The Definitive Guide to Living in the Capital , Cairo , Egypt

على الرغم من نجاح يوسف الشريف الواضح في المسلسلات الرمضانية، واللي حققت نجاح كبير في السنوات الماضية، الأمر اللي جعل اسم يوسف علامة على نجاح أي مسلسل يشارك فيه. إلا إن الحظ السعيد لم يكن حليف الشريف في أعماله للسينما.

بداية من أعمال زي 7 ورقات كوتشينة وفتح عينيك وآخر الدنيا وغيرها، كان نجاح يوسف الشريف متواضع، حتى مع مشاركته في أفلام قوية زي هي فوضى سنة 2007 للعالمي يوسف شاهين فضل يوسف الشريف محتاج فيلم يعيد تقديمه للناس بعد سلسلة من النجاحات في الدراما التليفزيونية. وده كان رهان يوسف الشريف في فيلمه الجديد اللي ما قدمش مسلسل رمضاني العام الماضي علشان يتفرغ له.

فيلم بني آدم بيحكي عن لص محترف بيعيش حياة مزدوجة، بين حياته كخارج عن القانون بيشتغل مع مجرم غامض (قام بالدور محمود الجندي) وبين حياته كرجل أعمال أمام زوجته (دينا الشربيني). لكن الحياة دي بتتعرض لمشكلة كبيرة مع بحث ضابط شرطة (أحمد رزق) عنه ومطاردته ومحاولة الإيقاع به.

سيناريو الفيلم قائم على حبكة الألتواءات Plot twist وهي المفاجأة اللي بنكتشفها في أخر الأحداث. ده التكنيك اللي حقق بيه يوسف الشريف نجاحه في كل مسلسلاته تقريبًا وده اللي قرر يرجع لنا به مع أحمد نادر جلال مخرجًا و عمرو سمير عاطف مؤلفًا. لكن مشكلة الألتواءات أنها إما تعجب المشاهدين جدًا أو تخليهم ينفروا من الفيلم جدًا. مافيش هنا حلول وسط.

من الأمور المميزة اللي لاحظناها في الفيلم الديكورات وتوظيف الموسيقى التصويرية لخدمة الأحداث بشكل جيد، ودي من الأمور اللي تحسب للفيلم وجعلت تجربة مشاهدته أفضل.

يوسف الشريف قدم أداء تمثيلي قوي لكن مش مختلف كتير عن أداؤه في المسلسلات، لكن بشكل عام يوسف من الوجوه اللي الكاميرا بتحبها ومجهوده وشغله على نفسه بيخليه دايمًا في مصاف النجوم اللي الجمهور بيتابعها باستمرار.

على الرغم من تقدم محمود الجندي في العمر الا إنه قادر يقدم أي دور يسند اليه بشكل متميز. خاصة مع تغيير ملامحه وطريقته في الكلام بالشكل اللي يناسب كل دور بيقوم بيه. أما البطولة النسائية لدينا الشربيني مع هنا الزاهد فكان أداؤهم جيد لكن في المنطقة النمطية المحفوظة الخاصة بهم.

بني آدم.. محاولة جادة من يوسف الشريف للرهان على السينما والعودة لها بعد تحقيق النجاح في التليفزيون. ما نقدرش نقول إن الفيلم أقوى حاجة، لكن ما نقدرش كمان نقول إنه فيلم ضعيف، هو محاولة جادة وفي النهاية الوقت لوحده هو اللي هيحكم على مدى نجاح يوسف في السينما زي ما قدر ينجح تليفزيونيًا.

علشان تقى عارف: يوسف الشريف مش الاسم الحقيقي للنجم المشهور، لكن أسمه الحقيقي هو محمد إسماعيل ناجي، وتم الاتفاق مع المخرج شريف صبري على تغيير الأسم في بداية عمل يوسف الشريف في السينما.