The Definitive Guide to Living in the Capital , Cairo , Egypt

التوأم الملتصق ظاهرة علمية حقيقية، بتحصل بشكل نادر للمواليد، وبيكون فيها الطفلين ملتصقين من عند الرأس أو البطن أو الظهر أو الرأس، واشتهرت المملكة السعودية بالعديد من عمليات فصل التوأم الملتصق، معظمها أجراها وزير الصحة السابق عبد الله عبد العزيز محمد الربيعه. تقريبًا دي المعلومة الوحيدة المفيدة اللي ممكن تخرج بيها من فيلم حسن وبقلظ!

فيلم حسن وبقلظ من إخراج وائل إحسان وتأليف وبطولة كريم فهمي وعلي ربيع، بنشوف قصة طفلين بيولدوا كتوأم ملتصق، وبيبدأ الفيلم في استعراض حياتهم الصعبة والمواقف الكوميدية اللي بتواجههم سواء في الدراسة أو العمل أو الحب، وإزاي بيستفيد (بقلظ) أو على ربيع بشكل دائم من أخوه حسن (كريم فهمي) لحد ما الاتنين بيقابلوا يسرا اللوزي وبيقعوا في حبها، وهنا بيقرر (حسن) إجراء عملية والإنفصال عن أخوه.

لو فيه صفه نقدر نصف بيها صناع الفيلم هنقول أنهم كانوا طماعين.. عاوزين يقدموا جرعة من الكوميديا والرومانسية والأكشن والدراما في حوالي ساعتين فقط.. والنتيجة كانت أنهم فلشوا في الخلطة بتاعتهم.

الكوميديا واللي المفروض أنها تستند على الأقل على 1% من المنطق، كانت مفتقرة لأبسط قواعد المنطق والفهم الصح، بداية من أن الفيلم عن توأم ملتصق بس التوأم مش شبه بعضه، مرورًا بكتير من المغالطات المنطقية في الأحداث وحتى المغالطة الكبيرة والمرعبة واللي خلت المشاهدين تضرب كف بكف في نهاية الفيلم لما بنشوف (كريم فهمي) كل ما يتحرك حركة جسم (على ربيع) يقوم بنفس الحركه مع أن المفروض أن الفيلم بيقول لنا في البداية أن كل حاجة يعملها أي واحد من التوأم بعد الإنفصال، الشخص التاني هيشعر بيها بس، مش جسمه هيعمل زيها كمان! ناهيك عن فكرة أن كريم فهمي يكون ظابط شرطة وهو ملتصق بشخص أخر أصلًا! وأنه يكون ظابط شرطة وإحنا مش بنشوفه في مشهد واحد وهو بيمارس مهام عمله!

كمان الكوميديا كانت معتمدة بدرجة كبيرة على الإيفيهات والقفشات والنكت، وكلها أمور اشتهر بها مسرح مصر واللي بييجي معظم أبطال الفيلم من كواليسه بالأساس، ونقدر نقول أن الكوميديا المعتمدة على المواقف كانت قليله جدًا، وبشكل عام كان فيه مشكلة في سيناريو الأحداث، أنه كان بيقفز على مشاهد الإثارة مباشرة بدون تمهيد، بمعني إننا لو شوفنا كريم فهمي بينوي مهاجمة عصابه مثلًا، المشهد التالي بتكون في مواجهة بينه وبين العصابة، بدون ما نعرف مثلًا المواجهة دي بتتم فين وازاي عرف يوصل لهم… إلخ مش مهم الكلام ده كله طالما السيناريو في حالة (هرولة) علشان يقدم كل حاجة طول الوقت!

كل الممثلين كان عندهم مشاكل حقيقة في الأداء، لعل أقلهم مشاكل كانت يسرا اللوزي في إطلالة جميلة أما بيومي فؤاد فأدى دور متميز كعادته على الرغم من قلة مشاهده، جائزة أسوأ تمثيل على الإطلاق تروح لمصطفى خاطر ومحمد أسامة (اوس اوس) على الأداء المنفعل والنمطية المبالغ فيها في تأدية الشخصية.

إحنا مش ضد تقديم فيلم كوميدي بحت، ومش ضد الأفلام الرومانسية أو أفلام الأكشن، لكن محاولة عمل مزيج من كل ده في فيلم واحد، مع عدم احترام أي منطق وعدم وجود سيناريو قوي يربط الأحداث.. نتيجته هتكون فيلم بضعف.. حسن وبقلظ.