هدايا تسوق in مدينة نصر Cairo, Egypt

تسوق

ليزر وورلد: رسم بالليزر على كل الخامات في جنينة مول
اصدرت في: 18/01/2012

بـ نشوف كثير مطبوعات ورسومات بالليزر في كل حتة وبـ نبقى مش عارفين دي بـ تتعمل فين أو بـ تُباع منين، خاصة لو النقش كان جيد أو على خامات صعبة زي الزجاج والكريستال. اكتشفنا ركن صغير كده (ما ينفعش نقول عليه محل) اسمه «ليزر وورلد – Laser World» موجود في الدور الثالث في جنينة مول في مدينة نصر، هو عبارة عن كاونتر خشبي عليه كمبيوتر وسكانر ومعدات طباعة وحفر بالليزر وشوية أجهزة كده مش عارفين بـ تعمل إيه، وخلف الكاونتر ده بـ يقعد الموظف المتخصص "اللي إحنا شايفينه فنان فعلًا" وعلى الجدار الخلفي فيه زي فاترينة بـ تعرض عينات من الأعمال المرسوم عليها من الزجاج والخشب والمخدات والقلادات والبراويز. كل اللي بـ تعمله أنك بـ تعطيهم الصورة المطلوب نسخها على فلاش ميموري أو سي دي (في الأغلب بـ تبقى صورة شخصية) أو بـ تكتب على ورقة اسم باللغة العربية أو الإنجليزية (علشان ما يغلطوش في الإملاء) وتحدد التصميم اللي أنت عاوزه للكتابة من النماذج اللي بـ تعرض عليك، وبـ تنتظر 15 دقيقة فقط لحد ما يتم النسخ وتستلمها وتمشي. النقش على العُليقات الستانلس الفضية بـ يبقى بـ 40 جنيه لو وجه واحد، و60 جنيه لو وجهين، وبـ تأخذ معاه سلسلة ستانلس برضه لحد ما تشتري سلسلة فضة حقيقية أو ممكن تعلقها في ميدالية المفاتيح. النقش على الخشب بـ 80 جنيه على القطع الصغير (حوالي 10 سم x 20 سم)، وبـ 120 جنيه للقطع الكبير (20 سم x 30 سم). المفاجأة بالنسبة لنا لما عرفنا أسعار النقش على الأطباق الكريستال "اللي هي أكيد مش كريستال أصلي" وأحجامها أكبر من كف اليد بحاجة بسيطة، بـ تبدأ من 250 جنيه وبـ توصل لـ 550 جنيه، غالية جدًا! والحفر بـ يظهر باللون الرصاصي الفاتح على الخلفية الشفافة، وكان معروض بعض نماذج لعينات من دروع المسابقات والهدايا التذكارية والكؤوس الزجاجية المنقوش عليها، شكلها حلو ومعمولة بحرفية عالية، لكن ده لا يبرر السعر المبالغ فيه للحجم الأكبر منها وهو 550 جنيه. فيه رسم على القماش (خاصة المخدات) والأقلام الخشبية والمجات والأكواب ويمكن يكون فيه خامات ثانية ما خطرتش في بالك لكن لو رحت هناك هـ تلاقي عينات كثيرة وخامات مختلفة. «ليزر وورلد» أو عالم الليزر بـ يفتح لنا مجال أوسع لاختيار وتصيم هدايا مميزة وخاصة جدًا، ووجب علينا ننقل لكم تجربتنا هناك، ونعرف اللي مش عارف "زينا كده" المطبوعات دي بـ تتعمل فين.

...

سي موا: هدايا بأسعار معقولة في جنينة مول بمدينة نصر
اصدرت في: 16/01/2012

القاهرة فيها غزو محلات هدايا في كل مول، وعنصر الجذب الذكى هنا مش مجرد بالونات هيليوم وبس، في جنينة مول نجح محل «سي موا – C’est Moi» فى أنه يحقق ده بفرعين موجودين فى المول ومدججين بكل أنواع الهدايا بداية من مجات "سبونج بوب" لحد تشكيلات الكريستال النقى. فرع المحل الموجود فى الدور الرابع ما يستحملش يدخل فيه غير 3 أشخاص فقط، علشان كده كان شيء جميل جدًا أن كل الأصناف اللى بالداخل معروضة في الفاترينة، أول حاجة خطفت نظرنا كانت تشكيلة "سي موا" من ستيكر ولوحات السيارات اللى كان سعرها 15 جنيه ومكتوب عليها كلام منه المضحك ومنه الرومانسي. كان فيه ستاند كمان عليه ساعات يد بلاستيك سعرها حوالى 40 جنيه، وكان فيه كمان ساعات يد تقليد لاكوست Lacoste بس ما كانتش مميزة قوي بـ تبدأ من 60 جنيه محطوطة جنب تماثيل كريستال عصفور اللى ما تلاقيهوش عادة فى محلات الهدايا التقليدية. أحجامهم وأسعارهم متباينة ممكن توصل لـ 250 جنيه لمركب حجمها متوسط، بينما قطار له 4 عربات هـ يكلفك 450 جنيه. فيه كمان وردة كريستال (250 جنيه) وداخلها ساعة تتحط على المكتب متوفرة باللونين البمبي والأزرق. مش هـ تكون مبالغة مننا لو قلنا أن المعروضات من الأرض للسقف هناك، حتى أن وسط المحل فيه ستاندات على شكل مكعبات محطوط عليها إيشاربات بأشكال مختلفة بـ 35 جنيه الواحد. كمان المحل فيه ماركة ماكياج صينية أسعارها معقولة اسمها "أوشاز - Ushas" بسعر 10 جنيه لأحمر الخدود ومحدد العينين (الآيلاينر) للواحدة. "سي موا" مليان كمان أفكار للهدايا المرتبطة بديكور البيت تقليدية ولكن على الرغم من كده عملية. على بُعد كام خطوة من الستاند خلى بالك أحسن تخبط واحدة من الفازات الأرابيسك الخشب (216 جنيه) واللي عليها كتابات بالخط العربي. فيه كمان أرفف منخفضة عليها شموع وتماثيل على شكل قلب (100 جنيه) ومجات من السيراميك، والمَحافظ وشنط بـ تتحط على الكتف (25 جنيه). "سي موا" هـ يخلى دماغك تلف من أول مرة هـ تشوفه، المحل الصغير ده هـ تلاقيه عارض هدايا كثيرة جدًا مالهاش أى علاقة ببعضها مش هـ تقدر تستوعبها كلها من أول مرة. حتى أن واجهة المحل معروض فيها سناكس وبارات من الحلوى، جودة المعروضات مش جامدة قوي بالنسبة لمحلات ثانية فى القاهرة، ولكن "سي موا" عنده اختيارات كثيرة ممكن تنتقى منها.

...

آخر العنقود: هدايا بأسعار منافسة في جنينة مول
اصدرت في: 05/01/2012

مفهوم البضاعة اللُقطة هي أنك تلاقي أعلى جودة بأقل سعر، ودي مهمة مش سهلة في مصر بشكل عام. علشان كده محل زي «آخر العنقود» في جنينة مول هـ تلاقيه دائمًا مليان على آخره وكل زبون بـ يدور على "لُقطته". المحل ده مافيش حاجة مش بـ يبيعها! بعيدًا عن الملابس هـ تلاقي كل حاجة من توكات الشعر للأدوات المكتبية للديكورات، ودور كامل للملابس الداخلية للسيدات والأجهزة المنزلية. «آخر العنقود» فيه أقسام كثير لحاجات مالهاش علاقة ببعض، وتفاصيله كثير وصعب تتفرج على كل حاجة في المحل في يوم واحد. لكن العامل المشترك في كل المعروضات دي أن أسعارها مهاودة جدًا. الجزء الأول من المحل المكون من دورين مخصص لإكسسوارات الشعر وفيه عشرات الصناديق مليانة بتوكات وبنس الشعر أشكال وألوان بأسعار بـ تبدأ من 3 جنيه. فيه مجموعة من لعب الأطفال البلاستيكية بس باين عليهم خامتهم نص نص، وفيه شخصيات الكارتون المعروفة وعربيات سباق وملابس أطفال وألعاب تعليمية زي بازل الحروف الأبجدية (15 جنيه) وكتب الأطفال (3 جنيه). الأرفف المحيطة عليها كريم شعر وشامبو من ماركات معروفة بأسعار ما تختلفش كثير عن أسعار الصيدليات والأماكن الثانية. وفيه أنواع مغمورة من المكياج لكن بأسعار مغرية (8 جنيه أنبوبة مسكارا) لكن طبعًا مش متأكدين من الجودة. ممكن تجيب كل ألوان المانيكير من هناك بسعر 3 جنيه للعبوة! وفيه قسم للعطور بأسعار بـ تتراوح بين 80 جنيه وأقل أو أكثر، وفيه عبوات للتجربة. الدور العلوي فيه تشكيلة من الصدريات الرياضية المصنوعة من القطن (15 جنيه) وجوارب حريمي بأطوال وخامات مختلفة (3.5 جنيه) والدور ده عمومًا أوسع ومريح أكثر في الحركة وهـ تشعر خصوصية أكبر في اللف والتدوير. فيه مجموعة من الأكواب والمجَّات السيراميك بسعر 12 جنيه للواحد، وعدد من التابلوهات واللوحات الزيتية منها المنقوش عليه آيات قرآنية ورسوم فرعونية وأسعارها بـ تبقى ما بين 25 جنيه لـ 150 جنيه حسب الحجم. لو كنت في جنينة مول لازم تلقي نظرة على «آخر العنقود»، لازم تطلع منه بشوية حاجات ع الماشي حتى لو ما كنتش ناوي تشتري حاجة، لكن الأسعار هـ تخليك تشتري. وما ينفعش نقول لك روح اشتري حاجة معينة من هناك، لكن غالبًا كل اللي هـ تفكر فيه هـ تلاقيه.

...

كاكادو: محل هدايا رخيص ومبتكر في مدينة نصر
اصدرت في: 05/04/2011

دلوقتي الهدايا الصيني مغرقة الأسواق وأغلبها بـ يبقى ذوقه شبه جودته، والإتنين متدنيين. والبدائل في محلات زي «كاو – Cow» و«توب تويز – Top Toys» مثلاً بـ تبقى غالية ومقتصرة على الهدايا الرمزية، دبدوب، وقلب وحاجات مش عملية. أما « كاكادو – Kakado» ففيه الصيني الخفيف على الجيب، بجودة متوسطة لمرتفعة وأسعار ممتازة. المحل مساحته هايلة، ومن بعيد لان الواجهة مش باين منها إلا أباجورات هـ تفتكره محل إضاءة أو إكسسوار منزلي. وده اللي كنا فاكرينه لغاية ما فوجيئنا بالهدايا العظيمة اللي جواه. المحل فيه أباجورات وبراويز وساعات حائط وشمع رائع الجمال وڤازات وطابلوهات...وحاجات تانية كتير. اللي بـ يخلي المكان ده مختلف عن غيره والمكان اللي احنا شخصياً هـ نروحله لما نحتاج نجيب هدية لحد، هو ان الذوق العام لكل منتج عنده عالي، وواضح ان صاحب المحل بـ يختار كل قطعة بعناية وده اللي أكدهلنا لما كنا هناك، المحل كل اللي فيه هـ تحب تقتنيه أو تهادي به حد. وأكيد لما بـ يكون "صديق للميزانية" (على وزن صديق للبيئة) بـ تكون حاجة حلوة جداً. من الصفات المميزة للمكان برضه، انه فيه حاجة لكل الناس.ففيه براويز شبابي وعلبة للإكسسوار خشب عليها شخصيات زي «هانا مونتانا – Hannah Monatana» اللي بـ يحبوها الشباب الصغير، ده غير ساعات الحائط المبتكرة والطابلوهات الشيك اللي هـ تنفع الكبار. لفت انتباهنا اباجورة طويلة من البامبو عبارة عن عامود بامبو وفي آخره غطا الأباجورة نفس البامبو الغامق الرفيع المضفور الجميل (فوق الـ800 جنيه). وكان فيه اباجورات تانية ما بين المودرن والستيل، وكام واحدة من التصميمات اللي بـ تحسها مودرن صيني من اللي بـ يبقى ذوقه غريب مالهوش طعم. كان في كمان المصابيح التقليدية الأوروبية بأحجام وألوان مختلفة (اسعارها ما بين 280 و120)، ودي فكرة رائعة لإضاءة مبتكرة وشكلها أنتيكة وغير معتاد. قطعة ممتازة تانية كانت ساعة حائط عاملة زي اللي بـ يبقوا في الميادين على عواميد، وبـ تلف 360 درجة وليها وشين فبالتالي ممكن تـ تشاف من ناحييتين (وصفها صعب لكن شكلها رائع وبـ195 جنيه). وكان في براويز عبارة عن مستطيلات متصلة بشكل عشوائي منها اللي بالطول واللي بالعرض وبـ20 – 45 جنيه وبأحجام مختلفة. (ودي للأسف ماكانتش جودتها في نفس مستوى فكرتها وشكلها). تشكيلة الشمع كانت إستثنائية وبأسعار وهمية. شمع عملاق وباقل من 100 جنيه، وعملاق هنا معناها يوزن كام كيلو وشكله تحفة. واحدة من الشمع كانت عبارة عن عامود مفرغ طوله حوالي 35 سم وقطره 10 سم وجواه شمعة طويلة وباقل من 50 جنيه. كان فيه كمان ڤازات كبيرة جميلة بأشكال مودرن (نفس اللون لأكتر من حجم وشكل بـ يعملوا طقم لذيذ) في منتهى الشياكة وأسعارهم من 40 لـ100 جنيه. «كاكادو» ماكانش ناقصه حاجة واسعاره ممتازة والخدمة فيه هايلة واكيد بـ نشجعك تروحوه لو عاوز تدي حد هدية جميلة ومميزة.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن