أحذية تسوق in المعادي Cairo, Egypt

تسوق

روكبورت: فرع جديد لمبتكر الأحذية خفيفة الوزن في جراند مول
اصدرت في: 24/06/2014

من سنة تقريبًا بدأت أحذية «روكبورت - Rockport» العالمية تظهر في مصر من خلال بعض المحلات داخل المراكز التجارية، لكن بدأت فروع مستقلة تفتح علشان تبيع موديلات روكبورت بس، وشوفناها في سيتي ستارز وداندي مول ومعادي سيتي سنتر ومؤخرًا في جراند مول المعادي الجديدة. المحل موجود في الدور الأول، مساحته مش كبيرة، المعروضات كمان مش كثيرة، حاجة غريبة جدًا لاحظناها في عدد كبير من محلات الأحذية والإكسسوارات مؤخرًا، بالذات الماركات المعروفة والعالمية، و«روكبورت» ما كانش استثناء للظاهرة دي، كان عارض موديلات محدودة جدًا من الأحذية الرجالي والحريمي، والـ New Arrivals أو موديلات الموسم الجديد كانت ما تزيدش عن 10 موديلات في كل قسم، لكن الميزة أنه كان عارض موديلات السنين اللي فاتت وعليها خصومات كبيرة بـ توصل لـ 30 % من سعرها، أخذنا جولتنا بين أرفف المعروضات وكان لنا الملاحظات التالية. روكبورت للي ما يعرفش متميزة بفكرة الوزن الخفيف للحذاء والنعل الصحي المرن المريح في المشي وفي نفس الوقت قوي ويستحمل الظروف المختلفة، يعني تقدر تقول أن دي النسخة الكلاسيكية والكاجوال من موديلات Crocs الرياضية المشهورة بخفة وزنها. روكبورت عملت موديل بـ ينزل بقى له سنتين تقريبًا اسم True Walk له نعل مميز فيه انحناءات معينة تساعد على المشي لفترات طويلة بدون ألم، وكمان بـ تعالج حالات الفلات فوت بمرور الوقت، كأنه حذاء طبي لكن بشكل مودرن وشيك. بمناسبة الشياكة الموديلات هنا فيها فلتات، حاجات حلوة جدًا مافيش زيها في محلات ثانية، وفيه موديلات كلاسيكية عادية زي اللي بـ نشوفها في محلات زي Geox وScarpa وبعض الموديلات الضخمة زي قريناتها في CAT وTimberland لكن زي ما قلنا الصفة المميزة للمعروضات هنا هي الوزن الخفيف، حتى لو النعل سميك، هـ تلاقيها وزن الريشة. في القسم الرجالي عجبنا هاف بوت فيه منه من الجلد الطبيعي اللميع (1100 جنيه) ونفس الموديل من الجلد المقلوب أو المشحم زي ما بـ يُقال عليه (900 جنيه) وده من موديلات السنة اللي فاتت، مناسب للملابس الكاجوال والكلاسيك. وفيه موديلات تقليدية جدًا، أحذية زي الكتاب ما بـ يقول، بأسعار من 750 لحد 850 جنيه، وطبعًا كان لازم يكون لهم نصيب من موديلات الأحذية الفلات المنتشرة اليومين دول وعملوا موديل واحد بالألوان الأسود والبني والكحلي بسعر 700 جنيه. ومافيش أي موديلات رياضية، هنا أحذية رجالي صريحة وصارمة. نفس الكلام بالنسبة للموديلات الحريمي، فيه أحذية سهرة كلاسيكية جدًا مناسبة للفساتين والملابس الرسمية بأسعار بـ تبدأ من 450 جنيه، وفيه موديلات أقرب للأحذية الرياضية وشكلها رجالي حبتين بأسعار من 500 لحد 800 جنيه. لكن ما حسيناش أن هنا المكان المثالي للأحذية الحريمي، إلا لو واحدة بـ تدور على الأحذية الخفيفة أو الـ True Walk اللي قولنا عليها هـ تلاقي منها بعض الموديلات هنا. الإكسسوارات محدودة، فيه أحزمة جلد رجالي بسعر غير منطقي هو 500 جنيه، مافيش أي مبرر للسعر ده، حتى موظفين البيع نفسهم كانوا مش مقتنعين به وهم بـ يقولوا لنا. الخدمة في الفرع ده معقولة، موظف البيع كان مكشر شوية بس كان بـ يساعدنا لما بـ نطلب المساعدة وبس وده في حد ذاته كويس، لكن بما أن الأسعار زي ما ذكرنا، يبقى لازم تبقى الخدمة على نفس مستوى الأسعار، لأن القرار هنا بـ يبقى صعب، يعني اللي هـ يشتري محتاج يأخذ ويدي مع نفسه ومع البياع كثير قبل ما يدفع 1400 جنيه في حذاء يبدو عادي، بس في النهاية روكبورت بـ يعمل حاجة مختلفة تستحق التجربة.

...

روكبورت: أحذية لكل المناسبات فى معادي سيتي سنتر
اصدرت في: 05/06/2013

حقيقة صريحة وواضحة لكل المصريين، الحقيقة دى بـ تقول أن التسوق فى القاهرة وبالتحديد علشان الأحذية مهمة صعبة. دائمًا ما تقدرش تلاقى اختيارات كفاية تكون جودتها عالية وأسعارها مناسبة فى نفس الوقت. وعلشان معادي سيتي سنتر يعتبر واحد من أجمد مولات القاهرة، وفيه مجموعة من المحلات المتنوعة، كنا متأكدين أننا هـ نلاقي حاجة ترضي ذوقنا. وعلى طول قررنا نشوف «روكبورت - Rockport»، أجدد محلات الأحذية فى المول. الموضوع بكل بساطة أن المحل محبط جدًا. المكان غريب شوية، ضيق وطويل، وفيه إضاءة فاقعة صناعية لونها أصفر ومش بـ تقدم أى إضافة للمنتجات المعروضة. بعيدًا عن الديكورات، الأحذية برضه كانت على نفس مستوى المحل. ما نقدرش نقول أنها سيئة للدرجة، بس تصميماتها كانت عادية خالص. روكبورت متخصص فى الأحذية المناسبة لفساتين السهرة، والكاجوال والسمارت كاجوال والمفروض أنها بـ تجمع بين الذوق الراقي والراحة. شدنا شوية موضوع الراحة ده، بس المشكلة كانت فى الشكل الجمالى. تشكيلة الأحذية الرجالى بـ تتكون من أحذية جلد تقليدية، اللى رغم أنها كانت تنفع كمان للمناسبات الرسمية، بس ناقصها الجاذبية، وعلشان كده فشلت فى شد انتباهنا. الأسعار كانت غالية وبـ تتراوح بين 400: 600 جنيه. الأحذية الكاجوال كانت نفس الأسعار أو أغلى شوية ووضح فيها شوية عيوب، مع شوية صنادل سيئة. قسم الحريمى كان أحسن إلى حد ما، بس برضه بـ يعاني من نفس مشكلة التصميم والتقفيل. التشكيلة الحريمى كانت على نفس فكرة الأحذية المريحة، زيها زى قسم الرجالى؛ حسينا أن دي محاولة فاشلة بـ يحاولوا بها يرجعوا من جديد تصميمات ماركة هاش بابيز Hush Puppies. كملت التجربة مع الخدمة السيئة بكل النواحى؛ كسل، عدم اهتمام وقلة معرفة كلها عينة بسيطة من اللى شوفناه، بس يمكن دى تعتبر ميزة للناس اللى بـ تتخنق من مضايقة البائعين فى محلات كثير فى القاهرة. بصراحة، مشينا من المحل مستغربين، ومافيش حاجة عجبتنا ورجعنا ثانى ندور على محلات أحذية جديدة، محلات تقدر تغير من عجز محلات الأحذية فى مصر من ناحية الأسعار والتصميم.

...

كروكس: سعادتك تبدأ من راحة رجليك فى المعادى
اصدرت في: 29/12/2012

حد فاكر الحياة قبل كروكس كانت شكلها إيه؟ أكيد كانت حياة هادئة، حياة أجمل والذوق العام فيها أكيد كان أشيك. على الرغم أن الأحذية دى شكلها مش عاطفى -وناس كثير أكيد موافقة على كلامنا- بس استخداماتها العملية صعب تتجاهلها. الطباخين، والممرضات، والكبار والأطفال كلهم استفادوا من الأحذية الغريبة دى اللى خلتنا نعرف أن أحيانًا الراحة أهم بكثير من أن شكلك يبقى أنيق.فى فرع "كروكس" الرسمى الموجود فى شارع 233 فى المعادى، رغم أنه مليان بمجموعة متنوعة بس المكان نفسه مش مشوق قوى مقارنة بكونه فرع كبير، ويمكن السبب هو الإضاءة السيئة وموسيقى البوب المزعجة. لما تسيبك من التفاصيل دى هـ تحس أن البضاعة الموجودة أفضل بكثير من طريقة عرضها.الأحذية بـ تملأ حوائط المكان الواسع. أول مجموعة هـ نتكلم عنها هى الأطفال. تقدر تلاقى تشكيلة جذابة بجانب الأحذية المعتادة، وبـ يناسبوا الأطفال اللى سنهم أقل من 10 سنين. شوية منهم عبارة عن كروكس عليها شخصيات كارتون" Toy Story وWinnie the Pooh، وشوية ثانيين من مطاط طري بلونين وفيه كمان أحذية مبطنة بالفرو شكلها شيك ودول سعرهم حوالى 360 جنيه. تقدر بأسعار مشابهة تشترى زوج من البوت الشتوى عليها رسومات "Hello Kitty" أو تخليك فى السادة. ستايلات ثانية من أحذية الأطفال برباط شكلها قريب من الكونفيرس وسعرها حوالى 300 جنيه. عندهم كمان أحذية ثانية للأطفال اللى سنهم أقل من سنتين شكلها ظريف بسبب حجمهم الصغير قوى.نروح على قسم الكبار واللى فيه تشكيلة ستايلات معقولة خصوصًا بالنسبة للسيدات. بعيدًا عن الكروكس التقليدية اللى كلنا عارفينها وحابينها (أو راضيين بها) دلوقت فيه شباشب وصنادل (299 جنيه) بألوان متعددة. عندهم كمان أحذية باليرينا بألوان صفراء، وبنفسجى، وأحمر وألوان ثانية كثير؛ مجموعة منهم بـ تظهر أصابع القدم سعرها حوالى 300 جنيه، وقبقاب له كعب مثير للشك سعره حوالى 500 جنيه.سعر البوت الحريمى 599 جنيه، واللى برباط كامل سعره 399 جنيه، أما الكروكس الشتوى المبطن بالفرو سعره 449 جنيه.فى حين أن القسم الرجالى بـ يقدم مجموعة كروكس المعتادة، وكمان شباشب (299 جنيه)، بس كمان عندهم مجموعتهم الخاصة من الأحذية الكاجوال، والمختلفة عن الشكل المعتاد المطاطى المخرم اللى بـ يشبه السلاحف.حذاء موكاسين هـ يكلفك 799 جنيه، فى حين أن نفس الستايل بس مصنوع من القماش سعره أقل بكثير (349 جنيه). عندهم كمان إصدارهم الخاص من أحذية على ستايل لبس الإبحار Deck Shoes بمجموعة من الألوان الهادئة بسعر 499 جنيه.بجانب تشكيلة منتجاتهم الكبيرة، كروكس كمان بـ يعرض منتجات إيست باك من شنط الظهر والكمبيوتر. أسعار الشنط تتراوح بين 500 و800 جنيه على حسب الحجم وتعقيد التصميم.تقدر تلاقى شوية إكسسوارات عند الكاشير بس مش كثير قوى. الأزرار اللى بـ تزين الكروكس التقليدى وبـ توضع فى الفتحات بتاعته واكتسبت شعبية كبيرة مع جمهور الشباب وكبار السن بس للأسف فرع المعادى نادرًا ما بـ يبقى عنده منها. الموجود منهم سعره 39 جنيه.

...

كروكس: أحذية صحية ورياضية في المعادي الجديدة
اصدرت في: 20/06/2012

الاختراع اللي ما كناش نعرف عنه حاجة من سنتين تقريبًا، يمكن كنا بـ نشوف حاجة شبيهة له في الصيدليات والمراكز الطبية، وهي الأحذية والصنادل الطبية المخصصة لعلاج آلام القدم والـ Flat Foot وكان لها شكل معين وخامات معينة وقطع معدنية من الداخل لتسوية شكل القدم. بس ما كناش نتخيل أن أحذية «كروكس» اللي ظهرت بعد كده ولها نفس المواصفات تقريبًا تحقق الانتشار ده كله ويبقى لها فروع في كل أنحاء مصر، وتجتذب عدد كبير من محبي الملابس الرياضية والأحذية المريحة الصحية حتى لو مش بـ يعانوا من آلام معينة في القدم. زرنا فرع Crocs الموجود في شارع النصر في المعادي الجديدة، المحل شيك ومساحته مش كبيرة ومش بـ يعرض أي حاجة غير أحذية وكوتشي وصنادل كروكس. كل المقاسات والألوان الرجالي والحريمي والأطفال موجودة. الفكرة بقى في الموديلات اللي هـ تلاقي بعضها شكله غير مألوف، لأنه مصنوع من البلاستيك وله بوز عريض جدًا فيه فتحات تهوية ونعل سميك ومرتفع عن الأرض. الغريب أن رغم شكله اللي مش عاطفي ده وهو في العرض إلا أنك أول ما بـ تجربه في رجلك وعلى أي لبس أنت لابسه هـ تحس أنه لائق عادي جدًا، لأ وشكله شيك كمان! وده بـ يرجعنا لفكرة أن الغالي ثمنه فيه، لأن الحذاء الكروكس ده بأسعار من 400 لـ 600 جنيه. الأحذية دي داخل في تصنيعها مادة معينة اسمها Croslite اللي بـ تمنع حدوث أي روائح للقدم ومش بـ تخلي الحذاء يسيب أي علامات، والأهم من ده كله أنها بـ تساعد على أنها تخلي وزن الحذاء خفيف جدًا على عكس شكله وحجمه الضخم تمامًا، تقريبا مش هـ تحس أنك لابس حاجة في رجلك. بجانب الشكل غير التقليدي للأحذية والصنادل اللي هو يعتبر الشكل التقليدي لأحذية كروكس، فيه موديلات عادية شبه الـ Vans أو الأسبترين بكل الألوان وبسعر 350 جنيه بعد الخصم، وبرضه هـ تلاقيها مريحة وخفيفة جدًا وشكلها حلو في اللبس، وفيه موديلات صورة طبق الأصل من الـ Converse Chuck Taylor الفلات واللي برقبة، لكن برضه يفضل الفرق في الوزن والخامات المصنوع منها، والسعر 400 جنيه. موديلات الأطفال والبيبي شكلها حلو قوي وألوانها زاهية ورقيقة، وأسعارها من 250 لـ 350 جنيه، وفيه موديلات شبابية شبه الموجودة في Zara وLacoste وفيه موديلات كلاسيكية مناسبة للملابس شبه الرسمية بألوان أسود وبني ورصاصي. «كروكس» فيه مقاسات من أول 19 للأطفال لحد 50 للرجال، بس كروكس له وحدات قياس خاصة هـ تحتاج تسأل العاملين في المحل عن معناها. تجربتنا هنا كانت ممتعة وسط كل الألوان والموديلات والراحة اللي حسينا بها وإحنا بـ نجرب الأحذية، الأسعار عالية شوية بس الموضوع يستاهل، خاصة لو حطينا الجانب الطبي للأحذية في الاعتبار.

...

بنيتون أوتلت: منفذ بيع ملابس كاجوال بالمعادي الجديدة
اصدرت في: 29/05/2012

في شارع النصر في المعادي الجديدة وعلى الصف المقابل لمطاعم «مؤمن» و«جاد» فيه مبنى صغير مكون من 3 أدوار باللون الأبيض عليه من الخارج شعار «يونايتد كلرز أوف بنيتون» المعروف وكل لما كنا بـ نعدي من هناك كنا بـ نبقى فاكرينه مجرد فرع عادي من فروع بنيتون المنتشرة في أحياء ومولات القاهرة. لكن لما دخلنا المحل لأول مرة عرفنا أنه منفذ بيع لعدد من ماركات الملابس العالمية. وأنت أمام المبنى هـ تشوف في الدور الثاني ملابس وأدوات رياضية خاصة بالنادي الأهلي، أو (الأهلي ستورز) لكن لما دخلنا المحل عرفنا أن الأهلي ستورز أغلق أبوابه للأبد في المكان ده، وأصبحت كل المعروضات موجودة في الدور الأرضي فقط. منفذ البيع ده عنده مجموعة محدودة جدًا من التي شيرتات من ماركة Benetton كانت على ستاند على يمينك أول ما تدخل المحل، كلها باللون الرصاصي وعليهات طبعات ورسوم بسيطة من الأمام وبأسعار من 120 لـ 130 جنيه. أغلب المعروض بالمحل هو تي شيرتات ماركة US Polo باللون الأبيض طبعًا، وفيه بعض موديلات بألوان مختلفة وبأقلام رفيعة بالعرض، لكن الأساسي هو اللون الأبيض وعليه اللوجو الشهير للبولو شيرت من على الصدر. كل التي شيرتات هناك أصلية وهي نفس التشكيلة الجديدة تقريبًا الموجودة في فروع US Polo في سيتي ستارز وغيرها، لكن الفرق في السعر بـ يبقى كبير، يعني اللي هـ تلاقيه في الفرع الرئيسي بـ 800 جنيه، هنا ممكن تلاقيه بأسعار من 400 لـ 500 جنيه. هو في الحالتين غالي طبعًا، بس غالي عن غالي قوي يفرق. والأسعار هنا قليلة كده لأن المفروض أن ده زي منفذ البيع بسعر الجملة أو سعر المصنع، مش عارفين بالضبط، بس اللي متأكدين منه أن الخامات ممتازة والتصميمات شيك جدًا، وأن كل المقاسات موجودة. فيه معروضات قليلة من ماركة Zara وهي عبارة عن بنطلون جبردين بلون غريب جدًا هو خليط بين البرتقالي والبني، وعرفنا أن ده الـ New Collection الصيف ده، وسعره 250 جنيه بدل 500 في زارا. وفيه مجموعة قمصان بولو ومجموعة صغيرة من تي شيرتات Massimo Dutti بسعر 240 جنيه. الأسعار اللي هنا كلها ممكن تنزل لحد 50 % لو رحت وقت العروض والتخفيضات، بس مافيش غير عروض بسيطة على الملابس دلوقتي زي أنك تشتري 2 تي شيرت بولو وتأخذ خصم 10 % أو تشتري 5 تي شيرت وتأخذ واحد هدية. فيه بعض إكسسوارات وشنط سفر بأحجام كبيرة بسعر 650 جنيه بعد الخصم، وفيه كوتشي ماركة Crocs بأسعار من 300 لـ 400 جنيه وموجود بكل الألوان. وفيه صنادل وأحذية بناتي بأسعار 200 جنيه بعد الخصومات برضه. في قسم البنات هـ تلاقي نفس تشكيلة التي شيرتات الموجودة في القسم الرجالي وبنفس الأسعار ويمكن أقل شوية. وفيه مايوهات وملابس رياضية ورغم أن المعروضات في القسم ده قليلة إلا أنها جذابة وأنيقة جدًا. في نهاية المحل فيه قسم للأطفال ومعظم معروضاته من Benetton والأسعار معقولة جدًا. يعني ممكن تجيب أي بنطلون أو شورت بـ 70 جنيه، والتي شيرت والكوتشي من 50 لـ 150 جنيه. يعني في القسم ده بس هـ تحس أنك في منفذ بيع بأسعار خيالية مش في فرع عادي للماركات اللي ذكرناها اللي أسعارها غير عادية. منفذ بيع «بينيتون» عجبنا فيه التنوع في المعروضات والخدمة والحرية في الفرجة وتجربة الملابس، رائق ونادرًا لما تلاقي زحمة. المكان يستاهل زيارة.

...

أديداس أوتلت: ملابس رياضية بأسعار مخفضة في المعادي
اصدرت في: 08/03/2012

وأنت ماشي على الطريق الدائري في المعادي باتجاه القطامية وبعد مبنى كارفور بحوالي 200 متر، هـ تلاقي مَنزل من الطريق السريع على طريق بطيء ناحية اليمين وأول محل عينك هـ تقع عليه أول ما تنزل من الدائري محل «أديداس أوتلت – Adidas Outlet» أو Factory Outlet وهو منفذ بيع بيافطة سوداء كبيرة عليها لوجو أديداس، وعدد من لوجوهات ماركات ملابس رياضية ثانية. الحقيقة أن المنفذ ده مش لأديداس بس زي ما ناس كثير فاكرة، إنما فيه براندات ثانية ومش كل اللي فيه ملابس رياضية كمان إنما فيه ملابس كاجوال عادية وأحذية وإكسسوارات. تخفيضات طول العام، مكتوب كده على اللافتات داخل المحل وعلى الزجاج الخارجي بتاعه مكتوب خصم 50% ويصل لـ 70%، والفكرة أن المكان ده عامل عروض وتخفيضات طول السنة فعلاً لأن معظم الموديلات اللي بـ تعرض عندهم بـ تبقى أقدم شوية من المعروضة في باقي الفروع الخاصة بالماركة دي، وساعات الموديلات بـ تبقى أقدم سنة أو أكثر. علشان كده كل الكوتشي والأحذية والتي شيرت والترينينج سوت والبنطلونات الرياضية عليها 2 تيكيت للسعر، واحد الأصلي والثاني بعد الخصم. المشكلة هنا أن فيه معروضات سعرها حتى بعد الخصم ورغم قدم الموديل جدًا يعتبر لسه غالي. الماركات الموجودة هي أديداس، ريبوك Reebok، أحذية جيوكس Geox، تمبرلاند Timberland، كروكس Crocs وليـﭭايز Levi's وQuiclsilver. الدور الأرضي مخصص للملابس الرجالي والعلوي للأطفال والحريمي. الموديلات واحدة تقريبًا في كل الأقسام. تشكيلة ضخمة جدًا من الكوتشي والتي شيرت والسويت شيرت والجينز. في القسم الرجالي ممكن تقعد تلف أكثر من نصف ساعة علشان تتفرج على كل موديلات الكوتشي على وجه الخصوص، أديداس بورش ديزاين وzx 750 وسنيكرز ده غير موديلات خاصة بكرة القدم وكرة السلة وكرة اليد والتنس، والأسعار بـ تتراوح بين 300 لـ 600 بعد التخفيض، وفيه جيرسي فرق ريال مدريد وميلان الأصلية بسعر 300 جنيه وفرق ثانية من اللي بـ تلبس أديداس. ريبوك موديلاته هناك تحفة لكن أسعاره أغلى شوية. من أرخص الموديلات في المحل سنيكرز ليـﭭايز ستاندارد شبه الـ Converse Chuck Taylor بألوان الأسود والأبيض بسعر 250 جنيه، وبعض الموديلات البسيطة والمريحة من ليـﭭايز بنفس السعر. ولما نقول ليـﭭايز يبقى لازم نتكلم عن الجينز باللون الأزرق الأساسي ولكن بقصات مختلفة بأسعار من 260 لـ 500 جنيه، وده نادرًا لما بـ يكون عليه تخفيض لأن موديلاته معظمها أساسية جدًا. تمبرلاند ضيف مهم جدًا في «أوتلت»، تشكيلة الأحذية بالألوان البني والبيج المميزة برقبات طويلة ومتوسطة وبدون بأسعار من 500 لـ 1000 جنيه، لكن تجربتنا مع تمبرلاند بـ تقول أن دي أفضل حاجة ممكن تستحمل وتعيش معاك لحد ما تزهق منها. موديلات متنوعة رياضية وكاجوال من أحذية كروكس وجيوكس هـ تلاقيها على ستاندات متفرقة في المحل، أسعارها أقل كثير من أديداس وتمبرلاند. فيه شنط رياضية وكابات وأحزمة ومحافظ من كل الماركات اللي تكلمنا عليها، والأسعار طبعًا أقل من أي فرع ثاني للماركات دي. لازم تزور «أديداس أوتلت» قبل ما تقرر تشتري أي أدوات أو ملابس رياضية من أي فرع من فروع ماركتك المفضلة لأنك هنا ممكن تلاقي اللي أنت عاوزه وتوفر 200 أو 300 جنيه أنت أولى بهم.

...

سنتر بوينت: مول داخل مول سيتي سنتر المعادي
اصدرت في: 04/03/2012

تعودنا مؤخرًا نلاقي ماركات عالمية مش موجودة في أي حتة داخل مبنى معادي سيتي سنتر العملاق الشهير بـ «كارفور». آخر اكتشافاتنا كان مول داخل المول. «سنتر بوينت – Centerpoint» سلسلة محلات لها فروع في كل عدد من دول الخليج والشرق الأوسط، وأخيرًا بقى لها فرعين في مصر، واحد في الإسكندرية والفرع الوحيد في القاهرة موجود في كارفور المعادي. البداية كانت بفرع صغير في البحرين من حوالي 40 سنة وكان فيه ماركة واحدة بـ تُباع في المول وهي «بيبي شوب» بعدها بدأ في التوسع تدريجيًا لحد ما وصل للشكل اللي هو عليه دلوقتي وهو عبارة عن مول مكون من طابقين، بـ يضم 4 ماركات كل منها متخصص في نوع معين من الملابس والأدوات، والماركات الموجودة هي «بيبي شوب - Babyshop» لملابس الأطفال وأدواتهم و«سبلاش – Splash» للملابس الرجالي و«شو مارت – Shoe Mart» للأحذية الرجالي والحريمي والكوتشي و«لايف ستايل – Lifestyle» للتحف والإكسسوارات المنزلية. «سنتربوينت» فتح مكان «زارا - Zara» اللي كان موجود في نفس المكان قبل ما يقفل فرعه، المحل مساحته كبيرة وفيه الدور الأرضي مخصص للملابس والأحذية والدور العلوي فيه أدوات منزلية وأدوات أطفال. الـ 4 ماركات اللي ذكرناهم موزعين بشكل واضح في أركان المول وهـ تلاقي كل ماركة عاملة عروض وتخفيضات خاصة بها بشكل مستقل عن مظلة «سنتربوينت». فيه بعض ماركات ثانية واخدة أركان في المحل زي «دي إن إم – DNM» للأحذية والإكسسوارات و«أديداس» و«بوما». المكان هـ يفكرك كثير بمحلات «إتش & إم – H&M» و«ماكس – Max» اللي سبق وكتبنا عنهم في كايرو360، نفس موديلات الملابس والأسعار وحتى طريقة توزيع المعروضات وطريقة تعامل موظفين البيع. وفيه سمة مميزة للمكان هي أن غالب عليه الطابع الخليجي في بعض موديلات الملابس، لكن في نفس الوقت هـ تلاقي كل التصميمات والأذواق بس هـ تتعب شوية في البحث لأن الأرفف والأركان كثير فعلًا. عجبنا بشكل خاص موديلات «سبلاش» الرجالي الكاجوال (مافيش في المول ملابس كلاسيك) والأسعار كانت مغرية جدًا. بول أوﭭر صوف خفيف بألوان مختلفة بسعر 250 جنيه، والجينز بأسعار من 200 لـ 350 جنيه، وفيه قسم للملابس الداخلية والإكسسوارات الرجالي من «سبلاش» وبما أنه عامل تخفيضات بـ توصل لـ 50 % بـ نرشح لكم زيارة القسم ده لأن الموديلات حلوة والأسعار ممتازة. في «بيبي شوب» في الدور العلوي هـ تلاقي بجانب الملابس وأدوات الأطفال الأساسية فيه أثاثات وتجهيزات الحضانات ونوادي الأطفال، وبرضه فيه خصومات كبيرة يا ريت تلحقوها. «لايف ستايل» فيه ديكورات منزلية وفواحات وشموع شيك جدًا وإكسسوارات وتابلوهات وشنط هدايا ومكياج هدايا لكل الأعمار خاصة من سن 16 لـ 21 سنة. مش هـ ينفع نتكلم عن أسعار كل حاجة في «سنتربوينت» العملاق، لكن يكفي أننا نقول أنك ممكن تعمل جولة تسوق كاملة داخل المكان وما تحتاجش تروح أي محل ثاني، وأي كانت ميزانيتك ممكن تلاقي حاجات على قدها. هـ يلفت نظرك في المكان كمية اللافتات اللي عليها كلمة (Sale) باللون الأحمر، وكأن المكان فتح بس علشان يعمل تخفيضات. لكن ده طبعًا في صالح المستهلك في النهاية. «سنتربوينت» دلوقتي في كايرو، إضافة جديدة لسلاسل المتاجر العملاقة في العاصمة، منتظرين فروع أكثر في المستقبل، وبـ نقول لكم أن المكان بجد يستحق الزيارة.

...

شوو روم : كل لُقطة وليها اللي يلقطها
اصدرت في: 23/06/2011

شوارع القاهرة الخشنة على الأقدام بـ تخللى سكانها دايماً بـ يدوروا على أحذية لقطة، وفي الغالب بـ تكون جزمة عملية أكثر ومش مهم تعمر أكثر من موسم. «شوو روم – Shoe room» ده عبارة عن سلسلة محلات متواضعة فيها أحذية حريمي أسعارها معقولة للستات المصرية اللي بـ يحبوا يغيروا الستايل بتاعهم مع الموضة اللي بـ تتغير كل 3 دقائق. أي نعم هو مش محل ماركات، لكن دائماً هـ تلاقى عنده تشكيلة متنوعة من الباليرينات، الصنادل، وأحذية الكعب العالي، و تقدر دائماً تطقمهم مع أى حاجة بـ سهولة جداً. فرع «شوو روم» المعادي واخد مساحة صغيرة مستخبية عند جراند مول المعادي. لو جاي من بعيد مش هـ تعرف تشوف اليافطة الأبيض في إسود بتاعته إلا بالعافية. عجبنا قوي صندل بـيـج جلد صناعى وعليه شوية إكسسوارات بلاستيك كبيرة، مناسب قوي لسهرة بالليل. تشكيلة الصنادل في «شوو روم» حلوة قوي وبـ تبتدي من 150 جنيه٬ أغلى من «ألدو» بس كونه مش بنفس الشهرة بـ يخلي اللي عنده متميز أكثر! وكان فيه برضه صندل بنـي جلد صناعي بـ حوالي 175 جنيه، وصنادل بلاستيك حلوة عشان البحر بـ تبتدي من حوالي 100 جنيه. الباليرينات وأحذية الكعب العالي ما انبهرناش بيها قوي، بس كان فيه جزمة شمواه صناعي بحوالي 200 جنيه فيها حتة صغيرة مبرومة كده عند الصوابع. بس أول ما اتجربت، الجزمة كانت ناشفة ، والحتة المبرومة ديه اللي كان شكلها حلو خلت الجزمة تبان ضخمة. الجزم المفتوحة من قدام وبـ تتقفل بشريطة من ورا كان موجود منها الأسود، البني والرمادي. وكان فيه موديل تاني فيه حلقات فضي صغيرة وفيه فيونكة وكان موجود منه اللون البني والاسود. أحذية الكعب العالي سعرها بـ يبقى ما بين 200 و 400 جنيه. الموديلات كانت كثيرة وسهل إنك تطقم حاجات معاها سواء لملابس رسمية أو كاچوال. «شوو روم» عنده برضه شنط معمولة من الجلد الصناعي والقماش زى الأحذية. كان فيه شنطة بني كبيرة مطرزة حلو قوي و تنفع للصبح في نفس الوقت. لكن للأسف الشنط الغامقة بـ يبان قوي فيها أن جودتها مش حلوة، لكن الشنط الفاتحة بـ تبقى إلى حدٍ ما أحسن. شنط البحر متعلقة على الرف ومعمولة من ألوان فاتحة ومبهجة، ومن أقمشة بألوان صيفية و أسعارها رخيصة قوي، ودائماً مناسبة عشان تحط فيها فوطة، هدوم، حاجات البحر، أو أي حاجة عشان تقضي بيها رحلة ظريفة. بشكل عام نقدر نقول أن «شوو روم» عنده تشكيلة حلوة قوي ومتنوعة تكملي بيها دولابك للموسم ده.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن