The Definitive Guide to Living in the Capital , Cairo , Egypt

أفلام
ريجاتا

ريجاتا: الوقوع فى فخ النمطية

  • إلهام شاهينرانيا يوسف...
  • إثارةدراما
  • محمد ساميمحمد سامي...
  • في1 Cinema
تم التقييم بواسطة
Mohamed Hamdy
قيم
قيم الآن
ريجاتا: الوقوع فى فخ النمطية

قبل مشاهدتنا لفيلم "ريجاتا" بوقت قصير، صادفنا على الفيسبوك تعليق من أحد المشاهدين بـ يقول فيه أن الفيلم على الرغم من كونه من إنتاج السبكي، إلا أنه فيلم محترم وقوي ويستحق المشاهدة، يا ريت اللى يعرف اللى قال كده، يقول له أننا فى كايرو 360 ضد رأيه تمامًا… وعندنا أسبابنا.

من تأليف وإخراج محمد سامي بـ نشوف ريجاتا (عمرو سعد) الشاب المعدم اللى بـ يعاني من مشكلة أنه ابن مجهول الأب، اضطرت والدته (إلهام شاهين) أنها تسميه باسمها لعدم وجود أب له، ريجاتا بـ يعيش حياة صعبة، بـ يضطر يشترك فى عمليات ضد القانون مع مجرم كبير (محمود حميده)، كل ده علشان يقدر يستخرج فيزا مزورة إلى إيطاليا، لكن كل أحلامه بالهجرة بـ تنتهي بعد تورطه فى جريمة قتل أخوه.. ثم بـ تستمر الأحداث.

طوال الأحداث بالكامل، من البداية للنهاية تقريبًا، الفيلم بـ يفاجئنا بمجموعة منتقاة ومختارة من الألفاظ الخارجة، والتلميحات الجنسية المنحطة، والمشاهد المبتذلة لرانيا يوسف، تقريبًا كل الجمل الحوارية لمحمود حميده كانت بـ تحتوي على تلميحات جنسية مكشوفة، وعلى الرغم من ذلك إلا أن حميده قدر يقدم دور مختلف ومتميز إلى أقصى درجة، وكان صاحب أفضل أداء تمثيلي فى الفيلم، لدرجة أننا ممكن نتقبل الألفاظ والتلميحات منه دونًا عن باقى المشاركين فى الفيلم، فقط لعبقرية أداؤه!

إلهام شاهين أدائها كان ضعيف، حتى فى مشهد كشف شعرها الصلعاء نتيجة العلاج الكيماوي، المشهد اللى كان المفروض يبكي كل الموجودين فى صالة العرض، واللى تم استعماله بكثافة فى الترويج الدعائى للفيلم، مما أفقد المشاهدين الإحساس بالمفاجأة، المشهد أدته إلهام بضعف شديد.

الموسيقى التصويرية إلى حد ما كانت كويسة، لكن الديكورات كانت سيئة للغاية خصوصًا ديكور منزل محمود حميده اللى ما عكسش الثراء الفاحش اللى وصل له، بالعكس كانت أشبه ما يكون بديكورات المنازل المتواضعة.

عمرو سعد كان أداؤه مبالغ فيه جدًا، وكان عندنا شعور طوال الوقت أنه بـ يمثل مش بـ يتصرف على طبيعته، وكان واضح أنه ما استعدش للدور بشكل كويس، أما أسوأ تمثيل على الإطلاق فكان من نصيب أحمد مالك، اللى مش عارفين إزاى جاء له قلب يشارك فى فيلم زي ده، وبالمستوى التمثيلي ده، بعد مشاركته فى فيلم بحجم "الجزيرة 2" !

"ريجاتا" فيلم متواضع ومتوقع، أفضل ما قدمه لنا هو أداء محمود حميده الأكثر من رائع، أكثر من كده ما تتوقعوش.

عجبك ؟ جرب

فيلم "الألماني".  

نصيحة 360

الفيلم هو ثاني تعاون بين السبكي منتجًا وعمرو سعد ممثلاً، بعد فيلم "حديد".

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح