القاهرة الجديدة تسوق in Cairo, Egypt

تسوق

هنكمولر: إعادة Branding وافتتاح لماركة اللانجيري فى كايرو فيستيفال سيتي
اصدرت في: 09/05/2015

أول ظهور لـ هنكمولر - Hunkmoller –أو Bodique وقتها- كان في سيتي ستارز مول من كام سنة فاتوا. بعد التغيير للاسم الجديد فتحوا أحدث فروعهم في واحد من أكبر مولات التسوق –وهو كايرو فيستيفال سيتي- كمحاولة للحفاظ على مكانته وسط مجموعة كبيرة من ماركات اللانجيري الموجودة في مصر. وبما أن مساحة المحل مش كبيرة فمن السهل جدًا أنك تتفرج على المعروضات في جولة واحدة سريعة، استقبلنا اثنين من مسئولي البيع بابتسامة لطيفة، وكلمونا عن عملية الـ Rebranding اللي مرت بها الماركة، بعدها أخذنا جولتنا في المكان مع استعدادهم التام لمساعدتنا وقت ما نحب. أول مجموعة لفتت نظرنا كانت للملابس الرياضية، واللي كانت بـ تضم قطع أي واحدة غاوية جيم هـ تحتاجها؛ من ضمن المجموعة دي Sport bra أسود في وردي (495 جنيه)، بنطلون يوجا لونه أسود (236 جنيه) أما الجاكيت اللي بـ يليق عليه فسعره (375 جنيه). المجموعة المعروضة الخاصة بالمايوهات -واللي كانت مكونة من مايوهات بيكيني فقط- فنعترف أننا ما حبيناهاش، لأن تفاصيلهم كانت كثيرة والشغل فيهم كان زيادة. زي بيكيني لونه وردي فاقع عليه مجموعة من القطع المعدنية، سعر القطعة العلوية (235 جنيه) أما السفلية (150 جنيه). ما اختلفتش الكاش مايوهات عن المايوهات بـ تفاصيلها ونقشتها الغريبة، من ضمنهم واحد عليه مجموعة من النقشات الهندسية المكونة من الألوان: الأحمر، الأزرق والأبيض (395 جنيه). استغربنا أن المعروضات من اللانجيري معظمها غير عملية بالمرة ومش للاستخدام اليومي، لأن الألوان المستخدم فيها صارخة وكمية الدانتيل فيها رهيبة، لفت نظرنا حمالة صدر Bra لونها بنفسجي وعلى أطرافها دانتيل باللون الأسود (315 جنيه)، ومن ضمن العروض اللي كانت موجودة وقت زيارتنا هو أنك تأخذي 3 قطع ملابس داخلية بسعر اثنين (72 جنيه للواحد). بعكس دوشة موديلات المايوهات واللانجيري، مجموعة البيجامات وملابس النوم تميزت ببساطتها، من ضمنهم بيجاما التوب لونه برتقالي وأبيض (181 جنيه)، ومعاه الشورت بسعر (264 جنيه). بالرغم من أن الأذواق المعروضة –خصوصًا في اللانجيري والمايوهات- محتاجة جرأة، وخصوصًا أنها مش للاستخدام اليومي؛ ولكن الملابس الرياضية، بالرغم من قلتها، إلا أنها عملية ومناسبة، ده غير أن القائمين على الخدمة ممتازين، وبـ يتعاملوا بمنتهى المهنية.

...

دار الشروق: سلسلة المكتبات المحبوبة وصلت كايرو فيستيفال سيتي مول
اصدرت في: 10/04/2015

أعتقد أن رأي الناس في عدد مولات القاهرة المتزايدة يوم بعد يوم بـ يختلف، والسبب أن المحلات والكافيهات بـ يسيطروا عليهم، لكن الأكيد من الصعب أنك تلاقي مكتبة منظمة وسط المولات الزحمة، ومن هنا كانت مفاجئة هائلة أننا نلاقي أجدد فروع دار الشروق في المول المتوسِّع بـ شكل مستمر كايرو فيستيفال سيتي. مع شعارهم الشهير باللون الأخضر الغامق، سهل تلاقي مكان الدار. المكان إضائته قوية بأرفف مرتبة كويس بـ تسهّل الفرجة على الكتب المعروضة. على اليمين، شوفنا عرض "أكثر الكتب مبيعًا" وفيه عناوين كتب شبابية معروفة منها If I Stay بـ (88 جنيه)، مع كتب من الكلاسيكيات المحبوبة زي Animal Farm بـ (80 جنيه) وكمان كتب تنمية بشرية منها كتب شهيرة زي الرجال من المريخ، النساء من الزهرة Men Are from Mars, Women Are from Venus بـ (105 جنيه). جنبهم على طول معروض أكثر الكتب العربية مبيعًا بأعمال حديثة زي يوتوبيا (25 جنيه) مع أعمال نجيب محفوظ الرائعة منوّرة العرض. كل أرفف العرض مترتبة بوضوح وكل قسم فيهم بـ يضم نوع معين من الكتب ومكتوب عليه التصنيف: أدب، أدب مترجم، سياسة، تاريخ، أطفال، شباب، كتابات إسلامية، مصريات، تجارة وتنمية بشرية كانت أبرز الأقسام هناك، وكمان - وقت زيارتنا - قسم "أحدث الإصدارات" كان بـ يقدم عدد من الإصدارات الصحفية الجديدة، منها أجدد كتب أحمد العسيلي "نص كتاب" بسعر 28 جنيه. جنب الكاشير على طول معروض 'Thinking Gift' ملفتة للانتباه، وتنفع كهدية مبتكرة لمحبي الكتب. مفكرات وستيكي نوتس على شكل دوناتس، ساندويتشات وقواعد تواليت (48 جنيه)، حامل كتب قوي (234 جنيه)، أباجورات قراءة (130 جنيه) وعلامات كتب معدنية بأشكال قطط وكلاب (60 جنيه) كانت من ضمن الحاجات اللي لفتت انتباهنا. الموظفين سابونا نتفرج براحتنا من غير مقاطعة، لكن أول ما كنا بـ نستفسر عن سعر أو وجود حاجة معينة، بـ يجاوبوا بكل تعاون. تلخيص الحكاية، أحدث فروع دار الشروق يعتبر إضافة ممتازة لمشهد التسوق في القاهرة الجديدة، واللي بـ يغلب عليه ماركات الملابس العالمية والمطاعم الكبيرة. مساحة المحل الصغيرة وتنظيم المعروضات الهائل قدر يقدم تجربة تسوق سريعة ومريحة من غير تضييع ساعات وسط الأرفف. طبعًا مش معنى كلامي أنك مش ممكن تقعد بالساعات هناك تائه وسط الكتب ورائحتها الأخاذة، ده لو كان لك في النوع ده من التسوق طبعًا.

...

ريسيرفد: ماركة الملابس الأنيقة تفتتح أول فروعها في مصر داخل كايرو فيستيفال سيتي
اصدرت في: 07/03/2015

المنافسة الحاصلة وسط مشهد الأزياء المصري قوية جدًا، وسط عدد كبير من المولات والماركات الأجنبية اللي بـ تجتاح البلد، من الصعب أنك تلاقي ملابس تجمع بين السعر المعقولة والجودة المناسبة. لحسن الحظ، اسم شهير في عالم الأزياء هو "ريسيرفد - Reserved" افتتح أول فروعه في الشرق الأوسط في كايرو فيستيفال سيتي مول، مافيش كلام أنك من الصعب تجذب عشاق الموضة القاهريين في ظل وجود أسماء مشهورة، لكن مع تقديم ملابس أنيقة بأسعار مناسبة، ريسيرفد عنده القدرة على التواجد. ريسيرفد بـ يعرض ملابس للرجال، السيدات والأطفال، تشمل ملابس داخلية، ملابس كاجوال وسهرة، وملابس رسمية/ سمارت كاجوال، بالإضافة لأحذية، وكل ده تحت سقف واحد. وسط ديكورات المحل الأنيقة بألوان الأسود والأبيض، المحل يتميز بروح عصرية جذابة. من وقت دخولنا، كان معانا واحد من المبيعات بـ يسألنا إذا كنا نعرف أي معلومات عن الماركة، وشرح لنا معلومات أساسية عنها وبعدها سابنا نتمشى بحريتنا. قسم الحريمي، واللي بـ يحتل النصف الأمامي من المحل، مقسوم لقسم الملابس السمارت وقسم للكاجوال. الحاجات اللي شدّت انتباهنا شملت فستان كوكتيل باللون الأزرق النيون (299 جنيه)، بوت أسود بكعب (699 جنيه)، شنطة يد شيك (479 جنيه) وبلوفر طويل مضفر باللون الرمادي (459 جنيه). بعدها تمشينا شوية لحد ما وصلنا للنصف الثاني من المحل، وهناك تفرجنا على قسم الرجالي، واللي كان فيه تشكيلة من التي شيرتات بأكمام طويلة (139 جنيه)، تي شيرتات مطبوعة (150 جنيه)، بليزر أزرق سمارت كاجوال (480 جنيه)، جاكيت منفوخ بغطاء للرأس (459 جنيه) وبنطلونات نحيفة باهتة شوية (299 جنيه). بشكل عام، مسئول المبيعات كان مهذب وجاهز للمساعدة، لكن أوقات كنا بـ نحس الموضوع فيه إلحاح شوية. طبعًا إحنا بـ نقدر المساعدة، لكن عرضه لتقديم مقاسنا مع كل قطعة نلمحها ممكن يكون مربك شوية. من ناحية الجودة، الملابس الموجودة مش مبهرة للدرجة، لكن في الوقت نفسه المحل بشكل عام بـ يقدم منتجات متناسبة مع سعرها وكان واضح فعلاً أن الأسعار معقولة. المهم هنا أننا أكيد هـ نرجع لهم في زيارة ثانية في رحلة تسوق تحافظ على ميزانيتنا من التدمير.

...

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

فيفا مي: العناية الكاملة بالجمال الداخلي والخارجي تحت سقف واحد في كونكورد بلازا مول
اصدرت في: 16/11/2014

بانتشار وسائل الإعلام والاتصال في العالم، بقى سهل جدًا أن توصل لِك آخر أخبار الموضة وفن التجميل؛ وللأسف أصبح التركيز موجه على الجمال الخارجي بشكل كبير، لدرجة أن معظمنا نسي تمامًا أن جمال وصحة الروح بـ تنعكس على جمال الصورة. بعكس صالونات ومراكز التجميل اللي بـ تقدم كل ماله علاقة بالشكل الخارجي بس، فيفا مي - VeeVaaME في كونكورد بلازا مول بالقطامية بـ يقدم مفهوم مختلف تمامًا. "فيفا مي" مش بس بـ يوفر خبراء متخصصين في فن التجميل، ده بـ يساعدك كمان على إبراز جمالك وتوازنك الداخلي بتوفير مجموعة من الأنشطة المختلفة بالحجز المسبق زي اليوجا والزومبا، ده غير أنه متوفر فيه جلسات شخصية لمدة 90 دقيقة مع مدربة الحياة "نيللي ياسين"، الحاصلة على شهادات معتمدة في المجال. وبالإضافة لاهتمامهم بالمعنى الأعمق للجمال، "فيفا مي" بـ يؤمن بالتخصص في فروع التجميل المختلفة؛ فبـ يستضيف مجموعة من أشهر الأسماء في كل تخصص علشان تقدم خدماتها المتميزة كفرق عمل قائمة بذاتها تحت سقف واحد. على سبيل المثال رويال سبا – Royal Spa وهو اسم مشهور في مجال العناية بالأظافر وتجميلها، له مساحة خاصة في "فيفا مي" بـ يوفر فيها خدماته اللي مش موجودة في صالونات التجميل المعتادة، لأنهم بجانب تميزهم في الجانب التجميلي، بـ يهتموا بصحة الأظافر أولًا، يعني أبسط برامج الـ Nail Spa واللي بـ يمتد للعناية باليدين أو الساقين، بـ يشمل تحديد نوع الأظافر (ناعمة – متوسطة – صلبة) وعلى أساسه بـ يتحدد طريقة العلاج بمجموعة من مستحضرات ماركة أليساندرو Alessandro الفخمة، واللي متوفر منها طلاءات للأظافر بألوان عديدة مناسبة لكل الأذواق. أما بالنسبة لجمال البشرة، فبمساعدة مجموعة من مستحضرات بايوسفير Biosphere السويسرية، واللي مصنوعة من مواد طبيعية بتكنولوجيا متطورة، خبير التجميل اللبناني عادل حسين هـ يساعدك على تقييم ومعرفة نوع بشرتك، وعلى أساس التقييم ده هيتم عمل برنامج علاجي لها وللحفاظ على نضارتها. من الخدمات الموجودة في "فيفا مي" تركيب رموش صناعية، ولكن بطريقة متطورة وعملية أكثر؛ فبعد تحديد الأماكن اللي هـ يتم فيها تكثيف الرموش واللي بـ تختلف من شخص لآخر، خبيرة التجميل بـ تقوم بوضع خصل رموش صناعية على الرموش الطبيعية. وبعكس الطريقة التقليدية اللي بـ يظهر فيها أثر الصمغ اللاصق في الشكل النهائي، بـ يتم استخدام لصق بنفس لون الرموش لشكل أكثر طبيعية، وبـ تبقى الرموش موجودة لمدة تصل لأسبوعين، بعدها ممكن يتم تكرار التركيب مرة أخرى. وزي ما بـ يضم "فيفا مي" أشهر الأسماء في عالم التجميل، "فيفا مي" فاتح بوتيك بـ يستضيف فيه أشهر أعمال مصممي الأزياء المصريين المتميزين، زي "ندى أكرم" بـ تعرض مجموعة من القطع المتميزة واللي بـ تنفرد بحيوية ألوانها وأفكارها المبتكرة، "زام" بمجموعة مختلفة جدًا من الحقائب والمنتجات الجلدية، ومن المعروضات المميزة، نظارات "شوود – Shwood" واللي بـ يميزها أنها مصنوعة يدويًا من الخشب الطبيعي. وبما أن فيفا مي مختلف عن أي مكان ثاني، فهو بـ يتيح لمقتني حقائب وأحذية الماركات العالمية أنهم يعيدوا بيعها من خلال البوتيك حسب حالتها، وده في حد ذاته شيء جديد بالنسبة لنا في مصر. كل اللي إحنا قلناه ده يعتبر جزء صغير بالنسبة الأسماء الثانية والخدمات المختلفة اللي بـ تقدم تحت سقف "فيفا مي"، ففيه كمان الـ Flash Tatto المؤقت واللي متوفر منه أشكال وألوان مختلفة، وطبعًا الخدمات المختصة بالعناية بالشعر من أول صحته حتى التسريحات والتلوين، واللي أسعارها تعتبر معقولة جدًا بالنسبة لجودة المستحضرات المستخدمة والنتيجة النهائية.

...

توب شوب: ماركة الملابس البريطانية رجعت مصر فى كايرو فيستيفال سيتى
اصدرت في: 12/11/2014

التسوق فى القاهرة بـ يزيد رقيه مع افتتاح أسماء عالمية كل يوم والثاني. آخر ماركة تزور مدينتنا هى توب شوب - TopShop، واللي كانت قفلت من فترة فرعها فى المعادي بسبب عدم استقرار الأوضاع فى السنين الأخيرة. بمكانه الجديد فى كايرو فيستيفال سيتي، من أول نظرة، قدرنا نشوف أن توب شوب رجع بخطوط أزيائه العصرية المناسبة للأذواق الراقية. من الإضاءة المسلطة على المانيكانات لليافطات المضيئة المميزة لكل قسم من أقسام المحل، لازم تعيش بكل حواسك مع شكل المكان العصري الرائع. الملابس المعروضة بشكل عام تميل للفخامة. الموظفين كانوا ودودين، وفى نفس الوقت حماسهم مش زائد عن اللزوم. بـ يرحبوا بك ويطلبوا منك تنادي عليهم فى حالة احتجت أي مساعدة، ومافيش إصرار على التواجد طوال الوقت، وهي حاجة كانت فعلًا مريحة. بدأنا على طول فى استكشاف قسم الحريمى علشان نشوف بـ يقدموا إيه، والحقيقة أنهم كانوا عارضين عدد من القطع كفيلة بـ تحويلنا نجوم موضة. شد انتباهنا فستان jumpsuit بلون وردى فاتح (949 جنيه) مناسب للمناسبات الرسمية، مع فستان skater مقلم (519 جنيه) وjumper منفوش مريح (579 جنيه) كمان، المحل بـ يقدم خط أزياء مخصوص للأحجام الصغيرة، لكل السيدات الرفيعين. انتقلنا لقسم الأحذية والإكسسوارات، وهناك كان معروض عدد أكبر أكيد هـ يعجب عشاق التسوق فى القاهرة. أكثر حاجات عجبتنا كانت شنطة ظهر صغيرة من الجلد (549 جنيه)، بوت بكعب من الجلد السويدى (1349 جنيه)، شنطه يد قوية (719 جنيه) وأحذية مسطحة شيك (449 جنيه). نفس الكلام بالنسبة لخط الأزياء الرجالى، توب مان. شوفنا هناك بعض المعروضات منها سويت شيرتات (449 جنيه)، فانلة بحمالات (249 جنيه)، الجينز بكل قصاته (480: 600 جنيه) ومجموعة من التي شيرتات (319 جنيه). الرجالة من حقهم يستمتعوا بشوية إكسسوارات، ولا إيه؟ معروض مجموعة آيس كابات من التريكو (129 جنيه) مع كابات عادية (280 جنيه). كلنا بـ نحتاج شخص ينصحنا إيه يتلائم معانا، خصوصًا وقت ما تكونى لوحدك بدون أصدقاء أو والدتك فى رحلتك التسوقية، وهنا جاءت فكرة المحل المميزة فى صورة خدمة التسوق الشخصية الرائعة. بدون أي تكلفة إضافية، خبير الأزياء الخاصة بالمحل هـ يساعدك فى اختيار حاجة مناسبة أو تجميع طقم كامل من الصفر. بشكل عام، توب شوب بـ يقدم تجربة تسوق فريدة من نوعها. البائع كان بـ يساعدنا وفى نفس الوقت كنا على راحتنا، والخدمة الجديدة اللي بـ يقدموها أكيد هـ تغير من شكل اللعبة. الجانب السلبي الوحيد أن كثير من المعروضات أسعارها عالية، وبناءً على خبرتنا، الأسعار أعلى من جودة وتحمل المعروضات.

...

إمتنان: منتجات صحية فى المتناول فى مول كايرو فيستيفال سيتى
اصدرت في: 29/10/2014

جنون الحياة الصحية يجتاح القاهرة، طبعًا إحنا مش بـ نشتكى، لكن المشكلة مع أغلب المنتجات الصحية أنها عادة بـ تكون غالية. اللى بـ يحصل فى النهاية أنك غصب عنك بـ تخصص ميزانية ضخمة لمجرد الحصول على أكلات صحية. "إمتنان – Imtenan" قدر يكسر القاعدة بتقديمه الطلبين: منتجات صحية طبيعية وفى نفس الوقت أسعارها فى المتناول. "إمتنان" مكانه فى المول الجديد كايرو فيستيفال سيتى، حجم فرعه متوسط، ببلاط أبيض وإضاءة جذابة وتصميمات بسيطة. أول حاجة لاحظناها لما دخلنا حاجة مثيرة جدًا، وهى أن مسئول البيع بـ يلبس بالطو معمل أبيض. علشان هم أخصائيين تغذية، كانوا مفيدين جدًا وقدروا يشرحوا إيه أكثر منتج يناسبك. أرفف المحل بـ تعرض منتجاتهم بطريقة شديدة الوضوح والتنظيم؛ كل رف عليه منتجات مقسمة على حسب تصنيفها ما بين نشاط وريجيم، طاقة، جمال، مناعة ومضادات سموم، صحة السيدات وصحة الرجال بجانب أقسام ثانية. نتكلم عن المنتجات الكثيرة اللى تشمل أغذية، مشروبات وحتى التوابل. إمتنان طوال عمرهم معروفين بعسلهم الرائع والمتوفر بكل النكهات اللى ممكن تتخيلها، لكن كثير من الناس مش عارفين أنهم بـ يقدموا منتجات كثيرة ثانية. معروض كل أنواع شاى الأعشاب (9: 10 جنيه للعبوة) اللى ممكن تتخيلها. الشاى المفضل بالنسبة لنا كان الشاى الأخضر، المكون من خلطة شاى أخضر مع توابل هندى قال عنها البائع أنها بـ تحرق الدهون وتساعد على تحسين عملية الهضم. شوفنا كمان شاى "للنوم" ممكن يكون هو الحل لمعضلة الأرق الأزلية. مافيش أحلى من شوية مقرمشات صحية، وطبعًا فرحنا لما شوفنا كوكيز الشوفان بالزنجبيل (8 جنيه). أكيد وهم! هى دى أول جملة خطرت على بالنا بعد ما اكتشفنا أنهم بـ يبيعوا قمح خالى من الجلوتين بسعر قليل جدًا (28 جنيه)، وطبعًا هى معجزة أنك تلاقيها فى مصر. أغذية ثانية تشمل أرز بنى (9.50 جنيه)، بذور قرع، شوفان (11 جنيه) وبروتين بار (8.50 جنيه). إمتنان عنده أكثر من الأكل والشرب، بـ يعرض كمان منتجات للحفاظ على جمالك. مجموعة من زيوت الشعر بـ تعمل على إصلاح الشعر التالف منها زيت جوز الهند (20 جنيه)، زيت جوجوبا (18.25 جنيه) وزيت الجرجير (12 جنيه). كمان، مجموعة مصنعة يدويًا منها زيت زيتون، عسل وصابون شوفان كانوا معروضين. زيوت للوجه برضه موجودة، منها زيت اللوز (25 جنيه). من الممتع أنك تزور إمتنان، لأنه يمكن يكون الوحيد من نوعه فى مصر بـ يقدم منتجات طبيعية، وفى نفس الوقت أسعارها مناسبة. مشينا وإحنا معانا كل أنواع المكملات الصحية، مستحضرات طبيعية للعناية بالبشرة والجمال مع أكلات خفيفة صحية، ونقدر نقول بكل ثقة أننا أكيد هـ نرجع نشترى مرة ثانية.

...

جس: الجودة لها سعرها فى كايرو فيستيفال سيتى مول
اصدرت في: 18/10/2014

لما يكون المطلوب هو البحث عن الملابس اليومية فى محلات القاهرة بعددها المهول، معظمنا بـ يروح على المحلات التجارية العادية لأسباب تتعلق بالراحة وطبعًا الفلوس. من وقت للثانى، الواحد مننا لازم يدلع نفسه بشوية حاجات من ماركات مشهورة. فى الدور الثانى من كايرو فيستيفال سيتى "جس - Guess" بـ يقدم ملابس فخمة بالإضافة إلى إكسسوارات رجالى وحريمى. أول ما تدخل المحل، هـ تشوف شاشة بـ تعرض أحدث خطوط الموضة من جس. لما ركزنا مع المعروض فى المحل، اكتشفنا أن الواحد يقدر يجمع طقم كامل من عندهم، من الأحذية وشنط اليد لغاية بنطلونات، تي شيرتات وفساتين ووصولاً للساعات وحتى ميداليات المفاتيح، جس بـ يقدم كل ده وأكثر. الأرفف الضخمة اللى بـ تعرض مجموعة من شنط اليد بكل الأشكال والأحجام قدرت تشدنا لها أول ما دخلنا. من بين شنط كبيرة بشكل معقول (1300: 1400 جنيه) لشنط بإبزيم صغيرة وعملية، تقدرى بكل سهولة تلاقى شنطة تلائم أى مناسبة أو ذوق. بجانب شنط اليد مباشرة كان عرض الساعات، ونفس الكلام مع الشنط، كان معروض ساعات بكل الأشكال والأحجام بشكل منظم على الأرفف الزجاجية. ساعة فضى صغيرة (1365 جنيه) قدرت تشد انتباهنا. قسم الإكسسوارات كمان يشمل مجموعة أحذية شوية منهم بكعب عالى ووصولاً لأحذية بوت متينة؛ عجبنا بوت لونه بنى خفيف بكعب قصير ويزينه قطع معدنية (1300 جنيه). محطتنا التالية كانت عرض المحافظ، اللى صحيح كان محدود، لكن فى نفس الوقت مناسب، وكان لازم نقع فى غرام مجموعتهم الجديدة من محافظ كبيرة بسوستة (500 جنيه) بدرجات ألوان منها الرقيق ومنها التقليدى. بصعوبة شديدة قدرنا نترك قسم الإكسسوارات اللامعة وروحنا على أرفف الملابس، ومن وقت للثانى نقف علشان نبدى إعجابنا بقطعة أو أكثر من بين المعروض. لاحظنا تي شيرتات حريمى (330 جنيه)، وكمان تي شيرتات رجالى (440 جنيه)، لكن مافيش حاجة مميزة منهم. الفساتين القصيرة يستحقوا تشوفهم، بتفصيلهم المميز وجودة خامتهم العالية. كان مستحيل نترك فستان أنيق بلون ورق النعناع يعتبر مثال حى على الأناقة (825 جنيه). الموظفين فى المحل كانوا بـ يساعدونا طوال الوقت، وعرضوا يخرجوا أى محفظة أو ساعة تعجبنا من العرض علشان نشوفهم كويس، وكمان عرفنا منهم أسعار المعروضات، دى كانت النقطة المضيئة وسط الأسعار المرتفعة جدًا.

...

باث أند بودى وركس: منتجات مغرية للعناية بالجسم فى كايرو فيستيفال سيتى
اصدرت في: 21/09/2014

وصل وصل وصل.. "باث أند بودى وركس -Bath & Body Works" افتتح حديثًا فرعه لكل عشاق الدلع فى المول الرائع كايرو فستيفال سيتى. دائمًا بـ تحصل لنا حاجة غريزية أننا نروح على أى حاجة لها علاقة بكلمة "دلع" أو كلمة "تسوق"، وعلشان كده طلعنا فورًا على الفرع الجديد نشوفه بـ يقدم إيه! شوفنا المحل بتصميماته الملونة والإضاءة القوية من مسافة بعيدة وسريعًا دخلنا وسط ناس كثير منتشرين فى المكان. ألوان المحل الزاهية والجو العام اللطيف بـ تجعله مميز ومختلف عن باقى المحلات المجاورة له. الرائحة الرائعة اللى هجمت على حاسة الشم عندنا أول ما دخلنا كمان أضافت لإحساسنا بروعة المكان. مع دخولنا، رحب بنا مسئول المبيعات وعرض علينا مساعدته. تقدرى تلاقى موظفين يساعدوكى فى كل شبر من المكان وكلهم مستعدين يساعدوا أى عميل محتار فى أى حاجة. كل منتجاتهم منظمة ومعروضة بطريقة أنيقة وسط تصميماتهم الجذابة. باث أند بودى وركس مشهور بمنتجاته الراقية من مستحضرات العناية بالجسم واللى تتميز كمان بأسعارها المناسبة، من عطور، سبراى للجسم، كريم للجسم، شموع معطرة وجيل للاستحمام. المعروض من الشموع المعطرة لفت انتباهنا بأنواع عطورها الكبير على الرف الضخم. فى وجود روائح مميزة زى "القرع والقرفة"، "بطيخ وليمون" و"كب كيك مثلج"، الشموع بـ تنادى على الناس يشتروا منها كميات كبيرة. كمان، وقت زيارتنا كان عليهم تخفيض من 225جنيه ووصل سعرهم 55جنيه؛ مافيش أحسن من كده بصراحة! طلعنا من منطقة الشموع المعطرة على المناطق الأكبر المخصصة للعطور الخاصة بـ"باث أند بودى ووركس". عملنا بنفسنا عينات تجربة من عطور الجسم، واستنشقنا العطور الجميلة علشان نختار من بينهم أحلى واحد. اختيارنا وقع على'Paris Amour' و'Japanesek Cherry Blossom' بـ 185 جنيه والاثنين كانول أخف حدة شوية من الباقيين. روائح ثانية منها'Warm Vanilla Sugar' كانت مسكرة جدًا من وجهة نظرنا وعلشان كده اختارنا الحاجات المعقولة. أكيد الرجال كمان من حقهم يتدلعوا، وعلشان كده باث أند بودى وركس بـ يعرض عدد من العطور الرجالى تستحق التجربة. عطر "Midnight"كان أحدث الموجود فى العرض ورائحته كانت جميلة وقوية وموجود منه عطر، كريم للجسم وغسول للجسم. الملخص، فرحنا أننا شوفنا المحل العطرى المليان بالحيوية. فى وجود منتجات فخمة وأسعار معقولة، أكيد باث أند بودى وركس بـ ينافس وبقوة فى منطقة مستحضرات العناية بالجسم. مشينا من المحل ومعانا كم رهيب من الشنط والميزانية قدرت تتماسك فى ظل وجود تخفيضات. وصل وصل وصل.. "باث أند بودى وركس -Bath & Body Works" افتتح حديثًا فرعه لكل عشاق الدلع فى المول الرائع كايرو فستيفال سيتى. دائمًا بـ تحصل لنا حاجة غريزية أننا نروح على أى حاجة لها علاقة بكلمة "دلع" أو كلمة "تسوق"، وعلشان كده طلعنا فورًا على الفرع الجديد نشوفه بـ يقدم إيه! شوفنا المحل بتصميماته الملونة والإضاءة القوية من مسافة بعيدة وسريعًا دخلنا وسط ناس كثير منتشرين فى المكان. ألوان المحل الزاهية والجو العام اللطيف بـ تجعله مميز ومختلف عن باقى المحلات المجاورة له. الرائحة الرائعة اللى هجمت على حاسة الشم عندنا أول ما دخلنا كمان أضافت لإحساسنا بروعة المكان. مع دخولنا، رحب بنا مسئول المبيعات وعرض علينا مساعدته. تقدرى تلاقى موظفين يساعدوكى فى كل شبر من المكان وكلهم مستعدين يساعدوا أى عميل محتار فى أى حاجة. كل منتجاتهم منظمة ومعروضة بطريقة أنيقة وسط تصميماتهم الجذابة. باث أند بودى وركس مشهور بمنتجاته الراقية من مستحضرات العناية بالجسم واللى تتميز كمان بأسعارها المناسبة، من عطور، سبراى للجسم، كريم للجسم، شموع معطرة وجيل للاستحمام. المعروض من الشموع المعطرة لفت انتباهنا بأنواع عطورها الكبير على الرف الضخم. فى وجود روائح مميزة زى "القرع والقرفة"، "بطيخ وليمون" و"كب كيك مثلج"، الشموع بـ تنادى على الناس يشتروا منها كميات كبيرة. كمان، وقت زيارتنا كان عليهم تخفيض من 225جنيه ووصل سعرهم 55جنيه؛ مافيش أحسن من كده بصراحة! طلعنا من منطقة الشموع المعطرة على المناطق الأكبر المخصصة للعطور الخاصة بـ"باث أند بودى ووركس". عملنا بنفسنا عينات تجربة من عطور الجسم، واستنشقنا العطور الجميلة علشان نختار من بينهم أحلى واحد. اختيارنا وقع على'Paris Amour' و'Japanese Cherry Blossom' (185جنيه) والاثنين كانول أخف حدة شوية من الباقيين. روائح ثانية منها'Warm Vanilla Sugar' كانت مسكرة جدًا من وجهة نظرنا وعلشان كده اختارنا الحاجات المعقولة. أكيد الرجال كمان من حقهم يتدلعوا، وعلشان كده باث أند بودى وركس بـ يعرض عدد من العطور الرجالى تستحق التجربة. عطر "Midnight"كان أحدث الموجود فى العرض ورائحته كانت جميلة وقوية وموجود منه عطر، كريم للجسم وغسول للجسم. الملخص، فرحنا أننا شوفنا المحل العطرى المليان بالحيوية. فى وجود منتجات فخمة وأسعار معقولة، أكيد باث أند بودى وركس بـ ينافس وبقوة فى منطقة مستحضرات العناية بالجسم. مشينا من المحل ومعانا كم رهيب من الشنط والميزانية قدرت تتماسك فى ظل وجود تخفيضات.

...

ذا بارتي ستيشن: تصميمات وإكسسوار حفلات في داون تاون مول بالقاهرة الجديدة
اصدرت في: 26/08/2014

مين مننا ما يحبش الحفلات؟ تقريبًا كلنا بـ ننتظر أي مناسبة علشان نحتفل... سواء أعياد ميلاد، تخرج، خطوبة، زفاف أو حتى وصول أفراد جديدة للعالم. وأي احتفال هـ يترك ذكريات رائعة خاصة لو أخذ مننا شوية اهتمام ومجهود بتفاصيله. ذا بارتي ستيشن أو The Party Station هـ يساعدك في إضافة جو لكل حفلاتك أيًا كانت المناسبة، علشان كده قررنا نزور فرعهم في داون تاون مول. المحل ككل –حتى من قبل ما ندخله- هو عبارة عن كرنفال ألوان، رؤية اللوجو الملون والبالونات اللي بـ تستقبلك عند الباب كفيلة بأنها تبهجك، أما من الداخل فالاحتفلات مستمرة... كمية منتجات وإكسسوارات ملونة ممكن تبهر ضيوفك. أول شيء لفت نظرنا كانت مجموعة الهدايا الخاصة بمباركة البيت الجديد: براويز أفكارها مجنونة، ساعات وشموع... ده غير أن المحل متوفر فيه مجموعة مش قليلة من إكسسوارات المنزل، منها ألواح من السيراميك محفور عليها كلمات ترحيب وتشجيع، أسعارها (60 جنيه – 140 جنيه). من الحاجات الثانية اللي لفتت نظرنا كانت إكسسوارات حفلات ليلة الحنة وتوديع العزوبية؛ الأولى لها تاج بلاستيكي يميز صاحبة الحفل، أو "بادج" مكتوب عليه "Bride to Be" أو العروس القادمة (20 جنيه). أما لحفلات توديع العزوبية فيه كرافاتات مناسبة للعريس "The Groom to Be" أو العريس القادم. فيه كمان كل أنواع القبعات، بالونات الهيليوم (45 جنيه – 100 جنيه)، وكروت لكل المناسبات (30 جنيه – 35 جنيه). والجديد اللي أبهرنا كان بوكيه... مش بس ورد، ده فيه كمان شوكولاتة، بس الانبهار ده ما دامش للأسف بعد ما عرفنا سعره (250 جنيه)، خاصة وأن نوع الشوكولاتة محلي، وعدد الورود في البوكيه مش مبرر لارتفاع السعر. من المشكلات اللي بـ تواجهنا بالذات في كايرو 360 لما بـ نيجي نكتب مقال نقدي عن محلات –مش مطاعم- أننا ما نلاقيش أسعار مكتوبة، فنضطر نسأل عنها بشكل هستيري ومحرج في الوقت نفسه، ما بالك لو زبون مقيد بميزانية محددة ومحتاج يحسب حساباته من غير ما يضطر أنه يكرر سؤال السعر؟ للأسف العيب ده لاحظناه هناك. بغض النظر عن عدم وجود الأسعار على المنتجات، وأن فيه منتجات كثيرة جودتها غير مناسبة للسعر اللي هـ تدفعه، إلا أن ذا بارتي ستيشن بلا شك إضافة لعالم التسوق في القاهرة، لأن فكرته مميزة وجديدة، ومنتجاته مبتكرة... أيًا كانت حفلتك أكيد هـ تلاقي إكسسوارات مناسبة لها هناك.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن