المعادي تسوق in Cairo, Egypt

تسوق

ميس توتي: لبس شتوي وفساتين سواريه في مكان واحد في المعادي
اصدرت في: 07/12/2015

كثير من البنات بـ يحبوا فكرة أنهم يلفوا على أكثر من محل بعد كده يختاروا هم هـ يشتروا إيه، والحقيقة أننا مش بـ نتبع الأسلوب ده قوي لو مقتنعين 100 % من اللي شوفناه وطلع علينا حلو، لكن ميس توتي – Miss Tutti هـ يوفر عليكم حيرة كبيرة بالتنوع اللي لاقيناه عندهم. مبدأيًا الأسعار هناك معقولة جدًا في كل حاجة، ممكن بس ما يبقاش فيه تعدد كثير في أنواع الفساتين السواريه، لكن التنوع في باقي الحاجات من بنطلونات جينز وسويت شيرت وجاكيتات خفيفة، كل الحاجات الأساسية موجودة، إحنا عجبنا هناك التنوع والأسعار، لفت انتباهنا بنطلون جينز خامته طرية جدًا مش زي الجينز العادي، ولونه ما بين الأزرق الغامق واللبني (150 جنيه)، وكان فيه منه كل المقاسات ودرجات الجينز المختلفة. عجبنا بلوفر مرسوم عليه دوائر ومثلثات بشكل هندسي فيه صفوف وكان فيه كل درجات البني والبيج، وكان بحوالي (220 جنيه)، وكان فيه منه اللون الأسود واللون الأزرق، كمان كان فيه بلوزة خفيفة طويلة لحد الركبة مدرجة بكل الألوان أصفر وبني وبرتقالي وأزرق وأبيض (175 جنيه)، برضه كان فيه مجموعة جاكيتات خفيفة لحد ما بعد الركبة، وكان مرسوم عليها شكل هندسي شبه السمبوكسة (245 جنيه)، وكان فيه منه كل الألوان البيج والأزرق والبرتقالي، ومعاه بلوزة طويلة خفيفة برضه لحد الركبة (145 جنيه). آخر حاجة عجبتنا كان جاكيت طويل قوي قبل الكعب بشوية ولونه بيج في بني غامق (225 جنيه) وكان مرسوم عليه بطريقة حلوة مثلثات صغيرة وخطوط بني، وبعدين فراغ كبير فيه سمبوكسة باللون البني برضه. "ميس توتي" مكان لطيف أنك تشتري منه أكثر من حاجة، بس أكيد مش كل الحاجات اللي أنت محتاجاها.

...

سيركل كيه: فطار لذيذ مع أجمل كوباية قهوة بكل أنواعها في المعادي
اصدرت في: 18/10/2015

برغم وجود مطاعم وكافيهات كثيرة جدًا في شارع 9 إلا أننا ما بـ نستمتعش بالكابتشينو بتاعنا أو اللاتيه إلا في Circle K واللي بالمناسبة جنب كوستا جدًا يعنى منافسة قوية، بس فعلًا نوع القهوة بتاعته حلوة جدًا وهو اللي بـ يخلينا نبدأ يومنا مستمتعين ومتمزجين بكل رشفة من كوب قهوتهم الساخن الصبح بدرى. أول ما فتح سيركل كيه - Circle K في شارع 9 افتكرناه سوبر ماركت بس، لكن أول ما دخلنا جوه لقيناه بـ يقدم كل أنواع القهوة وعنده كمان ساندويتشات تركي وسوسيس ودوناتس وكوكيز، يعني لو عاوز تفطر فطار خفيف مع قهوة عالمية يبقى ده أكيد مكانك. والحقيقة أننا متابعينه من أول ما فتح وكان لسه ما عندوش نمرة تليفون، وده اللي أخرنا أننا نتكلم عنه لحد دلوقت، لكن الحمد لله حاليًا هو مش بس بـ يقدم قهوة ودوناتس، لأ ده بدأ في عمل ساندويتشات سوسيس وبـ تحط عليها الإضافة اللي أنت عاوزها من جبنة أو فلفل أو بصل أو كاتشاب أو مايونيز أو مسطردة او باربكيو. طلبنا ساندويتش سوسيس Special بـ 25 جنيه، وبـ يتعمل بخلطة بالبصل والفلفل الألوان بس في الوقت ده الفلفل كان خلص، فحطينا عليه جبنة وكاتشب وباربكيو، ومن حظنا السعيد أن كان فيه عرض أن أي ساندويتش تطلبه تأخد واحد ثاني هدية، فجيبنا Hot dog عادي مش Special، والفرق بينهم أن الأخير من غير إضافات بس، الساندويتش كان طعمه حلو قوي، لكنه كان بالنسبة لنا مش مستوي كويس، لأنه ما اتسلقش مجرد اتحط على الجريل بس، لكن فيه ناس بـ تحبه كده، إحنا بـ نحبه Well done، وكانت غلطتنا أننا ما أكدناش عليه أنه يحطه أطول فترة ممكنة على الجريل. لكن أجمل وأفضل حاجة عند Circle K هي المشروبات بكل أنواعها، إحنا طلبنا Caramel Macchiato بـ 26 جنيه، وكان طعمه تحفة وهو ساقع وعليه كريمة وصوص كراميل كثير وكمان زي ما بـ نحب بلبن خالي الدسم، وطلبنا كمان Ck Frosted، وده بـ يبقى شبه الـ Smoothie كده وبـ يبقى له الماكينة بتاعته اللي أنت بـ تحط منها بنفسك، وكان فيه نوعين ليمون وتفاح أخضر، بعد ما تذوقناهم اختارنا التفاح الأخضر اللي كان حلو قوي، ولو أن طعم الثلج كان غالب شوية. وفي زيارة ثانية لنا كنا جربنا الكابتشينو عنده بـ 20 جنيه، وكان طعمه مميز ومركز ويعدل المزاج، وموكا فرابيه بـ 30 جنيه، وبرضه كان حلو جدًا. الحقيقة أن أجمل حاجة في المكان أنه متنوع وبـ يعطيك اختيارات كثيرة، فعمرك ما تزهق منه أبدًا، يعني لو عاوز تاكل حاجة خفيفة أو آيس كريم أو عصير، كأنك في سوبر ماركت بالضبط بـ تختار اللي أنت عاوزه، ولو عاوز تشرب مشروب مميز وتقعد تقرأ براحتك، هـ يكون مكان مناسب.

...

EG Bookstore: مكان هادئ للقراءة، المذاكرة، أو الشغل في شارع 9 فى المعادي
اصدرت في: 03/08/2015

كثير من المكتبات في الفترة الأخيرة بقوا بـ يعملوا زي كافيه جواهم، علشان يجذبوا الناس أنهم يبقوا موجودين هناك باستمرار وبالتالى بـ يساعد في نسبة مبيعاتهم للكتب، ولو ما اشتروش كتب يشربوا شاي أو نسكافيه، بس الوضع كان مختلف هنا في EG Bookstore اللي اكتشفناه بالصدفة وإحنا معديين على سوبر ماركت مترو، جذبتنا اليافطة بتاعته لأنه داخل ممر ضيق في عمارة الدكاترة، هـ تلاقي بزار شنط وإيشاربات فلكورية في وشك قبل ما تشوفه مالكش دعوة به، وبعدين هـ تلاقي المكتبة على أيدك الشمال. أول ما دخلنا لفت نظرنا أن فيه مكان كبير ممكن نقعد فيه، وفي الوقت ده كان وقت إمتحانات فكان فيه ناس كثيرة بـ تذاكر، وفي الوش فيه زي مكان صغير مفتوح حد بـ يعمل فيه القهوة والشاي، أو أي مشروب تحبه ثاني، غير ماكينة التصوير اللي جنبه، لو حد حب يصور ورق. (صحيح تصوير الورقة بنصف جنيه بس مش مشكلة) شفنا هناك قسم كنا بـ نشوفه في المكتبات العامة زمان الحقيقة، وهو قسم الكتب المستعملة، وكان تقريبًا كله كتب علمية، ما بين علم الاقتصاد، لعلوم الهندسة والعمارة، والتنمية البشرية، كل اللي تحبه وأكثر، كمان كل أقسام الكتب والروايات الثانية كانت موجودة وبأسعارها العادية، كتب د. مصطفى محمود والروايات الأكثر مبيعًا، وكتب الإسلام السياسي، ده حتى كان فيه كتب دينية، اللي هي لا غنى عنها في مكتبة أي مسلم، زي سلسلة صحيح البخاري ومسلم، وشرح الأحاديث القدسية للشيخ الشعراوي، وقواميس اللغات. بس أكثر قسم عجبنا جدًا، قسم الأطفال خاصة أنه كان واخد جانب في المحل، ويعتبر أشبه بمكتبة مصغرة لكل حاجة ممكن تحتاجها سواء وأنت طفل أو طالب، من أول الستيكر والأقلام الرصاص والألوان لحد المسطرة الهندسية والماركر، لازم نعترف أن برغم أننا المفروض كبرنا خلاص إلا أننا مازلنا بـ نلاقي لذة في تفقد لعب الأطفال وكتبهم، وأشيائهم الصغيرة، واللي كلها كانت موجودة هناك، بس أكثر حاجة جذبتنا كانت كتب الأطفال اللي أغلبها باللغة الإنجليزية، وقليل منها باللغة الفرنسية والعربية، كان فيه كتب بـ تعلم الأرقام والحروف والحيوانات زي كتاب Baby Animal وكان بـ 37 جنيه، وكتاب colors ومعاه CD وكان بـ 25 جنيه. وفيه كتاب قصص بالعربي عجبنا، اسمه " حكايات قبل النوم". ده غير الـ Notebooks بأشكال وأحجام مختلفة، واللعب والستيكرز التعليمية للحروف والأرقام. المكان هناك ممكن يساعدك جدًا أنك تشتغل أو تذاكر بهدوء، وتشرب مشروب خفيف يساعدك على التركيز، ومافيش مانع بعد ما تخلص شغل تبقى تشتري لك كتاب ترفه به عن نفسك.

...

ذا كورنر: فساتين سواريه وإكسسوارات للبيت بمحل واحد في المعادي
اصدرت في: 20/06/2015

كثير ممكن ندخل محلات متخصصة في الملابس السواريه وتعجبنا، بس أنه يبقى محل سواريه وإكسسوارات بيت في نفس الوقت هو ده الجديد، وده اللي لقيناه في ذا كورنر –The Corner في زهراء المعادي. المحل له واجهة زجاجية طول ما أنت ماشي في زهراء المعادي تقدر تشوف تصميماته الجديدة اللي بـ ينزلها كل فترة، وجنب التصميمات دي بـ يبقى فيه بعض قطع الديكورات، مدخل المحل من العمارة نفسها، للأسف مالوش دخلة خاصة به. أول ما بـ تدخل بـ تلاقي الإكسسوارات المنزلية أمامك، وعلى أيدك الشمال، جانب آخر فيه الفساتين والعبايات. الحقيقة أن ما كانش فيه فساتين سواريه كثيرة، أو تصميمات مختلفة أو مبهرة، بس أنتِ ممكن تختاري التصميم اللي أنتِ عاوزاه وهم ينفذوه لك. عجبنا فستان لونه روز بأكمام طويلة ومقفول وطويل وتفصيلته مستقيمة، وعليه زي شال واسع متخيط فيه فـ يخبي منطقة الصدر والبطن لو ضيقة، وكان بـ 1350 جنيه. كمان كان فيه فستان لونه لبني فاتح كت ومن فوق لحد الصدر عليه قماشة مشغولة بالترتر واللولي وكان بنفس السعر تقريبًا. والغريب أنهم كان عندهم مجموعة عبايات كمان، بس ذوقها خليجي شوية أو جدًا، ما بين عبايات بالترتر وعبايات واسعة بس تيجي حاجة تبوظها لك كلها من مجرد تفصيلة صغيرة، لفتت نظرنا عباية سوداء وعلى أكمامها زخرفة بسيطة بني، كان شكلها لطيف وسعرها 800 جنيه. كمان هم بـ يأجروا فساتين أفراح من أول 2000 جنيه للمستعمل لحد 5000 جنيه للفستان اللي أول لبسة. أما عن الجانب الآخر للمحل، لفت نظرنا قطعة شمع مستطيلة جواها دائرتين فوق بعض منحوت عليهم "القلب قد أضناه عشق الجمال والصدر قد ضاق بما لا يقال" وجواها لمبة علشان تنور، وسعرها 450 جنيه. وكان فيه أباجورات عادية بس ما كانش مكتوب أسعارها، وقطع فنية صغيرة لتماثيل، بس أكثر حاجة عجبتنا الجزء اللي كان فيه قطع زينة عربية نحاس لأبريق شاي وتحته طبق كله زخرفة إسلامية، وسعره 550 جنيه، وكمان مبخرة بنفس الزخرفة بـ 220 جنيه. وكان فيه زي كوفر مثلث بـ يتعلق على اللمبة نحاس مخرمة دوائر صغيرة بـ تعمل شكل إضاءة مختلف، وسعرها 350 جنيه للواحدة. أما أكثر قطعة فنية خدتنا ثلاث فازات مدورين نصفهم لونهم أبيض والنصف الثاني أزرق وفي الجزء الأبيض مرسوم ورد خفيف بالأزرق، كانوا تحفة فنية ونازل عليهم تخفيض، فالثلاثة سعرهم 550 جنيه. تجربة "ذا كورنر" كانت مختلفة، تدخل عاوز تشتري فستان تلاقي نفسك خارج بحاجات للبيت لمجرد أنها عجبتك، بس ننصحهم ينوعوا في الموديلات شوية لأنها كانت قليلة.

...

هلال: محل فضة متميز وأسعاره معقولة في شارع 9 في المعادي
اصدرت في: 12/05/2015

كل مكان جديد بـ نروحه بـ يختلف عن اللي قبله بحاجات كثيرة منها الذوق والجودة والسعر، وده كله متوفر في محلات الفضة اللي في شارع 9 بالذات محلنا النهارده "هلال – Helal".. محل صغير في أول شارع 9 بعد محطة المعادي، وجنبه أكثر من محل فضة، بس إحنا اختارناه هو بالذات علشان كانت الواجهة بتاعته منورة ومبينة منتجات الفضة مش زي الباقيين مش واضحة وضلمة. أول ما دخلنا لفت نظرنا الخواتم جدًا، لأننا لقينا تشكيلة أكثر من رائعة ومتنوعة جدًا، طبعًا بالنسبة للأسعار ده بـ يختلف من حجمها وسعر الجرام في الوقت اللي سألت فيه، لأننا أول مرة رحنا الأسعار كانت أرخص من ثاني مرة نروح. عجبنا خاتم حلو قوي مربع وجواه كلمة "حب" مزخرفة، وكان فيه واحد زيه بس مدور سعره بـ يبدأ من 90 جنيه على حسب وزنه، وواحد ثاني نفس الحجم مكتوب عليه كلمة "مودة". كمان كان فيه خاتم حلو قوي على شكل سمبوكسة أقرب للمربع شوية مكتوب عليها كلمة "صحة" ومزخرفة بأسلوب أقرب لعزة فهمي، والحقيقة أنه كان حلو قوي برضه وبـ 150 جنيه تقريبًا. كمان كان فيه خاتم على شكل مربع كبير مكتوب عليه "ومازال للحب بقية"، وهو حجمه كبير يعنى تقريبًا بـ 250 جنيه. ولفت نظرنا برضه خاتم مربع مكتوب عليه "فالله خير حافظًا" بحوالي 150 جنيه. طبعًا الخواتم العادية كانت موجودة اللي مكتوب عليها "سبحان الله" و"الحمد لله" و"ما شاء الله" بأشكال مربعة ومدورة ومستطيلة. وكان فيه خواتم مرصعة بالأحجار الكريمة الزرقاء والخضراء وسعرها بـ يتحدد على حسب الحجم والحجر الكريم. وعلى الجانب الآخر كان فيه حلقان فضة صغيرة حلوة قوي بأشكال متنوعة تبدأ من 50 جنيه على حسب حجمها طبعًا، والدلايات العادية برضه كانت كويسة، وطبعًا ما نقدرش ننسى الميداليات اللي كان فيها أحجام كبيرة وصغيرة، أكثر واحدة عجبتنا كانت ميدالية فيها مثلث صغير نازل منه ثلاثة ملثاث صغيرة أو دوائر مكتوب فيها كلمات زي "فالله خير حافظًا" أو " من ينصره الله فلا غالب له" أو "سبحان الله" و"الحمد لله" أو أي حاجة عاوز تكتبها، وكانت بحوالي 250 جنيه، كمان كان متوفر ميداليات مربعة عليها آيه قرآنية أو مفرغة ومجرد الكلام بس على شكل دائرة أو مثلث، وممكن برضه تكتبوا فيها اللي أنتم عاوزينه، ولما بـ تطلبوه حاجة تكتبوها مخصوص بـ تستلموها في حوالي 4 أيام. محل هلال تقدر تعتبره بيتك الثاني اللي لما تتزنق في هدية تلاقيها عنده بسعر معقول، ومعاملة الناس لك لطيفة جدًا.

...

الكتب خان: لسه أجمل مكتبة في المعادي
اصدرت في: 18/04/2015

بعد ما فاتت 8 سنين قدرت تحافظ فيها على مكانتها كأجمد مكتبة في المعادي من حيث الأجواء الدافئة والمكان المريح، دلوقت "الكتب خان Al Kotob Khan -" عملت شغل هائل بعد ما راحت لمكان أكبر في فرع دجلة الجديد، على عكس فرعها القديم في شارع اللاسلكي، الفرع الجديد للكتب الخاب بـ يوفر مساحة كبيرة للكتب والقراء. المكان عبارة عن فيلا دورين ببلكونة مساحتها معقولة فيها عدد من الترابيزات والكراسي. الدورين معروض فيهم كتب واصلة من الأرض لغاية السقف، مع قعدات جنب أرفف الكتب، وقت ما كنا هناك، أغلب القعدات كان عليها طلبة شافوا في الكتب خان مكان مثالي للمذاكرة. نكرر من ثاني، الفرع ده أكبر من القديم بكثير، ومن هنا ظهرت ميزة كبيرة وهي وجود عدد أكبر ومتنوع من الكتب؛ كل حاجة من الروايات الكلاسيكية والمعاصرة، لغاية الكتب التاريخية والتعليمية، تقدر كمان تلاقي كتب بلغات مختلفة لو حبيت تطور من لغاتك. التنوع ده يعتبر جنّة لعشاق القراءة؛ الفكرة أنك لو أول مرة تروح هناك، كمية الكتب الكبيرة دي ممكن تعمل لك شوية ارتباك. في الدور الأول جنب مكتب الكاشير هـ تلاقي بار للفاست فوود بمنيو تشمل كل أنواع السناكس والمشروبات من القهوة، والمشروبات الغازية، والمافينز والشوكليت كيك، لغاية ساندويتشات بانيني ومقرمشات. وزي ما بـ نشوف في كل المكتبات الحديثة، بـ يعرضوا كمان هناك أدوات مكتبية للبيع؛ حائط كامل في الدور الثاني عليه مفكرات مطبوعة ويدوية بألوان ومقاسات مختلفة. من السهل تفهم ليه الكتب خان تعتبر مأوى عشاق الكتب؛ الأجواء المريحة والمجموعة الضخمة من الكتب المعروضة بـ تضيف لها مزايا زيادة عن باقي المكتبات الشهيرة في مصر، بس تحذير هام، هام جدًا جدًا، بعد زيارة واحدة للكتب خان، الموضوع بقى إدمان خلاص ومالكش علاج، سواء كنت عاوز تشتري كتب، تذاكر أو حتى تضرب قهوة سريعة مع أصحابك.

...

مكتبة بيتا: مكتبة رائعة لكتب الأطفال والفن والتاريخ في المعادي
اصدرت في: 31/03/2015

شارع 9 اللي معروف بمحلات الأكل الجميلة والكافيهات المبهجة، فرحنا لما شفنا فيه مكتبة تحت Lido, Antie Loulou واللي بقى لها سنين كثيرة بـ تمتعنا بكتبها. أول ما بـ تدخل المكتبة، بـ تجذبك ألوان كتب الأطفال، وتنوعها الشديد في مكتبة بيتا – Beta في المعادي، عندهم كل أنواع اللعب التعليمية سواء فى كتب التلوين أو بكروت التعليم اللي برضه ملونة وشكلها تحفة، أو بكتب تعليم الكتابة المبسطة. عجبنا كتاب تعليم الحروف والأرقام للأطفال، كان مبسط جدًا وكبير اسمه Lesson plan Book وكان بـ 80 جنيه، كمان كان فيه مجموعة كتب تلوين متنوعة جدًا، لشخصيات كرتونية جديدة ومختلفة، منها كتاب Angelina Ballerina بـ 50 جنيه. أسعار كتب التلوين عامة بـ تبدأ من 25 جنيه لـ 60 جنيه. كمان هـ تلاقوا مجموعة متميزة جدًا من كتب تعليم الطبخ، واللي تتميز بأن حجمها كبير جدًا، زي المجلدات بس أقل شوية حوالي 150 صفحة، وفي كل أنواع المطابخ الهندية والشرق الأوسط والأكل الصحي سواء للأطفال أو للكبار، والكتاب الواحد كان بـ 80 جنيه. كمان فيه قسم خاص بتعلم علوم الإدارة والتسويق والقيادة الفعالة للمؤسسات، عجبنا فيه كتاب اسمه Living the Brand, How to transform every member of your organization into a brand champion، وكان بـ 230 جنيه. لكن أكثر قسم عجبنا قسم كتب فنون الرسم والأنيميشن، برغم أن الفنون دي لازم تمارسها بأيديك إلا أن الكتب في الموضوع ده كانت مفيدة جدًا. شفنا كتاب كان شكله لذيذ جدًا، اسمه Art projects بـ 90 جنيه، وكان مليان رسومات لأقمشة وألوانها وإزاي نعمل بها مشروعنا الخاص بالأنسجة والألوان وكثير من التفاصيل الثانية. كمان كان فيه كتب متميزة زيPastel painting والـ Drawing الواحد بـ 160 جنيه، وهو يعتبر كدليل للرسم أو كمرجع أكثر من كتاب. ده غير أقسام الروايات العادية سواء للكبار أو مرحلة المراهقة، وكتب التاريخ والإسلام. مكتبة بيتا متميزة فعلًا مش بس لاهتمامها بعقل الطفل والشخص الناضج واهتماماته، أو لتوفيرها لعب أطفال بجانب الكتب، هي بـ تنمي الثقافة من خلال بناء طفل صغير سوي ومتميز.

...

أوركيدا: أرخص محل ورد في شارع 9 في المعادي
اصدرت في: 29/03/2015

المعادي منطقة معروفة بكثرة محلات الورد وجمالهم، وإن فيه منافسة جامدة بين كل محل والثاني في الذوق والرقي وجودة الورد وطبعًا سعره. طبقًا أن فيه بعض الناس مش بـ تعرف تقضى يومها من غير ما يبقى فيه ورد في بيتها أو على مكتبها، مش شرط يكون فيه مناسبة غير عادية علشان نشتري ورد، أو حتى ممكن تكون هدية رقيقة لحد أنت عاوز تبسطه باختلاف صلة قرابته بك. مما لا شك فيه أن محل النهارده أوركيدا – Orchida أسعاره مافيش أرخص منها، لأن البوكيه الجاهز الكبير جدًا، اللي في أي مكان بـ يتراوح سعره من 50 لـ 300 جنيه، وهو بـ يبيعه بـ 120 جنيه بس. بالشكل اللي أنت عاوزه وتختاره. يعنى ممكن يبقى البوكيه فيه ورد أبيض مستورد مع ورد لونه موف الصغير اللي شبه الـ Daisy ، وزهرة تيوليب Tulip، أو مجرد ورد ثاني من اللون اللي تحبه، من نفس نوع الورد الأبيض المستورد. كمان ووردة التيوليب المعروفة أن سعرها من 20 لـ 25 بـ يبعها بـ 15 جنيه، تخيلوا!! ولما شفناها كانت لسه واصلة عنده فكان معظمها لسه مقفول خالص ما فتحش. أما ورود الروز Roses اللي شبه الورد البلدي بتاعنا، بـ يبيع الوردة الواحدة بـ 8 جنيه، والمعروف عنها في أي مكان أنها على الأقل بـ 10 أو 15 جنيه، لكن لو كان حظك حلو ولقيت منها لون جميل، ممكن تعمل بوكيه كامل منها ومش هـ يكلفك كثير، لو زودت حوليها ورق أخضر وأعشاب لونها أصفر بـ تبقى أحلى من الورد الأبيض الصغير خالص، وهـ يعملك فيه سعر حلو. كمان بـ يعمل لك بوكيه ورد صغير له قاعدة صغيرة، منها الحجم المتوسط بـ 50 جنيه، وحجم صغير بـ 30 جنيه، وأصغر بـ 20 جنيه أو 25 جنيه، على حسب نوع الورد اللي بـ تختاره. أوركيدا بـ يوفر لك أنواع ورود مختلفة بأسعار مناسبة جدًا، وفعلًا رخيصة بالنسبة لمكانه في شارع 9 وأنواع الورود اللي بـ يبيعها.

...

رويال جينز: أسعار مناسبة وموديلات عادية في المعادي
اصدرت في: 04/03/2015

طيب بما أننا في وقت التخفيضات دي أنسب فترة تشتروا فيها اللي أنتم عاوزينه بس المشكلة الوحيدة أن مش دائمًا بـ يبقى فيه حاجات حلوة، فلازم تلعبوا دور القناص علشان تفوزوا بقطعة جميلة وسعرها مناسب، وده اللي ننصحكم تعملوه لو رحتم "رويال جينز – Royal Jeans"، طبعًا عنده جاكيتات كثير كل الأحجام والألوان والأشكال والجينز طبعًا، وإلا تبقى عيبة في حقه علشان اسمه. كمان هـ تلاقوا عنده كل أحجام السويت شيرت، وده لفت انتباهنا يعنى غير السويت شيرت العادية اللي بالمناسبة كانت عنده بأشكال مختلفة وكل الألوان، وتنفع أكثر للبيت أو للجيم وسعر الواحد منها بـ 150 جنيه. لكن اللي حيرنا أمامه السويت شيرت الطويلة جدًا عنده أحجامها كبيرة لحد x-large وطولها لحد الركبة وفيه بعد كده كمان، والواحد منهم بـ 165 جنيه. بس أكثر شكل عجبنا وكان طويل برضه سويت شيرت على شكل الشخصية الكارتونية "بندق" اللي في ميكي ماوس وكان بـ 145 جنيه. كمان كان فيه بلوزات خفيفة صوف، كل الألوان والسادة والمشجر الواحدة فيهم بـ 135 جنيه، وبالنسبة للبلوزات الصوف اللي طالعين موضة اللي بـ يبقى مرسوم عليها رسمة ونفس الرسمة على السكارف والشوراب، كان فيه أكثر من واحدة موجودة برسومات مختلفة وحلوة جدًا، وبـ 195 جنيه بس. أسعار الجاكيتات الخفيفة القطن كانت مناسبة برضه كان فيه منها كل الألوان، والستايل اللي بـ يبقى قطن من الأمام ومن الظهر قماش ستان، والواحد بـ 100 جنيه، عجبنا كمان جاكيت خفيف صوف لونه روز ومزخرف على شكل ورد مفرغة كان شكله حلو قوي وبـ 100 جنيه. لكن أكبر تنوع موجود كان في أشكال وألوان الجينز المختلفة، والبنطلونات القماش واللي أسعارها بـ تتراوح بين 95 جنيه، و110 جنيه، و155 جنيه. كمان كل أنواع الجاكيتات اللي ممكن تتخيلوها، من أول الجاكيت الفورمال العادي المقفول بكل ألوانه، وكان بـ 155 جنيه، لحد الجاكيت القطن وفيه القماشة زي سمبوكسات في الخياطة ومن الظهر مفتوح على شكل سبعة علشان يبان القماش الستان، والواحد كان بـ 125 جنيه، وكان موجود منه اللون الأبيض والأزرق. استغربنا جدًا لما لقينا عندهم مجموعة بلوزات سواريه من النوع اللي بـ يلمع، يعنى للناس اللي مرتبط عندهم مفهوم المناسبة باللمعان، البلوزات فعلًا بـ تلمع، وفيه منها الأسود والروز والأزرق وبـ يبقى عليها جليتر ذهبي أو فضي، أو دواريات صغيرة فضي على الحروف، والواحدة بـ 100 جنيه. كمان كان عنده فساتين صيفى ممكن تناسب مناسبة: كتب كتاب أو خطوبة، كان فيه فستان قماشته من فوق لحد الصدر دوائر صغيرة لونها أبيض في رمادي في أسود متداخلة، وكان بـ 295 جنيه. أما عن الفساتين اللي سببت لنا صدمة ذوقية ممكن ناس تختلف أو تتفق معانا، فستان لونه مدرج من البني الغامق للبرتقالى كأنك مطيته من قوس قزح، بس قوس قزح لو شافه أكيد كان تضايق لأنه كان متعب للعين، وكان بـ 220 جنيه. وفستان بكم كله من أوله لآخره ستان أزرق مفرغ على شكل ورود ومطلى بالترتر الفضي، والحقيقة أنه ما عجبناش خالص، وكمان سعره 600 جنيه. في الآخر يا جماعة اللبس ده أذواق بس أهم حاجة تعمل الحاجة اللي تبهجك وتفرح اللي حولك.

...

بيرل بوتيك: محل أزياء وأكثر في زهراء المعادي
اصدرت في: 02/03/2015

شارع زهراء المعادي تحول في البداية من أنه منطقة صحراوية، لمنطقة سكنية، ودلوقت بقى منطقة تجارية، فيه محلات لبس كثيرة ومحلات ديكور (أثاث منزلي)، وكل اللي تحتاجه، بس في الفترة الأخيرة فتح أكثر من محل أزياء خاص بملابس السهرة والمناسبات الخاصة، فأشعل المنافسة على المحل اللي روحناه ولسه فاتح من شهر "بيرل -Pearl ". أول ما بـ تدخل بـ تلاقي صاحبة المحل بنفسها معاك لو محتاج تسأل عن أي أسعار، أو لو عاوز تشوف صور موديلات مختلفة وتختار الموديل اللي تحبه، لأنهم بـ يفصَلوا ودي في حد ذاتها ميزة. الجميل أن المحل مافيهوش فساتين بس، لأ ده فيه كل حاجة ممكن تحتاجها سواء جاكيت أو جيبة أو تايير، كل قطعة لوحدها عادي. عجبنا تايير مكون من توب بيج كات وجيبة أبيض شفافة في بيج مخططة بالعرض بس طبعًا محتاج البطانة بتاعته تطول شوية للمحجبات، كمان كان فيه توب أسود عليه دوائر صغيرة مرصعة ذهبي على الأيد ومن تحت لحد أول البطن بـ 550 جنيه، وتوب ثاني سادة عليه دوائر زيها أخف ولونها فضي بـ 350 جنيه، ولو عاوزة جيبة بس كان فيه جيبة بيج مشجرة (Fleurie) برضه كانت حلوة قوي وبـ 450 جنيه. أما عن الموديلات الغريبة فكان فيه فستان أسود عادي بأكمام طويلة وكل حاجة، لكن من فوق بعد الصدر بحاجة بسيطة عليه دانتيل شفاف مسافة كبيرة وبعدين مكمل بالقماش الأسود، وقبل الركبة بحاجة بسيطة عليه برضه مسافة كف أيد كده دانتيل شفاف أسود، فى الحقيقة إحنا نتمنى أنهم ما ينسوش البطانة وإلا.. يعنى كل واحد حر بقى، وهو بـ 1800 جنيه عامة. أما آخر فستان فكان أسود وواخد موديل مضبوط من فوق ومن تحت على شكل سمكة ومن الجانبين البطانة لونها بيج وفوقها دانيل أسود والحقيقة أنه كان حلو برضه بـ 1700 جنيه. كان فيه موديلات كثيرة جدًا باختلاف الأذواق، فيه اللي تلاقي فيه ترتر كثير أو دبابيس بـ تلمع من عند الصدر بشكل مبالغ فيه، كل واحد وذوقه، بس الأهم أنك تلاقي حاجة حلوة بسعر مناسب، وإن كان فيه بعض القطع مبالغ في أسعارها إلا أنه بالمقارنة بأماكن ثانية أسعارهم معقولة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن