دليل البرامج والمسلسلات - مقالات عن برامج ومسلسلات العالم العربي

تليفزيون

أبطال صنعوا التاريخ: ذكريات الحلو والمر على قناة ltc
اصدرت في: 13/01/2015

قال عم صلاح جاهين وغنت أم كلثوم: والله زمان يا سلاحي اشتقت لك في كفاحي انطق وقول أنا صاحي يا حرب والله زمان والله زمان ع الجنود زاحفة بترعد رعود حالفة تروح لم تعود إلا بنصر الزمان هموا وضموا الصفوف شيلوا الحياة ع الكفوف ياما العدو راح يشوف منكم في نار الميدان يا مجدنا يا مجدنا يا اللي اتبنيت عندنا بشقانا وكدنا عمرك ما تبقى هوان مصر الحرة مين يحميها نحميها بسلاحنا وهى دى فكرة البرنامج اللى قائم على ذكريات حرب أكتوبر 1973 مع الإعلامى الكبير الأستاذ حمدى الكنيسى. الإعلامى: اللى ما يعرفوش هو رئيس الإذاعة المصرية السابق وله مؤلفات كثير عن الإعلام وله كتاب عن الحرب والسلام أخذ عنه جوائز كثير، وفى حياته اتكرم كثير لأنه شخصية إذاعية قوية جدًا. بين الإذاعة والتليفزيون: المشكلة الأولى فى البرنامج هو روح الإذاعى اللى سيطرت على أ/ حمدى فى تقديم البرنامج واللى بـ تخليك تقعد تفكر كثير يا ترى هو فعلًا برنامج إذاعى ولا تليفزيونى، وده مش عيب ولا حاجة لكنه قضى أغلب عمره فى الإذاعة وده سايب أثر كبير، باختصار كأنك بـ تسمع إذاعة لكن فى نفس الوقت شايف المذيع والضيف. البرنامج: معظم البرنامج ماشى على وتيرة واحدة وهو مجموعة أسئلة عن ذكريات الحرب والنكسة والبطولات اللى اتحققت فى أكتوبر والأوامر اللى صدرت وإزاى اتنفذت والأبطال اللى عملوا حاجات ساعات من الحكى تحس أنها فعلًا خارقة على العادة، تحس أنك أمام بشر غير طبيعيين، قد إيه الناس دى ضحت، وقد إيه أبطال ماتوا وقد إيه ناس استشهدت علشان إحنا نعيش وعلشان ينقذوا متر من الوطن، فى البرنامج ده لازم تدمع أكثر من مرة وأنت بـ تتفرج عليه.. ولازم تحس بفخر مصر واللى عملته. الخريطة: خريطة البرنامج مافيهاش تغيير، يعنى ييجى الضيف يقعد مع أ/ حمدى الكنيسى ويبدأ "جرافيك" –ضعيف الجودة– عن الشخصية تخرجت إمتى وتم ترقيتهاإزاى فى الجيش ورتبتها اللى طلعت بها على المعاش.. ويدور الحوار.. مجموعة من الأسئلة عن الحرب واللى حصل فيها ودورك كان إيه، وسلاحك إيه، وكلمنا على العبور ولحظة العبور، طيب عن الثغرة، طيب مين الغلطان.. طيب إزاى انتصرنا، طيب المواقف المؤثرة، وبـ توصل فى النهاية إلى خريطة كاملة لحرب أكتوبر ومصر عملت إيه والاستعدادات قد إيه كانت كثير جدًا. مصر: أهمية البرنامج هـ تتلخص فى جملة واحدة "شبابنا العظيم اللى عمل المستحيل فى الحرب يقدر يعمل المستحيل فى التنمية والاقتصاد والتقدم" هى دى رسالة البرنامج والتركيز طبعًا على الرسالة أكثر من أى حاجة ثانية لأن الديكور عادى جدًا عبارة عن ترابيزة ولوحة كبيرة عن حرب أكتوبر شبه اللوحة اللى فى بانوراما أكتوبر، والمخرج ما عندوش مشاكل فى أى حاجة، يا دوب نقل الكاميرا من الضيف لأستاذ حمدى ومن أ/ حمدى للضيف.

...

أسرار الملاعب مع شلتوت: برنامج رياضى تقليدى على قناة ltc
اصدرت في: 29/12/2014

البرومو: لما تتفرج على برومو البرنامج مع الناقد الرياضى المعروف عصام شلتوت هـ تحس أنك أمام برنامج جديد، ولما تلاقى فى البرومو شلتوت بـ يتكلم على قد إيه البلد دى محتاجة طاقة أمل.. وأننا هـ نتكلم عن الأسرار ونحل الأزمات، ولما تلاقى البرومو فيه كل الألعاب الرياضية من البلياردو لألعاب القوى لكرة القدم.. يبقى إحنا بـ نتكلم عن برنامج بـ يهتم بالرياضة بمعناها الشامل بقى.. ناس بدأت تفهم أن الإعلام الرياضى مش كورة بس وإنما الرياضة حاجات كثير جدًا. حاجات: بـ يتضح مع الوقت أن الحاجات دى مالهاش أى ثلاثين لازمة فى الحياة أمام سطوة كرة القدم.. على دماغ مقدمى البرامج الرياضية وعلى مزاج شعبنا الكريم اللى بـ يقدس الكورة وبـ ينتمى لفريقه من صغره وما ينفعش يغيره بأى حال من الأحوال. الحاجات المهمة بقى هى أن الكرة فى مصر استحوذت على عقول الناس وعلى برامجها الرياضية والمشكلة دى مش هـ تتحل إلا عن طريق تغيير ثقافة المجتمع من الصغر والبركة فى اللى جاى. إيجابيات وسلبيات: عصام شلتوت ناقد رياضى معروف وله كتابات كثير من زمان، ثانى حاجة البرنامج معمول له ستوديو مخصوص وموسيقى كمان حماسية شغالة طوال الوقت علشان تعمل حالة من سرعة الأداء، وكمان بـ يطلع تقارير خارجية، إلى جانب أنه بـ يعرض أجزاء من المباريات والأهداف اللى أحرزها ضيوفه وهما بـ يتكلموا. الموسيقى طوال الوقت بـ توجع الأذن.. لازم يكون لها توقيتات أو معنى إخراجى ما، الديكور المعمول جيد ومصروف عليه نوعًا، عامة مصر محتاجة برنامج رياضى بجد مفيد وشيق وبـ يربط بين الرياضة والصحة والتغذية والتمارين علشان الناس تتحرك مع البرنامج. الهدف من البرامج الرياضية من وجهة نظرنا هو أن الناس تتمرن وتلعب رياضة وتتثقف وده صعب نلاقيه وبرامج محدودة هى اللى عملت كده، والتفاعل مع البرنامج مش قوى وده معناه أنه مش مسمع لسه، البرنامج بـ يحارب طبعًا لأن القناة لسه جديدة ولأن البرامج الرياضية كثير وكلها بـ تتكلم فى الكورة والمنافسة صعبة جدًا. الإخراج النهائى لأسرار الملاعب جيد ومتعوب فيه وفيه تحرك جيد للكاميرا والتنقل بين الضيوف والخروج من الستوديو والدخول له مدروس، اللغة اللى بـ يستخدمها عصام شلتوت جيدة للغاية ومحكمة كمان وفيه تعبيرات بتاعته هو بس وده من أجمل الحاجات اللى تستمتع بها فى البرنامج.

...

برنامج رايحين على فين: "إسمحز"
اصدرت في: 06/03/2013

إسلام (30 سنة) سواق التاكسى ابن البلد الرجل الجدع الشقى اللى كان بـ يتخانق علشان يجيب حق أصحابه وبـ يحب البنات جدًا حاجة بـ تجرى فى دمه يعنى وكلمته الأثيرة "أحلى حاجة فى الدنيا الستات.. ربنا خلق الست علشان تروق على الرجل".سندس (26 سنة) الناشطة السياسية خريجة كلية الإعلام ومخرجة المسرح القيادية اللى بـ تتابع باهتمام كل اللى بـ يحصل فى البلد ودائمًا فى الميدان والمسيرات الثورجية المتمردة حتى على أهلها لأنها عاشت بعيدة عنهم فترة طويلة ومع كل ده طيبة. ماريو (26 سنة) المسيحى الملتزم دائمًا بـ يزور الكنيسة وبـ يصلى باستمرار وبـ يحب الأكل جدًا والطبخ، وكمان بـ يحب الرسم جدًا وهو طبيب بشرى وفنان تشكيلى.. بـ يحب يجرب أى حاجة جديدة.. ما بـ يقتنعش برأى أى حد.. جزء كبير من نجاحه هو والدته لأنها دائمًا كانت بـ تقول له: "ما تبقاش رقم 2". حنان (20 سنة) بنت البلد اللى ساكنة فى القلعة واللى شغالة فى محل ملابس.. بـ تحب أهلها وأصحابها وأهلها بـ يبادلوها نفس الحب.. مخطوبة بقى لها سنة و8 شهور.. ما بـ تسمعش كلام أهلها بسهولة.. ولازم ماما تشد عليها علشان تسمع كلامها.. لكنها ومامتها أصحاب.. دائمًا قراراتها مع أهلها مش لوحدها. زغبى (29 سنة) ابن الناس الأغنياء درس تسويق وشغال فى "ماك" بـ يحب ركوب الخيل.. طيب.. جدع جدًا.. اجتماعى بـ يعرف كل الناس بسهولة.. بـ يحب يتبسط ويحضر حفلات ويحب يشوف ناس مبسوطة وبـ ترقص ويحب يهزر طوال الوقت.هما دول أبطال برنامج "رايحين على فين".. برنامج تليفزيونى واقعى، وعلشان حضرتك تعرف يعنى إيه واقعى يبقى لازم الأول نقول لك الفكرة، عبارة عن 5 شباب بـ تتعرف عليهم فى الحلقة الأولى.. حياتهم وعيشتهم وأسرتهم، أصحابهم وهما بـ يتكلموا عنهم وعن شخصياتهم.. وبعدين بـ يتجمعوا فى مكان عام (كافيه مثلًا) وبـ يبدأوا يحكوا عن موضوع عام وكل واحد يعرض وجهة نظره.. المهم اتفق الشباب على مشروع يعملوه مع بعض وهو معرفة رد فعل الناس عن التحرش بشكل عملى.. وبـ يتفقوا مع شباب ثانيين يعاكسوا واحدة منهم وبالفعل بـ تلبس البنوتة نقاب وبـ يعاكسها الولد فى الشارع والغريبة أن الناس بـ تمشى الولد وبـ يكون رد فعلها سلبى جدًا.. مع أنه بـ يعاكسها فى منطقة حيوية جدًا (وسط البلد).وبعدين بـ يقعد الشباب مع بعض ثانى ويناقشوا اللى حصل وأسبابه.. ويجرى بك البرنامج فى كادرات كثير ومختلفة ومواقف كثير يناقشوها بشكل عملى زى مثلًا ماريو اللى عاوز بنوتة علشان يرسمها.. وتدور الحكاية الجديدة حول إزاى يقنعوا بنت عادية أنها تروح المرسم لماريو وبـ يحاولوا يقنعوا البنات لكنهم بـ يرفضوا الفكرة.. ومن ضمن الأفكار اللى تم مناقشتها برضه عمل البنت وأهميته وشكل الحياة لكل واحد منهم بداية من اللى بـ يحب الحياة والخروج واللى بـ يحب السياسة واللى بـ يحب قعدة البيت واللى متدين واللى بـ يحب السهر وفكرة الشباب عن البنات وفكرة كل واحد عن شخصية اللى هـ يختاره شريك حياته.نعتقد أن حضرتك كده عرفت يعنى إيه تليفزيون واقعى من الحياة واللى بـ يعمله شباب عادى جدًا لا هو خريج إعلام ولا ممثلين والديكورات هى الأماكن العامة اللى كلنا بـ نروحها والكادرات كثيرة جدًا والمخرج بجد بـ يتعب قوى معاهم وبـ يأخذ وقت طويل جدًا أكيد فى المونتاج، لأن مش طوال الوقت كلهم بـ يتجمعوا مع بعض ساعات بـ يبقى اثنين أو ثلاثة منهم أو كلهم أو بـ يتعاملوا مع ناس ثانية... والمهم أنه واقعى جدًا من غير تزويق ولا تمثيل وأبطاله هما "إسمحز".إ... إسلامس... سندسم... ماريوح... حنانز... زغبى

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن