دليل البرامج والمسلسلات - مقالات عن برامج ومسلسلات العالم العربي

تليفزيون

بالفيديو: حلقات هاني في الأدغال متفبركة ولا حقيقية؟
اصدرت في: 23/06/2016

الحكاية فيها إن.. زى ما بنقول إحنا المصريين لما نحس أن الموضوع فيه حاجة، وقلبنا مش متطمن، وده اللي حاصل السنة دي على برامج المقالب ومنها رامز بيلعب بالنار، وهو الموضوع متفبرك ولا لأ، وكمان هاني في الأدغال.. وإحنا صراحةً مش عارفين إيه موضوع البرامج اللي بتتعمل بأسماء أصحابها دي، رامز وهاني، البرنامج قايم على حاجتين: اسم النجم، وضيوفه النجوم! وفي النص اضحك يا عم المشاهد بقى وعيش حياتك و اتسلى في رمضان! فكرة البرنامج قايمة على أن فيه دعوة بتيجي للفنانيين لعمل رحلة ترفيهية ودعائية للسياحة في جنوب إفريقيا، وطبعًا الفنان المحبوب بيلبي الطلب ويروح يركب عربية الرحلات المفتوحة من كل ناحية لكنها متقفلة بشبك حديد، وتبدأ الرحلة الجميلة والمناظر الطبيعية اللي بجد تخليك منبهر وتخليك بتشكر الناس اللي فكرت أن البرنامج يبقى في المكان ده، علشان نشوف طبيعة مختلفة وجميلة كده، وفجأة بتبتدي الدنيا تقلب وسائق العربية يروح ضحية أسد متوحش، والنجم يلاقي نفسه في مواجهة أسود وتعابين بقى وموضوع كبير، والمفروض أن الفنان الموهوب بيصوت ويموت من الرعب، وفجأة يلاقي طيارة، يجي يروح لها تمشي وتسيبه، علشان يظهر هاني رمزي في النهاية ويقوله أنها خدعة وهزار! .. لحد هنا الدنيا تمام والبرنامج فكرته جديدة ودخول الحيوانات عليه بيدى طابع مختلف خاصة أنه في مكان مفتوح، وبيئة مختلفة، وميزانية إنتاجه ضخمة مش عادية يعني فيه تكاليف سفر طاقم العمل وكل النجوم اللي اتصور معاهم وكمان تدريب الحيوانات دي والتصوير في مكان مفتوح زي ده، إنتاج محترم يعني.. لكن.. ويا خوفي من "لكن" دي لكن يا ترى الممثلين فعلًا كانوا متفاجئين؟ ولا الموضوع كله على بعضه فبركة؟ الحقيقة قررنا ندعبس في الموضوع ونبص بعين الناقد ونتابع السوشيال ميديا، ولاقينا مجموعة مش قليلة من الناس واقفة ضد البرنامج وموضحة كمان أنه متفبرك.. وكله بالفيديو! .. الفيديو اللي فيه جايبين كمية الكاميرات اللي واقفة قدام وش الممثلين وده بيبان من قرب الكاميرا قوى من الوش، وكمان الكاميرات اللي بانت في زوايا العربية اللي بيركبوها وإزاى مش بيبصوا لها خالص، فحتى لو كانت كاميرات متركبة وواضحة على اعتبار أنهم فى حملة دعائية وكده، فيه مشكلتين الأولى أن الممثل مش بيبص لها خالص من باب تطبيق النظرية العظيمة بتاعت: "صورنى و أنا مش واخد بالي" والمشكلة التانية هي أن كل الكاميرات جوه العربية متوجهة ناحية الضيف، مع أن المفروض لو كاميرات دعائية يبقى جزء متوجه ناحية الضيف وجزء ناحية الطبيعة اللي بره علشان الموضوع مايبقاش مقفوش أوي كده.. أما بقى أكتر حاجة جننت الناس، هي الغلطة الكبيرة اللي ظهر فيها مروض الأسود من ورا إلهام شاهين في لقطة خاطفة بس ظهر، وطبعًا الدنيا قامت ومقعدتش، وهاني رمزي رد وقال أنه عادي لأن الأسد محتاج مروض، لكن اللي مش عادي أن الضيف يشوف الأسد والمروض مع بعض يا عم هاني.. مش كده ولا إيه؟

...

رامز بيلعب بالنار.. مش كفاية كده يا رامز؟!
اصدرت في: 20/06/2016

أعزائي القراء على كل تابلت، أعزائي القراء على كل تليفون وأمام كل كمبيوتر، أهلا بكم في نقد جديد لبرنامج من برامج رامز جلال.. اتكلمنا قبل كده عن رامز ثعلب الصحراء و رامز واكل الجو وفي كل مرة بنقعد نقول ونعيد ونزيد لحد ما ريقنا ينشف، ورمضان يخلص وييجي رمضان جديد ونشوف برنامج جديد من برامج رامز جلال، وفي كل مرة بيحقق أعلى نسب المشاهدة! الموسم ده الموضوع اختلف بعض الشيء، يمكن بسبب القضية اللي رفعتها بنت متضررة من برنامج رامز جلال لأنها كانت ضحية إحدى الحرائق، وحست بإهانة وتقليب للمواجع بسبب جملة رامز جلال: "إحساس جميل لما تشوف واحد بيولع قدامك".. وده خلاها تتجه للقضاء وترفع قضية على البرنامج وعلى رامز. البرنامج زي كل سنة بيبدأ بتتر متصور على كروما خضراء –لتركيب الخدع- لرامز جلال فى مشاهد كلها ديناميت وقنابل ومتفجرات، بعدها بيبدأ البرنامج برامز وهو بيقدم الضيف من خلال استخدام عبارات أقل ما يمكن أن يقال عنها أنها عبارات مسيئة.. العبارات نفسها بتزيد وبتتكرر أثناء دخول الضيف لمجال الخدعة واللى بتكون عبارة عن دعوة في فندق فخم في المغرب لحضور مؤتمر فني، بتتحول لمأساة مع نشوب حريق في المبني، ثم بيدخل رامز كرجل مطافي علشان يزيد الطين بله ويغرق الضيف بمياه الإطفاء أو يقعد على ضهره –زي حلقة الخليل كوميدي- أو يتسبب للضيف في إصابات زي حلقة علا غانم، وغيرها من المواقف.. بعد كده بيصارح رامز جلال الضيف بحقيقة المقلب، ساعتها بيبدأ فاصل من الشتايم أو الضرب زي ما حصل في حلقة أمير كرارة اللي انهال بالضرب على رامز جلال وفريق عمل البرنامج نفسه. ده ملخص للـ 30 حلقة من البرنامج واللى بنتوقع أنها مش هتتغير أبدًا، لأن ده نفس سيناريو حلقات رامز جلال في كل سنة في رمضان، والحقيقة احنا مش قادرين نلومه قوي علشان كل سنة بيحقق أعلى نسب المشاهدة، بالتالي احنا مش قادرين ننسى دور المشاهد اللي بيحقق الترافيك وبيشجع رامز على تكرار برامجه. في رأينا أننا محتاجين نكون أكثر صراحة مع نفسنا: هل احنا بنحب نشوف المشاهير على التليفزيون وهما "بيولعوا" أو بيتعرضوا لمواقف سخيفة؟ هل رامز بيحقق رغبة نفسية دفينة داخل كل واحد فينا أنه يشوف نجمه المفضل اللي بيشوفه دايمًا في السما وهو بيتبهدل أو بيتعرض لمواقف ممكن أي شخص فينا يتعرض لها؟ ولا احنا بنكره النوعية دي من البرامج ومش حابين نشوفها؟ في الحالة دي يبقى غيروا مؤشر القناة عن رامز جلال، علشان يفقد الحاجة اللي ساند عليها، ومانضطرش نشوفه في موسم جديد.

...

بنات سوبر مان: مارفل بالخلطة المصرية
اصدرت في: 19/06/2016

مارفل: كلنا عارفين شركة (مارفل) اللي صنعت في عقول جيل كامل فكرة البطل الخارق، اللي بينقذ الأرض (والبنات الحلوة) على طول، مين فينا ماتفرجش على سوبر مان وبات مان وسبايدر مان، وكات وومن، مين فينا ماتعلقش بيهم وكان نفسه يطير زيهم، أو يبقى عنده جزء من قوتهم علشان يخلص كل مشاكله.. مارفل شركة كبيرة عندها قدرة تسويقية عالية وفريق عنده مهارة الابتكار، الفيلم اللي بيطلع مش مجرد فيلم سينما وخلاص، ده وراه فريق عمل ضخم وناس بتسوق الفكرة وبتنتج معاها لعبة وأبليكشن وصفحات على الفيس بوك وعالم تاني ناقص لنا كتير علشان نوصل له. البنات: إحنا بقى في مصر قررنا نعلي على (مارفل) ونخلي سوبر مان يتجوز من مصرية تحديدًا (انتصار) واللي خلفت منه وبقى عنده بنات، وعملنا مسلسل بنات سوبر مان الكوميدي (صراحة) مانقدرش ننكر إنه بيضحك ودمه خفيف وتقدر تخلي العائلة تتفرج معاك عليه، بالذات إن أبطاله قريبين من المشاهد وليهم تيمة كده في تمثيلهم بتخليك تحس أنك بتتفرج على ناس تعرفها قبل كده مش ممثلين، وهما (يسرا اللوزي – شيري – ريهام حجاج – بيومي فؤاد – انتصار – كريم عفيفي) أكيد طبعًا التوليفة دي مش هتعمل حاجة سيئة من ناحية (الضحك) يعني هتضحك هتضحك.. لكن السؤال هنا هل الملسل قدم قيمة. القيمة: لو قررنا نسأل السؤال ده في مسلسل سوبر مان إيه القيمة اللي بتتقدم لنا فيه يعني فكرة العمل إن سوبر مان كان نازل مصر في مهمة خاصة.. وفجأة قرر يغير وجهته ويروح شارع الهرم (الحبكة هنا فيها مشكلة) حتى لو ماشيين بمبدأ خيالي بحت، كان لازم نخلي بالنا من فكرة البطل الخارق اللي بيدعو لقيم عليا، مش رايح شارع الهرم، وبناته هيشتغلوا في النصب، وبيومي فؤاد (خال البنات) تقدر تقول رئيس عصابة قراري، بيخليهم يفتنوا على بعض، في حالة طبعًا مضحكة، لكن في نفس الوقت بتخليك تغير وجهة نظرك على فكرة البطل الخارق. البطل الخارق: هنا بقى لينا وقفة تانية مع البطل الخارق، شركة (مارفل) لما بتعمل حاجة لها علاقة بالمؤثرات البصرية بتبقى حاجة للزمن يعني فيلم بتقعد الناس تتكلم عن كمية الإبهار البصري اللي فيه، لكن في المسلسل واضح أن فيه شركة عادية هي اللي تولت عمليات الخدع البصرية، ركز على المصطلحين لأن ده مهم، فى أوروبا وأمريكا اسمه (إبهار بصري) بس عندنا اسمه (خدع بصرية) يعني محاولة مني إني أخدع عينك مش أبهرك.. وده بالضبط اللي حصل في بنات سوبر مان، هي محاولة كويسة للخدع لكنها مش موفقة وفيها أخطاء تقنية كتير وباين جدًا إقحام (الجرافيك). القصة: الحدوتة حلوة وفكرتها كانت ممكن تجيب ضحك أكت من كده وخيال عالي كمان، كفاية إن سوبر مان نزل مصر، دي لوحدها كوميديا، بس حتى لما عملنا مزاوجة بين الغرب وقصصه وبيننا ضحكنا على نفسنا وسخرنا من فقرنا.. والعمل في مجمله ناجح في فكرته وقدرته على انتزاع الضحك.. لكن كديكورات وإخراج وخدع وزوايا تصوير نقدر نقول (متوسط).

...

نيللي وشيريهان: السر في لغز ميكي
اصدرت في: 12/06/2016

من البداية بنعرف من صوت الراوي (سمير غانم) إن المسلسل بيحكي عن نيللي (دنيا سمير غانم) وشيريهان (إيمي سمير غانم) وبيقول لنا أنهم بنات عمّ. نيللي هي البنت الغنية، حياتها ما بين النادي وعروض الأزياء بالليل، والنوم طول النهار، شيريهان البنت المكافحة اللي بتشتغل 3 شغلانات في وقت واحد. التناقض الصارخ بين حياة البنتين منطقة واسعة للضحك. نيللي بتخبط شيريهان بعربيتها، والأتنين بيروحوا القسم، وهناك بنقابل الضابط تيسير فهمي اللي قام بدوره (شيكو) ودي نفس الشخصية اللي عملها في مسلسل (الرجل العناب) من سنتين، وفعلًا كان ظهور خاصّ جدًا ومختلف في الحلقة الثانية. في القسم صباح (سلوى خطاب) خالة شيريهان، بتقابل الأستاذ عبد الله (بيومي فؤاد) والد نيللي، وبتتضح علاقة القرابة أكثر. تصاعد الأحداث هيبدأ من محاولة رجل الأعمال عبد الله، زير النساء، من التقرب من صباح، أخت زوجة أخوه الراحل! الأستاذ عبد الله بيعرض على شيريهان بنت أخوه شغل في شركته براتب 5000 جنيه شهريًا علشان يتقرب أكتر من خالتها، رغم رفض بنته نيللي الشديد. ده كان خط الأحداث الرئيسي، مع وجود خطوط فرعية تانية، وكل ده في إطار كوميدي رائع. اختيار الممثلين من أهم عوامل النجاح، وطبعًا الكتابة اللي اشترك فيها 3 مؤلفين. الحوارات تلقائية تمامًا، والضحك من مواقف وكلام طبيعي جدًا. بيومي فؤاد من أهم الممثلين اللي ظهروا على الساحة الفترة الأخيرة، وجوده أضاف للحلقات الأولى ثقل وقوة، وخاصة مشاهده مع النجمة سلوى خطاب اللي استغلها المخرج أحمد الجندي في لعب دور الست البلدي اللي عملته باقتدار في مسلسل سجن النسا. النجوم الشباب أضافوا للعمل كتير وخاصة محمد سلام، أداء دنيا سمير غانم مبشر رغم أن دور البنت الأرستقراطية قماشته ضيقة، اختيار ضيوف الشرف من الحاجات الجملية، ومن الواضح أن ده هيبقى التقليد المتبع لسنين جاية وخاصة بعد نجاح مسلسل لهفة السنة اللي فاتت. مسلسل مبشر بكوميديا من العيار التقيل، مع نجوم كتير لسه هنشوف أحلى ما فيهم في الحلقات الجاية.

...

ما يصحش كده: برنامج اجتماعي رياضي ساخر على النهار
اصدرت في: 21/04/2016

مقدمة البرنامج بتقول أنه: برنامج رياضي اجتماعي ساخر، مالوش دعوة بتوجهات قناة النهار ولا ينحاز لأحد ضد أحد ولا يسيء إلى أحد ولا يفبرك أخبار، واللى شغالين عليه لا هم طابور خامس ولا نشطاء ولا عملاء ولا بياخدوا تمويل من الخارج، ولو بصيت في المراية وشفت عيوب كتيرة.. يبقى تلوم مين؟ المراية طبعًا.. ما يصحش كده برنامج مش للأطفال علشان حرام نصدمهم بالواقع بتاعنا، نيموهم واتفرجوا بمزاج. الكرة بالنسبة لنا حياة.. الكورة دي فرحة مش طبيعية.. لي لي لي لي لاه.. ده جزء من الأغنية اللي في بداية البرنامج، واللي فيها إيفيهات كتير وبيغنوها بنفس طريقة أغاني الأولتراس، اللى بيغنوها في الماتشات. وطبعًا ده موضوع حماسى جدًا وبيضحك جدًا في نفس الوقت، وبيخلينا نستنى شوية قبل ما نتكلم عن البرنامج يعني هو مختار أغنية حلوة وبتضحك ومختار أغنية بتوصل للناس وكمان مختار اسم حلو (ما يصحش كده) كل الناس بتستخدمه مايصحش تعمل كده، كده غلط، ما يصحش كده لازم نوصل لكاس العالم، ما يصحش كده اللي بيحصل في الكورة.. وحاجات كتير، البرنامج فكرته حلوة وهيشد شريحة كبيرة من الناس علشان أصلًا عمرو راضي عمل شعبية على اليوتيوب اللي ياما طلع ناس وشهرهم، وبقوا بعد كده بيعملوا في التلفزيون، وده طبعًا بيفرق كتير وبيخلي البرنامج نجاحه مضمون من قبل ما يطلع، وكمان صاحبه بيبقى متعود على الكاميرا، بس بقى عندنا حاجة عايزين نقولها، وأنت على اليوتيوب حمادة ووأنت على التلفزيون حمادة تاني خالص.. مايصحش كده وباسم يوسف! وأنت على اليوتيوب بتتكلم براحتك، وتصور براحتك، وتقول كل اللي أنت عايزه، لا عندك إعلانات ولا قوانين تلفزيون وكده، لكن أول ما تطلع على الشاشة لازم تخلي بالك من لبسك وشكلك وكلامك، عمرو راضي شوية غير الفكرة دي، هو بيطلع وبيقول كلام ممكن نقول عليه (نص خارج) يعني لا هو كلام خارج ولا هو كلام إعلامي مهني، وطبعًا السبب عارفينه أنه اتعود على اللي كان بيعمله على يوتيوب، وتجربة ما يصحش كده قريبة جدًا من تجربة البرنامج اللي كان بيقدمه باسم يوسف، باسم عمل برنامج ساخر وعمرو برضه، باسم كان بيكتب مقدمة بتشرح البرنامج قبل التتر وعمرو برضه، باسم كان بيقول كلام البعض بيعتبره خارج وعمرو برضه، باسم كان بيعمل أغاني جوه الحلقة وعمرو برضه، باسم بدأ من اليوتيوب وعمرو برضه! مش قصدنا نقول أن ما يصحش كده مستنسخ من البرنامج، هو بس تشابه كبير في الشكل، لكن المحتوى نفسه مختلف، خصوصًا في نقطة التركيز في الرياضة شوية، وأحيانًا البرنامج بيكون ساخر، وساعات بيبقى لطيف، وساعات بيبقى عادي مش بيضحك، لكنه بيختار ضيوف مهمين زي أحمد حسن وإبراهيم سعيد ومجدي عبد الغني. هنسيب لكم الحكم على البرنامج، ومنتظرين رأيكم.

...

مسرح النهار: تجربة جديدة على النهار
اصدرت في: 18/04/2016

المسرح أبو الفنون، طبعًا كلنا عارفين المعلومة دي، وعارفين كمان الكلمة المشهورة، وما الدنيا إلا مسرح كبير، صراحة هو كبير جدًا حاجة كده مختلفة، يعني المهم النهارده عايزين نكلمكم عن تجربة مسرحية جديدة، (مسرح النهار) بس قبل ما ندخل فى الموضوع لازم نحكي لكم الحكاية بسرعة.. الحكاية فيها (إنَّ) ليه بقى علشان الفكرة صراحة قديمة من أيام الفنان القدير محمد صبحي لما عمل شوية مسرحيات وسمعت جدًا مع الجمهور، والناس حبته جدًا واتفاعلت معاه، وكمان مع الممثلين اللي كانوا معاه، بس المسرحيات دي وقفت وماقدرش الفنان محمد صبحي أنه يكمل الموضوع، علشان طبعًا التكاليف وكده.. وبعدين طلع لنا الفنان أشرف عبد الباقي وعمل (مسرح مصر) اللي كسر الدنيا وخلى كل الناس ترجع تتفرج على المسرح تاني، وبقت التذاكر كلها محجوزة بشكل كبير، علشان استخدم مجموعة من الشباب الشاطرين وعملوا مسرح صعب يتكرر وبدأ يتعرض على قناة الحياة، وحصلت مشاكل اتقال فيها كلام كتير، وانتهت أن أشرف عبد الباقي غير القناة وغير الاسم وبقى موجود على قناة mbc مصر، طبعًا الحياة هتسكت.. أبدًا مايحصلش جابت مجموعة من الممثلين الشباب وعملت بيهم مسرح تاني لكن للأمانة ما نجحوش زي أشرف عبد الباقي واللي معاه، مع أن فيهم ناس كوميدية جدًا، أو علشان الناس اتعودت على عبد الباقي واللي عمله، مش هطول. جات قناة النهار وقالت اشمعنى أنا يعني.. وقامت عملت مسرح النهار، وهو مشروع كبير ما نقدرش نقول غير كده، مشروع فيه تفاصيل كتير وممثلين كتير وبيشارك في إنتاجه نقابة المهن التمثيلية، قايم على فكرة الضحك الكتير، ومناقشة قضايا اجتماعية، بس الأساس إيه؟ الضحك الفكرة إن قناة النهار عملت تعاون مع د/ أشرف زكي ووقعت عقد معاه عشان ينتجوا مسرحيات لمدة 3 سنين ما بين قناة النهار ونقابة المهن التمثيلية، علشان يعملوا مسرحية كل أسبوع، والمسرحيات أصلًا بتتعرض على مسرح اللي اتسمى (مسرح النهار) وهو مسرح (فيصل ندا) سابقًا، وطبعًا كلنا عارفين أن القناة بقى لها فترة نازلة بمجموعة كبيرة من العروض والبرامج وبتقول للكل النهار موجودة وبتنافس بقوة. المسرحيات بتضحك والديكور حلو ومتكلف، والمسرحيات فيها اللي مستواه عالي وفيها المتوسط، وواضح أن فيه جمهور كبير بيحضر، لكن التجربة لسه في الأول علشان نحكم عليها، وطبعًا هم شاطرين اختاروا يوم الخميس لعرض مسرحياتهم علشان يبعدوا عن مشكلة الجمعة والتنافس بين الحياة وmbc مصر، فيه عدد كبير من الممثلين بيشارك زي مروة عبد المنعم، دينا الشربيني، أحمد فهمي، عمرو رمزي، أحمد صيام.

...

نجم الكوميديا: برنامج ساخر.. اضحك بقى
اصدرت في: 12/04/2016

أيوه بقى عايزين نضحك شوية، معانا برنامج كل هدفه إننا نضحك، وبيدور على نجوم الضحك في كل مكان، مش فى مصر بس لكن فى الوطن العربي كله، يلا خلي السهرة تحلى.. لجنة التحكيم بتتكون من نجم الكوميديا محمد هنيدي، والجميلة سيرين عبد النور، والقدير حسن حسني، بس معلش فيه سؤال.. إيه علاقة سيرين عبد النور بالكوميديا؟ فين هالة فاخر وياسمين عبد العزيز ولطفي لبيب؟ إحنا شايفين أن الاختيارات دي كانت هتبقى أفضل. كمان موضوع أنك تعمل برنامج مابقاش قايم على فكرة حلوة وبس، إحنا في زمن الكل بيتسابق علشان يجذب المشاهد.. وذوق المشاهد اتغير ونظرته للحاجات اللي تشد اتغيرت، يعني دلوقتي بقى المشاهد بيهتم بشكل الاستوديو والإضاءة والإخراج والإنتاج، وطبعًا كلنا واخدين بالنا أن البرنامج وطريقة عرضه متاخدة قص ولزق من برنامجthe voice مع الاختلاف إن ده برنامج بيدور على الموهبة في الكوميديا اللي بنحاول نشوفها معاهم يعني.. طب ليه بنقول كده، بصراحة لحد دلوقتي ماشوفناش الموهبة اللي تموتنا من الضحك.. زي كتير مثلًا ما بنشوف مواهب على اليوتيوب بتضحك أكتر، وده مش معناه أن الناس وحشة، بالعكس فيه مواهب هايلة وحلوة جدًا.. وفيه مواهب كانت تستاهل من وجهة نظرنا تكمل لكنها خرجت. اختيار المتسابقين بيكون على أساس واحد.. وهو التصويت يعني لو أخد المتسابق وش بيضحك يعدي، لو خد وش حزين يبقى فيه قلق وهيبقى في منطقة الخطر، لازم ياخد من التلات محكمين وش بيضحك عشان يكمل في البرنامج وينتقل للمرحلة اللي بعدها. المفروض أن بعد التصفيات النهائية هيتبقى 4 مشتركين، والفائز هيقدم برنامج كوميدي على قناة الحياة. طبعًا أول حلقة اتعرض فيها تقرير عن المحكمين وليه تم إختيارهم وإيه اللي بيميزهم عن غيرهم ومشوارهم الفني، المشكلة الكبيرة عندنا هي اختيار لجنة التحكيم يعني المسابقة قائمة على إيه؟ قائمة على اللي يقدر يضحك اللجنة، وده المعيار للحكم، وبصراحة كدة صعب قوي تبقى مسابقة، كان المفروض يكون فيه حد مسرحي مخرج مثلًا، علشان يقيم الآداء المسرحي وكاتب مثلًا كوميدي يتكلم عن السكريبت مع نجم كوميدي، كان هيبقى الأمر منطقي أكتر. مش عايزين نطول عليكم.. البرنامج حلو وبيضحك، وكان فيه مشكلة أن شركة تانية قالت إن دي فكرتها أصلًا ورفعت قضية على القناة، لكن القناة ردت وقالت أن مافيش أي تشابه بين فكرة الشركة اللي رفعت القضية وبين نجم الكوميديا.

...

أشرف يقدمه أيمن: محاولة كوميدية دون هدف على MBC مصر
اصدرت في: 06/04/2016

الحياة حلوة.. أيوه بالظبط كده.. الحياة حلوة بس نفهمها.. زي ما بتقول الأغنية بتاعة زماااان، وما أدراك ما زمان، لما كانت كل حاجة حلوة من برامج راديو وتلفزيون، يعني تشوف لقاء مع فريد الأطرش، عبد الحليم، أو تسمع على الراديو برنامج ساعة لقلبك للعبقري فؤاد المهندس، دلوقتي الميديا اتغيرت والخريطة بقى لها شكل جديد.. الخريطة بتعتمد على (الضحك) عرفت تضحك الزبون؟ آه معلش قصدي (المشاهد) يبقى أنت بتعمل برنامج ناجح ومفيهاش حاجة يعني لما تقول كلمتين جامدين فى آخر البرنامج علشان يتقال عليك إنك برنامج هادف. الخريطة: تعالوا نبص على الخريطة بسرعة في الفترة الأخيرة عشان نعرف توجهات القنوات رايحة لفين.. هنلاقي "وش السعد" واللى اتهاجم من كتر الإسفاف اللي فيه بدعوى الضحك.. طلع معاه "البلاتوه" يمكن أكتر برنامج فيهم بيحاول يقدم حاجة ومتعوب فيه بجد، وبعدين "مهرجان نجوم الضحك" وده مسمعش خالص ومحدش عرف عنه حاجة، ومن "قبله مسرح مصر "اللي قدر يشد الناس وهو اللي فتح الخريطة للناس عشان يعملوا من بعده برامج ضحك، وتجربة "مسرح الحياة" من غير أشرف عبد الباقي وشبابه، ومن بعدها تجربة "مسرح النهار" اللي لسه بنشوف هتوصل لإيه.. وبرنامج "ميصحش كده" اللي شايفين إنه مش قادر يكمل، وممكن يقفل بعد موسم، وأخيرًا "أشرف يقدمه أيمن".. أشرف يقدمه أيمن؟ الاسم جيد بالفعل، وبيضحك كمان، بس مش كل اسم بيضحك يخليك تتابع البرنامج، شوفنا حلقتين من البرنامج فيهم محاولة للتمثيل وعمل اسكتشات زي بتاعة زمان كده لكن بأسلوب عصري، ومافيش مانع من دخول شوية مؤثرات زي أغنية بتضحك مع راقصة ملهاش لازمة جوه الموضوع، بس لما تيجي في البرومو أكيد هتخليك تتابع. أيمن وتار بدأ حياته كمهندس معماري، وبعدين اشتغل مع باسم يوسف في برنامج البرنامج اللي عمل صدى واسع جدًا له ولكل فريق العمل اللي اشتغل معاه، ومن هنا بدأ الموضوع ينتشر، وبعد ما اتوقف البرنامج بدأت رحلة صعود فريق العمل، منهم اللي راح أوربت واللي قرر يبقى فى MBC مصر، زي أشرف وتار وهو شخصية كاريكاتورية بامتياز، بيمتلك خفة ظل وكاريزما تخليك تضحك فعلًا، بس البرنامج مع إن فكرته حلوة وبيعتمد على فن الإسكتشات لكنه لسه ناقصه حاجة، ناقصه بقى إنه يضحكك بجد، إن يبقى فيه موضوع حقيقي لكل حلقة، يبقى برنامج هادف بجد، خلينا ناخد مثال واحد، الحلقة اللي اتكلم فيها عن المخدرات مثلًا بصراحة تخليك تحب المخدرات من كتر الكلام عنها وتناول الموضوع بشكل يضحك، مافيش غير في النهاية كلمتين من الولد لأبوه إنك ضيعتنا وضيعت حياتنا بالمخدرات! في النهاية احكموا على أشرف اللي بيقدمه أيمن وقولوا لنا رأيكم..

...

البلاتوه: برنامج جامد على قناة النهار
اصدرت في: 27/03/2016

اضحك: لو عاوز تضحك من قلبك بجد.. اتفرج على البلاتوه، باسم يوسف باعتباره أسطورة الكوميديا فى البرامج يرجع من جديد.. آه بجد عدد المشاهدات بيقول كده، التصوير والإنتاج بيقول كده.. أحمد أمين هيكسر الدنيا وهيبقى من أكثر الناس المشهورين قريب جدًا، خدوا مننا بقى اللى جاى. أحمد أمين: هو ممثل بدأ حياته عادى ما حدش كان عارفه، وبعدين قرر بحاجات بسيطة جدًا كاميرا عادية جدًا وقعد فى مكتبه وكتب السكريبت وبدأ يعمل سلسلة فيديوهات كسرت الدنيا واشتهر أحمد أمين وكل الناس بقيت تتفرج عليه على اليوتيوب نفس بداية باسم يوسف، إلا أنه بجد كان معتمد على نفسه وبس وكان كمان بيعمل الفيديو بنفسه وبيقعد يحفظ فى السكريبت علشان ما يعملش مونتاج للحلقة، بيصورها مرة واحدة.. وطلع فى أغلب القنوات يتكلم عن تجربته. البلاتوه: ومن جد وجد بجد.. عمل أمين برنامج البلاتوه، اللى قايم على فكرة جديدة جدًا، هو ممثل أغلب الوقت قاعد فى البلاتوه علشان يصور مشاهد من أفلام بقى أو أى حاجة بتتصور، ولازم يعمل حاجة فيها تصوير لمشهد له علاقة بعنوان الحلقة، يعنى عمل حلقة عن الشغل بفكر جديد، وعمل حلقة أمهات علشان عيد الأم، ودى بقى الحلقة اللى كسرت الدنيا، هو البرنامج فيه تقطيع كتير فى المشاهد، يعنى كام مشهد تمثيلى وكام مشهد فى البلاتوه، وكام مشهد بيتكلم فيهم أحمد أمين عن موضوع الحلقة وفى الغالب بيقعد مع شخص قدامه ويكلمه (زى معز مسعود كده فى آخر برنامج له). السكريبت: السكريبت متعوب فيه جدًا وفيه فريق كتابة بيكتب معاه، وده باين جدًا مع أنه النجم بجد فى البرنامج لكن بيجيب ناس تانية معاه يعنى مش عاوز يشتغل لوحده، هو له حضور قوى على الشاشة، كمان بيعمل مشاهد من أفلام تاريخية بتضحك جدًا، وبيعمل أغانى بشكل جديد. فيه ناس كتير كانت بتشتغل حلو على السوشيال ميديا ومقطعة نفسها على اليوتيوب، لكنه لما بيعمل شغل في التليفزيون بيبقى موضوع مختلف، من الآخر بيفشل، أما أمين تفوق على نفسه أول ما بقيت معاه إمكانيات عمل برنامج أحلى بكتير من اليوتيوب، وده معناه أننا لو أعطينا الفرصة للموهوبين بجد هيعملوا حاجة جديدة ومهمة والأكيد أنها بتضحك. البرنامج في النهاية بيناقش قضية وفيه جديد وممتع، يخليك تتفرج عليه وما تزهقش، ودي أهم علامة للبرنامج الناجح أنك ما تبقاش عاوز تقلب القناة من عليه، يعنى مركز معاه، وبتستنى مواعيده، الفكرة أننا نقدر نقول أن دايمًا فيه جديد، فيه حاجة حلوة المهم نعطي الشباب الفرص، وما تبقاش البرامج هما مجموعة ضيوف معروفة ومجموعة مذيعين مشهورين، الشباب لسه فيه أمل.

...

أكشن يا عيال: برنامج خفيف على mbc Action
اصدرت في: 23/03/2016

الفكرة: من أول ما شفنا البرومو قولنا أن البرنامج ده شكله هيفرق، وهيقدم جديد، أو هيبقى برنامج واقع، وكنا مستنيين نتفرج على كام حلقة فيه علشان نعرف نحكم بجد.. علشان ما ينفعش تحكم على برنامج من حلقة واحدة. خلينا نعرف الفكرة، هما مجموعة شباب بيتكلموا فى موضوعات كثير جدًا بتهم الشباب الصغير و"العيال" هما عاوزين الصغيرين، بس بيستهدفوا الصغيرين اللى فى إعدادى وثانوى وجامعة، مستهدفين شريحة عجيبة وصعب أنك تتعامل معاها.. وده جرأة منهم صراحة. الرحلة: فى الحلقات لازم واحد من الشباب يطلع رحلة استكشافية لمكان ما فى العالم، يعنى إنجلترا مثلًا ويتنكر فى شخصية مشهورة ومعروفة زى شيرلوك هولمز عارفين كل ده ليه؟ تعالوا نحكى لكم التقرير بتاعهم شكله عامل إزاى. فى أول الحلقة تكلموا عن لعبة جديدة نزلت على الإنترنت.. وقالوا أنهم عملوا تقرير عن اللعبة. التقرير: فى التقرير بنشوف واحد منهم وهو أحمد النشيط وده لقبه، بيسافر لإنجلترا وهو متنكر فى زى هولمز، وبيمشى فى خطوات مترتبة كأنه بيحل لغز، يلاقى تاكسى معين وفيه إشارة لمكان، يروح المكان علشان يلاقى رقم تليفون، وبعدها يتصل علشان يعرف مكان محدد، ويروح للعنوان، اللى هو إيه بقى.. العنوان هو مقر الشركة اللى عملت اللعبة الجديدة ويقابل المسؤولين هناك ويعمل التقرير فى شكل جديد جدًا ومبتكر ويخليك متابع بشغف. البرنامج: البرنامج شبابى جدًا بيقدمه مجموعة من الشباب اللى اشتهروا فى عالم السوشيال ميديا وبشكل أساسى بيقدمه المبدعان إبراهيم عبد الرحمن وطارق الحربى، وبيشاركهم من نجوم السوشيال ميديا (محمد سال، عمار رمضان، فيصل السيف، أحمد النشيط، دارين البايض، محمد النحيت) قايم على فكرة الضحك والدم الخفيف وهما ناجحين فعلًا فى ده، والبرنامج بيناقش موضوعات عصرية وقريبة من المشاهد، وكمان عندهم أفكار مبتكرة زى العرايس الماريونت فى البرنامج واللى بتشارك معاهم، وكمان الدى جى اللى موجود فى (اللوكيشن) وبيعمل الموسيقى وجزء من الفواصل، والمقابلات بتاعتهم لذيذة، يعنى لما تكلموا عن التعليم، جابوا معلم وعملوا معاه لقاء وكانت الأسئلة تموت من الضحك.. قولى "العصاية، الخيزرانة، المسطرة الخشب، المسطرة الحديد" أى نوع بتستخدم، وعلى الشاكلة دى بتكون الأسئلة والضحية دايمًا بيبقى ضيفهم اللى مش عارف يرد على إيه. اللوكيشن بتاعهم واسع جدًا وغريب فيه تفاصيل كتيرة وحاجات ما تعطيكش انطباع محدد عن البرنامج لكنه مجموعة من القعدات وكأنك فى جراج قديم لكنه عصرى. التصوير والإخراج متعوب فيهم بزيادة علشان التقطيع كتير والفقرات متعددة وقصيرة علشان ما تحسش بالملل، وفى النهاية بيغنوا مع بعض بطريقة "الأكابيلا" وهى بتعتمد على الصوت فقط من غير المزيكا. الخلاصة أن الشباب دى مبدعة بجد وعندها المقدرة على صنع البهجة وتقديم برنامج بشكل جديد تابعوهم.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن