موضوعات خاصة عن القاهرة - خروجات، سهرات، أحداث ثقافية وتسوق

مواضيع خاصة

آخر الموضوعات

5 حاجات تخليك لازم تحب #القاهرة!
اصدرت في: 01/12/2016

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة حكومية. كلها حاجات أساسية بتيجي في دماغك بمجرد ما تسمع كلمة "القاهرة". إحنا ماننكرش ده، لكن خلينا نعترف إن القاهرة فيها حاجات مش موجودة في بلد تانية في العالم مش بس مصر. حاجات تخليك غصب عنك تحبها وترتبط بيها. خلينا ناخد فكرة سريعة كده عن الحاجات دي: وسط البلد ماينفعش تبقا من سكان القاهرة وماعدتش على وسط البلد. المكان اللي هتقابل فيه كل أنواع الناس، باختلاف ثقافاتها وخلفياتها. أو أكبر تجمع للقهاوي ممكن تقعد عليها مع أصحابك تدردشوا مع شيشة وكوباية شاي. ده غير السينمات والمولات. وكمان محلات الأكل الكتير. باختصار كده، مفيش حاجة ماتتعملش في وسط البلد. السينمات البديلة السينمات هنا مش مقصود بيها السينمات العادية، إطلاقًا. مقصود بيها دور العرض والمراكز اللي بتعرض أفلام المهرجانات، أو الأفلام العادية. بس بأسعار رمزية جدًا أو حتى ببلاش. زي زاوية أو سينما دال أو درب 1718، وغيرها من الأماكن اللي مش ممكن تلاقيها في أي بلد تانية. الأنشطة والهوايات لو انت موهوب، بتحب ترسم أو تلعب مزيكا أو بتحب التصوير أو أي نوع نشاط انت بتفضله. لو عايز تاخد كورس في مجال معين لشغلك أو لدراستك. القاهرة مليانة أماكن و work spaces بتوفر ورش عمل وكورسات كتير في المجالات دي كلها. وكمان بأسعار على قد الإيد. زي شفشاون ومساحة وملاذ وغيرهم كتير. وهتلاقيهم بسهولة من غير تعب. الرحلات كلنا بنحب الرحلات. سواء رحلات مصايف أو الرحلات اللي بنطلع فيها نزور أماكن أثرية، أو نسكتشف جوانب مختلفة من الطبيعة، أو حتى نطلع نقضي day use في أي مكان نغير بيه المود. في القاهرة هتلاقي أكتر من مكان بينظم الرحلات دي لكل مكان في مصر طول السنة. تقدر تعرف كل المعلومات من خلال صفحات وجروبس كتير على فيسبوك. المراكز الثقافية في القاهرة بس هتلاقي أماكن ومراكز الثقافية كتير تقدر تحضر فيها حفلات التراث الشعبي والفلكلور والفنون الصوفية. وتتعرف على ألوان كتير مختلفة من الفنون، وفرق من كل أنحاء مصر. تقدر تحضر الحفلات دي في أماكن زي الربع أو مكان أو مسرح الضمة. وكمان هتلاقي الصالونات الثقافية اللي فيها بيتم مناقشة أنواع مختلفة من الكتب والروايات والقصص. الظاهر كده إن دايمًا في حاجة بتخليك تحب القاهرة ونيلها وطول ليلها ومواويلها، حبها واتبسط على قد ما تقدر بقى.

...

دليلك لويك إند سعيد: استمتع ببرد الشتاء
اصدرت في: 01/12/2016

برد برد عم بتشتي الدنيا، المطرة والبرد مش مبرر أنهم يمنعوا الناس تخرج وتتفسح في الويك إند ده، لكن كمان الخروجة بيكون لها متعة خاصة، متعة شرب كوباية شوكولاتة سخنة في البرد، أو نسكافيه تضبط بيه مودك. والمشي تحت المطر مع صوت فيروز. نبدأ بالنهارده الخميس، ومركز المصطبة للموسيقى والفنون التراثية واللي بيستضيف مسرح الضمة بوسط البلد عامل حفل لفرقة الطنبورة البورسعيدية، وسعر التذكرة 30 جنيه. كمان في علبة ألوان بالزمالك فيه حفل للإنشاد الصوفي والموسيقى الروحية تقدمه فرقة "برهان" للإنشاد الصوفي ومديح الحضرات، وسعر تذكرة الحضور 50 جنيه. شاملة المشروب. أما في روم آرت سبيس بجاردن سيتي ففيه حفل موسيقي للفنان شادي القصير وفرقته، اللي بيقدموا موسيقى الجاز، وسعر تذكرة الحضور 50 جنيه. كمان في سينما زاوية في وسط البلد فيه عرض للفيلم الوثائقي "20 سبتمبر" المعروف باسم "هدية من الماضي" للمخرجة الشابة كوثر يونس، وسعر تذكرة الحضور 35 جنيه. وننتقل ليوم الجمعة، هتلاقوا في مسرح الهوسابير آخر أيام العرض المسرحي "البروفة" واللي هيقدمه فريق العرض المسرحي الشبابي الشهير "1980 وأنت طالع"، وسعر التذكرة 25 جنيه. كمان لمحبي الأوبرا هتلاقوا على المسرح الكبير بدار الأوبرا المصرية عرض موسيقي بعنوان "أوبرا الحفل التنكري"، وأسعار التذاكر تبدأ من 35 لغير الطلبة و 25 للطلبة. أما لعشاق الجري فمجموعة الجري الجماعي الأشهر في القاهرة "Cairo Runners" عاملة يوم للجري الجماعي في وسط البلد، ونقطة التجمع أمام قصر عابدين، المشاركة مفتوحة للجميع. ونختم بيوم السبت، وعلى مسرح قاعة النهر بساقية الصاوي فيه حفل لفرقة "وسط البلد"، وسعر تذكرة الحضور 60 جنيه. كمان على مركز المصطبة للفنون الفلكلورية والشعبية هيستضيف مسرح الضمة بوسط البلد حفل لأسياد الزار، والزار هو فن غنائي شعبي قديم تحتل المرأة فيه دور بارز في الغناء والعرض، وسعر تذكرة الحضور 30 جنيه. ولمحبي الفلكلور الشعبي هتلاقوا في مركز إبداع وكالة الغوري، حفل تنورة، وأسعار التذكرة 5 جنيه للمصريين. لو عاوزين تعرفوا أكثر عن الأحداث اللي بننشرها كل يوم على مدار الشهر، تابعوا أجندتنا. ويك إند سعيد!

...

5 أفلام الأب فيهم Super Hero لازم تشوفهم
اصدرت في: 01/12/2016

كلنا بنحب الأفلام الأجنبية، بنحب القصص بتاعها المختلفة وأنواعها الكتير. وأفلام الأكشن والإثارة ليها معزة خاصة عند كتير من الناس، وخصوصا الأفلام اللي بيكون فيها أب بيحاول يحمي عائلته وبيعمل المستحيل علشان ينقذهم من أي خطر. طبعا في أفلام كتير أوي اتعملت في السكة دي، بس إحنا في كايرو 360 قولنا نجيب لكم أجمد 5 أفلام منهم، وده من وجهة نظرنا المتواضعة طبعًا. تعالوا نشوف مع بعض: Taken-2008 طبعًا أول فيلم لازم ييجي على بالنا هو "Taken". براين ميلز "ليام نيسن" عميل السي أي إيه المتقاعد، بيسافر من بلد لبلد ويطارد مجرمين وتجار مخدرات عشان يرجع بنته اللي اتخطفت في رحلة لباريس مع صحبتها. "نيسن" عمل من الفيلم جزء تاني في 2012، وتالت في 2014. Blood Father-2016 لينك "ميل جيبسون" مجرم سابق بيحاول يعيش حياة طبيعية بعيد عن عالم الإجرام. لكنه بيضطر يرجع لأيام الشقاوة من تاني لما بنته بتلجأ له عشان يحميها من عصابة مخدرات بيحاولوا يقتلوها. "جيبسون" عمل حاجة شبه كده برضو في "Edge of Darkness" 2010. Live Free or Die Hard-2007 الشرطي جون ماكلين "بروس ويليس" بيحاول ينقذ واشنطن من أحد أخطر الإرهابيين الإلكترونيين توماس جابريل "تيموثي أوليفانت". واللي بيخطف بنته كوسيلة للضغط عليه علشان ينفذ أوامره. Snitch-2013 بعد ما ابنه بيتورط في صفقة مخدرات ويتحبس. بيضطر جون ماثيوز "دواين جونسون" أو ذا روك، أنه يشتغل بشكل سري مع إدارة مكافحة المخدرات. علشان يقدر يمسك اللي قاموا بالصفقة ويخرج ابنه. Homefront-2013 فيل بروكر "جيسون ستيثام" عميل سابق في مكافحة المخدرات، بيقرر يعيش هو وبنته في بيت هادي على بحيرة بعيد عن المشاكل. لكن بيظهر تاجر المخدرات مارجون "جيمس فرانكو"، اللي بيعرض حياتهم للخطر. فيضطر "ستيثام" يلجأ لأساليبه القديمة علشان ينقذ بنته. دي كانت اختيارتنا في كايرو 360، يا رب تعجبكم. ماتنسوش تتفرجوا عليها وتقولوا لنا رأيكم فيها.

...

النهارده في القاهرة: أغاني وأفلام وتنورة وزار.. وأنت عليك تختار
اصدرت في: 30/11/2016

اليوم بادئ بشكل لطيف الحمد لله، وخلاص داخلين على الويك إند والأجازة والذي منه. والظاهر كده الحفلات والإيفينتات بتكتر على السيرة دي. يبقى على طول تعالوا نشوف أجندتنا النهارده فيها إيه. نبدأ كده بداية مزاج مع حفلة تنورة لفرقة التنورة التراثية في وكالة الغوري. الفرقة بتقدم رقص التنورة المستوحى من التراث الصوفي. الحفلة هتبدأ الساعة 7 مساء، وسعر التذكرة 5 جنيه. نكمل برضه في نفس المود مع "عرض زار بتقدمه فرقة مزاهر" في مكان. العرض بيبرز دور المرأة في الأداء والغناء في الشكل التراثي. العرض هبيبدأ الساعة 8 مساء، وسعر التذكرة 30 جنيه. ننقل بقى لجو الحفلات والأغاني ونبدأ مع "حفلة الفنان علي الحجار" على مسرح النهر في ساقية الصاوي. الحفلة هتبدأ الساعة 9 مساءً. أقل سعر للتذكرة 55 جنيه للأعضاء، 60 جنيه لغير الأعضاء. ومن ضمن فعاليات مهرجان "مزيكا في السطح" هنلاقي درب 1718 مجهز لنا حفلة لفرقة الراب "واي كرو". الحفلة هتبدأ الساعة 8 مساءً، وسعر التذكرة 50 جنيه. طبعًا عشاق الأفلام لهم برضه نصيب النهارده. سينما زاوية هتعرض الفيلم الوثائقي "20 سبتمبر". العرض هيبدأ الساعة 7 مساء، وهيكون كل يوم حتى 6 ديسمبر. سعر التذكرة 35 جنيه. وكمان سينما دال بجاردن سيتي هتعرض فيلم "A Clockwork Orange" الساعة 7:30 مساءً. الفيلم للكبار فقط والدعوة عامة. يومكم جميل.

...

قواعد الفرجة على أفلام الرعب في سينمات القاهرة
اصدرت في: 30/11/2016

الموضوع ده إهداء بشكل عام لمحبي الفرجة على أفلام الرعب في السينمات فى مصر، وبشكل خاص لمجموعة من المشاهدين حابين نتكلم عنهم بتفصيل أكتر، الناس اللي بيحصل لهم اختفاء قسري في الإستراحة ومش بنشوفهم تاني في قاعة العرض، تقريبًا بيهربوا من تكملة فيلم الرعب وأعصابهم مش بتستحمل، والمقال ده إهداء للبنت اللي كانت قاعدة جنب محرر كايرو 360 وهو بيتفرج على فيلم رعب، واللي أعطت ضهرها للشاشة وقعدت على ركبها على الأرض ودفنت وشها في الكرسي علشان ما تشوفش الأحداث! من الأخر الموضوع ده إهداء للناس اللي بيتحول عندها مشاهدة فيلم الرعب من تسلية لعذاب حقيقي، هنقول لكم إزاي تستمتعوا بلذة الرعب وتنسوا أعراضه الجانبية. بلاش تاخدوا أطفال الفيلم نناشدكم بأسمى معاني الرحمة أنكم ما تاخدوش أطفال معاكم في أفلام الرعب، علشان هيقضوا الحفلة كلها عياط وهيبوظوا علينا الفيلم، بالإضافة إلى أنهم ممكن يبوظوا مرتبة السرير بالليل لما تهاجمهم كوابيس الأفلام اللي دخلوها معاكم. بعض الأطفال لازم يتم إستثناءها من القاعدة دي، ومنهم الطفل اللي راقبه محرر كايرو 360 بيضحك بشغف أثناء فيلم The Cabin in the Woods واللي جعل محررنا خايف من الطفل أكتر من خوفه من الفيلم! امنعوا الفشار لو مش حامل وبتتوحمي على الفيشار وخايفة البيبي يطلع له (فشارة) في وشه، ولو ماعندكيش الحالة دي يبقى من المستحسن حضرتك بلاش تاخدي فشار معاكي أثناء مشاهدة فيلم رعب، علشان مع كل مشهد مرعب في الفيلم حضرتك هتمارسي هوايتك المفضلة في النط من على الكرسي، والفشار هيغرق الناس اللي قدامك ووراكي.. كمان يستحسن تربطي نفسك في الكرسي علشان ساعات النطة اللي بتعمليها بتكون مرعبة للناس اللي في السينما أكتر من المشهد نفسه! اثبت مكانك لو مافيش حالة طارئة جدًا تستدعي أنك تقوم من مكانك وتغادر القاعة، ولو مافيش حريقة في البيت أو أسهمك في البورصة ما نزلتش بنسبة 90%.. لو سمحت بلاش تقوم من مكانك أثناء مشاهدة فيلم رعب، علشان أكتر حاجة مرعبة لواحد أعصابه كلها مشدودة مع الأحداث هي أنك تحتك بيه وأنت قايم من مكانك، حالات الهلع اللي شوفناها نتيجة المواقف دي كانت مرعبة أكتر من فيلم الرعب نفسه، ومحرجة لأبطالها جدًا. الحبيبة يمتنعون زي ما اتكلمنا عن الأطفال نحب نتكلم عن الناس المقبلة على حياة عاطفية سعيدة، وفاكرين أن تجربة مشاهدة فيلم رعب مع بعض ممكن تزود من قُربهم من بعض في العلاقة، أبسليوتلي، كل اللي هيحصل أنكم ممكن تشوفوا ردود أفعال ما كنتوش تتوقعوها من بعض، زي أن حبيبتك تشوفك وأنت بتصرخ بشكل لا إرادي مثلًا، أو أنك تبقى قاعد في أمان الله تلاقي إيد حبيبتك نزلت على وشك بالتزامن مع مشهد رعب، ما نعتقدش أن الحركة الأخيرة دي ممكن تبقى لا إرادية هي كمان.. شوف بس أنت زعلتها في إيه قبل الفيلم! بلاش تعيش الفيلم أخر نصايحنا ليكم.. بلاش تعيشوا جو الأحداث بعد ما يخلص الفيلم، بلاش تخلوا اللي شوفتوه في الفيلم يأثر على سلوككم في الشغل أو البيت، وبلاش تفكروا كتير في أحداث أفلام الرعب اللي شوفتوها، علشان ده ممكن يأثر على قدرتكم على التخيل، ويخليكم تشوفوا أو تسمعوا حاجات مش بتحصل، افتكروا دايمًا أنكم بتتفرجوا على فيلم عادي زي أي فيلم تاني، وافتكروا أن الـ.... معلش إحنا مضطرين نقفل المقال على كده علشان سامعين صوت فى الـ Meetings Room رغم أن مافيش حد هناك!

...

اتخلص من كرشك في أسبوع واحد بس
اصدرت في: 30/11/2016

مشكلة كل المصريين. الظاهرة اللي حيرت أجيال وأجيال. المصيبة اللي كل واحد أو واحدة بتحاول تداريها عن المجتمع. إنه الكرش يا سادة. طبعًا أي حد عنده كرش بيحاول باستماتة إنه يتخلص منه، وفي نفس الوقت مش قادر يمنع نفسه عن الأكل. إحنا في كايرو 360 هنقول لك على شوية نصايح تتخلص بيهم من كرشك في أسبوع. بس في الأول تعالى نعرف إيه الأسباب اللي بتخلي الكرش يظهر. عادات بتخلي الكرش يظهر: كمية الأكل: لما بتاكل كمية كبيرة من الأكل، ده بيخلي السعرات الحرارية أكتر من احتياج الجسم. فبالتالي بيخزنها وبتظهر في مناطق زي البطن. سوء التغذية: بعض أنواع الوجبات بتكون مضرة جدًا، زي الوجبات السريعة أو المشروبات الغازية. دي كلها حاجات عالية في السكريات والدهون وفوائدها قليلة جدًا. وكمان زيادة أكل الأرز والعيش والحلويات بدل الخضار والفاكهة. قلة النشاط: طبيعة حياتنا العصرية خلت النشاط تقريبا منعدم. بسبب الشغل اللي أغلبه بيتم من خلال القعدة في المكتب. وحتى الألعاب اتحولت من ممارسة الرياضة زي كرة القدم أو السلة، للألعاب الإلكترونية ومتابعة السوشيال ميديا. نيجي بقى للجزء التاني، وهو إزاي نتخلص من الكرش: ممارسة التمارين: التمارين بكل أنواعها مهمة جدًا للكرش. ومن أهمها تمارين الأيروبيك. والتمارين دي مثبت علميًا أن ممارسة الدرجات متوسطة الشدة والشديدة منها فعالة جدًا في التخلص من الكرش. وبتساعد كمان في تقليل الدهون الداخلية، اللي بتتجمع على الأعضاء المهمة حول البطن. وكمان بجانب الأيروبيك ممكن نهتم برياضات تانية زي المشي، الركض، الهرولة، الدراجة الثابتة. حمية غذائية: دي طبعًا مش محتاجين نتكلم فيها كتير. لأنها بتعتمد على دكتور تغذية بيحدد لكل واحد الحمية الغذائية السليمة اللي تناسبه. وبيتابع معاه باستمرار. العلاج السلوكي: وده بيتم فيه إدخال تغييرات تدريجية على نمط حياة الفرد، عن طريق: وضع خطة تدريجية تناسب قدرة الشخص على التغيير. تدوين ملاحظات عن عادات الأكل والأنشطة علشان يقدر يحدد المشاكل فيها. بعد تحديد المشكلة يبدأ يختار الحلول المناسبة لها. في حالة الفشل في حل مشكلة، يبدأ يستعرض الحلول البديلة. بس كده، بالكام سطر اللي فوق دول قولنا لكم على أهم أسباب ظهور الكرش وطرق علاجه. تقدروا بقى من خلالهم وبمتابعة الدكتور تهزموا الكابوس اللي منغص عليكم حياتكم. وترجعوا للفرفشة من تاني. المراجع: أخصائية التغذية: نور حمدان. موقع "موضوع". مقال: Ohkawarna K. et al. كتاب: "Essentials of Nutritions" للكُتاب Schlenker and Long S.

...

ميني إيجيبت بارك: من القاهرة لأسوان في خطوتين بس
اصدرت في: 29/11/2016

مين فينا مافكرش قبل كده يزور المعالم السياحية في مصر كلها؟ بس نجيب منين الوقت والفلوس لكل ده؟ إحنا بقى في كايرو 360 قررنا نجيب لك المعالم كلها لحد عندك. ونخليك تروح من القاهرة لأسوان في خطوتين. وكل ده في مكان واحد بس، "Mini Egypt Park" في الغردقة. كايرو 360 تواصلت مع أ/ سمير زكي، المدير الإداري لميني إيجيبت بارك في الغردقة، وعرفنا منه شوية تفاصيل عن البارك والخدمات اللي بتقدمها. فكرة البارك قايمة على تنشيط السياحة عن طريق عرض المعالم السياحية المصرية، من خلال مجسمات أو ماكيتات منفذة بشكل رائع جدًا وجذاب. وصاحب الفكرة دي هو المهندس/ وائل زكريا، اللي شافها في أكتر من بلد في العالم وقرر أنه يطبقها في مصر، بأفضل شكل ممكن. البارك عمرها تقريبًا سنة و3 شهور. بتتكون من حوالي 55 ماكيت للمعالم السياحية المصرية القديمة والحديثة، يعني هتلاقوا فيها جزء لمصر القديمة زي المساجد والكنائس والمعابد. أو المعالم الفرعونية غير المعروفة زي معبد إدفو وكوم أمبو والرمسيون. وكمان معالم مصر الحديثة زي مجمع التحرير ومكتبة الإسكندرية. وغيرها من المنشآت القبطية والإسلامية المختلفة. الجولات البارك بتكون on foot. وفي كمان شوية مراكب صغيرة كده، كنوع من إضافة المرح على الجولة. لكن مش جزء أساسي منها. الجميل بقى في الجولة، إن كل معلم من المعالم عليه الشرح التعريفي الخاص به بأربع لغات: عربي – إنجليزي – ألماني – روسي. يعني هتفهم هتفهم. وأكيد طبعًا تقدر تتصور انت وأصحابك أو أسرتك مع المعالم دي زي ما انت عايز. مانقدرش ننسى المسطحات المائية في البارك، واللي معمولة على مساحة 3500 متر مربع. وعمقها 1 متر بس علشان احتياطات السلامة. مش كده بس، دي البارك كمان مجهزة للأشخاص ذوى الاحتياجات الخاصة. علشان هم كمان يقدروا يستمتعوا بكل شبر في المكان. وطبعا هتلاقي هناك مطاعم وكافيهات تقدر تاكل فيها وتستمتع بعروض التنورة والتخت الشرقي اللي بتتقدم في المكان. نيجي بقى للنقطة الفارقة في الموضوع، وهي الفلوس. ماتقلقش، المدير الإداري للبارك أكد لكايرو 360 إن الأسعار رمزية ومناسبة جدًا للمصريين، وبتمثل تقريبًا 20% من الأسعار المخصصة للسياح. وهيبقى في كمان تسعيرة ثابتة ومعلنة مع الافتتاح الرسمي للبارك يوم 25 يناير الجي مع المحافظ. ميني إيجيبت بارك فكرة هايلة جدًا، ومكان ممتع لأقصى درجة. تجربة لازم تمروا بيها وماتنسوش تتبسطوا وتتصوروا كتير. وممكن تتابعوا صفحتهم من هنا.

...

النهارده في القاهرة: حفل نوبي وموسيقى روحية وعرض في الأوبرا
اصدرت في: 29/11/2016

يا صباح الخير ياللي معانا.. نوفمبر بيودعنا وداع لطيف، وبيسلم الراية لديسمبر مع وصية ليه علينا بصحبة سعيدة ومرور خفيف. النهارده القاهرة فعالياتها مش كتير كعادتها معانا لكن البركة في الموجود. البداية هتكون من المركز المصري للثقافة والفنون "مكان" في وسط البلد، اللي هيستضيف حفل نوبي مميز مع فرقة "أراجيد" للفن النوبي، الحفل هيتشارك فيه الفنان النوبي فرح المصري والفنان مصطفى هيركي في تقديم تراث الغناء والاستعراض النوبي المحبب لنفوسنا، بداية الحفل في تمام الثامنة مساءً وموعد سقوط الحجز 7:30 مساءً، وسعر تذكرة الحضور 30 جنيه. ومن مدار في المعادي هنكون على معاد مع حفل رباعي إسلام الشعري، الحفل هيكون عبارة عن تقديم لموسيقى روحية ارتجالية، هيشارك فيه كل من إسلام الشعري ونانسي منير وأوسو لطفي وميزو جمال، سعر تذكرة حضوره 60 جنيه، والبداية في الثامنة مساءً. ونختم مع جوهرة اليوم، من دار الأوبرا المصرية اللي هيستضيف المسرح الكبير فيها أول أيام عرض "أوبرا الحفل التنكري" اللي هيستمر لحد يوم الجمعة 2 ديسمبر، العرض بيتم بمشاركة فرقة أوبرا القاهرة وأوركسترا أوبرا القاهرة وباليه أوبرا القاهرة وكورال أوبرا القاهرة، أسعار تذاكر حضوره بتبدأ من 25 جنيه للطلبة، و 35 جنيه لغير الطلبة، وبدايته في تمام الثامنة مساءً. يومكم سعيد.

...

النهارده في القاهرة: تشكيلة مزيكا ومسرح على رشة ثقافة وفن
اصدرت في: 28/11/2016

تاني يوم في الأسبوع يعني لسه في بدايته، وحلم أجازة الويك إند لسه بعيد شوية. يبقى أكيد هنلجأ للحل السحري لكل مشاكل وضغوطات الأسبوع، وهو أجندة حفلاتنا في كايرو 360، اللي دايمًا هدفها تبسطكم. تعالوا نشوف مجهزة لنا إيه: نصيب الأسد النهار ده هيكون لدار الأوبرا المصرية. اللي بتسضيف حفل موسيقي لرباعي الأوبرا الوتري على المسرح الصغير. الحفل هيبدأ الساعة 8 مساء. وسعر التذكرة: 25 – 35 جنيه للفرد. وفي نفس الوقت هيكون في حفل لفرقة الإيقاعات الشرقية، بقيادة الفنان سعيد الأرتيست، على المسرح المكشوف. سعر التذكرة: 25 جنيه للفرد. لو بتحب المسرح يبقى خد بعضك وطير على ساقية الصاوي، علشان قاعة الحكمة هتستضيف العرض المسرحي "قصة حياة طفل اسمه أوسكار". العرض هيكون الساعة 6 مساء. وسعر التذكرة: 15 للأعضاء، و20 جنيه لغير الأعضاء. نروح بقى لوكالة الغوري نلاقيها مجهزة لنا حفل تنورة لفرقة التنورة التراثية. اللي بتقدم رقص مستوحى من التراث الصوفي. الحفل هيبدأ الساعة 7 مساء. وسعرة التذكرة: 5 جنيه. التاريخ والأدب والثقافة من المجالات اللي لها جمهور كبير، وعلشان كده الصالون الثقافي في نقابة الأطباء "دار الحكمة" هيستضيف معرض لمجموعة من المجلدات الأدبية بعنوان "تاريخ مصر". وهيعرض كمان مجموعة من الأفلام الوثائقية القصيرة. والمعرض مستمر لحد 30 نوفمبر الجاري. يومكم سعيد يا قاهراوية.

...

النهارده في القاهرة: حفل المولوية وعرض مسرح وسينما وجولة سياحية
اصدرت في: 27/11/2016

بداية آخر أسبوع في الشهر والأمل بيتجدد في أوقات خفيفة وسعيدة تزق الدنيا معانا لحد آخر أيام الشهر، والأنظار كالعادة متجهة لأجندتنا وفعالياتها، يللا بينا نشوف. اللون الصوفي المحبب لنفوسنا فارض نفسه على ساحة الفعاليات الفنية النهارده بالحفل اللي هتستضيفه ساقية الصاوي لفرقة المولوية المصرية بقيادة المنشد المعروف عامر التوني، الحفل هيبدأ على مسرح قاعة النهر في تمام الساعة السابعة مساءً وسعر تذكرة حضوره 35 جنيه. ومن مركز الربع الثقافي في شارع المعز هنكون على معاد مع عرض مسرحي بعنوان "حب"، العرض كان تم تقديمه قبل كده في مهرجان كيميت للعروض المسرحية القصيرة، ودي المرة التانية لتقديمه، سعر تذكرة حضوره 10 جنيهات فقط، وهيبدأ في تمام الساعة 6:30 وآخر معاد لحجز التذاكر 6:00 مساءً. في حين هيستضيف درب 17 18 بمنطقة مجمع الأديان بمصر القديمة –بتنظيم سينما الفرن- عرض للفيلم الإسباني También la lluvia""، العرض هيبدأ في تمام السابعة مساءً والدعوة عامة. ونختم فعالياتنا مع جول سياحية ليلية داخل المتحف المصري من تنظيم مبادرة "ميراث"، الجولة هتضم شرح وتعريف كل المعروضات في المتحف، وهتبدأ في تمام الخامسة والنصف مساءً، والجولة مجانية لكنها غير شاملة تذاكر دخول المتحف. أسبوعكم سعيد.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول