The Definitive Guide to Living in the Capital , Cairo , Egypt

أفلام
حملة فرعون

حملة فرعون.. كله ضرب ضرب مافيش شتيمة؟

افلام مصرية السبكي حملة فرعون روبي سينمات القاهرة عمرو سعد
حملة فرعون.. كله ضرب ضرب مافيش شتيمة؟
  • روبيسوزان نجم الدين...
  • إثارةإستعراضي...
  • رؤوف عبد العزيز
بواسطة
Cairo 360

بقلم: أحمد شعراني

اتفرجنا على فيلم حملة فرعون اللي بتعرضه حاليًا سينمات القاهرة، وهو من بطولة عمرو سعد وروبي ونجوم تانيين كتير.. في السطور الجاية هنقولكم على 21 انطباع عن الفيلم ده.. يلا نبدأ.

1- السبكي عمل هروب اضطراري وكسر شباك التذاكر فنفسه اتفتحت وعمل حرب كرموز في السنة الي بعدها ونجح أكتر، فحب يعلي على نفسه السنة دي جت على دماغة، وده ينطبق عليه أن الأصعب من النجاح إنك تحافظ عليه.

2- النجم العالمي لما جابه السبكي في حرب كرموز، بيتر ميمي وظفه صح جدًا، لكن المرة دي كانت لعنة الفيلم، والشخصية اللي عملها ذا ماونتن شخصية مهمة في أحداث الفيلم وكان المفروض يجيلها ممثل تقيل وكان ممكن يبقى منذر رياحنه مثلًا.

3- الأستاذ رؤوف عبد العزيز المخرج واللي بكن له كل إحترام على المستوى الشخصي سلق الفيلم، وصدمني في المستوى الي شفته، وتجربه أولى غير موفقه.

4- الفيلم فاكك ومتعرفش هو عاوز ايه، الحكاية كلها مشاهد ضرب كتير مش مترتب وملوش هدف، وتفجيرات كتير بقى، وبرده مش عارف ليه.

٥- تايسون وذا ماونتن بيمثلوا وضمن الأبطال ومستمرين معاك لنهاية الفيلم، مش مجرد لقطتين وخلاص.

6- مايك تايسون ومحمد لطفي اوت كاست خالص، الاتنين كبروا وجسمهم تقيل على الاكشن اللي في الفيلم.

7- رامز أمير ممثل كويس، لكن مشاهد التنطيط اللي عملها كان المفروض تزيد، أظن عندنا إتحاد باركور في مصر كان المفروض نستغلهم، مش نخلي التنطيط على السلالم وجوه هنجر ع الأرض عادي كده، فين العمارات والحاجات دي، ده السقا بيعملها من نفسه من غير تدريبات.

8- عاوزك تتخيل معايا فراس سعيد وهو ماسك العالمي مايك تايسون من قفاه، لقطة فشيخه

9- أنا شايف ان كرم جابر يريح شوية بقى كده ويطلع يضرب او يتضرب بس لكن ينطق بلاش لحد ما يدرس تمثيل.

10- كان حد قبل كده قالي المخرج اللي ايده طارشة هو اللي هيقعد يعمل حاجات كتير متخدمش الحدوتة عشان يقولك انا تقيل وده اللي حصل في حملة فرعون.

11- مش عارف اقولهالكم إزاي أن ذا ماونتن المشهد الأخير ليه كان راكب عربية بيجو ٥٠٤ وبيهرب من عمرو سعد اللي راكب جيب.

12- على ما قدرت ألمح مرتين حصل قطع ودخول من مشهد لمشهد بشكل زفت، وكأن المونتير كان شغال على موفي ميكر.

13- أماكن التصوير اكثر من جميلة، سواء جوه مصر أو الخارجي صورة حلوة أوي، والتصوير حلو.

14- الحدوتة تعبانة، وفيلم شمس الزناتي اللي اتعمل من سنين برقبته، وفي حاجات كتير في السيناريو غير منطقية.

15- نيجي بقى للمزيكا اللي هي حاجة كده منحوته من فاست اند فيريوس، وكمية جيتار الكتريك لحد ما تتكرع، ودوشة رهيبة حاصله.

16- التعثر يلاحق للأسف عمرو سعد وصعبان عليا، لكن انا والله كنت بتوقع ردود أفعاله في الفيلم لأنه محفوظ بالنسبة لي في الأدوار دي، حاجة كده زي حديد.

17- محمود عبد المغني تقريباً لازم يقلد محمد منير في كل أفلامه.

18- الماونتن في جملة من جمله بيقول لتايسون محدش هينقذك، حتى ربك مش هينقذك، وعلى ما اظن دي أول جملة فيها الحاد صريح تتقال في فيلم مصري.

19- سوزان نجم الدين ممثلة جميلة وتقيلة، وروبي قمر ومكنتش متخيل هتعرف تعمل اكشن كده.

20- نسيت اقولكم في حد عامل شخصية أحمد زكي في الباطنية بالظبط، وقفشته من أول مشهد.

21- في النهاية ده اسوأ فيلم شفته لأنه فاضي مفيهوش حدوته، وناس كتير سابت الفيلم وخرجت من الزهق، لأنه كله ضرب ضرب مفيش شتيمة.

الصورة من صفحة الفيلم الرسمية على فيسبوك.

مقترح