طراز، وفساتين سهرة، وشنط، وأحذية، وإكسسوارات ومستلزمات منزل لمصممين محليين ومن البلاد المجاورة لنا، بالإضافة لماركات معروفة من أوربا. أول ما تدخل هـ يقابلك أرفف عليها حاجات متنوعة زى أعواد للحفلات قابلة لإعادة الاستخدام وأعواد الأكل الصينى، أو سماعات ملونة تنفع تتوصل على أى موبايل سعرها 190 جنيه. كل دى قطع لطيفة مش موجودة عادة فى أى مكان ثانى فى القاهرة. كمان فيه مستلزمات منزل زى مخدات، وقاعدة للكؤوس، وفوط، وصوانى، ومجّات لمصممين مصريين زى "جود"، و"خمسة وخميسة"، و"كايرويد"، إضافة لشموع من "كاندل كوليكشن". مكان لوضع ميدالية المفاتيح على شكل مفتاح خشب من "امسكوا الخشب" كانت لطيفة جدًا، وبرضه مجموعة سكاكين من سبع قطع. كمان عجبنا قفاز من غير صوابع ملون وخامته مقاومة للماء ومعاه مريلة سعرهم 85 جنيه. القطع المفضلة لنا كانت إكسسوارات لزينب شاهين عليها مصطلحات ساخرة مصرية ولبنانية زى "إيجيبشن هـ يبوسنى" مطبوعة بالعربى على خواتم ألوانها مبهجة وأسعارها بين 50 جنيه و70 جنيه. إكسسوارات ثانية موجودة لمصممين زى "تاش"، و"لوليسكو"، و"يوكيز"، و"بانجلز" ومصممين ثانيين، مع حاجات ثانية من إكسبريس وبريمارك. كمان فيه ساعات "وى واتش" ومايوهات بيكينى لطيفة وملابس للبحر. تشكيلة متنوعة من القمصان وملابس السيدات معروضة داخل المكان. تى شيرت بيضاء لندى أكرم عليها صورة الممثلة أودرى هيببورن بشريطة وردى فى شعرها مع تعليق مكتوب "البنات الفرحانين هم أحلى بنات" ( 300 جنيه). تى شيرتات ثانية عليها صور مارلين مونرو، وسعاد حسنى وإليزابيث تايلور. قطعة ثانية شيقة عبارة عن مجموعة تي شيرتات قصيرة بدون أكمام من تصميم "بوهو شاركى" عليها تطريز على شكل عين وشنب عاملة تكوين لرجل لابس طربوش (290 جنيه). معروض كمان فى الجاليرى أشكال مختلفة من الشنط الأنيقة والأحذية والصنادل. شنط بوهو بألوانها المتعددة بحوالى 250 جنيه، وشنط بوهو الصغيرة للبنات تبدأ من 120 جنيه. شنط ثانية من "إل ماك" و"جاى روس" وناعومى هانم بالإضافة لمايكل كورس متاحة برضه. كمان تشكيلة محدودة لكن لطيفة من الباليرينات، والصنادل والشباشب ماركة "أتموسفير" ده غير ماركات أوربية ثانية زى صندل برتقالى مبهج مكتوب سعره 190 جنيه. غرفه كاملة مخصوصة علشان عرض الفساتين. فساتين سهرة من رفيق زكى معروضة على رف أسعارها بـ تبدأ من 190 جنيه. ورف ثانى عليه فساتين مستوردة من "بى سى بى جى"، و"ميس سيلفريدجس" و"بريمارك". "جاليرى بوهو" يعتبر إضافة هائلة علشان بـ يعرض تشكيلة كبيرة متنوعة وقطع مرحة، لكن أهم سبب أنه كسر القاعدة الذهبية للتسوق فى القاهرة بأن عنده ملابس شيك وسعرها مناسب، وكل ده فى مكان واحد.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن