The Definitive Guide to Living in the Capital , Cairo , Egypt

أفلام
Cowboys & Aliens – رعاة بقر ومخلوقات فضائية

رعاة بقر ومخلوقات فضائية – Cowboys & Aliens: الحرب على المال

  • أبيجايل سبنسرأوليفيا وايلد...
  • حركة ومغامراتخيال علمي...
  • جون فافروجون فافرو
  • في1 Cinema
تم التقييم بواسطة
Mohamad Adel
قيم
قيم الآن
رعاة بقر ومخلوقات فضائية – Cowboys & Aliens: الحرب على المال

كل المعطيات بـ تقول أننا
أمام فيلم تجاري 100% لكن بالتعمق شوية هـ نلاقي القصة لها أبعاد ثانية أهم وهي دي
أهم مميزاته.

بداية مثيرة جدًا
لأحداث أكثر إثارة، نبدأ برجل يصحى من غيبوبة يلاقي نفسه في صحراء، مش عارف هو مين؟
وجاي منين؟ في أيده سوار مش قادر يخلعه، يهجم عليه 3 رجال ويقدر يتغلب عليهم، يأخذ
أسلحتهم وحصان واحد فيهم، يمشي ناحية بلدة، فيها مأمور وحاكم وواعظ وصاحب محل
خمور، لكن الأهم من دول هو الكولونيل “ويدرو دولارهيد” اللي بـ يدير
مواشي البلدة وله سلطان، يعرف بعدها الرجل اللي صحي من الغيبوبة أن اسمه “جيك
لونرجان”، مطلوب القبض عليه بتهم سرقة وقتل، هو مش فاكر أي شيء، وفيه بنت
غريبة بـ تتبعه زي ظله.

فجأة تهجم طائرات
غريبة لكائنات فضائية، السوار اللي في إيد “جيك لونرجان” يتحول لسلاح،
السلاح يقدر يوقع طائرة، لكن قبلها يقدروا يخطفوا مجموعة من أهل البلدة، يتفق أهل
البلدة على إعادة المخطوفين، يوافق “جيك لونرجان” على أنه يبقى معاهم،
هو الوحيد اللي معاه سلاح يقدر يوقف الكائنات الفضائية، لكن يقعد يسأل نفسه كثير
مين دول؟ وهو أصلاً مين؟

في فترة من فترات
هوليوود كانت أغلب الأفلام بـ تتكلم عن الطابع الغربي الأمريكي، دائمًا فيه رعاة
بقر، صحراء، حرب بالمسدسات، هنود حمر، علاقتهم برعاة البقر، لكن في الفيلم ده أضيف
شئ غريب وجديد هو الكائنات الفضائية.

ده أعطى شوية بُعد مش
بعيد عن النمط الأمريكي اللي هو أساس أفلام الخيال العلمي برضه واللي أشهر من
ابتكرها المخرج ستيفن سبيلبرج، لكن زي ما الفيلم بـ يقدم كل شئ أمريكي، فهو كمان
بـ يدين كل شيء أمريكي!

علشان نفهم ده أكثر
لازم نعرف سبب ظهور الكائنات الفضائية، فيه فلاش باك بـ يفتكره كل شوية “جيك
لونرجان” عن الذهب اللي جابه البيت، مراته ترفضه لأنه ملوث بالسرقة والقتل،
فجأة الذهب يتحول لشئ غريب يكسر سقف البيت، تظهر بعدها الكائنات الفضائية تملأ
الدنيا.

في الوقت اللي نشوف
فيه شخصية الكولونيل “ويدرو دولارهيد” المتعصب، ما يطيقش أن ابنه يكون
مع صديقه المكسيكي “نات”، اللي في الأصل رباه “ويدرو
دولارهيد” علشان يكون خادم لابنه، ما يطيقش “دولارهيد” برضه أنه
يتعامل مع الهنود الحمر، حتى في الحرب على الكائنات الفضائية، الهنود الحمر اللي
يتهموا “الرجل الأبيض” –في دلالة للشعب الأمريكي– أنهم السبب في قدوم الشر
أو الكائنات الفضائية.

انتقاد للرأسمالية
اللي قامت عليها أمريكا –الذهب اللي جاء بالشر– بجانب انتقاد للأمريكيين البيض في
فترة من الفترات –يمكن لحد دلوقتي– أنه شعب عنصري، ما يحبش أي حد غيره، يمكن لو
نفتكر التاريخ الأمريكي اللي مش كبير، اللي قام في الأساس على فناء الهنود الحمر.

كل الأسس الأمريكية
سيئة علشان كده كل الشخصيات بـ تحاول تتطهر وتتحرر من خلال الحرب على الكائنات
الفضائية، “دولارهيد” يقف مع الهنود الحمر يد واحدة، يبدأ يتعاطف مع
المكسيكي “نات” صديق ابنه واللي يبدأ يتحرر –بعد فقدانه الذاكرة– فـ
يكون شخص جديد غير الشخص الضعيف المعتمد على والده، “جيك لونرجان” يتطهر
بإبادته للكائنات الفضائية، تحويل جيشه من السارقين لجيش محارب، كمان البنت اللي
بـ تجري وراء “جيك لونرجان” زي ظله في إشارة دينية ما يمكن يقصدها صناع
الفيلم لأنها في مشهد مهم تموت، ترجع ثاني من الموت، يسألوها: “أنت منين
؟”، تقول لهم: “أنا من مكان أعلى من النجوم”، ده بـ يأكده كلام
الواعظ في بداية الفيلم أن النجاة مش هـ تكون غير بالإيمان.

الحقيقة الكلام عن
السيناريو العميق ده هـ يأخذنا بشكل كبير لأننا ننسى أن فيه مخرج متمكن زي جون فافرو
قدر يقدم فيلم جيد الصنع جدًا فيه تحكم كويس بالمجاميع والممثلين، كمان عنصر
المؤثرات الخاصة قدم أفضل ما عنده خاصة مشاهد الحرب بين الأمريكيين والكائنات
الفضائية، لكن ممكن الفيلم يبقى فيه شوية مط في أجزاء بـ يهدأ فيها الإيقاع، كمان
استخدامه للإضاءة الليلية في معظم مشاهده مع الكائنات الفضائية أعطى شوية إحساس بتخبط
المشاهد في تتبع بعض الأحداث لأن التصوير بـ يبقى صعب في أماكن مقفولة أو حتى في
صحراء وبالليل، لكن يفضل سؤال مهم: إذا كان الفيلم كله رموز بالشكل ده، يا ترى
يقصد مين بالكائنات الفضائية؟  

عجبك ؟ جرب

أفلام عن الغرب الأمريكي Dance With Wolves أو أفلام عن الكائنات الفضائية War Of The Worlds.

نصيحة 360

كان من المتوقع أن يلعب بطولة الفيلم ده الممثل الأمريكي روبرت داوني جونيور، خصوصًا أن مخرج الفيلم ده هو جون فافرو وهو نفسه مخرج سلسلة أفلام Iron Man اللي بـ يقوم ببطولتها روبرت، لكنه اعتذر عن المشاركة في الفيلم ده بسبب انشغاله بتصوير الجزء الثاني من فيلم Sherlock Holmes علشان يروح الدور بعدها لدانيال كريج.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح