دليل البرامج والمسلسلات - مقالات عن برامج ومسلسلات العالم العربي

تليفزيون

عرب كاستينج: حلم التمثيل على قناة النهار
اصدرت في: 02/11/2015

لو حلمك أنك تبقى ممثل، لو حلمك أنك تبقى ممثلة، يبقى روحوا واشتركوا في برنامج "عرب كاستينج".. البرنامج اللي عاوز كل الناس تمثل وتشترك، لكن اللي هـ ينجح عدد قليل جدًا، مين فينا ما وقفش أمام المراية وقعد يقلد حركات أو ما قعدش يقول إيفيهات من أفلام هو حافظها ويضحك عليها مع أصحابه أو ما قعدش يقلد ممثل معين في وقت ضحكه أو غضبه علشان يلفت الانتباه له. هي دي بقى فكرة "عرب كاستينج" اللى عاوز كل اللى عنده موهبة في التمثيل في الوطن العربي يجي ويشترك في البرنامج علشان يعملوا تصفيات أولى يطلع فيها المتميزين وبعدين ياخدوهم ويبدأوا برنامج تدريبي جاد وجامد جدًا قايم على مجموعة من الخبراء في التصوير والإخراج والتمثيل وفي النهاية هـ يطلع منهم ممثل أو ممثلة العرب. طبعًا واخدين بالنا جدًا أن البرنامج مش جديد من نوعه، قبله كثير برامج مسابقات في الغناء ومسابقات المواهب، يمكن فيه ناس مقتنعة بالموهبة وعاوزة الموهوبين يشتهروا أو أن الموضوع ده بـ يكسب بجد علشان كده انتشرت البرامج دي، ما هي كل الناس عاوزة تعرف مين اللى هـ يكسب وإيه الاختبارات ويتابعوا ابن أو بنت بلدهم برضه مش كده ولا إيه.. والله حاجة توجع القلب لما تقعدي تتفرجي على برنامج علشان صاحبتك وتشجعيها وتحسي أنها ممكن تبقى مشهورة في أي وقت وبعدين علشان دوسة زرار من لجنة التحكيم تطلع بره.. إحنا مش معترضين على البرنامج لكن اعتراضنا على انتشار البرامج دي واللى ممكن يؤثر بشكل سلبي على الشباب ويجيب نتيجة عكسية يعني. لجنة التحكيم بقى مش هـ نقول لك، حاجة كده فخيمة: قصي الخولي: الشاب السوري اللى أهله ما كانوش عاوزينه يمثل لكنه اعترض وكافح وأصر على التمثيل واتعلم ومثل في المسرح والسينما والتليفزيون، لحد ما بقى ممثل عربي معروف وده بعد تمثيله في مسلسل (باب الحارة) الشهير، ومن بعده مثل مسلسلات كثير أشهرها (العشق الحرام) وأخد جائزة أفضل ممثل عربي مرتين في 2006 و2011. غادة عبد الرازق: ممثلة مصرية مشهورة بدأت مشوارها مع الإعلانات، لكن البداية الحقيقية لها كانت في مسلسل (الحاج متولي) مع الراحل نور الشريف واللي اشتهرت بعده جدًا، لها عدد من الأفلام زى "حين ميسرة، الريس عمر حرب، وفيلم عن العشق والهوى" اللي أخدت عليه جايزة مهمة. باسل خياط: ممثل سوري معروف ولد ف حي شعبي وجاهد لحد ما بقى ممثل معروف، درس التمثيل في المعهد العالي للفنون المسرحية بدمشق وشارك في مسرحيات كثير في فرنسا ولبنان والأردن ومصر، له أعمال كثيرة جدًا لكن من أشهرها "صلاح الدين الأيوبي والتغريبة الفلسطينية" ومسلسل "طريقي" مع الفنانة المصرية شيرين. كارمن لبس: ممثلة لبنانية معروفة شاركت في أدوار كثير ما بين الكوميدي والتراجيدي وتميزت بقدرتها على أداء أدوارها، ومن الحاجات اللى شاركت فيها: "الشحرورة، سرايا عابدين، العشق الحرام". كده إحنا تعرفنا على لجنة التحكيم واللى لازم تتفق كلها أو ثلاثة منهم على الأقل على المتسابق علشان يطلع للمرحلة اللي بعدها، ولازم نعرف أن كل مرحلة بـ تبقى أصعب من اللى قبلها، يا ترى مين اللى هـ يكسب؟ ده اللى هـ نعرفه لما نتابع البرنامج.

...

مذيع العرب: المايك الفضي على قناة الحياة
اصدرت في: 20/04/2015

مقدمة: أهلًا بكم في حلقة جديدة من برنامجكم اللي كسر الدنيا.. وخلى الناس كلها ترجع ثاني للتليفزيون وتتشوق وتتفرج على برنامج المسابقات الأول في مصر والعالم العربي.. برنامج بـ يحاول يوصل معلومة وله هدف وقيمة.. برنامج هـ يخرج جيل جديد بـ يفكر ويحاور ويتكلم أحسن من الجيل القديم.. أهلًا بكم في حلقة جديدة من برنامج "مذيع العرب". تتر: في التتر لازم نتعرف على لجنة تحكيم البرنامج وهما ثلاثة: طونى خليفة المذيع اللبناني المشهور اللي عمل مجموعة من أهم البرامج، ليلى علوى الممثلة المعروفة واللي خارج فكرة المجال الإعلامي إلا أنها عملت "شوو" حلو وبـ تعطي نصائح حلوة، منى أبو حمزة الإعلامية اللبنانية المعروفة وصاحبة البرنامج اللبناني الشهير "حديث البلد"، ومذيع العرب من تقديم الممثل قيس الشيخ نجيب والمذيعة سالي شاهين. وأنت أمام لجنة تحكيم من لبنانيين ومصرية وعاوز تقدم برنامج كامل في دقيقة وتقنع به لجنة التحكيم علشان يوافقوا ويطلعوك للتصفيات.. ده موضوع صعب جدًا حتى لو كنت شاطر لازم تحس أن فيه حاجة صعبة عليك.. صراحة كان الله في عون المتسابقين. برنامج: "مذيع العرب" برنامج ترفيهي فكرته قائمة على اكتشاف مواهب في التقديم التليفزيوني، وتنمية موهبة التقديم عند المبتدئين، وإخراج المواهب المدفونة عند البعض الآخر من المشاركين في المجالات المختلفة من التقديم يعنى من كل لون.. برامج اجتماعية، وبرامج المسابقات، والبرامج السياسية، والتقديم الإخباري. كمان بـ يهتم البرنامج بإحياء اللغة العربية السليمة والاهتمام بنطقها والتدريب عليها.. وبـ يقوم على بناء العلاقات بين المتشاركين والاستفادة من خبرة لجنة التحكيم، ونقل التجارب بين المشاركين من البلاد المختلفة، واللي بـ تقوم على اكتساب المعلومات والثقافات والخبرات بين المتنافسين، علشان يتحولوا من مجرد هواة لمذيعين محترفين، وكمان بـ يشتغل البرنامج على معرفة الهواة ومساعدتهم فى اكتشاف قدراتهم المختلفة. أما من ناحية المجتمع، فهدفه هو تثقيف المجتمع بكيفية صناعة الإعلامي الناجح، وكمان عمل مساهمة في صناعة المذيع المحترف في العالم العربي، وده بـ يكون عن طريق الحفاظ على أساسيات الإعلام الصحيح، والاستثمار في الشباب العربي ومحاولة مدّ الجسور بين الخبرات العربية، بهدف توسيع انتشار المذيع العربي، ووصوله إلى العالمية... يا ترى هـ ينجحوا ولا لأ؟ سؤال مهم.. لسه الإجابة عنه مش دلوقت. جائزة مذيع العرب أنه هـ يحصل على عقد لـ 5 سنوات للظهور على أحدى أهم الشاشات العربية. ختام: الفكرة حلوة والبرنامج مع أنه مسابقات لكن فكرته جديدة من نوعها مع أننا كنا منتظرين لجنة تحكيم من بلاد عربية كثيرة مش لبنان ومصر بس.. وكمان من مقدمى برامج متنوعة يعني إخبارى وكوميدى وتوك شو وسياسى وأطفال... ومبروك للفائز مقدمًا.

...

المهمة 5/5: برنامج مسابقات كوميدية على قناة الحياة
اصدرت في: 28/11/2014

أحمد فلوكس فنان شاب معروف ومحبوب، بداية انطلاقته الفعلية كانت مع الفنانة يسرا فى مسلسل "قضية رأى عام" وبعدها قدر يثبت نفسه فى أدوار ثانية السيت كوم "أحمد اتجوز منى". وجاءت التجربة الأولى له فى تقديم البرامج فى برنامج المهمة 5/5، تم اختيار أحمد علشان هو نجم وطبعًا عنصر جذب للمشاهدة، إحنا مش بـ نقلل من إمكانيات فلوكس لكن بـ نعيب على الإعلام المصرى اللى بـ يخرج آلاف من طلبة كلية الإعلام ولما يحبوا يعملوا برامج دائمًا بـ يختاروا نجوم السينما. فكرة البرنامج أن كل متسابق بـ يُقدم له خمس مهمات على خمسة أسئلة وجائزة كل مهمة هى 5 آلاف جنيه، ولو عمل الخمس مهمات بـ يكسب 25 ألف جنيه.. بس خلاص. المتسابق نفسه اختاروه إزاى ما نعرفش.. وما فيش حاجة بـ تقول عن الطريقة لما دورنا على الإنترنت ما لقيناش حاجة.. لكن كل اللى عرفناه أن المتسابق بـ يبعت للبرنامج وبـ يتم اختياره.. لكن المعايير ولجنة الاختيار وكده مش معروفة. البرنامج برضة لازم يكون فيه فكرة جديدة زي أحمد فوكس لما بـ يظهر فى أول حلقة بملابس رجل الشرطة، وبـ يظهر فى باقى الحلقات بشخصيات مختلفة، والمهمات كمان دمها خفيف مثلًا زى تجميع عشر ستات وعمل مظاهرة لعودة المانجو فى الميدان وده لمدة 20 دقيقة، وكمان تفكر فى حل سؤال من هى أول وزيرة لمصر، واتضح أن الناس ممكن تعمل أي حاجة علشان خاطر الفلوس "للأسف". الأسئلة لو عاوزين نصنفها هـ نحطها تحت باب السهل الممتنع زى السؤال الثانى اللى كان عبارة عن تجميع 7 شنط بألوان قوس قزح وسؤال مظاهرة المانجو، يعنى أسئلة لا تعتمد على الدراسة أو التفكير والثقافة لكن بـ تعتمد بشكل أكبر على الجرأة فى تنفيذ المطلوب من غير كسوف وهى دي كلمة السر. ستوديو البرنامج هو الشارع والنيل ودي حاجة بـ تضيف حيوية وبصراحة شغل أكثر من فريق العمل علشان السيطرة على الشارع دي حاجة صعبة جدًا،فريق العمل لف تقريبًا مصر كلها والأماكن الشعبية: "شبرا، الغورية، الدرب الأحمر، الدقى"، والبرنامج له رسالة أن الشوارع هى الأصل ومنها لازم يكون الإعلام والفنانين نازلة الشارع وده كله فى إطار برنامج مسابقات.

...

الراقصة: البرنامج المشكلة على قناة القاهرة والناس
اصدرت في: 21/11/2014

أنت يا اللى بـ تتفرج على برنامج "الراقصة" تسمح لنا نسألك ليه؟.. أيوه.. يعنى إحنا كمشاهدين هـ نستفيد إيه من الفرجة على البرنامج ده؟ نحب نفكركم أن مصر لسه بخير.. وأن البرنامج اتمنع شوية من العرض.. لكن رجع ثانى! ونفسنا نفكر الفنانة دينا بجملة قالتها فى أحد البرامج التليفزيونية لما المذيع سألها عن إحساسها لو حد قال لابنها يا "ابن الراقصة"، ساعتها هى جاوبت وقالت: "أن الكلمة دي عيب"... مين بقى أعطاها الحق فى برنامح بالكامل اسمه الراقصة وكمان هى الحكم وبـ تختار المتسابقات من جميع أنحاء العالم. أول ما تفرجنا على البرنامج لاقينا الديباجة اللى فى الأول وفيها مكتوب: "من أجل إحياء فن الرقص الشرقى المعروف بأصالته وعراقته.. ولأننا نقدر هذا الفن ونؤمن أنه جزء من تراث مصر.. واحترامًا منا لعقلية المشاهدين قررنا عرض هذا العمل". فريق العمل لاحظ انتشار فن الرقص الشرقى فى جميع أنحاء العالم منها اليابان، روسيا، كاليفورنيا... من هنا جاءت فكرة البرنامج وطبعًا مافيش أنسب من ملكة الفن الشرقى فى الوطن العربى دينا أنها تقوم بالتحكيم، والمسابقة على لقب أفضل راقصة شرقية فى العالم، لجنة التحكيم بـ تتكون من السيناريست تامر حبيب، والفنانة فريال يوسف. وهنا بـ يكون السؤال.. إيه علاقة السينارست اللى المفروض بـ يفهم أكثر فى الكتابة والحبكة والدراما.. بالرقص؟ إجابة صعبة شوية، عمومًا خلونا نفكر معاكم على رواقة واللى يعرف الإجابة يبعت لنا. هدف البرنامج اختيار 27 متسابقة من جميع أنحاء العالم، والمسابقة لمت الشمل من مصر وسوريا ولبنان وروسيا والأرجنتين وأمريكا واليابان.. وحاجة عالمية يعنى.. لازم نقول أنهم تعبوا فى التجهيز للبرنامج وكان فيه فريق إعداد قوى بجد ولف العالم علشان يجيب أجانب وبـ يحترفوا الرقص الشرقى. ولازم نقول أننا نهيب بالسادة المشاهدين التركيز مع مع.. تفاصيل البرنامج: يعنى الديكور مثلًا مهم قوى والإضاءة عاملة شغل جذاب جدًا للعين وده بـ يخليك تركز جدًا، والإخراج احترافى.. ودينا صراحة فاهمة فى الموضوع جدًا وتعليقات تامر حبيب شوية فيه ذوق الرجل مش حاجة علمية يعنى.. أما فريال فهى فنانة عاوزة تحس الفن والجمال فى الموضوع. البرنامج أثار جدل كثير، فيه ناس رافضة تمامًا ومنهم اللى قال أنه لازم يكمل ويتم علشان ده فن وحاجات كده.. المهم فى النهاية رأيكم إيه؟

...

قوى قلبك: برنامج مسابقات ممتع على قناة mbc مصر
اصدرت في: 29/09/2014

فاكرين الهدف بتاع مجدى عبد الغنى اللى قعدت مصر تتكلم عنه فترة طويلة علشان ساعتها مصر كانت فى كأس العالم؟.. ياه ذكريات والله فين أيام ما كنا فى كأس العالم والناس كلها بـ تتابع مصر.. أى نعم إحنا ما دخلناش الكأس بقى لنا سنين وسنين لكن لسه عندنا أمل. والأمل بقى فى برنامج "قوى قلبك" اللى بـ يقدم لنا الموسم العاشر ومصر بـ تشارك فيه لأول مرة وبـ تتنافس فيه مع خمس دول وهما أمريكا وفرنسا وإندونسيا وروسيا والمجر. بـ تدور فكرة البرنامج حول مجموعة من الفرق من الدول اللى قولنا عليهم بـ يتنافسوا في مجموعة من الألعاب الخطيرة جدًا لكنها فى نفس الوقت مضحكة وممتعة جدًا. والبرنامج مأخوذ من فكرة برنامج فرنسى عُرض على مدار السنين اللى فاتت وحصل على نسبة مشاهدة عالية، في برنامج "قوي قلبك" بـ يشارك فريق من مصر ويمثل القارة الإفريقية ضد الفرق الثانية علشان يكون مجموع الفرق ستة، وعلى كل فريق بذل الجهود الممكنة علشان يجيب أعلى نقط في كل جولة، والنقط دى هى اللى هـ تقول مين الفائز فى النهاية.. الجميل فى البرنامج أنه فكرته حلوة وألعابه صعبة ومسابقاته فى الوقت نفسه لها روح الفكاهة اللى هـ تخليك مش هـ تبطل ضحك طوال الحلقة.. على عكس برامج مسابقات ثانية اللى كل تحدياتها عقارب وفئران وديدان وحاجات من اللى تقشعر الجسم دى. كمان اختيار داليا البحيرى لتقديم البرنامج كان موفق جدًا وبصراحة هى واجهة مشرفة لمصر لأنها بـ تشجع بحماس وتجرب كمان بعض التحديات بنفسها، وأعضاء الفريق المصرى هما أبطال فى مجالات رياضية مختلفة هـ نلاقى سباحة وجمباز ورياضات عنيفة يعنى فريق مرعب. جميل أن إحنا بـ ننافس فى مسابقة عالمية لكن اللى مش جميل أننا على طول فى مستوى متأخر يعنى تقريبًا بـ ننافس على المركز الخامس والسادس وده مؤشر مش لطيف على طبيعة الرياضة فى مصر وأهمية أننا نخلى بالنا من ده ومن أولادنا ويبقى فيه برامج صناعة الأبطال فى مجالات مختلفة. ومن الألعاب اللى شدتنا فى البرنامج "حائط الأبطال" وهو عبارة عن تسلق لحائط عن طريق عصا وهو صعب جدًا ومحتاج مجهود بدنى عالى.. وروسيا هى بطل العالم فى اللعبة دى علشان كده على طول كل حلقة هما اللى بـ يفوزوا على باقى الدول. لازم نقول أن البرنامج مصروف عليه بشكل جيد وإنتاجه ضخم جدًا، الناس دى لما بـ تعمل مسابقات بـ تبقى عاوزة الموضوع يطلع بشكل حلو وكبير.. وكمان تقنية التصوير اللى بـ تركز على اللاعب والمدرب وتعبيرات الوجه، والكاميرات اللى موجودة فى الملعب فى كل مكان موضوع لازم نأخذه فى الاعتبار ونقول أن مش أى مسابقة يشترك فيها دول العالم لازم تبقى سهلة وهادئة.. أبدًا دي حرب بين الدول على مين يأخذ لقب "قوى قلبك"..ربنا معاكى يا مصر.

...

حقق حلمك: اسم يوجع على الحياة فى رمضان
اصدرت في: 25/07/2014

أربعة طرق: "حقق حلمك".. الاسم فعلًا بـ يوجع قوى.. يا ترى حضرتك ناوى تحقق حلمك؟ طيب إزاى؟ الكتاب بـ يقول صفحة 12 مادة 52 أن فيه أربعة طرق للتحقيق: الأولى: اسرح بخيالك واطلع لفوق لفوق جدًا وتخطى كل الحدود وحقق حلمك فى خيالك ونام واحلم كويس وهـ تصحى مبسوط قوى. الثانية: كلم حد صاحبك بس لازم يكون غنى جدًا واطلب منه يحقق حلمك.. أو ممكن تورث حد يكون غنى برضه فى عيلتك وأنت ما تعرفش عنه حاجة. الثالثة: اشتغل وانجح وحاول وخطط وفكر واجتهد وأكيد ربنا هـ يكرمك. الرابعة: ربنا هـ يكرمك وهـ يسبب أسباب عجيبة جدًا وغريبة جدًا وأحيانًا كمان لا منطقية علشان فى النهاية يحقق لك حلمك بس أنت صدق. الأسباب: زمن ضمن الأسباب دى برنامج "حقق حلمك" اللى بـ يقدمه المذيع الرائع عمرو الليثى واللى قائم على فكرة قضاء حوائج الناس.. وقائم على فرحة الناس.. الجميل فى البرنامج أنه بـ يختار فعلاً حالات تعبانة قوى وفقيرة قوى علشان كده لازم تصدقه قوى.. الفكرة نفسها معادة والمخرج ما عندوش جديد يجود به فى البرنامج غير أنه يجود فى كادرات فرحة الفقير لما يشوف الشبكة جاية له لحد عنده بعد ما كان الموضوع هـ يبوظ علشان ابنه مش معاه فلوس الشبكة. الجديد: الجديد السنة دى أن الأحلام بـ تختلف باختلاف الناس وكمان الليثى بـ يطور من أفكاره زى الطفل أحمد اللى كل حلمه أنه يبقى "سبايدر مان" ووسط فرحة والديه بـ يحقق حلمه، أو نور اللى قدمت فقرة من برنامج الليثى لأن كل حلمها أنها تبقى مذيعة ولو لفقرة واحدة.. أو أميرة وعريسها اللى راحوا مع الليثى علشان يشتروا المطبخ وغرفة النوم ويكتمل حلمهم ويتزوجوا. هنا: هنا لازم نقف شوية ونقول أن فكرة تحقيق الحلم على الرغم من وجود رعاة للبرنامج ورغم نجاحه وصدقه الكبير لكن برضه نقف شوية ونقول للمؤسسات والحكومات دور مهم لازم تقوم به.. والمؤشر بـ يقول أن مصر فيها فقراء كثير قوى ومستنيين يحققوا حلمهم وأحيانًا على فكرة بـ يبقى حلم بسيط قوى. (لقمة عيش) علشان تعرف مواعيد وقنوات عرض "حقق حلمك" زور "دليل كايرو 360 للتليفزيون فى رمضان".

...

Killer Karaoke: غنى لو تقدر على قناة الحياة
اصدرت في: 11/04/2014

الغنا: الغنا فعل جميل لا محالة لازم كلنا نعترف بده، والمُغنى علشان يغنى لازم يتوافر له الجو المناسب.. يعنى يتعامل مع الموضوع بهدوء ويستعد ويشرب سوائل دافئة، ويدندن وبعدين يقول بقى. يقول إيه؟ هنا السؤال يفرق، يقول إيه دى المرحلة الثانية للى فات لازم يختار مقاطع أغانى أو أغانى يكون حافظها وسامعها كويس جدًا علشان يقدر يؤديها ويبدع فيها والناس تقول له الله عليك.. وبعد كده تيجى الإشكالية الشهيرة فى فيلم الكيف "التسليك الأول ولا الفتح". التسليك قبل الفتح: القاعدة الذهبية اللى قالها الجميل محمود عبد العزيز لمزاجنجى "التسليك قبل الفتح" وهو بـ يغنى "الكيمى كيمى كا" تقريبًا هى القاعدة اللى بـ يتم اعتمادها فى برنامجنا النهارده.. وأحيانًا كمان لا بـ يكون فيه تسليك ولا فتح.. فيه بس رعب السنين. الرعب: البرنامج بـ يعتمد على فكرة الرعب فى المقام الأول، أو على مواجهة الخوف، ده لو أخذناه من وجهة النظر الفلسفية اللى ممكن تكون "تقدر تواجه خوفك" ونشوف إزاى المتسابقين بـ يواجهوا خوفهم وبـ يتعاملوا مع الصعاب الكثير اللى بـ تواجههم لحد ما يعدوا المراحل كلها. المراحل: هنا لازم نتكلم عن المراحل بشكل كبير، المراحل اللى بـ يعديها المغنى علشان يكسب.. وهى بـ تختلف من حلقة لحلقة ومن متسابق للثانى، وخذ عندك يا محترم: درب الأشواك: هـ تغنى وأنت ماشى فى مكان كله شوك وملفوف حولك بالونات بـ تفرقع وبـ تنتهى فى النهاية بأنك تقابل ثعبان كبير وكل ده وأنت مغمض عينيك. كورنيش الرعب: هـ تعدى وأنت بـ تغنى على مياه ساقعة (عادى) ووحل (عادى برضه) لكن اللى مش عادى أنك وأنت ماشى لازم تعدى على صندوق "ديدان" وصندوق حشرات وحاجة يعنى فظيعة بجد. الرجل الكهربائى: عارفين لعبة الرجل الكهربائى اللى بـ تحبها العيال الصغيرة وبـ تسهر أمامها بالساعات على الكمبيوتر، هـ تتحول إلى حقيقة وهـ يتحول متسابق إلى رجل كهربائى عجيب متوصل له صواعق بسيطة فى أيده ورجله وكل ما ييجى يغنى وهو بـ يقدم طلبات للناس كأنه فى مطعم "يتكهرب" يا سلام على الفن مش كانوا وفروا الكهرباء دى للمحطات اللى بـ تفصل عندنا كل شوية. شوية: نقف شوية بس ونقول أنك لما تعدى فده بـ يبقى بحاجتين: أنك تكمل غناء وأن الجمهور يصوت لك لحد ما تكسب، لكن الفكرة بقى هنا مش فى الغنا صراحة لأن أغلب المتسابقين صوتهم مش حلو أصلًا، والفكرة هنا للضحك صراحة وبس يعنى الجمهور بـ يضحك والمشاهدين بـ يضحكوا وعمومًا ربنا يخلى "ميديا أمريكا" اللى بـ تصدر لنا نوعية برامج لطيفة!

...

أحلى مسا: فيفى وهشام وسلمى على قناة mbc مصر
اصدرت في: 18/03/2014

هشام عباس مطرب مصرى متميز جدًا اشتغل فى هندسة الصوت أيام الثمانينات ولما تعرف على صانع الموسيقى العصرية الفنان حميد الشاعري دخل مجال الغناء وأبدع كثير من الأغاني الجميلة واللى شهره أغنية "حلال عليك" مع حميد الشاعرى.. قال عن البرنامج أنه هـ يكون تجربة ممتعة خاصة أنه أول مرة يقدم برنامج وهـ يوفر حالة فنية على الشاشة، وأنه فرحان لوجوده مع الفنانة فيفى عبده لأنها مرحة وفيها الروح المصرية الأصيلة. فيفى عبده راقصة وممثلة من مواليد محافظة المنوفية، والدها ضابط.. بدأت حياتها راقصة فنون شعبية بفرقة عاكف، ظهرت للمرة الأولى في السينما فى فيلم "الرسالة" وكانت طالعة بدور الراقصة عام 1976 وكانت شهرتها في فيلم "امرأة واحدة لا تكفي"، واشتغلت فى السينما والمسرح والتليفزيون.. ومن مسرحيتها "شباب امرأة" عام 1979.. قالت عن البرنامج أنه منوعات وهـ يخليها تتواصل مع طبقات مختلفة من المشاهدين اللى هـ يتواصلوا مع البرنامج لأنه مليان مفاجآت. سلمى الدالى مذيعة مصرية من مواليد محافظة السويس.. تخرجت فى كلية الإعلام وحصلت على درجة الماجيستير من الولايات المتحدة الأمريكية، وفي الوقت ده سجلت عدد من الفيديوهات الكوميدية على اليوتيوب، وكانت محاكاة ساخرة للحياة السياسية في مصر بعنوان "انتخبوا سلمى الدالي لرئاسة الجمهورية، رمز البطة" وده كان قبل ثورة يناير 2011.. وبعدين قدمت برنامج "المستشارة" على دريم ونجح البرنامج.. وقالت أنها محظوظة لأنها هـ تشارك هشام عباس وفيفى عبده التجربة دى. وتقابلوا الثلاثة على قناة mbc مصر علشان يعملوا برنامج "أحلى مسا" والبرنامج صراحة لازم نقف أمامه شوية، من ناحية أنه مختلف فهو مختلف مافيش كلام فى ده.. لازم نقول أنه مختلف.. الفكرة بقى أن فيه ناس كثير هاجموه وقالوا عليه كلام مش لطيف.. خاصة الفنان "عبد الله مشرف" اللى وجه رسائل ساخرة لوزير الإعلام علشان مش عاجبه البرنامج.. ده غير الناس اللى تكلمت عن أن هشام عباس وفيفى عبده مش قوى فى التمثيل.. لكن البرنامج فيه فكرة وعاوز يقول حاجة برضه ما نقدرش ننكر ده. البرنامج من نوع المنوعات بـ يقدم سهرة يومية متنوعة بـ تجمع بين الفن والدراما والمسابقات اللى بـ تتعمل يوميًا وبـ توفر الفرصة للمشاهدين علشان يفوزوا بجوائز مالية يومية قيمتها 100 ألف جنيه، وكمان البرنامج بـ يهتم بمناقشة اهتمامات الأسرة المصرية في إطار اجتماعى جذاب ومرح، ومن المبدعين اللى كانوا ضيوف البرنامج: حمادة هلال، وحميد الشاعرى، ومى عز الدين، وأوكا وأورتيجا وشحتة، وعبد الباسط حمودة، وممدوح فرج. يعنى البرنامج بـ يحاول يعمل حالة مختلفة ويقدم مسابقات ومنوعات كثير وتصويره جيد والديكور مبالغ فيه شوية.. بس عادى يعنى الموضوع يستحق.. ابقوا تفرجوا عليه وقولوا لنا رأيكم!

...

المشروع: الحكاية عن مصر على قناة النهار
اصدرت في: 02/01/2014

الحكاية معرفة نفسها من غير رغى كثير ولا أى حاجة.. برنامج كبير وجديد وفكرته هائلة بجد.. وبـ يدعم الشباب وعاوز يقول لكل العالم: "بصوا مصر فيها إيه". إحنا عن نفسنا وقفنا كثير أمام الفكرة عمالين نقول: "يا ترى مين اللى هـ يكسب؟ مين اللى هـ يكسب"، وهـ نفضل لحد آخر حلقة وإحنا بـ نسأل نفس السؤال، عارفين ليه؟ علشان باختصار كلهم هائلين، كلهم بـ يتكلموا حلو واعيين جدًا، عارفين بـ يعملوا إيه، بـ يهتموا بفكرتهم.. طب واللى هـ يخرج من المسابقة "برضه ما يزعلش" وده لأسباب كثير منها على سبيل المثال مش الحصر: أنت اتشهرت يا معلم واتعرفت أصلًا وطلعت فى التليفزيون "مبروك بقى"، وعرفت يعنى إيه شغل مع فريق ونجحت فى الفرقة، قابلت لجنة تحكيم جامدة جدًا وعارفة هى بـ تعمل إيه، أكيد استفدت جدًا من التجربة وطلعت بتجارب كثير حلوة وكمان عارف ممكن تستفيد منها وتعمل أحلى شغل. طب مين لجنة التحكيم: هشام الجمل مستشار إدارة الأعمال لأكثر من 25 عام ومدرّب ومستشار معتمد لعدد كبير من المؤسسات في مصر وأوربا، ود. هلا حطاب محاضر في إدارة الأعمال بالجامعة البريطانية في مصر، حاصلة على الدكتوراة في الريادة النسائية للأعمال. أما نظام المسابقة فهو باختصار: عدد المتسابقين في الموسم الأول من "المشروع" هو 14 متسابق.. تم تقسيمهم لفريقين.. وبـ يكون أمام الفريقين في كل حلقة تحدي، وعن طريق نتيجة التحدي اللي بـ تعلنها لجنة التحكيم، الفريق الخسران بـ يختار أقل واحد أو السبب فى خسارة الفريق علشان يخرج.. ولجنة التحكيم بـ تختار متسابق ثاني، شايفين أن هو كمان يستاهل يخرج في المرحلة دي من المسابقة. والاثنين بـ يقفوا أمام لجنة التحكيم، واللي بـ يقدر يقنع اللجنة أنه أحق بالاستمرار في البرنامج، هو اللي هـ يفضل موجود في المسابقة. أخيرًا المتسابقين وهما عصب البرنامج: الفريق الأول اسمه "هـ نعدي" مكون من: شريف حسني (36 سنة) مشروعه "ذيع أنت" هدفه يكون صوت الناس العادية مسموع في برنامج تليفزيوني، وفدوى عطية (29 سنة) مشروعها ماركة فنية مصرية بـ تعمل تصميمات وكتابة عربية على القماش بـ تحلم أنها تتحول لماركة عالمية، وعبد الحميد رشاد (26 سنة) مشروعه مصنع تي شيرتات صغير يقدر من خلاله ينتج ويوزع ويبيع، وريهام جهاد (29 سنة) مشروعها صالون أزياء وماكياج تنتشر فروعه في كل محافظات مصر، وثرى الدين حجاج (22 سنة) مشروعه مصنع للمنتجات النوبية اليدوية، مهتم في الأساس بتوظيف ذوي الاحتياجات الخاصة، وأسماء حسن (32 سنة) مشروعها أنها تحوّل المنتجات اليدوية المصرية لسلع مهمة في السوق المحلي والعالم، ويوستينا بولس (25 سنة) مشروعها إنتاج وقود وطاقة بديلة باستخدام المخلفات العضوية. الفريق الثاني اسمه "سيفن شيلنجز" مكون من: شيرلى أحمد (21 سنة) مشروعها مدرسة لتعليم الرقص للأطفال والكبار من كل الطبقات والفئات، ومصطفى متولى (26 سنة) مشروعه هو "Beyond more" لتطوير وتحديث التعليم في مصر وبناء أول نظام تعليمي مصري على شبكة الإنترنت، وسارة البطراوى (26 سنة) مشروعها مسرح عرائس متنقل يلف محافظات مصر كلها، وأمنية القاضى (27 سنة) مشروعها بـ يحل مشكلة البطالة بطرق جديدة ومبتكرة، وبـ يحافظ على البيئة وبـ يدير موارد البلد البشرية، ومصطفى النحوى (21 سنة) مشروعه "إنكا" بـ يقدم تصميمات وألوان جديدة لمنتجات زي المخدات والـ Bean bags، وإسلام حامد (26 سنة) مشروعه مركز فنى ثقافى بـ يخدم المجتمع من خلال تقديم ورش عمل، وحفلات، وندوات، وكورسات، وفرج موسى (20 سنة) مشروعه هو محطة لإنتاج وتعبئة "زيت الزيتون" في منطقة "بير العبد" المشهورة بزراعة الزيتون. دلوقت تم عرض حلقتين آخر واحدة تم تكليف الفريقين بشراء 10 حاجات من أماكن معينة بأقل سعر وأفضل تنظيم، وخسر فريق "سيفن شيلنجز" وخرج فيها المتسابق "مصطفى متولى" بعد ما دافع عن وجوده فى البرنامج أمام أمنية، ولسه الحلقات اللى جاية فيها تحديات أكبر وأصعب.. يا ترى التحدي اللى جاى إيه؟ ومين اللى هـ يخرج الحلقة الجاية؟!

...

ستار أكاديمى (موسم 9): خلى نجمك يلمع على قناة cbc
اصدرت في: 11/10/2013

فى 26 سبتمبر الماضى تم إطلاق الموسم التاسع من برنامج النجوم "ستار أكاديمى" بعد غياب سنتين. بعد جولة فى البلاد العربية تم خلالها اختيار مجموعة من المشتركين وعددهم 16 مشترك، بـ تدربهم الأكاديمية على الغناء والتمثيل، وبـ يعرض البرنامج على قنوات cbc وlbc ونغم الساعة 8 مساءً كل خميس ودي الحلقة الرئيسية، أما يوميات ستار أكاديمى بـ تعرض كل يوم الساعة 7 مساءً على قناة cbc، الافتتاح كان مع الفنانة نانسى عجرم أما فى البرايم الثانى كان الفنان صابر الرباعى هو الضيف. بـ تستمر الإعلامية هيلدا خليفة فى تقديم البرنامج للموسم التاسع لكن للأسف مخرج البرنامج طونى قهوجى اعتذر عن البرنامج لأن الموسم التاسع مش هـ يقدم جديد من وجهة نظره، وفى الحقيقة غياب طونى قهوجى عن البرنامج مش هو التغير الوحيد لأن فى الموسم ده فيه تغيرات كثيرة فى الإدارة وفى لجنة التحكيم، وفى المدربين كمان، فى الموسم ده بـ تغيب رولا سعد عن إدارة الأكاديمية وبـ تحل محلها كلوديا مارشليان، حتى أن الأكاديمية غيرت مكان الإقامة والمسرح كمان وبقيت الإقامة فى فندق بلبنان. فى كل حلقة من كل أسبوع تختار لجنة التحكيم أسوأ 3 طلاب فى الغناء ومن خلال التصويت بـ يخرج أسوأ واحد فيهم، وكانت المصرية منة هاني هى أول طالب يغادر الأكاديمية من البرايم الثانى بعد دخولها فى دائرة الخطر مع ماريا من لبنان وعيسى من الكويت وحصولها على أقل عدد أصوات من زملائها. بعد قضاء الطلاب أكثر من أسبوعين فى الأكاديمية وبعد الحلقات اليومية اللى بـ نشوفها على cbc نقدر نكون فكرة عن طباع الطلاب فى الأكاديمية فمثلاً عبد الله عبد العزيز قدر يجذب الجمهور له فى وقت قصير جدًا وده بفضل روحه الخفيفة وفكاهته وشكل هو وزميله عيسى المرزوقي ثنائى مرح خلق جو من المرح والتسلية داخل الأكاديمية، ولكن على الجانب الثانى فيه بعض الطلاب مازالت شخصياتهم غامضة زى محمود محي فهو من الطلاب اللى بـ يتميزوا بصوت رائع جدًا وخاصة فى الغناء الطربي لكنه قليل الكلام والتفاعل وممكن يكون ده لأن طبعه هادىء وممكن يكون تفاعله أكثر بعد كده خاصة بعد ما نصحه أستاذ الغناء خليل أبو عبيد أنه يكون أكثر حيوية مع زملائه، وزيه الطالبة ماريتا أبو نادر لكنها بـ تختلف عنه أنها قريبة من كل زملائها وبـ تقف جنبهم فى مواقف كثيرة. طبعًا يوم الطلاب فى الأكاديمية مش تدريب على الغناء وبس، بـ يبقى فيه مهارات ثانية بـ يتدربوا على اكتسابها زى مثلًا تنسيق الألوان فى لبسهم كل يوم اثنين بـ يبقى لهم محاضرة مع خبير الماركة الشخصية ميلاد حدشيتى بـ يعلمهم كيفية تنسيق اللبس وتأثير المظهر الخارجى على الجمهور. كمان بـ تعلمهم أخصائية التغذية مونيك باسيلا زعرور أهمية الأطعمة اللى فيها فيتامينات وتأثيرها على الصوت والحنجرة وكمان إزاى يطبخوها بنفسهم. زى ما فيه حاجات إدارية اختلفت فى الأكاديمية روح الأكاديمية كمان اختلفت واختلف تأثيرها على الجمهور، فمثلاً تعامل الإدارة متمثلة فى المديرة الجديدة كلوديا مارشليان مع الطلاب بشكل جاف بـ يخلي الطلاب ما يتعاملوش بحرية وكل واحد بـ يتصرف أى تصرف وهو خايف من الإدارة خاصة بعد طرد المديرة للطالبة ليليا على الهواء وحرمانها من حضور البرايم الثانى بعد إهانتها للفنانة هيفاء وهبى وهى فى الحقيقة كانت بـ تقول رأيها. وده خلى الجمهور يثور على البرنامج وأعلن جمهور ليبيا مقاطعته ردًا على إهانة بنت بلدهم ليليا.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن