رحنا وشفنا في القاهرة – مطاعم، كافيهات، سهرات، محلات، كتب وأفلام

مقالات

أحدث المقالات

تافولينو: طعم أصلي وأطباق مبتكرة في مطعم إيطالي فخم
اصدرت في: 07/12/2016

إحنا عارفين إن مافيش أكتر من المطاعم الإيطالي في كايرو، بس برضه معظمنا متفقين إن قليل منهم اللي بيعرف يعمل الصح. تافولينو من أحسن المطاعم اللي بتعمل أكل إيطالي بجد. لو بصيت على المطعم الموجود في شارع متفرع من أبو الفدا في الزمالك هتفتكره صغير، لكن الموضوع من جوه حاجة تانية. المطعم مميز بديكورات بسيطة بحوائط من الحجر الأبيض مع لمسات من الخشب وبراويز أبيض وأسود ومرايات مثلثة، ويمكن السلبية الوحيدة كانت الإضاءة الصفراء. ننسى الديكورات شوية ونروح للأكل، والبداية مع كانيلوني (70 جنيه) من "المنيو الإيطالي الجديدة"، والمنيو دي ميزتها أنهم مدخلين فيها أفكار جديدة على الأكل الإيطالي التقليدي. ست قطع كانيلوني مستويين كويس جدًا وعليهم صلصة طماطم – طعمها قريب من صوص المارينارا –وصوص بيستو. شوية صوص الجورجونزولا عملوا طعم مميز، وبصراحة الطبق ده أثبت إن تافولينو هو أحسن واحد يوفق نكهات الأكل مع بعض ويعمل منهم أكلة لذيذة. من الحاجات اللي جربناها من "المنيو الإيطالي الجديدة" تندرولين على الحطب (235 جنيه)، وده بيكون ستيك تندرولين مستوي medium-well على معجنات محشية مشروم سوتيه وسبانخ وبصل، ومعاهم صوص ثوم حلو ومربى بلو بيري على بصل بطعمها الحلو والحادق المميز. بصراحة الطبق كان مبهر، مش بس علشان طعم الستيك الرائع الغني بالتوابل الإيطالية اللذيذة، العجينة المحشية مشروم كانت مقرمشة وطعم المربى الرائع مع صوص الثوم المسكر عملوا طبق خيالي. مع أخر طبق قررنا نرجع لقواعدنا سالمين ونطلب ريزوتو ألا بيسكاتورا (120 جنيه). الطبق كان غني بالكريمة والتتبيلة القوية مع جمبري وبلح بحر، وكان ممكن الطبق يكون مثالي لولا إن الكابوريا كانت مش ماسكة نفسها بزيادة والكاليماري صعب المضغ. من الحاجات اللي قللت من قوة تافولينو إن وقت زيارتنا طبق الحلو الوحيد الموجود كان آيس كريم أند سوربيت (50 جنيه) اللي بيتكون من 3 بولات آيس كريم من موفنبيك. كل اللي فات حاجات بسيطة مش هتقلل من جمال الأكلة الرائعة، وبصراحة تافولينو فاجئونا بطعم الأكل المختلف، خصوصًا الحاجات اللي جربناها من "المنيو الإيطالي الجديدة"، واللي ساعدتهم أنهم يتميزوا عن باقي المطاعم الموجودة على الساحة. تافولينو مش مطعم إيطالي عادي.

...

USS Indianapolis: Men of Courage: هل هيقدر ينافس على الأوسكار؟
اصدرت في: 06/12/2016

الأفلام السينمائية المقتبسة عن قصص حقيقية، واحدة من أشهر تيمات السينما، خاصة في موسم نهاية السنة علشان كل المنتجين بيبدأوا في طرح أفلامهم للحاق بمسابقة الأوسكار اللي بتقام في شهر فبراير من كل سنة... إيه العلاقة بين الأفلام المقتبسة عن قصص حقيقية وبين الأوسكار؟ العلاقة إن هوى لجان التحكيم المسئولة عن تحديد الفائز في الأوسكار بتتجه دايمًا لمنح الجائزة للأفلام المقتبسة عن قصص حقيقية. فيلم USS Indianapolis: Men of Courage من إخراج ماريو فان بيبلس، وتأليف كام كانون، وبطولة نيكولاس كيدج، جوني واكتور، إميلي تينانت، إيميلي ماري بالمر، كودي والكر، بالاشتراك مع مات لانتر. الفيلم بيحكي عن القصة الحقيقية للسفينة الأمريكية (إنديانابولس) واللي قدر لها القيام بعملية في غاية السرية في الحرب العالمية الثانية لها علاقة بإلقاء الولايات المتحدة بالقنابل الذرية على اليابان. لكن في رحلة العودة وبعد تنفيذها مهمتها بنجاح، بتتعرض السفينة الأمريكية الحربية لضربات من غواصة يابانية، وبيبدأ طاقم السفينة وقبطانها في مواجهة أسوأ أيام حياتهم في عرض البحر وسط هجمات القرش وتغافل الحكومة عن القيام بعملية إنقاذهم.. الأمر اللي أدى لخسارة عدد ضخم من الأرواح في أسوأ كارثة بحرية أمريكية في التاريخ الحديث. مش قادرين نصنف الفيلم في خانة الأفلام الحربية، بقدر ما بنصنفه في خانة الأفلام الإنسانية، لأن الفيلم بيتعرض للتجربة الإنسانية للبحارة اللي بتحاول تنجو من المأزق اللي أصبحوا فيه، لكن مشاهد مهمة السفينة وضربها مش بتحتل غير الربع الأول من الأحداث على أقصى تقدير. على الرغم من روعة القصة وكونها غنية بالأحداث والمشاعر الإنسانية، إلا أن الأداء التمثيلي سقط بيها في هوة عميقة من الأداء الباهت والضعيف.. حتى نيكولاس كيدج الحاصل على الأوسكار فيما مضى واللي بيعاني من عدم رواج أفلامه الحالية كنا بنراهن عليه أنه يقدر يخرج من الهوة اللي وقع فيها نفسه من فترة، لكن للأسف يضاف الفيلم لسلسلة الأفلام الضعيفة اللي قام بيها مؤخرًا. إيه اللي كشف ضعف الأداء التمثيلي؟ الضعف الشديد للمؤثرات الخاصة، وخاصة مشاهد غرق السفينة، ومشاهد هجوم أسماك القرش على البحارة.. كل المشاهد دي كان تنفيذها ضعيف ومفتقر للمصداقية وحصل فيها مونتاج مبالغ فيه، وكان ظاهر للمشاهدين في النهاية الضعف في تنفيذ المشاهد على الرغم من إن المؤثرات الخاصة فيما يتعلق بمشاهد هجمات القرش اتنفذت بحرفية في أفلام كتير جدًا قبل كدة، وبإمكانيات أقل بكتير. المميز في الفيلم كان الموسيقى التصويرية.. الموسيقى كانت قادرة تدرك الفرق بين الظهور في مقدمة الأحداث والتمهيد لها، وبين الظهور في الخلفية بصوت خافت علشان تعطينا الفرصة على التركيز في الأحداث على الشاشة.. الموسيقي كانت متميزة وحالمة، وجعلتنا نشعر بالخوف في مشاهد هجمات القرش اللي لو كانت اتنفذت أفضل من كده كان ممكن تقييمنا للفيلم يختلف. سيناريو الفيلم لم يعطي الفرصة الكافية لظهور التفاعلات الإنسانية في الربع الأخير من الأحداث، واللي تم التركيز فيه على مشاهد المحاكمة وما بعد الكارثة البحرية، ولو كان الخيط الرئيسي للأحداث ركز أكتر على المحاكمة ومرحلة ما بعد الحادثة كان السيناريو هيكون أقوى وأفضل. علشان تبقى عارف: الفيلم يعتبر ثاني تعاون بين النجمين (نيكولاس كيدج) و(توماس جاين) بعد تعاونهما الأول في فيلم (Face/Off).

...

تاريخ في الظل: تاريخ الناس الغلابة!
اصدرت في: 06/12/2016

الكاتب وليد فكري بيقدم لنا صفحات شبه مجهولة من تاريخنا بطريقة سهلة وممتعة، أقرب للحكايات بعيدًا عن الطريقة الجافة الموجهة للمتخصصين، واللي بتتعالى على القارئ. في مقدمة الجميلة بيقول وليد فكري إزاي اختار عنوان الكتاب. بيقول أن الناس بتتعامل مع التاريخ كرجل عجوز (راجل بركة) مابيعملش أي حاجة. راجل مريض مُقعد. قاعد على طول في الظل. ومن وقت للتاني أهله وجيرانه بيحكوا عن أمجاده وبطولاته القديمة من باب التسلية. الكتاب عبارة عن 7 فصول. وداخل كل فصل أكثر من مقال. ومن أجمل الحاجات في الكتاب هي كتابة المصادر في نهاية كل مقال. علشان اللي يحب يتأكد من الكلام أو اللي يحب يستفيد بقراءة المصادر نفسها. فصل (تاريخنا ماذا فعلوا به؟) بيعرض عن موضوع مهم جدًا، وهو إننا اتعودنا طول الوقت نعرف تاريخنا من المؤسسة الرسمية. لكن في الحقيقة في تاريخ تاني موازي للتاريخ الرسمي اسمه التاريخ الشعبي. هو التاريخ اللي بيتكلم عن الناس الغلابة مش عن الأبطال المنتصرين. وبيذكر الكاتب -ذكاء- رواية 1984 الشهيرة للكاتب الانجليزي جورج أورويل. فيها كان النظام بيتحكم في وقائع التاريخ والأحداث الحالية والأخبار اللي دايمًا بتقول أن كل شيء تمام والبلد بخير. وأن كل اللي بيحصل في البلد بسبب أعداء الوطن والعملاء! الكتاب مُصر على تنبيهنا إن قراءة التاريخ مش مجرد تسلية. لكن طريقة علشان نعرف موقعنا من العالم، سواء زمان أو دلوقتي. وعلشان نتعلم من أخطاء الغير. في فصل (العولمة) وهو من أجمل فصول الكتاب، وبيعرض لفكرة العولمة. الكلمة اللي ظهرت في نهاية التسعينيات وصدرتها أمريكا للعالم كله، بمعنى إن العالم يبقى قرية صغيرة. ومن خلال التاريخ هنعرف إن العولمة مش فكرة جديدة! لكنها فكرة قديمة جدًا. وأول من نادى بيها وطبقها فعلًا كان الإسكندر الأكبر! وعلشان كده بنى مدن كثيرة علشان يطبق فكرته عن العولمة على أرض الواقع. المدن اللي بناها الإسكندر وسماها على اسمه لسه موجودة لحد دلوقتي. تشهد على انه كان فاتح عظيم. وتشهد على نجاح فكرته. ومن أنجح النماذج على الفكرة مدينة الإسكندرية. والتاريخ أثبت صحة رؤية الإسكندر في اختيار موقع استراتيجي يربط بين الشرق والغرب. وده اللي حصل فعلًا بعد وفاة الإسكندر بقرون. ولحد دلوقتي العمارات القديمة دليل على العدد الكبير من الجاليات المختلفة اللي كانت عايشة في الإسكندرية لحد وقت قريب. والكاتب بيفكرنا أن الإسكندر متربي على إيد الفيلسوف العظيم أرسطو. لكن العولمة اللي صدرتها أمريكا للعالم كانت عولمة رعاة البقر! عولمة الهمجيين اللي بيتفاهموا بالبارود. واللي أبادوا الهنود الحمر (السكان الأصليين) واستوطنوا أرضهم. إنما عولمة الإسكندر كانت امتزاج ثقافي وحضاري. الفصل الأخير (إسلاموفوبيا) من أجمل وأهم فصول الكتاب. بيعرض بطريقة ممتعة وبسيطة أفكار كثير مهمة. زي مثلًا فكرة الدفاع عن الإسلام ضد اللي بيهاجموه باعتباره دين الإرهاب. من وجهة نظر الكاتب هو شايف إن أغلب اللي بيدافعوا عن الإسلام بيسيئوا ليه من غير قصد! أو على أفضل حال مجهودهم مالوش فايدة. وبيقول وليد فكري وجهة نظر تحترم، أنهم بيحاولوا يتفاهموا مع متعصبين جهلة. وأفضل شيء يقدموه أنهم يوجهوهم للمصادر الجيدة لو عايزين يقروها. وفي لمحة غاية في الذكاء بيقول الكاتب أن من بعد انهيار الاتحاد السوفيتي والعالم بيدور على أي حد يقعد مكانه على مقعد عدو الإنسانية وأن الغرب لازم يخلق عدو علشان يحقق مصالحه من خلاله. وده فعلًا اللي حصل بدعوى الحرب على الإرهاب. الكتاب رائع جدًا. بيناقش قضايا خطيرة بأسلوب سهل وبسيط. والأهم أنه فيه معلومات ومصادر وكتب كثيرة للي عايز يستفيد ويعرف التاريخ الحقيقي مش المزيف.

...

لا إكلير باريس: أحلى إكلير في كايرو؟
اصدرت في: 05/12/2016

القاهرة على مدار السنين اللي فاتت كانت شاهد على خروج عدد كبير من الماركات المحلية للنور في مجالات كتيرة أهمهم الأكل والمشروبات. لا إكلير باريس كان واحد من الأماكن اللي بدأت من عربة صغير في داون تاون مول القاهرة الجديدة عليها عدد محدود من أصناف الإكلير. المشروع وقتها حقق نجاح هايل، وخلال كام سنة شوفنا فروع لا إكلير باريس في المعادي والمهندسين ومول العرب وغيرهم من الأماكن الحيوية. إحنا في كايرو360 قررنا نعمل زيارة لفرع مول العرب ونشوف وصلوا لإيه من ساعة أخر زيارة لفرعهم في المعادي. لا إكلير باريس هتلاقيهم في كابينة مربعة في المول جنب سينما جالاكسي وبتتكون من ثلاثة أماكن للعرض، أتنين منهم للإكلير وواحدة لباقي حلوياتهم واللي منهم نكهات آيس كريم. بصراحة تركيزنا كله كان على الإكلير، فدخلنا على العرض المميز اللي شوفنا فيه مجموعة متنوعة من النكهات، واخترنا منهم إكلير ريد فيلفيت (18 جنيه) وأسطورة الإكلير الخالدة: إكلير شوكولاتة (16 جنيه). بصراحة ماقدرناش نقاوم الإغراء إننا نجرب حاجة أو أتنين غير الإكلير، فطلبنا تارت نوتيلا (19 جنيه) مع طبق تيراميسو (14 جنيه). نبتدي مع إكلير الشوكولاتة اللي يمكن عجينته كانت طازة، بس حشو الشوكولاتة والتوبينج ماكانش لهم طعم مميز ومش مسكرين زي المتوقع. أما الريد فيلفيت إكلير فكان أحسن وطعمه مسكر، وكمان حشو الكريمة كان هايل، بس المشكلة إن طعم التوبينج كان فيه نكهة فراولة صناعية مش لطيفة. بصراحة ماكناش متوقعين المستوى ده واللي طلع أقل بكتير من زيارتنا السابقة لهم. نروح لتارت النوتيلا اللي عانى من نفس مشكلة إكلير الشوكولاتة، قاعدة التارت مقرمشة وطعمها ولا أحلى وكمان طازة، لكن التوبينج المكون من طبقة كريمة شوكولاتة ومرشوش عليها صوص شوكولاتة ماكانش على المستوى ومافيش أي وجود لنكهة النوتيلا. بعد الكلام اللي فات كنا خايفين من التيراميسو، بس المفاجئة أنه كان طبق اليوم. طعم التيراميسو كان متوازن والكريمة مع الكيك عملوا دويتو هايل. طبعًا كلكم لاحظتم إن زيارتنا لـ إكلير باريس ماكانتش تمام. جايز كل الحلويات اللي جربناها كانت طازة ولذيذة، لكن التوبينج والحشو ماكانش على المستوى وأكيد أثروا على طعم الحلويات.

...

إنفوتيس: إكسسوارات منزلية واختراعات عملية شكلها مبتكر في أمريكانا بلازا
اصدرت في: 05/12/2016

زي ما البشرية مليانة ناس اخترعت حاجات حلت مشكلة حياة أو موت، زي ما برضه فيه ناس اخترعت حاجات –هي صحيح ما انقذتش العالم- بس على الأقل سهلت تفاصيل بسيطة في الحياة. إنفوتيس – Invotis في أمريكانا بلازا من الأماكن اللي بتعرض مجموعة من الابتكارات المفيدة وفي نفس الوقت مبتكرة في تصميمها. إنفوتيس كشركة للتصميم بدأت سنة 1995 في هولندا، وهي بتهتم بتطوير الأدوات اللي إحنا بنستخدمها في حياتنا كل يوم، سواء من حيث الوظيفة أو الشكل. وبعد ما كانت بتكتفي ببيع منتجاتها أونلاين بدأ يكون ليها محلات في أماكن كثيرة في العالم ومنها مصر. مبدأيًا المحل في تصميمه بسيط؛ حوائط بيضاء متعلق عليها مجموعة كبيرة من الساعات براويز الصور، أما بقية المنتجات فمعروضة على مجموعة من الترابيزات البسيطة المنتشرة في المحل. وبما إننا بدأنا كلام بمجموعة الساعات، وقت زيارتنا كان فيه مجموعة منها متعلق في الواجهة الزجاجية للمحل؛ منها واحدة شكلها مودرن بسيط عبارة عن دايرتين سود ما بينهم زجاج والعقارب باللون الأبيض (300 جنيه)، وواحدة ثانية مطبوع عليها صورة كلب صغير بالأبيض والأسود سعرها (100 جنيه). أما لو عايز ساعة شكلها غريب وجديد تنفع للمطبخ ممكن هتلاقي واحدة عبارة عن علبة صفيح إسطوانية نازل منها مضرب بيض يدوي (375 جنيه). أما للناس اللي بتحب تعلق ذكرياتها على الحوائط، فيه عدد كبير من البراويز اللي شكلها جديد وفيها أكثر من مكان لأكثر من صورة، وطبعًا كل ما حجم البرواز وعدد الصور اللي يستوعبها كثر كل ما السعر بقى أعلى. يعني فيه منهم عبارة عن مجموعة من البراويز الفضي المتركبة في بعض (بيستوعب 12 صورة) سعره (520 جنيه)، أما لو عايز صورك كلها في برواز واحد كبير، فيه برواز مربع بنفس لون الأول بيستوعب 9 أحجام مختلفة من الصور سعره (630 جنيه). من ضمن المعروضات لاقينا مجموعة من الإكسسوارات المنزلية الثانية زي الشمعدانات؛ فيه واحدة على شكل جسم زرافة والمفروض الشمعة بتلعب دور رقبتها سعر الواحدة (39 جنيه)، وواحدة ثانية مش محتاجة شمعة لأنها بتنور لوحدها في الضلمة وشكلها عامل زي حوامل الشموع القديمة (49 جنيه). لفت نظرنا مجسم ثقيل لسبيكة الدهب (290 جنيه)، اكتشفنا أن وظيفته أنه مسند للباب، ولنفس الوظيفة فيه منتج ثاني عامل زي بني آدم ساند على ذراعاته ونصه التحتاني بينزل تحت الباب –كأن الباب بيقفل عليه- وسعره (140 جنيه). برضه لاقينا أبريق لسقي الزرع على شكل بطة بلاستيك سوداء (85 جنيه). من ضمن الحاجات اللي دمها خفيف مجموعة من أغطية اللاب توب وهي عبارة عن صور للجزء الأعلى لأشخاص لحد الرقبة علشان لما تمسك اللاب توب يبان كأنك مثلًا لابس مايو بيكيني أو لابس بدلة –هسينا أنه اختراع مضحك لمرة واحدة وبصراحة ما لوش أي لازمة بس قلنا نقول لكم عليه، سعر الـ Cover الواحد (28 جنيه). يمكن ثلاث أرباع اللي موجود في المحل تلاقي له بديل في مكان ثاني، إلا أن مش بعيد لو أخدت لفة سريعة في المكان تنبهر بكم الحاجات اللي شكلها غريب ومبتكر بس ليها فايدة... روح مش هتخسر حاجة.

...

يوكل: كبدة وسجق بمزاج في الزمالك
اصدرت في: 04/12/2016

القاهرة فيها مطابخ من كل أنحاء العالم بتعمل أي أكل يخطر على بالك، لكن مع نجاح مطاعم بتقدم أكل مصري صرف، اكتشفنا إن أهل القاهرة هيفضلوا معتزين بأكل بلدهم وشايلينه في قلوبهم وعقولهم، وطبعًا معدتهم! يوكل الموجود في حارة من حارات الزمالك جنب كايرو كيتشين يعتبر واحد من أجدد المطاعم اللي بتقدم أكل مصري عريق وهو ساندويتشات الكبدة والسجق. المكان عبارة عن أماكن للأكل ترابيزات عالية ورخام على الحيطة مع كراسي عالية على شكل أزايز كوكا كولا، والقعدة المبتكرة دي ماشية مع المنيو البسيطة اللي مافيهاش غير ساندويتشات كبدة وسجق مع كفتة وبطاطس، وصنف حلو واحد وهو "سكالانس" (7 جنيه للواحد). يوكل كمان عاملين عرضين كومبو بيجمعوا فيهم كل حاجة في المنيو، الأول هو توتالا (60 جنيه) وفيه ثمانية ساندويتشات – منهم أتنين سكالانس –ومعاهم بطاطس ومشروبات، والتاني اللي طلبناه كان كبوت (35 جنيه) واللي يشمل كل أصناف المنيو. الأكل وصل بعد دقيقة واحدة من طلب الأوردر، وكل ساندويتش منهم ملفوف في ورقة ومرصوصين جنب بعض في علبة، وبعد ما شوفنا حجم الساندويتشات الصغيرة عرفنا إن اختيارنا للكومبو كان صح. البداية كانت روعة مع ساندويتش الكفتة. العيش الطازة مع الكفتة المشوية صح من بره والطرية من جوه كانت روعة، وكمان الطحينة عملت طعم هايل. بعدها كان الدور على السجق اللذيذ واللي كان خفيف ومش مزيت زي الساندويتشات الموجودة في معظم المحلات. الكبدة كمان كانت لذيذة، والتتبيلة الجامدة مع قطع الكبدة عملوا شغل جامد، ونقدر نقول أنه أحلى ساندويتش في المنيو. البطاطس كمان كانت مقرمشة وطازة بس مافيهاش أي طعم مميز، وده بيعكس بساطة المنيو. بعد ما جربنا كل الساندويتشات الحادقة، جه الدور على السكالانس اللي كان مسك الختام. القشطة مع الحلاوة جوه العيش المقرمش المدهون عسل كان أحلى حاجة ممكن نختم بيها أكلة عظيمة. يوكل قدر يحقق المعادلة الصعبة؛ أكل شارع بسيط وأصناف محدودة معمولين بإتقان وسط قعدة هادية.

...

Arrival: التواصل مع الكائنات الفضائية أصبح ممكن؟!
اصدرت في: 04/12/2016

المميز في فيلم Arrival أنه مش بيضيع وقت في فكرة هل هناك حياة على الكواكب الأخرى أم لا.. الفيلم بيتجاوز الفكرة دي تمامًا وبيبدأ السيناريو الخاص به فيما بعد اكتشاف وجود حياة على الكواكب الأخرى... وإزاي هيتم التواصل معاها وفهم لغتها وتطوير لغة قادرة على أنهم يفهموها. من بداية ظهور فن الخيال العلمي وفكرة الحياة على الكواكب الأخرى كانت واحدة من أكثر الأفكار رواجًا فيما يتعلق بالأعمال الأدبية والفنية اللي تناولت مجال الخيال العلمي.. بالتالي نقدر نقول أن Arrival ماقدمش كتير جديد فيما يتعلق بالفكرة، لكن فيما يتعلق بالتنفيذ... الأمور كانت مختلفة. فيلم Arrival من إخراج دينيس فيلنوف، وسيناريو وحوار إيريك هيزير، عن قصة قصيرة كتبها تيد شيانج، أما البطولة فكانت من نصيب إيمي آدمز، جيريمي رينر، فوريست وايتكر، مع جوليا سكارليت دان. الفيلم بيحكي عن مركبة فضائية غامضة بتظهر على كوكب الأرض، الأمر اللي بيستدعي من الولايات المتحدة تكوين فريق عمل متخصص في اللغات والتواصل مع الكائنات الأخرى بقيادة (د. لويز بانكس) والهدف هو التواصل مع الكيان الجديد والغامض. وبينما العالم كله تقريبًا بيستعد للدخول في مواجهة لا يعلم مداها إلا الله، بتحاول د. بانكس الوصول لإجابات شافية معرضة نفسها وفريقها لمخاطر مالهاش بداية أو نهاية. الأداء التمثيلي لأبطال Arrival كان جيد جدًا، وقدروا يقنعونا بكل تفاصيل الفيلم على الرغم من كونها تفاصيل خيالية، والحقيقة أن أفلام الخيال العلمي بتعتبر اختبار شديد الصعوبة للأداء التمثيلي للممثلين علشان بيكون مطلوب منهم طوال الوقت مش مجرد تزييف مشاعرهم -اللي هي أساس عملهم كممثلين- لكن أيضًا تزييف اللي بيشوفوه ويسمعوه ويشعروا بيه بالتناغم مع المؤثرات الخاصة. أما في الحديث عن المؤثرات الخاصة لازم نقول أنها أدت دورها بمنتهي البراعة، وقدرت تقدم لنا أحداث ومشاهد مش موجودة في الحقيقة إطلاقًا، لكن توظيف المؤثرات الخاصة لإنتاج المشاهد دي كان أكثر من بارع. وبما إننا اتكلمنا عن المؤثرات الخاصة لازم نتكلم عن الديكورات اللي كانت جيدة جدًا، وجعلت دخولنا سياق الأحداث سهل وسريع من المشهد الأول، والديكورات مع المؤثرات الخاصة كانت من الأمور اللي تحسب وبقوة للقائمين على الفيلم. الموسيقى التصويرية وعلى الرغم من أهميتها كعامل أساسي في أي فيلم خيال علمي، إلا أنها في حالة Arrival كانت باهتة وغير قوية وحسينا أن وجودها كان زي عدمه. مش عاوزين نقول إن ده حصل في كل مشاهد الفيلم لكن في الغالبية العظمي من مشاهد الفيلم ده اللي كان حاصل فعلًا، وللأسف دي من الأمور اللي بناخدها على الفيلم بشكل عام. علشان تبقى عارف.. كان المخرج (نيس ماتيو) مرشحًا لإخراج الفيلم في البداية. تعاون النجمان (آيمي آدامز) و(جيريمي رينر) من قبل في فيلم (American Hustle) عام 2013.

...

فيلم Shut In: رعب يستحق المشاهدة في السينما؟!
اصدرت في: 01/12/2016

البرد.. العواصف الثلجية.. الظلام.. الأوهام.. الأطفال اللي تبان بريئة وهي أبعد ما يكون عن البراءة، كل العوامل دي كفيلة بتقديم فيلم رعب متميز، لكن فى حالة Shut In وعلى الرغم من وجود كل مقومات الرعب، لكن النتيجة النهائية كانت مخيبة للآمال! فيلم Shut In من بطولة ناعومي واتس، جاكوب ترمبلي، أوليفر بلات، وديفيد كوبيت، مع أليكس برونستين وتشارلي هيتون، ومن تأليف كريستينا هودسون، وإخراج فارين بلاكبيرن، وبيحكي عن سيدة بتفقد ابنها المراهق في حادث أليم، وبيصاب بشدة لدرجة أنه بيفقد القدرة على الحركة أو الكلام. حياة بطلة الفيلم بتتحول لحياة رتيبة صعبة لا تطاق بعد إصابة ابنها، على الرغم من عملها في مجال الصحة النفسية للأطفال، الأمر اللي بيخليها في احتكاك مباشر مع طفل صغير بيظهر في حياتها وبتحس أنه تعويض من السماء عن خسارتها في ابنها.. لكن باقي أحداث الفيلم بتورينا أن الرعب ممكن يكمن في وجود الطفل الصغير. الأداء التمثيلي لكل الأبطال كان متوسط، حسينا أنه كان المفروض يكون أقوي، سيناريو الأحداث المرعبة كان نمطي ومحفوظ ومكرر وشوفناه في أفلام كتير قبل كده، كمان المؤثرات الخاصة والمؤثرات الصوتية والبصرية اعتمدت في المقام الأول والأخير على فكرة (الخضة) والظهور المفاجئ للأشخاص والأشياء أمام الكاميرا اللي بتتحرك ببطء. وده مش جديد، وممكن يكون السبب في قلة الإبداع في الفيلم أنه تكلفته الإنتاجية متوسطة. الموسيقى التصويرية كانت ضعيفة، وعجزت عن عكس حالة الرعب اللي كان المفروض تجسدها بإبداع فني أكبر من كده، وبالمناسبة الموسيقى مهمة جدًا في أي فيلم رعب، لكن في فيلمنا النهارده الموسيقى التصويرية كانت باهتة وضعيفة وما حسيناش أن لها وجود على طول الفيلم. الكلام عن Shut in ممكن يكون قليل لكن ده نتيجة أن الفيلم نفسه ماكانش قوي زي ما توقعنا، لو كنت من عشاق الرعب وما بتحبش تفوت أي فيلم جديد يبقى لازم تتفرج على الفيلم في السينما، لكن لو كنت بتدور على فيلم سينمائي متميز يبقى محتاج تفكر أكثر من مرة قبل ما تتعب نفسك وتشوفه في السينما.

...

دسوقي آند صودا: مطعم مش قد كدة في المعادي
اصدرت في: 01/12/2016

زي ما قلنا قبل كده أننا نقدر نختصر القاهرة في وسط البلد، فإحنا بنقول أننا نقدر نختصر المعادي في شارع "9"، مش بس علشان الشارع كبير ومحوري ورابط مناطق كتير ببعض، كمان علشان أي نشاط هتحب تعمله في المعادي، سواء تجاري أو ترفيهي أو غيرهم، هتلاقي له سكة ومكان هناك. "دسوقي آند صودا"، واحد من المطاعم اللي فتحت من كام شهر كده في شارع 9 في المعادي، وفي وقت قليل جدًا بقى اسمه على كل لسان، وواضح أنه بقى عزومة الذوق في أرض المعادي الشقيقة، ولأن كل حاجة لازم لها سبب فإحنا قررنا نزور المكان بهدف أننا نختبر حقيقة السمعة دي ونفهم إيه الدنيا ونحط إيدينا على أسباب الانتشار السريع والقوي ده، لكن تقريبًا كده والله أعلم يعني.. إحنا مافهمناش حاجة! أول ما تعدي من قدام المطعم هتتاخد بمنظر الزحمة الشديدة والمكان اللي مافيهوش مكان لرجل واحدة زيادة والناس الكتير اللي واقفين برة مستنيين دورهم علشان يقعدوا، المنظر ده وإن كان مش محبب لناس كتير لكنه ممكن جدًا يعتبر دليل قوة وتميز، عمومًا ترددنا شوية في الدخول بسبب الزحام ده لكن في الآخر غلبنا فضولنا للتجربة وقلنا لازم ندخل. الحجز والانتظار برضه مش عمليات محببة يعني لكن الموضوع عدى، قعدنا أخيرًا وده المهم، لفت نظرنا جدًا التعامل الودي –الزايد جدًا عن حده الحقيقة- من المسؤولين عن الخدمة في المطعم، يعني حسينا أنه آه لطيف أننا نتعامل بخفة وبشكل مافيهوش تكلف أو افتعال لكن مش هنقلب أصحاب يعني ونهزر هزار اتنين مقضيين ليلهم ونهارهم سوا، ده ممكن يقفل ناس كتير ويعتبروه تجاوز، وإن كان هيعجب ناس تانية وهيعتبروه نوع من اللطف وحسن الضيافة. واضح أن كل عملية في المطعم ده لازم لها شوية انتظار، بعد ما انتظرنا علشان نلاقي مكان نقعد فيه انتظرنا تاني لما قعدنا علشان حد ييجي ياخد مننا طلبنا، خلال فترة الانتظار التانية دي عرفنا -من اللوحة الكهربائية اللي محطوطة على شمال واجهة الطوب الحراري للمكان- سبب تسمية المطعم بالاسم اللي ممكن يكون غريب ومش مفهوم للبعض، اللوحة كانت عبارة عن جملة واحدة بتقول: "أكل شارع.. شرب أفرنجي"! بعد ما أخيرًا تم أخد الطلب بتاعنا اللي كان عبارة عن: كباب حلة بالبصل وش جبنة (48 جنيه)، وطاجن مكرونة بالفراخ المشوية (38 جنيه)، معاهم سلطة دسوقي (20 جنيه)، كان في فقرة انتظار تالتة عقبال ما الأكل يوصل، وإن كانت دي أخفهم يعني، المهم، وصل الأكل، وبدأت تجربة التقييم اللي حاولنا ننعزل فيها عن الدوشة قدر الإمكان علشان نقيم تقييم موضوعي ومش متأثر بأي عوامل تانية. السلطة كانت أول الأطباق وصولًا، الماشروم كائن جميل وسهل توظيفه في أي طبق أكل علشان يديله شكل وطعم، مع الخضار المشكل اللي يفتح النفس ويبسط العين الموضوع كان أكثر جمالًا، لكن كان يعيب السلطة بس أن زيت الزيتون فيها كان خفيف جدًا جدًا لدرجة أن قوامه كان عامل زي المية، وده خلانا مانقدرش نميز طعمه بسهولة وإن كنا حاسين بوجوده، لكن في العموم الطبق كان حجمه مناسب، ومتحضر كويس. بعدين، وصل طبق كباب الحلة بوش الجبنة، شكل الطبق الصغير يخليك تستقل بيه كده، لكن المثل بيقول: "يوضع سره في أضعف خلقه"، الطبق كان عظيم حرفيًا، لو كان بس يبقى أخف وأقل دسامة من كده علشان يبقى طِعِم وصحي في نفس الوقت كان يبقى حاجة أعظم وأعظم، لكن عامةً طعم اللحمة بالبصل والخلطة ودرجة سواها ووش الموتزاريللا المتماسك من أثر دخلته الفرن كانوا عاملين ميكس لطيف جدًا في الطعم. آخر الأطباق وصولًا كان طاجن المكرونة بالفراخ المشوية، والحقيقة أننا قعدنا فترة نحاول نفهم فين الطاجن في الموضوع بس ماوصلناش لإجابة، الموضوع كان عبارة عن طبق مكرونة أقلام عادية بالريد صوص مع أربع قطع صدور فراخ طويلة فوقيها وعلى الوش رشة ورق خضار، الفراخ كانت بارده للأسف وغالبًا مش طازة كمان واستنتجنا ده لما لاقيناها مش متماسكة وبتتفتت بسهولة، وده قفلنا من الطبق كله، المكرونة كانت دِلعة سِنَّة كمان وحسيناها ناقصة نكهة، التساؤلات اللي عندنا بخصوص تسمية طبق مكرونة عادي بأنه طاجن شاركناها مع أحد المسؤولين عن الخدمة في المطعم وسألناه إذا كان الطبق ده دخل الفرن فقال لنا أنه لأ، مش بيدخل الفرن غير الأطباق اللي عليها وش جبنة، لكن عامةً إحنا استنتجنا أنه جايز الطبق الفخاري اللي متقدم فيه كان هو سبب التسمية! في النهاية حابين نقول أنه تجربتنا مع الأكل كانت جيدة نسبيًا، لكن أيًا كان فالانتظار الطويل والتعامل المتجاوز، والقعدة اللي أشبه بقعدة القهوة البلدي مع الشِّيَش الكتير والدخان اللي في كل حتة وارد جدًا يخلوا الموضوع مش مستاهل!

...

نور: اللغة الجيدة لا تكفي لكتابة رواية!
اصدرت في: 01/12/2016

والرواية هي الجزء الأخير من ثلاثية بدأت برواية محال ثم جوانتانامو. بتحكي عن امرأة شابة وقعت في غرام شاب نوبي، ومن خلال علاقة غير شرعية حملت بـ(نور)، وبعدين بتتجوز ثري ليبي والبنت بتتكتب باسمه. الرواية كلها هي نظرة نور للعالم من حواليها. ومن خلالها هنتعرف على نظرة المجتمع للأنثى. نور متمردة على كل التقاليد والقيود وبتحاول تفهم العالم والناس. بتشك في وجود الإله وفي حكمته وفي وجودها نفسه. وهنشوف كل ده من خلال مونولوجات أو حوارات داخلية طويلة. حرص يوسف زيدان أنه يخلي العالم كله يكون بيدور حوالين بطلة الرواية. اللي طول الوقت بتتأمل في حالها وبتحلم بوضع أفضل. كالعادة نقطة القوة عند يوسف زيدان هي لغته، لكن اللغة الجيدة لا تكفي لكتابة رواية. عامة الأحداث هي اللي بتحرك الرواية. والأحداث تصنعها الشخصيات. فلو الشخصيات مش مكتوبة كويس الأحداث مش هتبقى سلسة، وبكده نقدر نقول -بكل ثقة- إن الرواية باظت! والشخصيات الجيدة هي اللي نقدر نصدق أنهم موجودين حوالينا. نقدر نتخيل تفاصيلهم. ونقول إننا شفناهم قبل كده وتعاملنا معاهم. شخصيات حقيقية. وعلى العكس بقى هي الشخصيات الأحادية. يعني الشخصيات اللي ليها جانب واحد بس. أفكار ثابتة. طبع ثابت. مركزة على فكرة واحدة بس طول الرواية. وهو ده اللي حصل هنا. نور مثلًا كل اللي شاغلها قضية الحجاب والحيض وقضايا المرأة المهزومة في المجتمع المصري معاصر. صحيح المجتمع المصري نظرته للمرأة سيئة وبالتالي التعامل معاها سيء. وفي أفكار وقضايا كتير في الرواية حقيقية فعلًا. ومش عيب أبدًا كتابة رواية للدفاع عن قضية معينة، وخاصة قضايا المقهورين فعلًا. لكن السؤال المهم.. هتتعمل إزاي؟ كل الشخصيات في الرواية مُفتعلة. وبما إن مافيش أحداث مهمة فكان لازم يوسف زيدان يعبر عن اللي عايز يقوله من خلال الحوارات، وخاصة الحوارات الداخلية -بين نور وبين نفسها- اللي كانت من أسوأ أجزاء الرواية. لأن القارئ أكيد مش محتاج يسمع حوار طويل بين شخص وبين نفسه. الرواية غير ناضجة فنيًا للأسف. لأنها من البداية موجهة لشريحة معينة، ولهدف معين، علشان الكاتب يجمع حواليه مزيد من القارئات ومزيد من المدافعات والمدافعين عن حقوق المرأة. وبكده -وبعد تجارب روائية كثيرة- نقدر نقول أن يوسف زيدان فعلًا روائي بالصدفة. لأنه من بعد رواية (عزازيل) ماكتبش أي حاجة قيّمة. كل الإنتاج الروائي السيئ ده هيرجح زعم اللي شككوا في عزازيل، وقالوا إنها مش بتاعته! لأن اللي كتب رواية بالجمال ده صعب أنه يكتب روايات سيئة للدرجة دي!

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن