The Definitive Guide to Living in the Capital , Cairo , Egypt

أفلام
Once Upon a Time in… Hollywood

فيلم Once Upon a Time in Hollywood: هوليود بعيون كوينتن تارانتينو

Once Upon a Time in Hollywood براد بيت كوينتن تارانتينو ليوناردو ديكابريو مارجوت روبي
  • براد بتليوناردو دي كابريو...
  • دراما
  • كوينتن تارانتينو
تم التقييم بواسطة
Mohamed Hamdy
قيم
قيم الآن
فيلم Once Upon a Time in Hollywood: هوليود بعيون كوينتن تارانتينو

لما تكون قدام فيلم من بطولة “ليوناردو ديكابريو” و “براد بيت “و”مارجوت روبي” لكن كل الاهتمام يكون منصب على مخرج الفيلم، يبقى إحنا أكيد قدام فيلم من إخراج “كوينتن تارانتينو” اللي نصه عبقري ونصه مجنون، واللي قرر يغير قواعد الكتابة والإخراج في السينما.

وبما إننا بنتكلم عن فيلم لتارانتينو، فلازم نبقى فاهمين إن اللي ينطبق على الفيلم من حيث قواعد كتابة السيناريو والقصة مش هاينفع ينطبق على Once Upon a Time in Hollywood وهو ده فعلاً اللي شوفناه، وأول الخروج عن القواعد دي كان إن الأحداث مش ماشية بترتيب متسق مع القصة.

Once Upon a Time in Hollywood  مقسوم لقصتين أساسيتين، بيتقاطعوا مع بعضهم، وبيجمعهم إن كلها بتحصل في كواليس عالم صناعة السينما، القصة الأولى لممثل كان مشهور وبدأت شهرته تقل (ليوناردو ديكابريو) والتفاعل اللي بينه وبين صديقه ودوبليره الخاص (براد بت) واللي بيدخل في قصة تانية مع مجموعة من الهيبيز اللي كانوا منتشرين في السبعينات والثمانينيات، واللي أشتركوا في قتل الممثلة المشهورة شارون تيت (مارجوت روبي) كل ده وسط استعراض للحياة والعمل في هوليود في فترة السبعينيات وكواليس أفلامها وممثليها.

تارانتينو بيمارس في Once Upon a Time in Hollywood كل هواياته المشهور بيها تقريبًا، القصة بتتحكي من خلال مشاهد من كل قصة لواحدها، بدون ما نكون فاهمين الرابط بين كل قصة والتانية، لحد ما يتم الجمع بين القصص كلها في مشهد نهائي، ده غير المشهد الدموي اللي بنشوفه مع اقتراب أحداث النهاية.

الحوارات الطويلة اللي مش لازم يبقى ليها علاقة بالقصة، والتلاعب بالتاريخ، وعدم الاهتمام بسرد الحقيقة في الفيلم، كل ده هيعجبك لو كنت من مجبي مدرسة تارنتينو في الإخراج، لكن لو كانت دي أول مرة تتفرج فيها على فيلم من إخراج تارانتينو، فهتحس إنه إنضحك عليك! وإن الفيلم مفكك ومش مترابط، وإن حتى الأداء التمثيلي للأبطال الكبار في الفيلم مش زي ما متعودين عليه في الأفلام السابقة لهم، وهو ده اللي حسينا بيه فعلًا من بعض المشاهدين في سينما آيماكس اللي كانوا مستغربين من اللي بيشوفوه، وده لإنهم مش متعودين على الأسلوب ده في الأفلام، خاصةً إن الفيلم مايستحقش المشاهدة بتقنية الآيماكس لأننا مش بنشوف مشاهد أكشن وحركة كتير في الفيلم.

وبرغم إن بنت الممثل وبطل الأعمال القتالية “بروس لي” – شانون لي- كانت من الناس اللي اتضايقت من الفيلم، وأعلنت عن استيائها من الطريقة اللي تم تجسيد شخصية والدها بيها في الفيلم، لكن يفضل Once Upon a Time in Hollywood استمرار لسلسلة أعمال واحد من أكثر مخرجين هوليوود جنونًا.

علشان تبقى عارف.. تقييم الفيلم على موقع IMDb هو 8.1 من 10.

عجبك ؟ جرب

باقي أفلام كوينتن تارانتينو زي pulp fiction

نصيحة 360

ننصح بمشاهدته بس للناس المهووسة بـ "تارانتينو" لكن بلاش ده يكون أول فيلم تشوفه لو لسه بتستكشف عالم تارانتينو الفني .

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح