The Definitive Guide to Living in the Capital , Cairo , Egypt

  • توم كروزسايمون بيج...
  • حركة ومغامرات
  • كريستوفر ماكواري
  • في1 Cinema
تم التقييم بواسطة
Mohammed Sabry
قيم
قيم الآن
فيلم Mission: Impossible – Fallout: حبس أنفاس لحد آخر لحظة

عارف لما تحب نجم معين، وتحب الدور اللي بيلعبه في سلسلة أفلام روعة، وتكون مستني بفارغ الصبر الجزء الجديد منها، ولما تشوفه تنبسط؟ أهو ده بالظبط اللي حصل لنا لما شوفنا النجم “توم كروز” في الجزء السادس من سلسلة “Mission Impossible”. وبيتعرض بعنوان “Fallout”.

 

 

بعد ما إيثان هانت “توم كروز” قبض على سولومان لين “شون هاريس” في الجزء الخامس. بتبدأ أحداث الفيلم بإن باقي أعضاء المنظمة اللي كان بيرأسها سولومان، كونوا جماعة إرهابية جديدة. والمفروض إنهم هيشتروا البلوتونيوم الخاص بـ 3 قنابل نووية، ويبيعوه لشخص مجهول اسمه “جون لارك”. ودور إيثان إنه يمنع العملية دي، لكنه بيفشل. ومن هنا بيبدأ هو وفريقه مهمة البحث عن البلوتونيوم المسروق.

 

 

طبعًا القصة مش جديدة، كعادة السلسلة فيه قنبلة أو صاروخ أو مرض خطير بيهدد العالم. وأكيد إيثان وفريقه هم اللي بيعملوا المستحيل، علشان يسيطروا على الخطر. لكن على صعيد تاني الفيلم فعلًا كان شادد انتباهنا وتركيزنا لحد آخر لحظة. أحداث كلها متشابكة، ظهور مفاجيء لشخصيات بتغير مجرى الأحداث. وشكوك مستمرة في شخصيات تانية، يا ترى هي الخير ولا الشر؟

مشاهد الأكشن والمطاردات كانت بتحبس الأنفاس. توتر وشدة أعصاب مع كل مشهد، بيخلوك تتفاعل مع الأبطال. المخرج “كريستوفر مكواري”  قدم لنا جرعة متكاملة من مطاردات العربيات والموتوسيكلات وكمان طيارات الهيليكوبتر، خليتنا خارجين من الفيلم كلنا منبهرين. “مكواري” هو برضه اللي أخرج “Rogue Nation” الجزء الخامس من السلسلة.

 

 

“توم كروز” ده حقيقي مابقيناش عارفين نقول عليه إيه ولا إيه. ده الرجل الخارق. فعلًا بيتغلب على نفسه مع كل فيلم. وكل مرة بينفذ مشاهد أخطر من اللي قبلها، وبيثبت إن السن ده مجرد رقم. خلاص بقى عادي تشوفه متشعلق في طيارة، أو بينط منها. أو بيطلع مبنى عالي زي ما عمل في الجزء الرابع وطلع برج خليفة.

 

 

“هنري كافل” اللي أول مرة يظهر في السلسلة، بيلعب دور عميل الـ CIA أوجست ووكر. وبينضم لفريق إيثان هانت علشان يراقب كل خطوة بينفذها. بعد ما فشل في مهمة استرجاع البلوتونيوم في أول مرة. “كافل” قدم شخصية العميل الصارم والمندفع في تنفيذ المهام، اللي صعب تعرف نواياه. ويخليك ماتقدرش تتوقع هيعمل إيه الخطوة اللي جاية. ودوره في الفيلم سبب زيادة يخلينا نحبه أكتر وأكتر.

 

 

بنشوف برضه شخصيات من الأجزاء اللي فاتت راجعة تاني، زي لوثر “فينج راميس”، وإيلسا “ريبيكا فيرجوسون”، طبعًا مانقدرش ننسى بنجي “سايمون بيج”. اللي قدم جرعته المعتادة من الكوميديا في الفيلم. بالإضافة لشخصيات جديدة منها زي ما قولنا أوجست ووكر “هنري كافل”، أنجيلا باسيت “إيريكا سلون”، وفانيسا كيربي “وايت ويدو”.

لو متابع السلسلة أو لأ، فيلم Mission – Impossible: Fallout هيعجبك جدًا، خصوصًا لو عايز تشوف فيلم يبسطك ويغير مودك للأحسن. زي ما حصل معانا.

عجبك ؟ جرب

باقي السلسلة – The Man from U.N.C.L.E. – Casino Royale – Jack Reacher

نصيحة 360

الفيلم هو ثالث تعاون بين المخرج كريستوفر مكواري وتوم كروز، بعد " Mission: Impossible - Rogue Nation" و"Jack Reacher".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح