المهندسين تسوق in Cairo, Egypt

تسوق

مانجو: الماركة الأسبانية فتحت فرع جديد في شارع لبنان بالمهندسين
اصدرت في: 26/07/2015

بالرغم من أن ماركة الملابس الأسبانية مانجو – Mango فاتحة فرع لها في شارع جزيرة العرب من وقت طويل، إلا أن من حوالي شهر كده فوجئنا بافتتاح فرع جديد على بعد مسافة قليلة جدًا من الفرع الأول، بعدها اكتشفنا أن فيه شركتين مصريتين عندهم توكيل مانجو، وبالتالي الفرعين منفصلين عن بعض في الإدارة. المهم، بما أننا في موسم أعياد، قررنا أننا نأخذ جولة في مانجو علشان نشوف الفرع الجديد هـ يقدم إيه لمحبي التسوق في المهندسين، من الواجهة الخارجية ممكن تفتكر أن الفرع الجديد أكبر لأنه مكون من دورين، ولكن بعد ما دخلنا اكتشفنا أنهم ممكن يكونوا تقريبًا نفس المساحة، ولكن الفرق في التوزيع. المحل مرتب ومقسم حسب المجموعات اللونية الموجودة في الـ Collections. أول مجموعة كانت ألوانها الأساسية الأحمر، الأزرق والأبيض؛ عجبناJumpsuit أحمر منقوش وفيه أزرق على أطراف الرجل (699 جنيه)، قميص قطن مقلم بالطول أبيض في أزرق (499 جنيه)، ومجموعة من البنطلونات الـ Jeggings بدرجات مختلفة من الأزرق سعر الواحد (399 جنيه). المجموعة الثانية غلب عليها الأبيض، البيج والأسود؛ بنفس سعر الـJumpsuit الأولى كان فيه واحدة باللون الكحلي، بدون أكمام. توب يعتبر نوعًا ما رسمي بحمالات رفيعة، لونه الأساسي الأبيض وعلى فتحة الصدر الـV خط عريض باللون الأسود. المعروف أن مانجو بـ يقدم في كل موسم مجموعة من الفساتين السواريه، مش دائمًا بـ نلاقيهم في كل الفروع. لكن فرع لبنان فيه مجموعة كبيرة من السواريهات سواء من الـ New Collection أو المواسم القديمة، والفساتين كلها بـ تتميز بالبساطة وأسعارها بـ تبدأ من 1299 وبـ توصل 1599 جنيه. الدور الثاني حاليًا كله خصومات بـ تبدأ بـ 50 % وحتى 70 %، فيه مجموعة كبيرة من الفساتين الرسمية القصيرة اللي ألوانها موحدة، عجبنا منها واحد أسود من غير أكمام سعره بعد الخصم (345 جنيه)، ومجموعة كبيرة من البنطلونات بقصات مختلفة، وصل بعضها لأسعار مش سهل تشوفها في مانجو زي 145 جنيه، ده غير مجموعة كبيرة من القمصان والبلوزات اللي أسعارها بـ تتراوح بين 199 جنيه و245 جنيه. بالرغم من أننا بـ نحب موديلات مانجو، إلا أننا بـ نفكر ألف مرة قبل ما نشتري منه، علشان ما نشهرش إفلاسنا، أما بقى لما يكون فيه تخفيضات، بـ نحاول نشوف إحنا محتاجين إيه بالضبط قبل ما نروح للكاشير علشان ما نزعلش أكثر.

...

نفرتاري: منتجات العناية بالجسم الطبيعية وصلت المهندسين
اصدرت في: 13/12/2014

محلات منتجات العناية بالجسم بقيت موجودة ومنتشرة في كل مكان في القاهرة، أغلبها ماركات عالمية فأسعارها ممكن تعتبر غالية بالنسبة لأحجام منتجاتها. وبالرغم من أن معظم منتجات الماركات دي بـ يبقى مكتوب عليها أنها 100% طبيعية، إلا أن شكلها النهائي التجاري بـ يوحي بالعكس تمامًا. الماركة المصرية الوحيدة على الساحة هي نفرتاري - Nefertari واللي فتحت فرع جديد في المهندسين. الفرع الجديد فتح من حوالي شهرين، وهو بالنسبة لأي حد معتاد أنه يشتري من أكشاك نفرتاري الموجودة في المولات هـ يكون أريح بكثير، أولًا لأنه واسع وطريقة العرض مريحة وتسمح لك أنك تتفرج بمزاج على مختلف المنتجات. أول ما دخلنا على الشمال لاقينا مجموعات الهدايا والموضوعة في صناديق خشبية بسيطة. عجبنا منها علبة فيها ثلاثة فوط يد بيضاء من القطن المصري العضوي، عليها موتيفات فرعونية باللون الأزرق (79 جنيه)، وواحدة ثانية فيها صابونتين وفوطة يد صغيرة عليها موتيفة عين حورس سعرها مناسب كهدية بسيطة ومبتكرة (54 جنيه). من المجموعات الأكبر فيه سلة فيها تشكيلة منتجات بنفس الرائحة زي الورد مثلًا سعرها (245 جنيه). ثاني مجموعة لفتت نظرنا كانت مجموعة من المنتجات القطنية، أولها أحجام مختلفة من الفوط، أصغرها سعره (10 جنيه)، الوسط منها (40 جنيه)، أما بشاكير الحمام فهي الأكبر وسعرها (104 جنيه). المجموعة دي تصميمها بسيط وكلها باللون الكريمي. أما الفوط اللي تفاصيلها أكثر فعجبنا منها واحد متوسطة بنفس اللون ولكن أطرافها مزينة بكروشيه (65.50 جنيه) وواحدة ثانية عليها رسمة للملكة نفرتاري (22 جنيه). من ضمن المنتجات القطنية فيه روب الحمام بمقاسات مختلفة (214 جنيه حتى 225.25 جنيه) حتى للأطفال بمختلف الأعمار، وفيه كمان شباشب قطنية بمقاسات مختلفة (40 جنيه). الروب والشبشب ممكن تشتريهم لوحدهم أو مع بعض بسعر أقل طبعًا. وبالرغم من أننا مش مقتنعين أن الشباشب الخوص ممكن تكون مريحة للقدمين إلا أن أشكالهم عجبتنا (37 جنيه). مجموعة الصابون كبيرة ومتنوعة الروائح والأشكال، من ضمن الروائح المختلفة الورد واللافندر وزيت الزيتون. بالرغم من أن شكلهم المربع ولونهم البني كان غير مشجع بالنسبة لنا، إلا أن مجموعة الصابون المكونة من 4 قطع برائحة الروزماري بالزيت الزيتون عجبتنا جدًا (35 جنيه)، أما القطعة الواحدة فسعرها (25 جنيه) وحجمها نسبيًا كبير، عجبتنا منها برائحة اللافندر، بنفس الحجم لاقينا مجموعة من 4 قطع موضوعة في كيس قماش مزين برسمة توضح المكون الأساسي للصابون (45 جنيه)، ولكن المجموعة دي روائحها محدودة عجبنا منها اللي برائحة الورد. أما بالنسبة لمنتجات التجميل فالمجموعة كبيرة جدًا، من أول الماسكات زي ماسك الطمي الأبيض (39 جنيه)، أملاح الاستحمام من سفاجا، السادة منها (30 جنيه) واللى بروائح زي الورد (35 جنيه) وحتى مرطبات الشفاه (30 جنيه) ولكن للأسف الأخيرة كانت بالنسبة لنا دهنية زيادة عن اللزوم ورائحتها مش مقبولة. اللي اكتشفناه في زيارتنا للفرع أن فيه قسم للمواد الطبيعية اللي ممكن تستخدم في الأكل زي السكر البني الطبيعي (15 جنيه) وزيت جوز الهند (36 جنيه). وزجاجات لماء الورد وروح النعناع (16 جنيه). صحيح ممكن نلاقي المنتجات دي في السوبر ماركت أو عند العطار ولكن بالنسبة لنا نفرتاري أضمن لأن معظم المنتجات اللي بـ نلاقيها عند العطار مش مكتوب عليها تاريخ صلاحية. منتجات نفرتاري في رأينا تقدر تنافس وبقوة محلات منتجات العناية بالجسم العالمية، لأن فيها مميزات مش موجودة في الماركات الثانية أولها أنها سعرها منافس، طبيعية شكلًا ومضمونًا، ده غير أنها مصرية 100%.

...

تيرانوفا: فرع جديد لماركة الملابس الشبابية في شارع لبنان
اصدرت في: 03/12/2014

سكان المهندسين من وقت قريب كان لازم "يضربوا" مشوار للمولات الكبيرة زي سيتي ستارز في مصر الجديدة أو مول العرب في أكتوبر علشان يلاقوا محلات الملابس المشهورة كلها في مكان واحد. الموضوع بالنسبة لهم بقى أسهل لما مجموعة محلات زي مانجو، بول أند بير وبيرشكا فتحت في شارع جزيرة العرب؛ محل وراء الثاني وبدأت حمى المحلات تنتشر لغاية ما وصلت بطول شارع لبنان، بدأت بـ "إتش & إم"، وبعدها فتحت مجموعة من المحلات من ضمنها تيرانوفا - Terranova، واللي قررنا نكتب عنه مقال نقدي. تيرانوفا كان فاتح في شارع وادي النيل بعيد عن مجمع المحلات الحالي، ولكن الفرع ده قفل علشان يحتل المحل اللي جانب إتش & إم. الفرع الجديد أوسع كثير وفيه أقسام ما كانتش موجودة في القديم زي قسم اللانجيري وملابس البيت. أول دور بـ يحتله القسم الحريمي كما هو معتاد في محلات الملابس، أول قطعة لفتت نظرنا كانت جاكيت ثقيل مضاد للماء لونه زيتي (339 جنيه) وهو مناسب جدًا للأيام دي بما أن الشتاء دخل علينا. معروض مع الجاكيت مجموعة من القمصان الكاجوال (119 جنيه)، وبنفس سعرهم معروض في قسم لوحده مجموعة من البنطلونات الـ Skinny Jeans بألوان مختلفة منها الرمادي والأزرق الفاتح. أما البنطلونات القطنية واللي مناسبة للجيم أو مشوار سريع فالواحد بـ (149 جنيه) وألوانه كحلي بكتابة بيضاء على الرجل أو العكس. من البلوفرز عجبنا واحد بسيط جدًا برقبة مستديرة و3/4 كم سعره (149 جنيه) والألوان الموجودة منه الكحلي والأبيض. الملابس الحريمي كثيرة لدرجة أننا اكتشفنا أنها مش بس محتلة الدور الأول، ده كمان نصف الدور الثاني، ومعروض فيه مجموعة من الـ Sweatshirts اللي عليها رسومات كرتونية والمناسبة جدًا ليوم دافيء، وموجود برضه مجموعة من الـ Leggings واللي ممكن تناسبها. قسم اللانجيري مش كبير ولكن ممكن تطلعي منه بعرض مناسب وخصوصًا أن العرض الموجود حاليًا، واللي مستمر لمدة 10 أيام هو اشتري 2 وتحصلي على القطعة الثالثة بـ 9 جنيه، واللي ساري على معظم القطع من الأقسام المختلفة. من قسم اللانجيري لاقينا بيجامة لونها Powder Pink عليها رسمة بسيطة في القطعة العلوية. سعر القطعة العلوية (119 جنيه)، أما البنطلون فهو سادة وسعره (149 جنيه). لاحظنا أن الملابس الداخلية مش منوعة من حيث الأشكال والألوان ومعظمها من الألوان الأساسية زي الأبيض والأسود والبيج. قسم الأطفال موجود فيه العديد من الاختيارات للأولاد والبنات وعجبنا فيه جاكيت بناتي مضاد للماء عليه رسمة ورود سعره (199 جنيه)، ومعظم الملابس القطنية أسعارها بـ تبدأ من 49 حتى 119 جنيه. آخر جولتنا كانت في القسم الرجالي واللي موجود فيه مجموعة من البنطلونات الواسعة بألوان مختلفة منها حتى بطبعة كموفلاج الجيش، استغربنا أن فيه لسه محل بـ يبيع الطبعة دي لأنها انقرضت من زمان. التي شيرتات اللي بنص كُم موجودة بكثرة بالرغم من أن الدنيا برد، لفت نظرنا واحدة مطبوع عليها ورود بالكامل (119 جنيه)، بلوفر على صدره مجموعة من الرسومات المناسبة للكريسماس (219 جنيه)، و Coat قصير ألوانه الكحلي والرمادي سعره (519 جنيه). ما بـ نعتبرش تيرانوفا من المحلات اللي بـ تقدم ملابس جودتها عالية، صحيح سعرها مناسب بالنسبة لناس كثير، ولكن التجربة أثبتت أنها ملابس الموسم الواحد لأن عمرها قصير. فلو أنت من الناس اللي بـ تحب اللبس يعمر معاك، ننصحك بأنك تعلّي ميزانيتك وتشتري من مكان جودة ملابسه أعلى. أما لو أنت من الناس اللي بـ تزهق من شكلك في اللبس بسرعة ممكن تلاقي هناك اللي يناسبك.

...

أوليو: مجمدات لبنانية وعالمية فى المهندسين
اصدرت في: 20/09/2014

في الفترة الأخيرة أكثر الزوجات خصوصًا الموظفات بقوا بـ يعتمدوا على الأطعمة المجمدة زي السوسيس والبرجر والبانيه لأنها وجبات سريعة التحضير خصوصًا بعد يوم مرهق في العمل وكمان لو فيه ضيوف فجأة بـ تكون الأطعمة دى شيء منقذ. وبما أن فريق العمل في كايرو 360 فيه متزوجات فبالطبع صادفنا "أوليو ماركت – Olio Market" للأطعمة اللبنانية المجمدة اللى موجود أمام مستشفى الصفا بالمهندسين، المكان مش كبير قوى لكن فيه منتجات كثيرة جدًا ومتنوعة وكلها لبنانية طبعًا، ما جربناهاش كلها بس جربنا أصناف كثير وكانت جيدة ولما تم طبخها كانت كأنها طازجة مش مجمدة، من الأصناف اللى جربناها: سبرينج رولز الخضار (40 جنيه) وده كان طعمه حلو جدًا ولذيذ بالنسبة للأطفال لأنهم مش بـ يأكلوا الخضار بسهولة، وفيه برينج رولز موتزاريلا وسبرينج رولز هوت دوج، وجربنا كمان سمبوسك اللحمة وكانت لطيفة جدًا وكمان سمبوسك ميكس جبنة (32 جنيه للكيلو) وجربنا كبة الخضار وكبة البطاطس وكروكيت الفراخ وفيه أصناف أخرى كثيرة. من مميزات "أوليو" أن كل أصنافه خفيفة على المعدة وجذابة بالنسبة للأطفال خصوصًا اللى مش بـ يأكلوا الخضار أو اللحوم، وفيه كمان وجبات تنفع للمدارس زى البطاطس الكروكيت، أما من ناحية الأسعار فـ نقدر نقول أنها معقولة، مافيش توفير فيها عن شركات ثانية، لكن أوليو بـ يعمل عروض كل شهر بس مش لصنف معين لمجموعة أصناف مع بعض، وبـ يكون فيه خصم على المجموعة كلها مش على صنف واحد، يعنى مثلاً فيه عرض على فيليه كريسبي، وممبار أرز، وكفتة أرز، وكبة ميني، وسمبوسك لحمة، وسمبوسك جبنة (115 جنيه) بس طبعًا الأوزان نصف كيلو وربع كيلو، وأحيانًا بـ تكون العروض دى مفيدة لكن مشكلتها أن مش شرط أى شخص يكون بـ يحب الأصناف دى كلها مع بعض، ونادرًا لما بـ يكون فيه عروض على أصناف مفردة لكن ممكن العروض دى تكون مفيدة في العزومات أو الرحلات. مش شرط أن أنت تروح فروع أوليو علشان تشترى، ممكن تتصل بالخط الساخن 16905 وممكن كمان تتعرف على العروض والأصناف من خلال صفحتهم على الفيسبوك، وكمان ممكن تطلب الأوردر من خلال الصفحة. وللناس النباتيين فيه منتجات نباتية في أوليو زى سمبوسك الخضار ومحشى ورق عنب بالزيت وكروكيت البطاطس وحلقات البصل المقلية وغيرها. وكل فترة أوليو بـ يعمل منتج جديد خاص به زى "سفيحة الجبنة" وده منتج مخبوز بشكل خاص وبداخله ميكس من أنواع مختلفة من الجبن مع الفلفل والزيتون. الاختلاف اللى ممكن نلاقيه في أوليو عن أي منتجات ثانية هى أنها مش لبنانية بالاسم فقط الطعم كمان لبنانى، وكمان دائمًا عنده جديد بـ يشدنا أننا نجربه.

...

أكسبت فيرنتشر: بيتك من الخيال فى المهندسين
اصدرت في: 14/06/2014

كل ست بيتها بالنسبة لها مملكتها الصغيرة، وكل رجل بيته بالنسبة له هو مكان الراحة اللى يحب دايمًا يكون منظم ومرتب ومريح. "أكسبت فيرنتشر" فى المهندسين هـ يسهل المهمة بالنسبة لكم، لو عاوزين تفرشوا بيتكم "مودرن" أو تصمموا ديكوراته بدون ما ترهقكم التكاليف العالية، وكمان فيه ضمان على كل قطعة أثاث هـ نشتريها. أول ما هـ ندخل "أكسبت فيرنتشر" هـ تنبهر بموديلات الأثاث الموجودة خصوصًا لما تعرف أنك ممكن تختار أى موديل يعجبك مع إمكانية تغيير ألوان الفرش حسب ذوقك وكمان قبل ما نشترى أى قطعة أثاث هـ تعرف خامة الخشب والقماش والأسعار فى المتناول، يعنى مثلاً الركنة بـ تبدأ أسعارها من 4500 جنيه، والأنتريهات تبدأ أسعارها من 6000 جنيه، ومن حيث المقاسات نقدر نختار الموديل و"أكسبت" هـ يصمموه لنا حسب المساحة اللى نحددها. ولأن كل قطع أثاث لا يكتمل جمالها إلا بديكور الغرفة المناسب لها.. من نفس المكان نقدر نختار ديكور بيتنا وإحنا بـ نختار الأثاث، و "أكسبت" هـ يعرضوا لنا كتالوجات الديكورات الخاصة بهم وتبدأ من إكسسوارات المنزل لغاية دهان الحوائط.. وكمان هـ يوفروا لنا الفنيين اللى هـ ينفذوا الديكور ومختصين فى تركيب الأثاث. وهناك هـ نشوف أشيك ديكور حوائط ثلاثية الأبعاد سعر المتر قبل الخصم (150 جنيه) و(130 جنيه) بعد الخصم، وهـ يساعدونا فى اختيار الألوان والحوائط المناسبة للأثاث اللى اشتريناه أو حتى لو ما اشتريناش الأثاث من هناك لأن كل غرفة لها ديكور يناسب طبيعتها وطبيعة الإضاءة فيها، يعنى مثلًا غرفة المعيشة ألوانها من الأفضل تكون حيوية وتعطينا إحساس بالنشاط. أما غرف النوم بـ تحتاج ألوان هادية وتصميم رقيق للحائط، وغرف الأطفال غالبًا بـ تكون قطعة من فيلم كرتون حتى أثاث غرف الأطفال بـ يكون كأنه جزء من مشهد خيالى.. وده بـ يخلى الأطفال مرتبطين بغرفتهم. كمان من مميزات "أكسبت" أننا ممكن نشترى قطعة الأثاث اللى تعجبنا حتى لو كانت مرتبطة بقطع أخرى، ولو إحنا بـ نحب ورق الحائط هـ نلاقى تصميمات ثلاثية الأبعاد من ورق الحائط مدهشة، وفيه مجموعة تصميمات حوائط شيك جدًا للأثاث الكلاسيك، وتصميمات خاصة للمطاعم، وكل فترة بـ يكون فيه عروض وخصومات خاصة فى الأعياد والمناسبات، ولو إحنا حابين نجدد ديكور البيت حتى لو مش هـ نجدد الأثات ممكن حائط بسيط يغير شكل المكان 180 درجة والتكاليف بسيطة جدًا. لما تروح "أكسبت" هـ تتعرف كمان على نصائح مهمة جدًا هـ تفيدك فى تأسيس المنزل يعنى مثلاً أن غرفة المعيشة لازم تكون غرفة كبيرة أو متوسطة، ولما نختار أثاث غرفة المعيشة لازم يكون بـ يتحمل الاستخدام المستمر ومن الأفضل أن قطع الأثاث ما تكونش ضخمة علشان ما تستغلش مساحة كبيرة ويكون فيه مساحة مناسبة للحركة. كمان يا ريت من الأفضل نختار الكنب والكراسى اللى لها شلت يتم سحبها وفك فرشها علشان يكون سهل التنظيف والغسيل خاصة أن غرفة المعيشة بـ يتواجد فيها الأطفال طوال الوقت، ولو المنزل مساحته صغيرة يمكن استخدام أثاث متعدد الاستخدام وسهل التخزين وفيه تصميمات وموديلات كثيرة للمساحات الضيقة، فيه تفاصيل بسيطة فى الديكور ممكن تغير مود الغرفة وتحولها إلى مكان مختلف زى الأباجورات مثلاً لها دور مهم جدًا فى غرف نوم الأطفال والكبار. باختصار ممكن بأقل التكاليف نخلى بيتنا جنة لو اعتمدنا على مكان يكون له خبرة فى التصميمات الراقية زى "أكسبت فيرنتشر".

...

السلام شوبنج سنتر: أناقة ملابس المحجبات فى المهندسين
اصدرت في: 02/12/2013

"السلام شوبنج سنتر" فرع المهندسين فيه كل شيء بـ تحتاجه المحجبات، وبـ يوفر عليهم وقت ومجهود كبير فى البحث عن زي أنيق ومناسب وفى نفس الوقت يكون أسعاره فى المتناول، المكان عنوان أى حاجة لها علاقة بالأناقة والرقى. السنتر مكانه مناسب لسكان المهندسين والدقى وبولاق والجيزة وإمبابة، وممكن نروحه من الجيزة لو أخذنا أى ميكروباص رايح ميدان لبنان وممكن لو هـ نروحه من وسط البلد يبقى بالمترو وننزل محطة البحوث وتأخذ تاكسى لشارع السودان. السنتر عبارة عن طابقين، فى الطابق الأول مجموعة من العبايات بألوان وموديلات مختلفة، وممكن لما نسمع كلمة عبايات نتخيل أنها ما تناسبش غير سن معين أو أنها تعطينا شكل أكبر من سننا، لكن بصراحة الموديلات اللى فى السنتر شيك جدًا لدرجة ممكن لو بنت مش محجبة تعجبها حاجات وتقرر تلبسها من غير حجاب، وفيه موديلات توحى أنها فستان مش مجرد عباية، وكل موديل له اقتراحات لألوان الطرح وموديلاتها واقتراحات كمان للفة الطرحة اللى ممكن تليق لكل موديل. بصراحة إحنا أول ما شوفنا أناقة المعروضات تخيلنا أن الأسعار هـ تكون عالية جدًا زى ما تعودنا فى محلات المحجبات خصوصًا العبايات، لكن بالعكس لقينا الأسعار مناسبة جدًا يعنى مثلاً شوفنا عباية باذنجانى وشيك جدًا وتنفع للبنات والسيدات (350 جنيه) والقماش بتاعها تركى وملمسه ناعم ومش بـ يشف وكان فيه منها كل المقاسات، وكان فيه كمان عباية فكرتها كانت جديدة ومختلفة عبارة عن طبقتين: طبقة قصيرة والثانية طويلة وفيه زى حزام عريض من الوسط وكان الطبقتين درجتين مختلفتين من البترولى (450 جنيه) وكان فيه كمان حاجات بسيطة جدًا وفى نفس الوقت أنيقة وأسعارها كانت فى المتناول وبـ تتراوح ما بين 200 و300 جنيه. وعلشان فيه بنات وسيدات كثير مش بـ يحبوا لبس العبايات، فى السنتر موديلات لأطقم كثيرة عبارة عن تونيك طويل أو متوسط الطول مع بنطلون من القماش، وتصميماتها مختلفة وأنيقة وتناسب البنات والسيدات وكمان أسعارها فى المتناول، يعنى كان فيه طقم مثلاً عبارة عن تونيك من التريكو 2/3 كم وصدره مفتوح وتحته بادى بكم كامل ومعاه بنطلون (سعر الطقم 300 جنيه). أما فى الطابق الثانى فيه الجيبات والبنطلونات والبلوزات القصيرة، وفى الطابق ده هـ نلاقى موديلات كثيرة من الجيبات، والجينز والجباردين والقماش وأسعارها فى المتناول بـ تبدأ من أول 85 حتى 150 جنيه، وفيه كمان جوانتيهات ومعاصم بألوان وتصميمات مختلفة، وأطقم جينز كاملة عبارة عن تونيكات طويلة وتحتها بنطلون جينز وألوان مختلفة. "السلام شوبنج سنتر" فيه ميزة مهمة جدًا وهى أننا ممكن نلاقى عنده مقاسات كبيرة جدًا يعنى مثلاً "XXXX" وده ممكن ستات كثير مش بـ تلاقيه وفيه كمان المقاسات الصغيرة جدًا زى الـ "S" وده برضه ممكن بنات محجبات كثير مش بـ تلاقيه. ومش بس المقاسات هى الميزة الوحيدة فى السنتر، فيه كمان ميزة مهمة بالنسبة لكل البنات والسيدات وهى التوفير، خصوصًا فى المواسم والأعياد لأنه بـ يعمل تخفيضات ممكن توصل لـ 50% وكمان ممكن يعمل هدايا المبيعات يعنى مثلاً ممكن تشترى طقم وتأخذى الطقم الثانى بنصف الثمن وعروض ثانية كثير لما تروحوا هـ تعرفوها.

...

دوبيتا: إيشاربات متنوعة فى المهندسين
اصدرت في: 11/07/2013

بعد ما لفينا محلات القاهرة بطولها وعرضها وروحنا أماكن صعب حد يوصل لها، وكل ده علشان نلاقى إيشارب حرير، نصحونا نروح "دوبيتا – Dubetta" علشان مجموعته المتنوعة من الإيشاربات متعددة الألوان. مكانه فى شارع جزيرة العرب فى المهندسين اللى دائمًا زحمة، أمام بيرشكا وبول & بير، ومع إبهار الشكل الخارجى للمحل، صعب ما تأخذش بالك منه. لما وصلنا كانت لسه الأرض بـ تتمسح وطلبت منا موظفة من الموجودين بمنتهى الأدب أننا نرجع بعد عشر دقائق. وفعلاً بعد عشر دقائق، كانت الأرض لسه مبلولة ونفس الموظفة طلبت مننا ننتظر؛ اقترحت علينا نلف على كام محل لغاية ما يبدأوا. أخيرًا، بعد ما دخلنا المحل نقدر نوصفه لكم، عبارة عن ممر طويل ضيق؛ وعلشان وقت زيارتنا كل الموجودين كانوا اثنين بس، مساحة دوبيتا الصغيرة ما كانتش مشكلة بالنسبة لنا. معظم معروضات دوبيتا –لو مش كلها– من غير بطاقة سعر، وده معناه أننا كان لازم نسأل مسئولة المبيعات كل مرة نحتاج نعرف سعر أى حاجة. دوبيتا عنده إيشاربات شيفون تبدأ من 90 جنيه. مجموعة ثانية لامعة من الإيشاربات الشيفون كانت موجودة علشان تناسب ملابس السهرة. فكرة تنوع الألوان وأن كل لون متوفر منه على الأقل ست درجات بـ تساعدك تلاقى اللى نفسك فيه بالضبط. منتهى سوء الحظ أن بعد كل الكلام ده ما قدرناش نلاقى درجة الرمادى اللى فى دماغنا، بس يفضل دوبيتا اختيار كويس لو عاوزة إيشاربات شيك جودتها عالية. ستاند كامل مخصص لإيشاربات السهرة اللامعة، تبدأ من 45 جنيه لغاية 150 جنيه. الإيشاربات السادة مش هى الحاجة الوحيدة عند دوبيتا؛ المحل بـ يقدم كمان إيشاربات منقطة، إيشاربات عليها ورود وأشكال ثانية. إيشارب شيفون طبيعى منقوش كان سعره 120 جنيه، وإيشارب منقط من الشيفون برضه كان سعره 120 جنيه. لو دماغك فى حاجة كاجوال أكثر، دوبيتا كمان عنده إيشاربات قطن. إيشارب منقط لونه بنى فى أبيض كان ثمنه 45 جنيه. شريط لشعر الرأس برضه متوفر بأسعار تبدأ من 10 جنيه. بونيهات، باندانات ومحافظ كلها حاجات تقدرى تلاقيها فى دوبيتا. ركن كامل من المحل مخصص لشنط يد شكل جودتها منخفضة؛ بأسعار تبدأ من 280 جنيه، رأينا أن الشنط مش بس غالية، لأ وكمان شكلها بشع. قصاد قسم الشنط، مجموعة صغيرة جدًا من فساتين ساتان بدون أكمام طولها يوصل للركبة. تحس أن الفساتين اللى سعرها يبدأ من 210 جنيه ومتوفرة بألوان كثيرة أنها مُخيطة من بواقى القماش. علشان نقول الحق، إيشاربات دوبيتا تعتبر من أجمد وأكثر التشكيلات تنوعًا فى القاهرة؛ أما باقى المعروضات ما كانش لها نفس التأثير.

...

بينوكيو: أثاث عربي وطراز مميز بأسعار نار فى المهندسين
اصدرت في: 12/06/2013

كل الموبيليات شبه بعضها في كل محلات الأثاث اللي روحناها، ودي بـ تكون أزمة كبيرة جدًا ما تحسش بها غير بنت بـ تدور على أثاث مميز لبيتها اللي بـ تجهزه، وغالبًا بـ يكون الوقت ضيق علشان مواعيد الفرح والالتزامات بمواعيد معينة وهكذا، ده غير أنه أحيانًا كثيرة الوقت ما بـ يكفيش أن الناس تنزل تروح دمياط علشان تلف كويس وتشوف "العفش" على أصوله. روحنا أماكن كثير جدًا وتفرجنا على محلات موبيليات يمكن بعدد شعر رأسنا، لذلك ومع كثر اللف عيوننا قدرت تقف عند بعض الأماكن والتصميمات المختلفة واللي كان أبرزهم «بينوكيو – Pinocchio » اللى له فرعين واحد فى المعادي والثاني فى المهندسين، خطفنا جمال تصميماته والشخصية المميزة لها لكن زي كل ما كلنا عارفين الحلو ما يكملش، وبينوكيو الحلو طلع أسعاره نار.. اتخضينا فعلاً لما عرفناها وحسينا أنها مبالغ فيها جدًا. "بينوكيو" بـ يقدم مجموعة من التصميمات لها أسماءها وشخصياتها اللي مش ممكن نشوفها في مكان ثاني، بـ ترجع بنا للعصور العربية المزدهرة لما كان لكل شيء اهتمام خاص، وشخصية ورعاية، الاهتمام بالتفاصيل هو السمة المميزة في المحل اللي بــ يخلط أحيانًا بين الطراز الفرعوني والعربي والإسلامي المميز. الزخارف كمان في بينوكيو مميزة جدًا، تلاقيها في كل شيء، سواء كانت ركنات أو غرف طعام أو نوم، من أكثر غرف المعيشة اللي رائجة عندهم جدًا غرفة جلوس اسمها "شهرزاد"، عبارة عن ركنة وكرسي، ومكتبة وطرابيزة، تم تحويل ظهر الركنة الخشبي لمكتبة ممكن يتحط فيها كتب أو أدوات زينة أو غيرها حاجات كثير، ده غير الزخارف اللي في كل قطعة من غرفة الجلوس، لكن برضه سعرها ما كانش مناسب قوي.. لكن خلينا نعترف أن الزخرفة متقنة، وواضح أنها معمولة بإتقان. بـ نعترف أن التجول في فروع " بينوكيو" خاصة فرع " المهندسين" يقدر يسرق المتفرج ويخليه يتوه في عالم ساحر من الأفكار والخيالات، طريقة العرض مميزة، والإضاءة واختياراتهم الدقيقة جدا للسجاد على الأرض، وللنجف، وأسلوب الإضاءة والمفروشات اللي بـ تزين السراير وغرف السفرة، مبهرة فعلا. من الحاجات اللي شوفناها ولفتت نظرنا في العرض غرفة نوم "إيزيس"، قد إيه كانت جميلة لكن تظل مشكلة السعر، سعرها كان 36.900 جنيه، أما غرفة السفرة من نفس الطراز والشغل الفرعوني كانت بـ 31.900 جنيه، أما غرفة نوم شهرزاد واللي أبهرتنا بالبساطة والأصالة والقوة في التصميم والخيال اللي بـ تحمله بـ 41.200 جنيه، وغرفة الجلوس اللي بنفس التصميم والاسم بـ 32 ألف جنيه. القائمين على بينوكيو فاهمين كويس أن أسعارهم عالية جدًا، يمكن علشان كده عملوا حاجة ذكية لكن برضه حسيناها استغلال، وهي أن المشتريات لو وصلت لـ 70 ألف جنيه بـ ينزل تخفيض على المجمل 15%، كمان أكدوا لنا أن وقت الشراء بـ يكون فيه خصومات هم بـ يحسبوها بنفسهم، على طريقة "ساعة الكاش الغالي يبقى ببلاش" لكن مع المبالغات الفظيعة عندهم حسينا أنها هـ تكون تخفيضها وهمية... على كل المثل بـ يقول: "الغاوي ينقط بطاقيته" واللي هـ يحس أنه مش قادر على جمال المعروضات يشتريها وأمره لله!

...

سوبر ماركت الهوارى: تسوق مع متعة التوفير في المهندسين
اصدرت في: 27/05/2013

فى منطقة زى ميدان لبنان مكدسة بالسكان ومحاطة بمستويات اجتماعية مختلفة لازم يكون فيه عدد كبير من السوبر ماركت علشان تلبى احتياجات السكان، وفى نفس الوقت تناسب مستويات الطبقات المختلفة اللى ساكنة فى المنطقة وفى المناطق المحيطة زى أرض اللواء وبولاق وغيرها، وبالفعل فيه سوبر ماركت كثير فى المنطقة لكن "الهوارى" له شعبية كبيرة بين سكان المنطقة والمناطق المحيطة. سوبر ماركت "الهوارى" بـ يتكون من طابقين، فى الطابق الأرضى هـ نلاقى قسم خاص بجميع أنواع المنظفات وقسم ثانى خاص بجميع السلع التموينية من جميع الشركات وكمان ركن خاص لجميع الأعشاب، يعنى ممكن نقول عطارة بس بشكل مختلف شوية ومكتب للإدارة ومكتب لخدمة العملاء. فى الطابق الثانى قسم كبير للفاكهة والخضروات، وفى القسم ده هـ تلاقى كل أنواع الخضار والفاكهة الموسمية و غير الموسمية، وبالجوار فيه قسم كبير لكل أنواع الدواجن واللحوم وكمان جزء خاص ببعض المأكولات الشامية والخليجية محفوظة أو مجففة. وقسم آخر مجاور للحلويات الشرقية والغربية وكمان الحلويات المحفوظة، وفيه قسم خاص للعطور وأدوات التجميل، وفى القسم ده فيه آنسات موجودة علشان تساعد المتسوقين فى اختيار أى شيء وهـ تلاقى كمان ماركات كثير عالمية ومحلية. وجنب قسم التجميل فيه قسم المنتجات الورقية اللى بـ يحتاجها البيت والمطبخ، وجنب الركن ده فيه ركن خاص بمستلزمات الأطفال زى البامبرز وعطور وشامبوهات الأطفال وبعض المنتجات البلاستيكية الخاصة بالأطفال. بعد ما عرفنا أنواع المنتجات هـ نرجع نوضح ليه سوبر ماركت الهوارى له شعبية كبيرة، وده لأنه بـ يقدم كل شهر عروض وتخفيضات مغرية جدًا وده بـ يناسب ناس كثير خصوصًا الموظفين لأن العروض بـ توفر كثير عليهم خصوصًا فى السلع الأساسية اللى لا يمكن الاستغناء عنها. وغير العروض الشهرية فيه عروض خاصة بالمواسم والأعياد بـ تكون مغرية أكثر خصوصًا على السلع الأكثر مبيعًا فى المواسم. وعلشان راحة العملاء سوبر ماركت الهوارى عامل صفحة على الفيسبوك بـ يعلن فيها عن العروض اللى بـ يقدمها كل شهر والعميل ممكن يختار السلع اللى هو عاوزها من البيت ويطلبها بالتليفون ومش بس كده ممكن كمان يرجع الطلب بالتليفون. وعلشان راحة العملاء فيه مندوبين من بعض الشركات اللى منتجاتها موجودة علشان يتلقوا أى شكاوى أو ملاحظات على المنتج مباشرة من العميل وده مهم لتطوير المنتج أول بأول. بالرغم أن سوبر ماركت الهوارى بـ يوفر قدر كبير جدًا من السلع والمنتجات اللى بـ يحتاجها أى بيت مصرى إلا أن مساحته مش كبيرة بما يتناسب مع كم المنتجات اللى بـ يعرضها وده ممكن يسبب زحام داخل الماركت خصوصًا فى المناسبات. وكمان الجراج المجاور للهوارى صغير وبالتالى لو معاك عربية الركنة ممكن تكون صعبة. لكن فى النهاية الخدمات اللى بـ يقدمها للمستهلك فيها قدر كبير من المراعاة والراحة.

...

سالم: محل أقمشة لازم تشوفه فى المهندسين
اصدرت في: 15/05/2013

قررت أنك تكون مصمم أزياء؟ وقررت أن الاختيارات الموجودة فى السوق بكل بساطة مش كافية وقررت تشوف حل للمشكلة دى بنفسك؟ كل حاجة مضبوطة ماعدا حاجة واحدة: القماش. فين محل القماش اللى الواحد يقدر يروحه فى القاهرة علشان يفصل فستان؟ الإجابة موجودة عند "سالم" فى المهندسين. سالم مكانه فى شارع لبنان، وبـ يقدم عدد لا نهائى من الأقمشة والمنسوجات المناسبة لأى نوع من الملابس التفصيل. قررنا نروح فى وسط الأسبوع بعد الظهر علشان نختار قماش مناسب لتصميم فستان، وهناك تفاجأنا بكمية الاختيارات المهولة أول ما دخلنا من باب المحل. البداية كانت مع قسم الحرير، على أمل أننا نلاقى حاجة عليها رسم. صعب الكلام يوصف العدد الرهيب من الأقمشة المطلة علينا من الرفوف اللى مليانة عن آخرها بأقمشة ملفوفة على رولات، وكلها مستنية صاحب نصيبها. الموظفين فى سالم طيبين ومركزين، ودول أهم عاملين لما تكون بـ تدور على أحسن خامة. اختار اللى يناسبك وهم على طول هـ يطلعوها، وكمان يفردوه لك علشان تقدر تتخيل شكله عليك عامل إزاى. جودة كل الأقمشة الموجودة عالية لحد كبير، وفيهم حاجات أفخم من الثانية من أسماء شهيرة زى كريستيان ديور، سعرها يوصل 2000 جنيه للمتر وأكثر من كده كمان. قماش حريرى عليه شكل زهور سعره 150 جنيه، وقماش ثانى لونه برتقالى عليه رسومات هندسية سعر المتر منه 190 جنيه. تقدر تلاقى كمان أقمشة مزخرفة بخرز مخيط وإكسسوارات ثانية، بس سعرهم كان أغلى شوية، المتر منه بـ يبقى بين 400: 700 جنيه، سالم كمان بـ يقدم مجموعة كبيرة من الشيفون بكل الألوان السادة؛ الخامات الطبيعية بـ تكون أغلى شوية، حوالى 65 جنيه للمتر. الدانتيل كمان متاحة بملمس ودرجات ألوان مختلفة من الأبيض، والبيجات والأزرق؛ دانتيلات عادية سعرها حوالى 62 جنيه للمتر، ونفسها بس مستوردة من فرنسا أغلى كثير بـ 500 جنيه للمتر. معظم الأقمشة بـ تحتاج لطبقة داخلية، والطبقة دى ممكن تستخدم على الجنب المطفى أو اللامع، سعر المتر منها حوالى 45 جنيه. سالم كمان عنده أقمشة أبسط من ناحية القوام والأشكال، زى قماش سادة أو مضلع ينفع للملابس الرجالى، بحوالى 165 جنيه للمتر. أنك تلاقى الخامة المناسبة ده يعتبر إنجاز؛ هـ تحس أنك محتار، متردد وفى مرحلة معينة، خايف جدًا وتسأل نفسك: طب أعمل إيه لو الشكل فى الآخر طلع فظيع؟ خذ وقتك، استمتع بالاختيار، اسمح لنفسك أنك تغوص بكل حواسك فى عالم "سالم" مع طاقم الموظفين الودودين وكله هـ يبقى تمام.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح