The Definitive Guide to Living in the Capital , Cairo , Egypt

أفلام

سينمات القاهرة في انتظارك.. دليلك لأفلام موسم عيد الأضحى 2022

أفلام العيد أفلام عيد الأضحى أفلام في السينما سينمات القاهرة موسم عيد الأضحى 2022
سينمات القاهرة في انتظارك.. دليلك لأفلام موسم عيد الأضحى 2022
    بواسطة
    Cairo 360

    دفعة جديدة من الأفلام هتستقبلها السينمات خلال الأيام القليلة الجاية، استعدادًا للمنافسة في موسم أفلام عيد الأضحى 2022، الجميل إن الأفلام مش شبه بعض خالص، وبتتنوع ما بين التاريخي والرومانسي والكوميدي والأكشن.

    ودي قائمة بالأفلام الجديدة اللي هنشوفها في موسم عيد الأضحى 2022.

     

    فيلم “كيرة والجن

    هيتم طرحه في دور العرض السينمائية يوم الخميس 30 يونيو الجاي، أحداثه بتحكي عن الفترة التاريخية من سنة 1919 لـ 1924. وقت المقاومة الوطنية ضد الاستعمار البريطاني، من خلال عرض قصص عمليات بطولية، نفذها أبطال مجهولين، دخلوا في معارك وضحوا بأرواحهم، علشان يوصلوا بمصر للاستقلال.

    بيشارك في بطولة الفيلم النجمين كريم عبد العزيز وأحمد عز، بجانب عدد من النجوم وهم روبي، هند صبري، أحمد مالك، هدى المفتي، علي قاسم، محمد عبد العظيم، تامر نبيل، عارفة عبد الرسول، سيناريو وحوار أحمد مراد، إخراج مروان حامد.

    فيلم “بحبك

    بيعيش النجم تامر حسني قصة حب مع هنا الزاهد، خلال أحداث الفيلم، بجانب وقوعه في مغامرات عاطفية تانية. الفيلم من إنتاج حسام حسني، تأليف وإخراج وبطولة تامر حسني في أول تجاربه الإخراجية، وبيشارك في بطولته: حمدي الميرغني، هدى المفتي، مدحت تيخة، شهد الشاطر، وعالية راشد.

    فيلم “عمهم

    في إطار كوميدي بيجسد محمد إمام شخصية ملاكم، بيشتغل في مركز رياضي، بيتورط مع صديقه في جرائم تزوير أموال، وبتتصاعد الأحداث بشكل تشويقي.

    بيشارك في بطولة “عمهم” عدد من الفنانين منهم محمد لطفي، هدى المفتي، محمد سلام، آيتن عامر، باسم سمرة، محمد ثروت، ونجوم أكتر، تأليف وسام صبري، وإخراج حسين المنباوي.

    فيلم “تسليم أهالي

    زوجين بيحلموا يهاجروا لـ كندا، الزوج بيشتغل طبيب بشري، بتظهر في حياة سيدة بتلاحقة من مكان لمكان، وبتفسد عليه خطته للهجرة مع زوجته.

    الفيلم بطولة دنيا سمير غانم، هشام ماجد، بيومي فؤاد، أحمد فتحي، أوتاكا، عبدالله مشرف، عمرو وهبة، بجانب الفنانة الراحلة دلال عبد العزيز، وكانت صورت مشاهدها في الفيلم قبل مرضها. الفيلم من تأليف شريف نجيب وإخراج خالد الحلفاوي.

    مقترح