The Definitive Guide to Living in the Capital , Cairo , Egypt

حالة من المتعة شعرنا بيها وإحنا بنتفرج على الجزء الأول من سلسلة أفلام Paddington، وبصراحة ومع نهاية أحداث الجزء الأول كنا بنحسب أن النجاح كان حليف صناع الفيلم لمرة واحدة فقط وأن الفيلم الجميل ده صعب يتكرر  تاني، لكن مع مشاهدة أحداث الجزء الثاني تأكد لنا أن النجاح مش وليد الصدفة. تعالوا نتعرف أكتر على الجزء الثاني من Paddington.

القصة

الفيلم بيحكي عن الدب العجيب بادينجتون واللي بيعيش حياة سعيدة ومستقرة، وبيحقق شهرة في المجتمع المحلي اللي عايش فيه، لكنه بيضطر يتورط في مجموعة من الوظائف التافهة والكوميدية في نفس الوقت علشان يقدر يشتري هدية قيمة وغالية في نفس الوقت.

فريق العمل

الفيلم من إخراج بول كينج ومن تأليف جون كروكر اقتباسًا عن الشخصية اللي ابتكرها مايكل بوند، أما بطولة الفيلم فكانت لـ إميلدا ستونتون وهيو بونفيل وسالي هوكينز وجيم برودبنت وجولي والترز  وبن وشو.

الأداء التمثيلي

الأداء التمثيلي لأبطال الفيلم كان قوي ومتميز إلى أقصى درجة، خصوصًا قدرة الممثلين على توصيل مشاعرهم لنا والمواقف الكوميدية اللي كانت معتمدة على حبكة الموقف نفسه بأكتر من اعتمادها على الإيفيهات والجمل الكوميدية.

السيناريو والحوار والإخراج

سيناريو الفيلم كان واضح ومباشر وأشبه ما يكون بالاسكتشات الكوميدية المتفرقة واللي في إجمالها بتقدم لنا فيلم قوي ومميز ويستحق إننا نشاهده، وكل ده بسبب الإخراج اللي قدر يوازن بين المغامرة والكوميديا بدون ما يطغى أي جانب فيها على الآخر.

الديكورات والموسيقى والأزياء

ديكورات الفيلم كانت جميلة إلى أقصى درجة، وعجبنا تدرجات الألوان في كتير من المشاهد وتقديم مجموعة من الألوان الساخنة في كتير من الكادرات، وبشكل جعل عيوننا تشعر بالسعادة والنشوة، كمان الأزياء كانت مميزة وجميلة وتكاملت مع الموسيقى التصويرية علشان تقدم في النهاية تجربة بصرية وسمعية جميلة.

الخلاصة

فيلم Paddington 2 مليء بالكوميديا والبهجة وبننصح الجميع من كل الأعمار بمشاهدته.

علشان تبقى عارف:

المخرج باول كينج مخرج الفيلم اعتذر عن إخراج فيلم Wonder علشان يتفرغ لإخراج الفيلم ده.