إكسسوارات تسوق in السادس من أكتوبر Cairo, Egypt

تسوق

لو شاتو: فساتين وجيبات قمة في الأنوثة في مول العرب
اصدرت في: 25/03/2012

«لو شاتو – Le Chateau» اسم اعتدنا نسمعه فى عالم المطاعم وبالتحديد مطعم "لو شاتو" الموجود في الجيزة أمام النايل بولينج والمشهور بأن فيه عزف بيانو حى لرواد المكان، لكن "لو شاتو" اللى هـ نتكلم عنه النهارده محل جديد لملابس السيدات ما بقالوش ثلاثة أسابيع في مول العرب. "لو شاتو" شركة كندية رائدة تأسست فى عام 1959 وبدأت بداية متواضعة فى مونتريال، لحد ما بقى لها أكثر من 200 محل في كندا والولايات المتحدة والشرق الأوسط، لها أكثر من 40 سنة خبرة في تاريخ صناعة الموضة، والشركة بـ تصنع تقريبًا 2 مليون ثوب في السنة. بنات حواء هـ تلاقى كل ما يخصها من فساتين سهرة وخاصة بالعمل والحفلات الصباحية وكمان جيبات لنفس المناسبات وبلوزات في منتهى الشياكة وكمان قمصان رقيقة، لدرجة أن بعد زيارتنا دخلنا على موقع لو شاتو الكندي وشفنا الموديلات اللى لسه ما نزلتش مصر وتعقدنا. وعلى الرغم من أننا لقينا تشكيلة ملابس للرجال على الموقع إلا أن المحل فى مول العرب فيه تشكيلة للسيدات فقط، ربما لأنهم لسه فاتحين من وقت قريب ولسه ما نزلوش كل التشكيلة وبدأوا بالسيدات. المحل مساحته كبيرة جدًا ومش هـ تعرف تبدأ منين، لأن كل شوية هـ يشدك موديل أو شكل فستان من بعيد فـ تروح وتشوفه، التفصيل خطوطه دقيقة وبـ يبرز الجمال الأنثوي لأى واحدة هـ تلبسه وده لاحظناه جدًا هناك، بعض الفساتين عليها تطريز خفيف لكنه مش بزيادة زي ما بـ نشوف فى أغلب الفساتين التفصيل المصري اللى تحس أنها "فلة، شمعة، منورة" على رأي عمرو أديب. والمعروضات موجودة من أعلى السقف لآخره وهـ تقعد حبة حلوين فى المحل لحد ما تخلص فرجة فقط. أسعار الفساتين هناك اللى فيها لمعة خفيفة وتنفع تتلبس في سهرات أو مناسبات (تبدأ من 1099 جنيه) وفيه فساتين خامتها قطن تنفع للخروج الصبح وفساتين خامتها عاملة زي الشيفون علشان السهرات وبعضها بسيط جدًا ينفع لمناسبات صباحية، عامة أسعار الموديلات هناك بـ تتراوح بين 1000 لحد 1500 جنيه.. قد تكون الأسعار مستفزة للبعض، لكن بجد الخامة والتفصيلة والموديل يستحقوا أكثر من كده. إحنا انبهرنا، لدرجة أن كان معانا ولد صديقنا أبدى إعجابه بأشكال الموديلات وتفصيلتها. بجد زيارة استثنائية لمكان اكتشفناه بالصدفة، بقالنا كثير ما شفناش فساتين وبلوزات وجيبات بحلاوة التصميم والتصنيع والتقفيل والشكل ده، لما تشوفوا الموديلات هـ تبقوا عاوزين تشتروا كل اللي فى المحل من حلاوته زي ما حسينا، وفى الآخر "الغالي ثمنه فيه". 

...

ستراديفاريوس: ملابس حريمي على الموضة في مول العرب
اصدرت في: 27/09/2011

فتح مول العرب، وفتحت معاه محلات أشهر الماركات الموجودة في سيتي ستارز. وضمنهم محل «ستراديفاريوس - Stradivarius»، اللي كان من أوائل المحلات اللي فتحت هناك. محل منظم، عنده ملابس شيك جدًا وعلى الموضة، أسعاره مش رخيصة، لكن في نفس الوقت فيه أغلى منه! هو نفس ستايل محلات «بيرشكا –Bershka » و«پول أند بير Pull & Bear -»، لكن يمكن يكون التنوع عنده أكثر، وهادئ أكثر في موديلاته، يعني مش على نفس مستوى طرقعة «بيرشكا». وعنده مقاسات معقولة، لأن كان فيه قريب ظاهرة غريبة جدًا وهي أن كل المحلات اللي بـ تحط ملابس مطرقعة وعلى الموضة، مش بـ يبقى متوفر عندها غير مقاسات صغيرة فقط، يعني بـ يبقى نادرًا لو لقيت عندهم حاجة مقاسها "L". إنما في «ستراديفاريوس» متوفر مقاسات من أول X-Small ولغاية X-Large. البائعين هناك في حالهم، بمعنى مش بـ يفضلوا واقفين فوق دماغك ويزنوا عليك ويقترحوا لك "اللي يليق عليك"، أو إيه اللي هـ "يكمل الطقم"، بالعكس أنت بـ تبقى واقف هناك براحتك تختار اللي يعجبك وتسيب اللي مش عاجبك، ولو احتاجت مقاس معين مش عارف تلاقيه أو احتجت أي مساعدة وسألت أي حد من البائعين هـ يساعدوك على طول. غير كده كمان، تقدر تأخذ اللي أنت عاوزه وتدخل تقيسه، وتخرج من غير ما تأخذ حاجة منهم عادي، من غير ما تحس بكسوف أو إحراج من البائع/ البائعة اللي بـ يسألوا كل شوية "طلع مظبوط ولا لأ؟" (زي ما بـ يحصل في محلات كثيرة). البنت اللي واقفة على باب غرف القياس كل شغلتها أنها تشوف معاك كام قطعة هـ تدخل بها غرفة القياس، وتعطيك بهم رقم، وبعدين وأنت خارج تعطيها الرقم والملابس اللي مش هـ تأخذها (حتى لو مش هـ تأخذ حاجة أصلاً). بالنسبة للملابس، فهي بـ تجمع بين الموضات المفتكسة زي مثلاً البنطلون اللي عجبنا ومش بـ نلاقيه في أي حتة، فاكرين البنطلونات السترتش بتاعة زمان اللي بـ يبقى فيها قطعة ممتدة من القماش تعديها من تحت كعب الرجل؟ كانوا زمان بـ يسموها "هيلانكا". المهم إحنا لقيناه هناك (169 جنيه) ولمّا رٌحنا كان متوفر بلونين (أسود ورمادي)، وكان فيه مقاسات L، خامته كانت ثقيلة شوية وتصلح شتوي. عجبنا كمان قميص جينز (229 جنيه)، وعامة القمصان هناك سعرها بـ يبدأ من 99 جنيه لغاية 349 جنيه. أمّا بالنسبة للتي شيرتات فهي موجودة بتنوعات كثيرة جدًا، مشجر وسادة، بنص كٌم وبكٌم طويل، والأسعار من 99 لغاية 299 جنيه، وعجبنا كمان الجاكتات الصيفي الخفيفة بكُم وسادة وبسيطة جدًا، متوفرة بألوان كثيرة منها أسود، وأبيض، ورمادي، وأحمر، وأزرق، ولمّا رُحنا كان سعر الواحد بـ 99 جنيه. المحل أسعاره مش رخيصة، بس ما يمنعش أنك ممكن من وقت للثاني تلاقي عنده حاجات بأسعار معقولة جدًا، وخصوصًا أنها حاجات "آخر موضة". وكمان المحل له موقع إلكتروني على الإنترنت، عليه كل القطع المتوفرة في المحلات بأسعارها بالجنيه المصري ومقاساتها، غير كمان دليل المقاسات بتاع المحل اللي على الموقع علشان كل واحد يبقى عارف مقاسه من قبل ما يروح.

...

بي يو: شنط تقليد الماركات العالمية في مول العرب
اصدرت في: 19/09/2011

بما أن المحلات الموجودة في مول العرب بمدينة 6 أكتوبر أغلبها محلات أحذية وشنط، فما كانش من الغريب أننا نلاقي هناك فرع لمحلات «بي يو»، وده محل شنط ومحفظات، بس مش أي شنط، ده تقليد شنط الماركات العالمية. لو دخلت «بي يو» هـ تلاقي تشكيلة متنوعة جدًا من الشنط المعروفة من أشهر الماركات العالمية زي: "لوي ڤيتون – Louis Vuitton"، "جوتشي – Gucci"، "لونشون – Longchamp"، "پرادا – Prada"، وغيرهم كثير. ودائمًا بـ يبقى عندهم تنوع في الماركات، والأشكال، والأسعار، لكن مش كل موديلات الشنط بـ تبقى موجودة على طول، ممكن لو رايح تسأل على موديل معين ما يبقاش موجود أو خلصان، وساعتها هـ يقولوا لك هـ ييجي ثاني إمتى. تقليد الشنط بـ يبقى فيه منه 7 درجات، أعلى درجة وأغلى واحدة في التقليد بـ تبقى الدرجة السابعة، ودي بـ تبقى ما ينفعش تفرقها عن الأصلي خالص. ما نقدرش نقول أن شنط «بي يو» من أعلى درجة، لكن برضه هو تقليد نظيف ومش سهل أنك تفرقه عن الأصلي. أسعار الشنط هناك بـ تبدأ من 150 جنيه وبـ توصل لـ 600 جنيه. يعني مثلاً لقينا شنطة تقليد "لوي ڤيتون" موديل الـ "Speedy" كانت في حدود 280 جنيه، شنط الـ "لونشون" في حدود 150 جنيه، وأغلب شنط الماركات الثانية هـ تبقى في الحدود دي ما بين 250 جنيه و350 جنيه. لما مشينا لآخر المحل، لقينا فيه وراء رف شنط في الآخر خالص ما كانش واضح عليها ماركات معروفة، عجبتنا فيه شنطة جلد لونها أسود، ولمّا سألنا الراجل قال لنا أن الرف ده كله شنط جلد طبيعي فغالية شوية، والشنطة السوداء كان سعرها 670 جنيه قبل الخصم، وحوالي 580 جنيه بعد الخصم. وواحدة ثانية جلد من نفس المجموعة ولونها أسود برضه كان سعرها في حدود 450 جنيه بعد الخصم، بس إحنا ما قدرناش نفهم الشنط اللي معمولة من الجلد الطبيعي دي برضه تقليد ماركات معينة، ولا جلد طبيعي وخلاص ومش من ماركة معروفة. العاملين هناك ودودين جدًا، وبـ يجاوبوا على أي استفسار عندك بصدر رحب، وكمان بـ يبقوا لابسين قمصان مهندمة جدًا، على عكس أغلب المحلات الثانية اللي العاملين فيها بـ يلبسوا تي شيرتات. ولو حبيت تسأل عن ماركة الشنطة أو خامتها أو سعرها هـ يجاوبوك ويفضلوا معاك على طول لغاية ما أنت تكتفي أسئلة، لأن كمان الشنط والمحفظات مش مكتوب عليها أسعار. المحفظات هناك برضه من الماركات العالمية، فيه "لوي ڤيتون" و"جوتشي" وغيرهم كمان. والأسعار في حدود 100 جنيه و150 جنيه. ده غير أنهم كمان عندهم شنط كبيرة تنفع للسفر (برضه ماركات). لو معاكي 300 جنيه وعايزة تدلعي نفسك، اشتري شنطة من «بي يو»، خامات نظيفة وقال يعني ماسكة شنطة ماركة "پرستيج يعني".

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن