أثاث ومستلزمات منزل تسوق in المهندسين Cairo, Egypt

تسوق

الرواد: محل مميز للأثاث في شارع السودان
اصدرت في: 29/04/2012

لما كنا بـ نعدي على المحل ده في شارع السودان كنا بـ نحس أنه عجيب شوية، باستمرار بـ يعرض أشكال مبتكرة للشيزلونج، وشكل النجف من الخارج غريب، أوحى لنا أن سعره غالي وحاجته مش عملية، لكن لما جربنا ندخله، تفاجئنا فعلاً. المكان بـ يبيع أثاث بيت مميز جدًا، تصميماته مش موجودة غير عندهم، لأن لهم مصنع في 6 أكتوبر فيه خطوط إنتاج بـ تنتج لهم بس، لأنهم في الأساس مسئولين عن تجهيز غرف الفنادق وأثاثها من الألف للياء، والمحل ده هو الفرع الوحيد لهم اللي بـ يبيع الأثاث اللي من تصميمهم، علشان كده ما قلقناش أننا لو اخترنا حاجة نلاقيها عند حد غيرنا، وده بـ يعطي الحاجة طابع متميز وإحساس مختلف. غالبًا بـ يكون الكتالوج اللي بـ يفرجه لك المحل فيه أثاث حلو قوي، لكن لما تيجي تشوف الحقيقة تلاقيها مختلفة أو غريبة شويتين، لكن في الحالة دي لأ، نقدر نقول أن كل اللي شوفناه من تصميمات في الورق اللي قدموه لنا شوفناه في الواقع ولقيناه أحلى. المحل بـ يبيع غرف نوم، وركنات، وأنتريهات، ومرايات، فيه غرف نوم كثير على الطراز التايلاندي، حلوة فعلاً ومبتكرة، البعض ممكن يشوف أن الحجرات صغيرة شوية، لكن في الحقيقة مش صغيرة ولا حاجة، هي مبتكرة ومناسبة جدًا لأحجام غرف النوم الجديدة اللي غالبًا مش بـ تكون كبيرة قوي وما بـ تتحملش أثاث ضخم يبلع المكان ويخلي الموجودين يحسوا بالخنقة، الشكل بسيط جدًا سرير واثنين كومود وتسريحة ودولاب عرضه ما بين مترين لأربعة في أكبر الغرف أنت وذوقك بقى. في كثير من المحلات اللي بـ تعرض الشكل المودرن ده من غرف النوم واللي بالأحجام دي، بـ تلاقي الخشب mdf، ورغم أن الغرفة أو القطعة ممكن تكون عاجباك جدًا لكن تخاف عليها في المستقبل لأن نوع الخشب ده مش بـ يعيش، وكل واحد فينا بـ يكون عاوز يشتري حاجة تدوم معاه طول عمره وتستحمل، في المحل ده ومع جمال التصميم هـ تلاقي الخشب مميز جدًا وقوي، وأكثر حاجة لفتت نظرنا التقفيل، وطريقة القفل والفتح، فعلاً مميزة وسهلة وقوية وتحسسك أنك فعلا دافع فلوس في حاجة خشبها كويس، وتصميمها حديث ومريح. فيه ميزة حلوة جدًا في المحل وهي أنك ببساطة ممكن تغير أي تفصيلة مش عاجباك في الغرفة أو القطعة اللي هـ تشتريها علشان تناسب بيتك، لأنهم مش بـ يبيعوا القطع اللي في العرض لك، لكن بـ يصنعوا الحاجة من أول وجديد على مزاجك، ولك زيارتين للمصنع أثناء التصنيع علشان تشوف حاجتك وهي بـ تتصنع يمكن يكون لك اقتراحات. الناس هناك متعاونين جدًا، وعندهم أفكار كثيرة، ومش بـ يملوا من الشرح، وبـ ينصحوك وهـ تخرجوا من الكلام معاهم فاهمين حاجات كثير. شوفنا هناك غرفة نوم كلاسيك حلوة جدًا اسمها "سيسيليا" خشبها وجمالها لفت نظرنا، حجمها يناسب غرف النوم الواسعة، قد إيه كانت جميلة، سعرها 25 ألف جنيه، شوفنا كمان غرف نوم مودرن زي "Wave" و"pyramids"، وغيرها، ودول أسعارهم كانت في حدود 16 ألف جنيه، كمان شوفنا غرفة نوم حلوة جدًا اسمها "Cancon" شكلها عادي جدًا وبسيط فيها شغل رقيق بالأركيت، ولونها بني فاتح قوي، وشوفنا منها كمان اللون الأبيض ودي كانت بـ 11 ألف جنيه، وفيه غرفة سفرة عملية جدًا أجزاءها بـ تنفصل بـ 8 كراسي بحوالي 14 ألف جنيه، كمان ركنات بأسعار ما بين 6 لـ 7 آلاف جنيه، وممكن تزود قطع إضافية من نفس الحاجة اللي اختارتها براحتك. غرف النوم هناك مش غالية أبدًا مقارنة بالجودة والقوة والشكل المبتكر، زي ما بـ يقولوا مافيهاش غلطة، ويمكن دي من الأماكن القليلة اللي روحناها ولاقينا جودة وجمال وقوة، وأسعار معقولة في الوقت نفسه.

...

زهران: أدوات منزلية يعتمد عليها في المهندسين
اصدرت في: 23/11/2011

مافيش أماكن كثير ممكن تلاقي فيها أدوات مطبخ عملية من غير ما تحس أنها هـ تعيش آخرها شهرين ثلاثة وبعد كده تبقى غير صالحة للاستخدام. فرع «زهران - Zahran» في المهندسين موجود في شارع سوريا، وبـ يلعب دور مهم في إعادة الثقة للمنتج المصري وخصوصًا منتجات التيفال. المحل بـ يقدم كل الأدوات والإكسسوارات الخاصة بالمطبخ. كان أول مرة لنا نشوف الكم ده من الحلل والطاسات معروضة في مكان واحد، معظم المعروضات تيفال طبعًا، مرصوصين في ركن بعيد ناحية اليمين حسب الحجم والوظيفة. العرض مركز أكثر على طاسات التيفال اللي مش بـ تخلي الأكل يلصق فيها، وفيه مجموعة من الطاسات المثلثة الشكل مرصوصين كان سعرهم 28 جنيه. فيه ستاند في آخر المحل عليه مجموعة من الأواني اللامعة بأسعار معقولة جدًا، وما تركزش في كلمة "صنع في الصين" المكتوب عليها قوي وركز في كلمة "ستانلس ستيل". فتاحة علب كلاسيكية بـ 5 جنيه، مجموعات من أكواب الشرب بأسعار من 18 لـ 50 جنيه، وفيها عدد كبير من الأكواب. هرمين من حلل الطبخ بأحجام ضخمة جدًا، أكبر واحدة بسعر 540 جنيه وقطرها حوالي 50 سم، ممكن تسوي فيها خروف يعني. وفيه مصفاة معدنية عملاقة بـ 480 جنيه موجودة على واحد من الهرمين اللي قلنا عليهم، وإحنا مش قادرين نفهم مصفاة بالحجم ده ممكن تستخدم في إيه؟ فيه ركن ثاني للرفايع والحاجات المتنوعة اللي مالهاش علاقة ببعض. مجموعة من ساعات الحائط الكبيرة اللي شكلها غير تقليدي بأسعار ما بين 220 و 280 جنيه. وفيه ورود بلاستيك للزينة وعمومًا المعروضات مش هي الأجمل لو ناوي تكمل بها ديكور بيتك لكن ده ما يمنعش أنها ظريفة ومناسبة جدًا لأي مطبخ. الأجهزة المنزلية ممكن تبقى أغلى شوية من أي محل عادي، لكن هـ تحس بالراحة والرضا وأنت بـ تتسوق في «زهران» وده له ثمن. الموظفين فاهمين جدًا خصائص المنتجات المعروضة وشروط الضمان وممكن يساعدوك ويرشحوا لك أدوات معينة دون غيرها، شئ هائل لكن الأفضل أنهم ما يقعدوش يلفوا وراءك في المحل.

...

ميجا لايت: إكسسوارات منزلية أنيقة في المهندسين
اصدرت في: 25/08/2011

أكيد ما حدش بـ يستريح أو بـ يستمتع في مكان أكثر من بيته، علشان كده مهم جدًا أننا نعمل الديكور بتاعه زي ما إحنا متخيلين على قد ما نقدر. وزي ما اسمه بـ يشرح نفسه، «ميجا لايت» الموجود في شارع جزيرة العرب في المهندسين متخصص في الإضاءات وبعض الإكسسوارات والديكورات زي الشموع والبراويز واللوحات والمرايات. المحل مش كبير قوي بس مليان على آخره بالمعروضات، وتصميمات بعض اللمبات والأباجورات فيها حركات مبتكرة؛ زي اللمبات المعلقة المزينة بأوراق الشجر النحاسية الملونة، والمصابيح اللي على شكل وردة. ولو شايف أن ده متكلف بزيادة فيه لمبات ثانية تصميماتها أبسط بكثير، مافيهاش تفاصيل كثير وكلاسيكية وتقليدية، لكن ده لا يمنع أن أسعارها غالية جدًا. أسعار الأباجورات بـ تكون بين 1500 لـ 2500 جنيه. الإضاءات اللي بـ تتحط على الأرض والمعلقة بـ تبدأ من 1500 جنيه لكن بـ توصل لـ 5000 جنيه. يعني لو عاوز تنور بيتك زي قصر فرساي يبقى عليك وعلى المحل ده، علشان كمان معظم النجف والإضاءات واخدة ستايل عصر لويس الخامس عشر. مجموعة متنوعة من الشموع في العرض كان سعرها 200 جنيه، وتصميماتها غير تقليدية جدًا، البراويز أسعارها بـ تبدأ من 125 جنيه، كثير قوي على مجرد برواز عادي. كل المرايات الموجودة مرايا حوائط، ولفت نظرنا بعض منها على شكل قرص الشمس. وعلى حسب الحجم بـ يكون السعر، بـ تبدأ من 1850 جنيه وبـ توصل لـ 2900 جنيه. فيه بعض الفازات المغطاة بقشرة الذهب، وأسعارها بـ تبدأ من 2100 جنيه للقطعة. نسبة الإبداع والابتكار بـ تزيد في المعروضات المودرن وغير التقليدية، زي اللوحات والأطباق الفضية. أحجام اللوحات ضخمة جدًا وتصميماتها معاصرة ومجنونة وأسعارها من 1860 جنيه وأنت طالع. واحدة من أجمل اللوحات الموجودة كانت خلفيتها بيضاء وعليها كلمات مطبوعة بالأسود والرمادي، ومع اللعب بالألوان هـ تحس أن الكلام المكتوب بالأسود واضح لك مباشرة والكلمات المكتوبة بالرمادي كأنها مخفاة في الخلفية البيضاء، وعجبتنا لوحة ثانية بالأبيض والأسود وهي بوستر فيلم «إفطار في تيفاني – Breakfast at Tiffany's». فيه أطقم أطباق أكل عادية، هي كمان واخدة الطابع القديم في فترة السبعينيات، فيها خط فضي ونقوش بالألوان البرتقالي أو التركواز. أطقم السكاكين كمان اللي بـ تيجي مع أطباق السلاطة شكلها ظريف قوي وفيه في المقبض بتاعها خرز ملون شكله تحفة. الأسعار مش وحشة هنا، طقم الأطباق الصغير بـ 160 جنيه، والحجم الأكبر شوية بـ يوصل لـ 315 جنيه. في الجزء الخلفي من المحل فيه ركن صغير للمجوهرات المعروضة على الكاونتر، أسعارها من 55 لـ 75 جنيه، ودول أرخص حاجات في المحل وتصميماتهم تقليدية، وفيه عين زرقاء بتاعة الحسد، وكف فاطمة وفيه ميداليات مفاتيح (55 جنيه) وحاجات ثانية كثير تنفع تكون هدايا. «ميجا لايت» عنده لوحات ظريفة وأطقم أكل حلوة، لكن الإضاءات عتيقة شوية ومش على الموضة، وغالية جدًا. وبالأسعار دي إحنا نفضَّل نجيب حاجات مودرن وروشة أكثر.

...

أول إن وان: إكسسوارات وموبيليا مودرن في المهندسين
اصدرت في: 29/07/2011

المهندسين طول عمرها مكان مثالي للتسوق والتمشية، محلات لكل حاجة وأي حاجة، خصوصًا الملابس والكافيهات، المرة دي هـ نتكلم عن محل إكسسوارات منزلية وأثاث اسمه «أول إن وان –All In One». موجود في شارع محي الدين أبو العز، وواضح أنه متميز فعلاً وعارف هو بـ يعمل إيه، الواجهة نوافذ زجاج طويلة وعليها إضاءة مودرن والإكسسوارات معروضة بشياكة خلف الزجاج. من أكثر الحاجات اللي عجبتنا لما دخلنا المحل أن موظفين البيع كانوا واقفين وعلى استعداد لتقديم المساعدة لو احتاجنا، ومع ذلك كانوا واقفين على مسافة كافية وسابونا نتفرج براحتنا لحد ما إحنا نسألهم. على الحوائط المقلمة المصمتة للمحل معروض مرايات غير تقليدية (أسعارها بـ تبدأ من 130 جنيه) وشوية لوحات زيتية، وكل ركن في المحل منسق بذوق رفيع. وضمن المعروضات الفريدة كان فيه ساعة حائط وهي قطعة ديكور فنية في نفس الوقت، هي عبارة عن قاعدة معدنية دائرية متينة طالع منها 12 عامود من المعدن المرن عليها من فوق أرقام الساعة والعقارب بـ تلف على القاعدة وطولها حوالي متر تقريبًا، وسعرها كان معقول (517 جنيه). تحفة فنية ثانية هي أباﭼورة ما شفناش شكلها في أي حتة وكان سعرها 900 جنيه، قاعدتها من الرخام الصافي ولها عامود معدني مقوس والجزء العلوي على شكل قبة والتصميم كله لازم يثير حواسك الإبداعية. لو بـ تدور على كراسي أو كنبات لفردين «Loveseats» هـ تلاقيها بأشكال كثيرة مودرن ومعاها مخدات مريحة، والكنبات نفسها منخفضة وقريبة من الأرض، فيه كنبات وركنات عليها أشكال تمويهات نباتات وتدريجات باللون البنفسجي والليموني ودي أسعارها 16000 جنيه لو رُكنة كاملة أو 6000 جنيه لو كنبة لفردين. فيه كمان ترابيزات بـ تكون مُلحقة بالركنات أو قطعة منها وسطحها بـ يكون طبقتين، ودي أسعارها تقريبًا 600 جنيه، الترابيزات مصنوعة من الخشب الغامق وواضح أنه سميك وثقيل والجزء السفلي ينفع يُقدم عليه مشروبات وينفع كـ رف للكتب وهكذا. «أول إن وان» هائل لو كنت بـ تدور على قطعة إكسسوار جديدة ومميزة تضيفها لبيتك، أو هـ تجيب لحد غاوي حاجات مش عادية هدية جواز، جرب خذ جولة في المحل ومش هـ تندم.

...

تيكا ديزاينز: أثاث جذاب، تصاميم خلابة
اصدرت في: 04/05/2011

أول حاجة بـ تقولّها صباح الخير هي الفوطة اللي بـ تنشف فيها وشك الصبح بعد مابـ تغسله، ياه لو متطرز عليها اسمك ولا كلام مشجع تـ بتدي بيه يومك. هو ده اللي بـ تعملوه «تيكاز ديزاينز – Tica’s Designs». أطقم فوط، وكراسي بينز باجز beans bags (اللي بـ تبقى عبارة عن قماش مقصوص على شكل كرسي ومحشية كوَر صغيرة – أنظر الصور). الرائع في منتجات «تيكاز» حاجتين أساسيتين. الجودة والتصاميم المصرية والغربية المبتكرة الجميلة. خالطة أفكار بالأصل غربية ومدياها طعم مصري، وكل ده مع الحفاظ على جودة عالية، شغل تقفيله نضيف جداً، وحرفيته عالمية. عندها أطقم فوط متطرز عليها بشتى الألوان. التطريز بالمكنة، دقيق ومميز. التطريز بـ يكون لكلمات زي "مصري"، أو اسم شخص أو أي حاجة انت عاوزها. فيه مثلاُ بشكير متطرز عليه "شمس، حرية، بحر..." دمه خفيف جداً واللغة العربية رِقعة ومشكلة وشكلها جميل. فيه مجموعات مكتوب عليها "الملك، الملكة، الأمير والأميرة"، على أربع فوط، ودي تبقى هدية رائعة لعيلة من أب وأم وبنت وابن. وفي كمان فوط عليها العين الزرقاء وكف فاطمة وموتيفات عربية وملكية جميلة، والمجموعة دي أغلب التطريز فيها بالذهبي والفضي. الفوط دي طبعاً في منها كل الاحجام بالإضافة إلى برانس. وعندهم كمان تصميمات موسمية مخصوصة لرمضان والكريسماس وعيد الأم وغيرهم، وممكن تطلب حاجة يكتب عليها اللي انت عاوزه وبـ يجهزوهالك في خلال 3 أو 4 أيام. وبالرغم من ان الجودة عالية في كل المنتجات إلا انها ممكن تبقى أحسن. مجموعة من 3 فوط (بشكير، فوطة وش، فوطة للضيوف مربعة) بـ 270 جنيه. أما كراسي (بينز باجز) فعندهم أحجام وأشكال مختلفة منها بضهر ومنها من غير ومنها مدور ومنها مربع. وبخامات مختلفة شاموا، جلد وقماش عادي. ودي أسعارها بـ تتراوح ما بين 450 لـ100 جنيه حسب الحجم. وفيه منها قماشة سادة، وفيه منه عليه تطريز. والأجمل هي المعمولة من القماش اللي عليها النقش العربي التقليدي بألوانه المبهجة، الأحمر والأزرق الغامق، وفيه كمان منه بألوان فسفوري متعشقه فيه شكلها مبتكر وجميل. وممكن كمان تجيب القماش وهما يعملوهلك والكرسي بـ يجهز في خلال 4 أيام وممكن يوصوهالك لغاية البيت. عندهم كمان ملايات وخدديات عليها نفس التطريز الرائع، والخدديات بـ تيجي في شاموا وخامات تانية. وكل ده بجودة عالية وتصاميم فنية جميلة. المكان ليه أكتر من منفذ بيع، في المهندسين، وفي هليوبوليس. زرنا منفذ البيع في المهندسين، المعروضات معروضة بشكل جميل وراقي، متكسية ونضيفة، والقائمين على المكان كانوا متحمسين للمنتجات وساعدونا جداً. مفيش أحلى من هدية تكون فيها حاجة مخصوصة للشخص المهدى، اسمه، أو رسالة شخصية ليه، «تيكاز» عملت ده لما مَصرْت المنتجات بشياكة، ولما إدت الفرصة لـ"تشخيص" الهدية. منتجاتها كلها ممكن تبقى هدايا رائعة، أوإضافات هايلة لأي بيت.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح