The Definitive Guide to Living in the Capital , Cairo , Egypt

حاجات كتير في حياتنا التعبير عنها بيكون صعب بالكلمات أو من خلال الأعمال الدرامية والسينمائية. زي العلاقة المعقدة بين الأصدقاء، وإيه هي الأمور اللي ممكن يعملها الصديق علشان صاحبه، وإيه مستوى التضحية اللي ممكن يقوم بيها علشان صديقه. كل الأمور دي بيناقشها فيلم Blindspotting في إطار بيجمع بين الكوميديا والدراما مع بعض الأكشن.

فيلم Blindspotting بيحكي عن صديقين (كولين ومايلز) واللي بيقوم بدورهم رافايل كاسال و دافيد ديجز واللي بيرتبطوا مع بعض بعلاقة صداقة قوية، ومختلفة عن كتير من علاقات الصداقة اللي شوفناها على الشاشة.

كولين بيتورط في بعض الأعمال الغير قانونية وبيدخل السجن، وقبل انتهاء فترة المراقبة اللي بيخضع لها بعد السجن بثلاث أيام بيبدأ من جديد في التورط في المشاكل بسبب صديقه. المشاكل اللي بتهدد حريته تمامًا.

الأداء التمثيلي في أحداث الفيلم كان هو المحرك الأساسي للأحداث. المخرج كارلوس لوبيز قدر يستغل القدرات التمثيلية لأبطال الفيلم إلى الحد الأقصى علشان يقدموا أفضل ما عندهم، ومش عاوزين ننسى أن رافايل كاسال رصيده السينمائي حوالي خمس أفلام فقط، أما دافيد ديجز قام بأكتر من دور منهم دور بالأداء الصوتي في فيلم Ferdinand المميز والقوي.

إخراج الفيلم للمخرج كارلوس لوبيز استرادا واللي بنشوفه تقريبًا في أول عمل طويل. معظم أفلامه السابقة كانت أفلام قصيرة أو حلقات من مسلسلات، لكن من الواضح أنه مخرج عنده أسلوب إخراجي مميز وعاوز يرسم لنفسه خط واضح. وده كان ظاهر في إخراج بعض المشاهد واللي حسينا أن حركة الكاميرا فيها بتعبر عن أجزاء مهمة من قصة المشهد نفسه. وفي نفس الوقت كان بيقدم الكادرات بشكل غير متكلف أو بطريقة تبان عادية وغير مرهقة للمشاهد العادي اللي مش عاوز يفكر في الأمور دي.

فيلم Blindspotting مش أفضل فيلم شوفناه مؤخرًا لكن في نفس الوقت فيلم جيد وبيقدم جرعة متوازنة من الدراما مع الكوميديا مع الأكشن.