The Definitive Guide to Living in the Capital , Cairo , Egypt

  • آسر ياسينعزت العلايلي...
  • إثارة
  • مروان حامد
  • في1 Cinema
تم التقييم بواسطة
Mohamed Hamdy
قيم
قيم الآن
فيلم تراب الماس: هل القتل هو الحل؟

فيلم تراب الماس مستوحى من رواية ناجحة بتحمل نفس الاسم. لكن الفرق بين كتابة رواية بيقراها جمهور له فكر معين وبيتخيلها بطريقة معينة. والمساحة الكبيرة اللي بياخدها الكاتب علشان يطلع كل اللي جواه في روايته، بتختلف تمامًا عن تقديم سيناريو فيلم بيجبر الكاتب أحيانًا على اختصار بعض الأحداث أو إسقاط أحداث تانية. هل نجح القائمين على تراب الماس في تحويل الرواية لفيلم متكامل؟

 

 

الإجابة المختصرة هي: نعم.. لكن بعض تفاصيل السيناريو كان ممكن أختصارها أو أسقاطها بدون الإخلال بسياقالفيلم. لكن أحمد مراد مؤلف الرواية والفيلم كان عاوز يقول كل اللي قاله في الرواية من خلال الفيلم. وده أدى في النهاية لبعض الضعف في تسلسل الأحداث. لكن رغم كده ما حسناش بملل أو ضيق وإحنا بنتفرج على الفيلم.

أحداث الفيلم بتبدأ بآسر ياسين في دور طه الزهار، بيوصل لمنزله اللي بيعيش فيه مع والده القعيد (بيقوم بالدور أحمد كمال) علشان يكتشف أن والده تعرض لاعتداء من مجهول. وبعد ثواني هو كمان بيتعرض لاعتداء ويدخل في غيبوبة.

مع دخول طه في غيبوبه بينقسم الفيلم زمنيًا لاتجاهين. الأتجاه الأول في الماضي بيحكي لنا تتابع الأحداث حتى وصولنا لنقطة الاعتداء. واتجاه ثاني في الحاضر بيحكي لنا إيه اللي بيحصل بعد الاعتداء من خلال بحث طه عن الجاني واكتشافه لماضي والده غير الطبيعي.

على الرغم من أننا أثناء قراءة الرواية أستمتعنا بجزء السرد التاريخي عن محمد نجيب أول رئيس جمهورية لمصر، إلا أننا في الفيلم حسينا أن الكلام عنه مقحم على السيناريو، وإن كان من الأفضل إما إسقاط المنطقة دي بالكامل أو المرور عليها بسرعة زي ما مرينا على فترة النكسة وانتصار أكتوبر وتوحش شركات توظيف الأموال في ظل الأنفتاح. حتى أن الربط بين قصة محمد نجيب في الماضي والحاضر جه في مشهد ضعيف كمكالمة هاتفية بين (شريف مراد) اللي قام بدوره إياد نصار و(محروس برجاس) اللي قام بدوره عزت العلايلي.

على صعيد آخر كانت المنطقة الزمنية اللي بتحكي عن مستقبل الأحداث متألقة جدًا.. أحداث بتتحرك بسرعة وانسيابية، مفاجأت درامية مكتوبة ومتنفذة بذكاء. بالأضافة للمشاهد المتصممة بعناية وكادراتها القوية المميزة.

 

آسر ياسين في دور البطولة قدم أداء تمثيلي متميز، اختيار الملابس الخاصة بشخصيته كمان كان رائع، ولا ننسى له بعض المشاهد زي مشهد نوبة الصرع. ومشهد المستشفى. منة شلبي قدرت تستغل نظراتها وحركة عينيها كويس، كمان مشهد الاغتصاب وما بعد الحادث كان من المشاهد اللي تألقت فيها ببراعة غير عادية.

ماجد الكدواني كان عليه دور مهم وكبير في الفيلم، وهو دور الشر مع لمحة من الكوميديا. قدمهم الكدواني بطريقة  السهل الممتنع اللي أتعودنا منه عليهم.

على الرغم من صغر مساحة شيرين رضا وعزت العلايلي وبيومي فؤاد وصابرين ومحمد ممدوح، إلا أن كل واحد منهم قدم دوره بشكل متميز جدًا، وده يثبت أن الممثل الموهوب بيهتم بتأثير الدور أكتر من اهتمامه بمساحته وحجمه واسمه على الأفيش.

 

على الرغم من توقعاتنا العالية بخصوص موسيقى هشام نزيه لكنه لم يكن في أفضل حالاته من وجهة نظرنا، لكن تصميم الديكورات والمشاهد واستغلال الإضاءة خاصة في مشاهد شقة طه، كلها كانت أمور ناجحة جذبتنا بصريا للفيلم.

تراب الماس خطوة جديدة وقوية من فريق عمل بيحترم اللي بيقدمه للجمهور، وفيلم متعوب عليه على كافة الأصعدة. وننصح بشدة بمشاهدته.

علشان تبقى عارف: تم عرض أحد الأدوار على الفنانة ميرفت أمين لكنها رفضت وقالت أن الدور المطلوب منها لا يليق بتاريخها الفني.

عجبك ؟ جرب

باقي أفلام أحمد مراد ومروان حامد، الفيل الأزرق أو الأصليين

نصيحة 360

كان المفترض أن أحمد حلمي يقوم بدور البطولة لكن حصلت بعض الاختلافات بينه وبين أحمد مراد المؤلف وتقرر تقديم الفيلم بآسر ياسين في دور البطولة.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح