ملابس رجالي تسوق in المعادي Cairo, Egypt

تسوق

جس: ماركة الإكسسوارات المميزة فى معادى سيتى سنتر
اصدرت في: 12/07/2014

مع زحف عدد كبير من الأسماء المشهورة على مشهد التسوق فى القاهرة يوم بعد يوم، أحيانًا ماركات أكثر شهرة بـ تغطى علي "جس – Guess". بعد افتتاحه لأول مرة فى مدينة النجوم بيفرلى هيلز فى أمريكا، شهرة جس سببها فى الأول كانت تصميماته المميزة من الجينزات. من ساعتها، قدر الاسم الشهير يتوسع فى إنتاج العطور، والساعات، والملابس والإكسسوارات رجالى وحريمى. مع امتلاكه لعدد من الفروع فى العاصمة، وأوكازيونات كثيرة فى كل المواسم، قررنا نروح فرعهم فى معادى سيتى سنتر. مكانه مميز أمام بوابة كارفور، بواجهة زجاجية حول ركن، معروض فيها مجموعة من شنط اليد والساعات يحتلوا الواجهة الزجاجية اللامعة. الأحسن أنك تتفرج من الخارج، ثلاث كبائن من الزجاج فيهم ساعات حريمى ورجالى، منهم حاجات أحلى من حاجات. المعروضات مختلفة، منها الأنيق الجذاب، ومنها الروش -ومنهم حاجات عليها قطع ألماس تقليد– ولاحظنا أسعار تزيد على 1500 جنيه. ساعة قوية ذهبى فى أسود لفتت انتباهنا سعرها كان 2160 جنيه. مع هيكل العرض الضعيف، ممكن تشعر أن المجموعة المعروضة مش مريحة؛ فى وجود الموظف الهادئ، جس يعتبر مكان مناسب للفرجة براحتك. صحيح أن موجود ساعات رجالى، باقى المحل بـ يركز على الحريمى، بس مافيش أى ملابس، إكسسوارات فقط. وقت زيارتنا، كان معلق على حائطين مجموعة شنط يد عليهم تخفيض، أما المجموعة الجديدة كانت موجودة برضه؛ على موضة "جس" الخاصة، معظم المعروضات يزينها طباعة على شكل حرف G الشهير، سحّاب على شكل حرف G، وطبعًا فيهم درجة من البريق واللمعان. المحافظ موجود منها كل الأشكال والأحجام، أسعارها تبدأ من حوالى 400 جنيه، شنط كلاتش بحوالى 700 جنيه، شنط سفر وكتف تبدأ من 1500 جنيه. من الأوكازيون، لاحظنا شنطة يد بأبزيم لونها صخرى من مجموعة باليرمو سعرها نزل من 1000 جنيه لغاية 732 جنيه. معروض كمان مجموعة صغيرة من الأحذية خارج الأوكازيون، منها أحذية باليرينا سوداء وعنابى، وزوج حذاء رمادى من الجلد السويدى (700 جنيه) كانوا أبرز المعروض من القطع اللى عليها إقبال. مجموعة أكبر من الأحذية داخلة فى الأوكازيون منها شباشب شيك، وصنادل وأحذية بكعب، كلهم عليهم 50% خصم. أسعار الحلىّ تبدأ من 200 جنيه، مع سلسلة مفاتيح روشة (165 جنيه)، وعطور، وأحزمة جلد وجلد ماعز (+400 جنيه) كلهم متوفرين. رغم أنه غير مناسب لكل الأذواق، لكل السيدات المهتمات بالماركات، جس أسعاره معقولة عن كثير من الماركات الثانية فى القاهرة. فرع المعادى أثبت أنه يملك تشكيلة كبيرة من الإكسسوارات، خصوصًا شنط اليد، والساعات والأحذية.

...

سبرينجفيلد: ملابس كاجوال رجالي وحريمي في المعادي
اصدرت في: 12/11/2012

أول معرفتنا بمحلات «سبرينجفيلد - Springfield» كانت من خلال الفرع الموجود في سيتي ستارز، وبدأنا نتردد عليه من وقت للثاني ورغم أن فيه موديلات بـ تعجبنا إلا أن كثير كنا بـ نلاحظ أن فيه أسعار مبالغ فيها وما فكرناش نقضي وقت أطول في المحل علشان نتفرج على كل حاجة فيه.لكن المغري في فرع المعادي سيتي سنتر (كارفور) اللي بـ نتكلم عنه النهارده أنه حاطط لافتات كبيرة عند كل المعروضات وعليها أسعار مغرية. صحيح لما دخلنا اكتشفنا أن الرقم المكتوب على اللافتة معناه أن "الأسعار تبدأ من" لكن برضه كانت الأسعار معقولة خاصة في الموديلات الصيفي والخريفي اللي عليها تخفيضات كبيرة. وكمان الموديلات الشتوي الجديدة فيها أسعار هينة تغريك بأنك تجرب جاكيت ولا اثنين.المحل في الممر الرئيسي للمحلات في سيتي سنتر على الصف المواجهة للهايبر ماركت أو كارفور نفسه. مساحته كبيرة بالمقارنة بباقي المحلات اللي حوله. إضاءة هادئة ومزيكا هاوس عالية وديكورات بألوان وبوسترات مبهرة وجو عام ظريف، لكن مريح في التسوق أو لأ دي حاجة ترجع لطبيعة "المتسوق" نفسه. القسم الرجالي واضح أنه أغنى من القسم الحريمي في عدد المعروضات اللي واخدة مساحة أكبر في المحل، وفي شكل الموديلات اللي فيها تنوع أكبر منها في الحريمي. تقريبًا أكثر حاجة إحنا شايفينها مميزة في «سبرينجفيلد» هي القمصان بكل أشكالها. أسعارها بـ تبدأ من 299 جنيه وبـ توصل لـ 350 جنيه، وهـ تلاقي كل النقشات من الأقلام الرفيعة والكاروهات والسادة، لكن الأكيد أنها هـ تعجبك وهـ تلاقي مقاسك دائمًا، ده غير أن عندهم قمصان Smart Size العجيبة اللي بـ تليق على أي جسم بقصاتها الفريدة. الجينز هنا بـ يبدأ من 300 جنيه، وفيه موديلات الجبردين بالألوان الفاقعة زي الأحمر والأصفر (اللي زي المسطردة) والأزرق وغيره ودي بـ 349 جنيه، وفيه موديلات جينز عادية تنفع كلاسيك أكثر. فيه سويت شيرت بكل الألوان والموديلات بأسعار تبدأ من 200 جنيه، وخامتها ثقيلة ومناسبة لبرد الشتاء. البول أوﭭر والجاكيت منتهى الأناقة في «سبرينجفيلد» بأسعار من 250 لـ 1000 جنيه، بس تأكد أن كل موديل هـ تشوفه هنا مش هـ تلاقي شبهه في مكان ثاني. وفيه عدد من موديلات البول أوﭭر بألوان مجنونة ورقبة عالية وألوان زاهية شبه اللي كانت موجودة في السبعينيات، تقريبًا دي أكثر حاجة عجبتنا في المحل. وجربناها في اللبس وكان شكلها غير عادي. بس عاوزة جرأة مافيش كلام. «سبرينجفيلد» مشهور بالتي شيرت الـ Basic السادة بكل الألوان بأسعار من 99 لـ 120 جنيه. تفصيلته خطيرة وألوانه متينة ومش بـ تطلع في الغسيل مع الوقت عن تجربة.الركن البناتي هادئ وكل حاجة فيه لها شبيه في القسم الرجالي تقريبًا، والألوان نفسها وقورة ورجالي بزيادة إلا فيما ندر. أسعار التوب من أي موديل بـ تبقى بـ 199 جنيه والجينز بـ 300 جنيه. ومش هـ نخوض كثير في القسم الحريمي لأن ده محتاج زيارة بناتي متخصصة أكثر. الخدمة معقولة وإن كان بعض العاملين ينقصهم بعض الخبرة و"مخضوضين" شوية مش عارفين ليه! لكن هـ تحس أنك براحتك وأنت بـ تتمشى بين الأرفف وممكن تجرب زي ما أنت عاوز بمساعدة الموظف اللي معاك. اعمل زيارة لسبرينجفيلد في فرع سيتي سنتر المعادي بس املأ محفظتك أو عمَّر كريديت كاردك، بس المهم أنك هـ تنبسط.

...

باص: ملابس رجالي بأسعار جيدة في كارفور المعادي
اصدرت في: 19/08/2012

ساعات بـ ندور على حاجة معينة في الملابس ومش بـ نلاقيها في أي حتة، أو مش بـ نلاقيها بالأسعار اللي إحنا عاوزينها، وعلشان كده لما بـ نقع في مكان بـ يعمل المعادلة الصعبة ويقدم موديلات مميزة بأسعار كويسة بـ نشرككم معانا على طول وبـ نحاول نعرفكم بالمكان ده. ده اللي حصل معانا وإحنا داخل سيتي سنتر المعادي (كارفور) ولقينا محل صغير في الممر التجاري اسمه «باص – Bass» عارض ملابس رجالي كاجوال، ومافيش أي ملابس كلاسيك. أول حاجة عجبتنا في المحل كانت التي شيرتات البولو بألوان مختلفة ومن ماركات غير معروفة لكن قصتها شيك وفيها شبه من موديلات US Polo وLacoste وأسعارها من 150 لـ 190 جنيه، غالية شوية على أنها مجهولة الهوية بس خامتها حلوة وشكلها حلو في اللبس بصراحة. اللي لقيناه هنا بقى ومش بـ نلاقيه في أي حتة "وبالسعر ده" هو البنطلون الجبردين اللي تفصيلته شبه الجينز Straight وبـ يبقى غالبًا باللون البيج والكاكي والبني (ماركة اسمها Men's Club)، المفاجأة بقى كانت سعره اللي هو 140 جنيه، ومتوفر منه كل المقاسات، وفيه ألوان عجيبة كمان زي البنفسجي والأحمر والأخضر، الألوان اللي نزلت موضة وانتشرت بشكل غريب بعد ظهور بوسترات محمد منير وتامر حسني الأخيرة، وفيه كمان بنطلونات باجي اللي كنا بطلنا نشوفها تقريبًا من منتصف الألفينات، لكن لسه لها محبيها وبرضه ما كناش عارفين ممكن نلاقيها بـ تُباع فين، موجودة هنا وبأسعار مناسبة جدًا من 150 لـ 200 جنيه. فيه قمصان بس كلها نفس الشكل تقريبًا، كاروهات كبيرة ونصف كم زي اللي كانت منتشرة في التسعينيات، هو المحل فعلًا تحس أنه أنتيكا شوية، فيه موديلات قديمة وحاجات بِطلِت، لكنه برضه مواكب الموضة وجايب جينزات وتي شيرتات جديدة، هو الميزة الحقيقية اللي فيه أنه متنوع ومش متوقع، يعني مش زي أي مكان مرتب ممكن تدخله وبعد دقيقتين تبقى عرفت هو إيه اللي عنده وإيه اللي مش عنده وتكون عرفت متوسط أسعاره. هنا الموديلات مختلفة والأسعار متفاوتة، وفي وسط ملابس الخروج العادية هـ تلاقي إكسسوارات وملابس داخلية رجالي وجوارب، وفيه كمان شورتات رياضية وجينز وملابس بحر (100 جنيه) وموديلاتها شيك وحديثة. هو بس ما كانش عارض أي أحذية. تجربتنا في «باص» كانت جيدة وقررنا بالفعل نروح نجيب فلوس كفاية ونلحق لنا بنطلون وتي شيرت بالأسعار دي، وعرفنا أن المحل ده هو وجهتنا كل لما نحب ندور على حاجة مش موجودة بسهولة.

...

بنيتون أوتلت: منفذ بيع ملابس كاجوال بالمعادي الجديدة
اصدرت في: 29/05/2012

في شارع النصر في المعادي الجديدة وعلى الصف المقابل لمطاعم «مؤمن» و«جاد» فيه مبنى صغير مكون من 3 أدوار باللون الأبيض عليه من الخارج شعار «يونايتد كلرز أوف بنيتون» المعروف وكل لما كنا بـ نعدي من هناك كنا بـ نبقى فاكرينه مجرد فرع عادي من فروع بنيتون المنتشرة في أحياء ومولات القاهرة. لكن لما دخلنا المحل لأول مرة عرفنا أنه منفذ بيع لعدد من ماركات الملابس العالمية. وأنت أمام المبنى هـ تشوف في الدور الثاني ملابس وأدوات رياضية خاصة بالنادي الأهلي، أو (الأهلي ستورز) لكن لما دخلنا المحل عرفنا أن الأهلي ستورز أغلق أبوابه للأبد في المكان ده، وأصبحت كل المعروضات موجودة في الدور الأرضي فقط. منفذ البيع ده عنده مجموعة محدودة جدًا من التي شيرتات من ماركة Benetton كانت على ستاند على يمينك أول ما تدخل المحل، كلها باللون الرصاصي وعليهات طبعات ورسوم بسيطة من الأمام وبأسعار من 120 لـ 130 جنيه. أغلب المعروض بالمحل هو تي شيرتات ماركة US Polo باللون الأبيض طبعًا، وفيه بعض موديلات بألوان مختلفة وبأقلام رفيعة بالعرض، لكن الأساسي هو اللون الأبيض وعليه اللوجو الشهير للبولو شيرت من على الصدر. كل التي شيرتات هناك أصلية وهي نفس التشكيلة الجديدة تقريبًا الموجودة في فروع US Polo في سيتي ستارز وغيرها، لكن الفرق في السعر بـ يبقى كبير، يعني اللي هـ تلاقيه في الفرع الرئيسي بـ 800 جنيه، هنا ممكن تلاقيه بأسعار من 400 لـ 500 جنيه. هو في الحالتين غالي طبعًا، بس غالي عن غالي قوي يفرق. والأسعار هنا قليلة كده لأن المفروض أن ده زي منفذ البيع بسعر الجملة أو سعر المصنع، مش عارفين بالضبط، بس اللي متأكدين منه أن الخامات ممتازة والتصميمات شيك جدًا، وأن كل المقاسات موجودة. فيه معروضات قليلة من ماركة Zara وهي عبارة عن بنطلون جبردين بلون غريب جدًا هو خليط بين البرتقالي والبني، وعرفنا أن ده الـ New Collection الصيف ده، وسعره 250 جنيه بدل 500 في زارا. وفيه مجموعة قمصان بولو ومجموعة صغيرة من تي شيرتات Massimo Dutti بسعر 240 جنيه. الأسعار اللي هنا كلها ممكن تنزل لحد 50 % لو رحت وقت العروض والتخفيضات، بس مافيش غير عروض بسيطة على الملابس دلوقتي زي أنك تشتري 2 تي شيرت بولو وتأخذ خصم 10 % أو تشتري 5 تي شيرت وتأخذ واحد هدية. فيه بعض إكسسوارات وشنط سفر بأحجام كبيرة بسعر 650 جنيه بعد الخصم، وفيه كوتشي ماركة Crocs بأسعار من 300 لـ 400 جنيه وموجود بكل الألوان. وفيه صنادل وأحذية بناتي بأسعار 200 جنيه بعد الخصومات برضه. في قسم البنات هـ تلاقي نفس تشكيلة التي شيرتات الموجودة في القسم الرجالي وبنفس الأسعار ويمكن أقل شوية. وفيه مايوهات وملابس رياضية ورغم أن المعروضات في القسم ده قليلة إلا أنها جذابة وأنيقة جدًا. في نهاية المحل فيه قسم للأطفال ومعظم معروضاته من Benetton والأسعار معقولة جدًا. يعني ممكن تجيب أي بنطلون أو شورت بـ 70 جنيه، والتي شيرت والكوتشي من 50 لـ 150 جنيه. يعني في القسم ده بس هـ تحس أنك في منفذ بيع بأسعار خيالية مش في فرع عادي للماركات اللي ذكرناها اللي أسعارها غير عادية. منفذ بيع «بينيتون» عجبنا فيه التنوع في المعروضات والخدمة والحرية في الفرجة وتجربة الملابس، رائق ونادرًا لما تلاقي زحمة. المكان يستاهل زيارة.

...

سنتر بوينت: مول داخل مول سيتي سنتر المعادي
اصدرت في: 04/03/2012

تعودنا مؤخرًا نلاقي ماركات عالمية مش موجودة في أي حتة داخل مبنى معادي سيتي سنتر العملاق الشهير بـ «كارفور». آخر اكتشافاتنا كان مول داخل المول. «سنتر بوينت – Centerpoint» سلسلة محلات لها فروع في كل عدد من دول الخليج والشرق الأوسط، وأخيرًا بقى لها فرعين في مصر، واحد في الإسكندرية والفرع الوحيد في القاهرة موجود في كارفور المعادي. البداية كانت بفرع صغير في البحرين من حوالي 40 سنة وكان فيه ماركة واحدة بـ تُباع في المول وهي «بيبي شوب» بعدها بدأ في التوسع تدريجيًا لحد ما وصل للشكل اللي هو عليه دلوقتي وهو عبارة عن مول مكون من طابقين، بـ يضم 4 ماركات كل منها متخصص في نوع معين من الملابس والأدوات، والماركات الموجودة هي «بيبي شوب - Babyshop» لملابس الأطفال وأدواتهم و«سبلاش – Splash» للملابس الرجالي و«شو مارت – Shoe Mart» للأحذية الرجالي والحريمي والكوتشي و«لايف ستايل – Lifestyle» للتحف والإكسسوارات المنزلية. «سنتربوينت» فتح مكان «زارا - Zara» اللي كان موجود في نفس المكان قبل ما يقفل فرعه، المحل مساحته كبيرة وفيه الدور الأرضي مخصص للملابس والأحذية والدور العلوي فيه أدوات منزلية وأدوات أطفال. الـ 4 ماركات اللي ذكرناهم موزعين بشكل واضح في أركان المول وهـ تلاقي كل ماركة عاملة عروض وتخفيضات خاصة بها بشكل مستقل عن مظلة «سنتربوينت». فيه بعض ماركات ثانية واخدة أركان في المحل زي «دي إن إم – DNM» للأحذية والإكسسوارات و«أديداس» و«بوما». المكان هـ يفكرك كثير بمحلات «إتش & إم – H&M» و«ماكس – Max» اللي سبق وكتبنا عنهم في كايرو360، نفس موديلات الملابس والأسعار وحتى طريقة توزيع المعروضات وطريقة تعامل موظفين البيع. وفيه سمة مميزة للمكان هي أن غالب عليه الطابع الخليجي في بعض موديلات الملابس، لكن في نفس الوقت هـ تلاقي كل التصميمات والأذواق بس هـ تتعب شوية في البحث لأن الأرفف والأركان كثير فعلًا. عجبنا بشكل خاص موديلات «سبلاش» الرجالي الكاجوال (مافيش في المول ملابس كلاسيك) والأسعار كانت مغرية جدًا. بول أوﭭر صوف خفيف بألوان مختلفة بسعر 250 جنيه، والجينز بأسعار من 200 لـ 350 جنيه، وفيه قسم للملابس الداخلية والإكسسوارات الرجالي من «سبلاش» وبما أنه عامل تخفيضات بـ توصل لـ 50 % بـ نرشح لكم زيارة القسم ده لأن الموديلات حلوة والأسعار ممتازة. في «بيبي شوب» في الدور العلوي هـ تلاقي بجانب الملابس وأدوات الأطفال الأساسية فيه أثاثات وتجهيزات الحضانات ونوادي الأطفال، وبرضه فيه خصومات كبيرة يا ريت تلحقوها. «لايف ستايل» فيه ديكورات منزلية وفواحات وشموع شيك جدًا وإكسسوارات وتابلوهات وشنط هدايا ومكياج هدايا لكل الأعمار خاصة من سن 16 لـ 21 سنة. مش هـ ينفع نتكلم عن أسعار كل حاجة في «سنتربوينت» العملاق، لكن يكفي أننا نقول أنك ممكن تعمل جولة تسوق كاملة داخل المكان وما تحتاجش تروح أي محل ثاني، وأي كانت ميزانيتك ممكن تلاقي حاجات على قدها. هـ يلفت نظرك في المكان كمية اللافتات اللي عليها كلمة (Sale) باللون الأحمر، وكأن المكان فتح بس علشان يعمل تخفيضات. لكن ده طبعًا في صالح المستهلك في النهاية. «سنتربوينت» دلوقتي في كايرو، إضافة جديدة لسلاسل المتاجر العملاقة في العاصمة، منتظرين فروع أكثر في المستقبل، وبـ نقول لكم أن المكان بجد يستحق الزيارة.

...

تي شيرت فاكتوري: طباعة فورية على التي شيرت في سيتي سنتر المعادي
اصدرت في: 26/01/2012

زمان كان فيه محل اسمه "ليزر" موجود في روكسي في مصر الجديدة هو الوحيد اللي بـ يعمل موضوع الطباعة على الملابس في مصر كلها، تجيب تي شيرت ماركة Winner باللونين الأبيض أو الأسود وتطبع عليها باستخدام طابعة الليزر العملاقة اللي كانت اختراع في الوقت ده، وكانت الاختيارات محدودة في الكام كتالوج اللي أمامك، وكان أغلب المترددين على المحل ده من هواة موسيقى الروك والميتال وطباعة التي شيرتات السوداء عليها صور فرقهم المفضلة أو رسوم مرعبة وجماجم اللي انتشرت في منتصف وأواخر التسعينيات. «تي شيرت فاكتوري – T-Shirt Factory» أو "مصنع التي شيرت" فاتح دلوقتي في أماكن كثير، هو مش محل هو بـ يبقى ركن فيه كاونتر عليه أجهزة الطباعة وعدد من الكتالوجات. في الممر الرئيسي في سيتي سنتر المعادي (كارفور) هـ تلاقيه بالقرب من ساحة الطعام واخد زاوية وعارض عدد من التي شيرتات المطبوع عليها كعينات، لكن الحقيقة شكلها ما يشجعش على الشراء خالص لأنها مبهدلة ومتربة وواضح أنها ما تغيرتش من يوم ما فتحوا المحل! المنتج محدد جدًا في T-Shirt Factory، تي شيرت بأكمام طويلة، وسويت شيرت بغطاء رأس (كابوشون)، والألوان كمان مش كثيرة، أبيض وأسود ورصاصي وأحمر. طبعًا ممكن تجيب تي شيرت سادة من عندك لكن لازم الخامة تكون مناسبة. الأسعار ثابتة وهي 100 جنيه للتي شيرت واللي بأكمام بـ 120 جنيه، والسويت شيرت بـ 150 جنيه. الأسعار دي طبعًا بعد الطباعة عليه. خامات التي شيرت قطن وفيه نسبة بوليستر، والسويت شيرت كان ثقيل ومناسب لجو الشتاء. فيه 3 كتالوجات بـ تختار منها الرسومات أو الكلمات اللي عاوز تطبعها، الطباعة بـ تكون بماكينة الليزر مش بطريقة الاستنسل Stencil اللي بـ يستخدم في الطباعة على الكميات الكبيرة. الرسومات الموجودة متنوعة جدًا وأغلبها لفرق موسيقية منها Beatles وNirvana وOasis وغيرها وفيه كمان فنانين عرب زي عمرو دياب ومحمد منير، وفيه مجموعة رسومات كوميدية وشخصيات كرتونية. وفيه واحد من الكتالوجات فيه مجموعة من الكتابات بفنون الخط العربي أوCalligraphy والعبارات المكتوبة كلها ظريفة وكوميدية وفيه بعض الرسومات الشرقية والمصرية زي الموجودة في محل «زفير - Zafir» اللي في الزمالك، وممكن كمان تكون لنفس المصممين. والحقيقة أن التشكيلة هنا أكبر وممكن كمان تجيب أي صورة من عندك وهم يطبعوها، والاستلام بـ يبقى فوري. السعر ممكن يبقى أقل من كده خاصة أن إحنا عارفين تكلفة التي شيرت والطباعة اللي مش بـ تتجاوز 30 جنيه! لكن طبعًا المكان بـ يحاول يعوض ثمن الإيجارات في المول ويحقق مكسب، وفي النهاية مهم أننا نبقى عارفين أن لسه فيه أماكن بـ تطبع على التي شيرت، ونعرف نتصل بهم نستفسر عن أي حاجة.

...

أزارو: ملابس رجالي كلاسيكية في سيتي سنتر المعادي
اصدرت في: 23/01/2012

الماركة الفرنسية العالمية Azzaro دلوقتي موجودة في محل خاص بها في مصر وبالتحديد في سيتي سنتر المعادي الشهير بـ «كارفور» على الطريق الدائري، محل «أزارو» للملابس الرجالي الكلاسيكية بـ يقدم أحدث خطوط الموضة الفرنسية بأسعار ما نقدرش نقول عليها غالية لأنها لائقة على الموديلات وأناقتها وعلى الاسم اللي على التيكيت: «أزارو». ديكور المحل أنيق بأنوار بيضاء ساطعة ومساحة مربعة كبيرة. المعروضات موزعة بشكل جيد في أنحاء المحل وكل ركن مخصص لنوع معين من الملابس. ستيكر كبير على الزجاج الخارجي للمحل مكتوب عليها تخفيضات تصل إلى 70 %، إغراء شديد أنك تدخل ويشجعك كمان أنك تشتري، لكن ده طبعًا قبل ما تعرف الأسعار. على اليمين أول ما تدخل من الباب هـ تلاقي ستاند عليه بعض البليزرات الصيفية الخفيفة لونها تركواز وعليها خصم كبير وسعر الواحد 210 جنيه فقط. بعد الستاند ده الصف الأيمن كله عبارة عن سترات كاملة بألوان غامقة بأسعار من 2000 لـ 3000 جنيه وده بعد الخصومات، وسترات الأفراح المغطاة بالساتان بـ 1300 جنيه، وفيه قمصان حريرية وقطنية ومعظمها سادة أو بنقشات بسيطة جدًا وهي موجودة بكل الألوان وسعر القميص من 200 لـ 300 جنيه. وبعد كده ستاند كبير للجوارب والبابيونات والإكسسوارات ووصلات الأساور المعدنية وكلها بأسعار أكثر من أي محل ملابس رجالي ثاني بالمول. السويترات الجلد هي الأكثر تميزًا وسط كل المعروضات، تشكيلة كبيرة من الموديلات والأطوال والقصات، لكن كلها باللون الأسود وأسعارها من 2000 لـ 3000 جنيه، وفيه بالطوهات صوفية بألوان الأسود والرصاصي بأسعار من 3000 لـ 4000 جنيه، وشكلها كان "رجالي" بزيادة أو بمعنى أدق لسن أكبر شوية من سن الشباب، يعني مناسبة أكثر لمن هم فوق الأربعين من عمرهم. على الناحية الشمال البنطلونات وبعض التي شيرتات البولو المصنوعة من الصوف والأكريليك ودي سعرها كان 420 جنيه وموجود منها الألوان الأسود والبني وهي شيك قوي وبـ تدفي قوي لكن كمان غالية قوي! البنطلونات فيه منها القطن الحرير العادي وفيه قطيفة مضلع وشمواه، وأسعار البنطلونات بـ تتراوح بين 200 و 300 جنيه، وفيه مجموعة من البليزرات المصنوعة من نفس خامات البنطلون لكن كل منهم ممكن يتباع لوحده، والبليزر بـ يبقى بـ 700 جنيه. سويت شيرت شبه كاجوال كان عليه خصم كبير ووصل سعره لـ 65 جنيه. تشكيلة كبيرة من البول أوﭬر بموديلات مختلفة وأسعار قريبة من بعض، دائمًا بـ تلعب في الـ 500 والـ 600 جنيه. وهـ تلاحظ أن الأسعار مكتوبة برمز غريب مش عارفين بعملة أي دولة! لكن سألنا وعرفنا أنك هـ تحتاج تقسم السعر على 4 علشان تعرفه بالجنيه المصري، يعني لو مكتوب 15000 يبقى السعر 3500 جنيه، اللي هو "اتخض.. بس ما تتخضش قوي". «أزارو» موديلاته أنيقة وكلاسيكية بزيادة، لكن وجوده ضروري لفئة معينة من الرجال مش بـ تعرف تلبس إلا كده، بـ نرشحه كمان لكل عريس بـ يدور على بدلة الفرح. الخدمة جيدة والموظفين مش هـ يطاردوك لكن هـ يكونوا قريبين لو احتاجت تسأل عن حاجة، وغرف القياس مريحة وكثيرة.

...

مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا