ملابس حريمي تسوق in مصر الجديدة Cairo, Egypt

تسوق

لاكوست: الماركة العالمية الأسطورية في سيتي ستارز، مصر الجديدة
اصدرت في: 04/09/2013

مع أكثر من 1000 محل حول العالم - اثنين منهم بقوا من أعضاء المشهد التسوقي في القاهرة، شعار لاكوست الصغير منور يافطة المحل زي المنارة بأنوار ساطعة مع واجهات عرض بـ تبرق. اليونيفورم بتاع لاكوست مسيطر على كل أنحاء المحل مع كثرة التي شيرتات البولو بكل ألوانها المختلفة، طبعًا الشعار الرهيب للتمساح منور صدور معظم التي شيرتات إن ما كانش كلها، التداخل موجود في كل قسم وده خلانا نأخذ لحظات علشان نقدر نميز بين الملابس الرجالي والحريمي، وقت زيارتنا كان فيه مجموعة من المعروضات عليها خصومات، وده كان مُعلن داخل المحل. تي شيرتات البولو للسيدات أعلى سعر لها 995 جنيه في الوقت اللي التي شيرتات الثانية بعلامة التمساح المميزة بـ تُباع بـ 1160 جنيه، أسعار التي شيرتات 100 % قطن سعرها 790 جنيه وكان باين قوي قد إيه ملمسها ناعم زي التشكيلة الأصغر بالخطوط الصفراء العادية، التي شيرتات بنصف كم (بداية من 440 جنيه) والفانلات بحمالة (428 جنيه) وتي شيرتات بأكمام طويلة (665 جنيه) وكان فيه عليها عرض بسعر 590 جنيه، البلوفرات الصوف بـ يوصل ثمنها 1720 جنيه، أما فساتين النهار بألوانها البحرية والأزرق والأبيض المخطط ثمنها بقى 1370 جنيه بعد ما كان 1895 جنيه، القمصان المخططة بلونين بسعر 1116 جنيه والجينز الكاجوال يبدأ بـ 1000 جنيه. في مواجهة قسم السيدات قمصان البولو للرجل سعرها بـ يوصل 1000 جنيه، بالتقريب لأسعار القمصان الثانية لمحنا قميص بولو بألوان البرتقالي والأسود بسعر 1290 جنيه وقميص أسود بأزرار كاملة بـ 1292 جنيه، مجموعة صيفية من القمصان الكاجوال بأكمام قصيرة بسعر 770 جنيه وبنطلونات زرقاء بأسعار من 1220: 976 جنيه وشورت بحري من 1390: 875 جنيه، استعدادًا لموسم الشتاء شوفنا جاكيت بسعر 1895 جنيه، كمان فيه قسم للأحجام الأكبر شوية بمجموعة من قمصان البولو وأكثر من موديل للجينز، اللي ثمنها بقى 965 جنيه بدل 1495 جنيه. قسم الأطفال صغير قوي لكن بـ يعرض مجموعة مختلفة من تي شيرتات المرح (بداية من 400 جنيه) وقمصان صغيرة (بداية من 600 جنيه) قمصان النهار للبنات (810 حنيه) وفانلات بحمالات (435 جنيه)، مرة ثانية قمصان البولو العادية كانت بسعر 845 جنيه والإصدارت المميزة من شواروفسكي كريستال كانت بـ تُقدم في علبة هدايا بسعر 990 جنيه. الأحذية بـ تيجي في أكثر من ستايل مختلف؛ المسطح (760 جنيه) والـ canvas بـ 515 جنيه وأحذية الـ plimsols للسيدات (515 جنيه) مع الأحذية المطاطية للسيدات والرجال بأسعار تبدأ من 230 جنيه، تشكيلة الرجالي بـ تضم أحذية كاجوال (بداية من 1140 جنيه)، أحذية رياضية ( بداية من 900 جنيه) والأسبترينات (590 جنيه)، أحذية الأطفال كانت ظريفة قوي بأسعار من 390 جنيه وأحذية البيبهات بسعر 530 جنيه، كمان المحل بـ يضم مجموعة مميزة من الإكسسوارات الجلدية زي المحافظ والأحزمة وشنط اللاب توب وشنط عامل البريد (1180 جنيه). محل لاكوست فعلًا محل بـ يبيع حاجات تدل على سمعته وعدد كبير من اللبس الموحد لكن بأعداد أقل شوية، كنا نحب نشوف أكثر من كده، الأسعار برضه عالية قوي وبكده الواحد بـ يتمنى أن ده ينعكس على مستوى جودة المعروضات.

...

فيكتوريا سيكريت: عطور وحاجات جميلة فى سيتى ستارز بهليوبوليس
اصدرت في: 03/09/2013

رغم كل الظروف الاقتصادية المحيطة بمصر، الماركة العالمية الشهيرة قررت تشق طريقها وسط العدد الرهيب من محلات القاهرة. مع أكثر من 1000 فرع داخل أمريكا لوحدها، بدأت "فيكتوريا سيكريت - Victoria's Secret" فى حملة توسع عالمية. بعد شهور من الترقب، أخيرًا فتح الاسم الشهير محل صغير فى سيتى ستارز، وبكده منتجات فيكتوريا سيكريت أصبحت مش مجرد منتجات مستوردة. شهرتها الأكبر نتيجة لخطوط أزيائها من اللانجيري وملابس البيت، ودلوقت توسعت لتشمل كل أنواع الملابس الحريمى مع مجوعة خاصة جدًا من مستحضرات التجميل. المشكلة فى الموضوع أن فرع سيتى ستارز مركز على الإكسسوارات والجانب الجمالى للمعروضات، مع مجموعة بسيطة لكن متنوعة من الملابس الداخلية (+115 جنيه). بديل ثانى هو أرفف مليانة عطور وكريمات للجسم، والعطور تحديدًا كانت كثيرة جدًا لدرجة صعبت الاختيار بينهم. أول ما دخلنا من بوابة الفرع بين جهاز الأمن، عرضوا علينا عينة من عطرهم الجديد، هارت بريكر Heartbreaker بسعر 625 جنيه برائحة الزهور اللطيفة. عدد من الكريمات رائحتها تحفة شدت انتباهنا منها مجموعتهم المشهورة سيكريت أنجيل 'Secret Angel بسعر 275 جنيه بس رائحتها ثقيلة حبتين. علب هدايا كبيرة ملفتة للانتباه فيها مجموعتهم ويذ لوف 'With Love' المكونة من غسول للجسم، كريم، عطر وزجاجة عطر صغيرة، سعر المجموعة 895 جنيه، وبكده تعتبر هدية مثالية لشخص مميز. معروض لنهاية المحل عدد كبير من الشنط، المحافظ، شنط الماكياج وإكسسوارات ثانية لطيفة. الغالب على المكان الألوان البناتى الصارخة، بمجموعة من الألوان المبهجة، صور الحيوانات والترتر لإرضاء الأذواق المطرقعة. شنطtote bags الممتازة فى خروجات البحر، سعرها يزيد عن 350 جنيه، و فى نفس الوقت شنط أجازات عليها أشكال، سعرها 795 جنيه وشنط ترولّى كبيرة ثمنها 1950 جنيه. شنط الماكياج سعرها حوالى 475 جنيه ومجموعة من خمس فرش داخل جراب سعرهم 345 جنيه، أمّا شنطة بسيطة لأساسيات الماكياج فكان ثمنها 225 جنيه. شنط يد مستطيلة من الجلد باللون الوردى الفاتح حجمها كبير وسعرها كثير شويتين (1150 جنيه)، أما بالنسبة لمحافظ التليفونات والكروت، سعرها كان أقل شوية (1025 جنيه). شنط موبايل جلدية عليها شعار VS بسعر 375 جنيه وجرابات أى باد (545 جنيه). لاحظنا كمان وجود إكسسوارات للسفر، منها جراب لجواز السفر (345 جنيه) وشواحن جذابة بس غالية داخل علبة مميزة بسوستة (475 جنيه). موجود كمان عدد بسيط من نظارات شمس ماركة فيكتوريا سيكريت للبيع، سعرها يبدأ من 400 جنيه. رغم إحباطنا لعدم وجود تشكيلة مناسبة من ملابسهم الداخلية العظيمة، ملكات الجمال يقدروا يستمتعوا بمجموعة عطور وكريمات فيكتوريا سيكريت الشهيرة. الأسعار الموجودة كانت غريبة شوية وثقيلة على الجيب، بس لو بـ نتكلم على احتياجنا للدلع من فترة للثانية، فيكتوريا سيكريت أكيد من الأماكن المهمة.

...

ديفاكتو: ماركة ملابس تركية فى مول صن سيتى بهليوبوليس
اصدرت في: 27/08/2013

من الصعب أنك توصل لصفقة كسبانة من أولها لآخرها فى محلات القاهرة، والسبب أن الأسعار القليلة غالبًا معناها جودة قليلة. ومع إعلانهم عن تخفيضات شديدة على كل معروضاتهم طلعنا على محل الملابس التركى "ديفاكتو "DeFacto- فى مول صن سيتى في هليوبوليس، وشعارنا هو "أهلاً بالتخفيضات". وبعد تأسيسها سنة 2003 زادت شعبية الماركة التركية وبدأت تتوسع للسوق العالمية. المحل مساحته واسعة مقسمة تقريبًا لنصفين: رجالى وحريمى. مئات من الرفوف المنظمة فوقها لوحات لونها أحمر مشرق مكتوب عليها "تخفيضات"، وعليها الأسعار بشكل واضح. موظفين بملابس موحدة بـ ينظموا المعروضات ويعرضوا مساعدتهم على الناس كل فترة، لكنهم فى نفس الوقت مش مميزين، وبكده قدرنا نتفرج براحتنا. حصل لنا حالة من الانبهار بمجموعتهم من الملابس، منها تي شيرتات سادة رجالى وحريمى بياقة دائرية وحرف V، بكل المقاسات والألوان (58: 78 جنيه). نفس الكلام بالنسبة للتي شيرتات البولو بألوانها المبهجة تبدأ من 79 للحريمى و148 جنيه للرجالى. مجموعة من قمصان بحمالات بتطريزة حريمى سعرها 79 جنيه، وتي شيرتات رجالى كاجوال بأكمام طويلة ثمنها 99 جنيه. قمصان عليها مربعات كانت موجودة فى كلٍ من القسمين (129: 148 جنيه) ونفس الكلام بالنسبة لبليزرات سمارت كاجوال (398: 499 جنيه). موجود عدد كبير من الجينزات jeggings، leggings وبنطلونات كتان، قسم الرجالى على وجه التحديد مليان بنطلونات جينز، كتان (249 جنيه) وبنطلونات سمارت كاجوال (179 جنيه- 249 جنيه) تقريبًا بكل الألوان اللى ممكن تتخيلها. شوفنا كمان شورتات مقلمة ظريفة سعرها 249 جنيه مع شورتات ثانية مناسبة للبحر. قسم الحريمى مش بس بـ يقدم جينزات (+179 جنيه)، فيه كمان تشكيلة كبيرة من leggings و jeggings بأسعار من 79 لـ 300 جنيه وعدد كبير من جينزات صيفية برسومات ورود (209 جنيه). تنورات جينز بوسط عالى برضه متاحة بألوان سادة، مقلمة وألوان غامقة (179 جنيه) مع تنورات أطول سعرها 218 جنيه. المحل للأسف كان مليان تي شيرتات مبتكرة لكن جودتها سيئة (59: 229 جنيه) منها عليها شخصيات كرتون أو جمل مالهاش معنى. البلوزات (199: 249 جنيه) كانت شوية على الموضة، منهم منقط على شكل جلد الفهد ومنهم بأزرار بألوان مختلفة. كان شيء لطيف أننا نلاقى قمصان تشبه الجينز (179 جنيه) فى قسم الرجالى، قبل ما نلاحظ أنهم برضه عليهم شعار شكله سيء على الصدر. نروح لحاجة أحسن شوية، بلوفرات سادة (+199 جنيه) متوفرة للرجال والسيدات، بنطلونات رياضية حريمى سعرها 129 جنيه وتي شيرتات رجالى لها جيوب ملونة كان سعرها معقول (118 جنيه). كان متوفر تشكيلة بسيطة من الفساتين الكاجوال (+200 جنيه) مع مجموعة محدودة من ملابس الحوامل متعلق عليه "آخر قطعة". قسم الإكسسوارات كان كبير بالنسبة للجنسين، وبـ يضم كل المطلوب؛ شرابات (25 جنيه- 59 جنيه)، أحزمة شيك (79 جنيه- 129 جنيه)، كوفيات خفيفة بألوان مفرحة (68 جنيه- 99 جنيه)، محافظ وشنط كبيرة وتصميم بسيط (63 جنيه- 119 جنيه)، ساعات ضخمة مبتكرة (278 جنيه) ومجموعة من الأساور الساحرة (69 جنيه) ومجوهرات تقليد. ديفيكتو بـ يقدم تشكيلة ملابس أسعارها مناسبة بمجموعة متنوعة من الألوان، رغم أنهم ممكن يكونوا بعدوا شوية عن منطقة التصميمات الشهيرة اللى على أحدث صيحة. بـ ننصح بالمكان ده للضروريات والإكسسوارات البسيطة.

...

كويز: ملابس مناسبات تلفت الانتباه فى صن سيتى بهليوبوليس
اصدرت في: 08/08/2013

"المناسبات والفساتين أيد واحدة".. ده شعار كل بنت موجودة فى المدينة التى لا تنام، محتاجة دولابها يمتلئ بملابس السهرات المبهجة؛ أحيانًا، ولسبب غير مفهوم بـ تكون بأسعار فلكية. ممكن إجابتك تكون عند "كويز - Quiz"، السلسلة العالمية المشهورة فرعهم فى صن سيتى هليوبوليس بـ يقدم مجموعة كبيرة متنوعة من ملابس الحفلات المبهجة لكل بنات العاصمة. المحل الموجود فى الدور الثالث بواجهته الزجاجية قدر يجذب الانتباه باللافتة الوردية المشرقة والعدد الكبير من الفساتين، معظمها يزينه فصوص متلألئة تشبه البلاستيك. المشكلة أن من الوهلة الأولى فيه انطباع يحفزك تتجنب المحل، رغم أنه بناتى جدًا، بس فيه بارقة أمل أن وسط الذوق الردئ شوية الموجود تلاقى حاجة تستحق التجربة. أقسام المحل مش مرتبة بشكل منظم، بمعنى أنك محتاجة تشقى طريقك وسط المعروضات علشان توصلى لهدفك. فستان ماكسى فضفاض لونه أبيض مطرز بقطع تشبه الألماس سعره عالى شوية (1099 جنيه) ومتوفر كمان باللونين السمنى والأسود، فستان حفلات قصير مقدمته منخفضة على شكل رسمة القلب، تنورات منفوخة وتطريز جذاب سعرهم يبدأ من 849 جنيه بألوان كثير؛ تحديدًا لون روز بودرة، السمنى والمرجانى. الفساتين الجاهزة برضه موجود منها أشكال وألوان؛ فستان أسود مخملى صغير سعره كان 499 جنيه، وكمان فستان مزين بالترتر له أكمام شفافة طويلة كان سعره أعلى شوية (599 جنيه). فساتين غير تقليدية بقماش خفيف عليها أشكال خطوط متعرجة، حمار وحشى وفساتين مقلمة متوسطة الطول. ممكن تلاقى وسط الفساتين الموجودة حاجات كاجوال منها بنطلونات سوداء ليكرا شكلها غريب (129 جنيه)، بنطلونات جينز ضيقة jeggings باللون الأبيض (399 جنيه) أو جينزات بقصة مستقيمة straight بسعر 349 جنيه وبنطلونات عليها رسوم كارتون مطبوع عليها كلمة 'geek' سعرها 199 جنيه، أما تنورة متوسطة الطول جزء من قماشها عبارة عن جلد سعرها 199 جنيه. التي شيرتات تتراوح بين البناتى لأشكال أكثر رجولة، من واحدة قطن لونها فاتح عليها رسمة فراشة (399 جنيه) لتي شيرت فضفاضة عليها كلمات زى كلمة 'raver' (249 جنيه). بانتاكورات طرية مقلمة سعرها كان 199 جنيه، وفى نفس الوقت فيه منها من خامة الليكرا باللون الأسود ضيق بنفس السعر. صديرى خفيف وبلوفرات صوف كانت ظاهرة بقوة مع قطع خرز صغيرة سعرها يبدأ من 199 جنيه وكمان سترة رياضية عليها كلمة 'love' بالترتر على مقدمتها سعرها 229 جنيه. تقريبًا مافيش إكسسوارات خالص، مجرد كام زوج من أحذية مفتوحة عند أصابع القدم peep toe shoes بسعر 650 جنيه، شنط لامعة بمقبض (169: 499 جنيه) وزوجين أو ثلاثة من الحلقان. مجموعة ملابس كويز معبرة عن التفاخر أكثر من الحس الجمالى؛ الأسعار عالية وبعيدة عن مستوى جودة المعروضات. أكيد من بين الفساتين الموجودة حاجات هـ تعجبك على الآخر، لكنها غير ضرورية. عمومًا، مع التنوع والمعروضات متغيرة بشكل سريع، الموضوع يستاهل منك نظرة.

...

مايكل كورس: ماركة نيويوركية جديدة فى القاهرة
اصدرت في: 15/06/2013

خلال السنين الأخيرة شهدت القاهرة تضاعف عدد محلات المصممين المشهورين عشرات المرات، وده جذب كثير من الماركات العالمية للمدينة. وعلى الرغم من كل الظروف الاقتصادية، مايكل كورس صاحب جائزة أفضل مصمم قرر يحضر مجموعته من نيويورك للقاهرة، ويفتتح أول معارضه فى سيتى ستارز هليوبوليس. المحل المبهر مكانه فى الدور الثالث وبـ يعرض أحدث مجموعات شنط الهاند باج، بـ يغرى المتسوقين يدفعوا مبالغ كبيرة لشراء اسم المصمم المرموق. المحل من الداخل يشبه تمامًا شباك العرض: رقيق، ومنظم وبسيط. موظفين المحل مش بس لابسين ملابس سمارت كاجوال، دول كمان مهذبين وعندهم صبر يساعدهم على شرح أسعار المنتجات الخالية من بطاقة السعر. الفرع بـ يقدم تشكيلة كبيرة من شنط الهاند باج، أحجام كبيرة وصغيرة، وكمان مجموعة بسيطة من الأحذية وإكسسوارات متنوعة منها محافظ، وشنط وجرابات أى فون وأى باد. رغم أنك تحس المحل مليان بضاعة، بس ينقصه الشنط الرجالى، وخط أزياء كورس للملابس الحريمى. المفاجأة بالنسبة لنا كانت أن الأسعار مش مبالغ فيها زى كثير من المنتجات المستوردة، وبـ يلتزموا بدرجة كبيرة بأسعار البيع فى البلاد الثانية. مجموعة مايكل كورس بـ تتكون من مجموعة ألوان تتدرج من الكاجوال الشيك زى الأسود، والأزرق الغامق، والبنى والكريمى وصولاً لألوان أكثر حيوية زى درجات الأحمر الزاهية، والوردي وحتى الذهبي اللامع. أكثر شنط شدت انتباهنا كانت من مجموعة شنط كتف "Grayson" منقطة أسعارها تتراوح بين 4650: 4990 جنيه على حسب حجمها. شنطة يد بنفس الشكل هـ تكلفك 1790 جنيه. شنط بولينج 'Grayson logo' ساحرة لونها ذهبى، مغطاة بعلامة MK سعرها كان 3250 جنيه، وكمان موجود منها ألوان خفيفة. شنط يد 'Hamilton' عليها قفل بشعار MK سعرها 3850 جنيه للحجم الكبير و3450 جنيه للحجم الأصغر، أما حجم وسط مستطيل 'Jet Set Saffiano Travel Tote' كان سعرها 3250 جنيه. شنط يد طرية شوية 'Monogram' لها حلية مدورة مُعلقة على شكل حروف MK ثمنها 2290 جنيه وشنط كلتش سمارت كاجوال ثمنها 2400 جنيه. شنط يد أصغر مصممة على نفس طريقة شنط هاند باج موجودة باللون الذهبى اللامع، الأزرق الغامق، والبنى وألوان ثانية (830 جنيه). جرابات أى فون طرية سعرها 600 جنيه وفيه منها مجموعة متنوعة من الألوان أزرق غامق خفيف وبُني وأصفر فاتح وبرتقالى، مع شكل جلد الثعبان. شوفنا كمان شوية جرابات أى باد طرية، وكمان شنط ناشفة وعملية (1530 جنيه). تشكيلة الأحذية كانت محدودة شوية، بس متنوعة بشكل لطيف، مع مجموعة من الشباشب الصيفى، وصنادل Wedges، وأحذية كعب عالى وأحذية برقبة Boots للركبة من الجلد الأسود السميك (3470 جنيه) وأحذية مطاطية Wellies مطبوع عليها شعار MK. صنادل T-Bar روعة من الجلد كان سعرها 1360 جنيه، أما صندل 'Sondra Jellies' مطاطى مناسب للصيف هـ يكلفك 640 جنيه وشباشب كاجوال من المطاط والفوم للشاطئ كانوا أرخص شوية (430 جنيه). موجود أحذية كلاسيك من الجلد السويدى Moccasins عليها شعار MK على القفل الذهبى الصغير باللون الأسود، البنى والأزرق الغامق (1470 جنيه)، حذاء مدبب بكعب ذهبى كان ثمنه 1850 جنيه وحذاء Wedge من الفلين سعره 2250 جنيه. مايكل كورس كمان مشهور بمجموعته من ساعات اليد، واللى فيه منها تشكيلة كبيرة للرجال والسيدات معروضة فى كابينة زجاج على شكل ترابيزة، أسعارها تزيد عن 1000 جنيه. محل مايكل كورس مكان مثالي بـ يقدم أحدث مجموعة من شنط الهاند باج والإكسسوارات واللى أى واحد قاهري بـ يفهم فى الموضة غالبًا هـ يقع فى عشقهم. الأسعار غالية بس زى معظم المصممين المشهورين الماركة –والجودة طبعًا– هى سبب الرئيسى لدفعك المبالغ دى.

...

جاليرى بوهو: ماركات محلية وعالمية فى هليوبوليس
اصدرت في: 13/07/2012

واضح أن فيه قاعدة خفية بـ تقول أنك مستحيل تلاقي ملابس سعرها مناسب وفى نفس الوقت ماشية مع الموضة بسهولة من غير ما تلف على القاهرة كلها. كمثال، لو كنت فى محل غالى هـ تدّور وسط حاجات كثير أسعارها غالية علشان توصل لحاجة سعرها معقول، أو فى محل رخيص محتاج تشوف حاجات كثير مش حلوة علشان توصل لحاجة كويسة. «جاليرى بوهو» اللى لسه فاتح كسر القاعدة دى. وواضح أنه قارى السوق المحلية والأوربية وجمع كل الحاجات الحلوة علشان تبقى جاهزة ومتاحة لسكان هليوبوليس تحت سقف واحد. فى شارع جانبى متفرع من شارع صلاح سالم، وفى مساكن شيراتون، المحل بـ يعرض ملابس على أحدث طراز، وفساتين سهرة، وشنط، وأحذية، وإكسسوارات ومستلزمات منزل لمصممين محليين ومن البلاد المجاورة لنا، بالإضافة لماركات معروفة من أوربا. أول ما تدخل هـ يقابلك أرفف عليها حاجات متنوعة زى أعواد للحفلات قابلة لإعادة الاستخدام وأعواد الأكل الصينى، أو سماعات ملونة تنفع تتوصل على أى موبايل سعرها 190 جنيه. كل دى قطع لطيفة مش موجودة عادة فى أى مكان ثانى فى القاهرة. كمان فيه مستلزمات منزل زى مخدات، وقاعدة للكؤوس، وفوط، وصوانى، ومجّات لمصممين مصريين زى "جود"، و"خمسة وخميسة"، و"كايرويد"، إضافة لشموع من "كاندل كوليكشن". مكان لوضع ميدالية المفاتيح على شكل مفتاح خشب من "امسكوا الخشب" كانت لطيفة جدًا، وبرضه مجموعة سكاكين من سبع قطع. كمان عجبنا قفاز من غير صوابع ملون وخامته مقاومة للماء ومعاه مريلة سعرهم 85 جنيه. القطع المفضلة لنا كانت إكسسوارات لزينب شاهين عليها مصطلحات ساخرة مصرية ولبنانية زى "إيجيبشن هـ يبوسنى" مطبوعة بالعربى على خواتم ألوانها مبهجة وأسعارها بين 50 جنيه و70 جنيه. إكسسوارات ثانية موجودة لمصممين زى "تاش"، و"لوليسكو"، و"يوكيز"، و"بانجلز" ومصممين ثانيين، مع حاجات ثانية من إكسبريس وبريمارك. كمان فيه ساعات "وى واتش" ومايوهات بيكينى لطيفة وملابس للبحر. تشكيلة متنوعة من القمصان وملابس السيدات معروضة داخل المكان. تى شيرت بيضاء لندى أكرم عليها صورة الممثلة أودرى هيببورن بشريطة وردى فى شعرها مع تعليق مكتوب "البنات الفرحانين هم أحلى بنات" ( 300 جنيه). تى شيرتات ثانية عليها صور مارلين مونرو، وسعاد حسنى وإليزابيث تايلور. قطعة ثانية شيقة عبارة عن مجموعة تي شيرتات قصيرة بدون أكمام من تصميم "بوهو شاركى" عليها تطريز على شكل عين وشنب عاملة تكوين لرجل لابس طربوش (290 جنيه). معروض كمان فى الجاليرى أشكال مختلفة من الشنط الأنيقة والأحذية والصنادل. شنط بوهو بألوانها المتعددة بحوالى 250 جنيه، وشنط بوهو الصغيرة للبنات تبدأ من 120 جنيه. شنط ثانية من "إل ماك" و"جاى روس" وناعومى هانم بالإضافة لمايكل كورس متاحة برضه. كمان تشكيلة محدودة لكن لطيفة من الباليرينات، والصنادل والشباشب ماركة "أتموسفير" ده غير ماركات أوربية ثانية زى صندل برتقالى مبهج مكتوب سعره 190 جنيه. غرفه كاملة مخصوصة علشان عرض الفساتين. فساتين سهرة من رفيق زكى معروضة على رف أسعارها بـ تبدأ من 190 جنيه. ورف ثانى عليه فساتين مستوردة من "بى سى بى جى"، و"ميس سيلفريدجس" و"بريمارك". "جاليرى بوهو" يعتبر إضافة هائلة علشان بـ يعرض تشكيلة كبيرة متنوعة وقطع مرحة، لكن أهم سبب أنه كسر القاعدة الذهبية للتسوق فى القاهرة بأن عنده ملابس شيك وسعرها مناسب، وكل ده فى مكان واحد.

...

بول & بير: ملابس كاجوال على الموضة وأسعارها معقولة في سيتي ستارز
اصدرت في: 19/01/2012

شهر بـ يعدي وراء شهر وإحنا بـ نمر من أمام محل فاضي عليه إعلان أن هـ يفتتح هنا محل «بول & بير – Pull & Bear»، صبرنا كان بـ ينفذ كل ما كنا بـ نشوفه لكن اللى هون علينا أننا شفنا العمال طالعين داخلين على المكان وشغالين من نار فـ عرفنا أن الموضوع قرب. وأخيرًا أول ما فتح "بول & بير" أبوابه جرينا داخل المكان وكلنا حماس لكن للأسف خاب ظننا من الفرع ده بعد زيارته. الفكرة أننا كان عندنا آمال كبيرة أن الفرع ده هـ يكون أكبر وفيه معروضات أكثر من اللى موجودة في فرع المهندسين، لكن للأسف لقيناه كمان أصغر منه وموجود فى ركن فى الدور الأول بالمرحلة الأولى (جنب محل "زارا - Zara" الضخم). وأكثر حاجة هـ تلاحظها هناك أن ركن الرجال أكبر من السيدات، لكن إزاي؟ إحنا حاسين أننا مش فى بول & بير اللى نعرفه. جودة الملابس إلى حد ما جيدة وأغلب الأسعار معقولة، من الحاجات الحلوة أن بـ ييجي لهم تشكيلة ملابس جديدة كل ستة أسابيع، وبالتالى فرصتك أنك تلاقي موديلات جديدة كل فترة أفضل. ستايل الملابس في بول & بير مريح ومن النوع الكاجوال اللى فيه جانب مرح، وبالتالى تحس أنهم مستهدفين شباب كايرو، التى شيرتات على سبيل المثال بـ يكون عليها غالبًا مطبوعات أو كلام مرح. وغالبًا تلاقيهم برضه بـ يتبعوا تيمة معينة كل فترة فى التصميمات زي المتعلقة بشخصيات ديزنى، لونى تونز، أو مدينة نيويورك وبـ تبدأ من 79 جنيه للسيدات وبـ 129 جنيه للرجال. سعر بنطلون الجينز في بول & بير بـ يبدأ من 399 جنيه للسيدات وبـ 499 جنيه للرجال. وسعر السويت شيرت بالكابوشو (غطاء الرأس) بـ 299 جنيه للجنسين. "بول & بير" عندهم صف كبير من الفساتين اللطيفة على الرغم من أنهم غاليين شوية وأغلبهم عليه رسومات بنانيتي وورد بـ 399 جنيه، وبالنسبة للأحذية هناك مش هـ تقعد أمامها كثير لأنها بلاستيك وجودتها رديئة وسعرها غالي، لقينا هناك صنادل تصميمها بسيط بـ 459 جنيه، فى حين أن الجزم الباليرينا بـ يتراوح سعرها بين 259 و499 جنيه، الاثنين سعرهم عالي قوي بالمقارنة بمثيلاتهم في أى مكان ثاني. لو بـ تدور على بالطو روح المحل بالتأكيد، أغلبها بـ يتراوح سعرها بين 499 و799 جنيه. والسعر الثانى ده ممكن تجيب به بالطو أسود بياقة فرو، أغلب البالطوهات مش مرتبطة بموسم معين وتقدر تلبسها بسهولة لموسمين متتاليين أو أكثر. أفضل شيء بالنسبة لـ "بول & بير" هي التخفيضات بالتأكيد اللى فيه بـ تلاقى خصم على المعروضات بـ يوصل إلى 50% لأن المعروضات بـ تتغير في وقت قليل، وبالتالى ممكن تلاقى عندهم تخفيضات طوال الوقت. طاقم العمل هناك ودود وتلاقيه وقت ما تحتاجه رغم أنهم مشغولين دائمًا بـ توضيب المعروضات. لكن مازلنا بـ نفضل فرع المهندسين على اللى موجود في سيتي ستارز.

...

أور: ملابس بسيطة وأساسية على الموضة في مصر الجديدة
اصدرت في: 27/11/2011

لو بـ تدوري على حاجة تجيبي منها ملابس حريمي أساسية بأسعار معقولة، يبقى «أور - Or» هو المكان المناسب لكي. المحل له كذا فرع في القاهرة كلها. فرع مصر الجديدة موجود في شارع الثورة المزدحم دائمًا. وتبقى فكرة حلوة لو أخذتوا تاكسي لأن من المستحيل أنكم تلاقوا ركنة للعربية هناك. المحل مقسم لـ 3 أقسام، تحت فيه جزم كونفيرس بألوان متعددة. الدور اللي فوق فيه مجموعة ملابس من "دانيال هشتر" وملابس ثانية من «أور». العاملين هناك شكلهم متبعين نظام غريب بخصوص ترتيب المعروضات في المحل. تحسوا أن الملابس مرتبة ترتيب عشوائي بدل ما تبقى على حسب النوع أو اللون. ودي بـ تبقى مشكلة لو عاوزين تدوروا على لون ثاني من نفس الحاجة. «أور» عنده جينزات حلوة جدًا وجودتها كويسة وبأسعار تبدأ من 250 جنيه. هـ تلاقوا هناك كمان القمصان الأساسية بكم طويل وبنصف كم بألوان متعددة وبأسعار تبدأ من 120 جنيه، وده كثير شوية عليهم مقارنة بجودتهم الأقل من المتوسطة. فيه جاكيتات صوف خفيف لطول الوسط بألوان أساسية وساطعة. فيه لون أزرق زهري خطف نظرنا كان سعره 210 جنيه. الجاكيتات الصوف الخفيف الطويلة للركبة كان فيه منها الأسود، الرمادي، والأزرق فقط. متوفر كمان الجاكيتات الجينز بأسعار تبدأ من 270 جنيه. فيه قمصان كاروهات كثير جدًا وبألوان متعددة أسعارها تبدأ من 200 جنيه، وفيه مزج جرئ من الألوان لفت نظرنا. كان فيه كمان قميص مخطط أسود وموف بـ 220 جنيه، وبلوفرات وسويت شيرتات أساسية تبدأ أسعارها من 150 جنيه. فيه جاكيت رمادي عليه رقع واقية للكوع بـ 140 جنيه. ممكن كمان تلاقوا تشكيلة محدودة من الإيشاربات والكوفيات يبدأ سعرها من 80 جنيه، السعر ممكن يبقى عادي، لكنه كثير جدًا على جودتهم. شنطة جلد أخضر هناك كانت بـ 270 جنيه. علشان وقت لمّا إحنا رُحنا المحل كان فاضي، فـ حسينا أن العاملين هناك كثير جدًا، وممكن يبقوا لازقين لك على طول بطريقة مزعجة، خصوصًا لو بـ تحبوا تتسوقوا في هدوء. رغم أن «أور» ممكن ما يبقاش اختيارك الأول لو بـ تدور على ملابس بجودة كويسة، لكن مش هـ يخسرك حاجة.

...

بول & شارك: ملابس بحر وشتوي في سيتي ستارز
اصدرت في: 13/11/2011

بما أن القاهرة مش مدينة ساحلية ومافيهاش أنشطة بحرية، فثقافة اليخوت والإبحار والملابس الخاصة بها مش متوفرة في العاصمة بكل محلاتها. لكن كسر القاعدة دي محل جديد ممكن من خلاله تلبس وتعيش حياة البحر، الماركة الإيطالية الشهيرة «بول & شارك – Paul & Shark» بقت متوفرة من خلال المحل الموجود في سيتي ستارز، كل الملابس مستوحاة من الأجواء البحرية من حيث الخامات والموديلات، وعليها لوجو سمكة القرش الصغير المميز للماركة. صحيح اللبس مش هـ يحميك من عضات أسماك القرش في البحار ولا يخليك قادر على عبور المحيطات! لكن الأكيد أنه هـ يخليك تبدو أنيق طول الوقت. زرنا المحل في المول اللي بـ نعتبره جنة كل مستهلك في كايرو، وهو موجود أمام محل «أتش & إم - H&M»، والمساحة بتاعته مش كبيرة لكن فيه كل الملابس الأساسية بكميات معقولة زي البنطلونات والقمصان والشيرتات والجينز الرجالي وفساتين وجيبات بناتي، وكالعادة في كل محلات الملابس في القاهرة المعروضات كلها متأخرة فصل كامل عن بلاد الموضة في الغرب بفعل فرق التوقيتات. قسم السيدات على شمالك وأنت داخل المحل صغير جدًا ومكون من 3 أرفف مش أكثر، لكن الموديلات ظريفة ومحتشمة وألوانها كمان هادئة. الألوان الفاتحة موجودة في الموديلات اللي فيها شغل بالكريستال السواروفسكي زي بعض السويترات وأسعارها كانت غالية (2150 جنيه) وكان فيه بلوفر صوف مفتوح بسعر 2500 جنيه برضه فيه شغل بالكريستال، والجينز العادي بـ يبدأ من 1950 جنيه ومعظم البلوزات والشيرتات بـ تبقى بـ 1900 جنيه. والفساتين أغلى شوية (2500 جنيه)، وفيه شال كشمير بـ يدفئ بجد لو الدنيا ثلج وكان سعره 1150 جنيه. الموديلات في القسم الرجالي متجانسة جدًا، كل السويترات عليها التصميمات البحرية والأعلام، وطبعًا جودة الملابس معدية لكن السعر كان غير عادي (3150 جنيه)! والحاجة اللي هـ تلفت نظرك بشدة في القسم الرجالي هي البالطوهات الثقيلة جدًا اللي ممكن تخليك دافئ في كل الظروف حتى لو جاء إعصار تسونامي، أسعارها بـ تبدأ من 6950 جنيه! ما علينا.. معظم الجينزات الرجالي بأسعار من 1450 جنيه وأنت طالع. القمصان معظمها سادة وبالألوان التقليدية زي الأسود والأزرق والرمادي وكلها بسعر 1550 جنيه. الحزام الجلد بـ 995 جنيه، شوية منهم سادة وشوية عليهم بعض الأعلام البحرية. بالمقارنة بباقي فروع «بول & شارك» في دول ثانية؛ المعروضات في مصر هي الأقل في حاجات كثير، لكن لو كنت شغوف بملابس الإبحار ولبس الصيد وما كنتش عارف تعمل اللوك ده إزاي ومنين، أو كان معاك فلوس زيادة ومش عارف تصرفها في إيه، يبقى هو ده المكان المناسب علشانك.

...

كشمير: محل مصرى للمشغولات والإكسسوارات الهندية
اصدرت في: 09/11/2011

كشمير مش بس اسم بلد جميلة موجودة بين الهند وباكستان ومشهورة بمنتجات يدوية رائعة زي الحرير والسجاد والشالات والتحف والحلى وإكسسوارات الأطفال والستات، لأ ده كمان اسم محل موجود فى القاهرة فى طريق متفرع من طريق الإسماعيلية ينفع يتحط فى قائمة محلات الهدايا للستات والبنات. «كشمير - Kashmir» مُقسم لـ 3 أركان: ركن فيه الشنط الهندية وفيه منها أشكال وألوان، يعنى مثلا فيه الشنط الهندية الكبيرة واللى لها يد طويلة معمولة من القماش ومطرزة بخيوط فضية وذهبية، وفيه الشنط السادة المعتمدة على تناسق ألوانها مع بعضها البعض، وفيه الشنط اللى لها يد خشبية، ومعمولة من قماش الأورجانزا وسعرها فى حدود 40 جنيه. فى ركن الشنط بـ يبقى فيه برضه مفارش من خامات مختلفة بـ تناسب الموائد الكبيرة والصغيرة سواء كانت على شكل دائرة أو مستطيل، يا إما مفارش مطبوع عليها لون ذهبى وفضى واسمها "الأور"، يا إما مفارش مطرزة تطريز ضخم بالخرز والترتر واسمها "الأولد"، وخداديات مطرزة. الركن الثانى من المحل فيه إكسسوارات أشكال وألوان معلقة على رفوف فوق بعضها، من سلاسل لغوايش لحلقان معمولة من الفضة الألمانى وهى بـ تعادل الفضة الحقيقية، لخواتم أهم حاجة بـ تميز شكلها الأحجار الكبيرة اللى فيها الفيروز والعقيق، وبرضه فيه أطقم مكونة من عقود مرنة خفيفة بـ تتلبس على الرقبة والأساور الضخمة والرفيعة المعمولة من الخشب والخرز، ده غير الأطقم اللى هى تقليد الذهب الهندى ومليانة فصوص ملونة، كمان فيه سلاسل "الكوكو" وهى سلاسل للبنات الصغيرين فيها أشكال مجسمة للفيل الهندى، وبرضه فيه الكتافات وهى أساور بـ تتلبس فى الكتف واخدة شكل التيجان، والحظاظات المعمولة من الخيوط المضفرة مع بعضها، وفيه النجوم الألماظ اللى بـ تتحط فى الوش. وفى الركن الثالث فيه المعلقات الهندية، ودي عبارة عن لوحات معمولة من الكليم فيها أشكال للبيوت، وللطيور موجودة بأحجام مختلفة برضه، كمان فيه إكسسوارات للبس زى الأحزمة المعمولة من الخرز وسعرها بـ يتراوح بين 40 إلى 50 جنيه، وبـ تبقى عبارة عن كذا خيط جنب بعض أو كذا خيط فيه أحجار صغيرة لها ألوان مختلفة متداخلة مع بعضها، برضه فيه علب للهدايا قيمة "البونز" المعمولة من عظام الحيوانات، والعلب الخشبية الصغيرة. كشمير متعة هندية كبيرة للناس اللى تحب تغير من نوع إكسسواراتها أو تحب تضيف لمسة هندية على بيتها، وهو محل بـ يبيع جملة وقطاعى، وممكن يبقى وسيط بينك وبين الهند، يعنى لو حد حابب يشترى أقمشة أو شالات أو سارى هندى ممكن يتفق مع صاحب المحل اللى من وقت للثانى بـ يطلع سفريات للهند.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن