The Definitive Guide to Living in the Capital , Cairo , Egypt

لو سألنا أي شخص عن أهم إنجازات (ستيف جوبز) هتكون إنه قدم لنا الأيفون. لكن الحقيقة إن واحد من إنجازات جوبز التي لا تنسى، إنه كان له الفضل في وجود شركة بيكسار اللي اتحدت اليوم مع ديزني لتقديم Cars 3.

القصة

بنشوف مغامرة جديدة للسيارة ماكوين واللي بيتم استبعادها من عالم السباقات، بعد دخول جيل جديد وسريع جدًا من السيارات، لكن المنافسة مش بتتوقف عند المرحلة دي، بل على العكس بتبدأ لما بيقرر ماكوين أنه يثبت للجميع أنه أفضل سيارة سباق في العالم!

فريق العمل

الفيلم من إخراج بريان في ومن تأليف دانيال جيرسون، والأداء الصوتي لكل من أوين ويلسون وكريستيلا ألونزو مع كريس كوبر وناثان فيليون وﻻري كابل جاي.

الأداء التمثيلي

الأداء التمثيلي كان متذبذب من وجهة نظرنا مابين القوة والضعف، وعند مرحلة معينة (خاصة النصف الأول من الأحداث) حسينا أن المؤديين بيقروا من الأوراق الموجودة أمامهم بدون أي روح أو إحساس بالكلام. لكن مع سخونة الأحداث في النصف الثاني من الفيلم بدأت الأمور تختلف وبدأنا نحس بالروح بتدب في أحداث الفيلم.

السيناريو والحوار والإخراج

سيناريو الفيلم كان ممل في الجزء الأول من الأحداث وحسينا إنه استغرق وقت طويل علشان نبدأ نخش في صلب الأحداث، لكن مع بداية النصف الثاني منها بدأت الأحداث في التطور وبدأنا في الانسجام بالتدريج.

أما الحوار فكان عليه العبء كله علشان نفهم الأحداث وعلشان نضحك مع الجرعة الكوميدية المميزة اللي بيقدمها الفيلم، أما الإخراج فركز في المقام الأول على المشاعر الإنسانية وعلى تقريبنا أكتر وأكتر من عالم السيارات بشكل فكرنا بالجزء الأول من الأحداث.

الرسومات والموسيقى والتحريك

موسيقى الفيلم كانت متوسطة، لكن جودة الرسومات والتحريك كانت أكثر من رائعة، خصوصًا الطريقة والتقنية اللي أتحركت بيها السيارات على الشاشة، كلها عوامل جعلتنا نشعر بالإنبهار من اللحظة الأولى، وخاصة في مشاهد السباقات واللي حسينا إنها حقيقية بالفعل!

الخلاصة

الجزء الثالث من Cars أشبه ما يكون بالجزء الأول، وبيركز في المقام الأول على العلاقات الإنسانية والمشاعر العاطفية.

علشان تبقى عارف:

تقييم الفيلم على موقع imdb 7.1 من 10 وشارك في الاستطلاع حوالي 15 ألف مستخدم للموقع.