The Definitive Guide to Living in the Capital , Cairo , Egypt

من فترة طويلة ماشوفناش فيلم أنيميشن قوي ويستحق الاهتمام وقادر على إثارة انتباهنا وضحكاتنا في نفس الوقت. لكن هل قدر فيلم Monster Family إنه يوصلنا للحالة دي فعلًا؟ ده اللي هنعرفه مع بعض من خلال مقالنا عن الفيلم.

القصة

الفيلم بيحكي عن أسرة صغيرة بتحاول واحدة من أفرادها (إيما) أنها تعيد التواصل بين أفرادها من جديد وتنشر بينهم السعادة وتخليهم أسرة سعيدة، لكن كل مخططاتها بتنتهي لما بتحل على الأسرة لعنة بتحولهم لوحوش شكلها شرير. هل هتقدر الأسرة تتخلص من اللعنة وترجع الحب بين أفرادها تاني؟ هو ده اللي بنتابعه مع بعض.

فريق العمل

الفيلم من تأليف ماثياس بارشتكا وكريستي فالكوس ومن إخراج  هولجر تابي وبطولة إميلي واتسون  وجايسون إيزاك ونيك فروست وجيسيكا براون فيندالي وسيليا إمري.

الأداء الصوتي

لازم نشيد بالأداء الصوتي لكل أبطال الفيلم، وعلى رأسهم إيميلي واتسون واللي قامت بدور إيما، واللي كان أدائها الصوتي مميز إلى أقصى حد، على الرغم من نوعية الأفلام المختلفة اللي بتشارك فيها في الوقت العادي. لكن يبدو أن نجاح تجربتها في فيلمنا شجعتها على المشاركة في أفلام أنيميشن تانية هيتم عرضها قريبًا.

السيناريو والحوار والإخراج

سيناريو الفيلم اعتمد على المواقف الكوميدية أكتر من اعتماده على الإيفيهات المضحكة ودي حاجة تحسب للفيلم وصناعه، لكن مانقدرش نغفل أن الحوار في الفيلم وقع عليه أكتر من عبء الكوميديا فقط، لكن كمان توصيل رسالة الفيلم وهي ضرورة أننا نبحث عن السعادة ونصنع في محيط أسرتنا حالة من الحب والسعادة.

إخراج الفيلم وعلى الرغم من مجهوده لكن من الواضح أنه كان بيقوم باللي عليه بدون شغف زائد أو حب أن الفيلم يخرج كعمل قوي ومتماسك، وعلى الرغم من عدم تأثير ده على الفيلم في صورته النهائية لكنه سرب عندنا كمشاهدين إحساس أننا بنتفرج على فيلم نمطي وغير استثنائي.

التحريك والموسيقى والخدع

تحريك الشخصيات الأساسية في الفيلم كان جيد، وسلسل وبعيد عن الملل، على الرغم من بعض البطء في بعض المشاهد لكن النتيجة النهائية كانت جيدة، وكان فيه اهتمام بالتفاصيل الصغيرة وباستخدام الرسامين لقدراتهم لتقديم متعة بصرية، لكن الخدع والمؤثرات الخاصة كانت محتاجة تكون أكثر تنويعًا وأكثر قوة من اللي شوفناها في النهاية على الشاشة، كمان الموسيقى التصويرية للفيلم كانت غير مؤثرة إطلاقها وحسينا أنها كانت محتاجة تكون أقوى وأفضل.

الخلاصة

فيلم Monster Family مش أحسن فيلم أنيميشن شوفناه مؤخرًا، لكنه تجربة جيدة تستحق المشاهدة وننصح بيها كل اللي عندهم أطفال صغيرة بتحب تتفرج على أفلام الأنيميشن.

علشان تبقى عارف:

الفيلم بيعرض تحت اسم أخر هو Happy Family