The Definitive Guide to Living in the Capital , Cairo , Egypt

من كُتر أفلام الرعب اللي شوفناها في حياتنا، أصبحنا بنحس إن كل اللي محتاجينه هو كاميرا كويسة وفريق خدع سينمائية علشان نعمل فيلمنا الخاص. واللي بلا شك هيكون أفضل من فيلم Demonic، اللي حسينا بعد مشاهدته إنه فيلم فاقد لبوصلته تمامًا.

فيلم الرعب علشان نقدر نسميه فيلم رعب، لازم يكون له خيط معين ماشي عليه، أو بوصلة بتحدد له الاتجاه. يعني مثلًا فيه أفلام عن الأشباح، أو أفلام عن القوى الخارقة، أو عن الأماكن المسكونة.. الخ. فيلم Demonic حاول يلعب على أكتر من تيمة من التيمات دي. لكن – وبكل جدارة – فشل أنه يمسك في واحدة منهم ويركز معاها للنهاية.

فيلم Demonic بيحكي عن شابة لها ماضي عنيف، بتحاول تهرب منه (قامت بالدور كارلي بوب). والماضي ده دمر علاقتها بوالدتها تمامًا. وخلاها ماتعرفش عنها أي خبر لسنوات طويلة.

لكن اتصال مفاجئ بعد السنين دي كلها من المستشفى اللى بتتعالج فيها الأم، بيطلب منها الحضور فورًا علشان حالتها الصحية وصلت للنهاية. وعندها كلام أخير عاوزه تقوله لبنتها.

كنا متوقعين، بناء على الأحداث، إن القصة ماشيه معانا في اتجاه الأماكن المسكونة، أو الأرواح الشريرة اللي بتسيطر على الناس وترغمهم على عمل حاجات عكس إرادتهم. لكن صناع Demonic كان عندهم رأي تاني. مش هنقوله علشان مانحرقش الأحدث، لكن باختصار لقينا نفسنا في تيمة تانيه أشبه بتيمة فيلم Inception.

كان ممكن نبلع كل اللخبطة دي، لو قدم لنا الفيلم التعويض البصري المناسب، ونقصد هنا الخدع السينمائية، واللي كان مستواها هو كمان ضعيف جدًا، لدرجة أن شكل الوحش اللي بيظهر في الفيلم كان مثير للرثاء والضحك أكتر من إثارته للرعب بالمرة. وحتى تخفيض الإضاءة وتسريع المشاهد فشلوا في تحسين فقر المؤثرات البصرية تمامًا.

حط كل ده جنبا الى جنب مع ضعف تمثيل كارلي بوب وباقي أبطال الفيلم، واللي الـ (ريأكشنات) بتاعتهم كانت محتاجه تحسين جذري.

الخلاصة إن فيلم Demonic للأسف الشديد كان مهزلة سينمائية اتعملت باستسهال. نعتقد أن صناعه هيندموا على وجوده في الفيلموجرافيا بتاعتهم.