The Definitive Guide to Living in the Capital , Cairo , Egypt

  • أمير كرارةغادة عبدالرازق...
  • دراما
  • بيتر ميمي
  • في1 Cinema
تم التقييم بواسطة
Mohamed Hamdy
قيم
قيم الآن
حرب كرموز: أحلى فيلم في سينمات القاهرة ولا إيه؟!

مع بداية طرح الإعلانات التشويقية الخاصة بفيلم حرب كرموز، افتكرنا قصة واقعية لها نفس أحداثالفيلم. عن حكاية صمود مجموعة من ضباط الشرطة المصريين أمام جيش الاحتلال الإنجليزي، وتحولت قصة صمود الضباط لعيد للشرطة في 25 يناير. وفي رأينا لو كان الفيلم بيحكي القصة الحقيقية كانت هتكون لفتة أفضل. لكن مافيش فرق كبير بين الحقيقة والخيال.

 

 

(حرب كرموز) بيحكي عن قصة اغتصاب بنت مصرية من مجموعة عساكر إنجليز، في فترة احتلالهم لمصر. وبيتدخل مجموعة من الشباب المصري لحماية البنت وبتحصل اشتباكات بيتم أسر واحد من الجنود الإنجليز بعدها.

بيتم مطالبة مأمور القسم (أمير كرارة) بالإفراج عن العسكري الإنجليزي، لكنه بيرفض، وبيعرض كل القسم لخطر الحصار والسحق من الجيش الإنجليزي اللي بيحرك وحداته لضرب القسم المصري. معركة غير متكافئة لكننا بنشوف من خلالها صمود الشعب المصري أيام الاحتلال على الرغم من اختلاف أطياف المجتمع ده والانقسامات الظاهرية اللي ممكن تكون موجودة بين أشخاصه.

 

 

الفيلم من تأليف وإنتاج محمد السبكي، وكان واضح من البداية للنهاية أن السبكي بيراهن على نجاح الفيلم بشكل شخصي. وكان واضح البذخ الإنتاجي اللي يمكن مش بنشوفه عادة في أفلام السبكي. لكن على الرغم من البذخ ده بعض التفاصيل كانت ناقصة الفيلم، زي مثلًا شعورنا أن الدم الظاهر في المشاهد مش حقيقي، أو شعورنا طوال الوقت بجو التصوير في الأستوديو. لكن من ناحية تانية أفاد الإنتاج في إخراج مشاهد أكشن قوية ومشاهد التحامات ومطاردات مميزة.

المخرج بيتر ميمي من الواضح أنه بيهتم بكل التفاصيل وبيخرج الفيلم بشغف كبير. ومن خلال متابعتنا لحسابه على تويتر شوفنا الملابس اللي تم تخصيصها للشخصيات والورق اللي تم عمله علشان يخرج الفيلم متقن من ناحية التفاصيل الصغيرة. لكن وبما أننا بنتكلم عن الملابس، كنا متوقعين أن الملابس ماتكونش تقليدية، لكن للأسف ظهرت كل شخصية من شخصيات الفيلم بالملابس التقليدية لها بدون أي محاولة للتجديد أو كسر الصورة النمطية.

 

 

أمير كرارة في دور البطولة بيعيد تجسيد شخصيته في مسلسل كلبش من جديد. حتى أننا توقعنا واحد من الأبطال يناديه بلقبه الشهير (باشا مصر)! لكن الغريب أن أمير قدر يقدم الشخصية بشكل متنوع بدون ما يشعر المشاهدين بالملل من تكرار نفس الخطوط الرئيسية للشخصية. ودي تحسب لأمير قدرته على تقديم شخصية واحدة لمدة شهر كامل ثم إعادة تقديم نفس الشخصية -تقريبًا- بعدها ولا يشعر المشاهدين بالنفور أو الضيق.

 

 

مصطفى خاطر ومحمود حميدة قدموا أداء مميز، وخصوصًا مصطفى خاطر اللي بنعتبره الجواد الرابح في الفيلم، أما سكوت أدكنز فقدم أداء ممتاز على صعيد المعارك والالتحامات اليدوية، وإن كان وجوده في الفيلم مقحم بشكل أو بأخر ومش متسق مع السيناريو العام للأحداث.

حرب كرموز واحد من أفضل أفلام عيد الفطر 2018 خاصة أنه بيبعد عن منطقة الكوميديا اللي أصبحت مكررة ومحفوظة وبيقدم أحداث متعوب عليها وعلى تفاصيلها وعلى أنتاجها بشكل يحترم عقلية المشاهد ويقدم له وجبة سينمائية جيدة وصالحة للمشاهدة في العيد.

علشان تبقى عارف:

اعتمد المخرج بيتر ميمي على 1200 صورة و حوالي 15 ساعة من الوثائق المصورة عن الفترة دي في مصر علشان يطلع الفيلم بشكل متقن في النهاية.

 

عجبك ؟ جرب

مسلسل كلبش

نصيحة 360

تم تصنيع 5 دبابات مخصوص لتصوير أحداث الفيلم

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح