The Definitive Guide to Living in the Capital , Cairo , Egypt

قصص السرقات المنظمة ومحاولة فريق إنه ينفذ عملية صعبة تيمة بتكون مصدر لنوعين من الأفلام، الأول هو الأكشن والمغامرة والمطاردات. أما النوع الثاني فهو الكوميديا، وهو ده النوع اللي قرر الفنان سامح حسين إنه يختاره في أحدث أعماله “الرجل الأخطر”.

الفيلم بيحكي عن شخص بيقرر يكون مجموعة تساعده في سرقة أحد البنوك، الأمر اللي بيدخلهم في سلسلة من المغامرات والمواقف الكوميدية اللي مش بتنتهي، مع محاولة أعادة تقديم فيلم لصوص ولكن ظرفاء واللي تم تقديمه سنة 1969 من بطولة عادل امام وأحمد مظهر ولكن بطريقة عصرية أكتر.

مستوى الكوميديا في الفيلم مش عالي أو مميز وده بسبب الاعتماد على الإيحاءات الجنسية أو الإيفيهات المستهلكة، طبعًا حاول المؤلف جوزيف فوزي يحط بعض المواقف الكوميدية المختلفة واللي كانت جميلة وجيدة لكن للأسف عددها كان قليل.

ما فيش كلام كتير نقدر نقوله عن الأداء التمثيلي لأن كل واحد من أبطال الفيلم سواء سليمان عيد أو سامح حسين أو إدوارد قدم الأداء العادي واللي بنشوفه في كل عمل له بدون أي محاولة للتجديد أو تقديم حاجة مختلفة عن باقي الأدوار.

المخرج مرقس عادل قدم مستوى إخراجي معقول مقارنة بطبيعة الفيلم وميزانيته اللي بتتناسب مع توقيت عرضه في فترة الصيف بعيدًا عن فترة عيد الأضحى اللي منتجين كتير منتظرين الوصول له لطرح الأفلام القوية والثقيلة.

الرجل الأخطر فيلم خفيف وظريف وينفع للمشاهدة في أجازة نهاية الأسبوع.

علشان تبقى عارف: الفنان سامح حسين قدم أدوار كتير لكنه اشتهر بدوره في سيت كوم “راجل وست ستات” مع أشرف عبد الباقي.