هدايا تسوق in مصر الجديدة Cairo, Egypt

تسوق

كادر: تابلوهات وأعمال فنية للبيع في سيتي ستارز
اصدرت في: 06/06/2012

في الدور الأول في المرحلة الأولى في مول سيتي ستارز وبالتحديد أمام محل «استقبال» للأثاث، لمحنا محل بـ يبيع منتج غير مألوف في المول، وهو محل «كادر» اللي بـ يبيع بورتريهات ولوحات زيتية وبراويز ولوحات فنية بأحجام مختلفة. المحل أشبه بركن في الجدار مساحته مش كبيرة وكل واجهاته زجاجية علشان تبين الأعمال المعروضة داخل المحل. دخلنا وبدأنا نتفرج على اللوحات المعلقة لكن لأن المساحة مش كبيرة كان فيه أضعاف عدد اللوحات مرصوصة على الأرض ولازم تقعد تقلب بأيدك علشان تتفرج على كل اللى موجود في المحل. المحل فيه أعمال فنية أصلية ومقلدة، مصرية ومستوردة وكل الأحجام موجودة من أول الـ 1.5 متر x 1.5 متر لحد الأحجام الصغيرة الـ 30 سم x 20 سم. مناظر طبيعية وبورتريهات لأشخاص وأعمال تجريدية وسريالية وتكعيبية. فيه لوحات زيتية عادية وفيه رسومات على القماش ولوحات أكريليك وفحم وكل ما تتخيله. الأسعار بـ تختاف حسب الحجم أولاً وبعد كده حسب الخامات المستخدمة وإن كانت أصلية ولا لأ. يعني مثلًا عجبنا جدًا تابلوه عملاق عليه ألوان مجردة بدرجات البرتقالي والأحمر وكان مقاسه أكبر من متر مربع وكان سعره 2150 جنيه وعرفنا أن اللوحة نفسها مستوردة. وأصغر حجم من النوع ده من اللوحات التجريدية المستوردة كانت بـ 185 جنيه. على الصف الشمال من الأعمال المعروضة في واجهة المحل كانت كلها واخدة الطابع المصري التراثي ببورتريهات لوجوه نوبية ورسوم بالفحم للموالد والفرق الشعبية الصعيدية وفوانيس ودي كانت من أكثر الأعمال اللي عجبتنا في المحل. وعرفنا أن دي أعمال أصلية لفنان اسمه محمد شهاب، وكان واضح عليه توقيع الفنان والتاريخ. وكان سعر أحد اللوحات بالحجم الوسط 1080 جنيه. «كادر» بـ يشارك في معارض الأثاث والديكورات زي (لو مارشيه) اللي لسه خلصان قريب، وبـ يتعامل مع عدد من الفنانين المصريين والأجانب وبـ يعرض أعمالهم للبيع وممكن تحدد طلبك بالضبط وهم يحاولوا يحضروه لك من خلال معارفهم وعلاقاتهم بالرسامين والتشكيليين. بـ تختار شكل البرواز اللي يعجبك، ممكن تأخذ التابلوه بالبرواز اللي عليها، وممكن تختار من المعروض داخل المحل وفيه عينات كثيرة جدًا منها المذهب والخشبي العادي والملون والتقليدي والمنحوت زي شغل القويما في النجارة وغيرها كثير. بس طبعًا لو هـ تأخذ برواز عمولة الموضوع ممكن يأخذ يوم أو اثنين. إدارة المحل والمصنع الخاص بهم موجود في مدينة بدر بالمنطقة الصناعية الثالثة، متخصصين في صناعة البراويز. عجبنا أن لهم فرع في سيتي ستارز لأن النوع ده من المحلات ناقص شوية هناك، وفي كل مكان الحقيقة.

...

لاﭭلي لايس: إكسسوارات منزلية مبتكرة وهدايا في هليوبوليس
اصدرت في: 21/11/2011

البحث عن هدية مناسبة دائمًا مهمة صعبة، بالذات لما تكون بـ تدور على هدية زواج مبتكرة. لو عديت على «لاﭭلي لايس – Lovely Lace» الموجود في مول سيتي ستارز في المرحلة الثانية وأنت في طريقك للفوود كورت الجديد، هـ تلاقي نفسك لازم تقف تتفرج على المحل المعمول بالديكور الإنجليزي القديم بألوانه الوردي والحليات الساتان باللون البرتقالي الفاتح. المعروضات صحيح شكلها بناتي بكل الدانتيل والنقشات اللي فيها، لكن أكيد هـ تلاقي حاجات مناسبة تنفع هدية لعرسان جداد. جودة عالية وكله بثمنه! ممكن تجيب هدية شيك وتلفها بشكل من اختيارك ومعاها كارت تهنئة بـ 100 جنيه. شمعة مغطاة بالساتان بـ 25 جنيه للحجم الوسط، وفيه أحجام وأشكال ثانية بأسعار قريبة من كده. وفيه شموع على شكل عريس وعروسة الواحدة بـ 25 جنيه. لو بـ تدور على أفكار بسيطة للهدايا المنزلية فيه مجموعة من الزهور البلاستيكية لكن لونهم البنفسجي ما كانش جذاب كفاية. وكان فيه علامة "Welcome" الخشبية اللي بـ تتحط على باب الشقة بـ 60 جنيه بجودة عالية جدًا ومحفور على بروازها بالورود. ومن الأفكار اللي عجبتنا واللي تنفع لحديثي الزواج كان صندوق للاحتفاظ بدعوات الفرح سعره كان 75 جنيه، وكان محطوط وسط براويز الصور العادية. البالون الكبير المنفوخ في مدخل المحل اللي عبارة عن عريس وعروسة يخليك تعتقد أن المحل ده بتاع هدايا أفراح فقط، صحيح النوع ده من الهدايا واخدة القطاع الأكبر من المحل، لكن فيه هدايا ثانية ظريفة لمناسبات أخرى غير الزواج. فيه قسم لهدايا الأطفال والسبوع وبراويز باللون الأزرق الفاتح والوردي. وعجبنا برواز محدد حوله دباديب صغيرة وكان سعره 145 جنيه. أول ما تفتكر أنك خلصت المحل فرجة وتمشية هـ تلاقي قسم كامل خلف الحائط بـ يقسم المحل لنصفين. ده كان قسم التغليف وفيه كل أنواع التغليف من الجليتر اللي بـ يلمع والسوليفان وحاجات ثانية كثير. تغليف هدية بحجم متوسط مش هـ يعدي 50 جنيه، وما تنساش تشوف الحائط اللي عليه كروت التهنئة اللي أسعارها حوالي 30 جنيه. محلات الهدايا في القاهرة بقت ظريفة جدًا خاصة أنهم أصبحوا عارفين بالضبط الزبون بـ يدور على إيه.

...

تصميمات هاني محفوظ: أجندات بأشكال جميلة وجودة ممتازة
اصدرت في: 23/10/2011

كل واحد فينا فيه حاجات بسيطة ممكن تكون مصدر إلهام له في أفكاره أو شغله، الغريب أن أجندات هاني محفوظ اللى بـ تُباع فى كثير من المكتبات بـ تعتبر مصدر كبير لإلهام بعض الشباب بدليل أنهم بـ يدخلوا المكتبة يبحثوا بالاسم على الأجندات أو الكشاكيل اللى بـ تحمل توقيع المصمم هانى محفوظ أو H.M.D. الميزة أنك هـ تلاقى أحجام مختلفة للمنتجات اللى بـ يقدمها هانى، يعني مثلاً هـ تلاقى الأجندة الكبيرة والمتوسطة اللى بالسلك، وهـ تلاقى كمان البلوك نوت اللى ورقها بـ يتقطع بسهولة لتدوين الملاحظات السريعة وهـ تلاقي قواعد الشاي. هانى محفوظ فنان مصرى تخرج سنة 1988 من قسم الديكور في كلية فنون جميلة، هانى اشتغل فى شركات دعاية وإعلان لحد سنة 1997 اللى افتتح فيها رسميًا شركة التصميمات الخاصة به. فكرة الأجندات بدأت لما هانى قرر سنة 2002 أنه يعمل مجموعة من عينات الأجندات منها الأجندات اليومية والأسبوعية ونتائج سنوية ويبعتها لعملاء الشركة كنموذج بـ يحمل فكره الخاص فى التصميم، وفضل هانى كل سنة يبتكر أفكار جديدة يبعتها لعملائه وفي سنة من السنين تبقى عند هانى عدد كبير من الأجندات فكر بعد كده أنه يجرب يوردها لمكتبة الديوان، المدهش أن الأجندات حققت نجاح كبير وبقى يتعمل عليها طلبيات على الرغم من أنها كانت أجندات مخططة مكتوب عليها فقط 2005 ودي كانت السنة اللى شهدت ميلاد مشروع الأجندات ومن سنة 2006 بدأ هانى يراعى التنويع في أحجام وأشكال الأجندات. كل سنة بـ يحرص هانى أنه يقدم تصميمات جديدة مختلفة عن السنة اللى قبلها تتنوع ما بين البورتريهات والحكم باللغة العربية والإنجليزية وحيوانات بأشكال هندسية. فى الأول كان هانى بـ يراعي أنه لازم يقدم تصميمات ترضى جميع الأذواق لكن بعد ما بقى فيه جمهور بـ يتابع الجديد في أجندات "هانى محفوظ" فأصبحت التصميمات فنية أكثر وبـ تخاطب جمهور مثقف أكثر. الجميل في منتجات H.M.D أن أسعارها متوسطة وفي متناول الجميع، يعني مثلاً البلوك نوت الصغيرة بسبعة جنيه ونصف، وقواعد الشاي بـ يتراوح سعرها من 16 لـ 25 جنيه على حسب العدد، والأجندات العادية بـ يتراوح سعرها من 7 لـ 26 جنيه على حسب الحجم. أما بالنسبة لأجندة التخطيط الأسبوعي فسعرها 33 جنيه وأجندة التخطيط السنوي سعرها 50 جنيه.

...

علي طه: هدايا يدوية من كنوز الكوربة الخفية
اصدرت في: 24/06/2011

من وقت للتاني وانت بـ تتمشى في القاهرة بـ تعدي على محل ولا مطعم وتتفاجأ انك ماشوفتهوش قبل كده. «علي طه» محل مميز جداً ضمن مجموعة المحلات المتنوعة اللي في شارع بغداد في الكوربة٬ في مصر الجديدة. ولو ماكنتش بـ تدور عليه ممكن تعديه وماتخدش بالك منه. المحل مليان إكسسوارات منزلية مصرية أصلية ومشغولات يدوية وهدايا. المحل عنده مجموعة منتجات كل منتج منها ممكن يبقى هدية رائعة. الهدايا دي منها منتجات جلدية زي أچندات٬ ماوس پاد Mouse pad وإكسسوارات بناتي٬ ده بالإضافة لإكسسورات البيت. عنده مفكرة جلد صناعة يدوية رائعة٬ عليها تصميمات هندسية٬ ودي فيه منها 3 أحجام: الكبير حوالي 30 في 50 سم٬ وبـ200 جنيه. الأچندة ممكن كمان تخليها شخصية أكتر وتطلب انه يتكتب عليها اللي انت عاوزه من برة. أما الماوس پاد Mouse pad فهي عبارة عن خرايط لمصر موضحة اهم المدن حوالين حوض النيل. تِوَك الشعر كمان تحف فنية لأي بنت عايزة تعمل "لوك" بوهيمي شوية. أغلب المشغولات والهدايا في المكان إكسسورات منزلية. فيه مرايات بدوي وعربي ومصري راقية جداً بـ تبدأ من 250 جنيه. المكان كمان عارض مصابيح بأشكال وأحجام ولإستخدامات مختلفة. من أول الأشكال المودرن الإنسيابية المربعة اللي بـ تتحط على الأرض٬ لغاية البيضاوية التقليدية اللي بـ تتحط على الترابيزات. المصابيح دول معمولين بحرفية عالية جداً وأسعارهم بـ تبتدي من 200 جنيه. فيه كمان قواعد كوبايات بأشكال متنوعة٬ منها اللي واخد أشكال هندسية إسلامية٬ وغيرها عليه جمال أو تصميمات فرعونية عليها عين حورس. «علي طه» كمان عنده عبوات زجاج للعطور والزيوت٬ فلو بـ تجيب هدية لحد بـ يحب العطور ومنتجات العناية بالبشرة٬ ممكن تجيبله حاجة كده أو حاجة من مجموعة صابون وكريمات «نفرتيتي». فيه كمان علبة بخور وشموع بـ تيجي في علب صغيرة جميلة. ولمُحبات شنط اليد المعمولة من قطع قماش مختلفة متخيطة في بعض (مرقعة)٬ «علي طه» عنده ده بأشكال وأحجام مختلفة وألوان مبهجة٬ أسعارها ما بين 200 و300 جنيه. وإشاربات منسوجة لقطة بألوان كتيرة جداً بـ30 – 50 جنيه. المحل كمان بـ يعمل شوية ميداليات مفاتيح من الأجمل في القاهرة بـ15 جنيه بس. وممكن تخليها على شكل أول حرف من اسم الشخص اللي بـ تجيب له الهدية. فلو الفوس اللي معاك من 15 جنيه لـ 200 جنيه هـ تلاقي في «علي طه» هدية مناسبة وذوقها مصري أصلي.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح