The Definitive Guide to Living in the Capital , Cairo , Egypt

لما نتكلم عن السويد، معظمنا هييجي في باله إنها مدينة الثروة والرخاء والحياة البسيطة المرفهة، لكن المخرج والمؤلف “آري آستر” قرر يقدم لنا وجه مختلف للسويد.. وجه مرعب.

فيلم Midsommar بيحكي عن “داني” اللي بتقوم بدورها “فلورنس بوغ” واللي بيحصل لها مأساة عائلية ضخمة، وبعدها بتقرر تسافر للسويد مع مجموعة من أصدقائها علشان تحضر مهرجان بيتعمل مرة كل ٩٠ سنة! المهرجان اللي المفروض يغير حياة الجميع للأحسن، لكن “داني” وأصدقائها هيكتشفوا إنه المهرجان ده مجرد واجهة لأعمال سحرية بتمارسها طائفة غريبة، وبتستمر الأحداث مع حالة من الغموض والإثارة.

مش غريب على المخرج والمؤلف “آري آستر” إنه يقدم الحالة دي من الغموض الممزوج بالرعب في أفلامه، ونفتكر إنه سبق وقدم تجربة مشابهة في فيلم Hereditary لكن هنا بنشوف مستوى وأسلوب مختلف شوية في الرعب.

المختلف المرة دي إن الأحداث المرعبة مش بتحصل بالليل زي معظم أفلام الرعب، بالعكس بنشوف المشاهد المخيفة بتحصل بالنهار عادي، وفي مشاهد كلها ألوان وبهجة، وده مزيج مش هيعجب محبي أفلام الرعب التقليدية، لكن الناس اللي زهقت من أفلام الرعب التقليدية هتشوف في الفيلم تجربة مختلفة وتستحق المشاهدة.

“فلورنس بوغ” قدمت دور جيد جدًا، ودي من المرات النادرة اللي نقدر نحكم على تمثيل الأبطال من أدائهم في فيلم مرعب، لإن زي ما قولنا الرعب هنا مختلف، وبيدي مساحة للأبطال علشان يقدموا أداء تمثلي قوي نقدر نفتكرهم بيه.

فيلم Midsommar هيبقى فيلم مناسب لو كنتم بتدوروا على فيلم رعب مختلف، بيدور في أجواء مختلفة، لكن في نفس الوقت لازم يكون عندكم القدر الكافي من الصبر على أحداث بتستوي على نار هادية، لمدة ساعتين ونصف، وبعيدة عن الرتم السريع المعتاد لأفلام الرعب.