فن وأدب في القاهرة – أفلام، مواعيد السينمات، تليفزيون، مزيكا وكتب

منوعات

أحدث المقالات

تاريخ في الظل: تاريخ الناس الغلابة!
اصدرت في: 06/12/2016

الكاتب وليد فكري بيقدم لنا صفحات شبه مجهولة من تاريخنا بطريقة سهلة وممتعة، أقرب للحكايات بعيدًا عن الطريقة الجافة الموجهة للمتخصصين، واللي بتتعالى على القارئ. في مقدمة الجميلة بيقول وليد فكري إزاي اختار عنوان الكتاب. بيقول أن الناس بتتعامل مع التاريخ كرجل عجوز (راجل بركة) مابيعملش أي حاجة. راجل مريض مُقعد. قاعد على طول في الظل. ومن وقت للتاني أهله وجيرانه بيحكوا عن أمجاده وبطولاته القديمة من باب التسلية. الكتاب عبارة عن 7 فصول. وداخل كل فصل أكثر من مقال. ومن أجمل الحاجات في الكتاب هي كتابة المصادر في نهاية كل مقال. علشان اللي يحب يتأكد من الكلام أو اللي يحب يستفيد بقراءة المصادر نفسها. فصل (تاريخنا ماذا فعلوا به؟) بيعرض عن موضوع مهم جدًا، وهو إننا اتعودنا طول الوقت نعرف تاريخنا من المؤسسة الرسمية. لكن في الحقيقة في تاريخ تاني موازي للتاريخ الرسمي اسمه التاريخ الشعبي. هو التاريخ اللي بيتكلم عن الناس الغلابة مش عن الأبطال المنتصرين. وبيذكر الكاتب -ذكاء- رواية 1984 الشهيرة للكاتب الانجليزي جورج أورويل. فيها كان النظام بيتحكم في وقائع التاريخ والأحداث الحالية والأخبار اللي دايمًا بتقول أن كل شيء تمام والبلد بخير. وأن كل اللي بيحصل في البلد بسبب أعداء الوطن والعملاء! الكتاب مُصر على تنبيهنا إن قراءة التاريخ مش مجرد تسلية. لكن طريقة علشان نعرف موقعنا من العالم، سواء زمان أو دلوقتي. وعلشان نتعلم من أخطاء الغير. في فصل (العولمة) وهو من أجمل فصول الكتاب، وبيعرض لفكرة العولمة. الكلمة اللي ظهرت في نهاية التسعينيات وصدرتها أمريكا للعالم كله، بمعنى إن العالم يبقى قرية صغيرة. ومن خلال التاريخ هنعرف إن العولمة مش فكرة جديدة! لكنها فكرة قديمة جدًا. وأول من نادى بيها وطبقها فعلًا كان الإسكندر الأكبر! وعلشان كده بنى مدن كثيرة علشان يطبق فكرته عن العولمة على أرض الواقع. المدن اللي بناها الإسكندر وسماها على اسمه لسه موجودة لحد دلوقتي. تشهد على انه كان فاتح عظيم. وتشهد على نجاح فكرته. ومن أنجح النماذج على الفكرة مدينة الإسكندرية. والتاريخ أثبت صحة رؤية الإسكندر في اختيار موقع استراتيجي يربط بين الشرق والغرب. وده اللي حصل فعلًا بعد وفاة الإسكندر بقرون. ولحد دلوقتي العمارات القديمة دليل على العدد الكبير من الجاليات المختلفة اللي كانت عايشة في الإسكندرية لحد وقت قريب. والكاتب بيفكرنا أن الإسكندر متربي على إيد الفيلسوف العظيم أرسطو. لكن العولمة اللي صدرتها أمريكا للعالم كانت عولمة رعاة البقر! عولمة الهمجيين اللي بيتفاهموا بالبارود. واللي أبادوا الهنود الحمر (السكان الأصليين) واستوطنوا أرضهم. إنما عولمة الإسكندر كانت امتزاج ثقافي وحضاري. الفصل الأخير (إسلاموفوبيا) من أجمل وأهم فصول الكتاب. بيعرض بطريقة ممتعة وبسيطة أفكار كثير مهمة. زي مثلًا فكرة الدفاع عن الإسلام ضد اللي بيهاجموه باعتباره دين الإرهاب. من وجهة نظر الكاتب هو شايف إن أغلب اللي بيدافعوا عن الإسلام بيسيئوا ليه من غير قصد! أو على أفضل حال مجهودهم مالوش فايدة. وبيقول وليد فكري وجهة نظر تحترم، أنهم بيحاولوا يتفاهموا مع متعصبين جهلة. وأفضل شيء يقدموه أنهم يوجهوهم للمصادر الجيدة لو عايزين يقروها. وفي لمحة غاية في الذكاء بيقول الكاتب أن من بعد انهيار الاتحاد السوفيتي والعالم بيدور على أي حد يقعد مكانه على مقعد عدو الإنسانية وأن الغرب لازم يخلق عدو علشان يحقق مصالحه من خلاله. وده فعلًا اللي حصل بدعوى الحرب على الإرهاب. الكتاب رائع جدًا. بيناقش قضايا خطيرة بأسلوب سهل وبسيط. والأهم أنه فيه معلومات ومصادر وكتب كثيرة للي عايز يستفيد ويعرف التاريخ الحقيقي مش المزيف.

...

Arrival: التواصل مع الكائنات الفضائية أصبح ممكن؟!
اصدرت في: 04/12/2016

المميز في فيلم Arrival أنه مش بيضيع وقت في فكرة هل هناك حياة على الكواكب الأخرى أم لا.. الفيلم بيتجاوز الفكرة دي تمامًا وبيبدأ السيناريو الخاص به فيما بعد اكتشاف وجود حياة على الكواكب الأخرى... وإزاي هيتم التواصل معاها وفهم لغتها وتطوير لغة قادرة على أنهم يفهموها. من بداية ظهور فن الخيال العلمي وفكرة الحياة على الكواكب الأخرى كانت واحدة من أكثر الأفكار رواجًا فيما يتعلق بالأعمال الأدبية والفنية اللي تناولت مجال الخيال العلمي.. بالتالي نقدر نقول أن Arrival ماقدمش كتير جديد فيما يتعلق بالفكرة، لكن فيما يتعلق بالتنفيذ... الأمور كانت مختلفة. فيلم Arrival من إخراج دينيس فيلنوف، وسيناريو وحوار إيريك هيزير، عن قصة قصيرة كتبها تيد شيانج، أما البطولة فكانت من نصيب إيمي آدمز، جيريمي رينر، فوريست وايتكر، مع جوليا سكارليت دان. الفيلم بيحكي عن مركبة فضائية غامضة بتظهر على كوكب الأرض، الأمر اللي بيستدعي من الولايات المتحدة تكوين فريق عمل متخصص في اللغات والتواصل مع الكائنات الأخرى بقيادة (د. لويز بانكس) والهدف هو التواصل مع الكيان الجديد والغامض. وبينما العالم كله تقريبًا بيستعد للدخول في مواجهة لا يعلم مداها إلا الله، بتحاول د. بانكس الوصول لإجابات شافية معرضة نفسها وفريقها لمخاطر مالهاش بداية أو نهاية. الأداء التمثيلي لأبطال Arrival كان جيد جدًا، وقدروا يقنعونا بكل تفاصيل الفيلم على الرغم من كونها تفاصيل خيالية، والحقيقة أن أفلام الخيال العلمي بتعتبر اختبار شديد الصعوبة للأداء التمثيلي للممثلين علشان بيكون مطلوب منهم طوال الوقت مش مجرد تزييف مشاعرهم -اللي هي أساس عملهم كممثلين- لكن أيضًا تزييف اللي بيشوفوه ويسمعوه ويشعروا بيه بالتناغم مع المؤثرات الخاصة. أما في الحديث عن المؤثرات الخاصة لازم نقول أنها أدت دورها بمنتهي البراعة، وقدرت تقدم لنا أحداث ومشاهد مش موجودة في الحقيقة إطلاقًا، لكن توظيف المؤثرات الخاصة لإنتاج المشاهد دي كان أكثر من بارع. وبما إننا اتكلمنا عن المؤثرات الخاصة لازم نتكلم عن الديكورات اللي كانت جيدة جدًا، وجعلت دخولنا سياق الأحداث سهل وسريع من المشهد الأول، والديكورات مع المؤثرات الخاصة كانت من الأمور اللي تحسب وبقوة للقائمين على الفيلم. الموسيقى التصويرية وعلى الرغم من أهميتها كعامل أساسي في أي فيلم خيال علمي، إلا أنها في حالة Arrival كانت باهتة وغير قوية وحسينا أن وجودها كان زي عدمه. مش عاوزين نقول إن ده حصل في كل مشاهد الفيلم لكن في الغالبية العظمي من مشاهد الفيلم ده اللي كان حاصل فعلًا، وللأسف دي من الأمور اللي بناخدها على الفيلم بشكل عام. علشان تبقى عارف.. كان المخرج (نيس ماتيو) مرشحًا لإخراج الفيلم في البداية. تعاون النجمان (آيمي آدامز) و(جيريمي رينر) من قبل في فيلم (American Hustle) عام 2013.

...

فيلم Shut In: رعب يستحق المشاهدة في السينما؟!
اصدرت في: 01/12/2016

البرد.. العواصف الثلجية.. الظلام.. الأوهام.. الأطفال اللي تبان بريئة وهي أبعد ما يكون عن البراءة، كل العوامل دي كفيلة بتقديم فيلم رعب متميز، لكن فى حالة Shut In وعلى الرغم من وجود كل مقومات الرعب، لكن النتيجة النهائية كانت مخيبة للآمال! فيلم Shut In من بطولة ناعومي واتس، جاكوب ترمبلي، أوليفر بلات، وديفيد كوبيت، مع أليكس برونستين وتشارلي هيتون، ومن تأليف كريستينا هودسون، وإخراج فارين بلاكبيرن، وبيحكي عن سيدة بتفقد ابنها المراهق في حادث أليم، وبيصاب بشدة لدرجة أنه بيفقد القدرة على الحركة أو الكلام. حياة بطلة الفيلم بتتحول لحياة رتيبة صعبة لا تطاق بعد إصابة ابنها، على الرغم من عملها في مجال الصحة النفسية للأطفال، الأمر اللي بيخليها في احتكاك مباشر مع طفل صغير بيظهر في حياتها وبتحس أنه تعويض من السماء عن خسارتها في ابنها.. لكن باقي أحداث الفيلم بتورينا أن الرعب ممكن يكمن في وجود الطفل الصغير. الأداء التمثيلي لكل الأبطال كان متوسط، حسينا أنه كان المفروض يكون أقوي، سيناريو الأحداث المرعبة كان نمطي ومحفوظ ومكرر وشوفناه في أفلام كتير قبل كده، كمان المؤثرات الخاصة والمؤثرات الصوتية والبصرية اعتمدت في المقام الأول والأخير على فكرة (الخضة) والظهور المفاجئ للأشخاص والأشياء أمام الكاميرا اللي بتتحرك ببطء. وده مش جديد، وممكن يكون السبب في قلة الإبداع في الفيلم أنه تكلفته الإنتاجية متوسطة. الموسيقى التصويرية كانت ضعيفة، وعجزت عن عكس حالة الرعب اللي كان المفروض تجسدها بإبداع فني أكبر من كده، وبالمناسبة الموسيقى مهمة جدًا في أي فيلم رعب، لكن في فيلمنا النهارده الموسيقى التصويرية كانت باهتة وضعيفة وما حسيناش أن لها وجود على طول الفيلم. الكلام عن Shut in ممكن يكون قليل لكن ده نتيجة أن الفيلم نفسه ماكانش قوي زي ما توقعنا، لو كنت من عشاق الرعب وما بتحبش تفوت أي فيلم جديد يبقى لازم تتفرج على الفيلم في السينما، لكن لو كنت بتدور على فيلم سينمائي متميز يبقى محتاج تفكر أكثر من مرة قبل ما تتعب نفسك وتشوفه في السينما.

...

نور: اللغة الجيدة لا تكفي لكتابة رواية!
اصدرت في: 01/12/2016

والرواية هي الجزء الأخير من ثلاثية بدأت برواية محال ثم جوانتانامو. بتحكي عن امرأة شابة وقعت في غرام شاب نوبي، ومن خلال علاقة غير شرعية حملت بـ(نور)، وبعدين بتتجوز ثري ليبي والبنت بتتكتب باسمه. الرواية كلها هي نظرة نور للعالم من حواليها. ومن خلالها هنتعرف على نظرة المجتمع للأنثى. نور متمردة على كل التقاليد والقيود وبتحاول تفهم العالم والناس. بتشك في وجود الإله وفي حكمته وفي وجودها نفسه. وهنشوف كل ده من خلال مونولوجات أو حوارات داخلية طويلة. حرص يوسف زيدان أنه يخلي العالم كله يكون بيدور حوالين بطلة الرواية. اللي طول الوقت بتتأمل في حالها وبتحلم بوضع أفضل. كالعادة نقطة القوة عند يوسف زيدان هي لغته، لكن اللغة الجيدة لا تكفي لكتابة رواية. عامة الأحداث هي اللي بتحرك الرواية. والأحداث تصنعها الشخصيات. فلو الشخصيات مش مكتوبة كويس الأحداث مش هتبقى سلسة، وبكده نقدر نقول -بكل ثقة- إن الرواية باظت! والشخصيات الجيدة هي اللي نقدر نصدق أنهم موجودين حوالينا. نقدر نتخيل تفاصيلهم. ونقول إننا شفناهم قبل كده وتعاملنا معاهم. شخصيات حقيقية. وعلى العكس بقى هي الشخصيات الأحادية. يعني الشخصيات اللي ليها جانب واحد بس. أفكار ثابتة. طبع ثابت. مركزة على فكرة واحدة بس طول الرواية. وهو ده اللي حصل هنا. نور مثلًا كل اللي شاغلها قضية الحجاب والحيض وقضايا المرأة المهزومة في المجتمع المصري معاصر. صحيح المجتمع المصري نظرته للمرأة سيئة وبالتالي التعامل معاها سيء. وفي أفكار وقضايا كتير في الرواية حقيقية فعلًا. ومش عيب أبدًا كتابة رواية للدفاع عن قضية معينة، وخاصة قضايا المقهورين فعلًا. لكن السؤال المهم.. هتتعمل إزاي؟ كل الشخصيات في الرواية مُفتعلة. وبما إن مافيش أحداث مهمة فكان لازم يوسف زيدان يعبر عن اللي عايز يقوله من خلال الحوارات، وخاصة الحوارات الداخلية -بين نور وبين نفسها- اللي كانت من أسوأ أجزاء الرواية. لأن القارئ أكيد مش محتاج يسمع حوار طويل بين شخص وبين نفسه. الرواية غير ناضجة فنيًا للأسف. لأنها من البداية موجهة لشريحة معينة، ولهدف معين، علشان الكاتب يجمع حواليه مزيد من القارئات ومزيد من المدافعات والمدافعين عن حقوق المرأة. وبكده -وبعد تجارب روائية كثيرة- نقدر نقول أن يوسف زيدان فعلًا روائي بالصدفة. لأنه من بعد رواية (عزازيل) ماكتبش أي حاجة قيّمة. كل الإنتاج الروائي السيئ ده هيرجح زعم اللي شككوا في عزازيل، وقالوا إنها مش بتاعته! لأن اللي كتب رواية بالجمال ده صعب أنه يكتب روايات سيئة للدرجة دي!

...

Bleed for this: مستعد تضحي بإيه علشان حلمك؟!
اصدرت في: 30/11/2016

لما نتكلم عن الفكرة العامة الخاصة بتيمة النهوض من قاع اليأس إلي قمة النجاح، التيمة دي ممكن تكون واحدة من أكتر تيمات السينما المعاصرة تحقيقًا للنجاح، وواحدة من أكثر الحكايات مضمونة النجاح الجماهيري، علشان الناس دايمًا بتحب الأفلام اللي بتحفزها وتعطيها القدرة على مواصلة الكفاح في حياتها اليومية. سنة 1976 قدم الفنان سلفستر ستالون الجزء الأول من سلسلة أفلام، هتكون السبب في انطلاق شهرته في الأوساط الفنية.. اسم الفيلم كان Rocky على اسم الشخصية الرئيسية للفيلم وهي روكي بالبوا الملاكم اللي بيصعد من الصفر لقمة عالم الملاكمة في الولايات المتحدة. مع تحقيق الفيلم لنجاح كبير تم تقديم جزء تاني منه سنة 1979 ثم جزء ثالث سنة 1982 ومع استمرار نجاح الفيلم اتقدم منه جزء رابع 1985 ثم خامس في 1990، ناهيك عن تقديم أفلام مستقلة تعتبر أجزاء جديدة للسلسلة زي الجزء اللي تم تقديمه في 2006 ثم فيلم Creed في 2015. ليه بنقول كل ده؟ علشان تفهموا معانا إن مجال أفلام الصعود من الصفر في عالم الملاكمة بالذات أصبح مستهلك بدرجة كبيرة، خاصة مع وجود أفلام تانية ناقشت نفس الحبكة زي Million Dollar baby وغيرها من الأفلام. فيلمنا اليوم واللي أخرجه بين يونجر، ومن تأليف بيبا بيانكو، مش بيخرج كتير عن التقاليد الأساسية لحبكات أفلام الملاكمة، وفي المجمل نقدر نقول أنه ماقدمش جديد على مستوي القصة والسيناريو، وإن كان الأداء التمثيلي كان فيه بعض التجديد. الفيلم المقتبس عن قصة حقيقية بيحكي قصة حياة الملاكم فيني بازينزا، واللي بيحقق إنجازات متميزة في مجال الملاكمة، ثم بيتعرض لحادث مروع بيكاد يفقد فيه حياته، وبيضطر للعيش بدعامات للرقبة تمنعه من تحريك رقبته علشان مايحصلوش انفصال في الحبل الشوكي ويموت. لكن على الرغم من الحالة الطبية الصعبة لـ(فيني)، وإن الدكاتره قالوا له أنه مش هيقدر يلعب ملاكمة تاني أبدًا، إلا أنه استطاع استكمال تدريبه بالمخالفة لكلام الأطباء، واستعادة مكانته في عالم الملاكمة تاني بعد فترة طويلة من الإنقطاع من أجل العلاج. الفيلم من بطولة مايلز تيلر، أرون إيكهارت، كاتي ساجال، وسياران هيندز، مع أماندا كلايتون وكريستين إيفانجليستا، واللي قدموا أداء تمثيلي متميز، تناغم مع السيناريو اللي حاول يحافظ على نغمة هادية ومستقرة مابين الأكشن واللحظات الإنسانية، مع الحفاظ على خيط رقيق جدًا من الكوميديا اللي بتظهر في بعض المشاهد القليلة، والمعتمدة بالمقام الأول على الجمل الحوارية... والحوار كله بشكل عام كان قوي ومركز على الفكرة الأساسية للفيلم. الموسيقي التصويرية كانت هامشية وضعيفة، وماحسيناش أن لها تأثير قوي أو حقيقي على الأحداث، وده شيء أحبطنا في الحقيقة لإن أفلام الملاكمة دايمًا بيكون لها تيمات موسيقية متميزة، زي التيمة الموسيقية لفيلم روكي على سبيل المثال، واللي تحولت لتيمة موسيقية عالمية وشهيرة جدًا. ديكورات الفيلم كانت جيدة، وظهر فيها الحرص الإخراجي على نقلنا للحقبة الزمنية اللي بتدور فيها أحداث الفيلم، ومع مقارنتنا بين أحداث الفيلم واللي حصل في الحقيقة اكتشفنا إن كان فيه اهتمام غير عادي بتقديم الجزء الأكبر من القصة الحقيقية والأصلية تمامًا كما حدث بدون زيادة أو نقصان إلا في بعض التفاصيل الصغيرة، وده شيء يحسب للسيناريو والقائمين عليه. فيلم Bleed For This فيلم جديد يضاف لسلسلة أفلام الملاكمة.. ماقدمش جديد على مستوى الفكرة لكن الأداء التمثيلي والسيناريو المقتبس عن قصة حقيقية يستحقوا التحية. علشان تبقى عارف: ميزانية الفيلم: 6 مليون دولار. مدة الفيلم: 117 دقيقة. اللي درب مايلز تيلر على الملاكمة هو المدرب داريل فوستر، واللي سبق ودرب نجوم كتير قبل كده.

...

البر التاني: مأساة الهجرة غير الشرعية في مصر
اصدرت في: 29/11/2016

بقى لنا فترة طويلة جدًا ماشوفناش فيلم عربي يستحق الإشادة، ويستحق 5 نجوم، والحقيقة إن دي مناسبة تستحق الاحتفال في حد ذاتها، لكن موضوع الفيلم وقصته اللي بنشوفها في وقت متزامن مع حوادث الهجرة غير الشرعية اللي بنسمع عنها مؤخرًا، كلها عوامل بتخلينا نشعر بالحزن والأسى على اللي بيحصل، لكن ده مايمنعش إحتفائنا بالفيلم. (البر التاني) من بطولة محمد علي، حنان سليمان، عبدالعزيز مخيون، عمرو القاضي، عفاف شعيب ومحمد مهران، ومن إخراج على إدريس، وتأليف زينب عزيز. الفيلم بيحكي قصة مجموعة من الشباب بتقرر الهجرة عن مصر إلي إيطاليا بطريقة غير شرعية بمساعدة مافيا تهريب البشر. الأمر اللي بيضعهم أمام مواجهات بلا بداية ولا نهاية مع ظروف البحر والتهريب والسلطات وخلافه، لكن الصراع الأقوى في الفيلم كان بالأساس صراع لتوفير الفلوس لدفعها لعصابات التهريب. الفيلم بيبدأ بمناقشة قضايا الشباب اللي هنشوفهم بعد كده خلال رحلة الهروب، المال كان المحرك الأساسي لسفر كل الشباب تقريبًا، إما علشان الشاب يقدر يتزوج أو علشان يقدر يعول أسرته، كل واحد فيهم كان بيعمل المستحيل علشان يقدر يجمع المبلغ المطلوب دفعه. بنشوف بعد كده الرحلة الطويلة على المركب الخاصة بالتهريب، وإزاي بيبدأ مجموعة من الشباب من مستويات ثقافية وتعليمية مختلفة أنهم يتعاملوا مع بعض علشان يتغلبوا على المشاكل الصعبة أثناء الرحلة، خاصة مع المعاملة السيئة جدًا من قبطان المركب، والحالة المتهالكة للمركب واللى بتخلي اتمامها لرحلة زي دي تحدي بحد ذاته. الأداء التمثيلي للأبطال كان أكثر من رائع، محمد علي قدر يثبت أنه فنان متميز قادر على تأدية الدور المطلوب منه على أفضل ما يكون، ونقدر نقول إن علي كان هو اللى شايل الفيلم على أكتافه تمثيليًا وإنتاجيًا كمان.. علشان عرفنا أن محمد أنتج الفيلم على نفقته الخاصة واللي تكلف حوالى 25 مليون جنيه بحسب ما نشر عن الفيلم. (كايرو 360 متأكدتش من صحة الرقم). على الرغم من صغر مساحة دور حنان سليمان وعبد العزيز مخيون إلا أنهم أدوا أدوارهم بأفضل ما يكون، وماقدرناش نمنع دموعنا من بعض المشاهد اللى أدوها بمنتهي الإحترافية والذكاء وعدم الإصطناع فى نفس الوقت وده شيء يحسب لهم. محمد مهران واللي بيظهر في مرحلة متأخرة نسبيًا من زمن الفيلم بيقدم أداء متميز بيخلينا ننسى السقطة التمثيلية له في فيلم (من 30 سنة) مع أحمد السقا، والحقيقة إن مهران واحد من أنجح فنانين جيله ومش هننسى دوره في فيلم (أسرار عائلية) واللي قدم فيه دور شاب مثلي جنسيًا بكل ما يعنيه الأمر من مشاكل وتحديات في مجتمع زي مصر. سيناريو الفيلم كان متقسم بطريقة متميزة تخلينا لا نشعر بالملل أبدًا، أما الحوار فكان طبيعي وغير متكلف، وكأنه نابع بشكل انسيابي بسيط من الفنانين اللى بيأدوا كل الأدوار، أما الموسيقى التصويرية الخافتة والحزينة فحملت في طياتها حالة من الشجن جعلتنا في حالة من الحزن أثناء متابعة الفيلم. ديكورات المركب، ومنازل أبطال الفيلم كلها ديكورات تم تنفيذها بعناية متميزة، كمان المؤثرات الخاصة ومشاهد غرق السفنية كلها تم تنفيذها بحرفية عالية، وتضافرت فيها جهود الإنتاج مع التمثيل مع الموسيقى علشان تنتج لنا في النهاية فيلم ناجح ومتميز على كافة الأصعدة. (البر التاني) فيلم مصري محترم وقادر على المنافسة فنيًا... بيناقش قضية في منتهى الأهمية ولا يعيبه سوي إن جرعة (النكد) فيه عالية شوية علشان كده مش بنرشحه للمشاهدة للناس اللي أعصابها بتتعب بسرعة.

...

Allied: رومانسية وجاسوسية وحرب عالمية!
اصدرت في: 28/11/2016

الحرب العالمية الثانية واحدة من أكثر الفترات في التاريخ الإنساني المليئة بالأحداث والتقلبات، واللي تصلح مادة أكثر من رائعة لتقديم أفلام وأعمال سينمائية عنها.. الفترة اللي قال عنها الدكتور أحمد خالد توفيق أنها فترة رائعة للقراءة ومشاهدة الأفلام عنها لكنها فترة صعبة جدًا إن الواحد يعيشها أو يكون طرف فيها. من حسن الحظ أننا في كايرو 360 متعمقين جدًا في تاريخ الحرب العالمية الثانية، وبالتالي محتاجين نوضح لكم بعض المعلومات علشان تفهموا الفيلم كويس، مبدئيًا لازم نعرف إن الألمان بقيادة هتلر قدروا يحتلوا فرنسا في بداية الحرب العالمية الثانية، وعلشان يضمن الألمان السيطرة على فرنسا بدون تخصيص عدد ضخم من جنودهم وظباطهم لحفظ الأمن في المدينة، تم الإتفاق مع الحكومة الفرنسية المستسلمة والمهزومة، بالاحتفاظ بقوات الشرطة النظامية بسلاح خفيف لحفظ الأمن في المدينة وإعطاء فرصة للألمان يتفرغوا لمهام ثانية تخص الحرب.. الحكومة اللي عينها الألمان في فرنسا كان اسمها حكومة (فيشي) وأصبحت مع الوقت متعاونة ومتواطئة مع الألمان ضد الفرنسيين أبناء وطنهم! وأصبح لزامًا على قوات الحلفاء أمريكا وإنجلترا ضرب حكومة فيشي والمتعاونين معها من الألمان والفرنسيين. فيلم Allied بيتجنب الخوض في سيرة الحرب نفسها، وبيتكلم عن فترة بداية الحرب العالمية الثانية من حيث الحياة الإجتماعية فيها،وبيبدأ الفيلم بمشاهد افتتاحية لعميلة المقاومة الفرنسية (ماريان بيساجور) اللي قامت بدورها (ماريون كوتيلارد) واللي بتعيش كجاسوسة على الألمان في فرنسا بعد احتلالهم لها. وبتحاول تنفذ عملية انتحارية جريئة ضد السفير الألماني في فرنسا، وعدد من أهم أعضاء حكومة فيشي في فرنسا... وفي سبيل تنفيذ مخططها بتتعاون مع العميل البريطاني (ماكس فاتان) اللي بيقوم بدوره براد بت... واللي بيقع في غرامها بعد العملية وبيتجوزوا وبيعيشوا حياة جميلة. من هنا بيبدأ الفيلم في الخروج من خيط الحرب والدم والمعارك ويخلينا نركز مع جانب الحب والرومانسية، لكن حالة الرومانسية مش بتستمر لوقت طويل علشان بتبدأ المخابرات البريطانية في الشك في سلوك زوجة الضابط الهمام، وبيتهموها بالجاسوسية وبيطلبوا من زوجها التعاون معهم للتأكد من كونها جاسوسة من عدمه.. الأمر اللي بياخد (ماكس) لمرحلة نفسية متغيرة تمامًا وصعبة جدًا. مش عاوزين نحرق الأحداث عليكم أكثر من كده، علشان فعلًا الفيلم يستحق المشاهدة بكل المشاعر الإنسانية اللي فيه، وكل الأداء التمثيلي المتميز والموسيقى التصويرية الأكثر من رائعة. بداية لازم نقول أن الأداء التمثيلي لكل الأبطال كان أكثر من رائع.. براد بيت قدر يلعب ببراعة دور العميل السري القوي والقادر على الفصل في مشاعره بين شغله وبين علاقته بزوجته، وإحساسه بالضياع مع إختلاط المشاعر ودخول الشغل في الحب وإحساسه -لأول مرة- بالشك في زوجته اللي كانت بتشاركه في الماضي عمليات ضد الألمان. في دور الزوجة بنشوف (ماريون كوتيلارد) اللي قدرت تقدم دورها كأفضل ما يكون، وفي الربع الأخير من الأحداث بتقدم أداء أكثر من رائع. فى الأدوار المساعدة ما ننساش دور (أوجست دايهل) واللي من الواضح أنه حب الأدوار التاريخة بعد مشاركته في فيلم Inglourious Basterds مع براد بت برضه. الديكورات والموسيقى التصويرية كان لهم دور كبير في نقلنا زمنيًا لحقبة الحرب العالمية الثانية بكل ما فيها من دمار وخراب وخوف من الموت، والإحساس طوال الوقت بالتهديد خاصة مع الشعب البريطاني اللي تعرض لقصف مستمر وغير متوقف من الطيران الألماني. مع اقتراب موسم الأوسكار في فبراير القادم، بنعتقد إن Allied هيكون من المنافسين الأساسيين على جوائز الأكاديمية.. خاصة مع ضعف معظم الأفلام الصادرة في 2016.

...

موسيقى الشعوب: رحلة مع المزيكا في العالم كله
اصدرت في: 28/11/2016

في العشرينيات من القرن العشرين، اكتشفت بعثة ألمانية في مدينة على الساحل السوري قطع حجرية مكتوب عليها نوتة موسيقية قريبة جدًا من شكل كتابة الموسيقى حاليًا! واكتشف العالم كله إن الموسيقى بشكلها الحالي بدأت من الشرق الأوسط. برنامج موسيقى الشعوب هو الأول من نوعه على تلفزيونات العالم العربي. فكرة البرنامج إنه بيدوّر على الموسيقى في العالم كله. ويستكشف طبيعة الموسيقى الخاصة بكل بلد. وتحديدًا الموسيقى التقليدية، اللي مافيهاش أي عناصر حديثة. وبما إن البرنامج مهتم بمزيكا الشرق فكان من الطبيعي إن أول حلقة تبدأ من لبنان. وهنشوف شكل مختلف تمامًا للبنان، بعيدًا عن أماكن السهر وموسيقى الديسكو والبوب. هنشوف لبنان الجبل والسهل والضيعة (القرية) هنتعرف على قوة الدبكة اللبنانية في مدينة بعلبك. وجمال الموسيقى السريانية. اللي اتأثرت بيها الموسيقى اللبنانية وحتى اللهجة. وهنكتشف إن الموسيقى العربية في شكلها الحالي هي عبارة عن تطور للموسيقى السريانية. وهنشوف إزاي المزيكا قدرت تمزج بين الأناشيد الإسلامية والموسيقى السريانية في الكنيسة. وهي دي رسالة البرنامج اللي بيركز عليها في كل حلقة. البرنامج عايز يقول إن الموسيقى هي اللغة الوحيدة اللي مش محتاجة ترجمة. هي اللغة اللي بتجمع بين كل الشعوب. زي ما هنشوف في حلقة اليونان. وإزاي الموسيقى اليونانية قايمة على آلة البوزوكي، اللي شكلها أقرب للعود. وأنها انتقلت إلى الشرق الأوسط وبقى اسمها البزق. وفي شرق اليونان هنشوف الفرق بتغني موسيقى تركية وقدود حلبية باللغة العربية، من غير ما يفهموا المعنى. نقدر نقول أن عبير نعمة مقدمة البرنامج من أهم عوامل نجاحه. بتلقائيتها وبساطتها في التعامل مع الناس. وبصوتها النادر وثقافتها الموسيقية الواسعة قدرت تغني جميع الأشكال الموسيقية ببراعة من مهرجان الموسيقى الروحية في الهند لأغاني الأمازيج في المغرب وللغناء على الربابة مع الغجر في صعيد مصر. برنامج جميل وفريد من نوعه. كأنه ركن هادي بعيد عن كل الهيصة اللي حوالينا.

...

بنت مولانا: عدوى جلال الدين الرومي تجتاح العالم
اصدرت في: 28/11/2016

"مَهمّتها في هذا العالم انتهت، وعلى المثيل، فإن تغير مولانا أيضًا قد حدث، لكن مهمته كانت بداية. وكي تتم مهمته كان على شمس الدين أن يرحل فبقاؤه كان يُعيق مولانا. وفي الحالتين انتهى عمل شمس الدين، ومصيره فاض إلى مجراه." مولانا جلال الدين الرومي، غزالة قادرة تجري في التاريخ علشان تنسج معلقات من حب وورد وياسمين على روحه المعجزة، كأنه حدائق بابل المعلقة، أو كهرم في المعرفة والقوافي والتصوف، ناس كتير استفادت منه، وناس كتير اشتغلت على حياته، وعلى قصصه، قامت عليه رسائل دكتوراه، وليه مريدين في كل مكان وزمان، فلا وقت للحديث عن كتابات مولانا، الحديث النهارده عن كتاب حوالين بنت مولانا. المفتاح والأجراس وحدوة الفرس والبحر وغرف بيت مولانا وقصاصة الورق من كتاب قرآن، والحضرة والحب والروح، حدائق من عشق هتعيشها في رواية "مورل مغروي" اللي قررت تكتب عن قصة حياة مولانا، بشكل جديد، ومن وجهة نظر مختلفة، تكتب عن حياته من خلال "كيميا". فتاة صغيرة موهوبة بهبات غريبة، تشوفها موسيقى ماشية على رجلين، وآية في الجمال، لكن كأنها بتكلم اشباح طول الوقت ومصابة بإنها بتعرف طاقات الكون و"بتشوف" وده خلى كل الناس تبعد عنها وتخاف منها، قرر أبوها يوديها للعالم والصوفي المعروف "جلال الدين الرومي" اللي اهتم بيها وعلمها، ولما ظهر شمس تبريزي في حياة مولانا، تعلق بكيميا، واتجوزها، وببساطة ماتت من كتر الحب، ماقدرتش تستحمل، كمية الحب دي فماتت، قد إيه القصة عظيمة. الرواية بتتكلم عن كيميا وحياتها، واللي بتتقاطع مع حياة مولانا ومع حياة شمس تبريزي، وقد إيه بتشوف لغة جميلة وكلها صور مختلفة، وكادرات متتابعة ورا بعض في تناسق، بتحكي لك المشاهد كأنك شايفها، وبتخليك تفكر، يا ترى لما شمس تبريزي ساب مولانا ومشي، هل كان وفاة كيميا سبب فيه. رواية دي بتثبت حاجة مهمة، إن الإبداع مالهوش وطن، لأن رغم أن المؤلفة مورل مفروي اتولدت وعاشت في مجتمع مختلف عن المجتمعات الإسلامية من حيث الثقافة والعادات والاهتمامات، لكن رغم كده اتأثرت بالرومي وبعالمه السحري، وقدرت تعبر عن المعاني الصوفية اللي نشرها للعالم كله بحرفية عالية. بعد أسبوع من وفاة (كيميا)، اختفى شمس الدين من حياة مولانا، اللي قعد يكتب فيه شعر ويحزن، ويبكي، ويتعلم من كل حاجة سابها، حتى من رحيله، رحيل شمس تبريزي هو الل يخلى مولانا يبقى مولانا، زى ما رحيل كيميا عنهم كان علامة بانتهاء العلاقة بين شمس ومولانا، الرواية حلوة وشيقة اقروها، وهناك شيء أكيد: أنه ذات ليلة باردة من ديسمبر عام 1248 في قونية، اختفى شمس الدين فلم يُرَّ ثانية.

...

رواية كتاب الشمس: حكايات رعب من شمس المعارف
اصدرت في: 24/11/2016

بيقول محمود علام مؤلف الكتاب: " أعرف أن الأمر أقوى منكم .. هذا طبيعي ومفهوم .. في داخل كل إنسان فضول قط كبير يرغب في عبور الشارع.. بعضهم ينجح في العبور فعلًا، والبعض الأخر تدهسه السيارة.. فأيهم أنتم ؟؟ فقط تذكروا.. المعرفة المحرمة لا تقود إلى التنوير ، ولا تؤدي لشيء إلا لفتح باب إلى الجحيم". لكن يا ترى إيه الجحيم اللي بيتكلم عنه، قبل ما تعرفوا أي حاجة عن الكتاب، لازم تعرفوا عن الكتاب.. مش لغز ولا حاجة، خليني أقول لكم، قبل ما تعرفوا حاجة عن الرواية اللي بتحكي رعب، لازم تعرفوا إيه حكاية الكتاب الأصلي اللي بيتكلم عنه علام، وهو كتاب شمس المعارف الكبرى، واحد من أشهر كتب السحر. بتقول الأسطورة إن فيه واحد باع النسخة الأصلية لكتاب شمس المعارف زماااان بآلاف الجنيهات، وده كله بس علشان اللي اشتراه كان عايز يفهم التعاويذ اللي فيه، وفيه اللي بيقول أن أي حد بيجيب الكتاب ويقرأ فيه وهو مش فاهم يعني إيه تعاويذ وسحر، هيطلع له مش عفريت، لا أنسى، قبائل من العفاريت والجن، وينططوه، وفيهم اللي قراه ومات، أو تعب أو أو، حكايات كتير عن كتاب شمس المعارف ده، مافيش فيها حد يقدر يقول إيه الحقيقي أو إيه الأسطورة، لكن في النهاية فيه ظاهرة في السحر اسمها كتاب شمس المعارف، نفس الظاهرة دي هي الصدفة اللي خلت محمود علام يكتب كتابه ده، بعد ما كتب مقالة عن شمس المعارف، واقترح عليه واحد من أصحابه أنه يحول المقالة والفكرة لرواية. الكتاب أخد نفس فكرة الأفكار اللي فوق، ولعب عليها وقدر أنه يلعبها بشكل حلو، نقدر نقول عليها الكتابة الخضرا، اللي لسه طازة يعني، زي ما بيقول درويش أحبك خضراء، علام مش مجرد بذرة كاتب شاطر، لا هو كاتب فاهم بيعمل إيه، وقدر يمسك كنز اسمه "شمس المعارف" ويلعب عليه بالراحة، بمجموعة صور هايلة وقفلات رعب بجد، لو اتحولت لفيلم أنتجه وأخرجه محترفين، هيبقى فيلم رعب بجد، علشان هو بيوهمك فعلًا إنها قصة حقيقية حصلت لشخص اسمه جمال فرج عبد الناصر، هو البطل اللي قرر يجرب هل فعلًا التعاويذ اللي في شمس المعارف شغالة ولا لأ. بلغة سهلة ومتماسكة، وجمل مكتوبة بحرفية، وقدرة على دخول الرعب في الوقت المناسب بالضبط، زي أى واحد فينا بيحب يعذب نفسه، ويتفرج على أفلام الرعب، قدر علام يكتشف فكرة الألم النفسي ده ويكتب رواية رعب بجدارة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن