دليل البرامج والمسلسلات - مقالات عن برامج ومسلسلات العالم العربي

تليفزيون

الإيمان والعصر: برنامج بين الدين والتنمية البشرية لعمرو خالد في رمضان
اصدرت في: 07/07/2015

بعد غياب طويل واتجاه لسكة الأدب وإصدار رواية بعنوان رافي بركات، بـ يعود لنا الداعية عمرو خالد ببرنامج "الإيمان والعصر".. البرنامج بـ يحاول يربط بين حياتنا اليومية والعصرية، وبين الدين والتدين والإسلام. أول وأهم شىء لفت نظرنا في البرنامج كانت الديكورات الفخمة والمتميزة، تقريبًا التصوير تم في فيلا راقية، وفي غرفة واسعة لها سقف مش بـ نشوف آخره! وجدران الغرفة عبارة عن أرفف مكتبة واسعة، اللقطات الواسعة اللي بـ تتجول فيها الكاميرا بحرية بـ تخلينا نركز مع الديكور ونحس بالعراقة والمستوى الإنتاجي المتميز. بعد كده بـ يبدأ عمرو خالد في تقديم برنامجه من وضع الوقوف، وبـ يبدأ يتحرك يمينًا ويسارًا بأسلوب سلس وبحركات بطيئة، وممكن يستعين بكتاب ياخده من الرفوف الموضوعة أمامه.. وبـ يكلم أكثر من كاميرا في نفس الوقت ويتحرك بين الكاميرات بسلاسة عارفينها فيه من زمان. عمرو خالد هو نفسه عمرو خالد.. بداية من خلط الدين بالتنمية البشرية، ونهاية بأسلوبه المميز في الكلام وحركات يده، مرورًا بحبه لسرد القصص وتقريب رسالته بالأمثلة والشروحات المستفيضة، واللى أشعرتنا في بعض الحلقات بالملل زي حلقة "فقه حب الحياة" واللي ضرب فيها أمثلة كثير علشان يوصل لهدف واحد كان مفهوم لنا من البداية. البرنامج بـ يركز في حياته على نقد الإلحاد ومحاولة تفنيد دعاوي الملحدين، ثم بـ يبدأ يناقش القضايا السياسية اليومية زي انتشار جماعة داعش وغيرها من الجماعات الإرهابية اللى بـ تأخذ من الإسلام آياته وتعيد صياغتها واستعمالها بأسلوب خاطئ، والحقيقة أن البرنامج مش بـ يقدم جديد في المنطقة دي لأننا سبق وتابعنا برنامج آخر حاول يناقش نفس الأمور للشيخ خالد الجندي. الدين عند عمرو خالد مرتبط بشكل كبير بالتنمية البشرية.. بـ نشوفه طوال الوقت بـ يستعمل كلمات إنجليزية في نصف الكلام، وبـ يستعمل أسلوب وطريقة بـ نشوفها كثير في مدربي التنمية البشرية، بالإضافة لأسلوبه في السرد وطريقته في توصيل المعلومة اللى بـ تخلط بين الدين والتنمية البشرية وهو خلط في رأينا خاطئ جدًا. ثقافة عمرو خالد الواسعة بـ تظهر في حلقات البرنامج، وبما أنه صاحب الإعداد للحلقات بـ نقدر ننسب له فضل المعلومات اللى شوفناها في البرنامج وما كناش نعرفها زي "قلعة موسى" اللى اتكلم عنها فى الحلقة 14 لرجل لبناني ضربه مدرس التربية الفنية وهو صغير لأنه حلم ببناء قلعة وقال له "احلم على قدرك"، فـ صمم وقدر يبني القلعة فعلًا ويجعلها مزار للناس من كل مكان.. وغيرها من المعلومات. "الإيمان والعصر" برنامج جديد لعمرو خالد وعودة موفقة لعالم الميديا، وإن كان فيه خلط بين الدين والتنمية البشرية.

...

هبوط اضطراري: برنامج مقالب رمضاني... بدون تجديد
اصدرت في: 30/06/2015

وكأن برنامج رامز جلال فتح علينا باب مش هـ نعرف نقفله، هو باب برامج المقالب اللى كلها في النهاية شبه بعضها بشكل كبير، بداية من سلسلة برامج رامز اللى "بـ يتحفنا" بها كل سنة، ونهاية بـ "هبوط اضطراري"، ومرورًا بـ "فؤش في المعسكر" واللى تم عرضه في رمضان الماضي و"التجربة الخفية" اللى بـ يتم عرضه هذا الموسم. أن البرامج تكون متشابهة ده مفهوم، لكن أن البرامج كلها تقريبًا تدور في فلك واحد هو فلك الطائرة وحوادث الجو وإيهام الضيف باقتراب حياته من نهايتها، ده اللى مش قادرين نفهم سببه أبدًا، ومش قادرين نقتنع أن فقر الأفكار أدى بالقائمين على 3 برامج في رمضان أنهم يشتغلوا على 3 أفكار بـ تدور في الجو وتقريبًا مع نفس الممثلين! البرنامج بـ يبدأ كالعادة بـ تقديم هاني رمزي للضيف أو الضيفة، بكثير من الاستظراف والاستخفاف غير المضحك على الإطلاق، ثم بـ يبدأ المقلب من خلال تحرك الطائرة بالضيف وبداية الرحلة، ثم بـ تبدأ بعض المواقف تحصل زي سقوط المضيفة ببعض الأكل أو الشرب على الضيفة أو الضيف، وانتهاءً بإيهام الضيف بسقوط الطائرة واندلاع حريق في محركات الطائرة! حلقة روجينا على سبيل المثال حسينا أنها نسخة مكررة من نفس الحلقة مع نفس الفنانة في برنامج التجربة الخفية، نفس البكاء ونفس الانفعالات ونفس ردود الأفعال، والأسوأ أن لسه المشاهدين مقتنعين بحقيقة اللى بـ يحصل! السؤال اللى بـ يطرح نفسه.. هل ممكن الإنسان الطبيعي يحتفظ بهدوء أعصابه حتى في موقف زي ده؟ صحيح إحنا بـ نشوف صراخ الضيوف وانهيارهم، لكن هل فريق عمل البرنامج ضامن أن الضيف مش هـ يصاب بارتفاع في ضغط الدم أو ذبحة صدرية مثلًا -لا سمح الله- ؟! أم أن البرامج دي كلها قائمة على الترتيب مع الضيوف مع كتابة عقود بعدم تسريب أسرار الحلقات أو الاعتراف بأنها حقيقة فعلًا؟! هبوط اضطراري برنامج مضطرب بـ يستكمل به هاني رمزي سلسلة طويلة من السقطات في السينما والتليفزيون، ونتمنى في رمضان القادم يكون فيه عدد أقل من برامج المقالب.. ولو عاوزين يحتفظوا بنفس عدد البرامج على الأقل يحاولوا يغيروا الأفكار شوية!

...

ظرف أسود: مسلسل تشويقي فكرته مُعادة في رمضان
اصدرت في: 25/06/2015

التتر: التتر متداخل جدًا وفيه جو كده شبه المسلسلات الأجنبية في لعبة الجرافيك من أول التتر، وده أعطانا مؤشر على أن المسلسل هـ يكون مختلف. البداية: خلينا نقول أن البداية هـ تشدك يعني هـ تشدك.. في الصحراء وزوجتك معاك وثلاثة عاوزينها منك.. بـ يصحى يوسف (عمرو يوسف) من كابوس (اللى حكيناه من شوية) وهو في السجن بسبب قضية إيصال أمانة لصالح البرنس (محمود البزاوي)، البرنس ده بقى اللى بـ يحاول مراودة سعاد زوجة يوسف (درة) علشان هي عاجباه.. وبـ يطالبها بالطلاق منه علشان يتجوزها، المهم بـ يخرج يوسف من السجن عن طريق كفالة مش عارف مين اللى دفعها. مش مفهوم: المشكلة أن حضرتك في أول حلقتين تقريبًا هـ تبقى مش مستوعب إيه اللى بـ يحصل، ويمكن بعض الناس تشوف أن ده صعب وهـ يخلي المشاهد ما يركزش في المسلسل.. لكن رأينا أن ده عمل تشويق كبير وخلى المشاهد يركز جدًا مع اللى بـ يحصل علشان يفهم وعلشان المسلسل تشويقى جدًا. التشويق: عامل مهم جدًا في صناعة المسلسل أنك تشوق المشاهد وتخليه مركز معاك، وعاوز يعرف إيه اللى هـ يحصل، ولازم نقول أن مؤلف ظرف أسود قدر يكتب سيناريو مشوق، هو يعيبه أن مجموع القصص بتاعته مش جديدة يعني لازم الراجل الفاسد والشاب المظلوم والراجل الغني اللى عاوز ياخد زوجة الرجل متوسط الحال أو الفقير، يعنى على حسب الحبكة.. لكن برضه لازم نعترف أن مجموع الحبكات دي لما دخلت مع بعض عملت شغل عالي ومختلف وعملت خلطة كده من التشويق مع الدراما والحركة. الحركة: الحركة مصطلح أجنبي أصلاً أخذناه من أفلام الـ Action وقررنا نترجمه إلى أفلام الحركة وبعدين ظهرت مسلسلات الحركة، يعنى المسلسلات اللى فيها دراما ممزوجة بالضرب والتشويق والجرى وراء متهم والعسكر والحرامية والمطاردات وخاصة مطاردات العربيات.. عندنا فى مصر أخدنا وقت طويل علشان نطلع من أفلام الحركة على نمط "شجيع السيما" العبقرى فريد شوقى.. أو على نمط "فرافيرو" وهي الحركة الكوميدية للعبقرى فؤاد المهندس، وعدينا على تجارب كثير وصلت للشحات مبروك وغيرهم.. إلى أن بدأ الإنتاج فى بلدنا الحبيبة ومعاه الإخراج ينتبهوا إلى أن اللى عندنا مش حركة، وهنا قرروا الاستعانة بكذا جهة، منهم جهات تدريبية زي مدربي الألعاب القتالية علشان يمرنوا الممثلين، ومنها جهات أجنبية قادرة على صنع مشاهد حركة تقترب من الحقيقي، وده نوعًا بدأ يظهر مع السقا وسلسلة أفلامه اللى بدأت مع تيتو، وفى مسلسلنا ده لازم نقول أن الحركة فيه تطورت وأنك تقدر تشوف مسلسل تشويقي جيد لكن حبكته قديمة.

...

رامز واكل الجو: بداية نهاية رامز جلال في رمضان
اصدرت في: 22/06/2015

أي نكتة.. أو موقف مضحك، لو تكرر بحذافيره مرة واثنين وثلاثة، بـ تتحول لشىء سخيف وغير مضحك بالمرة، فما بالك بفكرة برنامج غير مضحكة بـ يتم تكرارها للسنة الخامسة على التوالي، وبدون أي نية للتجديد، بل على العكس لاحظنا تراجع في مستوى تنفيذ المقالب! البرنامج بـ يبدأ بمقدمة موسيقية مكررة وشبه مقتبسة من باقي برامج رامز في السنين اللى فاتت.. كورال فخم في البداية ثم موسيقى سريعة وكلمات أسرع مع شوية جرافيكس، ثم بـ يبدأ رامز -اللى بـ يغني التتر بنفسه- في تقديم البرنامج بنفس طريقته المعهودة وبنفس ديباجة كل سنة، مع شوية قلش على النجم اللى بـ يتم استضافته. البرنامج قائم على استدراج النجم لمؤتمر وهمي في دبي، ومن ثم بـ يتم إقناعه بركوب طائرة لعمل جولة، وهناك بـ يتم عمل المقلب الرئيسي من خلال إيهام الضحية أن الطائرة اللى راكبها هـ تقع، لكن قبل المقلب الرئيسي بـ نشوف شوية مقالب بسيطة زي تقديم قهوة طعمها وحش أو رش بعض الروائح الكريهة في الطائرة، أو حتى ترك الضيف بسرعة لعمل لقاء صحفي مع نجم أهم منه.. وغيرها من المواقف الرخمة! المختلف في برنامج رامز السنة دي هو حاجتين: الأول سلبي وهو ضعف المقلب الرئيسي وقصر مدته وعدم جديته وعدم دخول الضحية في موقف حقيقي يثير المتفرج ويضع النجم في حالة غير اللى عارفينها عنه في الوقت العادي، والأمر الثاني إيجابي وهو استعانة رامز بالماكياج من خلال فريق عمل أجنبي محترف، بـ يغير شكل رامز في كل حلقة بشكل مختلف تمامًا ومثير للدهشة والإعجاب. كالعادة شوفنا شتائم وضرب وردود أفعال عصبية من النجوم بعد معرفتهم بالمقلب، حلقة لوسي حتى الآن كانت الأعنف من حيث الشتائم اللى تم تغطيتها كلها ونقدر نقول أن الحلقة كلها كانت عبارة عن صوت (تييييت) متواصل بشكل يخلينا نستنتج مدى قبح الشتائم اللى قيلت، لأن الشتائم اللى ما تمش تغطيتها كانت سيئة جدًا لدرجة أننا حتى مش عارفين نعطيكم أمثلة عليها! الحلقة الأعنف -حتى الآن- من الناحية الجسدية كانت لمحمد رمضان اللى ضرب رامز بالشلوت بشكل عنيف جدًا بالإضافة للألفاظ طبعًا! برامج رامز بـ تحقق دائمًا أعلى نسب المشاهدة في كل السنين اللى فاتت، أما السنة دي إحنا عندنا شك حقيقي من قدرة البرنامج على حصد نفس نسب المشاهدة للأسباب اللى ذكرناها في المقال النقدى.. ونعتقد أن بداية نهاية برامج رامز في المقالب هـ تكون مع "رامز واكل الجو"، لكن هل طوفان برامج المقالب الرمضانية هـ يتوقف مع انحدار رامز جلال؟ نتمنى... لكن نشك!

...

ماسبيرو: لعبة الذكريات على قناة Ten
اصدرت في: 05/06/2015

اللعبة: اللعب على منطقة الذكريات من الحاجات المؤثرة.. اللعب على العقل بـ يكون صعب.. اللعب على المشاعر والعواطف أسهل كثير اللعب على عواطفك من خلال الذكريات هو أحسن باب.. اللعبة لها قواعد.. ما ينفعش تخرج عن قواعد اللعبة وإلا طردوك منها اللعبة عليك أنت لوحدك.. ركز واهدأ وافهم البرنامج اللي عبارة عن حكاية، والحكاية محتاجة راوي والراوي لازم يكون له مقومات.. يبقى ده وقت الكلام عن مقومات الراوي. مقومات الراوى: الراوي لازم يكون عنده قدرة كبيرة على الحكي وبـ يتمتع بسلاسة.. وذهنه حاضر.. وأداؤه سريع وقوى ومحكم.. الراوي لازم يكون عارف الحكاية من بره ومن جوه يعنى أسرار الحكاية وتفاصيلها. التفاصيل: أكثر حاجة بـ تميز برنامج سمير صبرى "ماسبيرو" على قناة Ten هو اهتمامه بالتفاصيل، وأنه بـ يحكى حكايات قديمة لكن كل ده زي ما هو جميل وممتع عمل مشاكل من نوع ثاني فى البرنامج. المشاكل: مشاكل البرنامج قائمة على الإطار العام اللي واخده.. يعنى البرنامج قائم على فكرة الحكي عن الزمن الجميل، وبالتالي ده خلى أداء سمير صبرى "واقع" وهادى بزيادة وده ممكن يعمل حالة ملل للمشاهد وما يقدرش يكمل متابعة البرنامج. كمان فيه مشكلة أن البرنامج مدته طويلة أحيانًا بـ يعدى الساعتين.. وطالما أغلبه بـ تشوف شخصية واحدة هي اللي بـ تتكلم وكمان بأداء واحد ده هـ يخليك ما تستحملش.. أضف لكل اللي فات أن كمان الأغاني اللي بـ يذيعها سمير صبري فى البرنامج بـ تبقى كاملة من أولها لآخرها مش جزء أو كوبلية من الأغنية وينقل على حاجة ثانية بسرعة. بصوا هو برنامج لسن الستين وأنت طالع.. هـ ينبسطوا به قوي.. خاصة لما يحكي عن ذكرياته مع شادية وعبد الحليم وعبد الوهاب وهنا قواعد اللعبة بـ تختلف لأن موقف عبد الوهاب اللي حكاه بدأ يسمع على صفحات التواصل الاجتماعى. لقاء عبد الوهاب: مش هـ نطول عليكم اللعبة هنا في الحكاية اللي حكاها سمير صبرى عن عبد الوهاب.. الموسيقار العبقرى اللي لحن له أغنية وسمير وهو بـ يحكي كان فخور جدًا بالحكاية وبسرده علشان كده طلعت حلوة... وكمان الجميل في الموضوع أنه قعد يقلد صوت عبد الوهاب وهو بـ يسأله: عبد الوهاب: الغنوة دي هـ تغنيها لمين؟ سمير: لميرفت أمين يا أستاذ محمد. عبد الوهاب: الله الله الله البنوتة دي عاملة زي الملبسة تحطها في "بقك" وتفضل تمصمص تمصمص علشان ما تخلصش. القضية: مش ناقص من كلامنا إلا أننا نقول أن الجو العام للبرنامج شكله قديم.. والتصوير مركز على سمير صبرى بس وزاوية الكاميرا ثابتة مافيهاش لعب.. وفيه مشاكل على البرنامج وقضية رافعها "اتحاد الإذاعة والتليفزيون" على إدارة قناة Ten علشان برنامج ماسبيرو كان بـ يعرض على القناة الأولى بنفس الشكل والموضوع والمحتوى.. وكمان الأغاني القديمة ملك لاتحاد الإذاعة والتليفزيون وما باعوهاش للقناة.. وفي انتظار حل الموضوع.. لكن البرنامج شغال عادى.

...

السم فى العسل: حوار مع نفسية النجوم على mbc مصر 2
اصدرت في: 17/05/2015

على رأى الناس بتوع زمان: لو عاوز تعطى حد حاجة أو معلومة مهمة وهو مش متقبلها.. اعطي له السم فى العسل، وفيه ناس ثانيين كانوا بـ يقولوا على النصاب أنه بـ يبيع السم فى العسل يعنى يعطيك كلام معسول (زى العسل) لكن جواه سم ونصب وحاجات كده يعنى، ومن نظريات التربية أنك تدخل الألعاب فى كل حاجة عاوز ابنك يذاكر خلى المذاكرة لعبة، عاوزه يأكل اعمل الأكل لعبة وكأنك بـ تعطى له سم المذاكرة فى عسل اللعب. هبة الأباصيرى بقى المذيعة المعروفة قررت تعمل برنامج وتسميه "السم فى العسل"، لكن يا ترى هى ماشية مع أى نظرية؟ ده اللى هـ نعرفه وإحنا بـ نتكلم عن برنامجها الجديد. بـ تقول فى مقدمة البرنامج أن الوصفات القديمة فيها السم اللى ممكن يقتل وفيه الشفا اللى من كلمة واحدة.. العسل ممكن يعملها.. ما تخافش من السم ولا تآمن للعسل. طب إيه الحكاية؟ صراحة إحنا عاجبنا العنوان وعاجبنا فكرته خاصة أنها بـ تبدأ بمقدمات مختلفة زى مثلًا: "الباب اللى ييجي لك منه الريح سده واستريح" وبـ تبنى الحلقة على الموضوع ده وتقول أسئلة ماشية بقى مع المثل الشعبى، يعنى يا ترى لما تسد الباب هـ تستريح ولا إيه؟ يا ترى هـ تخاف من السم وهـ تآمن للعسل؟ تعالوا نقول لكم.. الديكور مافيهوش تجديد هو ستوديو والتصوير داخلى كله.. وقائم على مقدمة المذيعة وبعدها لقاء مع الضيف والكلام كله بـ يدور حول فكرتين: "ما تخافش من السم" وهى الأسئلة الصعبة اللى بـ تنكش فى حياة الضيف وتجيب أسراره لو قضية مثلًا كانت مرفوعة عليه أو مواقف بايخة تعرض لها أو فيلم أو مسلسل فشل له. والفكرة الثانية "ولا تآمن للعسل"، والموضوع مرتبط برضه بفريق إعداد جيد بـ يجيب صور للضيوف مختلفة وقديمة أو كمان حاجة عملوها كأنهم زاروا مدرستهم القديمة مثلًا من قريب وهما كبار وبـ يبدأ هنا موضوع السم فى العسل، الصورة حلوة والضيف راح يزور مدرسته.. لكن هبة الأباصيرى بـ تحاول تفهم هو ليه عمل الحاجة الفلانية ويا ترى هو عمل الحاجة دى علشان شايل هموم أو مكتئب وحياته عاملة إزاى وهو مبسوط ولا لأ.. يعنى بـ تحاول تضغط على الضيف علشان تطلع اللى جواه.. الأسئلة جزء منها نفسى وجزء منها بـ يدور داخل حياة الضيف وأدواره المختلفة وهو مثلًا بقى جرئ فى أدواره وده ينفعه ولا لأ.. وبـ تمنحه حق التمصل فى سؤال واحد وما يردش عليه.. أو طوق النجاة علشان يهرب من الفخ اللى فى السؤال.. ويا ترى هـ يقدر الضيف يهرب من العسل المسموم ولا هـ يقع فى الفخ؟ ده اللى بـ يعتمد عليه البرنامج.. البرنامج حلو لكنه ما خرجش بره فكرة التقليدية ومقابلة ضيف والدردشة معاه.

...

ست الحسن: منوعات من غير سياسة على قناة ONtv
اصدرت في: 03/11/2014

فاكرين القصة زمان بتاعة ست الحسن والجمال؟.. تقريبًا كل الناس عارفاها.. وهى قصة جميلة يستمتع بها الصغار والكبار واسم يشد جدًا، وده اسم برنامجنا النهارده اللى يشد أى بنت، وبالذات البنت اللى نفسها تبقى "ست الحسن" فلازم هـ تتفرج عليه علشان تشوف فيه رشاقتها وجمالها ومكياجها وأكلاتها المفضلة والدايت والحاجات دى. المفروض أن فكرة البرنامج قائمة على اللى فات وده اللى قالته مقدمة البرنامج شيريهان أبو الحسن.. أنه برنامج هـ يكون لكل ست مصرية من أسوان للإسكندرية وهـ يشوف اهتمامتها ومشكلاتها وقضايا الست المصرية فى ربوع مصر. والبرنامج بـ يركز على إبداعات الست المصرية فى الفن والأدب وكل المجالات.. وده طبعًا هـ يخليها تهتم بالعاملات والفلاحات فى القاهرة والأقاليم المختلفة، الناس المنسية واللى مافيش حد بـ يعبرها.. لحد هنا نقطة ومن أول السطر. تعالوا نشوف فى أول حلقة استضافت شيريهان معظم زميلاتها مقدمات البرنامج طبعًا فى "Ontv" علشان يحتفلوا ببداية البرنامج وعن طموحها فى البرنامج وأنها إن شاء الله هـ تقدم حاجة حلوة. عمومًا فى الآخر زيها زى برنامج "صاحبة السعادة" اللى قالت أنها هـ تحاول تعرفنا مصر فين وإحنا وديناها فين فى برومو البرنامج وبعد كده لاقيناها استضافت فنانين ومشاهير ولا إحنا عرفنا ولا هى وصلتنا. بالضبط قررت شيريهان فى حلقة اشتهرت باسم "الجوكر" مستضيفة فيها مطرب مسمى نفسه "مطرب الرعب" وإحنا هـ نسيبكم تقولوا أنتم إيه علاقة ده بالست المصرية.. عمومًا هى اشتغلت برضه على المرأة وعلى الأطباء اللى لهم علاقة بأمراض النساء والحملات اللى بـ تهتم بالمرأة والمشاهير من النساء زى رنا سماحة مثلًا.. وقدرت تعمل شغل حلو وتجذب الناس، والبرنامج أشبه بفكرة المجلة الاجتماعية اللى بـ تهتم بالمشكلات فى أبواب ويحاول يحلها كلها من خلال مناقشتها مع الضيوف. الديكور فى البرنامج نهارى جميل والستوديو لونه أبيض ومريح للعين وتفاصيله بـ تميل للعصرية، وشيريهان وهى بـ تقدم البرنامج تحس أنها صديقتك وده طبعًا من مميزات المذيعة الشاطرة -خاصة اللى بـ تقدم برنامج اجتماعى- يعنى بـ تضحك وتتفاعل مع كلام الضيوف وتستشهد بأمثال شعبية وعادى أنك تلاقيها تقول "دخول الحمام مش زى خروجه".. وفى النهاية هى نجحت فى البُعد عن السياسة والتوك شوز وعملت برنامج فى مجلة لطيفة وسمته اسم لطيف مع ضيوف ومجموعة تقارير وطلع فى الآخر "ست الحسن".

...

المستخبى: إيه المسكوت عنه على قناة القاهرة والناس
اصدرت في: 08/10/2014

منى عراقى مخرجة تليفزيونية كانت بـ تعمل أفلام تسجيلية واشتغلت صحفية فترة من الوقت.. كل ده أثر عليها وعلى أفكارها وخلاها تشوف إيه اللى ممكن تقدمه للمجتمع المصرى من خلال برنامج جديد وفكرته جديدة. قبل أى حاجة تعالوا نسمع هى قالت إيه فى أول حوار لها بعد البرنامج.. قالت أنها بعد 9 سنين قدمت فيها أفلام بـ تتضمن التحقيقات الاستقصائية المهمة لقضايا مهمة وخطيرة مست حياة المصريين، شافت أن الأفلام لا تأتى بأى نتائج حقيقية على الأرض، وأن تأثيرها فقط فى بعض المهرجانات وكمان بـ تخلق عداوة مع الناس اللى اتعمل عليهم التحقيقات. علشان كده كان الحل الوحيد هو نقل التجربة دى للشاشة علشان تحقق الصدى المطلوب لهذه القضايا الخطيرة اللى بـ تمس حياة ملايين المصريين. فكان برنامج المستخبى اللى بالفعل عملته بجرأة واشتغلت فيه "عاملة نظافة" أو متعهدة قمامة بالبلدى يعنى "زبَّالة" (بالتشديد على الباء) علشان تعرف المستشفيات بـ تعمل إيه فى نفايتها وبـ تروح فين وإيه اللى بـ يحصل فيها خصوصًا المخلفات الخطيرة اللى المفروض تتحرق.. وطبعًا بـ نسمع عن كوارث وبلاوى لازم تخلى الشعب ده يموت ولازم بعدها نقول إحنا شعب عايش بالقدرة الإلهية. طبعًا قابلتها مشاكل كثير وهى بـ تصور الناس خاصة أنها بـ تصور الناس من غير علمهم لكن ده ما يعملش مشاكل قانونية لأن فى الغالب كل الحلقات ممكن نعتبرها بلاغ للنائب العام والتصوير بـ يتم بكاميرتها السرية زى ما بـ تحب "منى عراقى" تسميها ومع أن جودة الصورة بـ تبقى سيئة لكن محتواها لازم يوجع قلبك. البرنامج جيد فى محتواه ومش بـ يهتم بالديكور المبهرج ولا بحرفية التصوير، بـ يهتم بفكرته اللى مطرقعة وعاوزة تقول أن فريق الإعداد اللى مع منى هو البطل الكبير والجندى المجهول وراها.. كمان لازم نرفع القبعة للمذيعة اللى شغلها فى الصحافة خلاها تمتلك قلب قوى وجرئ وتروح لأماكن صعبة وتعمل تحقيقاتها هناك وممكن يحصل لها حاجة لكنها قادرة تقاوم كل الشر ده. الأنواع دى من البرامج بـ تبقى محتاجة معاها مسئول فى كل حلقة محافظ بقى أو نائب عام أو وزير علشان فعلًا البرنامج يكون له صدى عالى ويحقق المطلوب منه، ده اللى ناقص البرنامج، أما فكرته وطريقة إعداده فهى جيدة جدًا قائمة على مقابلات ناس ومسئولين لهم علاقة بموضوع الحلقة.. لكن اللى بـ نتكلم عنه هو فكرة المسئول اللى يأخذ قرار وفكرة رد الفعل مش بس أنهم يحسسوا كل حد ماشى شمال أنه ممكن يتصور زى ما بـ تختم منى عراقى حلقتها.

...

المسامح كريم: برنامج بـ يلم الشمل من جديد
اصدرت في: 27/07/2014

مع زحمة برامج المقالب والتوك شو في رمضان بـ يطل علينا الإعلامى الكبير "جورج قرداحى" ببرنامج مختلف عن باقى البرامج المصرية وهو "المسامح كريم" اللى بـ يُعرض على قناةcbc حصريًا. بـ تقوم فكرة البرنامج على اختصار المسافات اللى بعدت بين أي شخصين متخاصمين خصوصًا لو كانوا أقارب، وبـ يقدم البرنامج دعوة لأحد الطرفين ويتفاجأ في البرنامج بالطرف الثانى ويبدأ دور الإعلامى جورج قرداحى في تقريب المسافات والتهدئة بين الطرفين إلى أن يتم الصلح، وخلال البرنامج بـ نتعرف على قصص كثيرة مؤثرة ومش دائمًا بـ يقدر جورج قرداحى يقنع الطرفين بالصلح لكن على الأقل قرب بينهم خطوة. ومن القصص مثلاً اللى تعرض لها البرنامج: قصة الشاب محمد محمد عطية اللى بعد عن والده 26 سنة بسبب طلاق والديه وتكفلت أمه بتربيته هو وأخوته بعد زواج أبيه وسافر محمد خارج مصر ولما رجع دعا أبوه علشان يسكن معاه ولكن حصلت بينهم مشاجرة بسبب عدم اهتمام الأب بابنه في الماضى وترك الأب منزل ابنه بعد شهر واحد وتفاجأ الأب بابنه في البرنامح مع جورج قرداحى وتأثر وبكى وأوضح أنه ندم جدًا علشان ساب ابنه، والابن كمان اعتذر لأبوه وحضنوا بعض. "المسامح كريم" يعتبر النسخة العربية من البرنامج الشهير You've Got Mailوبالرغم أن فكرة البرنامج مش جديدة لكنها جديدة على التليفزيون المصرى وبـ يعتبر البرنامج بالبلدى "له لازمة" لأنه بـ يقوم برسالة نبيلة وهى فض النزاعات، ومن ناحية ثانية هو فرصة للاعتبار، يعنى ممكن جدًا لما يشاهد البرنامج شخصين متخاصمين تتحرك عاطفتهم ويميلوا للصلح، وبعد حلقات من البرنامج بدأ كثير من المشاهدين إطلاق لقب "شيخ الصلح" على الإعلامى جورج قرداحى وده علشان الحالات اللى قدر بالفعل ينجح في الصلح بينهم. لكنه مش دائمًا بـ ينجح فحلقة بين أخين تخاصموا منذ عامين بـ يفشل جورج قرداحى أنه يصلح بينهم وكانت قصة الخصام أن الأخين كانوا متشاركين في مشروع أجهزة دى جى للأفراح وأحدهم باع الأجهزة وفض المشروع دون علم الآخر ومن هنا نشأ الصراع والخصام خصوصا أن الأجهزة تم بيعها بالخسارة ولما تفاجأ أحد الأخين في البرنامج بأخوه غضب جدًا وكانوا على وشك يتخانقوا لولا طاقم البرنامج قاموا بالتدخل. برنامج "المسامح كريم" من نوعية البرامج اللى الناس خاصة الشعب المصرى بـ يحبها لأننا دائمًا بـ نحب القصص والحكايات ولما تكون الحكايات حقيقية ومجهولة النهاية يكون التشويق أكبر. بعض الناس شككوا في أن حلقات البرنامج بـ تتم بالاتفاق مع كومبارس لكن الإعلامى جورج قرداحى نفى الأمر وأكد أن جميع قصص البرنامج حقيقية وجميع الضيوف مش مأجورين. في النهاية نقدر نقول أن البرنامج حتى ولو دارت حوله الشكوك فهو برنامج مختلف واستطاع أنه يحظى بمشاهدة جيدة. علشان تعرف مواعيد وقنوات عرض "المسامح كريم" زور "دليل كايرو 360 للتليفزيون فى رمضان".

...

حقق حلمك: اسم يوجع على الحياة فى رمضان
اصدرت في: 25/07/2014

أربعة طرق: "حقق حلمك".. الاسم فعلًا بـ يوجع قوى.. يا ترى حضرتك ناوى تحقق حلمك؟ طيب إزاى؟ الكتاب بـ يقول صفحة 12 مادة 52 أن فيه أربعة طرق للتحقيق: الأولى: اسرح بخيالك واطلع لفوق لفوق جدًا وتخطى كل الحدود وحقق حلمك فى خيالك ونام واحلم كويس وهـ تصحى مبسوط قوى. الثانية: كلم حد صاحبك بس لازم يكون غنى جدًا واطلب منه يحقق حلمك.. أو ممكن تورث حد يكون غنى برضه فى عيلتك وأنت ما تعرفش عنه حاجة. الثالثة: اشتغل وانجح وحاول وخطط وفكر واجتهد وأكيد ربنا هـ يكرمك. الرابعة: ربنا هـ يكرمك وهـ يسبب أسباب عجيبة جدًا وغريبة جدًا وأحيانًا كمان لا منطقية علشان فى النهاية يحقق لك حلمك بس أنت صدق. الأسباب: زمن ضمن الأسباب دى برنامج "حقق حلمك" اللى بـ يقدمه المذيع الرائع عمرو الليثى واللى قائم على فكرة قضاء حوائج الناس.. وقائم على فرحة الناس.. الجميل فى البرنامج أنه بـ يختار فعلاً حالات تعبانة قوى وفقيرة قوى علشان كده لازم تصدقه قوى.. الفكرة نفسها معادة والمخرج ما عندوش جديد يجود به فى البرنامج غير أنه يجود فى كادرات فرحة الفقير لما يشوف الشبكة جاية له لحد عنده بعد ما كان الموضوع هـ يبوظ علشان ابنه مش معاه فلوس الشبكة. الجديد: الجديد السنة دى أن الأحلام بـ تختلف باختلاف الناس وكمان الليثى بـ يطور من أفكاره زى الطفل أحمد اللى كل حلمه أنه يبقى "سبايدر مان" ووسط فرحة والديه بـ يحقق حلمه، أو نور اللى قدمت فقرة من برنامج الليثى لأن كل حلمها أنها تبقى مذيعة ولو لفقرة واحدة.. أو أميرة وعريسها اللى راحوا مع الليثى علشان يشتروا المطبخ وغرفة النوم ويكتمل حلمهم ويتزوجوا. هنا: هنا لازم نقف شوية ونقول أن فكرة تحقيق الحلم على الرغم من وجود رعاة للبرنامج ورغم نجاحه وصدقه الكبير لكن برضه نقف شوية ونقول للمؤسسات والحكومات دور مهم لازم تقوم به.. والمؤشر بـ يقول أن مصر فيها فقراء كثير قوى ومستنيين يحققوا حلمهم وأحيانًا على فكرة بـ يبقى حلم بسيط قوى. (لقمة عيش) علشان تعرف مواعيد وقنوات عرض "حقق حلمك" زور "دليل كايرو 360 للتليفزيون فى رمضان".

...

شاهد المزيد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال