ملابس حريمي تسوق in المهندسين Cairo, Egypt

تسوق

السلام شوبنج سنتر: أناقة ملابس المحجبات فى المهندسين
اصدرت في: 02/12/2013

"السلام شوبنج سنتر" فرع المهندسين فيه كل شيء بـ تحتاجه المحجبات، وبـ يوفر عليهم وقت ومجهود كبير فى البحث عن زي أنيق ومناسب وفى نفس الوقت يكون أسعاره فى المتناول، المكان عنوان أى حاجة لها علاقة بالأناقة والرقى. السنتر مكانه مناسب لسكان المهندسين والدقى وبولاق والجيزة وإمبابة، وممكن نروحه من الجيزة لو أخذنا أى ميكروباص رايح ميدان لبنان وممكن لو هـ نروحه من وسط البلد يبقى بالمترو وننزل محطة البحوث وتأخذ تاكسى لشارع السودان. السنتر عبارة عن طابقين، فى الطابق الأول مجموعة من العبايات بألوان وموديلات مختلفة، وممكن لما نسمع كلمة عبايات نتخيل أنها ما تناسبش غير سن معين أو أنها تعطينا شكل أكبر من سننا، لكن بصراحة الموديلات اللى فى السنتر شيك جدًا لدرجة ممكن لو بنت مش محجبة تعجبها حاجات وتقرر تلبسها من غير حجاب، وفيه موديلات توحى أنها فستان مش مجرد عباية، وكل موديل له اقتراحات لألوان الطرح وموديلاتها واقتراحات كمان للفة الطرحة اللى ممكن تليق لكل موديل. بصراحة إحنا أول ما شوفنا أناقة المعروضات تخيلنا أن الأسعار هـ تكون عالية جدًا زى ما تعودنا فى محلات المحجبات خصوصًا العبايات، لكن بالعكس لقينا الأسعار مناسبة جدًا يعنى مثلاً شوفنا عباية باذنجانى وشيك جدًا وتنفع للبنات والسيدات (350 جنيه) والقماش بتاعها تركى وملمسه ناعم ومش بـ يشف وكان فيه منها كل المقاسات، وكان فيه كمان عباية فكرتها كانت جديدة ومختلفة عبارة عن طبقتين: طبقة قصيرة والثانية طويلة وفيه زى حزام عريض من الوسط وكان الطبقتين درجتين مختلفتين من البترولى (450 جنيه) وكان فيه كمان حاجات بسيطة جدًا وفى نفس الوقت أنيقة وأسعارها كانت فى المتناول وبـ تتراوح ما بين 200 و300 جنيه. وعلشان فيه بنات وسيدات كثير مش بـ يحبوا لبس العبايات، فى السنتر موديلات لأطقم كثيرة عبارة عن تونيك طويل أو متوسط الطول مع بنطلون من القماش، وتصميماتها مختلفة وأنيقة وتناسب البنات والسيدات وكمان أسعارها فى المتناول، يعنى كان فيه طقم مثلاً عبارة عن تونيك من التريكو 2/3 كم وصدره مفتوح وتحته بادى بكم كامل ومعاه بنطلون (سعر الطقم 300 جنيه). أما فى الطابق الثانى فيه الجيبات والبنطلونات والبلوزات القصيرة، وفى الطابق ده هـ نلاقى موديلات كثيرة من الجيبات، والجينز والجباردين والقماش وأسعارها فى المتناول بـ تبدأ من أول 85 حتى 150 جنيه، وفيه كمان جوانتيهات ومعاصم بألوان وتصميمات مختلفة، وأطقم جينز كاملة عبارة عن تونيكات طويلة وتحتها بنطلون جينز وألوان مختلفة. "السلام شوبنج سنتر" فيه ميزة مهمة جدًا وهى أننا ممكن نلاقى عنده مقاسات كبيرة جدًا يعنى مثلاً "XXXX" وده ممكن ستات كثير مش بـ تلاقيه وفيه كمان المقاسات الصغيرة جدًا زى الـ "S" وده برضه ممكن بنات محجبات كثير مش بـ تلاقيه. ومش بس المقاسات هى الميزة الوحيدة فى السنتر، فيه كمان ميزة مهمة بالنسبة لكل البنات والسيدات وهى التوفير، خصوصًا فى المواسم والأعياد لأنه بـ يعمل تخفيضات ممكن توصل لـ 50% وكمان ممكن يعمل هدايا المبيعات يعنى مثلاً ممكن تشترى طقم وتأخذى الطقم الثانى بنصف الثمن وعروض ثانية كثير لما تروحوا هـ تعرفوها.

...

دوبيتا: إيشاربات متنوعة فى المهندسين
اصدرت في: 11/07/2013

بعد ما لفينا محلات القاهرة بطولها وعرضها وروحنا أماكن صعب حد يوصل لها، وكل ده علشان نلاقى إيشارب حرير، نصحونا نروح "دوبيتا – Dubetta" علشان مجموعته المتنوعة من الإيشاربات متعددة الألوان. مكانه فى شارع جزيرة العرب فى المهندسين اللى دائمًا زحمة، أمام بيرشكا وبول & بير، ومع إبهار الشكل الخارجى للمحل، صعب ما تأخذش بالك منه. لما وصلنا كانت لسه الأرض بـ تتمسح وطلبت منا موظفة من الموجودين بمنتهى الأدب أننا نرجع بعد عشر دقائق. وفعلاً بعد عشر دقائق، كانت الأرض لسه مبلولة ونفس الموظفة طلبت مننا ننتظر؛ اقترحت علينا نلف على كام محل لغاية ما يبدأوا. أخيرًا، بعد ما دخلنا المحل نقدر نوصفه لكم، عبارة عن ممر طويل ضيق؛ وعلشان وقت زيارتنا كل الموجودين كانوا اثنين بس، مساحة دوبيتا الصغيرة ما كانتش مشكلة بالنسبة لنا. معظم معروضات دوبيتا –لو مش كلها– من غير بطاقة سعر، وده معناه أننا كان لازم نسأل مسئولة المبيعات كل مرة نحتاج نعرف سعر أى حاجة. دوبيتا عنده إيشاربات شيفون تبدأ من 90 جنيه. مجموعة ثانية لامعة من الإيشاربات الشيفون كانت موجودة علشان تناسب ملابس السهرة. فكرة تنوع الألوان وأن كل لون متوفر منه على الأقل ست درجات بـ تساعدك تلاقى اللى نفسك فيه بالضبط. منتهى سوء الحظ أن بعد كل الكلام ده ما قدرناش نلاقى درجة الرمادى اللى فى دماغنا، بس يفضل دوبيتا اختيار كويس لو عاوزة إيشاربات شيك جودتها عالية. ستاند كامل مخصص لإيشاربات السهرة اللامعة، تبدأ من 45 جنيه لغاية 150 جنيه. الإيشاربات السادة مش هى الحاجة الوحيدة عند دوبيتا؛ المحل بـ يقدم كمان إيشاربات منقطة، إيشاربات عليها ورود وأشكال ثانية. إيشارب شيفون طبيعى منقوش كان سعره 120 جنيه، وإيشارب منقط من الشيفون برضه كان سعره 120 جنيه. لو دماغك فى حاجة كاجوال أكثر، دوبيتا كمان عنده إيشاربات قطن. إيشارب منقط لونه بنى فى أبيض كان ثمنه 45 جنيه. شريط لشعر الرأس برضه متوفر بأسعار تبدأ من 10 جنيه. بونيهات، باندانات ومحافظ كلها حاجات تقدرى تلاقيها فى دوبيتا. ركن كامل من المحل مخصص لشنط يد شكل جودتها منخفضة؛ بأسعار تبدأ من 280 جنيه، رأينا أن الشنط مش بس غالية، لأ وكمان شكلها بشع. قصاد قسم الشنط، مجموعة صغيرة جدًا من فساتين ساتان بدون أكمام طولها يوصل للركبة. تحس أن الفساتين اللى سعرها يبدأ من 210 جنيه ومتوفرة بألوان كثيرة أنها مُخيطة من بواقى القماش. علشان نقول الحق، إيشاربات دوبيتا تعتبر من أجمد وأكثر التشكيلات تنوعًا فى القاهرة؛ أما باقى المعروضات ما كانش لها نفس التأثير.

...

سالم: محل أقمشة لازم تشوفه فى المهندسين
اصدرت في: 15/05/2013

قررت أنك تكون مصمم أزياء؟ وقررت أن الاختيارات الموجودة فى السوق بكل بساطة مش كافية وقررت تشوف حل للمشكلة دى بنفسك؟ كل حاجة مضبوطة ماعدا حاجة واحدة: القماش. فين محل القماش اللى الواحد يقدر يروحه فى القاهرة علشان يفصل فستان؟ الإجابة موجودة عند "سالم" فى المهندسين. سالم مكانه فى شارع لبنان، وبـ يقدم عدد لا نهائى من الأقمشة والمنسوجات المناسبة لأى نوع من الملابس التفصيل. قررنا نروح فى وسط الأسبوع بعد الظهر علشان نختار قماش مناسب لتصميم فستان، وهناك تفاجأنا بكمية الاختيارات المهولة أول ما دخلنا من باب المحل. البداية كانت مع قسم الحرير، على أمل أننا نلاقى حاجة عليها رسم. صعب الكلام يوصف العدد الرهيب من الأقمشة المطلة علينا من الرفوف اللى مليانة عن آخرها بأقمشة ملفوفة على رولات، وكلها مستنية صاحب نصيبها. الموظفين فى سالم طيبين ومركزين، ودول أهم عاملين لما تكون بـ تدور على أحسن خامة. اختار اللى يناسبك وهم على طول هـ يطلعوها، وكمان يفردوه لك علشان تقدر تتخيل شكله عليك عامل إزاى. جودة كل الأقمشة الموجودة عالية لحد كبير، وفيهم حاجات أفخم من الثانية من أسماء شهيرة زى كريستيان ديور، سعرها يوصل 2000 جنيه للمتر وأكثر من كده كمان. قماش حريرى عليه شكل زهور سعره 150 جنيه، وقماش ثانى لونه برتقالى عليه رسومات هندسية سعر المتر منه 190 جنيه. تقدر تلاقى كمان أقمشة مزخرفة بخرز مخيط وإكسسوارات ثانية، بس سعرهم كان أغلى شوية، المتر منه بـ يبقى بين 400: 700 جنيه، سالم كمان بـ يقدم مجموعة كبيرة من الشيفون بكل الألوان السادة؛ الخامات الطبيعية بـ تكون أغلى شوية، حوالى 65 جنيه للمتر. الدانتيل كمان متاحة بملمس ودرجات ألوان مختلفة من الأبيض، والبيجات والأزرق؛ دانتيلات عادية سعرها حوالى 62 جنيه للمتر، ونفسها بس مستوردة من فرنسا أغلى كثير بـ 500 جنيه للمتر. معظم الأقمشة بـ تحتاج لطبقة داخلية، والطبقة دى ممكن تستخدم على الجنب المطفى أو اللامع، سعر المتر منها حوالى 45 جنيه. سالم كمان عنده أقمشة أبسط من ناحية القوام والأشكال، زى قماش سادة أو مضلع ينفع للملابس الرجالى، بحوالى 165 جنيه للمتر. أنك تلاقى الخامة المناسبة ده يعتبر إنجاز؛ هـ تحس أنك محتار، متردد وفى مرحلة معينة، خايف جدًا وتسأل نفسك: طب أعمل إيه لو الشكل فى الآخر طلع فظيع؟ خذ وقتك، استمتع بالاختيار، اسمح لنفسك أنك تغوص بكل حواسك فى عالم "سالم" مع طاقم الموظفين الودودين وكله هـ يبقى تمام.

...

ماسيمو دوتى: ملابس أنيقة فى المهندسين
اصدرت في: 16/04/2013

يمكن فى آخر عشر سنين تقريبًا تم افتتاح كمية مهولة من المحلات فى القاهرة، دلوقت عندنا كل حاجة بداية من محلات 2.5 جنيه لغاية الماركات العالمية زى "ماسيمو دوتى - Massimo Dutti"، الشركة الأسبانية من سنة 1985 بدأت توسع إمبراطوريتها حول العالم بأكثر من 500 محل فى حوالى 50 دولة، كثير منهم منتشرين فى القاهرة. البداية كانت مع الملابس الرجالى، وبعدها بدأ خط الأزياء الحريمى سنة 1992 وبسرعة أصبح من الماركات المحبوبة. "ماسيمو دوتى" محل مبهر، عبارة عن دورين بمساحة صغيرة، وسط مركز تسوق القاهرة الرائع، المهندسين، وتحديدًا شارع جزيرة العرب. المانيكانات على جوانب مدخل المحل لابسين ملابس راقية أنيقة بـ تعبر تمامًا عن ملابس الرجالى والحريمى الموجودة عندهم. عند دخولنا رحب بنا الحارس وفتح لنا الباب، وبعدين مشينا فى ممر ضيق، طويل ومنظم. الدور الأرضى هو مكان الملابس الحريمى اللى مرتبة بشكل منظم والدور الأول مخصص لمجموعة الملابس الرجالى. لاحظنا أن مافيش تصنيف معين لشغلهم فى أى من القسمين وساعات كنا بـ نشوف بالطوهات بألوان متنوعة فى أماكن مختلفة من المحل. المقاسات كانت مرتبة بحيث تسهل الوصول لها، وكمان موظفين ودودين كانوا دائمًا موجودين علشان يساعدوك ويقدموا لك النصائح. قصات ملابس ماسيمو دوتى مش مماثلة لكثير من بيوت الأزياء الشهيرة، إنما واخدة سكة الأناقة البسيطة الراقية. عندهم جاكيتات بمجموعة متنوعة من الألوان زى الرمادى، والأخضر الزمردى، والأسود والأزرق الغامق سعرها 449 جنيه، وواحد لونه ذهبى لامع سعره 549 جنيه. قمصان رياضية خفيفة كانت موجودة كثير؛ واحد منهم معمول من الكروشيه لونه أزرق فاتح، وواحد أزرق غامق ثقيل. بلوزات سادة بأكمام قصيرة أسعارها تبدأ من 349 جنيه، أما بلوزة ثانية جميلة بأكمام كروشيه سعرها كان 499 جنيه؛ ضيفى جاكيت (895 جنيه) على واحدة من البلوزات دى وبكده تحول لطقم أنيق. بنطلونات سمارت كاجوال بألوان متنوعة منها البيج، والأزرق الغامق والأسود كان سعرها 449 جنيه. عدد الفساتين الموجودة كان محدود، مثلاً فستان واصل للركبه مزين بالدانتيل كان سعره 895 جنيه. قسم الرجالى برضه فيه جاكيتات سمارت كاجوال عالية الجودة بنفس طريقة القسم الحريمى. ماسيمو دوتى كمان عنده قمصان بقصات وألوان متنوعة؛ قميص أبيض سادة (329 جنيه) ينفع للخروج الرسمى وغير الرسمى، فى حين أن جاكيتات سمارت وجاكيتات ثانية سمارت كانت غالية شوية، تبدأ من 1000 جنيه. بنطلونات قماش وكتان غامقة سعرها كان 499 جنيه ونفس الكلام بالنسبة لشورتات صيفى خفيفة. يبدأ سعر القمصان البولو والتي شيرتات من 150 جنيه، أما السويترات فـ تبدأ من 400 جنيه. لاحظنا كذا بالطو رجالى وحريمى عليهم تخفيض، فيه منهم الخفيف والثقيل، مع جاكيتات جلد سعرها يزيد عن 2000 جنيه. مجموعة الإكسسوارات المعروضة فى قسمى الرجالى والحريمى قليلة جدًا، كوفيات قطن (329 جنيه) ومجموعة صغيرة موجودة من الشنط والأحذية سعرها حوالى 1000 جنيه أو يمكن زيادة شوية. من سوء حظنا أن فرع المهندسين صغير –بس مش هو أصغر واحد- ومش بـ يعرض أى من ملابس الأطفال اللطيفة. ماسيمو دوتى بعيد شوية عن الموضة السائدة لكنه فى المقابل بـ يلتزم أنه يقدم جودة عالية، وملابس كاجوال، بدل من الجرى وراء الموضة المعقدة، وده أكيد جدير بالاحترام حتى لو ده معناه أن أسعاره تبقى عالية.

...

فيرو مودا: سويترات وجاكيتات مريحة فى المهندسين
اصدرت في: 09/10/2012

زمان كان فيه وقت كان الناس أول ما توصل مصر تعرف أن احتمالية أنهم يقدروا يشتروا هدوم جديدة مش بس تحدى، ده كان يعتبر مهمة مستحيلة. وداعًا لبلاد بره بلبسها اللى معظمه تي شيرتات وأهلاً بك في القاهرة، المكان اللى تقدر تحصل فيه على اللى نفسك فيه. لحسن الحظ، دلوقت كل اللى محتاج تعمله علشان تزود تشكيلة هدومك أنك تروح المهندسين.«فيرو مودا» واحد من سلاسل محلات كثير ظهرت فى القاهرة ووفرت مجموعة محبوبة من الهدوم الكاجوال بأسعار تعتبر معقولة. الفرع الموجود فى شارع سوريا واسع، وفيه دورين لعرض ملابس حريمى ورجالى.فى رحلة البحث عن هدوم كاجوال، تنفع تتلبس كل يوم، "فيرو مودا" أثبت فعلاً أنه مكان مناسب. بأسعار من 100 إلى 150 جنيه، تقدرى تشترى تي شيرتات قطن بأكمام طويلة عليها إضافات شيك، زى A sheer back واللى بـ تيجى بتشكيلة من ألوان الشتاء زى الأخضر الفاتح، والأزرق الفاقع، أو سويتر واسع معمول كروشيه، وده مناسب لشهور الخريف فى القاهرة.بأسعار مشابهة، فيه مجموعة من الجينز النحيف jeggings بألوان تقليدية مع ألوان ثانية أجرأ زى الأحمر، والأصفر أو الأخضر. تشكيلة الجينز رغم كده مش كبيرة، بس فيه شوية جينزات عملية بقصات سكينى لو ده اللى بـ تدورى عليه.مع تشكيلة الخريف الجديدة بـ تيجى السويترات والجاكيتات علشان توفر دفء أكثر. جاكيتات بسيطة وطويلة من القطن من غير أزرار أو سوست موجودة باللون الأزرق الهادى، والأسود والرمادى سعرها 275 جنيه. سويترات مخططة بقصة عادية هـ تكلفك 255 جنيه، فى حين أن بنفس السعر تقدر تلاقى سويترات سادة بفرو. كمان فساتين شتوية مريحة موجودة بـ 255 جنيه فيه منها ألوان زى الأسود والنبيتى.نروح على حاجات أغلى شوية بحوالى 500 جنيه، مجموعة من البالطوهات، جواكيت على ستايل ركاب الموتوسيكلات، ومعاطف طويلة للمطر ومعاطف شتوى كلها موجودة، خصوصًا جاكيت صوف سميك عليه رسم مربعات كان مميز قوى.قسم الرجالى، رغم أنه أصغر من الحريمى بـ يقدم تشكيلة كبيرة من الجينز (تبدأ من 675 جنيه) واخدة معظم مساحة العرض. رغم كده، فيه حاجات ثانية زى تي شيرتات وملابس رياضية، بس الملاحظ أكثر كان الأحذية. بأسعار تبدأ من 599 جنيه، تقدر تلاقى أحذية برباط تشبة ماركات الكونفيرس والكيدز، مع مجموعة من السبيدرينات بألوان وأشكال مختلفة.صحيح أن "فيرو مودا" يقدر يشبع احتياجاتك من هدوم جديدة تضاف لدولابك، بس لازم تستعد أنك تدفع شوية علشان ممكن سعر ثلاث قطع يوصل لـ 700 جنيه. كمان قسم الملابس الكاجوال هو أكثر حاجة تستحق الإشادة لأن ملابس السهرة شكلها ردئ وموضتها قديمة. الخدمة فى الفرع مناسبة لتجربة التسوق؛ مفيش حد يضايقك أو يمشى وراءك، والتعامل مع طاقم العمل لطيف.

...

برونوفياز: محل عالمي لفساتين الزفاف فى المهندسين
اصدرت في: 17/01/2012

لو فيه حاجة واحدة بـ تحبها الستات فأكيد هى الفساتين، كبرنا وإحنا بـ نتفرج على أفلام فيها الأميرات لابسين فساتين رائعة وهما نازلين على السلالم الفخمة، ودلوقتي كل ما نشوف نجمة أو فنانة في في حفل ماشيين على سجادة حمراء ولابسين فساتين سهرة بملايين الدولارات بـ نكون غيورين جدًا، للأسف فى الواقع اللى إحنا عايشينه ما نقدرش نعمل كده، ولكن لما بعض صديقاتنا بـ يتزوجوا بـ نلاقيها حجة أو فرصة أننا نلبس فستان، ده غير أن كل البنات منتظرين لحظة شراء أهم فستان فى حياتها.. فستان الزفاف. «برونوفياز - Pronovias» سلسلة عالمية متخصصة في فساتين الزفاف والسهرات، وسلسلة المحلات دي فى مصر لها ثلاثة فروع: الأولى فى الإسكندرية، والثانية في سيتي ستارز، والثالثة فى المهندسين وده الفرع اللي قررنا نزوره. "برونوفياز" موجود بالقرب من "بول & بير – Pull & Bear" وأمامها محل "لاكوست - Lacoste" في شارع لبنان بالمهندسين، المحل مكون من دورين ومليان فساتين، على الرغم من أن موديلاته على أحدث صيحة لكن ما كانش كلهم حلوين، هى مسألة أذواق فى الآخر لكن فيه موديلات كان شكلها بشع، كان فيه واحد منهم كان فيه ريش كثير لو لبستيه هـ تبقى كأنك كتلة ضخمة مغطاة بالريش. "برونوفياز" غالى فى أسعاره إلى حد ما، اختارنا نتفرج على فستان تصميمه رقيق وصُدمنا لما شفنا السعر على الورقة الملحقة بالفستان لقينا 8600 جنيه، فيه فستان ثانى مرصع بالمجوهرات لونه أسود كان ثمنه 5250 جنيه، كان فستان جامد جدًا بطبقات من الشيفون ومجوهرات محطوطة بحرفية ولكن للأسف مازال غالى جدًا، اختارنا فستان أزرق ثانى وكان فيه خرز تركواز على الوسط بـ 7190 جنيه. أجمل فستان شفناه كان مستوحى من فساتين الفلامنكو، الفستان كان له جيبونة منفصلة مصنوعة من عدة طبقات، الفستان كان ثقيل قوي وكان شكله مستحيل أننا نعرف نتحرك داخله، تحمسنا شوية لما قالوا لنا أن عليه خصم 50%، ولكن للأسف كان ثمنه 6125 جنيه وبالتالى هو لسه غالى برضه بالنسبة للناقد كاتب المقال بعد الخصم. بصينا كمان على فستان زفاف، كان جميل جدًا ولونه "كريمي" باللآليء بـ 22.700 جنيه، وممكن تحطي "رابطة شعر" مرصعة بالجواهر علشان تكملى الشياكة، أرخص واحدة سعرها 1450 جنيه. ممكن يكون "برونوفياز" غالى، لكن أنت بـ تحصل على خدمة جيدة للفستان كمان، لو أشتريت فستان من عندهم هـ يضبطوه على مقاسك بالضبط، ولو عاوزة بوليرو ولا شال يتناسب مع الفستان بتاعك هـ تلاقى اللي شغالين هناك ودودين ومتعاونين معاكي. لو الفلوس معاكي مش مقصرة ومحتاجة تجيبي فستان لمناسبة خاصة "برونوفياز" اختيار مناسب لك رغم أن ممكن ما تلاقيش اللى على مزاجك دائمًا، لكن لو عاوزة حاجة مهاودة فى الستايل والأسعار ما نعتقدش أن ده المكان المناسب بالنسبة لك.

...

بربيري: تصميمات عالمية من لندن لكايرو في المهندسين
اصدرت في: 28/09/2011

لو كنت سافرت بره مصر يبقى أكيد لفت نظرك العلامة المميزة لـ «بربيري - Burberry» في الأماكن الراقية وبالقرب من ساحات الهوكي وملاعب التنس والجولف والبيسبول، وعلى ملابس وإكسسوارات سيدات الطبقات الأرستقراطية وأولادهم المدللين اللي دواليبهم أكيد مليانة بمنتجات عليها الكاروهات المميزة لـ «بربيري». الماركة البريطانية الشهيرة بـ تعرض منتجاتها من خلال متاجر فخمة في جميع أنحاء العالم، موديلات شيك من التي شيرتات البولو والبالطوهات القيمة والإيشاربات والأحذية، وكل المعروضات بـ تفوح برائحة الفخامة وتعبر عن الثراء. تم افتتاح أول فرع «بربيري» في مصر في المهندسين وبالتحديد على ناصية شارع جزيرة العرب وشارع لبنان جنب محلات «بيرشكا» و«بول & بير». الأسعار غالية جدًا ومش في متناول المشتري العادي أو المتوسط، وده لأن الموديلات كلها لمصممين عالميين، واللي غاوي يدفع بقى. وبما أن كثير من سلاسل المحلات العالمية المتخصصة في الموضة دخلت السوق المصري مؤخرًا، نقدر نقول أن «بربيري» مش بـ يقدم أحدث موديلات، وأماكن ثانية ممكن يكون عندها الأحدث. مساحة المحل مش كبيرة، الدور السفلي مخصص للأحذية والشنط والإكسسوارات. الكوفية الكاروهات الشهيرة اللي بـ تميز الماركة غالية بشكل مضحك (2650 جنيه)، أه طبعًا هي خامتها ممتازة وشيك جدًا لكن في النهاية هي مجرد كوفية. الأحزمة الجلد الرفيعة بـ 1575 جنيه، والشنط بـ تبدأ من 5200 جنيه لأصغر حجم. وفيه شنطة لاب توب صغيرة بـ 6350 جنيه! مقارنة بأسعار الشنط، الأحذية تعتبر لُقطة: الفلات البناتي العادية بـ تبدأ من 1995 جنيه، والكعب العالي بـ يبدأ من 2850 جنيه. طبعًا رخيصة بالنسبة لأسعار الإكسسوارات الثانية اللي عرضناها.. ولكن! الدور العلوي للمحل مخصص للملابس، وممكن تلمس بأيدك البالطو السميك اللي عليه علامة المحل، موجود بألوان مختلفة زي البيج والرمادي والأسود. والبالطوهات الحريمي بـ تبدأ من 6450 جنيه والرجالي أغلى شوية وبـ تبدأ من 6690 جنيه. الجينز بـ 1900 جنيه والبنطلون العادي بـ 1995 جنيه. التي شيرت الرجالي من 1375 جنيه وأنت طالع والبولو بـ 1150 جنيه، وأرخص حاجة في القسم الرجالي هي الكرافتات (950 جنيه). مرة ثانية بـ نأكد أن الجودة في المعروضات كلها عالية جدًا، وأي حد متابع خطوط الموضة والمصممين المشاهير هـ تعجبه محتويات المحل خصوصًا البالطوهات والجينز، لكن مش هـ تعجبه الأسعار غير المنطقية. الموظفين في المحل ودودين، لكن طبيعي في أي محل غالي زي ده أنهم يفضلوا قريبين من الزبائن ويلفوا وراه زيادة شوية.

...

برشكا: چينز وتي شيرتات مطرقعة في المهندسين
اصدرت في: 03/07/2011

«برشكا – Bershka»، الأخ الثالث للمحلات الأسبانية الأصل «زارا – Zara» و«پول اند بير – Pull and bear»، اقتحم مؤخراً عالم الأزياء المصري بكل قوة، و فجأة بقى ملجأ الشباب الأساسي اللي ما يقدروش يعملوا جولة تسوق من غير ما يعدّوا عليه. خصوصاً فرع المهندسين لإنه دورين وتحسه هو لوحده عبارة عن مول صغير، وأغلب الأوقات ماتعرفش تقف فيه من كتر الزحمة. الدور الأول فيه الملابس الحريمي وأجدد الحاجات اللي وصلت، والدور الثاني نصه رجالي، ونصه الحاجات القديمة شوية واللي عليها خصومات. من أشهر الحاجات اللي بـ يعملها «برشكا» هي الپلوفرات الخفيفة، والتي شيرتات بالألوان الفاقعة والأحذية المصنوعة من جلد الثعبان اللي طالعة موضة قوي! ملابس «برشكا» المصري بـ تميل قوي للطرقعة، خصوصاً في مجموعة الأحذية. المحل دايماً بـ يبقي فيه أجدد حاجة نازلة وأجدد الأفكار اللي في مجلات الموضة. من أول البنطلونات اللى وسطها عالي High Waist ولغاية الأحذية الغريبة. وزي ما انتم أكيد مُتَخيلين، مش دايماً بـ تبقى الحاجات المجنونة دي شكلها حلو. البياعين عامةً بـ يبقوا في حالهم، ومش بـ يفضلوا لازقين جنبك وانت بـ تتفرج، و دي حاجة دايماً بـ تضايقنا في المحلات التانية. حتى في غرف القياس، اللي دايماً بـ يبقى فيه حد جنبك عشان لو عايز لون أو مقاس تاني يجيبوه لك على طول، برضه مش بـ يبقوا موجودين. وانت داخل الپروڨا، بـ يدولك قطعة بلاستيك مكتوب علها عدد الحاجات اللي أخدتها تقيسها، وانت خارج بقى بـ ترجعها تاني وتديهم الحاجات اللي مش هـ تاخدها. ودي كمان حاجة حلوة قوي هناك، لأن في معظم المحلات فيه ناس بـ تتكسف تفضل تقيس وما تشتريش حاجة في الآخر. إنما في «برشكا»، محدش بـ يبقى مركز معاك أساساً حتى لو دخلت تقيس 20 مرة، فـ خد راحتك على الآخر وماتقلقش! أغلب الأوقات بـ يبقى فيه هناك حاجات مرعبة قوي من كتر ما هي مش تقليدية، زي مثلاً الـچينز البهتان ومرسوم ورد عليه كله. بس ماتتخضش ودَوَر كويس لأن بـ يبقى فيه حاجات تانية حلوة قوي بس لازم تلقطها. ورغم أن الملابس هناك أغلبها شكلها غريب قوي، بس برضه بـ يبقى عليها إقبال جامد جداً، وفيه ناس بـ تحب فعلاً تشتريها وتلبس الحاجات الغير تقليدية دي. ومن أحسن الحاجات في «برشكا»، أن مش كل الملابس اللي هناك على نفس النمط ومش كلها غريبة قوي كده، يعني زي ما عنده كده، عنده برضه حاجات رقيقة، وحاجات سهرات، ده غير الأساسيات Basics سواء تي شيرتات، أو چواكيت أوچينزات. بس في الآخر الحاجة المشتركة فى كل الحاجات اللي بـ يبيعها «برشكا»، إن مفيش حاجة عنده مش ماشية مع الموضة.

...

ﭘول اند بير: ملابس "سوبر" كاﭼوال في المهندسين
اصدرت في: 14/06/2011

رغم التشابه الشديد بينه وبين «بيرشكا – Bershka» اللي من نفس سلسلة محلات الملابس الأسبانية اللي فتحت في مصر مؤخراً ومعاهم كمان «ماسيمو دوتي – Massimo Dutti»، إلا أن « ﭘول اند بير – Pull & Bear» له شخصية مميزة ونسبة "الطرقعة" أو الـ "Funky Style" أقل شوية في المحل ده، وكمان الملابس الرجالي واخدة القطاع الأكبر منه على عكس شقيقه « بيرشكا – Bershka» اللي مسيطر عليه الجانب الأنثوي. موجود في شارع جزيرة العرب قدام فرع «تومي هيلفجر - Tommy Hilfiger»، وعلى نفس الصف بتاع إخواته «بيرشكا – Bershka» و«ماسيمو دوتي – Massimo Dutti». المحل تصميمه من الداخل مثالي ولايق تماماً على نوعية الموديلات اللي بـ يعرضها، الديكورات باللون الرصاصي الغامق والإضاءة كمان غامقة بس متوزعة بشكل عبقري عشان الرؤية تكون واضحة، وموسيقى الـ (House) بـ تهز المكان وبـ تديك إحساس بالطاقة وإنك عايز تشتري لبس ينفع ترقص بيه على المزيكا دي! في القسم الرجالي الغالب على المحل كل أشكال الملابس الكاﭼوال موجودة، الجينز أسعاره بـ تبدأ من 260 جنيه وفيه كل المقاسات حتى الكبيرة قوي اللي مش موجودة في أي حتة، والتي – شيرتات من 100 لـ 190 جنيه والبولو شيرت بـ 219 جنيه، والقمصان الـ (Check) أو المربعات اللي تعتبر علامة مميزة لمنتجات « ﭘول اند بير – Pull & Bear» موجودة بسعر 250 جنيه وبكل الألوان، وكل القمصان قصتها بـ تكون (Slim Fit) أو متفصلة على الجسم عشان لو حد وزنه زيادة شوية يتجنبها. الـﭼواكت خطيرة، سواء الـ "سوبر كاﭼوال" بالرسومات والجرافيكس اللي عليها بالألوان الزاهية زي البرتقالي والموﭫ، أو البليزر الجبردين بتصميمه الأنيق بالبادﭺ اللي بلون مختلف من عند الكوع، وكالعادة بـ يكون ضيق وعلى قد الجسم بالظبط. فيه كمان تشكيلة ﭼواكت جلد وﭼواكت من القطن السميك بـ "كابوشون" للرأس وده كان سعره 460 جنيه. كم هايل من الإكسسوارات زي الشنط الصغيرة الجلد اللي بـ تتعلق (Cross) أو على الوسط ودي سعرها حوالي 200 جنيه، والكوفيات الكاروهات بكل الألوان والأحزمة، بس اللي كان ملفت فعلاً تصميمات الجزم والكوتشيات رغم التشكيلة الصغيرة اللي في المحل، معظمها مصنوع من القماش وأسعارها من 300 لـ 500 جنيه، وأفضلها كان الـ (Half Boots) بتصميمها الإيطالي البسيط الشيك. في قسم الملابس البناتي لاحظنا أن معظم الموديلات شبه «بيرشكا – Bershka» كتير وبرضه مطرقعة حبتين بس بأسعار أقل حاجة بسيطة، بس فيه معروضات معتدلة مش مجنونة قوي، زي التي - شيرتات والـبوديهات الأساسية (Basic) السادة اللي بـ تصلح لكل المواسم بكل الألوان بسعر 120 جنيه، والجزم الفلات بأسعار من 100 لـ 200 جنيه. الإكسسوارات والشنط والإيشاربات قليلة بس المعروض منها شيك جداً بس غالي شوية. وانت داخل البروفة بـ تاخد القطع اللي عايز تجربها كلها وكارت عليه عدد القطع اللي معاك، والخدمة محترفة جداً ومش هـ تلاقي حد بـ يلاحقك أو يسألك "بـ تدور على حاجة معينة"، بس هـ يساعدوك وقت ما تسألهم بس. خرجنا من « ﭘول اند بير» بـ نفكر إزاي ندبر فلوس عشان نشتري 4 أو 5 أطقم من عنده، منتهى الشياكة والتميز وكل المعروضات عليها تيكيت بـ يقول أنها « Pull & Bear»، إملى محفظتك وإتجه إلى شارع جزيرة العرب واستمتع بالـ (New Arrivals) بتاعة 2011 في المحل.

...

النيل ستوك: ملابس قطن بأسعار متفاوتة في المهندسين
اصدرت في: 09/05/2011

النيل ستوك هو محل لملابس الأقطان الرخيصة زي بواقي التصدير، ودايما كنا نلاقى عنده الهدوم القطن الأساسية الرخيصة قوي زي الملابس الرياضية، وزي ملابس البيت والنوم. فرع النيل ستوك الجديد موجود في نص شارع شهاب جنب حلواني «قويدر»، من أول ما تدخل المحل ماتحسش أبداً إنه ده هو النيل ستوك اللي بـ يبيع هدوم رخيصة زي ما إحنا متعودين عليه من زمان. المحل نضيف قوي من جوة ومُنَظَم زي المحلات الكبيرة اللي بـ تبيع هدوم بميات الجنيهات. البياعين اللي في المحل ودودين جداً وبـ ييجوا يساعدوك من نفسهم لو حسوا إنك واقف محتاس أو بـ تدور على حاجة معينة (بس برضه من غير ما يفضلوا واقفين فوق دماغك ويخنقوك). الحقيقة إحنا مش عارفين الكلام ده حاصل عشان المحل لسّه فاتح جديد ولا ده هـ يفضل العادي عندهم، بس الحاجة الأكيدة إنهم لو استمروا كده هـ يكسبوا زباين كتير قوي. الحاجة الوحشة في المحل إنه كبير ومافيهوش غير پروﭬتين بس لقياس الهدوم، يعني لو المحل زحمة شوية إنسى إنك تعرف تقيس أي حاجة. بما إن نوعية الهدوم عندهم تقريباً واحدة، فـ مش هـ تلاقي أقسام كتيرة هناك. أول ما تدخل من باب المحل هـ تلاقي أرفف وشماعات عليها تيشيرتات شبه بعض (يا اما باللون أو بالنوع)، فيه بعد كده ستاند للشرابات، والحاجة الغريبة اللي لاحظناها فيه هي إن كل الشرابات اللي بصينا عليها كان سعرها موحد مهما كان نوعها أو سمكها أو طولها (19.98 جنيه). ومن وسط الشرابات ديه لاقينا شراب عجبتنا فكرته جداً، وهو شراب طبي مخصوص لمرضى السكر. الشراب تقيل عشان يدفي، لكن عاملينه قصير شوية عن العادي، والأستيك بتاعه خفيف قوي ومعمول من خامة معينة مريحة جداً عشان مايبقاش ماسك على رجل مرضى السكر ويحبس الدم فيها، وبرضه كان زيه زي باقي الشرابات من ناحية السعر (19.98 جنيه). وفي آخر المحل خالص فيه قسم لملابس الأطفال من أول سن سنة واحدة وإنت طالع، بس أغلب أسعار ملابس الأطفال مش رخيصة قوي، يعني بـ تبتدي من أول 50 جنيه. بالنسبة لخامات الملابس، فـ هي كويسة جداً وناعمة. لكن على عكس بعض المحلات التانية، التيشيرتات الرخيصة في نايل ستوك كانت برضه خامتها حلوة جداً. الشيء الغريب قوي بقى كان تفاوت الأسعار في الهدوم، يعني مثلاً التيشيرت السادة اللي بنص كم كان سعرها في حدود 30 جنيه، ولمّا تِقَلِب في نفس الستاند تلاقي تيشيرت تانية سادة برضه بس بـ 160 جنيه. يمكن الفرق الوحيد بينهم يبقى إن التيشيرت اللي بـ 160 جنيه دي قَصِتها تِدّي أكتر على (توب) للخروج، على عكس التيشيرت التانية اللي تمشي أكتر للرياضة والنادي أو للمشاوير. عامةً أسعار التيشيرتات كانت بـ تبدأ من 25 جنيه ولغاية 180 جنيه. عجبنا هناك تيشيرت سادة بكم طويل وبرقبة مقفولة سعرها 99 جنيه، وجنبها كان فيه أختها بالظبط بس برقبة عالية (هاي كول) وكانت بـ 109 جنيه. أما بالنسبة للبنطلونات فـ عندهم تنوع جامد فيها، يعني كان فيه بنطلونات للرياضة وبنطلونات رسمية للشغل وبنطلونات جينز وپرمودا، وحتى شورتات البحر كمان. أسعار البنطلونات كانت من أول 50 جنيه لغاية 180 جنيه، وبالنسبة للجيبات كان فيه مجموعة مش بطالة، وكان فيه تشكيلة جيبات رسمية في حدود 150 جنيه. من ضمن الحاجات اللي لاحظناها هناك كانت إن فيه ملابس كتير التيكيت بتاعها مكتوب عليه اسم محل «بنيتون» وصنع في سوريا. بس اللذيذ إن الملابس بتاعة «بنيتون» ديه كانت أسعارها حلوة قوي، عجبنا منهم قميص سادة بنص كم وكان سعره 78 جنيه. لو جيت بعد كده تنزل تعمل شوية شوپنج إبقى عَدّي على النيل ستوك، أكيد هـ تلاقي هناك حاجة ولا حاجتين لُقطة بأسعار رخيصة قوي.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن