دليل البرامج والمسلسلات - مقالات عن برامج ومسلسلات العالم العربي

تليفزيون

وش تاني: كريم عبد العزيز يعيد نفسه في دراما رمضان
اصدرت في: 30/06/2015

الوش التاني بقى موجود كثير أوي في الحياة، يعني الناس اللى بـ تطلع بوش وهي مخبية وش تاني خالص، الناس اللى بـ تطلع تتكلم عن خير البلد وأهمية المجتمع والتنمية وكل الحاجات الحلوة دي وبعدين تطلع هي اللى بـ تسرق الناس أصلًا وبـ تهرب بره مصر، ودي تقريبًا هي روح المسلسل الجديد اللى بـ يعمله كريم عبد العزيز مع حسين فهمي اللى طالع بدور الظالم ورجل الأعمال الهارب واللى واكلها والعة، أما كريم عبد العزيز فطبعًا كالعادة هو ابن البلد والشجاع الشهم اللى كل البنات بـ تحبه.. اللى هو "واحد من الناس" والضابط الجدع في "أولاد العم" وحتى لما كان حرامي برضه كان شهم ولازم تحبه في "حرامية في كي جي 2".. يبقى الملخص أنت لازم تحب كريم عبد العزيز. تعالوا نفهم قصة المسلسل.. ولا أي حاجة... قصة مُعادة وتفاصيل كثير أحيانًا ممكن توصل لدرجة الملل وإحنا لسه في الحلقات الأولى.. وكمان حلقات المسلسل متشابهة مع فيلم "المصلحة" في اختيار المشاهد خاصة الكمين اللى بـ يتضرب، وطريقة هروب سيد من الشرطة.. أما بقى عن الديفوهات فخد عندك: سيد موظف أمن بسيط وعايش في بيت تقريبًا آيل للسقوط ومع كده بـ يلبس غالي وشيك جدًا، سيد الفقير عنده لاب توب من النوع الغالي وبـ يشتغل عليه حلو جدًا يكاد يكون خبير كمبيوتر.. مع أن الشرطة بـ تدور عليه وهو هربان إلا أنه بـ يزور أبوه في السجن عادي، وبـ يقول له: "ابني سيد" وما حدش بـ ياخد باله أنه هو، مع أنه غير شكله لكن حتى تغيير شكله مش مقنع بالنسبة للمشاهد.. بـ يفكرنا بالجملة الشهيرة: "ما عرفتكش أنا كده". وعلى الرغم من كل اللى فات لازم نقول أن كريم عبد العزيز عنده قدرة عالية على التمثيل والتصوير والحركات والهروب اللى في المسلسل معمولين بشكل جيد وتقنية التصوير عامة في المسلسلات بقيت عالية وجديرة بالاحترام، وكمان ما بقاش عندنا مشاكل كبيرة في مونتاج الحلقات، يبدو أن جهات الإنتاج غيرت الأجهزة الخاصة بالمونتاج واستعانت بخبراء، لأن شفنا في أكثر من مسلسل شغل جرافيك عالي وشغل كمان بـ يلعب على فكرة المجتمع والخارجين عن القانون والمظلومين وبقى عندنا مسلسلات الحركة والتشويق والإثارة وده مكلف، بس ناقصنا أن الممثلين يتمرنوا كويس وكمان يبقى فيه مخرجين حركة وأكشن من الخارج ساعتها مع قصة جيدة ومحبوكة وجديدة وخيوطها متماسكة هـ نعمل مسلسلات تكسر الدنيا.

...

طريقي: ميلاد جديد لشيرين عبد الوهاب في رمضان 2015
اصدرت في: 28/06/2015

النجمة المتألقة شيرين عبد الوهاب في تجربتها الأولى في التمثيل التليفزيوني بـ تطل علينا في دور جديد ناس كثير قالت أنه بـ يمثل قصة حياة شيرين، لكن تامر حبيب مؤلف المسلسل قال أن كل ده كلام مالوش أي مصدر من الصحة، والمسلسل تقريبًا هو اللى اختار شيرين، لأنه عبارة عن قصة صعود مطربة شابة من الأرياف وإزاي بـ تتحدى تقاليد المجتمع وعاداته، وإزاي قدرت تتحمل العواقب الخاصة بحبها للغناء.. وتعالوا نفهم مع بعض القصة. بـ تبدأ حكاية المسلسل مع محمود، المهندس الشاب، اللى بـ يكتشف بعد حضوره إلى عزبة والده من شغله البعيد، أن والدته هدى هانم حبست أخته الصغرى "دليلة" في أوضة الفيران علشان غنت في حفلة زفاف أحد الأهالي بالقرية، بعد ما فتن عليها أخوها الأكبر "سيد" اللي رفض دخول الجامعة لمساعدة والده سالم في العمل بالعزبة، واللي بـ يخدع "سلوى" صاحبة دليلة بالحب. المهم لحد هنا القصة عادية، لكن بـ تبدأ تبان لما بـ يتخانق سيد مع صاحبه "عليوة" بعد ما يعايره بغناء أخته في فرح القرية، وده بعد ما رفض سيد تسديد اللى عليه من ديون لعب القمار، أما محمود فبـ يحاول إقناع والده إلغاء قرار محكمة الحاجة والدته بحبس دليلة، لكن هدى هانم بـ تدخل وتقلب الترابيزة على الجميع لأنها ببساطة بـ تعلن رفضها الواضح لغناء بنتها (شيرين)، وبـ تعاير سالم أنها قبلت الزواج منه رغم رفض عيلتها علشان الفرق الاجتماعي، وبعد ما توافق أخيرًا هدى هانم على السماح لبنتها أنها تخرج من أوضة الفيران تطلب من عائلتها الاستعداد للسفر إلى بيت خالتهم للاحتفال معهم بشم النسيم.. كل اللى فات بـ يبين قد إيه الجو اللى هـ نعيشه في مسلسل "طريقي". تعالوا نقف شوية مع شخصية هدى هانم (سوسن بدر) وتحكمها الشديد وإزاي قدرت تجسد الشخصية بقوة كبيرة ودراية وخبرة، أما شيرين ما حدش يقدر يتكلم عن صوتها وقبولها، أما عن تمثيلها فهي لسه محتاجة تتدرب أكثر وتشتغل على نفسها أكثر من كده، التصوير واخد كادرات كثير قريبة من الوجه وبـ يحاول يركز على الملامح أكثر من الصورة العامة. أما الإخراج فهو جيد والكادرات متاخده وراء بعض في تناسق وتناغم لكن يبقى أن القصة مُعادة مش جديدة.. هي قصة صعود مطربة شفناها قبل كده فى مسلسل "الشحرورة" و"أسمهان"، فإيه الجديد غير أن شيرين دخلت مدرسة الراهبات وبـ تحاول تشتهر؟ نعتقد أن نهاية المسلسل برضه هـ تبقى بنفس الفكرة أنها هـ تبقى مشهورة جدًا وعيلتها في النهاية هـ تفتخر بها بعد ما كانت هاجراها.. ورمضان كريم.

...

لعبة أبليس: مسلسل أقل من قدرات أبطاله
اصدرت في: 28/06/2015

بعد النجاح الكبير في رقم مجهول ثم اسم مؤقت والصياد كان لازم يتم استغلال النجاح ده أفضل من كده في "لعبة إبليس"، لكن اللى شوفناه لحد دلوقت أن المسلسل مش بنفس قوة مسلسلات يوسف الشريف وفريقه اللى اعتاد على الظهور معاه.. شيري عادل والمخرج إسماعيل شريف والسيناريست عمرو سمير عاطف. المسلسل بـ يحكي عن أخين (بـ يقوم بالدورين يوسف الشريف)، الأول بـ يرث تركة مهولة عبارة عن سلسلة قنوات فضائية ناجحة، لكن بـ يحصل مشكلة على الميراث بينه وبين أخوه اللى بـ يشتغل ساحر وبـ يقدم فقرات في المسارح والأماكن العامة، وبـ يبدأ يستغل خبراته للانتقام من أخوه والوصول لحقه من خلال التواطؤ مع سكرتيرته (شيري عادل). المسلسل في الأصل كان رواية كتبتها إنجي علاء زوجة (يوسف الشريف)، واشتغلت قبل كده معاه كستايلست في الصياد واسم مؤقت ورقم مجهول، وشاركت بشخصيتها الحقيقية في اسم مؤقت، يوسف لما قرأ الرواية عجبته وقرر يحولها لمسلسل مع وعد من إنجي بصدور الرواية بعد عرض المسلسل. لكن الحقيقة أن فكرة تحويل العمل الأول لكاتب إلى مسلسل فكرة مخيفة شوية، مع احترامنا للعلاقة الشخصية و"الكيميا" اللى ممكن تكون موجودة بين الأزواج، لكننا عارفين كويس أن مافيش مجاملات في الشغل، وأن أي كاتب علشان يثقل موهبته محتاج عمله يتم طرحه الأول ونقده من القراء والمتخصصين قبل تحويله لمسلسل، ويمكن ده اللى جعل المسلسل السنة دي أضعف من باقي السنوات. يوسف الشريف قادر يفصل بين الشخصيتين بشكل كويس، قادر يقدم انفعالات مختلفة لكن طريقته في الكلام والتصرفات للشخصيتين تقريبًا واحدة.. شيري عادل لسه دورها مش ظاهر بشكل قوي أو مؤثر لحد دلوقت لكن بشكل عام مستوى المسلسل كله سواء في الكتابة أو الإخراج أو حتى الأداء التمثيلي أضعف من المسلسلات اللى عملها يوسف قبل كده. شريف إسماعيل المخرج فضل أنه يبتعد عن الغموض والأمور المعقدة في طرح المسلسل، ويمكن دي أول سنة نشوف فيها مسلسل ليوسف الشريف مافيهوش عقد أو ألغاز أو أسرار أو حتى مشاهد فلاش باك وخلفيات نفسية معقدة للأبطال، الموضوع ده ميزته أنه بـ يقدم عمل سهل يمكن لأي شخص متابعته دون مجهود، لكن في النفس الوقت بـ يفقد العمل اهتمام المشاهد والحرص على عدم تفويت أي حلقة، لكن إسماعيل قدر يحتفظ بعادة كويسة من باقي أعماله هي إغلاق كل حلقة على سر أو مفاجأة مذهلة بـ تخلي المشاهد في حالة ترقب للحلقة القادمة. "لعبة إبليس" مسلسل متوسط الجودة، لو كان البطل فنان ثاني غير يوسف الشريف كان ممكن نعتبره مسلسل جيد، لكن يوسف علمنا وعودنا على انتظار الأفضل والأقوى منه.. ولسه عندنا أمل كبير في اختياراته المقبلة وقدرته على تصحيح مساره بذكاء فني يحسب له باستمرار.

...

الكابوس: اللهم اجعله خير في دراما رمضان
اصدرت في: 27/06/2015

لسه مكملين في فكرة مسلسلات الغموض والشك وأحيانًا الرعب كمان، واللى تميزت فيها غادة عبد الرازق من ساعة مسلسل "مع سبق الإصرار" واللى كان لازن تتابعوه لآخر حلقة علشان تفسروه أو تفكوا اللوغاريتمات الخاصة به، صراحة فكرة الشفرة فى المسلسل مهمة جدًا لأنها بـ تخليك مركز مع المسلسل جدًا وعاوز تعرف إيه اللى هـ يحصل. وده اللى بـ يميز المسلسل وسط زحمة المسلسلات الرمضانية... تعالوا نعرف إيه الحكاية.. بـ تحلم مشيرة (غادة عبد الرازق) في ليلة العيد بكابوس بـ ييجي لها فيه ابنها فارس (كريم قاسم)، ويقول لها أن هى سبب ضياعه ولازم تروح عند الجبل، ولما يبص لها تلاقى عيونه مخيفة ومرعبة، وبـ تصحى علشان ذبح الأضحية، ولما بـ تروح بـ تكتشف ضياع سلسلة المفاتيح اللي كانت أول هدية من زوجها. وبعد توزيع اللحمة على الغلابة بـ تروح ملجأ الأطفال علشان تعطي لطفل اسمه فارس لبس العيد ولعب وتوعده أنهم هـ يروحوا بكره الملاهي، وتروح بعد كده للمكان اللي توفى فيه زوجها وتفتكر لما جابها المكان علشان يوريها مكنة إعادة تحويل الزبالة لمنتجات فـ تقع سلسلتها داخل المكنة فيـ حاول أنه يعيدها لها فـ يصعق من الكهرباء وتلد في نفس المكان ابنها فارس وإذا بها تنتبه لكيس زبالة يقع عليها وفيه رأس ابنها فارس، وطبعًا لازم نفهم أن أجزاء كثير من المسلسل بـ تتداخل فيها الحقيقة مع الحلم يعنى مش هـ تعرف تفرق ما بين الواقع والخيال، ما بين الحقيقة اللى بجد والحلم، في الكابوس المنطقتين بـ يدخلوا مع بعض في الكابوس هـ تلاقى الشعرة اللى بـ تفصل بين حقيقتك وبين خيالك. فاكر مرة لما صحيت من النوم وأنت مش عارف هو أنت كنت بـ تحلم ولا ده حصل بجد.. المؤلفة هالة الزغندى لعبت على الموضوع ده خاصة فكرة العقل الباطن واللى بـ يمتلك قدرات ما نقدرش نحدها ولا نفهم طبيعتها حتى، غادة عبد الرازق أدت دور الأم اللى فقدت ابنها بجدارة وجرأة منها أنها تطلع تقريبًا من غير ماكياج أغلب الحلقات، وأنها تطلع فى دور أم لشباب، وكمان من اللافت للنظر استخدام الجرافيك فى المسلسل بشكل جيد خاصة فى الأحلام أو الكوابيس، فكرة المسلسل جديدة وملعوبة حلو ومحاولة التفريق طوال الوقت بين فكرة الكابوس والرسايل مهم وبـ يخليك عاوز تعرف إيه الموضوع وإيه الفكرة، كمان جو الرعب والغموض بـ يخليك كمشاهد مشدود طوال الوقت للمسلسل ومش عاوز تمشى وده يخلى الناس تفهم أن الأفكار الجديدة هى اللى هـ تستمر مش مجرد أنك تلعب على فكرة معادة، الجديد مهم ومفيد خاصة لما بـ يبقى مدعوم من مجموعة شباب شاطر وجرافيك جيد ومن إخراج محبوك ومتعوب فيه علشان يتفصل الخروج من الواقع للحلم ومن الحلم للحلم أو من الحلم للواقع... واللهم اجعله خير.

...

ذهاب وعودة: مسلسل وجع قلب في رمضان
اصدرت في: 24/06/2015

بـ تدور أحداث المسلسل حول أحمد السقا أو خالد الإبراشي رجل الأعمال المعروف واللى شغال في الاستيراد والتصدير وبـ يحب مراته وابنه جدًا، ووالده الطيب اللواء أحمد راتب اللى برضه بـ يحب أسرته جدًا، ولأن المسلسل قائم على فكرة الحب.. بـ تخطف ابنه عصابة بـ تتاجر في الأعضاء البشرية. بعد ما بـ يكتشف خالد ضياع ابنه أو على الأصح اختطافه بـ تدور الحكاية عن إبلاغ الشرطة اللى بدأت بالتحقيق في ملابسات الخطف علشان توصل إلي حقيقة المختطف لأنهم اكتشفوا بقايا شعر الطفل ياسين وهدومه بأحد حمامات المول التجاري اللي كان فيه بصحبة أمه.. طبعًا مش هـ نقول لكم على وجع القلب اللى قدرت تجسده الممثلة الشاطرة "إنجي المقدم" وهي بـ تنادى على ابنها في ميكروفون المول التجارى، قد إيه التصوير في المسلسل ده جيد وبـ ياخد زوايا جديدة حتى ده باين في تتر المسلسل، وبذكر التتر طبعًا يبقى لازم نقول أن الأغنية حلوة قوي مع أنها كئيبة لكن معبرة جدًا، المهم رجل الأعمال زى أي حد في شغل التجارة لازم يكون له ناس ضده.. أعداؤه في الشغل وفي المنافسة وفي الحياة، والمشكلة بقى أن خالد رجل أعمال كبير يعني أعداؤه كثير جدًا وده اللى خلى فرصة أنك تعرف مين اللى خطف ابنه صعبة، والسوق كبير وفيه كثير من المنافسين لكن يا ترى المنافسة في الشغل تؤدى لخطف الولد الصغير؟ ولا الخدامة هي السبب واللى تحس أن وراها حكاية. لازم نقول أن الموضوع مكتوب حلو ومعمول فيه شغل عالي والقصة مع أنها اتعادت في أفلام قبل كده عن خطف الأولاد الصغيرين، ولو فاكرين أغنية "عودى يا بلية" بتاعة عمرو دياب والكلام عن العيال اللى بـ تتخطف من أهلها، إلا أن برضه التصوير والإخراج الجيد واستخدام كاميرات حديثة وده باين في جودة الصورة في كل المسلسلات السنة دي، كل ده بـ يؤثر، وبـ يخليك قاعد مركز مع المسلسل. أما عن الممثلين فأحمد السقا فارس وشاطر في أفلام ومسلسلات الأكشن، لكن في مسلسلات الدراما بـ نحس أن فيه حاجة ناقصة، هي إيه لسه بـ ندور عليها، لكن الأكيد أن السقا شاطر جدًا في منطقته (الأكشن). أكثر حد لازم نرفع له القبعة في المسلسل هي إنجي المقدم لأنها مش بـ تمثل هي أم بالفعل خايفة على ابنها وقلبها موجوع عليه وبـ توجع قلب كل اللى بـ يتفرج، وهي طبيعية في تمثيلها يعني هـ تصدقها هـ تصدقها، المهم تركز معاها مش هـ تحس بـ تمثيل هـ تحس بوجع قلب الأم.

...

ألف ليلة وليلة: الأسطورة في شكلها الجديد في رمضان
اصدرت في: 23/06/2015

الفكرة: لازم نقول من الأول كده أن من الصعب جدًا أنك تعمل مسلسل زي ألف ليلة وليلة، وده لعدة أسباب: لما اتعمل زمان كانت شهرزاد هي زوزو نبيل بصوتها الفخم جدًا وأدائها اللى لسه حافظينه لحد دلوقت. ألف ليلة وليلة مجموعة قصص قائمة على الانبهار والرعب والخيال الواسع، يا ترى هـ تقدر تعمل ده. شهريار تكرر كثير كملك قاعد وسط الجوارى وبـ يلعب ويهزر ويقتل النساء، إيه الجديد اللى هـ تقدمه؟ القرار: لكن لما قررنا نعمل "ألف ليلة وليلة" كان الموضوع مختلف، قررنا نعمل مسلسل بجد يتشاف في رمضان، قررنا نعمل حاجة لها علاقة بالجرافيك.. قررنا نعمل حاجة لها علاقة بالحركة والأكشن بس بجد، تخيلوا لما تتفرجوا على حاجات بـ تظهر وتختفي ووحوش ودنيا.. تعالوا نحكى لكم بالتفصيل.. بصوا إحنا مع اللعبة الحلوة، وإحنا لما بـ نشوف حاجة مختلفة لازم نقول عليها مختلفة.. وده راجع لشوية حاجات. الحاجات: الحلقة الأولى للمسلسل مملة صراحة وفيها حكي كثير عن فكرة ألف ليلة وليلة وليه الملك قرر يقتل كل نساء المملكة، لكن إحنا صبرنا وقولنا أننا هـ نشوفها برضه، وبدأت الحلقة تسخن في الآخر وبدأت السرعة تبقى أعلى. شغل الجرافيك في المسلسل هايل وواضح أن فيه فريق وخبرة عالية في الموضوع لأننا في الغالب عملنا "المونتاج" في أوربا وده طبعًا خلى المنتج النهائي يقترب من أفلام الأساطير العالمية. نيكول سابا وشريف منير وأمير كرارة وآسر ياسين وغيرهم قادرين يعملوا حاجة جديدة ومختلفة وكلهم أدوا أدوارهم بشكل جيد. الفكرة بقى بقيت مختلفة في التفاصيل اللى عملها محمد ناير المؤلف على ألف ليلة وليلة، زي تفاصيل أن فيه حركة مقاومة ضد شهريار، وعاوزين يتخلصوا منه، وزي أن شهرزاد عاوزة تقتل شهريار لأنه السبب في قتل والدتها. صورة شهريار مختلفة جدًا في المسلسل ده لأنه ملك بـ يحارب وبـ يهتم بـ توسيع مملكته وأوضاع البلاد وحال الناس، وذنبه الوحيد أنه قتل أغلب نساء المملكة. نقلة الصورة والكاميرا وشكل التصوير من المملكة لحكاية ألف ليلة وليلة نقلات جيدة ومحبوكة، وما بـ تتعبش العين، بالعكس بـ تريحها وبـ تحسس المشاهد أنه اتنقل في الزمن وده الهدف الكبير من وراء النقلة، لأن الحكايات في زمن وحالة مختلفة. الشخصيات الكثير والإخراج المتميز والجرافيك العالي والممثلين الشاطرين والتكلفة العالية للمسلسل وموسيقى الأوركسترا العظيمة كل دى مقومات نجاح ألف ليلة وليلة.

...

المطلقات: مسلسل بعيد عن السامعين على قناة Ten
اصدرت في: 18/05/2015

تبدأ الحلقة الأولى بصورة لكوبري قصر النيل علامة على أننا في القاهرة.. وعلا غانم بـ تلم شنطة هدومها وشكلها متضايق جدًا، والدخلة بقى في أول الكلام لها وردها على أمها اللي بـ تقول لها: "مش هـ تسافري يعني مش هـ تسافري". ترد: "عايزيني أقعد؟.. تمام... قولي للناس تسيبني في حالي.. انزلي خبطي على شقة شقة وقولي لهم سيبوني في حالي.. قولي للناس تبطل تبص لي نظرة كده ولا كده احترم نفسك.. تنزلي لكل واحد بـ يتكلم عني وقولي له اخرص". وتسافر دينا المطلقة إسكندرية علشان تشوف حياة جديدة، والمسلسل بـ يناقش فكرة صعبة لشريحة كبيرة في المجتمع. أصعب حاجة في الدنيا الوحدة.. أنك ما تلاقيش حد تتكلم معاه، تفضفض له أو حتى تتخانق معاه، علشان كده كل واحد فينا بـ يدور على نصه الثاني، وكل واحد فاكر نفسه حكم وقاضي، بـ يحاول يحكم على اللي أمامه وخلاص، وخد عندك بقى بالنسبة للمطلقة لازم نبص لها على أنها في الغالب "مش محترمة" أو زي ما بـ يقول الشباب "صيدة سهلة" والهمسات تشتغل عليها خاصة من الجيران والنظرات اللي من تحت لتحت.. وكمان مشكلة الأهل اللي أول ما يحصل معاهم حاجة أو مشكلة لازم تقول الأم أو الأب لبنتهم: "أنت مش عارفة أنت إيه.. أنتي مطلقة" وكأن دي نهاية العالم بالنسبة للبنت. الشخصيات الأربعة الأساسية في المسلسل بـ يسيطر عليها الكآبة علشان مطلقات: علا غانم جوازتها جاءت غلط أصلًا لأنها افتكرت العريس "لُقطة" ما يتعوضش يعني ولازم تتجوزه وعلشان والدها متوفي وما عندهاش خبرة هي ولا مامتها اتجوزته وطلع الموضوع على فاشوش.. واتطلقت، وهي بقى البنت العنيدة. مي كساب هي الشخصية الهادية الحنينة والزعلانة أغلب الأوقات واللي بـ تشتاق دايمًا كده.. ميرهان حسين شخصية جميلة بـ تحاول توقع الشاب الغني علشان تتجوزه وما عندهاش أ مؤهلات غير أنها البنوتة الرقيقة.. مي سليم بـ تعمل شخصية جديدة عليها خالص وهي الصعيدية المحجبة اللي جاءت الإسكندرية علشان تتعلم فوقعت في غرام الشاب الظريف. الفكرة في المسلسل حلوة وهي وجهة نظر المطلقات عن نفسها، يعني الموضوع من وجهة نظر نسائية ومن وجهة نظر المجتمع، لكن المسلسل شخصياته قليلة وحواره كبير وأماكن تصويره قليلة والدنيا عمالة تدور حول فكرة واحدة وكلام بـ يتكرر في الحوار وكأن مافيش جديد وكمان الأحداث نفسها مش بـ تتطور بسرعة، ودي من السلبيات اللي بـ نأخذها على المسلسل. لكن من الناحية الاجتماعية لازم نقول أنه مهم جدًا وجاي في توقيته، علشان يعالج نظرة المجتمع لها ونطرة الست للست المطلقة حتى لو صاحبتها لأنها بـ تخاف على جوزها منها، ونظرة الأهل والجيران والأصدقاء في العمل.. وبعيد عن السامعين يا رب.

...

الصندوق الأسود: خليه مقفول أحسن على قناة النهار
اصدرت في: 07/02/2015

داخل كل واحد فينا "صندوق أسود"، الأسرار اللى بـ يخفيها كل شخص بداخله وبـ يرفض التحدث عنها حتى لأقرب الأشخاص إليه وهى دي نفس فكرة المسلسل، من خلال قصة درامية ومعالجة جيدة للسيناريست طارق بركات، يا ترى الصندوق اللى جواك لونه إيه؟ سألت نفسك قبل كده السؤال ده ودورت جواك علشان تعرف الصندوق أسود ولا أبيض؟ ما تتعبش نفسك فى التفكير، برضه جواك صندوق أسود شايل فيه ذكريات وحاجات كلها هـ توديك فى النهاية لطريقين ما لهمش ثالث.. يا خير يا شر.. وأنت وقوتك بقى يا تقفل الصندوق وتختار الخير ويا تسيبه مفتوح وأنت عارف بقى هـ تمشى فين، مش كده ولا إيه؟ نفس الحكاية اللى اتهرست 100 مرة فى التليفزيون والسينما،وهى حكاية البنت الفقيرة الطموحة.. واللى عاوزة تبقى غنية ومشهورة ومعاها فلوس كثير وعربية وساكنة فى فيلا.. ودائمًا بـ نلاقى اللعب على مشاعر الناس فى القصص اللى زى دى.. ما هو أصل كلنا بـ نحب الفلوس وكلنا عاوزين نبقى أغنياء،لكن الفرق بقى فى الطريقة اللى هـ نبقى بها أغنياء، هـ نتعب ونشقى ونتعلم ونتدرب لحد ما نستحق نترقى أو نعمل مشروع مدروس ومع الوقت نبقى مستورين.. أو ربنا يكرمنا ونبقى أغنياء.. ولا هـ نسيب كل اللى فات ونبقى وصوليين أو ندور على طريق غلط ومختصر ونهايته الله أعلم بها. نرجع للمسلسل.. بـ تدور أحداث "الصندوق الأسود" فى إطار اجتماعى درامى عن تمرد رانيا يوسف"دولت" على طريقة حياة عائلتها المكونة من الأب اللى بـ يشتغل سائق والأم اللى شغالة خادمة فى المنازل،دولت بـ تعتمد على جمالها كوسيلة لمحاولة الهروب من فقرها وتعيش هى وأسرتها فى مستوى أعلى بس بـ تواجهها بعض الصعوبات فى رحلتها، خصوصًا أنها ما عملتش حساب لحياتها الجديدة. رانيا يوسف فنانة متميزة قدرت خلال السنوات الأخيرة تخلى الجمهور يحبها ويثق فى قدرتها على التمثيل، وبالذات فى مسلسل "موجة حارة"،"نيران صديقة"، وفيلم "واحد صحيح" اللى أخدت فيهجايزة أفضل ممثلة فى المهرجان القومى للسينما المصرية. أما خالد سرحان فبـ يقوم بشخصية مختلفة وجديدة وهى شخصية "بلطجى" مسجل خطر يحترف الإجرام لكن وجود دولت فى حياته اللى حبها ووقع فى غرامها بـ يتحول من مجرم إلى إنسان صالح وبـ يحب الخير.. المسلسل إخراجه جيد ورؤيته تستحق وديكوره مناسب للحالات الاجتماعية اللى شغال عليها..اتفرجوا عليه وقولوا لنا رأيكم.

...

لو: مسلسل يفتح باب الشيطان على قناة الحياة
اصدرت في: 15/11/2014

التويتة الأولى: ليلى تشعر بملل شديد مع أنها غنية جدًا. التويتة الثانية: مع أنها رفضت جاد ومحاولاته لكنها استسلمت فى النهاية لرغباته. التويتة الثالثة: يبدأ غيث فى الظهور وليلى مستغربة وجوده فى المنزل من غير ما ينزل. ثلاث تويتات بـ يلخصوا المسلسل أو فكرته العامة اللى بـ تدور حول ليلى اللى اتجوزت من من غيث لكنه مشغول عنها بعمله، وهى بـ تشعر بفراغ عاطفي نتيجة إهماله، لحد ما تشوف الفنان التشكيلي جاد اللى بـ يهتم بها جدًا. وتنشأ بينهم قصة حب سرية.. ورغم قرارها بـ ترك عشيقها، ومرورها بلحظات ندم وتأنيب ضمير، يستمر جاد بكل الوسائل والطرق غير المتوقعة علشان يخليها ترجع له ثانى.. يا ترى هـ ترجع ثانى ولا لأ. لازم تتابعوا المسلسل علشان تعرفوا.. بشكل عام نقدر نقول أن المسلسل كويس.. إنتاجه جيد مش مبهر جدًا، بمعنى ثانى مش زى المسلسلات التاريخية.. "حريم السلطان" مثلاً.. قائم على فكرة البنت الغنية المرفهة وزوجها المشغول وهى مشاكل طبقة معينة من الناس مش كثير بـ يهتم بها.. لكن اللى لازم نقوله أن مطلوب التنوع فى القصص.. يعنى الحبكة الرئيسية للمسلسل قائمة على علاقة ثلاثة ببعض: زوج وزوجة وعشيق.. وصراحة هي فكرة قديمة قوى.. وتم إعادتها فى كثير من المسلسلات المصرى.. ولكن يمكن التغيير بعد كده ييجى فى طرق العشيق اللى هو "جاد" فى استمالتها.. لكن برضه الموضوع ده مكرر يعنى الموضوع فى النهاية حب وخيانة.. من ناحية الإخراج لازم نقول أن المخرج سامر البرقاوى عمل شغل ممتاز فى اللقطات واختيار الأماكن وتصوير "الـ Locations" فى مشاهد الزواج واختيار زاوية الكاميرا والتركيز على الوجوه.. وكمان اختلافها فى زاوية العشيق والتركيز على لغة الجسد. المسلسل متاخد من مجموعة قصص أجنبية زى ما بـ تقول الصفحة الرسمية للمسلسل على الفيسبوك، والموسيقى التصويرية ماشية مع الموضوع جدًا.. وكمان أغنية إليسا فى البداية عملت طعم مختلف للمسلسل وفى أول عرض له حصل المسلسل على "مليون ونصف" مشاهدة على اليوتيوب. بالنسبة لأداء الممثلين لازم يأخذ المركز الأول عابد فهد بأدائه المتميز وهو اللى قام بدور غيث.. وفى المركز الثانى "نادين نسيب" قامت بدور ليلى.. والمركز الثانى برضه دور العشيق "يوسف الخال" ودور عبد الرحمن أبو زهرة برضه كان مميز جدًا وده أكيد من كثر خبرته فى التمثيل.. وأصلًا فكرة أن المسلسل يتعمل "Mix" ما بين ممثلين من جنسيات عربية مختلفة ده بـ يعطى طعم ثانى للموضوع.

...

عد تنازلي: مسلسل عن اغتيال الإرهاب للشرطة في رمضان
اصدرت في: 24/07/2014

كل يوم بـ تثبت ثورة يناير أنها لسة مؤثرة على أحداث حياتنا، وده واضح في الدراما، وخاصة في رمضان اللي تحول لمعرض درامي ضخم، وأثر الثورة في دراما رمضان واضح في تطور الأفكار –وإن تشابهت- وعمق التناول في كثير من الأعمال، والجرأة في مناقشة موضوعات ما كناش متعودين نشوفها على الشاشة قبل 4 سنين. ورمضان السنة دي ظهرت فيه أعمال مختلفة بـ تناقش موضوعات متعلقة بالشرطة، والجماعات الإرهابية وأحداث العنف اللي حصلت على مدار سنة من بعد نهاية حُكم الإخوان.. وده مطروح بوضوح في مسلسل "عد تنازلي" اللي كتبه تامر إبراهيم، وأخرجه حسين المنباوي كأول تجربة درامية له. غموض المسلسل بـ يظهر في حلقته الأولى، اللي بـ تدور معظم أحداثها في الظلام أو في أماكن مغلقة. ببدلة الإعدام يظهر الإرهابي سالم (عمرو يوسف) داخل السجن وهو واثق في نفسه ويطلب مقابلة الضابط اللي كان قبض عليه، مقابل أنه يبلغ الشرطة بتفاصيل عملية اغتيال متوقعة لمساعد وزير الداخلية، وبسرعة بـ يظهر الضابط حمزة (طارق لطفي) بعد ما اضطر يقطع أجازته المفتوحة اللي بدأت بعد إصابته أثناء القبض على الإرهابي، وبـ يقابل المحكوم عليه بالإعدام علشان يعرف تفاصيل عملية الاغتيال، لكنه قال له لازم الحُكم يتأجل.. لكن اللواء اللي مُعرض للاغتيال رفض التأجيل وأصر على تنفيذ الإعدام في ميعاده لأنه شايف أن عيب شرطي كبير زيه يخاف من تهديد إرهابي. الموسيقى التصويرية مساهمة جدًا في ربط المشاهد ببعضها وتوصيل إحساس الغموض وترقب حاجة مهمة هـ تحصل بشكل مفاجئ، وده عنصر مهم جدًا بـ يأثر فعلًا في المشاهدة وبـ يربطنا بمتابعة الأحداث حتى وإن كان فيه شيء من الملل. اغتيل اللواء مساعد وزير الداخلية، كترجمة لواقع الشرطة في عدم القدرة حتى على حماية نفسها وتأمين قيادتها.. ومن أغرب مشاهد المسلسل، مشهد بدء التحقيقات في واقعة الاغتيال، ورفع البصمات من الشقة اللي شهدت الحادثة، والمفاجأة أن الضابط بهاء (محمد فراج) اكتشف أن بصمات القتل متطابقة مع بصمات الضابط حمزة! وبـ نكتشف تورط حمزة في الأحداث بعد اتصال سالم به علشان يبلغه بثاني عملية اغتيال واللي هـ يكون ضحيتها المقدم إيهاب. في الحلقات التالية هـ نلاحظ تسارع كبير في تطور الأحداث وظهور شخصيات اختفيت من الحلقات الأولى، وهـ تفاجئنا غادة (كندة علوش) بمقابلة أحد الشخصيات المهمة والمؤثرة في أحداث العمل.. وهـ يتعرض مرشد الإخوان اللي بـ يقوم بدوره الفنان سيد رجب للاعتداء والغريب أن الضابط حمزة هـ يظهر ويحاول ينقذ المرشد من الموت. ديكورات العمل هادئة ومش مُكلفة كثير، والمؤثرات الخاصة زي الانفجارات مش معمولة كويس، خاصة مشهد انفجار السيارة في أول حلقات المسلسل اللي بـ يظهر بشكل سيء جدًا وغير واقعي. علشان تعرف مواعيد وقنوات عرض "عد تنازلى" زور "دليل كايرو 360 للتليفزيون فى رمضان".

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن