مدينة نصر تسوق in Cairo, Egypt

تسوق

فتح الله ماركت: وفر فى العملة واشتري بسعر الجملة في مدينة نصر
اصدرت في: 09/12/2013

فتح الله ماركت فرع صلاح سالم عنوانه ما يتوهش أبدًا موجود فى عمارات العبور بصلاح سالم، لما هـ تروحوا ممكن ما تأخذوش وقت فى الطريق قد ما هـ تأخذوا وقت فى التسوق داخل الماركت، وده لأن الأسعار والعروض مغرية جدًا للشراء بالنسبة لأى ست بيت. فتح الله ماركت بـ يتكون من عدة أقسام، فى كل قسم بـ يحتوى على سلع معينة وهـ يوفر لنا وقت كبير جدًا لأننا هـ نلاقى فيه كل حاجة وأسعاره هـ تشجعنا أننا نشترى كميات كبيرة بدل ما ننزل السوق كل يوم، كمان هـ نعرف من العاملين فى الماركت إزاى نحفظ الأطعمة والخضروات لفترات كبيرة وده هـ يساعدنا أننا نستغنى عن الأكل الجاهز ودائمًا كل ست بيت هـ تكون مستعدة لأى عزومة مفاجأة لأن ثلاجتها مليانة وخزين بيتها متوفر. أول ما ندخل هـ يقابلنا قسم المعلبات، كل الجبن والألبان والعصائر وبعدها قسم السلع التموينية زى المكرونات والأرز والسكر، فيه كل الأنواع حتى الأرز الدايت والمكرونة الدايت ومكرونات الأطفال الملونة، يليها قسم خاص بالمنتجات الورقية زى المناديل وفوط المطبخ وحفاضات الأطفال، وبعد كده هـ تلاقوا قسم للجبن والألبان اللى بـ تباع بالكيلو وكمان قسم كبير للحوم الطازجة والمغلفة زى منتجات البانيه الجاهز والبرجر والكفتة وكمان فيه قسم للأسماك الطازجة. وبعيد شوية هـ نلاقى قسم للأدوات الكهربائية زى المكانس والدفايات وحتى الأدوات الكهربائية الثقيلة. فتح الله ماركت بـ يرفع شعار "وفر فى العملة واشترى بسعر الجملة"، ده مش مجرد شعار دى حقيقة فعلاً لأن الأسعار أسعار جملة وكمان كل شهر فيه عروض وهدايا وفى المناسبات العروض بـ تكون مذهلة، يعنى مثلاً مع اقتراب رأس السنة فتح الله عامل عروض هائلة هـ تلاقوا مثلاً باكيت أرز من النوع الممتاز وزن خمسة كيلو بـ "21 جنيه" وفيه كمان فخدة ضانى سعر الكيلو "34 جنيه"، وممكن العاملين فى قسم اللحوم يقسموا لك الفخدة حسب ما أنت عاوزة، وفيه عروض على مساحيق الغسيل زي تايد أوتوماتيك "48 جنيه" بدلاً من 58 جنيه للباكيت الـ 3 كيلو وكمان فيه كيلو هدية، وعرض على الشامبوهات (بانتين شامبو + بلسم بـ "29 جنيه" بدلاً من "37 جنيه")، وطبعًا علشان الشتاء فيه عروض على الدفايات: دفاية 2 شمعة بـ "77 جنيه"، وطبعًا فيه شجر كريسماس وبأسعار وأحجام متفاوتة، وفيه كمان عروض كثيرة ومغرية فى المفروشات، فيه لحاف فايبر بخامات عالية الجودة بـ "99 جنيه"، كمان عروض على الكيك والتورتات المعلبة علشان نعمل أحلى كيك فى رأس السنة. فتح الله ماركت بـ يهتم بوقت العملاء جدًا علشان كده ممكن بـ يوفر العروض من خلال الإنترنت يعنى ممكن نستفيد من العروض ونطلب طلبات الشهر كله بالتليفون بعد ما نختار اللى إحنا عاوزينه من على صفحة فتح الله ماركت على الفيسبوك. ولو إحنا حابين نتسوق المكان مناسب تقريبًا لناس كثير وكمان فيه مكان نقدر نركن فيه لو معانا عربية وساعتها ما تشيلش هم الشنط الكثير. فى فتح الله ماركت الأسعار صحيح بسعر الجملة والعروض جيدة وبـ توفر لكن ممكن جدًا وإحنا بـ نحاسب على الكاشير نلاقى الفاتورة بمبلغ كبير جدًا وده لأن الأسعار مغرية لدرجة ممكن تخلينا نأخذ كل شيء رخيص بغض النظر عن احتياجاتنا علشان كده قبل ما نروح من الأفضل أننا نحدد طلباتنا علشان ما نتفاجئش بالفاتورة.

...

أوفيس إكسبريس: ميجا ستور للأدوات المكتبية والمدرسية في رمسيس
اصدرت في: 03/12/2013

شهر وتبدأ سنة جديدة محتاجة أجندات، وأقلام، ونتائج التقويم الميلادى، وأدوات مكتبية، وهدايا متنوعة لها علاقة بالأعمال المكتبية، كل ده هـ تلاقيه فى أوفيس إكسبريس، مبنى أزرق مكون من ثلاثة طوابق فى شارع امتداد رمسيس، أول ما تدخل المبنى هـ تلاقى نافورة مياه وزحليقة للأطفال وده بما أنه فيه كل الأدوات المدرسية. أول ما تدخل أوفيس إكسبريس هـ تقتنع فعلاً بـ اللى مكتوب على اليافطة الإعلانية للمبنى وهو أنه ميجا ستور للأدوات المكتبية فعلاً، يعنى هـ تلاقى كل حاجة لها علاقة بالمكاتب من الدبابيس لخراطة الورق، بدخولك الطابق الأول هـ يقابلك رف النوت بوك والأجندات الصغيرة والمتوسطة الحجم ألوانها وأشكالها وتجليدها قمة فى الجمال يعنى هـ تلاقى أجندات جلدها قماش دانتيل وأجندات جلدها بلاستيك وأجندات ثانية جلدها على هيئة لازار بألوان ميتالك، بـ يتراوح عدد صفحاتها ما بين 160 و320 صفحة، وطبعًا كل الأجندات لها أستيك خاص بها علشان يضمن خصوصية المكتوب فيها، أسعارها بـ تختلف حسب الشكل والحجم من أول 6.50 جنيه إلى 11.95 جنيه. أما الهدايا القيمة فهى موجودة بدءً من أقلام "باركر وكروس" واللى أسعارها بـ تتراوح ما بين 100 إلى 300، وأجندات "بيير كاردين" وأسعارها حسب حجمها 40 و80 جنيه، طقم أدوات المكتب وخاماتها مختلفة جلد طبيعى وصناعى مزركش، طفايات سجاير بأشكال فرعونية وباللون الفضى والنحاسى، كمان فيه المفكرات اليومية والأسبوعية بأحجام كبيرة وصغيرة وأسعارها 11 و40 جنيه. ركن المدارس وفيه كشاكيل مدرسية وكمان ألعاب تعليمية للحروف والأرقام وترفيهية للأطفال زي المتاهة والبازل أسعارها بـ تبدأ من 30 جنيه، وبما أننا جيبنا سيرة التعليم، هـ تلاقى قواميس للغات مختلفة وقصص قصيرة للأطفال باللغة الإنجليزية، شنط مدرسية للأطفال بس أحجامها بـ تناسب مراحل الروضة والابتدائية، حصالة بـ تعلم الأطفال إزاى يدخروا من صغرهم، وبالنسبة للأقلام الجاف وأقلام الرصاص والأستيكة والبرايات فهى موجودة بماركات مختلفة زي: ستيدلر ويونيىبول وبريما وفبريانو، اللى لفت انتباهنا مسطرة فيها حروف اللغة الهيروغليفية وما يوازيها من حروف اللغة الإنجليزية، ومن الدباسات دباسة ماركة ديجيتال ودي بـ توفر تدبيس مؤقت ودائم وكمان فيها مكان علشان تحط فيه اسمك. من الحاجات اللطيفة اللى بـ يقدمها أوفيس إكسبريس خدمة عمل إسطمبات الختامات بالليزر، بـ تختار الختامة المناسبة لطلبك من الختامات المعروضة وبـ تبعت تصميم فى صورة ملف pdf أو Jpeg لإيميل azs.darwish@office-exp.com، بعدها بـ 48 ساعة بـ تستلم بروفة للختامة على إيميلك وبعد ما يتم الانتهاء من تجهيزها بـ تستلمها من هناك. ولو كنت من عشاق الأدوات المكتبية المطرقعة هـ تلاقى كليبس الورق الكبير اللى عليه أشكال كرتونية وقلوب، أو الورق اللاصق "Sticky Notes" على شكل iPhone، وتراى الورق العمودى والأفقى بألوان زاهية.

...

نورماندي: معرض الأحذية العملاق في مدينة نصر
اصدرت في: 26/06/2013

بقى لنا فترة بـ نسمع عن محلات «نورماندي» للأحذية اللي ذاع صيتها وقدرت تربي زبون في فترة قليلة، وأصبح المحل الموجود في شارع عباس العقاد في مدينة نصر واحد من الوجهات المهمة لكل واحد "أو واحدة" بـ تدور على جزمة أو كوتشي أو أي إكسسوارات جلدية زي الشنط أو الأحزمة في القاهرة، ومن ضمن المعروضات فيه بعض الموديلات الإيطالية الحديثة للأحذية والملابس الرياضية والتي شيرت لزوم الديكور، وكانت لنا زيارة للفرع الأهم الموجود في عباس العقاد وهـ نحكي لكم عن تجربتنا. الواجهة متوسطة الحجم للمحل من الخارج لا يمكن تخليك تتخيل مساحة المحل من الداخل، هو من الآخر مش محل؛ هو معرض عملاق مكون من طابقين فيه عدد مهول من الأرفف على كل الجردان فيها أحذية أشكال وألوان وكل صف معلق عليه لافتة بمقاس محدد، 40..41..43..وهكذا علشان تروح تتفرج مباشرة على المقاس بتاعك ولو لقيت الموديل اللي عجبك يبقى تجربه في رجلك وتشتريه لأنك أكيد هـ تلاقي مقاسك، طريقة ظريفة وبـ تسهل الدنيا كثير. نرجع تاني للـ Show Room العملاقة اللي خليتنا نتمشى في المحل ونطلع الدور الثاني علشان نتفرج على كل الموديلات حتى اللي مش في مقاسنا، لكن للأسف ورغم التنوع الكبير في الموديلات اكتشفنا أن كل المعروضات غير أصلية، يمكن تكون تقليد عالي الجودة أو High Copy زي ما بـ يقولوا عليها لكن إحنا مش قادرين نستوعب أن فيه كوتشي أو جزمة تقليد بـ 300 أو 400 جنيه! ويبقى عليها شعار ماركة عالمية زي Zara أو Lacoste أو Massimo Dutti وهي في الحقيقة تقليد. لكن لو حضراتكم شايفين أن موضوع الأصالة والـ Branding حاجة ثانوية مادامت الخامات قوية وبـ تستحمل والموديلات شيك وأنيقة يبقى ممكن تلاقي حاجات كثير تعجبك عند «نورماندي»، لكن برضه دوَّر كويس وفصص الجزمة اللي هـ تجيبها قبل ما تدفع فلوس لأنك ممكن تلاقي عيوب في التقفيل والخياطة واللصق، لاحظنا كدة في بعض القطع اللي جربناها. فيه صندل وسابو وكوتشي وأحذية كلاسيك رجالي والسبدرين اللي هو تقليد الـ Vans وحاجات شبه الكروكس الشهير، ومودبلات قريبة جدًا من الموجودة في CAT وTimberland وبأسعار أقل طبعًا، يعني ممكن تجيب حاجة شكلها فخيم وأنيقة جدًا بـ 250 أو 300 جنيه، بس ما نضمنلكش الجودة والعمر الطويل بقى، وهـ تلاقي النعل مش عليه العلامة الأصلية للماركة طبعًا لكن بـ يبقى عليه اسم المصنع اللي اتعمل فيه في مصر أو في الصين. رغم كدة محلات «نورماندي» لها صيت كبير بين الشباب اللي بـ يدوروا على موديلات كاجوال جديدة بأسعار معقولة وكمان لأن المحل من الداخل مبهر ويعطي إيحاء بالعظمة وممكن بسهول يخدع ناس كثير ويتخيلوا أن كل حاجة بـ تتباع هنا أصلية مافيش كلام. لكن الحقيقة أننا بمجرد ما سألنا احد العاملين قال لنا ببساطة: "زي ما حضراتكم شايفين، إحنا بـ نشتغل في الـ High Copy" يعني الموضوع مش سر. في النهاية الخدمة كانت جيدة ومش "لازقة" وجربنا الموديلات براحتنا، لكن قلبنا ما طاوعناش ندفع المبالغ دي في الأحذية دي، والمرة الجاية نتمنى نشوف عندهم أسعار أقل أو يكونوا أخذوا توكيلات بعض الماركات المهمة.

...

كلاركس: أحذية معمرة تتحمل شوارع القاهرة الصعبة فى جنينة مول
اصدرت في: 17/05/2013

من الصعب أنك تلاقى محلات فى القاهرة للأحذية بـ تبيع حاجة تعيش وفى نفس الوقت تستحمل، بس فيه ماركة عالمية قدرت تسهل الموضوع شوية. شركة "كلاركس – Clarks" للأحذية بدأت سنة 1825، لما عامل مدابغ من منطقة وسط إنجلترا الجذابة قرر يفتح أول محلاته علشان يبيع اختراعه الجديد: شباشب من جلد الغنم. وبعد بدايته الرائعة حصلت طفرة لكلاركس وبقى من الأسماء العالمية اللى لها وزنها وسط أصحاب الذوق الرفيع حول العالم. كلاركس فضل لفترة مكان بـ يروحه الآباء المرهقين كل أغسطس، واللى زهقوا من تغيير أحذية مدارس أولادهم المتبهدلة، علشان يقدروا يلاقوا حذاء مناسب لأطفالهم. نتيجه لكده كلاركس حصل على سمعة كبيرة أنه بـ يهتم بعنصر تحمل الأحذية أكثر من تماشيها مع الموضة، وتوجه له اللوم لأنه كان سبب أنهم يمشوا فى الملعب ولابسين حذاء زيه زى الخوذ الواقية؛ وفضل الشكل القبيح ده مكمل سنين طويلة. قدر كلاركس اليومين دول يطور من نفسه ويضيف شكل راقى لمنتجاته. قررنا نزور واحد من فروع كلاركس القاهرة وتحديدًا جنينة مول علشان نعرف إذا كان ممكن نلاقى حذاء شكله حلو وفى نفس الوقت يستحمل شوارع القاهرة الصعبة. يمكن مساحة المحل صغيرة جدًا، بس على عكس محلات أحذية ثانية فى المول، عرضهم لمنتجاتهم كان منظم بطريقة كويسة وعملية. المجموعة المعروضة شاملة أحذية رجالى وحريمى، بس للأسف مافيش حاجة معروضة من مجموعتهم الرائعة المبهجة من أحذية الأطفال. كان معروض صف واحد للأحذية الرجالي من المجموعة الخاصة بماركة "كلاركس"، على صف قريب من الأرض. الصف ده فيه أحذية كاجوال وصنادل سعرها 490 جنيه، وحذاء brogue الضخم شكله يقدر يستحمل، وكمان موضته روعة. الشكل ده تكلفته 720 جنيه بس أكيد اختيار ممتاز هـ ينفعك فى أى فرح، أو مقابلة شغل أو عزاء، ولسنين طويلة. رغم أن المتوفر عدد قليل جدًا من الموديلات، بس كل المعروض ألوانه بـ تتنوع من الأسود المطفى لغاية البنى الباهت، وكلهم من جلد طبيعى أصلى وكعب مناسب. من الماركات الموجودة عند كلاركس لويدز Lloydsمن ألمانيا، واللى واضح أنها ماشية على نفس نظام وأسعار كلاركس. ضيف على كده أحذية رياضية خامتها Gortex skin بـ 1180 جنيه، لو أى حد محتاج حاجة تستحمل الهلك بجد. المجموعة الحريمى تشمل ماركة نمساوية اسمها HoglوكمانUnisa اللى بـ تصنف نفسها أنها ماركة من الشرق الأوسط، جزء من مجموعة Hogl للأحذية بالكعب شكلها كان عتيق شوية، بس عمومًا ما كانش فيه حاجة ثانية مميزة تشد انتباهنا، ويعوض ده أن كل الموجود شكله كان مريح جدًا. أحذية بكعب من Unisa سعرها حوالى 640 جنيه، وكمان عندهم أحذية فلات -من غير كعب– عليها أزرار شكلها أنيق (520 جنيه)، وصنادل وأحذية بكعوب ضخمة كل مجلات الموضة بـ تنصح بلبسها. ولا واحدة من الأحذية المعروضة تعتبر تحفة فنية، بس كلهم فى نفس الوقت لهم ذوق راقى، مع مواصفات أنيقة وخامات ممتازة. فى الحقيقة، كلاركس قدر يعدى لمستويات ثانية بعيدة خالص عن مستوى القرية الإنجليزية البسيطة اللى شهدت بدايته، ومجموعته من الأحذية قدرت وبمنتهى السرعة تبقى من الماركات العالمية المفضلة، وفى نفس الوقت تناسب شوارع القاهرة.

...

إم. سو: ملابس سيدات تقليدية في مدينة نصر
اصدرت في: 17/01/2013

زيارتنا على فترات متباعدة لمول سيتي سنتر اللي في بداية شارع مكرم عبيد بـ تخلينا نفتكر ليه المكان ده مش بـ يبقى في قائمة الاحتمالات الخاصة بأماكن الخروج والتسوق لما نقرر نخرج حول مدينة نصر. المول برغم فخامته الظاهرة خارجيًا وموقعه الممتاز إلا أنك بمجرد دخولك بـ تحس بجو من الرتابة والكلاسيكية اللي ما تناسبش فكرة أي مول على الإطلاق، تقريبًا المكان ما حصلش فيه أي تجديد أو تطوير من يوم ما فتح، حتى في نوعية المحلات والماركات الموجودة فيه، اللهم بعض المحلات الجديدة اللي دبت فيها بعض الحيوية وأكسبته عدد من الرواد الجدد زي محلات «أور» و«ماكس» و«رافين». بـ نقول المقدمة دي لعلها توصل لإدارة المول ويبدأوا يهتموا شوية بتطويره وتسويقه بالشكل اللي يليق به وإعادته كمنافس قوي على خارطة المولات القاهرية العملاقة.شوفنا محل ملابس حريمي واخد ركن في الدور الثاني على يمين السلالم المتحركة اسمه غريب ومش مفهوم بالنسبة لنا هو محل «إم سو – M.Sou» ورغم كده حبينا ندخل ونشوف شكل الموديلات اللي عارضها بعد ما جذبت انتباهنا بعض قطع في الـﭭاترينة الخارجية، وفعلاً دخلنا المحل الخالي من الزبائن كعادة معظم محلات المول، وبدأنا نتجول بين الأرفف والستاندات الثابتة في وسط المحل، وعجبنا أن العاملات في المحل ما حاولوش يلفوا حولنا أو حتى يقربوا مننا خالص وسابونا نتفرج براحتنا لحد ما نقرر إحنا نستدعيهم. المحل مش كبير لكن المعروضات فيه متنوعة وكثير، هـ نلخصه في كلمتين: ملابس تقليدية للمرأة المصرية، مافيش أي مجال للإبهار أو التميز في «إم سو»، الموضوع مش بـ يخرج عن ملابس وقورة بموديلات كلاسيكية وكثير من ألوان البني والبيج والأسود. لكن في نفس الوقت فيه قصات ظريفة لبعض التونيكات والفساتين اللي تناسب مختلف الأعمار ومع شوية إضافات وإكسسوارات ممكن تعمل أطقم شيك وبسيطة.الأسعار معقولة جدًا، الجينز هنا اللي بقصات واسعة جدًا وخامات ثقيلة مناسب أكثر للبس تحت العبايات والتونيك الطويل، لألوان محددة هي الكحلي والأزرق بسعر 140 جنيه، وفيه كمان جيبات جينز بأسعار قريبة من كده. البلوزات هي أكثر حاجة موجودة في المحل، دي فيه منها أشكال وألوان كثير، بقصات عادية وفيه بعض القطع المتميزة بروح شبابية أكثر، بأسعار من 70 لـ 130 جنيه، وكلمة 50% تخفيض على جميع المعروضات المكتوبة على الزجاج الخارجي للمحل كان لها أثر كويس على أغلب الأسعار اللي داخل المحل، وكان سهل نلاقي أطقم كاملة مكونة من بلوزة وتونيك وجينز وجاكيت كمان بمبلغ يقل عن 500 جنيه. وعجبنا عدد من فساتين النهار المصنوعة من القطن والمطرزة من عند الصدر بحبيبات خشبية دقيقة، وأسعارها كانت 150 جنيه وكانت بالألوان البني والرمادي السادة وفيه بعضها بخطوط طولية ملونة. موديلات زي دي تعتبر مثالية لما تكون بـ تدور على هدية للأمهات المحجبات، فيها شيء من العصرية وفي نفس الوقت محتفظة بوقار وكلاسيكية بـ يفضلها السيدات في السن ده. المنتجات صناعة مصرية وهـ تلاقي على التيكيت عبارة "اشتري المصري" و"أنا مصري" اللي كانت ضمن الحملة اللي تم إطلاقها من سنة فاتت لدعم المصنوعات المحلية. مش هـ نقول أن الخامات والموديلات هنا هي أحسن ما يمكن، لكن بـ نقول أن المحل له تخصصه وله ناسه، وأي واحدة ممكن تدخل المحل وتلاقي حاجة تناسبها لو دورت كويس، وتستفيد بمهرجان التخفيضات اللي المحل عامله دلوقت.

...

جينى لاروش: ملابس حريمى لكل المناسبات فى مدينة نصر
اصدرت في: 26/12/2012

"جينى لاروش - Giny La Roche" محل مكون من ثلاثة أدوار موجود على شارع عباس العقاد المزدحم دائمًا فى مدينة نصر، وبـ يقدم تشكيلة كبيرة من الملابس الحريمى بأسعار معقولة جدًا. سهل قوى أنك تغلطى فى مدخل "جينى لاروش" وتدخلى مدخل العمارة اللى جنبه، بس أول ما توصلى للمحل، أول حاجة هـ تبهرك مدخله العملاق.من الوهلة الأولى هـ تحسى أن الملابس اللى عارضها جينى لاروش موضتها قديمة، بس أول ما تدورى على مهلك وسط الرفوف اللى مالهاش عدد، هـ تلاقى شوية حاجات أكيد هـ تفاجئك. الدور الأول مخصص لمجموعة متنوعة من بنطلونات البدل المناسبة لاستخدامات الشغل، أسعارها تبدأ من 390 جنيه بالنسبة للسادة، والألوان المعتادة زى الرمادى، والأسود والأزرق الغامق. تقدرى تلاقى كمان عبايات مريحة بمجموعة تصميمات وألوان متنوعة سعرها يبدأ من 300 جنيه.وعلشان خلاص الشتاء على الأبواب، بـ يقدم جينى لاروش مجموعة كبيرة من الجاكيتات بألوان كثير زى الرمادى، والأزرق، والبيج، والبنى، والأسود، والنبيتى. أسعار الكوفيات تبدأ من 60 جنيه، وشيلان فرو من 140 جنيه برضه موجودين بوفرة.أكثر حاجة بارزة عند جينى لاروش هى فساتين السهرة. لازم يبقى أول مكان ييجي على بالك لما يبقى عندك مناسبة مفاجئة ومحتاجة تشترى طقم بسرعة علشان تقدرى تلاقي فساتين بأى خامة ولون ممكن تفكرى فيهم. رغم أن فساتينهم مش عظيمة للدرجة وأغلبها فيه مبالغة فى الترتر، والخرز، والأحجار الكريمة الصناعى والزخرفة، بس ممكن تلاقى فستان أو اثنين يشدوا انتباهك. فستان أزرق بدون أكمام بحزام عليه خرز سعره 550 جنيه. أما الفساتين القصيرة فسعرها يبدأ من 375 جنيه.الدور الأرضى بـ يأخذك لقسم الملابس الكاجوال الخاص بالمحل. جيبة مخملية طولها يوصل لكعب الرجل بنقشة جلد فهد سعرها 170 جنيه. جاكيتات بليزر برضه موجودة بأشكال متنوعة وسعرها يبدأ من 325 جنيه، وجاكيت مزين بالفرو سعره بـ 390 جنيه وكمان جاكيت أحمر لامع سعره 380 جنيه. البلوفرات التقليدية تقدر تلاقيها بألوان متنوعة، ويبدأ سعرها من 175 جنيه. بلوزة فضى من الساتان شكلها ردئ سعرها 65 جنيه وتحس أنها معمولة من تجميع بواقى القماش. البائعات ما حاولوش يساعدونا بأى شكل، وده مفهوم نظرًا لمحل حجمه كبير زيه، وده مش بس مفهوم ده كمان مرحب به جدًا. مساحة المحل الكبيرة دى معناها كمان أنك محتاجه وقت طويل علشان تتفرجي بعناية على أرفف الملابس.الدور الثانى هو أهدأ جزء من المحل، وفى وقت زيارتنا، ما كانش فيه أى حد. تقدرى تلاقى مجموعة أنيقة من فساتين السهرة والأفراح. ورغم أن عندهم مجموعة ضخمة تقدرى تختاري منها، بس كل حاجة فيها تفصيلة بسيطة بـ تحسسك بنوع من الرداءة. بس إحقاقًا للحق، ممكن تقابلك شوية فساتين تصميمها بسيط. فستان لونه فضى بترتر طوله واصل للركبة سعره كان 1250 جنيه، وفستان ماكسى بترتر معاه جاكيت بترتر برضه سعره 2200 جنيه، أما أسعار الفساتين الشيفون فـ تبدأ من 450 جنيه.رغم أن جينى لاروش مش بـ يقدم ملابس بأحدث صيحة، بس مش هـ يضرك أنك تأخذى فكرة.

...

لودنج: بيع وصيانة وتحديث البلاي ستيشن في مدينة نصر
اصدرت في: 01/12/2012

سوق جديد للإلكترونيات في الدور الأرضي في السراج سيتي مول في مدينة نصر، موبايل وكمبيوتر ومستلزماته وأجهزة ألعاب زي البلاي ستيشن والإكس بوكس والـ Wii. المكان بقى وجهة ناس كثير من زبائن التكنولوجيا، وممكن نشبهه بشارع عبد العزيز في العتبة شوية، لكن الفرق أن هنا المستوى أرقى حبتين، والمول المقفول برضه أحسن من الشارع، لكن في نفس الوقت الأسعار هي هي، وممكن دائمًا تفاصل وتوصل لسعر أحسن، وأنت وشطارتك.بـ نتكلم في المقال ده عن محل محدد بـ يقدم خدمة محددة داخل المول، لكن في نفس الوقت لازم نقول أن المحل ده مش متميز أو فريد بأي شكل بالنسبة لباقي المحلات اللي بـ تقدم نفس الخدمة في نفس المول، وأننا بـ نحكي عن تجربتنا معاه اللي متأكدين أنها كانت هـ تبقى هي هي لو كانت مع أي محل بـ يعمل خدمات في مجال الألعاب وأجهزتها. لأن في المولات والشوارع والممرات التجارية بـ تبقى الخدمة متشابهة بنسبة 90 % والفرق في الأسعار بـ يبقى طفيف أو مش موجود أصلًا، والموضوع كله بـ يرجع للراحة النفسية للزبون ومدى تفضيله لمكان دون الآخر، أو ممكن بـ يبقى الذهاب لشخص بعينه بـ يبقى بسبب السمعة أو الخبرات السابقة أو ترشيحات المعارف والأصدقاء. في النهاية إحنا عاوزين نقول أننا هنا بـ نتكلم عن الفكرة ونوع الخدمة مش عن محل بعينه.محل «لودنج» واحد من عشرات المحلات اللي بـ تبيع أجهزة بلاي ستيشن 2 و3 وأجهزة XBOX وغيرها من Consoles الألعاب. الأسعار هي العادية بالنسبة لأي محل في المول أو في شارع عبد العزيز، مثلًا بلاي ستيشن 3 بهارد ديسك داخلي 320 جيجا بـ 1900 جنيه، والـ 240 جيجا بـ 1750 جنيه وهكذا، لكن الفكرة أنه بـ يعمل التعديل الخاص بالأجهزة علشان تقدر تلعب عليها بالألعاب اللي بـ تحملها على الهارد ديسك الخاص بالجهاز وما تحتاجش تشتري الأسطوانات الأصلية للعبة أو الـ Blu-ray بأسعار خيالية بـ توصل لـ 550 جنيه للعبة الواحدة. بعيد عن موضوع ده قانوني أو لأ، الفكرة أنهم هنا محترفين في الموضوع ده، وبـ يعملوا نوعين من التعديل، تعديل software بمبلغ 150 جنيه وده بـ يتم من خلاله تحميل تحديث معين خاص بنظام التشغيل على بلاي ستيشن 3 وبعد كده تقدر تشغل كل الألعاب الحديثة لحد السنة اللي عملت فيها التعديل، بس بشرط أنك ما تدخلش باللعبة أونلاين علشان الجهاز ما يقومش بتحديث نظام التشغيل تلقائي وفي الحالة دي هـ يتم إفساد مفعول "التعديلة" اللي بـ 150 جنيه. وفيه تعديل ثاني Hardware (350 جنيه) بـ يتم من خلاله زرع شريحة معينة داخل الجهاز لتشغيل الألعاب، وده بـ يتعمل في حالة أن الجهاز يكون مُعدل قبل كده أو دخل عمل تحديث من الإنترنت زي ما قولنا، وهنا بـ يبقى لازم العملية الجراحية دي تتم وتُزرع الشريحة داخل الجهاز. مع كل تعديل من النوعين ممكن تأخذ 5 ألعاب هدية، في حين أن المحل بـ يبيع الألعاب بشكل منفصل بأسعار من 10 لـ 50 جنيه حسب حداثة اللعبة. ودي بـ يتم تحميلها على الجهاز أو تجيب له هارد ديسك خارجي يملاه على الآخر لو حبيت. الموضوع لا يخلو من المجازفة، وفيه احتمالات أن أثناء عملية التعديل يتم مسح ملفات معينة أو لا قدر الله الجهاز يبوظ خالص، لكن ده ما حصلش معانا في تجربتنا هناك، بس كنا عاملين احتياطتنا وعاملين Backup لكل حاجة مهمة على جهاز الـ PS3 الخاص بنا. وفعلًا خلال 4 ساعات اللي سيبنا فيها الجهاز هناك رجعنا ولقينا التعديل اتعمل، لكن اكتشفنا أن بعض الألعاب اللي أخذناها كانت مش شغالة، بس رجعنا وطلبنا تحميلها مرة ثانية وصاحب المكان ما كانش عنده مانع أنه يضبط لنا أي حاجة مش مضبوطة. تجربتنا في «لودنج» كانت عملية وسريعة وفعالة، وبـ نفكركم مرة ثانية أن المحلات هناك متشابهة في كل حاجة، شطارتك بس في أنك تعرف توصل لأحسن سعر وأسرع وقت تخلص فيه مهمتك.

...

لو فوال: كل أنواع الإيشاربات اللى بـ تدورى عليها فى مدينة نصر
اصدرت في: 17/10/2012

الإيشاربات، زيها زى أى إكسسوارات تقدر تحلي أو تبوظ شكل أى لبس. وعلشان كده لازم تبقى مركزة قوى وأنتى بـ تختارى حاجة منهم. «لو فوال – Le Voile» فى شارع عزت سلامة فى مدينة نصر المتفرع من شارع عباس العقاد بـ يقدم مجموعة ممتازة من الإيشاربات اللى أكيد هـ تناسب كل لبسك."لو فوال" عبارة عن محل صغير عنده مخزون من الإيشاربات الملونة بتصميمات وستايلات مختلفة. مهما كانت الحاجة اللى بـ تدوري عليها أكيد هـ تقابلك فى محل "لو فوال" الصغير. الإيشاربات مقسمة على حسب اللون، وده بـ يساعد الزبائن أنهم يلاقوا طلبهم بسهولة. رغم كده، الحاجات اللى عليها تخفيض مش منظمة بنفس الطريقة، وده بـ يصعب فرصة أنك تلاقى إيشارب رخيص باللون اللى أنت عاوزاه.من الحاجات اللى لفتت نظرنا أن البائعات معظم الوقت كانوا بـ يتكلموا فى التليفون. ومع أن ده ممكن يعمل دوشة في المحل الصغير، ده كمان معناه أنك تقدري تعتمدي على نفسك، وتنقى براحتك الإيشاربات اللى تعجبك وسط أقل إزعاج ممكن."لو فوال" بـ يقدم إيشاربات بخامات مختلفة زى الشيفون، والقطن والساتان. ومن ناحية الأسعار إيشاربات "لو فوال" تعتبر معقولة جدًا. هم مش الأحسن فى المدينة بس بـ يقدموا أحسن حاجة بالنسبة للسعر. معظم الإيشاربات اللى شدت انتباهنا كانت قريبة من 40 جنيه وكام حاجة بس عدوا الـ 50 جنيه.إيشارب منقط لونه وردى سعره 40 جنيه فى حين أن إيشارب تركواز مقلمة كان سعرها 35 جنيه. إيشارب ثاني فيه دوائر موجودة بكميات كبيرة وبتشكيلة من الألوان والمقاسات.كمان تقدرى تلاقى إكسسوارات ثانية عند "لو فوال". أشكال وألوان من الباندانات موجودة بحوالى 5 جنيه. "لو فوال" كمان بـ يقدم أكمام طويلة منفصلة، وأساور وعقود. ورغم أن مجموعة الإكسسوارات شكلها مش قد كده، بس مش هـ تخسرى حاجة لو اتفرجتى.سكارفات مربعة بشراشيب بـ تتلبس عادة حول الرقبة على شكل مثلث برضه موجودة بمتوسط سعر حوالى 35 جنيه.يمكن "لو فوال" مش أحسن محل إيشاربات وطرح فى مصر، بس كفاية نقول أن ده أول مكان نروح له لما نحتاج سكارف تليق مع ملابس جديدة.

...

ركن الحفلات: محل مستلزمات المناسبات السعيدة فى مدينة نصر
اصدرت في: 08/10/2012

يافطة ألوانها متنوعة ومبهجة مكونة من كلمتين بـ تطل على شارع حيوى فى مدينة نصر.. شارع الطيران، أكيد شدت ناس كثير ماشيين أو سايقين وخاصة أكيد اللى عندهم أى مناسبة حلوة أثار فضولهم عنوان «ركن الحفلات».هو صحيح اسم المحل "ركن" لكنه محل مساحته كويسة ومش ضيق، متخصص فى بيع كل الحاجات اللى لازم تبقى موجودة فى أى مناسبة سعيدة، مهما كان نوع المناسبة ودي مش مبالغة دي حقيقة، أول ما تقرب من واجهة المحل هـ تلاقى أعمدة الصواريخ اللى بـ تفرقع ورق محطوطة جنب بعض، وزى ما هى مختلفة فى الطول يعنى هـ تلاقى اللى قد ذراعك وصواريخ ممكن توصل لنصف جسمك، هى كمان مختلفة فى الحاجات اللى بـ تطلعها لما تفرقع يعنى هـ تلاقى الصواريخ الحمراء اللى تنفع مناسبات زى الخطوبة والفلانتين ودي بـ تطلع ورق أحمر على شكل قلوب وسعرها 17 جنيه، وصواريخ بـ تطلع ورق ملون وجليتر تنفع أعياد الميلاد وسعرها 15 جنيه، وصواريخ بـ تطلع ورق دولارات وسعرها 18 جنيه. وجنب الصواريخ الورقية هـ تلاقى الألعاب النارية اللى بـ تستخدم فى أى مناسبة معمولة فى مكان مفتوح وبـ تبقى داخل علبة مستطيلة وسعرها 168 جنيه، وممكن السعر يقل حسب الخامة وعدد الألعاب النارية، وفيه الصواريخ اللى بـ تتحط فى تورتة أعياد الميلاد وبـ تتراوح أسعارها حسب عددها من 5 لـ 10 جنيه.الشموع قصة ثانية، هـ تلاقى الشموع على هيئة الحروف الإنجليزية وده للناس اللى مش بـ تحب تحط أعمارها وسعرها 3.75 جنيه، وشموع الأرقام كل الأرقام كانت متوفرة وجنبها أشكال والت ديزنى مينى وميكى ودونالد دك ودي سعرها 7 جنيه، وشموع أرقام واخدة شكل سبونج بوب سعرها 8 جنيه. وبذكر الشموع تيجى إكسسوارات أطباق الحفلات، يعنى فيه العيدان الخشبية للمشويات وسعرها 3 جنيه، وفيه العيدان الخشبية الصغيرة اللى واخدة شكل شمسية وتتحط فى كاسات الآيس كريم أو العصائر وسعرها 6 جنيه للدستة، وكمان فيه أطباق الفويل والبلاستيك لزوم الحفلات ومجسمات صغيرة مكتوب عليها عيد ميلاد سعيد بالإنجليزى، وشنط هدايا.بالنسبة للحفلات التنكرية هـ تلاقى أقنعة تنكرية كاملة لوجوه الأطفال واخدة أشكال والت ديزنى ونمور وأراجوز وسبايدر مان وسبونج بوب وسعرها 5 جنيه، وأقنعة تنكرية للكبار واخدة ألوان ميتالك سعرها 20: 30 جنيه بـ تغطى منطقة العيون والجبهة والأنف، وبرضه من أدوات التنكر هـ تلاقى شنب رجالى الواحد بـ 3 جنيه، وألوانه وأطواله مختلفة الأسود والرمادى الشايب والبنى والأشقر. فوق الأقنعة التنكرية هـ تلاقى أكياس البالون معلقة على 4 صفوف فوق بعض: صف للبالون اللى بـ 34 جنيه وفيها أشكال البالون المدور والقلوب والبالون الطويل جنبها على طول منفاخ البالون الصغير بـ 8 جنيه، وأكياس البالون الميتالك اللى تنفع مناسبات زى الخطوبة وأعياد الزواج وسعرها بـ يبدأ من 65 ألوانها الفضى والذهبى والأبيض والموف والبمبي، كمان محل ركن الحفلات هـ يوفر قريبًا خدمة نفخ البالون وتركيبه فى الكوشة، التركيب هـ يبدأ من أول 150 لأن لكل كوشة تصميم مختلف. طبعًا مش دي بس الحاجات اللى موجودة فى ركن الحفلات، يعنى أكيد فى كل زيارة الواحد هـ يكتشف حاجات جديدة خاصة أن كل ركن داخل المحل مليان حاجات كثيرة.

...

هوت برايس: ملابس مناسبة لكل أفراد العائلة فى مدينة نصر
اصدرت في: 31/05/2012

بالرغم من أن شوارع القاهرة فيها أماكن تسوق كثير بـ تزيد يوم بعد يوم، لكن بـ تبقى حاجة مثيرة أنك تكتشف محل لسه فاتح جديد، خصوصًا لما يكون فى شارع معروف ومزدحم بالحركة زى شارع عباس العقاد. «هوت برايس – Hot Price» محل أكيد هـ يعجبك، المكان عبارة عن دورين وعنده تشكيلة كبيرة من الملابس لكل أفراد العائلة وبأسعار مناسبة. فى الدور الأول هـ نلاقى الأحذية وملابس الأطفال، نبدأ بحذاء باليرينا كله لون واحد بيج أو أبيض (55 جنيه لكل لون) كمان هـ نلاقى باليرينا من غير كعب لونها بنى غامق (64 جنيه) وصنادل بكعب عالى (95 جنيه) ودي كانت بارزة عن باقى الأحذية والصنادل بتصميماتها اللى تخطف العين. أما فى قسم ملابس الأطفال، تقدر تلاقى ملابس من سن الرضاعة لحد 10 سنين، ودائمًا هـ تلاقى مساعدة مفيدة علشان ترشدك للمقاس المناسب من بين صفوف الفساتين اللطيفة، وسالوبيتات للأطفال اللى عليها تصميمات على شكل ورود أو قماشها مطرز، بالرغم أنك ممكن تلاقى أخطاء إملائية لو عليها كتابة. سالوبيت وردى نص كم مقاسه صفر (20 جنيه) موجود برضه بألوان ثانية وكان مقاسه وجودته كويسين رغم أن خامته من القطن الثقيل. كمان بيجامة قطعتين لطفل عنده سنه واحدة سعرها حوالى 45 جنيه، فى حين أن فيه بنطلونات جينز للأطفال الأكبر سنًا شوية يبدأ تقريبًا من 115 جنيه. بعديها طلعنا الدور الثانى، لاقينا الملابس الحريمى وشوفنا جاكيت بدون أكمام خامته صوف مع بوليستر خفيف (95 جنيه) وأشكال ثانية فيها خياطة (45 جنيه) بألوان ترابية زى البيج والرمادى المخضر. قسم الملابس اليومية كمان فيه جيبات طويلة عليها طباعة على الأطراف، مصنوعة من خامات مناسبة لفصل الصيف وسعرها حوالى 60 جنيه. قسم ملابس البيت والبيجامات الحريمى بـ يتكون معظمه من أطقم قطعتين وحاجات بسيطة بـ يكون البنطلون لوحده والتوب لوحده، ورغم كده هـ نلاقى حاجة أو اثنين حلوين زى توب أزرق سماوى ومعاه بنطلون أسود مريح (85 جنيه). قسم الرجالى يعتبر أهدأ قسم والمعروضات فيه تقريبًا متشابهة شكله زى دولاب مُعلق فيه تي شيرتات على بنطلونات وشورتات تقريبًا شبه بعض. الحاجة الوحيدة اللى كسرت حالة الملل كانت صديرى ستايل الثمانينات لونه موف فاقع (85 جنيه) مُعلق أمام التي شيرتات البولو (85 جنيه) ودي عندهم بكل ألوانها، بالإضافة لشورتات صيفى شيك بألوان مختلفة (50 جنيه). هوت برايس بـ يعرض ملابس رجالى وحريمى وأطفال مريحة بأسعار معقولة، ده بالإضافة لأحذية شيك للكل، ولازم نقول لك أنك محتاج تدور كويس وسط الملابس الموجودة علشان توصل للى تقدر تقول عليه صفقة كسبانة.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول