The Definitive Guide to Living in the Capital , Cairo , Egypt

فيلم Berlin, I Love You يعتبر واحد من سلسلة أفلام قصتها الرئيسية بتدور حوالين الحب والرومانسية في مجموعة من المدن حوالين العالم، السلسلة دي بتتعرض تحت أسم Cities of Love وسبق وشوفنا أفلام في السلسلة دي زي Paris, je t’aime و New York, I Love You و Rio, Eu Te Amo وقدرت بشكل أو بآخر تحقق نجاح جيد.

فيلم النهارده Berlin, I Love You بيحكي عن حوالي 10 قصص حب بيربطها رابط واحد، هو إن كلها بتحصل في العاصمة الألمانية برلين، والجميل في القصص دي إن ليها أشكال مختلفة، وبتناقش كتير من قضايا المجتمع اللي ممكن البعض يعتبرها شائكة أو حتى غير قابلة للمناقشة.

لكن من ناحية ثانية، الكلام عن 10 قصص حب مرة واحدة في سياق فيلم، حسسنا في كتير من الأحيان واحنا بنتفرج بالزحمة وعدم القدرة على التركيز في قصة بعينها، وده الطبيعي من سيناريو بيناقش أكتر من قصة في نفس الوقت.

مش بس كده.. برلين كمدينة ألمانية ما ظهرتش في الفيلم بشكل رومانسي عاطفي على الرغم من كل محاولات الفيلم إنه يقدم مشاهد فيها حميمية ورومانسية، إلا إن شعور إن برلين (جامدة) ولا يمكن تقديمها كمدينة قادرة على احتضان قصص الحب والعواطف فضل واضح موجود في الكادرات.

بالنسبة للأداء التمثيلي اللي قدمه الأبطال “كيرا نايتلي” و”هيلين ميرين” و”لوك ويلسون” وكتير غيرهم من أبطال الفيلم فنقدر نقول عليه أداء جيد، ويمكن الأداء الجيد ده هو اللي خلانا نصبر شويه على القصص اللي حسينا إنها مبتورة ومش متوظفة بسيناريو قوي مترابط وقابل للمشاهدة من البداية للنهاية.